صفحة 1 من 4 123 ... الأخيرةالأخيرة
النتائج 1 إلى 10 من 36

الموضوع: أمسية عصام كابو الرمضانية

  1. #1
    Tetris Champion!
    تاريخ التسجيل
    May 2004
    الدولة
    القاهرة
    العمر
    49
    المشاركات
    8,981

    Icon18 أمسية عصام كابو الرمضانية

    [frame="9 80"]
    أمسية جديدة من أمسيات أبناء مصر الرمضانية و ضيفنا اليوم

    عصام كابو




    السلام عليكم و رحمة الله وبكراته
    اهلاً و مرحباً بك أخي العزيز عصام و كل سنة و انت طيب و رمضان كريم
    و سعيدة بتواجدك معنا في امسيتنا الرمضانية و يا رب دايما متجمعين في الخير

    و عليكم السلام و رحمة الله وبركاته
    اهلا بيكى يا ريهام... كل سنة و انت و جميع اعضاء منتدانا الغالى بخير و صحة و سعادة... و ربنا يعود علينا جميعا هذه الايام المباركة بالخير و البركة.. اللهم آمين





    و نبدأ معك اللقاء علي بركة الله

    فى البداية اود ان اشكرك على دعوتك الكريمة لهذه الامسية الرمضانية و التى تشرفت بها... و يا رب اكون ضيف خفيف على الاعضاء الكرام...
    و اتفضلى إسألى يا فندم انا تحت أمرك



    1- لرمضان ذكريات متعددة لدينا جميعاً منها ما يرجع للماضي و الحاضر يا تري ما هي أجمل ذكريات رمضان عند عصام كابو؟

    بصى بقى يا ريهام

    شهر رمضان له فى ذاكرتى العديد و العديد من الذكريات الجميلة و بالذات فى مرحلة الصغر
    طبعا الفانوس له معايا صولات و جولات و كان لازم كل سنة والدى يشترى لى فانوس جديد و كنا انا و اصدقائى نتجمع مع بعض بعد الافطارو كل واحد معاه فانوس شكله مختلف..... و طبعا ما ننساش اهم حاجة و هو اننا نفرقع البمب و الذى منه من وسائل الازعاج هههههههههههههه

    كمان لا انسى ان رمضان ايام الدراسة كان بييجى فى الاجازة الصيفية (فى عز الحر... ههههههههه) و كنا دايما انا و اصدقائى لنا طقوس سنوية... كنا مثلا لازم نعلق الزينة فى الشارع اللى احنا ساكنين فيه و كنا بنعتمد على مجهوداتنا الذاتية فى قص اوراق الكتب و الكشاكيل القديمة و نعمل اشكال كثيرة جدا... و نبدأ نلصقها فى الاحبال عن طريق مادة لاصقة مخصوصة.. نصنعها بانفسنا من النشا... و بعد كده نبدا فى تعليقها و احنا فى منتهى السعادة.... و طبعاً ما ننساش الجامع اللى بيتعلق فى وسط هذه الزينة و كنا بنعمله من الصناديق الكرتون
    و كنا كمان بمجهوداتنا الذاتية (قصدى مجهودات اباءنا الذاتية هههههههه) لازم نشترى لمبات و اسلاك لعمل الاضاءة اللازمة..
    و كل ده كان بيتم قبل حلول الشهر الفضيل بكام يوم... و مش قادر اوصف لك مدى السعادة اللى كنا بنشعر بيها انا و اصدقائى......... يااااااااااااه كانت ايام جميلة جدا
    و طبعا كنا لازم نتجمع بعد الافطار و نقضى الليل كله فى لعب الكورة.. حتى موعد السحور.........إفترا بقى و ناس فاضيه... ههههههههه.

    اما بقى فى الوقت الحاضر.. فإن متعتى الكبيرة هى شراء الفوانيس لأطفالى الصغار ياسمين و يوسف... و أكون فى منتهى السعادة لما بشوفهم فرحانين بالفوانيس.... و كمان دايما اشترى فانوس مخصوص و اعلقه فى بلكونة المنزل فى محاولة لتذكر الماضى ههههههههههه
    كمان بقضى معظم الوقت فى التعبد و قراءة القرآن... و طبعا دلوقتى بقى عندى مشكلة صغيرة و هو اننى فى اوقات كتيرة اكون فى العمل اثناء الافطار... فاضطر لاختلاس القليل من الوقت للافطار... و كم من المرات اضطررت للافطار بعد اذان المغرب بوقت طويل لانشغالى فى العمل... بس الحمد لله... لان الواحد بيشعر ان ما يقوم به هو شئ فى غاية الاهمية و ان ما يفعله لا يضيع سدى... و الاجر عند الله



