يمنع منعا باتا وضع روابط تحميل لأي موسيقى أو أغاني أو برامج أو أي ملفات أو مواد ذات حقوق ملكية فكرية
وأي مشاركة مخالفه لحقوق الملكية الفكرية والنسخ والتوزيع مهما كانت سيتم حذفها وإيقاف عضوية صاحبها فورا
برجاء مراجعة قوانين المنتدى

صفحة 1 من 9 123 ... الأخيرةالأخيرة
النتائج 1 إلى 10 من 82

الموضوع: زيزو .. على ضفاف النيل

  1. #1
    الصورة الرمزية الشاطر حسن
    الشاطر حسن غير متواجد حالياً "رَبِّ لا تَذَرْنِي فَرْدًا وَأَنْتَ خَيْرُ الْوَارِثِينَ"

    تاريخ التسجيل
    Jan 2010
    الدولة
    مصر
    المشاركات
    4,529

    مصري زيزو .. على ضفاف النيل

    ياعزيزي لو تلاحظ تلقى ضلك بيبتسم
    ولما أبص في عينيك ألقى قلب بيترسم
    هوا من ضمن البشر اللي اتحشر مابين الصبر والأمل
    هوا اللي ولا على حاجة ندم
    طنط وتيتة وعمو نادر والأسطى جابر
    بيقولوا عليه زي العسل
    بيقولوا ان ضحكته ومودته
    وبراءته وكمان صحبته
    باقة ورود
    بيهدوا للناس وردها
    قالوا كمان برغم طيبته المفرطة
    لما تزحف نحوه الهموم
    بيكون واعي وقدها

    هذا هو ، فؤاد ُطيرٍ في سماحته وقلبُ ليثٍ في مواجهة الأمور . أم أنه صقرٌ فوق نخيل يقتات الرطب لكنه مانسيَ القنص أبدا، فهو على هذا قد جُبل.


    طال هذا الموضوع في خروجه للنور والسبب أنا بالتأكيد لكن لي من الحجج الكثير أولاها كسلي المعتاد الذي مارأيته في ضيفي اليوم لكني أزيد عليه أني لاأمل سريعا ومن حججي أيضا التأني فأنا أراه بصورة صقر نبيل فكان التأني لأرى وجوها أخرى وماإن رأيتها حتى أكدت انطباعي الأول .
    حقيقة أثلجت صدري نتائجي كلما قرأت موضوعا جديدا أوقديما أو مشاركات كمثلهما يزيد ابتسامي وأوقن أنني أمام نموذج راقي للشباب المصري . طوبا لهم
    وحقيقة أخرى أدرجها هنا أنني وبعد تكاسل بدأت فجأة الكتابة وكأن فكرة اختمرت في رأسي كان غذاؤها الوقت . أو ربما هكذا أعتقد.

    رحبوا صحبي الكرام بالغالي كما أحب أن أناديه بالقناص كما أتخيله
    بالباشمهندس / أحمد عبدالعزيز
    ************
    زيزو

    تحية طيبة أخي العزيز السلام عليكم ورحمة الله وبركاته


    في لقائنا على ضفاف النيل أنصح ضيوفي دائما بالاسترخاء لكني لاأريدك كذلك أريد أن أرى في أجوبتك الانفعال بصورته الحميدة لتخرج مافي جعبتك من أفكار ووجهات نظر
    كأس العصير أمامك سبق حرارة نهار الصيف بدرجات، عذرا فهذا ماأملكه.


    أتغفر لي صديقي العزيز؟ أم تتهمني بخيالك أنني لست كفؤا في عملي ؟
    كان ذلك أول أسئلتي




    مقدرش اقول حاجه على الى فات ده كله غير ربنا يخليك ياحسن وشكرا الكلام ده فعلا كتير جدا عليا لانى فعلا ابسط من كده خالص موضوع انك كفؤء فى عملك ده انا شايف انك كفؤء طبعا بدليل تواجدك مابينا من فتره صغيره و حضورك الجميل الذى يسعد الجميع و تواجدك وسط اخواتك وبعدين هما همين عمو وتيته والاسطى جابر بس ربنا يخليهم يعنى على كلامهم وكلامك يا حسن .
    موضوع الهموم بقى والضحك مش شرط والله فيه مقوله كانت بتقول اكثر الناس ضحكا اكثرهم حزنا المقوله دى صحيحه يعنى وانا مقتنع بيها بس الحمد لله بحاول افضل مابين كل حاجه اوقات كتير قوى ابقى مضايق بس بستريح نفسيا لما بدخل المنتدى واكلمكو او حتى اقابل اشخاص من المنتدى لكن الهموم تزحف وتتوغل وتستمر
    بس سبحان من يلهم الصبر الصراحه





