صفحة 1 من 7 123 ... الأخيرةالأخيرة
النتائج 1 إلى 10 من 61

الموضوع: عصفور الشعر في انجلترا

  1. #1

    تاريخ التسجيل
    May 2004
    الدولة
    القاهرة
    العمر
    48
    المشاركات
    8,981

    Icon18 عصفور الشعر في انجلترا



    بسم الله الرحمن الرحيم

    أهلاً و مرحباً بكم أخواني و أخواتي أعضاء أبناء مصر

    اليوم نبدأ معكم أولى جولاتنا مع ضيوفنا الكرام في البلدان المختلفة التي يقيمون فيها

    مصري..لبناني..عراقي....الخ المهم اننا كلنا هنا مع بعض في أبناء مصر اخوة و أخوات بجد

    و اليوم نبدأ جولتنا مع ضيفنا الكريم



    عصفور الشعر






    أهلاً و مرحباً بك أخي الكريم عصفور الشعر في "أبناء مصر حول العالم"
    في الأول ممكن تعرفنا عليك في سطور قليلة..من هو عصفور الشعر؟؟؟

    أهلا بكى أختى العزيزه ريهام .. وبكل ضيوف الموضوع الكرام .. اشكرك على استضافتى بذلك الموضوع المميز والذى كنا نحتاجه فعلا .. كى نتعرف من خلاله على حياة الاعضاء المغتربين خارج الوطن الغالى مصر

    أنا محمود .. 34 سنه .. متزوج ..بورسعيدى أصيل .. اقيم بصفه دائمه بالشقيقه إنجلترا منذ نحو ال 6 سنوات .. أعمل بشركة كبرى للشحن والنقل والتفريغ والتخزين والتوزيع ((بتاعة كله يعنى))



    من خلال ملفك الشخصي أرى أنك تقيم في المملكة المتحدة..منذ متى؟؟ و هل تشعرن بالغربة فيها؟؟؟

    أقيم بانجلترا منذ 2004 .. وان كنت عدت فتره الى مصر ..قبل ان أرتد ثانية لانجلترا .. أما عن الغربه فهى شعور دائم متلازم ..لا يبارجنى ..منذ أن تركت بورسعيد سنة 2000 .. فغربتى ليست عن مصر فقط .. بل عن بورسعيد تحديدا .. بل قد اكون مغاليا لو قلت أننى أشعر بالغربه بعيد عن الحى الذى أقطن به ((حى العرب)) .. لذا عندما عزمت على شراء شقه للحياة الزوجية .. أثرت .. . وصممت.. على أن تكون بنفس هذا الحى القديم والشعبى .. رغم مقدرتى والحمد لله على الشراء فى أحسن الاماكن ببورسعيد .. ولكنه إرتباطى الحميمى بالمكان .. والذى لم استطع التغلب عليه حتى الان

    ورحلة الغربه بدات صيف عام 2000 بعملى بطابا ثم القاهره ..ف شرم الشيخ .. ف دبى .. وانتهاءا بانجلترا

    ناهيكى عن غربتى الشخصيه عمن حولى((مع نفسى دايما)) .. وهذا موضوع اخر يطول شرحه وليس المقام هنا مقامه



    ممكن تعرفنا موقع المدينة التي تقيم فيها ...و ياريت لو عندك خريطة للمملكة موقع عليها مكان المدينة

    طوال 6 اعوام لم أعش الا فى مدينتين .. نيوكاسل 3 أعوام .. وإبسويتش سنتين ونصف تقريبا .. ومازلت بها حتى الان .. ولم أزر مدن اخرى .. حتى لندن لم أزرها الا مره واحده زياره خاطفه .. وامر عليها عندما اذهب للمطار فقط

    اما عن المدينه التى أقيم بها حاليا ((إبسويتش)) فهى مدينه صغيره تقع فى الجنوب الشرقى لانجلترا .. فى مقاطعة سوفولك ... وبينها وبين لندن ساعة سفر بالقطار .. اون شاء الله حسرد معلومات عنها وبعض الصور والخريطه لاحقا