    2- سؤالنا إلي دكتور عصام الآن يا ريت تكلمنا عن تخصصك في الطب و سبب إختيارك لهذا التخصص؟ و هل كانت مهنة الطب حلمك منذ الصغر؟؟

    انا تخصصى هو امراض القلب... و هو تخصص جميل على الرغم من تعرض من يعمل فيه لتوتر عصبى شديد.... و عملى معظمه فى الرعاية المركزة و مش عايز ادخل فى تفاصيل قد تكون مملة... بس هذا التخصص ممتع جدا لانك قد تنقذين حياة انسان يكون وشك التعرض لفقدان حياته فى لحظات قليلة.
    اما بقى عن حلم العمل كطبيب.. فهو فعلا كان موجود عندى منذ الصغر و كنت دايما باحلم بكونى طبيب و الحمد لله ان ربنا حقق لى ما تمنيته.



    3- عند تصفحي لمواضيعك في المنتدي وجدت 80% منها في قاعة الرياضة ..
    إلهذه الدرجة تحتل الرياضة هذه النسبة في حياة عصام كابو؟؟ و ما هي رياضتك المفضلة؟ و هل تمارس أي نوع من أنواع الرياضة؟؟

    عندك حق يا ريهام.. فعلا الرياضة تشغل حيز كبيرا من تفكيرى و بالذات كرة القدم... فانا مشجع اهلاوى صميم
    بس بصراحة فى الوقت الحالى انا لا امارس الرياضة... علشان مفيش وقت خالص.. بس هذا لا يمنع من ممارسة بعض الرياضات العنيفة جداااااااااا مثل الشطرنج و البلياردو كلما سمح الوقت هههههههههه



    4- يقال ان كل طبيب يحلم بـ : (خمسة "ع") ما رأيك في هذه المقولة؟
    و بماذا يحلم عصام كابو؟؟؟

    هههههههههههههه
    طبعا الخمسة عين هم
    1-عربية
    2-عروسة
    3-عيادة
    4-عمارة
    5-عزبة
    بس مين فى الزمن ده يقدر يحقق كل ده؟؟
    طبعا دى مقولة قد تعتبر نوع من الهزار.. لان بصراحة الدنيا بقت صعبة و مش سهل الواحد يحقق كل الكلام ده
    بس اهم حاجة بقى الصحة و الستر و راحة البال
    بس بينى و بينك..... يا ريت الواحد يحقق 10 عين مش 5 بس.... يعنى من كل حاجة اتنين
    بس اوعى حد يقول لزوجتى الكلام ده هههههههههههههههه

    اما انا بحلم بس ان ربنا يوفقنى فى تربية اولادى و اشوفهم احسن منى و ناجحين فى حياتهم وسعداء..... بل و يكونوا اسعد من فى الارض.



    5- في توقيع عصام كابو "عليك ان تفخر انك أهلاوي"
    التعصب ما هو حجمه لدي عصام كابو؟؟ و هل التعصب يكون في الرياضة فقط؟؟ ام يمتد لبقية الحياة؟

    ههههههههههههههه
    هو انا لما اكون فخور انى اهلاوى معنى كده انى متعصب؟؟

    طيب انا عايز اقول حاجة صغيرة.. هو دايما الناس بيقولوا التعصب شئ مش كويس و الكلام ده

    بس انا فى رأيى انه يجب التفرقة بين التعصب السيئ و شدة الانتماء

    الانتماء.... قد يكون لنادى او الوطن او حتى للشارع اللى نسكن فيه
    اما بقى التعصب السيئ..... فهو الذى يلحق الأذى أو الضرر بالاخرين

    يعنى مثلا قد يكون الشخص اهلاوى متعصب و يتسبب بتعصبه فى أذى او إساءة (سواء بكلام او افعال) لزمالكاوى مثلا......... و العكس صحيح

    و هذا لم و لن يحدث منى ان شاء الله و إسألوا صديقى و اخويا "حسام عمر" كبير الزمالكاوية فى المنتدى... اللى انا و هو دايما نناقر فى بعض بكلام فى منتهى خفة الدم و عمر ما حد مننا زعل من التانى