    على فكرة ياغالي أنا اسمي حسن في الشهادة لكن اسم شهرتي بين معارفي وأهلي هو أحمد
    أيعرفك أهلك كذلك بـ زيزو ؟


    اسمك حسن وبيدلعوك با احمد
    انا زيزو معروف على مدى التاريخ انا اسمى فى الشهاده احمد احمد عبد العزيز فكان نقطه ان انا وووالدى اسمهم احمد كان بيكون لخبطه فمعروف بزيزو فى جميع الاوساط الاسم ده ملازمنى من وانا فى kG-1 واستمر معايا لغايه دلوقتى قصه بقى zizoYAzizo هو حكايه كده لما كنت ماسك مدير فصل فى المدرسه فكنت مسؤل عن الغياب والنظام وغيره من الحاجات دى بقى بس كنت مظبط العيال الصراحه يعنى كنت بسمح بالتزويغ والغياب احضره وكده يعنى فعملو مظاهره وقعدو يهتفو زيزو يا يعيش يا يعيش زيزو يا زيزو يامظبطنا يا مهنينا يا مشبعنا يا مغدينا زى اعلان هاتلنا ريرى هاتلنا ريرى كنت انا ريرى بالنسبه للطلبه وتقريبا كانو بينتخبونى لرئاسه الفصل علشان كده





    سؤالي الآن عن هذه العبارة
    "اتقِ شر الحليم إذا غضب "
    هل يعطي الحليم نفسه الحق في غضب جارف لأنه أمهل كثيرا؟


    ايوة طبعا انا واحد من الحليم ده وللاسف رد فعلى بيكون عنيف جدا جدا و اوقات بضيع حقى طبعا بالعصبيه الزائده بس بيكون عنيف ومش مساوى للفعل بيكون زفت



    صوت غير مألوف . هزة. رائحة. لون غريب. رجفة وقت السرعة . كلها تدل على وجود خطب ما بالسيارة لكن ولأنك تخالط الكثيرين تسامرهم وتجالسهم متى تعرف أن في نفوسهم خطب ما؟


    بالعشره والله على حسب التعود يعنى يعنى انا بعامل حسن مثلا وعارف ردود افعاله عارف لما بيقابلنى بيكون ازاى عارف كلامه نبره صوته وقت مابيهرج وقت مابيزعل فلما بحس بتغير بحس ان فيه شى غلط فابتدى اسال عن سبب الزعل وان كان منى او من شى تانى لو منى بحاول افهم الموقف وابرر موقفى لو مش منى بحاول اهدى من الموقف وابين انه شى عادى وهكذا





    كتبت موضوعا أعجبني حقا عن الشيعة في سطور ولي وقفة هنا وبعض أسئلة
    ولن تكون عن الموضوع نفسه إنما ما شعرت به


    " دعوي جديد" وحديثٌ صحيح
    ((لئن يهدي الله بك رجلاً واحداً خير لك من حمر النعم))


    كيف تتعامل مع المحيطين بك وبماذا تنصحهم دائما ؟


    موضوع الشيعه فى سطور ده من اجمل المواضيع الى كتبتها فى المنتدى بس قمت بكتابته بعد شرح من العضوه رحمه كانت بتشرحلى الموضوع على الماسينجر وانا كنت بكتبه بالعاميه على المنتدى فالمجهود المبزول حقيقى من نصيب رحمة انا كنت ناقل للكلام بس من شرحها على الماسينجر
    بالنسبه للمحيطين بيا انا بتعامل عادى جدا وبطبيعتى مع الناس كلها ان كان مع المحيطين بيا او الى مش محيطين اوقات طبعا ناس بتبقبل ده واوقات ناس مش بتبقبله طبعا انا مش بنصح حد غير فعلا لما بلاقى الغلط بيحصل او لو حد سالنى فى موقف معين وده بيحصل اكتر مع اصحابى بالصوره الكبيره بيهتمو انهم يعرفو رايى فى مواقف كتير اوقلات لانى بنظر للشى بصوره تانيه غير التقليديه او بشوف الموقف بصوره تانيه النصيحه بتختلف من شخص لشخص على حسب الموقف بس مش بلح عليها يعنى بنصح مره او اتنين لكن لو مات بعد كده مش بنصحه تانى فى نفس الموقف