    ما هي العادات المشتركة و المختلفة بين مصر و بريطانيا؟؟

    العادات المشتركه نقدر نقول أنها نسبيه وليست متطابقه ..مثلا يوجد ترابط أسرى نسبى بين كثير من الانجليز على الاقل الذين عرفتهم ..وشهدت بنفسى علاقات أسريه قويه وحميميه مثلها مثل مصر .. خصوصا فى نيوكاسل .. حيث ان طبيعة أهلها تقترب من طبيعة أهل الصعيد لدينا .. وشهدت تكافلهم اجتماعيا وتزاورهم ومساعدتهم لبعضهم البعض .. ولكن رغم ذلك هم يتميزون عنا بالاستقلاليه .. والاعتماد على الذات فى المقام الاول قبل اللجوء الى مساعدة الاسر .. والاسره مش متحكمه فى مصائر ابناءها زى عندنا سواء فى التعليم او الزواج

    من العادات المشتركه بين نساء مصر ونساء انجلترا .. إن الاتنين ماشاء الله وربنا يبارك .. مسرفاااااااات ههههههههههههههه .. وبيضيعوا فلوسهم فى حاجات ومحتاجات مش بيستخدموها الا يمكن مره واحده .. زى الملابس والاحذيه والاكسسورات والمكياجات وغيره .. يعنى يمكن اعتقد دى عاده مشتركه لدى نساء الارض

    من العادات المشتركه ايضا الميل الى السخريه والمزاح والهزار والتنكيت حتى على النفس .. الانجليز برده زينا ولاد نكته على عكس ما يظن البعض .. لكن هما بيفرقوا عننا إن هزارهم تقيل جدا..ملوش حدود .. ممكن يتعدى حدود اللياقه والادب .. وفيه تجاوزات لا تحدث عندنا طبعا .. يمكن بسبب ده واجهتنى مشاكل وسوء تفاهم مع كثير منهم فى اول حياتى هنا .. لغاية ما فهمت الموضوع ده .. وبقيت بتجنب المزاح والتهريج معاهم عشان متعرضش لشئ لا يتناسب مع شخصيتى وعاداتى وتقاليدى ودينى

    من العادات المشتركه الروتين .. أنا بعتقد ان الروتين العقيم ده اللى موجود بمصر . من ضمن ما خلفه تواجدهم او احتلالهم لينا .. حتكلم عن النقطه دى بالتفصيل فى السوال ما بعد القادم

    من العادات المشتركه حبهم الجنونى للكوره .. بس هما عندهم لاحظت النساء بيشجعوا الكوره بحراره وبيروحوا يشجعوا بالاستاد بصفه دايمه .. وبيروحوا بشكل عائلى ..ويعتبر شئ مقدس عندهم .. خصوصا للعائلات المقتدره .. لان اسعار التذاكر حدث ولا حرج

    من العادات المختلفه بقى كثيرررررررر منها حقول .. شرب الخمور .. يعتبر عندهم زى المياه .. خصوصا البيره .. وادمان الكحوليات ظاهره مترسخه بالمجتمع الانجليزى .. وده ادى ان الحكومه الانجليزيه مؤخرا.. حسب ما اعلنت بالاعلام أنها تزيد ضريبة الكحوليات تبعا لنسبة الكحول فى المشروب

    من العادات المختلفه حبهم لإقتناء الحيوانات الاليفه .. وعلى وجه الخصوص الكلاب . الكلاب فى انجلترا لها احترامها.. واالاهتمام بها ورعايتها غير طبيعيه .. وشئ طبيعى انك تبقى ماشى وتلاقى الناس معاه كلاب بتفسحها .. والقوانين صارمة جدا تجاه اى ايذاء او تعرض لها بالقول او الفعل لها .. الكلاب يعنى

    ايضا الشعب الانجليزى على عكس الشعب المصرى تماما فى مسالة الدين .. ف رغم ان انجلترا تعتبر ملكتها ((حامية الصليب)) الا ان الشعب هنا غير متدين بالمره .. بل ان الاغلبيه العظمى من الانجليز اللى قابلتهم صرحوا لى بانهم لا يؤمنوا بوجود إله للكون ((حاشا لله)) ملحدين يعنى او زى ما بيقولوا ((لا دينيين)) .. عشان كده الكنائس هنا شبة مهجوره .. ولا يزورها الا الاجانب من الدول الاخرى .. وفى الكريسماس بيحتفلوا بيه ك day for fun no more يعنى لا يقوموا باداء اى طقوس دينيه مثل مسيحيى الشرق مثلا

