يمنع منعا باتا وضع روابط تحميل لأي موسيقى أو أغاني أو برامج أو أي ملفات أو مواد ذات حقوق ملكية فكرية
وأي مشاركة مخالفه لحقوق الملكية الفكرية والنسخ والتوزيع مهما كانت سيتم حذفها وإيقاف عضوية صاحبها فورا
برجاء مراجعة قوانين المنتدى

النتائج 1 إلى 5 من 5

الموضوع: مش عارف تتواصل مع حد معين - مش عارف تفهم الناس وجهة نظرك - ادخل هنا

  1. #1

    تاريخ التسجيل
    Jul 2006
    الدولة
    اجمل واطهر ارض خلقها الله
    العمر
    39
    المشاركات
    318

    مش عارف تتواصل مع حد معين - مش عارف تفهم الناس وجهة نظرك - ادخل هنا

    كيف تتكلّم مع الناس ؟

    عنوان غريب مش كده؟؟

    عمرك لقيت إنك مش عارف تتواصل مع حد معين؟؟ رغم إنك فعلا عايز تكلمه؟

    لقيت مرة واحد مابتحبّش تتكلم معاه خالص؟؟ كده لله في لله؟؟

    هل مرة لقيت إنك مش عارف تبيع سلعتك للزبون بتاعك رغم إنك حاولت بكل إخلاص؟
    أكيد أيوه.. مش كده؟

    طيب.. هنتكلم النهارده عن حاجة من الحاجات اللي هتفيدك في التواصل مع الناس بصورة أفضل.. والحاجة دي اسمها
    (التحدث بإيجابية)

    *********

    في البداية عايز أوضح لك حاجة مهمة جدا عن عقلنا اللاواعي
    هنعرفها من المثال الصغير ده
    :
    هاقول لك جملتين عايزك تركز فيهم قوي وتنفّذ اللي فيهم

    ماتفكرش في وردة حمراء

    ها ها ها.. ينفع؟ طيب خد دي كده

    ماتتخيّلش سيارة سوداء

    ها؟ خدت بالك من اللي حصل ده؟؟ أكيد أكيد فكرت لا إراديا في الوردة الحمراء وفي السيارة السوداء كمان

    *********

    إيه اللي حصل ده؟


    اللي حصل يا جماعة إن العقل اللاواعي بتاعنا مابيسمعش الكلام قوي.. ببساطة بياخد الجملة ويقعد يفكر فيها كلمة كلمة عشان يقدر يستوعبها.. فعلشان تفهم الجملتين اللي فاتوا كان لازم العقل اللاواعي بتاعك يتخيل الوردة والسيارة السوداء

    يعني إيه؟؟ يعني لو أنا عايز أأثر على العقل اللاواعي للشخص اللي باتكلم معاه, ومش عايزه يفكر في وردة حمراء.. يبقى لازم الجملة مايبقاش فيها وردة حمراء.. صح كده؟؟

    *********

    طبعا المسألة مش مسألة وردة حمراء وسيارة سوداء
    عشان تفهم قصدي اقرا الأمثلة دي

    البائع: الأسعار بتاعتنا مش غالية.. احنا مش حرامية ونصابين

    الجملة دي غلط تماما وهتأثر في اللاشعور بتاع الزبون.. هيلاقي نفسه ببساطة (مش مستريح) للصفقة دي, ومش لازم يكون عارف ليه.. لكن احنا عارفين طبعا

    جملة (مش غالية) دي هيركز اللاشعور على كلمة (غالية) لا إراديا.. والجملة التانية (احنا مش حرامية ونصابين) هيفهم منها إنهم (حرامية ونصابين).. ده أكيد

    يبقى المفروض البائع يقول مثلا: أسعارنا مناسبة جداً.. احنا يهمنا ثقة العملاء

    *********

    نفهم من كده إيه؟؟

    نفهم إن إنت لو عايز تأثر في اللي قدامك بحاجة, يبقى لازم تستخدم الكلمات الإيجابية المناسبة اللي تخلق جو من الراحة في نفسه.. زي (رائعة) و(ثقة) في المثال اللي فات... واهرب من الكلمات السلبية زي (غالية) و(حرامية ونصابين) حتى لو نفيتها.. زي ما عرفنا مع بعض