    **************


    أتجاوزت نصيحتك يوما بأن تتبنى مشروع اصلاح شخص تحبه؟


    حاولت كذا مره بس محاولاتى جت بالفشل لانى مش بعرف الح على النصيحة ومؤمن بنظريه الممنوع مرغوب




    يكفي هكذا فلنجعل من الدفء العائلي محورا للحديث




    أتقنع دائما بوجهة نظر والديك أم تخالفها أحيانا ؟ أقرن إجابتك بمثال .


    هما مدينى مطلق الحريه لكل حاجه وتحمل مسؤليه قرارى، اوقات بتكون فيه نصيحه لموقف معين وباخد بيها واوقات بخالفهم الراى بس بيكون النتيجه هى تحمل المسؤليه عن قرارى فيه امثله كتيره بس اغلبها فى نطاق العمل يعنى خصوصا لما كنت بكون فى مشكله فى الشغل او طريقه معينه فى إداره حاجه فى الشغل وكانت نصيحه والدى دائما تسبق تفكيرى للطريق الصحيح وكثيرا ما اخذ بها






    نصفك الثاني يعزز قوتك ويتمم نقصك بعبارات بسيطة فيم أفادك ؟وكيف غير وجهة نظرك عن بعض الأشياء؟
    النصف التانى بيعزز قوتى ايوة لانه بقى مسؤوليه ومسؤليه كبيرة من جهه انه بيتمم نقصى فهو بيتمم كل حاجه فعلا يعنى انا مثلا مش صبور خطيبتى صبوره يعنى الحاجات العامه دى الصراحه بلاقى الى بيكملها فى خطيبتى







    عبارات أكد صحتها أو صحح خطأها




    الانطباعات الأولى عندي تدوم فأنا أحكم على الشخص بمجرد رؤيته.


    لا انا مش كده خالص بس المعامله هى الى بتفرق معايا جدا مع الشخص لكن ممكن الرؤيه الاولى لشخص او معاملته لاول مره تبنى ليا انطباع عنه كويس او وحش ولكن المعامله هى الى بتفرق مع الشخص والمواقف وده الى بيحددلى الشخص واسلوبه وهل هو يبقى صديق او لا علشان كده انا بردو اصدقائى على الرغم من عددهم الكتير بس الصديق الحقيقى منهم يتعدو على اصابع اليد

    ************


    أكره السراب فدائما ما أوقعني في المشاكل.


    اوافقك على العباره دى بس للاسف مش بعرف اعمل بيها بجرى ورا الحلم بتاعى وهو فى الاخر مجرد حلم بس بحاول اوصله وناتيجه انى بسعى للحلم الى بحلم بيه بتعطل عن حاجات اكتر فى الطريق

    ************


    الناس كالسيارات وربما السيارات أقل كذبا.
    السيارات عندى احسن من الناس لنفس السبب الى قلته ولاسباب تانيه كتير والصقور والكلاب كمان طبعا لكل قاعده شواذ يعنى بس السيارات لا

    ************


    عناية الله تظلني دائما لذلك أنا محظوظ.


    اوافق بشده على العباره دى فعلا بحس ان ربنا حافظنى من حاجات كتير وكذا موقف اتحط فيه واطلع منه من غير تعب او اجهاد على الرغم من المواقف الى بتحط فيها اخرها كان حادث سرقه والحمد لله ربنا وقف معايا اليوم ده ونبهنى فى اخر لحظه وقدرت اتصرف


    ************


    إنها جميلة. إنها تضحك . إذن سأحبها .


