يمنع منعا باتا وضع روابط تحميل لأي موسيقى أو أغاني أو برامج أو أي ملفات أو مواد ذات حقوق ملكية فكرية
وأي مشاركة مخالفه لحقوق الملكية الفكرية والنسخ والتوزيع مهما كانت سيتم حذفها وإيقاف عضوية صاحبها فورا
برجاء مراجعة قوانين المنتدى

النتائج 1 إلى 9 من 9

الموضوع: حوار مع ............. النظام

  1. #1

    تاريخ التسجيل
    Jun 2004
    الدولة
    الإسكندرية
    العمر
    55
    المشاركات
    5,002

    حوار مع ............. النظام

    ومع إن النظام دي كلمة جميلة .. إلا إن أكيد كلنا لما قرينا العنوان ما جاش في بالنا غير النظام الفاسد .. البائد .. اللي بوظ علينا جمال الكلمة .. وخلانا نطالب بإسقاط النظام
    ومع سقوط النظام .. قلت أما ازوره في السجن .. أشمت فيه شوية .. وأحاسبه على اللي عمله فينا طول السنين اللي فاتت .. وقد كان

    قابلت السجان – هاي .. أنا الشاب السيس اللي أسقط الرئيس
    السجان – أيوه يا شاب سيس .. خير عايز مين ؟؟
    - ممكن أقابل النظام البائد
    - لا .. ممنوع يا فندي .. خايفين حد يإذيه .. إنت عارف الثورة .. سلمية
    - اطمن خالص .. أنا مش هاضربه .. أنا هاعرفه غلطه بس
    - إذا كان كده معلش .. اتفضل بس ما تطولش

    دخلت .. النظام البائد كول خالص .. وعايش حياته .. ولا على باله
    أنا – أخيرا وقعت يا مجرم .. كنت فاكر إنك هتفضل طول عمرك .. وطول عمرنا .. تذل فينا .. وتسرقنا .. وتقتل أحلامنا
    النظام – هأأو .. لو كنت فاكر إني سقطت فعلا تبقى غلطان .. لسه بدري عليا أوي يا مان
    – لأ طبعا .. إنت وقعت .. ورجالتك في السجن ومتشردين .. وأيامك معدودة ونرجع نصلح كل حاجة .. وبلدنا تبقى أحسن بلد
    - فيه ناس في السجن أيوه .. بس مش دول اللي كانوا بيفسدوا ف البلد .. المفسد الكبير لسه بره .. وما حدش هيقدر عليه
    - مين ؟؟ مين ده ؟؟
    - أنت يا كابتن
    - أنا ؟؟
    - اتخابث بقى .. يعني مش عارف ؟؟
    - انت اللي خبيث .. ومجرم .. ما تحاولش تنكر إن انت الفاسد .. والقاتل
    - تعرف .. إنت صعبان عليا .. أنا طول عمري كنت عارف إن أنا فاسد وقاتل ومجرم .. كنت عارف .. وباعمل كده وانا مستمتع جدا باللي باعمله .. انت بقى صعبان عليا إنك مفسد كبير ومش عارف .. يعني حتى مش بتستمتع بالفساد اللي انت فيه