    انا من رأيي.....من حقك ان تتعصب لفريقك بس بشرط الا تسيئ للفريق الاخر ولا لمن ينتمى اليه

    قيسى بقى على كده كل شئ فى الحياة

    فاذا تم تصنيفى على اننى متعصب فانا افخر اننى
    متعصب لدينى
    متعصب لبلدى
    متعصب لوالدى و والدتى
    متعصب لزوجتى
    متعصب لأولادى



    6- ما هو تقييمك لأحوال المنتدي عامة و قاعة الرياضة خاصة؟ و ما هي إقتراحاتك بشأنهما؟؟

    جينا بقى لنقطة مهمة
    احب او اؤكد ان منتدى ابناء مصر يمثل لى جزء فى غاية الاهمية فى حياتى و بالذات بعد سفرى و تواجدى خارج مصر... و اصبحت لا استطيع الاستغناء عنه مطلقاً .... كما اننى ارتبطت بصداقات فيه مع ناس كثير جداً... و الغريب اننى لم أرى معظمهم حتى الان و لكننى اشعر كأننى اراهم و اعرفهم من زمان.

    و رايى بصراحة و بدون مجاملة ان هذا المنتدى هو فاكهة المنتديات و لا يوجد له مثيل من حيث ترابط أعضاءه و حبهم فى الله لبعضهم البعض
    و يزيد من قوته تواجد الاعضاء من العيار الثقيل الذي هو من النادر تواجدهم و تجمعهم فى مكان واحد

    بس اكتر حاجة مضايقانى هو اختفاء بعض الاعضاء القدامى المهمين و المحبوبين لنا جميعا
    اذكر منهم على سبيل المثال و ارجو الا تخوننى الذاكرة
    احمد ناصر- بنت مصر- نوسه- عصفور الشعر- ماما زوزو- دراجون شادو- الصاعق

    بالنسبة لقاعة الرياضة.. فاكثر شئ لا يعجبنى فيها هو ان معظم الموضوعات المكتوبة فيها اما موضوعات منقولة او اخبار...
    و الموضوعات المكتوبة بواسطة الاعضاء نفسهم قليلة للغاية و انا عن نفسى احاول قدر الامكان ان اقوم بعمل موضوعات من اجتهادى الخاص... و ارجو ان يكون ذلك هو سمة القاعة.

    و ان كان لى بعض الاقتراحات على سبيل المثال:

    مثلا شاهدت مرة فى احد المنتديات.... انه تحت الاسم و الصورة الرمزية لكل عضو يوجد مساحة مخصصة لوضع لينكات لموضعات خاصة بالعضو... يعتبرها العضو موضوعات مميزة بالنسبة له و هى تكون بمثابة الدعاية لموضوعاته.... هذا مثلا قد يساهم فى زيادة المشاركات.. كما انها تلفت انتباهنا الى بعض الموضوعات التى قد نسهو عنها فى وسط هذا الكم الكثير من الموضوعات فى كافة القاعات

    بالنسبة لقاعة الرياضة
    ما اسهل ان تقام فيها مواضيع المسابقات و الالغاز نظرا لطبيعة القاعة المميزة... و تكون لها جوائز من تقييمات و لوحات شرف و ميداليات تمنح للأعضاء الفائزين...
    تلك الاشياء لها قد يكون لها اثر كبير فى زيادة الاقبال على القاعة و زيادة النشاط و المشاركات فيها.



    7- اوصف لنا يوم من أيام رمضان في حياتك

    بصراحة السؤال ده صعب شويه...
    لانه من الصعب على القيام بكل شئ فى كل يوم... لان كل الايام فى رمضان مختلفة بالنسبة الى نظرا لعدم ثبات مواعيد العمل.... فقد افطر فى يوم ما بالبيت و يوم اخر قد افطر فى العمل...
    ايضا من المكن ان اصلى الفجر فى المسجد فى يوم... و يوم اخر قد اكون منهمكا فى العمل اثناء الصلاة و هكذا...
    لكن الشئ المؤكد.... هو ان التعبد و قراءة القرآن هو الحاجة الوحيدة اللى بتتكرر يومياً... لكن فى مواعيد مختلفة.