    الابتسام والجمال هما سر الحياه وكل الناس تتفق معايا ان الجميل هو بشوش الوجه المبتسم فهى نعمه من الله يعطيها لمن يشاء ولكن الابتسامه تخفى وراها الكثير من الالم فى بعض الاحيان والجمال زائل الجمال الحقيقى هو جمال القلب وصدق المشاعر


    ************


    مرت بعض الليالي تمنيت لو اختفيت


    موقف حدث ليه فى اوقات الدراسة وتمنيت فعلا انى اختفى من الوجود لعدم مواجهه والدى او والدتى

    ************


    الشهامة لابد منها ولو كنت في موقف ضعف


    الشهامه لابد منها فى اى موقف







    عزيزي استمع لهذا ثم أعطني انطباعك وكيف أثرت فيك الكلمات



    جميله قوى الانشوده دى يا حسن انا فعلا سرحت معاها وكررتها كذا مره سر حبى للصقور يمكن وانا صغير كان عندى حلم انى ابقى زى الصقر واطير زيه ولما فعلا وصلت لثانوية عامه كان نفسى ادخل الثانوى الجوى وكان نفسى ادخل بعدها كليه الطيران بس منفعش ده كله فى الاخر
    أيها الصقر الجريح أنت في الأسر طريح
    يا صريعا للأماني أنت بالطيش ذبيح
    ضاحك والقلب لو تدري جروح وقروح
    غره نفس و شيطان وأهواء تلوح
    هذه آيٌ من الله فهل في القلب روح
    آن أن يرتد عن طغيانه القلب الجموح
    آن للميزان أن يثقله التوب النصوح
    هذه آي من الله فهل في القلب روح


    يمكن اوقات بحس انى زى الشطر التالت (ضاحك والقلب لو تدري جروح وقروح )
    جميله الانشوده واثرت فيا جدا على الرغم من العزه والكبرياء والقوه بس لازم محاسبه النفس والتذكير بوجود الاقوى وهو الله







    التعديل الأخير تم بواسطة الشاطر حسن ; 15-04-2012 الساعة 01:44 PM


    شكراً ياأسير الغروب
    مكان فاضي** باقات حروف
    كل عام أنتم بخير

  2. #2
    الصورة الرمزية الشاطر حسن
    الشاطر حسن غير متواجد حالياً "رَبِّ لا تَذَرْنِي فَرْدًا وَأَنْتَ خَيْرُ الْوَارِثِينَ"

    تاريخ التسجيل
    Jan 2010
    الدولة
    مصر
    المشاركات
    4,529




    لحظة ربما أفرطنا ياغالي في الأسئلة فهلا استراحة لالتقاط الأنفاس وعودة لمن نحبهم في الله من الناس

    عودة لعائلتنا في المنتدى.



    أيامك الأولى بعد التسجيل . كيف كانت ؟ لمن انجذبت عيونك لقراءة مايكتب؟ لمن انجذبت مشاعرك لصدق مشاعره؟


    ايامى الاولى فى وجودى فى المنتدى هى قبل موعد تسجيلى الفعلى بسنه تقريبا كنت بتصفح فيها المنتدى للبحث عن البرامج وكان اول موضوع دخلت فيه للمنتدى كان موضوع عن برامج انتى فيرس للبروف سمسمه وكان قبل تسجيلى بسنه تقريبا و المنتدى ظهرلى فى محرك البحث الجوجل

    واول معرفتى بالاشخاص كان محمد الشاترى ( مظلوم ) – ( اسد ) – ( احمد ناصر) – وبعدين احمد صلاح ابن البلد





    وكأن السؤال السابق مستوحى من نظرية نيوتن فلنكمل من نفس نظرياته





    لكل فعل ردة فعل مساوية له في القوة ومضادة له في الاتجاه





    عبر عن رد فعلك للمواقف التالية:







    عن جهل أحدهم أخطأ في حقك أمام من يهتموا لأمرك.