    - لأ طبعا .. أنا عارف نفسي كويس .. مش ممكن اكون أنا المفسد .. أنا قمت بالثورة عشان أقضي على الفساد .. والثورة نجحت
    - طيب أنا بقالي 60 سنة بافسد في مصر .. وباسرقها .. واخرب فيها .. تقدر تقوللي إيه اللي كان حايشك تجتهد في عملك .. وتتقنه .. وتحافظ على مواعيده بدل ما تهمل .. ويكون كل همك تزوغ وحد يمضيلك التايم شيت
    - بس .. أصل .. أنا مهما اشتغلت كويس ما كانش هيبقى فيه فايدة .. لإنك حاطط إدارات فاشلة .. بتقضي على أي جهد أعمله
    - ياراجل .. طب عيني ف عينك كده ؟؟ .. يمكن أصدقك في أول ما اشتغلت .. بس يا ترى انت حاولت تصلّح المكان اللي انت فيه ؟؟ .. وللا اتعودت على الهرجلة .. وبقيت جزء منها .. فاكر الصيف اللي فات لما كنت مسافر المصيف .. وقعدت تتحايل عشان تزوغ بدري .. وفي الآخر رحت ساعة ومشيت .. عشان تاخد يوم زيادة في المصيف ؟؟ يا ترى أنا برضه اللي خليتك تعمل كده بالقوة والأساليب القمعية اللي بتتهمني بيها
    - ؟؟؟؟؟
    - طب الصيف ده بقى .. مش من يومين كلمت صاحبك اللي في العلاقات العامة عشان تتخطى زمايلك .. وتاخد دورهم في المصيف مع إنك طلعت الصيف اللي فات وهم ما طلعوش ؟؟ يا ترى أمن الدولة هو اللي ورا اللي عملته ده ؟؟
    - ما تحاولش تخدعني .. إنت اللي أفسدت الحياة العامة .. وغيرت أخلاق الناس كلها .. ولازم يكون فيه نهاية لده كله
    - نهاية إيه يا عم .. هو النظام الفاسد المستبد برضه هو اللي قال لك تقاطع أخوك ابن امك وابوك عشر سنين .. وانت مع الناس كلها زي السمنة عالعسل .. ومع قرايبك حاجة تانية خالص .. وكل ده عشان غلبك في دور طاولة
    - ؟؟؟؟؟؟؟؟
    - طب بلاش .. أنا كنت السبب .. وإنت اللي أخلاقك عالية .. و عشرة على عشرة .. طب بعد الثورة .. وبعد قعدتك في التحرير .. وحبك للناس كلهم .. وحواراتك اللي كانت مالية الفضائيات عن أخلاق التحرير .. يا ترى بعد الثورة ما صالحتوش ليه .. ده انت حتى كلمتوش بالتليفون تبارك له على إسكات النزام .. وللا برضه النزام الفاسد هو السبب .. إخيه عليك .. دي أخلاق الثورة دي ؟؟
    - إسمع اما اقولك .. انت هتتحاكم يعني هتتحاكم .. قتل المتظاهرين .. وسرقة البلد دي هتتحاسب عليها .. وهناخد حق بلدنا اللي خربتها دي
    - برضه هتقول لي انت اللي خربتها .. يا راجل بص م الشباك كده .. بص ما تخافش .. المفسد الحقيقي تحت اهه
    - مين ؟؟ مافيش حد في الشارع
    - عربيتك يا لورد .. عربيتك اللي دخلت بيها الشارع رونج .. وركنتها صف تاني .. مع إن النظام سقط من 5 شهور .. ها .. هتقول إيه على دي كمان ؟؟
    - ؟؟؟؟؟؟؟
    - طب في الامتحان الأسبوع اللي فات .. غشيت وللا لأ ؟؟ ما تقول .. وللا مكسوف
    - ما تاخدنيش في دوكة .. إنت نسيت انك كنت ديكتاتور .. ومستبد .. أنا عشت عمري كله ما باسمعش منك غير الشعب الجاهل .. الشعب اللي مش مؤهل للديمقراطية .. الشعب المضلل .. أخيرا أسقطتك .. وهابني البلد بالديمقراطية بجد
    - هههههه .. على مين الحوار ده ؟؟ على بابا ؟؟ ده انت ف أول اختبار فشلت فشل ذريع .. وبعد ما كنت فرحان انت وصحابك وعمالين تقولوا إيد واحدة .. أول مصلحتكم ماختلفت مع بعض .. انت اتهمتهم بالجهل .. وهم اتهموك بالعمالة .. إنت احتقرتهم .. وهم خونوك .. وشبطتم في بعض .. وماحدش بقى طايق التاني .. وقريب أوي هتمسكوا ف بعض وتضربوا بعض .. وده اليوم اللي انا مستنيه .. وقريب قوي هتشوفني في الشارع تاني
    - ده بُعدك .. أنا مختلف معاهم عشان هم مش فاهمين .. مش عشان مصالح شخصية .. وعمرنا ما هنخسر بعض
    - وهو انا كنت باقول غير كده ؟؟ طول عمري شايف ان انا بس اللي بافهم والشعب ما بيفهمش .. دلوقت بقت حلوة منك وكانت وحشة مني .. إنت المستبد الحقيقي .. يا ويل الشعب منك
    - ؟؟؟؟؟؟؟؟؟
    - بص يا بني .. أنا دلوقت في السجن .. وكمان في آخر عمري .. هاتحاسب .. هاتحاكم .. وهاتعدم .. أو اتسجن .. يعني من الآخر مش طمعان في حاجة تاني في اللي باقي من عمري .. بس هاقول لك كلمتين .. اسمعهم .. يمكن اقابل بيهم ربنا .. لو نفعوك وعملت بيهم
    - قول
    - النظام الحقيقي اللي كان بيفسد في البلد ولازم يتصلح .. هو انت شخصيا .. انت نفسك .. عشت عمرك كله تشتم النظام وتعمل أسوأ منه .. عشت طول عمرك تلعن الواسطة والمحسوبية .. وأول ما يبقى عندك مصلحة تجري تشوف لك واسطة .. عشت طول عمرك تحارب الفاسدين اللي بيخالفوا القانون ويخربوا في البلد .. وبعد الثورة أما بقى قرارك في إيدك ما سبتش شارع في البلد ما طلعتش فيه عمارة مخالفة .. عشر تدوار .. عشرين دور .. وسلم لي على شوارع البلد اللي لا هتستحمل ميه ولا كهربا ولا غاز ولا مجاري .. مش دي برضه البلد اللي انت بتحبها وعايز تنضفها من الفاسدين .. وللا دي بلد تانية ؟؟ .. قبل ما تحاسبني يا حبيبي روح حاسب نفسك .. روح طهر نفسك .. روح غير نفسك .. روح اتصالح مع اصحابك اللي كانوا واقفين معاك في الثورة .. وكنتم فعلا إيد واحدة زمان .. وسلم لي عالنظام

