يمنع منعا باتا وضع روابط تحميل لأي موسيقى أو أغاني أو برامج أو أي ملفات أو مواد ذات حقوق ملكية فكرية
وأي مشاركة مخالفه لحقوق الملكية الفكرية والنسخ والتوزيع مهما كانت سيتم حذفها وإيقاف عضوية صاحبها فورا
برجاء مراجعة قوانين المنتدى

صفحة 1 من 3 123 الأخيرةالأخيرة
النتائج 1 إلى 10 من 29

الموضوع: ايمان الشامي في محطات أبناء مصر

  1. #1

    تاريخ التسجيل
    May 2004
    الدولة
    القاهرة
    العمر
    47
    المشاركات
    8,981

    Icon18 ايمان الشامي في محطات أبناء مصر





    بسم الله الرحمن الرحيم

    السلام عليكم ورحمة الله
    اهلا ومرحباً بك ايمان الشامي واللا نقول د/ إيمان ..دلوقتي بقت رسمي
    وفرصة نبارك لك على الدكتوراه وربنا يوفقك دايما لما فيه الخير
    اهلا بك معنا في محطات ابناء مصر وسعيدة بتواجدك معنا في هذه الجولة ..


    و عليكم سلام الله و رحمته و بركاته ريهام

    اهلا بيكِ و بكل أعضاء المنتدى..و ربنا يبارك فيك
    أكيد هكون سعيدة و ليا الشرف بتواجدي في موضوعك الجميل

    بداية يا ريت تعرفينا متى كان إشتراكك في المنتدى وكيفية التعرف عليه؟

    أول معرفتي بالمنتدي كانت بالصدفة البحتة الحقيقة، عن طريق سيرش عن حاجة – للأسف مش فاكراها- لأني في المنتدى من سنة 2006-و رابط جوجل جابني للمنتدى- اللي هو أول منتدى أدخله في حياتي..و هو الوحيد اللي أنا فيه.



    نصل لأول محطة لكِ في المنتدى
    يا ترى في اي من القاعات وما هو الموضوع الذي سنقف عنده..
    وما هو سب اختيارك لتلك القاعة ولهذا الموضوع لنقف عندهما في اولى محطاتنا في المنتدى؟


    لو حبيت أبدأ بأول قاعة- هتكون قاعة المسابقات..اللي هي أول قاعة بدأت فيها التفاعل في المنتدى، و لها معايا ذكريات كتير جدا- بوجه عام- ضحكت فيها كتير من قلبي بجد بسبب المسابقات اللي بين الأعضاء، أو بسبب تعليق كنت أكتبه أو يتوجه ليا من أي حد من أصدقائي في المنتدى و يكون بينا موقف خارجي شخصي..و نيجي نغتت على بعض، من غير ما حد يكون فاهم احنا بنتكلم عن إيه-ده غير إن القاعة دي بشكل عام،قعدت فيها كتييير جدا قبل ما أبدأ التفاعل في قاعة المناقشات..اللي برده ليا فيها ذكريات كتير
    و لو حبيت أختار موضوع معين في قاعة المسابقات..هيكون موضوع
    قاعد تسمع إيه بالظبط لهايدي دياب
    لأن الموضوع ده، كنت بستمتع به جدا، اختيارات الأعضاء المختلفة، كانت بتفكرني بأغاني كتير...و كنت بستمتع بده بصراحة. و دايما بفتكر به المهندس أحمد رحمة الله عليه- لما كنت انزل اغاني حديثة و هو – الله يرحمه- مكنش غاويها اوي، و كان في اعضاء كتير بيسهروا بليل و نقترح على بعض حاجات و نعلق عليها كمان..الحقيقة، كان بيجمعنا جو دافي و جميل و عائلي.

    لكن ده ميمنعش إن موضوع " عبر عن حالتك" ..و أنا عارفة إن لكي عليه تحفظ خاص بحبه جدااااااا، و قريب بجد من قلبي

    انت عارفة شعوري الطيــــــــب تجاه الموضوع

    ما هو الموقف الذي لا تنسينه كلما ذكر اسم "منتدى ابناء مصر" ؟

    بصي ريهام مقدرش أقول إنه موقف محدد بصراحة أد ما هو معنى كبير بالنسبة لي- و هو إنه عن طريق المنتدى عرفت يعني إيه صداقة تبدأ من العالم الافتراضي" الانترنت" و صحيح في صداقات تحولت من خلال الشاشة..لصداقة حقيقية..و حميمة- كمان ليا مواقف و خبرات سيئة لنفس المبدأ..لكن بما إني بحب أنظر للنصف الممتلئ من الكوب فأول شئ بفتكره مع منتدى أبناء مصر- هي خبراتي اللي اكتسبتها..و الناس العزيزة جدا على قلبي اللي عرفتهم من المنتدى.