    8- من ملفك أري انك مقيم في الكويت... يا تري هل يوجد إختلاف بين رمضان في مصر عن الكويت ؟؟

    اختلاف السما و الارض يا ريهام... لا وجه للمقارنة على الاطلاق


    ماذا يعجبك هناك عن مصر و العكس في هذا الشهر الكريم؟

    بدون تحيز لبلدى و بدون اى مبالغة
    شهر رمضان فى مصر افضل من هنا بمراحل.. بل و اكاد اجزم انه لا يوجد مثيل له فى اى مكان فى العالم.

    فى مصر نشعر برمضان قبل الشهر الكريم و نرى الزينة فى الشارع و الاضواء فى كل مكان و الناس تسهر للفجر فى الشوارع حتى انك مثلا لو ذهبتى الى الحسين الساعة 3 الفجر... و تشوفى الناس فى الشارع... و الزحام... رجال و نساء و اطفال و شيوخ.... من الممكن انك تعتقدى ان الساعة مثلا 8 مساءً...

    و فى مصر تلاقى موائد الرحمن منتشرة فى كل مكان و ذلك على الرغم من وجود الفروق المادية الكبيرة... سبحان الله

    ده طبعا بالاضافة للتواجد وسط الاهل و الزيارات المتبادلة الجميلة و التجمع على الافطار مع الاهل و الاصدقاء

    كل هذه الاشياء الجميلة و التى تميز مصر عن اى بلد فى العالم... افتقدها هنا بشدة
    لا..... رمضان فى مصر له بهجة و متعة خاصة لا توجد على اى بقعة من بقاع الارض



    9- كلمة توجهها لأحد أعضاء المنتدي فلمن و ما هي ؟؟؟

    بصراحه هم اكتر من واحد

    احمد ناصر: وحشتنا جداااااااااااا... المنتدى يفتقدك بشدة.
    بنت شهريار: شخصية جميلة و مميزة و مرحة للغاية... ربنا يكرمك و يوفقك.
    عمرو صالح: يا ريت ترجع زى زمان!!!
    حسام عمر: الأهلى حديد!!
    محمود زايد: صديقى و اخى... ربنا يديم الود و الحب بيننا.
    مى مؤمن: خفة دم مالهاش حل.
    جيمى: الف سلامة عليك.. فى انتظار تواجدك زى زمان.
    ليدر: انت فين؟؟!!
    ايميرالد: مش قادر انسى موقف الكاميرا الخفية... بجد كان ظريف جداً



    10 - أمنية نختتم بها اللقاء علي الصعيد الشخصي والإجتماعي.

    أتمنى من الله الصحة و الستر فى الدنيا.. و الجنة فى الاخرة... و أن يحفظ لى أبنائى ياسمين و يوسف من كل شر و يبارك فيهم.


    عصام سعدت و تشرفت بتواجدك في الأمسية معي حقا
    و يا رب يسعدك و يحقق لك كل ما تتمني و تحلم به و ينعم عليك بالصحة و راحة البال
    في رعاية الله

    ربنا يخليكى يا ريهام... و بجد انا اللى استمتعت باللقاء الجميل و الأمسية الرائعة و الأسئلة المميزة.. و اتمنى من الله ان لا اكون قد اثقلت على الاعضاء و كل عام و انت و كل اعضاء منتدانا الغالى بخير و فى أحسن صحة و حال .... و رمضان كريم.

    الآن دعوة سحور جماعية علي شرف عصام كابو علي مائدة سحور أبناء مصر

    http://www.egyptsons.com/misr/showth...268#post896268

    أخواني و أخواتي الأعزاء سعدت إلي الملتقي و ضيف جديد في أمسياتنا الرمضانية

    و لقاءنا القادم مع نهر الحياة فأنتظرونا

    دمتم بكل خير

    في رعاية الله ،،،
    [/frame]
    التعديل الأخير تم بواسطة boukybouky ; 18-09-2007 الساعة 12:16 AM


    يارب إن كان إدراك الحكمة صعباً.. فاجعل برحمتك الصبر والرضا سهلاً.

    على الطريــق

  2. #2

    تاريخ التسجيل
    Jan 2006
    الدولة
    ....
    المشاركات
    5,285

    مبتسم

    السلام عليكم ..

    دكتور عصام .. كل عام وانت بخير وصحة وسلامة ..

    ذكريات جميلة .. وربنا يخليلك أولادك .. ويخليك لأولادك .. وكل سنة تشتريلهم فانوش عشان ما ينسو .. وتروح الذكرى الجميلة دي ..