    من العادات المختلفه ايضا انهم مش بيحبوا الكراكيب .. وبيتخلصوا منها كل اما يقدروا .. واى حاجه تبوظ بيحاوالوا يصلحوها بنفسهم الاول أو بيشتروا غيرها ويريحوا دماغهم من التصليح وتكاليفه الباهظه .. طبعا احنا بقى بنعشق الكركبه والتخزين .. وسطوح منازلنا خير شاهد ودليل .. عاده فرعونيه لم نستطع التخلص منها

    من العادات المختلفه حاجاه مش حتصدقوها .. هما شعب منساق تقريبا مثل القطيع ولايفقهون فى السياسه كثيرا .. الحكومه تقوله شمال بيروح شمال .. تقوله يمين يروح يمين .. الاعلام يقولهم المسلمين كلهم ارهابيين يصدقوه .. واليهود دول غلابه مظلومين يقولوا امين .. .. يعنى عندهم ثقه فى حكوماتهم واعلامهم الى حد كبير .. وهما شعب لا يميل الى الثورات .. وان كان يعترض ولكن بشكل غير صاخب .. احنا بقى حقيقى شعوب متمرده .. ولدينا رأى ووعى سياسى.. ولكن للاسف الحكومات القمعيه المتعاقبه هى السبب فيما نحن فيه من سلبيه وخوف واستكانه

    من العادات المختلفه السباب والشتائم .. صعب جدا يحصل حوار بين اتنين انجليز حتى لو كانوا نساء من غير ذكر الفاظ نابيه أو شتائم او سباب .. يعنى يعتبر شئ عادى جدا عندهم .. لا يغضبهم .. ولا يثير حفيظتهم .. الا لو حدث هذا امام الاطفال



    في بعض البلدان يشكوا البعض من سوء معاملة للمغترب او بعض انواع العنصرية او الإضطهاد ...ليتك تحدثنا عن الحال في المملكة المتحدة او في مدينتك تحديداً

    الانجليز عنصريين جدا جدا .. يكفينى اقولك ان بعد الازمه الاقتصاديه الحاليه خرجت عدد من جرائدهم واسعة الانتشار تتطالب بتفضيل الانجليز على الاجانب فى العمل بغض النظر عن الكفاءه .. والانجليز اساسا وخصوصا الجيل الجديد . جيل متدلع ومرفه .. مش بتاع شغل جامد .. وده ادى ان اصحاب العمل يفضلوا الاجانب لانهم اكثر انتاجا وانضباطا وكفاءه

    لكن خلينا نتكلم بصراحه .. العنصريه انا بعتبرها سلوك انسانى نمارسه جميعا ولكن باشكال مختلفه .. وشئ طبيعى انى احس بالضيق... بعيدا عن اى اعتبارات .. من واحد جاى من بلد تانيه يشتغل فى بلدى وانا عاطل .. وده على فكره بيحصل داخل مصر .. وفى بورسعيد كاقرب مثال ليا .. وخصوصا فى تعيينات شركات البترول والغاز .. والمطالبه بان تكون فى المقام الاول للابناء بورسعيد .. انا لا أدافع عن العنصريه أو اشرعها .. ولكن ما اريد أن أقوله ان العنصريه واقع نشتكى منه رغم اننا نمارسه احيانا ولكن باشكال اخرى .. اليس التهكم على اصحاب البشرة السوداء والسخريه منها عنصريه .. اليس إطلاق النكات على فئه من فئات المجتمع عنصريه .. أليس تفضيلواختيار صاحب العمل للعاملين على اساس الديانه عنصريه

    يمكن عشان كده أنا حاليا متصالح جدا مع العنصريه اللى بعانى منها هنا .. ومتقبلها بصدر رحب ومتعايش معها ,, على الاقل جايه من الغريب ...ومش من القريب ..وهى وجهات نظر برده



    الخدمات العامة و المصالح الحكومية التي يحتاجها الفرد دوماً لتخليص أوراقه و تيسير أموره هل ترى فيها أي نوع التعقيد ؟؟(شرح يا ريت)