    عبارات... لمن توجهينها:
    - غيبتك طالت
    أقولها لنفسي بخصوص غيابي عن المنتدى

    - اي ان كان ما حدث اللي فات مات
    لا الحقيقة مقولهاش لحد – على الأقل جوا حدود المنتدى-

    - وجودك بيفرق كتير يا ريت تواجدك يكون اكثر
    أنا الحقيقة مش عارفة المفروض الجملة دي أقولها لحد بشكل عام و لا لحد معين في المنتدى
    عموما..لو شخص بشكل عام . يبقى بقولها لشخص عزيز جدا على قلبي- بتعلم منه كتير- و هو أستاذ ليا
    و لو لشخص معين في المنتدى- يبقى اقولها بشئ من التعديل : لوسام: (سوما)..يمكن هي نفسها تستغرب لاختياري لها- بس انا و سوما بينا مكالمات على فترات متباعدة صحيح- لكن مكالمتي معاها داايما بتحمل كم من الضحك كفيل بتغيير حالتي المزاجية- و دي فرصة إني أوجه لها تحية و وردة" بنفسجي"

    - هذا المكان ضم الكثير من الذكريات.. سعيد انني كنت طرف معك فيها
    الجملة دي..أقدر أوجهها لأكتر من شخص يا ريهام- تقريبا كل أصدقائي المقربين اللي عرفتهم من المنتدى و اتنقلت صداقتنا لعالم الواقع..لكن لو حبيت أختار على سبيل المثال..هختار هايدي دياب..

    - ألم يحن وقت مراجعة النفس..
    أنا أقل كتير من إني أوجه نصيحة زي دي لأي حد..و لو مضطرة أوجهها لحد..يبقى لنفسي أولا.


    عادة تفسر المواقف حسب رؤية كل منا ..
    ما هو الموقف الذي اثر فيكِ وكنتِ أسأتِ تفسيره وتبين لك عكس رؤيتك بعد ذلك


    هقولك ريهام- هو الحقيقة كان طبع سئ جوايا- و لله الحمد أقدر أقول إني قدرت اتجاوزه – لحد كبير جدا- و هو إني مكنتش ببص للأمور من وجهة نظر الشخص الآخر..و ده كان بيخليني أسئ الظن بتصرف ناس معينة- ده في الحياة بشكل عام يعني- لكن بشكل خاص، كنت مرة أقحمت نفسي بفضول غبي في مشاركات عضوة- و سمحت لنفسي إني أتجاوز حدودي و أسألها عن سبب التعليقات- و رغم إن بيجمعني بها علاقة طيبة- إلا إني مكنش يصح أبدا أعمل كده و أقولها كمان إن مشاركتها المتعددة اللي بتحمل طابع واحد مبيتغيرش تقريبا- هيخلي ناس ممكن تسئ الظن بيها- إلا إنها كانت بتحمل كثير من الأدب و اللباقة و الذكاء اللي عرفتني إن أصلا تصرفي هو الخطأ بعينه أما طبيعة مشاركتها فهي مجرد استنتاجات من أعضاء – فضولية- ، و بصراحة كان درس ليا- لأني بطبعي مش فضولية أبدا- و زي مبسمحش لأي حد مهما كانت طبيعة علاقتي به انه يتدخل في شئوني الشخصية طالما انا متكلمتش..فالمفروض أعامل الناس بالمثل..و ده الشئ اللي انا ملتزمتش به، و الحمد لله اني اتعلمت الدرس


    ونتوقف عند ثاني محطاتك في المنتدى ..أين ؟
    ماذا يعني لك هذا الموضوع؟ وهل له موقف تتذكرينه؟


    هختار في المحطة دي قاعة الصالون الأدبي و الثقافي..أنا بعشق عالم الأدب ريهام بكل جوانبه، الرواية الأدبية بالنسبة لي- هي العالم اللي بهرب له من أي ضغوط- هي السما اللي بطير فيها- هو الواقع الاختياري – مش الإجباري- و القاعة الأدبية قرأت فيها موضوعات كتير و عرفت منها معلومات عن أعمال أدبية مكنتش قرأتها
    و القاعة دي هي اللي سمحت ليا إني أكتب موضوعين من أجمل المواضيع لقلبي.