    الطبيب: ماتخافش.. الحقنة مش بتوجع خالص

    هه.. إيه رأيك في المثال ده؟؟

    يلاّ مع بعض نطلع الكلمات السلبية
    :
    أول كلمة سلبية هي: (ماتخافش).. دي هتخليه يخاف أصلا لأننا ذكرنا الخوف
    ثاني كلمة سلبية هي: (مش بتوجع).. دي هتخليه يتخيل الألم والوجع
    يبقى المفروض يقولها ازاي؟؟

    الطبيب: اطمئن.. هتحس براحة بعد ثواني

    (ملاحظ إننا ماذكرناش كلمة "حقنة" أصلا؟)

    تجنب الكلمات السلبية زي: ماتخافش، ماتقلقش، زي شكة الدبوس
    كلّمه يا دكتور عن الراحة والشفاء وإن حقنة البنج مريحة لأنها حقنة بنج أساساً

    *********

    خدت بالك؟

    ببساطة لأن هي دي الحقيقة, بس المهم هنوصلها له بأي طريقة؟

    البنت لخطيبها: ماتقلقش يا حبيبي.. عمري ما هاخونك أو أكرهك

    طبعا كلنا حسينا بصدمة من الكلام ده.. لكن احنا عرفنا ليه.. عشان الكلمات السلبية زي: ماتقلقش- هاخونك – أكرهك

    المفروض الجملة دي تتقال كده
    البنت لخطيبها: اطمئن يا حبيبي.. أنا مخلصة لحبنا وهافضل أحبك على طول

    شايف الجمال اللي في المعنى؟؟ مع إننا ممكن نلاحظ ببساطة إن الجملتين لهم نفس المعنى

    *********

    نستفيد من الكلام ده إيه بقى؟؟

    نخش على الحكمة بتاعة التهاردة
    مهم جدا معنى الكلام الذي نقوله.. والأهم هو: كيف نقول هذا المعنى

    استخدم كلمات إيجابية دائما في حياتك.. ولاحظ الفرق الذي سيحدث في علاقاتك مع الناس..واعرف الحقيقة دي.. الناس اللي بيستخدموا كلمات سلبية كتير في كلامهم, الناس بتبتعد عنهم ومش بتحب تتكلم معاهم.. افتكر حد مش بتحب تتكلم معاه.. يا ترى إيه السبب؟؟ بيشتكي دايما من الظروف؟ بيشتم كتير؟ بيثير الإحباط؟؟ ركز في كلامه هتلاقي الكلمات اللي قلنا عليها.. الكلمات السلبية

    على عكس الناس اللي الناس بتحب تتكلم معاهم.. فكر في واحد بتحب تتكلم معاه وبتستمتع بكده.. مبتسم؟ متفائل؟ بيهوّن على الناس اللي حواليه مشاكل الحياة؟ ركز في كلامه هتلاقي الكلمات اللي بنقول عليها: الكلمات الإيجابية

    *********

    قبل ما نختم بقى تعالوا نلعب لعبة


    اختار الجمل والكلمات الإيجابية اللي توصل المعنى بصورة صحيحة, وحط قدامها علامه: صح

    أنا مش عبيط.. أنا فاهم كل حاجة
    صح غلط

    خليك ذكي وركز معايا
    صح غلط

    الجو النهارده كويس
    صح غلط

    ياباشا البضاعة بتاعتي مش بتعفن بسرعة
    صح غلط

    ماتقلقش.. الموضوع بسيط
    صح غلط

    هابطّل السجاير, واكون إنسان جديد
    صح غلط

    البارفان ده ريحته مش وحشة خالص.. بالعكس
    صح غلط

    ماتفتكرش إن صحتي راحت.. أنا زي الفل
    صح غلط

    مش هاخذلك يا معلّم
    صح غلط

    أنا إرادتي قوية جدا.. ثق في كده
    صح غلط

    ماتبقاش غبي يا بني.. فتّح مخك معايا
    صح غلط

    بحبك
    صح غلط

    طبعا حلّيت الواجب كله لوحدي..إنت فاكرني باكدب؟
    صح غلط

    *********

    حلها بقى بروقان واعرف إنت بقيت متحدث إيجابي ولاّ لأ
    مرّن نفسك من النهارده على إن كلامك يكون إيجابي.. ولاحظ الفرق اللي هيحصل في حياتك

    ماشي يا جماعة.. حط بقى مرادفات (إيجابية) للجمل (السلبية) اللي فاتت لو حبيت.... وورينا شطارتك يا بطل

  2. #2

    تاريخ التسجيل
    Apr 2004
    الدولة
    قـصـر القـبـة
    العمر
    39
    المشاركات
    5,859
    قصدك ما استدعيش كلمات أو معاني ذات أثر سيء وأنا بعرض فكرة أو سلعة أو......

    جميل بجد الموضوع
    تسلم إيدك
    لو تحب ننقله قاعة "من هنا وهناك" لو مش منقول، تحت أمرك
    التعديل الأخير تم بواسطة Abdou Basha ; 19-07-2006 الساعة 06:31 AM

    الأصدقاء الثلاثة

  3. #3

    تاريخ التسجيل
    Jan 2006
    الدولة
    ....
    المشاركات
    5,285
    السلام عليكم

    موضوع جميل يا خالد , شكرا لك على طرحه.
    عملية احلال الاجابية محل السلبية , في الافكار , الافعال, وحتي الحديث , من اسهل الطرق لتسهيل حياتنا اليومية وتسهيل التواصل لاننا نكون اكثر مرونة لاستقبال كل شئ جديد سواء كان سيئ او جيد , ونتعامل مع القديم بكل انفتاح ورغبة في التصحيح.
    شكرا لك على الموضوع الرائع.

    بارك الله فيك.
    سبحان الله وبحمده .. سبحان الله العظيم ..

  4. #4

    تاريخ التسجيل
    Jul 2006
    الدولة
    اجمل واطهر ارض خلقها الله
    العمر
    39
    المشاركات
    318

    مصري اخى عبده باشا

    اقتباس المشاركة الأصلية كتبت بواسطة Abdou Basha
    قصدك ما استدعيش كلمات أو معاني ذات أثر سيء وأنا بعرض فكرة أو سلعة أو......

    جميل بجد الموضوع
    تسلم إيدك
    لو تحب ننقله قاعة "من هنا وهناك" لو مش منقول، تحت أمرك
    يا صاحبى انا مش عارف الموضوع منقول ولا لأ لانى لما بيعجبنى اى موضوع باحتفظ بيه سواء على ورق او على الكمبيوتر الخاص بى - بس اللى اقدر ااكده ليك انه مش منقول من اى منتدى تانى خالص
    وشكرا ليك ولكل الاخوة المشرفين ويارب دايما للامام

  5. #5

    تاريخ التسجيل
    Aug 2006
    الدولة
    مصر
    المشاركات
    31

    مصري

    اشكرك جزيلا على الموضوع الجميل ده لانو فعلا موضوع مهم ولو كل واحد منا بدأت في تنفيذ الكلام ده اكيد هنتحسن ونتطور لافضل

    وانا اقوق الناس بتبعد عني ليه دلوقتي عرفت السبب هههههههههههههه

المواضيع المتشابهه

  1. رتب هذه الكلمات ...حسب وجهة نظرك
    بواسطة bortofa7 في المنتدى قاعة المناقشات
    مشاركات: 13
    آخر مشاركة: 28-02-2008, 07:17 PM
  2. من أفضل لاعب في وجهة نظرك
    بواسطة رونا9لدو في المنتدى قاعة الرياضة
    مشاركات: 6
    آخر مشاركة: 12-03-2007, 07:51 AM
  3. مش عارف
    بواسطة ميمو المصرى في المنتدى طبيبك النفسي
    مشاركات: 1
    آخر مشاركة: 24-09-2006, 11:19 PM
  4. ماهي أهم مقومات الزواج الناجح من وجهة نظرك ؟؟؟
    بواسطة 7oodaa في المنتدى قاعة المناقشات
    مشاركات: 17
    آخر مشاركة: 23-08-2006, 01:23 AM
  5. اية احسن موقع فى وجهة نظرك
    بواسطة sherry في المنتدى قاعة فك التكشيرة
    مشاركات: 13
    آخر مشاركة: 02-11-2003, 03:54 PM

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
تابع صفحتنا على الفيس بوك