    أجارك الله .. تعقيد ما بعده تعقيد .. خصوصا فى الوقت الحالى بعد ازدياد عدد الاجانب من دول الاتحاد الاوربى .. وقلة الكوادر العالمه بالقطاعات الخدميه والحكوميه .. انا اكتر شئ بكرهه فى حياتى سواء بمصر او انجلترا هو الروتين .. وهنا الروتين عقيم عقيم عقيم .. حاجه متتوصفش بجد ومتتشرحش .. أصعب شئ فى الموضوع ان الواحد لو عايز يقدم على شئ كهربا او تليفون او خلافه بيبقى محتار اى طلب او form اللى مفروض يملاه .. ولو عايز يقدم على سكن او اعانه .. بيبقى قدامه متاهه وميت باب وطريق ومش عارف يسلك أى منهم .. عشان كده فى كل بلد فى مركز مجانى للنصائح والمشوره بيساعد الناس فى الامور دى .. .. ومعظم الخدمات بتتم عن طريق البريد او التليفون.. مفيش زى عندنا تجمهر وزحمه فى المصالح الحكوميه .. وهما لو عايزين حد بيطلبوا انه يجيلهم

    الف شكر لك عصفور الشعر انت نورت جولتنا حول العالم و سعيدة بتواجدك معنا

    و الآن ننتقل جميعاً في جولة سياحية مرشدنا فيها الأخ الغالي عصفور الشعر
    ...يلا بينا
    في رعاية الله ،،،




    يارب إن كان إدراك الحكمة صعباً.. فاجعل برحمتك الصبر والرضا سهلاً.

    على الطريــق

  2. #2

    تاريخ التسجيل
    Mar 2005
    الدولة
    إنجلترا الشقيقه الشريفه العفيفه الطاهره النضيفه
    العمر
    44
    المشاركات
    3,405

    مبتسم إبسويتش البلد

    بسم الله الرحمن الرحيم








    إبسويتش هى مدينه صغيره نسبيا .. تقع فى الجنوب الشرقى لانجلترا .. ضمن مقاطعة سوفولك .. تطل على مصب نهر أوريل .. ويمكن عشان كده فيها ميناء .. وفيها أيضا مرسى لليخوت .. لاتصال النهر بالبحر ..


    http://maps.google.com/maps?hl=en&so...7,5.603027&z=8


    عدد سكانها حوالى 110 ألف نسمه حسب الاحصاءات الرسميه .. لكن أنا ذات نفسى بعتقد أن الرقم أكبر من كده .. نظرا لوجود مهاجرين كتير جدا بتلك البلده .. والذين توافدوا عليها خلال الستة أعوام السابقه .. خاصة من العراق بعد الغزو الامريكى .. وبشكل محدد ((الاكراد)) أو الجراد زى ما بسميهم .. لانهم منتشرين فى كل مكان بشكل مكثف ..بشكلهم المميز ... وكذلك البولنديين بعد انضمامهم للاتحاد الاوربى .. والبرتغاليين .. والليتوانيين ... والمغاربه والجزائريين .. والافغان .. والباكستان .. والبنجلاديش .. الى جانب جاليه مصريه صغيره جدا ..



    يعنى خليط عجيب من الجنسيات .. والثقافات . اللى اثرت اكيد على إتجاهات الحياه فى تلك المدينة الصغيره .. والتى لم تكن تعتاد من قبل على التعامل مع الاجانب أو الاغراب بهذا الشكل المفاجئ والهجومى كما قال لى مديرى الانجليزى .. والذى يشتكى بانه عليه ان ينتظر حوالى اربع اسابيع حتى ياتى عليه الدور ليذهب لطبيب الاسنان .. نظرا للزحام الشديد على الحجزمن قبل الوافدين .. وكان من قبل يستطيع الذهاب للطبيب فى نفس اليوم .. وقس على ذلك نقص فرص العمل .. والتى احتلها الاجانب ايضا .. بعد ان كان اصحاب العمل ووكالات التشغيل فى الماضى ((يحايلون)) الناس كى يعملوا لديهم باجور ومميزات كثيره.. هذا ليس كلامى بالطبع .. بل هو الكلام الذى اسمعه من بعض الانجليز .. وأقرأه فى الصحف !!