    ادام عن جهل فبعذره


    ************

    عضو اتهمك زورا ودلس أدلته


    هبرر موقفى بادله مضاده وادام دلس الادله يبقى الحق معايا بص صدقنى الى عارفنى صح مش بيصدق حاجه عنى واغلب الناس بتسالنى ان كان ده حصل او محصلش والناس متعوده منى على الصراحه


    ************

    هدية ثمينة من أحد الأعضاء تمنى لو تقبلها


    هقبلها وهردهاله فى اقرب فرصه




    صديقي أرهقت تفكيرك أليس كذلك؟ فلسترخي الآن وتبرق لمن تحب من أهل المنتدى دون قيد أوشرط


    لا مافيش ارهاق ولا حاجه خالص بس ابرقلهم ازاى

    اول كلمه فعلا هقولها للمنتدى ككيان او بيت ليا وللاعضاء المكان ده جميل جدا اصبح بيت فعلى وليس افتراضى للناس كلها تواجدى فيه وسط ناس جميله حقيقى بستفاد منهم الكثير والكثير شعور دائما يصاحبنى لما برجع البيت وهو انى ادخل المنتدى اطمن على الناس الى فيه واشوف احوالهم ومين حضر ومين غاب والى غاب عنده مشكله ولا غاب لظروفه الخاصه

    اخص بقى فعلا وجود اعضاء اثرو فى حياتى الشخصه واستفدت منهم كتير اولهم



    م / محمد حسن (R17E) :

    اجمل واطيب انسان واخ ليا بجد وافضاله عليا كتير جدا وحقيقى من محبتى انى اكون زيه مواضيعه بستفاد منها الكثر واحب اتناقش معاه فى كل حاجه رايه مهم بالنسبالى والوحيد تقريبا الى بيدقر يقنعنى بكل سهولة


    ************

    احمد صلاح ( ابن البلد )

    انت اخ عزيز عليا فعلا وليك مواقف كتير بردو معايا . ربنا يعينك على الحمل الى انت شايله فى المنتدى

    ************

    احمد ناصر

    كان ليا الشرف انى اتكلمت معاك واتعلمت من اسلوبك فى المنتدى حاجات كتير وحقيقى فرحت لما بقيت مراقب عام فى المنتدى

    ************

    الشاطر حسن

    انت اخ عزيز وسعدت جدا بمعرفتى بيك وكان شرف ليا فعلا انى عرفتك وكفايه انت مغرقنى بصورك


    ************

    حسام عمر
    ( للاسف زمالكاوى)
    حسام طيب وبعزه بس الزمالك لحس مخه


    ************

    شاعر الرومانسيه

    اخ جميل و سعدت بمعرفته واتعرفت عنه عن قرب شكرا ليك


    ************

    أ / سيد جعيتم

    والد تعلمت منه الكثير حبه للوطن نابع من قلبه له اراء جميله كثيرا ماتعجبنى طريقه التفكير فيها

    ************

    ا/ مصطفى سلام

    اطيب عضو فى المنتدى حقيقى بفرح لما بشوفه


    ************

    د/ عصام ( ابو كريم الاهلاوى)

    بحترمه جدا وبحب تواجده وبيحب اعلان بريل بتاع هوووووووب هوب هوب هوووب
    انا مازلت مصر انه شبه الراجل الى بيعمل الاعلان


    ************

    اسكندرانى ( ابو البنات )

    كرمك مغرقنا باستقبالك لينا فى اسكندريه وحقيقى انت شخص جميل جدا وانا بعزه واحنا مقصرين معاك فعلا اتمنى انى ازورك قريب فى اسكندريه او نشوفك انت هنا فى القاهره

    ************

    د/جمال الشربينى

    على الرغم من تحفظاتى الكثيره على بعض الردود وتحاملك علينا فعلا بس بحب تواجدك فى المنتدى وده بيتاكدلى ان رغم كميه الايقافات الى بتقفها بس بترجع تانى وتشارك بنشاط

    بس بالراحه علينا ولازم حضرتك تعذر من هم اقل منك علم او على الاقل علشان نعرف نتعلم منك


    ************

    بنت مصر

    حقيقى بعتذر منك على اى اساءه حصلت منى وقت وجودك فى المنتدى عن عدم خبره او اساءه فى التقدير واتمنى رجعوك للمنتدى مره اخرى

    ************

    اليمامه ( ام ادم حمزه )

    اخت ليا واقعيه هى وعيالها المشاغبين بحب ادخل المنتدى وادخل مواضيعها اتفرج على ردودها واعلق عليها ومواضيعها رايها كثيرا مايعجبنى وكتير بتكون سبب فى انى اكون مبسوط ولو فيه مشكله او حاجه بتحلها