    وربنا يقويك .. ويعطيك العافية يا دكتور .. بجد بجد بجد حضرتك من الناس الي تركت في اثر كبيييير جدا .. و بأعتبرك قدوة ليا في اصرارك وعزيتمك .. وطيبة قلبك .. واهتمامك .. ومساهمتك ربنا يخليك لنا وما يرحمنا منك يارب..



    ايميرالد: مش قادر انسى موقف الكاميرا الخفية... بجد كان ظريف جداً
    انا حقيقي بأعتذر منك لو ازعجتك في السابق بالمقلب .. وحزينة على الي عملته .. لكن في نفس الوقت .. سعيدة اني من خلال هذه المقلب اتعرفت على شخصية جميلة جدا .. ومهتمة لأبعد الحدود ..

    ومبارك علينا وعليك .. بنتنا رنا .. ربنا يحفظها ويحميها ..

    كل عام وانت بخير ..

    وحقيقي يا بوكي .. انت ملاك ملاك ملاك .. ربنا ما يحرمنا منك ان شاء الله
    التعديل الأخير تم بواسطة emerald ; 17-09-2007 الساعة 11:28 PM

  3. #3

    تاريخ التسجيل
    Aug 2004
    الدولة
    الرياض
    العمر
    41
    المشاركات
    7,079
    السلام عليكم
    حبيبى واخويا الدكتور عصام الكينج زى مابحب اقولك دايما
    كل سنه وانت طيب ياغالى
    امسيه جميله جدا وكلامك استمتعت بيه جدا
    وباذن الله قاعه الرياضه تبقى افضل من كده بوجودك ورجوع الغايبين عنها
    ربنا يوفقك دايما ويخليلك اولادك وتطلعهم اهلاويه زيك
    وربنا يعطيك كل ما تتمناه
    شكرا يابوكى على الامسيه الجميله

  4. #4

    تاريخ التسجيل
    Oct 2006
    الدولة
    Oslo
    العمر
    49
    المشاركات
    1,262

    مصري

    السلام عليكم
    كل سنه وحضرتك طيب يادكتور والف الف مبروك الفوز اليوم وعقبال يارب منشوفكم تاني في اليابان
    وشكرا جدا لحضرتك اللي دتنا فرصه نكون معك ونتذكر اجمل ايام الرمضانيه في مصرنا الحبيه
    حقيقي كنت رائع واسلوبك جميل ورائع وانا مؤيدك ومع حضرتك في ان فيه فرق كبير من الانتماء والتعصب السئ اللي بيسئ للناس اخريين
    وانا كنت قلت نفسك جملتك وهي مرحب بان اكون عصبي او متعصب ادام بدافع عن ديني او عن ايماني بشئ لايقبل المجادله
    اما انتي يابوكي بوكي انا خلصت فيكي كل الكلام يامعلمانا الزوق وحسن الاختيار
    امسيه رائعه جميله وحوار رائع وضيف جميل خفيف الظل ولا الانتريه بتاعه يهبل
    شكرا لكم وربنا مايحرمنا منكم دائما
    واستاذنكم الحق السحور قبل محد ياخد الكرسي بتاعي علشان شويه وهنطلع بالمسحراتي وربنا المعين بيطلع عيني من بلد لبلد لمدينه لمحافظه مش عارف ليه الاعضاء كلها مش تسكن في شارع واحد ويخلصوني
    يا ايها الذين آمنوا إن جاءكم فاسق بنبأ فتبينوا أن تصيبوا قوماً بجهالة فتصبحوا على ما فعلتم نادمين

  5. #5
    Tetris Champion!
    تاريخ التسجيل
    May 2004
    الدولة
    القاهرة
    العمر
    49
    المشاركات
    8,981
    [frame="3 80"]منورنا يا عصام و كل سنة و انت طيب

    و الف الف مبروك المولودة السعيدة تتربي في عزك يا رب

    و ربنا يبارك فيها و في اخوتها ان شاء الله



    دمت بكل خير

    في رعاية الله ،،،[/frame]


    يارب إن كان إدراك الحكمة صعباً.. فاجعل برحمتك الصبر والرضا سهلاً.