    موضوع شيكاجو

    و موضوع أبحر معنا

    أنا عارفة إن ممكن كتير يقولوا إيه الغرور ده لأني اخترت موضوعين أنا اللي كتبتهم..بس أنا حبيت أشارككم موضوعين بحبهم جدا من قلمي المتواضع- و خصوصا لأن شيكاجو خصيصا لها معزة خاصة جدا في قلبي-و ذكريات جميلة جدا- لإني افتكر إن بسببها اجتمعت في أكتر من لقاء مع مجموعة من الأصدقاء بناقشها و كمان كان في فترة بسافر فيها كتير و الرواية دي بالذات مكنتش بتفارق حقيبة اليد ليا- و كنت بقرأها أثناء السفر.و لأن شخصية " شيماء محمدي" أحد أبطال الرواية" أثرت فيا بشكل كبييييييير جدا.


    في بعض الاحيان تكون الردود في الموضوع لها صدى وقوة لدرجة تساعد على إنجاح الموضوع أكثر...
    اختاري لنا ردين من تلك الردود التي توقفتِ عندها واعجبتِ بها وماذا استوقفك فيها؟


    هستأذنك في شئ ريهام- أنا مش هقدر أقول اسم الموضوع لإن الردود فيه كانت حول خلاف أو فلنقل جدال- لكن الطرفين لا انكر أبدا- إنهم كانوا على درجة من الوعي الشديد لمفرادتهم اللغوية ن فأصبح الجدال بينهم مثير للغاية في متابعته. كنت الحقيقة بتابع و أنا صامتة تماما..حتى التجاوز اللي كان بيحصل بعض أوقات- كنت ببتسم لما أقراه لأنه كان على درجة من الحرفية في الكتابة لا تسمح لأي مشرف إنه " يمسك فيه غلطة" – و يمكن بعد كده في المحطة القادمة.هتكلم أكتر أد إيه أنا بيعنيني قراءة مناقشات و ردود الأعضاء في حالة الخلاف أكتر من الاتفاق.


    في تقديرك ما هو :
    - القرار الذي تأخر كثيراً في المنتدى


    إن ابن البلد يسمح لأعضاء المنتدى إنهم يساهموا ماديا في أي شئ يخصه-

    - القرار الذي تم التسرع في أخذه

    في الوقت الحالي..مش عارفة، يمكن لأن بقى لي فترة بعيدة


    ما هو مفهوم حرية التعبير عن الرأي بالنسبة لكِ؟؟ ومتى تقولين اهلاً بالديكتاتورية؟

    حرية التعبير عن الرأي..تتلخص في الأدب ثم الأدب ثم الادب، الالتزام بأدب الحوار أو التحدث..ممكن أعبر عن رأيي مهما كانت جرأته بأسلوب مؤدب أولا..و مهم جدا برده إني لا أتجاوز..اختصارا
    انا مؤمنة بشدة بمبدأ..انت حر، ما لم تضر

    و أهلا بالديكتوراية ألف مرة..لو كنت في موقع قيادي مع ناس جهلة، و متملكش القدر الكافي من الوعي-..و لحد ما أيسر لهم سبل الوعي و الثقافة و يتعلموا التحضر و المدنية..بمنتهى الحسم..هكون ديكتاتورة

    كلمة توجهينها لأحد أعضاء المنتدى أو أكثر... فلمن وماذا تقولين فيها؟

    أقول..لابن البلد
    شكرا إنك كنت سبب في معرفتي بناس جميلة و اتعلمت منهم و على أيديهم كتير" سلبا أو إيجابا"


    وها نحن نصل إلى المحطة الثالثة والأخيرة
    يا ترى سنختم جولتنا في اي من القاعات وما هو الموضوع الأخير لنا فيها؟