    ************

    رحمه

    اتمنى اسمع عليكى سمع خير وترجعى المنتدى من جديد

    ************

    ناريمان

    مش هقول غير فظيعه
    بحب تواجدها جدا فى المنتدى بتحسسنى بالروقان الصراحه ملحوظه فظيعه دى والله يعنى حاجه جامده يعنى
    وكمان بتحب تجرى ورا غلطاتى الكيبورديه والوحيده تقريبا الى بقت بتفهم الوغاريتمات الى بكتبها


    ************

    مى مؤمن

    ياريت ترجع المنتدى تانى كان وقت وجود عصابه حماده وتوتو كان المنتدى فى قمه ازدهاره

    ************

    عبير بنت شهريار

    ياريت ترجع المنتدى عضو من اعضاء حماده وتوتو


    ************

    لولى

    فنانه ابناء مصر بحب تصميماتها وعلمتنى ازاى اعمل الصوره الى نص ابيض والنص ملون

    ودى احد انجازتها معايا بس تبطل تقول على الجاجوار شبه الفيات




    ************
    ************



    بعتذر لو كنت نسيت حد بس الى اقدر اقوله ان كل اعضاء المنتدى انا بعزهم وتعلمت منهم الكثير وبعزهم كلهم



    عايز اقول لكل الاعضاء ان المشرفين والله مافيش مابينهم ومابين الاعضاء اى حاجه وياريت نتعامل كلنا ان مافيش فرق مابين مشرف او عضو او يون فيه الحساسيه دى لان فعلا ربنا العالم كلنا هنا واحد والمشرف هو والله عضو بس عليه مهام اداريه مش اكتر بيقوم بيها واوقات بتكون غصب عنه وانا بعتذر عن اى اساءه حصلت منى لاى حد فى المنتدى



    وماذا سيكون غير عناق في الختام ودعاء نزعت كلماته لمعاني التوفيق والسداد . هذا ماتفضل به ضيفي الكريم ، أجاد كثيرا بعد أن اشترى ابتساماتي ونبض قلبي بحلو حديثه
    بارك الله فيه وفيكم


    شكرا بالغ المدى أخي الغالي زيزو وتقديرا تجاوز كثيرا مداه

    وختاما شكرا جزيلا لا نفي معه كرم حضورك ووردا كثيرا لايحاكيه إلا عطر وجودك.

    ومع ضيف عزيز آخر ونقاط مضيئة انتظرونا

    أستودعكم الله
    التعديل الأخير تم بواسطة الشاطر حسن ; 15-04-2012 الساعة 01:48 PM


    شكراً ياأسير الغروب
    مكان فاضي** باقات حروف
    كل عام أنتم بخير

  3. #3

    تاريخ التسجيل
    May 2004
    الدولة
    القاهرة
    العمر
    47
    المشاركات
    8,981
    بسم الله الرحمن الرحيم

    يااه اول مرة الحق اقرأ الموضوع واكون اول واحدة ارد
    بس المهم مش على بال ما اكتب رد الاقي حد سبق ههههههههههه

    النهاردة معانا زيزو...
    نبدأ نتكلم يعني براحتنا بقى طالما حليم
    ربنا يوفقك يا زيزو ويسعدك ويحقق لك كل اللي تتمناه
    بجد شئ جميل ان الإنسان يطور من نفسه واسلوب علاقاته
    مش اي حد يعرف يعمل كده..والا يعرف يحافظ على الناس مع المتغيرات اللي بتحصل
    حب الناس ده شئ عظيم ..هقولك دعوة كانت ماما الله يرحمها بتدعي لي بها دايما وكنت بشوفها اجمل دعوة:
    "ربنا يحبب فيك خلقه"

    حسن مش عارفة اقولك ايه...عايزة ازود عن المرة اللي فاتت علشان ما شاء الله كل مرة للأفضل
    ربنا يكرمك وتجمعنا دايماً ..انا بحب جدا الموضوعات اللي بتقربنا لبعض ديه

    دمتم بكل خير
    في رعاية الله،،،


    يارب إن كان إدراك الحكمة صعباً.. فاجعل برحمتك الصبر والرضا سهلاً.

    على الطريــق

  4. #4

    تاريخ التسجيل
    Mar 2012
    الدولة
    مصر
    المشاركات
    146
    موضوع رائع انك تتعرف على اخوانك من قريب
    وحسن ماشاء الله عليه محاور ممتاذ
    امتعنا باسئلته الشيقة
    واسلوبه الرائع
    وبصراحة كمان اسعدنى جدا
    انى اتعرف على انسان جميل زى زيزو
    استمتعت جدا
    بذكره لاخوانه فى المنتدى فرد فرد
    وحبه واعتزازه بيهم
    وكنت فعلا نفسى اعرف
    ايه حكاية
    زيزو يا زيزو
    وكان باب السما مفتوح
    ههههههههههه
    ماشاء الله عليكم ربنا يديم مودتكم ومحبتكم
    بارك الله فيك يا حسن

    ربنا يسعدك ويسعدك يا زيزو
    ورده ليكم انتو الاتنين

  5. #5

    تاريخ التسجيل
    Feb 2004
    الدولة
    جمهورية مصر العربية
    المشاركات
    21,881

    أوكي

    طول عمرنا بنسمع عن البطل أحمد عبدالعزيز
    فدائما كل ما نعرف أى حد إسمه أحمد عبدالعزيز بيخطر على بالنا بالإيحاء إنه بطل
    زيزو بطل برضه
    وكمان إنسان تحب تصاحبه
    لإن عنده أجمل صفات ممكن تبحث عنها فى أصحابك
    طيب وبريء وصريح ونشيط ودمه خفيف جدا وصاحب صاحبه
    لما تلاقوا حد بيحب الصقور والطيور والحيوانات والسيارات إعرفوا إنه قمة فى الرومانسية
    لإن الرومانسيين دايما بيخافوا إن حد يجرح مشاعرهم
    كلمة صغيرة ممكن تضايقهم مدة طويلة
    وبسمة صغيرة ممكن تفرحهم طول العمر
    علشان كده أنا مش مستغرب لما بيقول إنه مش بيفرق معاه الإنطباعات الأولى ولكن المعاملة هى اللى بتفرق معاه..
    أنا واحد من الناس اللى إتشرفوا برؤية زيزو فى الحقيقة
    وهو فى الحقيقة بنفس شخصيته فى المنتدى
    شاب جميل ومصرى أصيل وإبن بلد
    الحلقة دى جميلة جدا وممكن أفضل أكتب كلام كتير جدا
    بس مش عايز أثقل على القراء
    قبلة منى لزيزو

    وللشاطر الشاطر حسن كل تحية على ما يقدمه لنا من موضوعات جميلة وجهود وفيرة
    وقدرته الفائقة على أن يبصر دائما مواطن الجمال فينقلها بتلذذ وبنكهة رائعة المذاق
    التعديل الأخير تم بواسطة أحمد ناصر ; 13-04-2012 الساعة 06:23 PM

  6. #6

    تاريخ التسجيل
    Mar 2009
    الدولة
    قلب أبى
    المشاركات
    7,715
    موضوع رائع

    وفعلاً .. نِعم الضيف والمضيف

    أهلا بالصقر المصري زيزو

    منور ضفاف النيل

    تعرفت أكثر على شخصك وفكرك الراقي

    وربما لم يختلف إنطباعي الأول عن الآن

    فأنت نفسك .. بنفس رقيك
    عيبك الوحيد زيزو .. خسااااااارة انك مش زملكاوي

    تسلم حسن على موضوعاتك الجميلة وفي انتظار الضيف القادم
    التعديل الأخير تم بواسطة فراشة ; 13-04-2012 الساعة 07:48 PM




    أسباب سقوط الأمم والحضارات: النظام الإلهى للانذار المبكر






  7. #7

    تاريخ التسجيل
    Nov 2005
    الدولة
    بلــــــد الغريـب
    المشاركات
    5,695
    السلام عليكم ورحمة الله وبركاته...
    مكنش ينفع خالص
    إنى اشوف اسم
    زيزو بدون ماألقى التحية
    حتى لو لم أقرأ الموضوع بعد.
    وواثقة إنى هسعد جدا بالموضوع
    وهستمتع جدا بالحوار
    عمومـــا
    مسائك جميل يازيزو
    ورجعالك بعد قرأة الموضوع