    مع تحيات .. محمد عبد السلام

    حوارات .. على فيسبوك

  2. #2

    تاريخ التسجيل
    Jul 2007
    الدولة
    بين نبضة .. وقبضة .. وسقطة ..أعيش أنا
    المشاركات
    8,216
    لابد من أن نثور على أنفسنا ايضا... الثورة ان لم تطهرنا من كل سلبيات الماضى لن تنجح ابدا..
    ولكن ايضا هذا لن يحدث فى يوم وليلة فنحن نحتاج الوقت والصبر والحكمة والى هذا الحين نريد القانون وتفعيله بكل حزم وقوة على الجميع دون استثناء حتى يعرف المخطئ انه لن ينجو بخطأه ابدا نحتاج هذا
    مع الكثير جدا من الامن ...
    أشكرك على الموضوع المبدع استاذنا الفاضل الصعيدى ...
    تحياتى



    لأننا نتقن الصمت ؛ حمَّلونا وزر النوايا

  3. #3

    تاريخ التسجيل
    Apr 2008
    الدولة
    القاهرة
    المشاركات
    2,064
    إبداع جميل أخي الصعيدي
    سرداً وحواراً على مستوى الشكل
    وإن كنتُ أختلفُ معك على مستوى المضمون

    هذا النوع من الإبداع الذي يأتي بفكرةٍ يتم تحميل
    المسار الإبداعي عليها
    ومن ثم يتحرك السرد والحوار ليخدم هذه الفكرة
    غالباً مايأتي أقل روعة
    وتنقصه المبررات المُقنعة
    لأن الفكرة المُسبقة هنا تفرض مبرراتها على دراما الحدث
    والمفروض هو العكس بأن تصنع الدراما فكرتها وتقدم مبرراتها

    لا أقلل من جماليات الإبداع هنا
    فأنت أستاذ نتعلم منه في هذا المجال - الدراما الحوارية -
    لكني أرى أنك جئت هنا بفكرة صعدت فوق الحوار
    فجعلته على مستوى المضمون غير مُقنع لأنه تنقصه مبررات الحدث
    الفكرة المُسبقة في هذا الطرح هي أن الخطأ هوا أنا أنت نحن
    وضعتنا كلنا في سلة الخطأ
    ونسيت أنَّه إذا كان رب البيتِ بالدفِّ ضاربٌ فشيمة أهلِ البيتِ الرقصُ
    أعرف أنك حمَّلت رب البيت بعض الوزر
    لكنك حمَّلت الوزر كله لأهل البيت
    والعكس هو الصحيح

    نعم نتحمل الوزر ولكننا لسنا منبعه
    ومن هنا جاء السرد والحوار غير مُقنع ولايحمل من المبررات مايتوازى مع الواقع



    حكيم عيووون

  4. #4

    تاريخ التسجيل
    Jun 2004
    الدولة
    الإسكندرية
    العمر
    55
    المشاركات
    5,002
    اقتباس المشاركة الأصلية كتبت بواسطة جيهان محمد على مشاهدة المشاركة
    لابد من أن نثور على أنفسنا ايضا... الثورة ان لم تطهرنا من كل سلبيات الماضى لن تنجح ابدا..
    ولكن ايضا هذا لن يحدث فى يوم وليلة فنحن نحتاج الوقت والصبر والحكمة والى هذا الحين نريد القانون وتفعيله بكل حزم وقوة على الجميع دون استثناء حتى يعرف المخطئ انه لن ينجو بخطأه ابدا نحتاج هذا
    مع الكثير جدا من الامن ...
    أشكرك على الموضوع المبدع استاذنا الفاضل الصعيدى ...
    تحياتى
    أحسنت أختي الكريمة .. وأحييك على مرورك و تعليقك الجميل
    بالطبع نحن في حاجة للكثير .. وبحاجة لأن نشعر بأننا نعيش فعلا في بلدنا .. وأننا نحن الذين نحكمها .. وبالطبع نعيش فيها في أمان .. كل ذلك سيعجل بلاشك من نجاح الثورة الداخلية على ما اعتادته نفوسنا من عادات سلبية .. أتمنى أن ننجح في التخلص منها قريبا ان شاء الله