    ختار قاعة المناقشات
    من أحب القاعات لقلبي حتى و لو مشاركتش بصفة مستمرة
    و ده لأكتر من سبب الحقيقة
    السبب المباشر طبعا..إنها بتضم مواضيع جادة و مهمة و حيوية لأي شخص..مهما كانت انتمائاته..أو فكره
    و ثانيا..لإن أكتر وسيلة ناجحة ممكن تعرفك شخصية اللي أدامك..لما تختلفي معاه
    و الاختلافات بين آراء الاعضاء كانت من أكتر سبل تعرفي على شخصية اللي أدامي..في أعضاء كانت لالالالالالالالالالالالا تقبل إن حد يختلف معاهم..و بدون ذكر أسماء محددة ..أفتكر عضو معين لما كان يرضى عن حد..يثني عليه بكلمات قليلة فعلا..لكن تحسسك- إنه ملك و بيثني على وزيره بغرور- و لما كان عضو يختلف معاه- بدون أي هوادة..لا يتردد لحظة في التشكيك في وطنيته أو انتمائه لبلده أو حتى دينه- و ده في رايي قمة التخلف و الرجعية.

    و لو حبيت آدي أمثلة للموضوعات اللي بحبها جدا في قاعة المناقشات..مش هكتب مواضيع ليا علشان كده هيبقى كتير الحقيقة
    بس هقول على سبيل المثال فقط لا غير..موضوع " انا لا أرفضك و لكني أخالفك الرأي"
    لأني أصلا الحقيقة..عندي حساسية خاصة تجاه ثقافة الاختلاف هنا في مصر
    يمكن لإني بئالي تلات سنين تقريبا شغلي مع أجانب و بتربطني بمعظمهم علاقة صداقة شخصية بعد كده..فاتعملت منهم أكتر فالموضوع ده. بس هو الأصل إن طبعي من صغري إني لما اختلف مع حد..بقدر او بحاول على الأقل قدر المستطاع إني أفصل بين المواقف..مش اتصرف بهمجية و أختار أسهل الطرق و هو الصوت العالي أو الغلط أو حتى الإساءة و الانتقام.أو زي ما ناس كتير أوي بتتصرف" بمعيلة" و تقاطع اللي أدامها نهائي..كلنا بشر، و محبش إني أمسك سوط و أجرح غيري أو أحسسه إني أعلى منه درجة..تقبل خطأ الآخر..مش فضل همن بيه على الأدامي..بل هو حق وواجب عليا لازم ألتزم بيه و أعبر عنه و أترجمه في هيئة تسامح أولا..و تفهم لظروفه و دوافعه ثانيا.


    هل يوجد موضوع كنت تود الحديث عنه لم تتح الفرصة للكلام عنه في اللقاء؟

    و بالنسبة لاختياري لموضوع كنت أتمنى إني أتكلم عنه
    اسمحيلي إني أختار موضوع أتمنى فقط إني اتوجه له و لصاحبته بتحية مخلصة
    هختار موضوع " دعوة لكتابة خاطرة من سطر واحد" للعزيزة المبدعة جيهان محمد على
    لإنه فعلا..بيتيح لي إني أقرأ كلمات رائعة قليلة..و معبرة جدا

    و لو يزيد طمعي في فرصة تانية..في موضوع ليكي انت اسمه
    ألبومات عمرنا
    لأن الموضوع ده أثر فيا جدا لما قرأته..الحقيقة استرجاع الذكريات..بالنسبة لي شئ جميل و مش مؤلم في معظمه، و حتى لو الخبرة سيئة و افتكرتها بفتكر انا اتعلمت ايه منها و ده كافي انه يخليني ابتسم لما افتكرها تاني.


    كل الشكر لكِ إيمان الشامي على إتاحة الفرصة لي وللأعضاء الكرام للتجول معكِ عبر اروقة هذا المكان الجميل والمحبب إلى نفسي وأتمنى ان تكون سعدت معنا فيها

    و الله يا ريهام أنا اللي سعيدة فعلا إن ك سمحتي ليا باسترجاع ذكريات جميلة
    لك مني كل الشكر و التحية
    و أتمنى إني مكتش ضيفة تقيلة
    و السلام ختام،،



    أخواني وأخواتي...إلى الملتقي يوم السبت 12 نوفمبر مع ضيف جديد في محطات أبناء مصر

    دمتم بكل خير
    في رعاية الله،،،





    يارب إن كان إدراك الحكمة صعباً.. فاجعل برحمتك الصبر والرضا سهلاً.