    على الطريــق

  6. #6
    Tetris Champion!
    تاريخ التسجيل
    May 2004
    الدولة
    القاهرة
    العمر
    49
    المشاركات
    8,981
    وحقيقي يا بوكي .. انت ملاك ملاك ملاك .. ربنا ما يحرمنا منك ان شاء الله
    إيميرالد يا رب يخليكي يا نهاري ده كتير علية اوي بجد انا محرجة جدا منك
    تسلمي لي يا قمراية و ربنا ما يحرمني منك و من كلامك الرقيق ده و دايما متجمعين في الخير


    شكرا يابوكى على الامسيه الجميله
    العفو يا محمود و منور الأمسية و سعيدة انها عجبتك

    اما انتي يابوكي بوكي انا خلصت فيكي كل الكلام يامعلمانا الزوق وحسن الاختيار
    امسيه رائعه جميله وحوار رائع وضيف جميل خفيف الظل ولا الانتريه بتاعه يهبل
    شكرا لكم وربنا مايحرمنا منكم دائما


    يا رب يكرمك يا عماد تسلم و تعيش ...أخجلت تواضعنا
    الرائع تواجدك و مشاركتك العطرة في الأمسية

    دمتم بكل خير

    في رعاية الله ،،،


    يارب إن كان إدراك الحكمة صعباً.. فاجعل برحمتك الصبر والرضا سهلاً.

    على الطريــق

  7. #7

    تاريخ التسجيل
    Aug 2006
    الدولة
    القاهره
    العمر
    46
    المشاركات
    230
    السلام عليكم ورحمه الله وبركاته
    امسيه ممتعه مع د عصام عرفنا فيها الكثير عنه وعشقه للرياضه والاهلى وبهذه المناسبه بهنيك بفوز الاهلى النهارده على الزمالك اكيد انت اسعد واحد دلوقتى
    شكرا بوكى بوكى على تميزك الدائم
    اذا كنت فى ضيق فلا تقل يارب لى هم كبير ولكن قل يا هم لى رب كبير


  8. #8
    3D Net Blazer Champion! Bunch Champion! Typing Test Champion!
    تاريخ التسجيل
    May 2006
    الدولة
    alexandria
    المشاركات
    2,273
    بوكى
    اختيار رائع وشخصية جميلة

    د. عضام
    سعدنا تواجدك معنا فى الأمسية وامتعتنا بذكرياتك

    جميل جداً رأيك فى الفرق بين التعصب والانتماء .......

    تحياتى وتقديرى
    أمل موؤود وحلم مفقود ... ليل بلا حدود
    -------------------

    -------------------------
    ليس البكاء بدليل على الحزن ... ولا الضحك بدليل على السرور
    إنما الآلام تتوارى خلف القلوب

  9. #9

    تاريخ التسجيل
    Feb 2007
    الدولة
    SomeWhereNtheAiR
    المشاركات
    1,753
    السلام عليكم...
    كل سنة و حضرتك طيب استاذ عصام
    حقيقى استمتعت جدا بالحوار و الامسية معاك
    و الف مبروك على المولود الجديد ربنا يباركلك فيه و فى اولادك.

    ميرسى يا بوكى على الامسية الجميلة دى و على اختياراتك الرائعة دايما
    تحياتى.
    X

  10. #10

    تاريخ التسجيل
    Apr 2006
    الدولة
    مـكــان بـعـيــد
    المشاركات
    19,114
    دكتور عصام اخبارك ايه
    اتمنى ان تكون فى افضل حال
    ورمضان كريم
    وكل عام وانت والعائله بخير باذن الله


    بالطبع انا منتظر الامسيه دى من زمان
    ومنتظر اشوف ايام الطفوله الكابتن عصام كان بيعمل ايه
    وطبعا الكوره كان شىء اساسى
    ربنا يعينك يا دكتور فى عملك
    والف مبروك على المولوده الصغيره رنا
    وبنا يرجعك مصر بالف سلامه
    وباذن الله تحقق ال10 عين
    ههههههههههههه
    انا ماليش دوه
    امسيه جميله استمتعت بها شخصيا

صفحة 1 من 4 123 ... الأخيرةالأخيرة

المواضيع المتشابهه

  1. عصام كابو في محطات أبناء مصر
    بواسطة boukybouky في المنتدى تحت دائرة الضوء
    مشاركات: 26
    آخر مشاركة: 07-02-2012, 09:19 PM
  2. دكتور عصام كابو هابي بيرث دي تو يو
    بواسطة عزة نفس في المنتدى قاعة التعارف والمناسبات
    مشاركات: 21
    آخر مشاركة: 07-05-2008, 06:14 PM
  3. سحور في ضيافة عصام كابو
    بواسطة boukybouky في المنتدى المطبخ
    مشاركات: 7
    آخر مشاركة: 22-09-2007, 08:52 PM

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •