القلق العادى
---------
لما الوهم اتمدد
فوق القلق العادى
شفتك
وانتى بترمى الحلم
فى اول سكة خوف قابلتنا
وانتى بتنسى معنى حياتنا
------
ملعونة عادات الناس
وحاجات الناس
ملعون الحلم الخايف
جوّه الصدر المتسلسل
بغباء الناس
----------
وانتى ياخضرة
فى وسط الزمن الناشف
لسّه سواقى النور بتدور
لسّه الحلم مطلّع روحنا
واحنا لسّه بنستناه
لسّه القلق العادى فى جوفنا
واحنا بنغزل توب الاه
يا الله
صعب نكون شعرا على طول
احنا ياموجه فى وسط بحور
صعب نقول للقطر استنى
داللى اتهنى خلاص اتهنى
واحنا بنكتب فى الاشعار
ياستار
ليه الفقرا كتير فى بلادنا
ليه الغربه فى وسط ولادنا
ليه ياحبيبتى
ليه الوطن العربى اتفكك
لما اتكتف كل بلاده
ليه القدس بترفض ترجع
واحنا بنرفض نستقبلها
ليه لبنان العشق اتمزع
فيها القاتل جنب قتيلها
ليه انا وانتى؟
رغم سنين الحب حبيبتى
زى الغُرب
ليه مش عارف ادخل بيكى
عتبة بيت
ليه عايشيين على الف ياريت
ليه علشان القاكى .. اسيبك
ليه مش عارف ابقى حبيبك
عارفه ده ليه
علشان فقرا
علشان اتعلمنا نكتب
واتعذبنا واحنا بنقرا
-------
لما الوهم اتمدد فيّه
اتهيألى
انى بالف انا وانتى العالم
كل بلاد العرب الحلوه
فى فلسطين وفلبنان فى الجولان
اتهيألى
ان النيل واصل للمغرب من اسوان
وان القمح ببركة مكه
شبّع اهلى فى السودان
---------
اتهيألى
ان يهود الدنيا انزاحوا
وان الوطن العربى اتجمع
بعد ماطابت كل جراحه
اتهيألى
اه ياحبيبتى
لما الوهم اتمدد فيه
شفتك ترمى الحمل عليه
وبتعتذرى لحزن عنيه
وتفارقينى
وتصحينى
يرجع قلقى العادى
ويسكن
جوّه الننى فى قلب عيونى
عادى
-----------------------------
حلمى عمر
رد مع اقتباس
ــــــي .,.,
المفضلات