    تتميز إبسويتش بكم كبير من الابنيه والمنازل العتيقه .. والتى مازلت تستعمل حتى الان من قبل أصحابها .. رغم انها تعود الى اواخر القرن التاسع عشر.. وأوائل القرن العشرين !!! ..مما يضفى على المدينه رونق ..وعبق تاريخى مميز .. يجعلك تشعر وكأنك تعيش فى عصر غير العصر الذى نحياه الان



    .. ورغم ذلك هناك بعض الابنيه والمنازل المبنيه على احدث وأفخم الطرق المعماريه





    .. لتجعل المدينه تجمع بين الأصاله والمعاصره .. فى لوحة غير منفره .. الى جانب هذا يوجد العديد من الكنائس القديمه جدا .. ذات الطراز المعمارى المختلف عن شكل الكنائس المتعارف عليه لدينا فى مصر .. ولكنها أشبه بأماكن مهجوره .. لا يرتادها احد .. اللهم الا فى مناسبات الزواج .. او من قبل الاجانب المتدينين فى اعياد المسيحيين .. فالانجليز بصفه عامه شعب غير متدين .. واغلب من قابلتهم لا يؤمنون أصلا بوجود إله لهذا الكون .. ربنا يهدى





    يوجد بالمدينه مسجدين للمسلمين .. وهم ..ولحسن حظى.. على مقربة كبيره منى .. مما يجعلنى دائم التواصل مع الجاليه المسلمه هنا .. والتى اغلبها من البنجلاديش والباكستان والاكراد




    أما عن المصريين هنا .. فعددهم قليل .. وكما هو متعارف عنهم .. فكل واحد فى حاله .. عكس الجاليه السودانيه المترابطه والمتلاحمه بشكل يثير الاعجاب والاحترام .. ورغم ذلك لدى علاقات طيبه ببعضهم .. وان كانت علاقات محدوده.. نظرا لانشغال الجميع فى عمله ..وحياته الشخصيه .. فاغلبهم متزوجون من انجليزيات ((وشاربين المر)) زى ما بيقولوا.. وكل واحد فيه اللى مكفيه .. والحياه هنا غير الحياه فى مصر تماما.. لذلك من الطبيعى ان تكون العلاقات بين المصريين هنا علاقات محدوده وغير حميميه كما فى مصر


    نرجع لابسويتش تانى .. ونقول أن أكثر مكان تشعر به فى الحياه والنشاط .. هو التاون سينتر .. او نص البلد زى ما بنقول ..




    وفيه محلات الموبيلات والكمبيوتر والمحلات التجاريه والملابس والاجهزه الكهربائيه والعطور وأغلب البنوك .. تقريبا فيه كل حاجه... وكل شئ موجود فى التاون سنتر .. لكن تيجى الساعه سته المغربيه .. التاون سنتر ده تلاقيه ((هس)) ومفيش صريخ ابن يومين .. البلد كلها بصفه عامه .. الا قليل من المينى سوبر ماركت اللى ممكن تفضل فاتحه لغاية تمانيه بالليل .. بعد كده بقى عشان الواحد يشترى حاجه لازم يروح المجمعات الكبيره اللى بتبقى موجوده على اطراف المدينه زى أصدا وتيسكو وموريسون .. ودى مجمعات زى كارفور كده فيها كل شئ .. طبعا البارات والملاهى الليليه ده شئ أساسى .. والاماكن دى تعتبر المتنفس الوحيد تقريبا لابناء البلد الانجليز او الاوربيين فى الترفيه وتقضية الويك ايند.. والانجليز يحتسون الخمر بشراهه .. من اكتر شعوب العالم ادمانا للكحوليات

    إبسويتش بقى مشهوره بحاجتين

    الحاجه الاولى .. إن فريقها الكروى ((واللى حاليا بيلعب فى الدرجه التانيه بقاله سنين)) عمل انجاز كبير وتاريخى بالنسبه للبلد الصغيره دى .. ودايما بيحتفلوا وبيتفاخروا بيه .. وهو حصولهم على كاس اوروبا للانديه سنة 1981 .. على يد المدرب الانجليزى المشهور ((بوبى روبسون)) ودى صورته وهو رافع الكاس