    على الطريــق

  2. #2

    تاريخ التسجيل
    Feb 2004
    الدولة
    جمهورية مصر العربية
    المشاركات
    21,877
    محطة أخرى جميلة
    وطبعا علشان د.إيمان الشامى هى بطلتها
    ألف مبروك يا إيمان على الدكتوراة
    إستمتعت كثيرا بالحوار وبأسلوبك فى الإجابة على أسئلة ريهام
    صحيح أغلب الإجابات ديبلوماسية
    وبتفتح أبواب للفضول

    لكن بجد المحطة كانت متميزة بقدر صاحبتها
    وإن شاء الله ألقى نظرة على الموضوعات التى قمت بإختيارها غدا ((على رواقة))
    وأتمنى أن تعودى مرة أخرى للمشاركة بفاعلية فى المنتدى يا د.إيمان
    وكل سنة وإنت طيبة بمناسبة عيد الأضحى

  3. #3

    تاريخ التسجيل
    Apr 2009
    الدولة
    مصر
    المشاركات
    13,188
    أهلا دكتورة إيمان
    كانت فرصة جيدة وسعيدة أن نتعرف على أفكارك عن قرب ..
    وأن نجدك بيننا مرة أخرى بعد غياب وأتمنى أن تعودى من جديد أكثر نشاطا كسابق عهدك ..
    كان لى شرف متابعة احدى الموضوعات المذكورة فى حواراك وهو " أبحر معنا " ..موضوع كان رائع جدا ..قيم جدا ..كنت أتمنى أن تستكمليه ..وأتذكر مشاركتك عن سانتياجو ..ومشاركتى أنا الأخرى ..لأى مدى كانت مقتطفاتك رائعة وأسلوبك ..
    كما أعجبنى حديثك عن الإختلاف .. وأتفق معك أن الإختلاف مثرى أكثر ..ومحصل أعمق من مجرد التوافق والإتفاق ..ولكن لمن يحسن التقدير ..

    شكرا جميلا لك وللعزيزة بوكى


  4. #4

    تاريخ التسجيل
    Aug 2008
    الدولة
    قلب البشر
    المشاركات
    2,156
    رحلة أخرى جميلة وموفقة
    وشكرا أختى ايمان الشامى

    على هذة المحطات الجميلة التى من خلالها
    قدرنا نقرب من شخصيتك وفكرك وطريقة حوارك جميلة
    وشكر خاص للأستاذة ريهام
    لانها مع كل ضيف يتضيف لنا جديد من خلال الموضوع الجميل جدا جدا
    وانا لسة متابعاكم للاخر بأذن الله

    شكرا


  5. #5

    تاريخ التسجيل
    Jul 2007
    الدولة
    بين نبضة .. وقبضة .. وسقطة ..أعيش أنا
    المشاركات
    8,215
    اهلا بالدكتور المختفية
    والله برافو على ريهام انها عرفت تخطفك وترجعك للمنتدى من تانى ...
    حقيقى مفتقدين وجودك يا ايمان ومفتقدين مواضيعك الحلوة
    اشكرك يا حبيبة قلبى على تحيتك الجميلة واطرائك اللى اسعدنى على موضوع من احب المواضيع لقلبى (خاطرة من سطر واحد )
    وبالمناسبة دى أحب أقولك على سر صغير
    الموضوع دا انا كتبته كنوع من التدريب الشخصى ليه لانى اكتشفت انى بستطرد جدا فى كتابة الخواطر او خلينا نقول الافكار الخاصة بالخواطر وبعبر عن الفكرة الواحدة بكلمات كتيرة جدااااااا فحبيت انى اقيد نفسى بقوانين معينة للكتابة والتزم بيها عشان اتعلم الاختصار والاختزال دون الاخلال بالمعنى
    ههههههههههههه المشكلة بقى دلوقتى انى اتعلمت الاختصار اكتر من اللازم وبقت عندى مشكلة فى كتابة الخواطر الطويلة عشان كدا عملت موضوع تانى اسمه (لولاك ما غنت اصابعى )
    بجد حلقة جميلة يا ايمان قربتنا من انسانة اجمل واجمل ...ارجوكى ترجعى تشاركى من تانى لان وجودك بيفرق جدا صدقينى ..تحياتى