    تقبلي أطيب تحياتي أختي الفاضلة

  5. #5

    تاريخ التسجيل
    Jun 2004
    الدولة
    الإسكندرية
    العمر
    55
    المشاركات
    5,002
    اقتباس المشاركة الأصلية كتبت بواسطة حكيم عيووون مشاهدة المشاركة
    إبداع جميل أخي الصعيدي
    سرداً وحواراً على مستوى الشكل
    وإن كنتُ أختلفُ معك على مستوى المضمون

    هذا النوع من الإبداع الذي يأتي بفكرةٍ يتم تحميل
    المسار الإبداعي عليها
    ومن ثم يتحرك السرد والحوار ليخدم هذه الفكرة
    غالباً مايأتي أقل روعة
    وتنقصه المبررات المُقنعة
    لأن الفكرة المُسبقة هنا تفرض مبرراتها على دراما الحدث
    والمفروض هو العكس بأن تصنع الدراما فكرتها وتقدم مبرراتها

    لا أقلل من جماليات الإبداع هنا
    فأنت أستاذ نتعلم منه في هذا المجال - الدراما الحوارية -
    لكني أرى أنك جئت هنا بفكرة صعدت فوق الحوار
    فجعلته على مستوى المضمون غير مُقنع لأنه تنقصه مبررات الحدث
    الفكرة المُسبقة في هذا الطرح هي أن الخطأ هوا أنا أنت نحن
    وضعتنا كلنا في سلة الخطأ
    ونسيت أنَّه إذا كان رب البيتِ بالدفِّ ضاربٌ فشيمة أهلِ البيتِ الرقصُ
    أعرف أنك حمَّلت رب البيت بعض الوزر
    لكنك حمَّلت الوزر كله لأهل البيت
    والعكس هو الصحيح

    نعم نتحمل الوزر ولكننا لسنا منبعه
    ومن هنا جاء السرد والحوار غير مُقنع ولايحمل من المبررات مايتوازى مع الواقع



    حكيم عيووون
    أهلا بك أخي الجميل .. الحكيم .. حكيم عيون

    بمراجعة متأنية للفكرة .. في ضوء ما تفضلت به أخي الكريم من نقد موضوعي بناء .. وجدت أنني فعلا أسرفت في جلد الذات .. وربما وضع الضحية مكان الجلاد
    ربما كنت أعتبر أن الثورة على الأرض قد أسقطت الجلاد فعلا .. ويجب علينا الانتباه للثورة الداخلية التي ما زال الكثير منا لا يشعر بأهميتها
    ربما استفزتني مشاهد تجعل الكثيرين يشعرون - خطأ - بأن الثورة تسببت في كم من الفوضى والتسيب غير مقبول
    ولكنني مع كل الأحوال .. لا اعتبر ذلك مبررا لتحميل أهل البيت كل العذر .. فاقبل عذري
    طبت أخي الكريم .. ودمت لي ناصحا أمينا

  6. #6

    تاريخ التسجيل
    Apr 2002
    الدولة
    القاهرة
    العمر
    41
    المشاركات
    25,557
    عايز أكمل قراياااا للموضوع





    لي عودة إن شاء الله

    يا اقرب مني ليا... يا كل الدنيا ديا... يا اجمل حاجة فيا ونور عينيا وحشتني!
    ليالي تغيب عليا ولسه فاكرك يا حبيبي... يا غايب عن عينيا ولسه شايفك ياحبيبي
    بحبك وانت عارف اد ايه انا روحي فيك... ومين في الدنيا بعدك يوم ياغالي يحس بيا




    LolosMail.blogspot.com
    الحمدلله

  7. #7

    تاريخ التسجيل
    Feb 2004
    الدولة
    جمهورية مصر العربية
    المشاركات
    21,901
    مرحبا بك يا محمد

    ها هى الأيام تمر لتكشف لنا أنك لم تسرف فى جلد الذات
    فالأيام قد كشفت لنا من الشقاق ما قد فاق مخاوفك وهواجسك
    تحية لك أخى وصديقى الحبيب
    وأدعو الله أن يؤلف بين قلوبنا وأن يغفر لنا ذنوبنا