    واللى كان مدرب انجلترا فى كاس العالم 90 واللى لعبنا أمامه بقيادة الجوهرى .. والانجاز تاريخى فعلا .. وصعب يتكرر تانى .. وهو غير مسبوق من اى نادى من اندية انجلترا الصغيره .. او اوربا بصفه عامه




    الحاجه التانيه المثيره .. هو مقتل خمس فتيات ليل بتلك المدينه سنة 2006 ...على يد مواطن انجليزى .. اسمه رايت





    ولم يعرف حتى الان لماذا ارتكب تلك الجرائم ..وقد ظل الاعلام يتحدث عن هذه الواقعه كثيرا .. وكنت وقتها اعيش بنيوكاسل .. والغريب والمثير فى الامر أننى حين انتقلت الى ابسويتش فى اواخر عام 2007 .. إلتحقت بالشركة التى أعمل بها حتى الان .. والتى فوجئت أنها هى نفس الشركه التى كان يعمل بها هذا السفاح عند ارتكاب جرائمه والقبض عليه .. وقد حدثنى بعض زملائى الذين عاصروه وزاملوه .. عن انه كان شخص عادى جدا .. ولم تبدو عليه أى أعراض أو نوازع إجراميه او سلوكيات عنيفه

    وأخيرا الطقس فى إبسويتش أفضل بكثير من نيوكاسل .. فهنا أنعم برؤية الشمس كثيرا خلال العام .. ودرجات الحراره تترواح ما بين 4 الى صفر فى الشتاء .. و20 الى 8 فى الصيف ((رضا ونعمه))



    أتمنى ان أكون قد نقلت أقرب صوره للمدينه التى أعيش فيها .. وعذرا إن فاتنى شئ مهم ولم أذكره .. مع خالص تحياتى وتقديرى


    خوكم ومراسلكم من إبسوتيش البلد

    عصفور الشعر .. توت
    إنه قريبٌ جدا .. على بعد مليمترات .. لو تعلمون!!

  3. #3

    تاريخ التسجيل
    May 2004
    الدولة
    القاهرة
    العمر
    48
    المشاركات
    8,981
    بسم الله الرحمن الرحيم


    بجد بجد انا استمتعت جداً يا محمود بتلك الجولة

    تعرفت على مدينة جديدة و معلومات حلوة اوي سواء من خلال الحوار او من خلال الجولة

    الف الف شكر حقاً امتعتنا ربنا يخليك

    دمت بكل خير
    في رعاية الله ،،،


    يارب إن كان إدراك الحكمة صعباً.. فاجعل برحمتك الصبر والرضا سهلاً.

    على الطريــق

  4. #4

    تاريخ التسجيل
    Mar 2009
    الدولة
    قلب أبى
    المشاركات
    7,715
    وأنا فعلا يسعدنى أكون أول المشاركات فى الموضوع الرائع دا بوكى

    مع ضيف أكثر من رائع وفعلا خير بدايه للجولة السياحيه الجميله دى

    إختيارك

    عصفور الشعر

    علشان يكون أول ضيف

    معلش ليا سؤال توت

    إنت متمكن جدا من اللغة العربيه

    ودا غريب بالنسبه لإنسان مقيم فى بلد أجنبى

    هل واجهتك مشكلة اللغه فى بداية تواجدك فى انجلترا؟

    وإذا كنت متمكن من الإنجليزيه إيه الدراسات إللى اخدتها

    يعنى قويت اللغه عندك ازاى علشان تقدر تتعامل معاهم؟

    شكرا بوكى تسلم أفكارك

    شكرا عصفور الشعر على الجولة الرائعه دى

    ربنا يوفقك ويردك من غربتك سالم إن شاء الله

    تحيااااااااااااتى
    التعديل الأخير تم بواسطة فراشة ; 11-02-2010 الساعة 04:40 PM




    أسباب سقوط الأمم والحضارات: النظام الإلهى للانذار المبكر






  5. #5

    تاريخ التسجيل
    Feb 2008
    الدولة
    MCV MerCeDieS
    العمر
    32
    المشاركات
    7,096
    منور يا عم محمود