    لأننا نتقن الصمت ؛ حمَّلونا وزر النوايا

  6. #6

    تاريخ التسجيل
    May 2006
    الدولة
    بورسعيد
    العمر
    38
    المشاركات
    7,021
    هلا هلا هلا هلا



    محدش يطمع ف الوردة يا جماعة دي لبوكي

    خديها يا ريهام ليكي.قبل ما حد ياخدها

    على ما ارجع تاني
    بسم الله الرحمن الرحيم

    {قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ}


  7. #7

    تاريخ التسجيل
    Aug 2005
    الدولة
    مصــر
    العمر
    34
    المشاركات
    7,421
    لا لا الكلام هنا شكله كبير وعايزله مج نسكافية محترم
    خصوصا وان عندي رغبة شديدة في الإعتراف..وأنا مش متعودة اعترف بنص دماغ

    رجعالك يا ايمان ..
    منورة ع الآخر والله

    تسلم ايدك يا أحلى بوكي

    وَلـَنْ ينجبَ الزَّيفُ إلا الدَّجَلْ !

  8. #8

    تاريخ التسجيل
    Feb 2004
    الدولة
    جمهورية مصر العربية
    المشاركات
    21,877
    اقتباس المشاركة الأصلية كتبت بواسطة ايمان الشامى مشاهدة المشاركة
    هلا هلا هلا هلا



    محدش يطمع ف الوردة يا جماعة دي لبوكي

    خديها يا ريهام ليكي.قبل ما حد ياخدها

    على ما ارجع تاني
    لاااااااااا
    خلاص
    أنا أخدت الوردة لنفسى

    إبقى إديها واحدة تانية بقى

  9. #9

    تاريخ التسجيل
    May 2006
    الدولة
    بورسعيد
    العمر
    38
    المشاركات
    7,021
    طب ده ينفع يا استاذ أحمد!!!!!!!!!!!

    باة انا قلت يا بت يا دكتور ايمان ادخلي اسقي الوردة على ما بوكي تيجي

    اجي الاقيها اتخطفت..و مافيش بدالها حتى حزمة جرجير!!!!


    ماشي..متغلاش عليك


    هسيب واحدة تانية، بس هكهربها المرة دي


    بسم الله الرحمن الرحيم

    {قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ}


  10. #10

    تاريخ التسجيل
    Feb 2004
    الدولة
    جمهورية مصر العربية
    المشاركات
    21,877
    اقتباس المشاركة الأصلية كتبت بواسطة ايمان الشامى مشاهدة المشاركة
    طب ده ينفع يا استاذ أحمد!!!!!!!!!!!

    باة انا قلت يا بت يا دكتور ايمان ادخلي اسقي الوردة على ما بوكي تيجي

    اجي الاقيها اتخطفت..و مافيش بدالها حتى حزمة جرجير!!!!


    ماشي..متغلاش عليك


    هسيب واحدة تانية، بس هكهربها المرة دي


    كله إلا الكهربا
    خلاص ماشى
    ح أسيب الوردة المرادى لبوكى زى بعضه

صفحة 1 من 3 123 الأخيرةالأخيرة

المواضيع المتشابهه

  1. nariman في محطات أبناء مصر
    بواسطة boukybouky في المنتدى تحت دائرة الضوء
    مشاركات: 43
    آخر مشاركة: 18-11-2011, 05:55 PM
  2. اسكندراني في محطات أبناء مصر
    بواسطة boukybouky في المنتدى تحت دائرة الضوء
    مشاركات: 19
    آخر مشاركة: 18-11-2011, 04:52 AM
  3. دكتورة / ايمان الشامي .. ميلاد سعيد
    بواسطة العسل المر في المنتدى قاعة التعارف والمناسبات
    مشاركات: 31
    آخر مشاركة: 17-08-2010, 03:32 PM
  4. (الاخت ايمان الشامى) كل سنة وانتى طيبة .
    بواسطة ناصرالصديق في المنتدى قاعة التعارف والمناسبات
    مشاركات: 32
    آخر مشاركة: 14-08-2008, 10:14 PM

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
تابع صفحتنا على الفيس بوك