  8. #8

    تاريخ التسجيل
    Dec 2012
    الدولة
    ميدان التحرير
    العمر
    40
    المشاركات
    713
    موضوع متميز يا صعيدى

    للاسف كل واحد فينا محتاج ثوره على نفسه

    على اخلاقه على قيمه على اهدافه على اتجاهاته

    على سلوكه الاجتماعى و الثقافى




    الثوره مستمره


  9. #9

    تاريخ التسجيل
    Jun 2004
    الدولة
    الإسكندرية
    العمر
    55
    المشاركات
    5,002
    اقتباس المشاركة الأصلية كتبت بواسطة أحمد ناصر مشاهدة المشاركة
    مرحبا بك يا محمدها هى الأيام تمر لتكشف لنا أنك لم تسرف فى جلد الذات فالأيام قد كشفت لنا من الشقاق ما قد فاق مخاوفك وهواجسك تحية لك أخى وصديقى الحبيب و أدعو الله أن يؤلف بين قلوبنا وأن يغفر لنا ذنوبنا
    أخي الحبيب أحمد .. واحشني جدا .. وسعيد بمشاركتك الجميلة .. ومرورك الكريم
    طبعا بعد مرور سنة ونصف تقريبا على تاريخ الموضوع .. اتضحت لنا حاجات كتير .. كان لازم يمر الوقت ده كله عشان نكتشفها .. خلال الأزمة اللي مرت بيها البلد أيام الإعلان الدستوري والاستفتاء على الدستور اكتشفت حاجة كانت غايبة عن بالي .. وهي إن – من وجهة نظري – ما كانش ينفع مبارك أو غيره يمارس الاستبداد لوحده كده .. ولا حتى لو استقوى بمؤسسات زي الجيش أو الداخلية أو غيرها .. وإنما اللي ساعده على الاستمرار في استبداده الفترة دي كلها هو وجود نسبة غير قليلة من الشعب تشجعه على الاستبداد .. وتصادر اي رأي الآخر .. وتدعي الديمقراطية وفي واقع الأمر هي مستبدة زيه بالظبط .. الفئة دي من الشعب انكشفت تماما في الأزمة دي .. وبيتهيألي دي من حسنات الفترة الانتقالية .. عشان نحس فعلا بعيوبنا وأمراضنا ونعالجها في الوقت المناسبتخيل أنا كنت باتناقش مع واحد امبارح – المفروض انه من الثوار – وهو مقتنع تماما إن الاستفتاء اتزور .. مش بس كده .. وكمان نتيجة انتخابات الرئاسة .. وانت فعلا عشان تقنع واحد ثوري إنه يتظاهر ويمارس العنف زي ما شفنا .. مش هتقول له ثور ضد الديمقراطية .. ولكن تقنعه إن اللي بيحص ده لعبة .. وان البلد ما تغيرتش .. والنظام مش هيتغير إلا بثورة تانية .. وفيه ناس كتير للأسف بتنساق وراء الأفكار دي .. وده شيء خطير .. لإنه فعلا ممكن يؤدي لحرب أهليةالحمد لله أنا متفائل .. لإن مازالت النسبة الأكبر من الشعب بخير .. ومش هايأس أبدا إن شاء الله من الاستمرار في الإصلاح .. دي بلدنا .. ومسئوليتنا .. والله الموفق والمستعان
    التعديل الأخير تم بواسطة الصعيدي ; 27-12-2012 الساعة 03:54 PM

المواضيع المتشابهه

  1. اداة قويه لتنظيف النظام من فيروس الاوتورن وغيره والتى تسبب مشاكل النظام+الشرح
    بواسطة دلال مغربي في المنتدى قاعة الكمبيوتر والبرامج
    مشاركات: 0
    آخر مشاركة: 29-01-2012, 01:47 PM
  2. مشاركات: 0
    آخر مشاركة: 20-02-2011, 01:50 AM
  3. ميدو في حوار مميز: اللعب جوار أبو تريكة أمنية الجميع
    بواسطة عمرو صالح في المنتدى قاعة الرياضة
    مشاركات: 10
    آخر مشاركة: 10-11-2006, 01:12 PM
  4. ....اجلس عند النعال ....لو تسمحو لى ...تحت النعال....
    بواسطة deaa في المنتدى قاعة الخواطر والقصة القصيرة
    مشاركات: 18
    آخر مشاركة: 06-02-2003, 05:49 PM

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
تابع صفحتنا على الفيس بوك