    حسن
    انا متأكدة إنى هاستمتع جدا بحوارك
    بس
    الشكر بعد القرآة

    إنتظرونـــــــى





    الحمد لله
    الحمد لله
    الحمد لله



  8. #8

    تاريخ التسجيل
    Aug 2005
    الدولة
    مصــر
    العمر
    34
    المشاركات
    7,421
    أفتكر من كام سنة في أحد لقاءات المنتدى شفت زيزو .. من بعيد
    كانت ابتسامته على وشه برضه زي ما بنشوفها هنا

    أنا كمان باقتنع ان الإنطباعات الأولى مش بالضرورة تدوم أو تصدق لازم نتعامل
    كمان مش كل حاجة ظاهرة بتبقى هي الحقيقة كاملة

    الزمن ده اتقلبت فيه موازين كتير بحيث أصبحت معاني زي الصدق والوفاء والطيبة والتلقائية والتسامح وغيرهم حاجات استثنائية نادرة
    بل إنها لو وجدت في انسان أحيانا بيوصفها المجتمع بصفات عكسية..أخفها إنك تلاقي اللي يندهش إن فيه حد كده فعلا بدون تصنع

    عن نفسي بشوف إن اللي بيملك ولو معنى أصيل واحد من اللي دهستهم الدنيا هو بالتأكيد انسان
    قوي يستحق الإحترام



    قد ايه سعيدة بمعرفتك يا زيزو

    وَلـَنْ ينجبَ الزَّيفُ إلا الدَّجَلْ !

  9. #9

    تاريخ التسجيل
    Aug 2005
    الدولة
    مصــر
    العمر
    34
    المشاركات
    7,421
    الشاطر حسن
    الشكر أصبح كلمة بلا معنى معك
    ربنا يكرمك


    وَلـَنْ ينجبَ الزَّيفُ إلا الدَّجَلْ !

  10. #10

    تاريخ التسجيل
    Jun 2003
    الدولة
    اسكندرية
    العمر
    59
    المشاركات
    8,428



    اخى العزيز والحبيب والجميل

    زيزو

    مفاجاه جميله ان اجد موضوع مميز عن اخ جميل زى زيزو

    مهما كان الانطباع من خلال المنتدى ومن خلال الكلمات

    تختلف كثيرا عن اللقاء

    شاب جميل مؤدب مبتسم ابتسامة ثقه وامل

    مرح وايضا جاد فى تصرفاته وسلوكه

    تقدر تقول عليه بمنطق ولاد البلد

    راجل جدع رغم صغر سنه

    وعن نفسى احبه جداااااااا واثق فى رايه جدا واحترمه جدااااااااااااااااا

    اتمنى ان اراه كثيرا وتكون لقاءاتنا مستمرة ومتصله

    حقيقى سعدت جدا بهذا الموضوع

    واشكر جدا اخى العزيز الشاطر حسن عنه

    وكل مرة تتحفنا بموضوع اقوى وامتع مما سبقه

    تسعدنا رشاقة كلماتك وعمق حوارك

    لك منى خالص التقدير والاحترام



صفحة 1 من 9 123 ... الأخيرةالأخيرة

المواضيع المتشابهه

  1. بهية البراوية على ضفاف النيل
    بواسطة الشاطر حسن في المنتدى تحت دائرة الضوء
    مشاركات: 92
    آخر مشاركة: 22-03-2012, 11:29 AM
  2. ابن البلد على ضفاف النيل
    بواسطة الشاطر حسن في المنتدى تحت دائرة الضوء
    مشاركات: 50
    آخر مشاركة: 01-03-2012, 12:15 PM
  3. على ضفاف النيل
    بواسطة الشاطر حسن في المنتدى تحت دائرة الضوء
    مشاركات: 38
    آخر مشاركة: 18-01-2012, 07:09 PM
  4. صحيفة إنجليزية: نهاية أجوجو على ضفاف النيل ...
    بواسطة M . B في المنتدى قاعة الرياضة
    مشاركات: 3
    آخر مشاركة: 14-05-2009, 12:07 PM
  5. لحظة فضفضة ..على ضفاف النيل
    بواسطة منال درويش في المنتدى قاعة الشعر العامي
    مشاركات: 14
    آخر مشاركة: 14-03-2006, 09:45 AM

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
تابع صفحتنا على الفيس بوك