    وان شاء الله حياة سعيدة فى انجلترا الشقيقة الشريفة العفيفة النضيفة
    بس فين صورة البيت بتاعك يا عم ؟ وياريت كمان صورة ليك جنب اى شجرة توت فى ابسويتش تاون
    وحياة سعيدة ان شاء الله فى انجلترا
    IIIIII am back



  6. #6

    تاريخ التسجيل
    Mar 2005
    الدولة
    إنجلترا الشقيقه الشريفه العفيفه الطاهره النضيفه
    العمر
    44
    المشاركات
    3,405

    مبتسم

    اقتباس المشاركة الأصلية كتبت بواسطة boukybouky مشاهدة المشاركة
    بسم الله الرحمن الرحيم


    بجد بجد انا استمتعت جداً يا محمود بتلك الجولة

    تعرفت على مدينة جديدة و معلومات حلوة اوي سواء من خلال الحوار او من خلال الجولة

    الف الف شكر حقاً امتعتنا ربنا يخليك

    دمت بكل خير
    في رعاية الله ،،،


    العفو اختى العزيزه ريهام .. دنا اللى مفروض اشكرك على اختيارى كأول ضيف فى الموضوع .. وأتمنى إن الجوله بتاعتى تكون شافيه وافيه .. وأى حد عنده استفسار او اى أسئله عن إبسويتش او انجلترا بصفه عامه .. أو عن شكل حياتى هنا .. أنا مستعد على قدر معلوماتى ومعايشاتى للاجابه التفصيليه ان شاء الله

    كويس كمان ان الويك ايند على الابواب عشان اقدر اجاوب واتواصل مع زوار الموضوع ..

    أنا على مشارف الخروج للعمل .. فوتكوا جميعا بعافيه .. والى ان نلتقى ثانية بحول الله


    خوكم ومراسلكم بالاراضى الانكليزيه

    عصفور الشعر توت
    التعديل الأخير تم بواسطة عصفور الشعر ; 11-02-2010 الساعة 04:53 PM
    إنه قريبٌ جدا .. على بعد مليمترات .. لو تعلمون!!

  7. #7

    تاريخ التسجيل
    Sep 2006
    الدولة
    اسكندريه/ جدة
    العمر
    34
    المشاركات
    2,112


    ما شاء الله عليك يا تووووووووووووووووووووووووووووت

    جوله جميله جدا وحوار رائع خلانا نشوف البلد ونعرف تفاصيل كأننا روحنا هناك بالظبط
    بس فعلا في مثل انجليزي بحبه قوي
    EAST OR WEST . HOME IS THE BEST
    ربنا يرجعك لبلدك على خير ويوفقك انت واسرتك
    ومرسي يا بوكي يا حبيبتي على كل المواضيع الي بتعميلها علشان تسعدي الكل
    تحياتي لك


  8. #8

    تاريخ التسجيل
    Apr 2009
    الدولة
    مصر
    المشاركات
    13,188
    موضوع هايل يا بوكى حقيقى..فكرة جميلة وانسانية هاتحسس اخوانا واخواتنا المغتربين انهم معانا واننا بنتكلم مع بعض فى قعدة حلوة..
    شكرا كتير يا محمود..كنت رائع كالعادة فى الوصف ...استمتعت كأننا قاعدين بنسمعك اونلاين..هههه..على الطبيعة بصوتك..
    انا حقيقى باحب انجلترا وأى حاجة انجليزى واللغة الانجليزية من الذ اللغات عندى اللى بتقنها عن حب..لكن للاسف بدات اى حاجة انجليزى تختفى نظرا للغزو الصينى..هل دا صحيح يا محمود...الصناعات الانجليزية والبضائع ..هل اختفت فعلا اللمسة الانجليزية..؟؟..اصل كنت ناوية آجى أعمل شوبنج عندك وأرجع...ههههههههه
    أعرف كمان ان مفيش خدم بشكل ملحوظ عند الاسر الانجليزية وان كل واحد بيخدم نفسة على طريقة....help UR self..هل دا حقيقى وكمان لازم please و thanks?
    وهل ممنوع فعلا الاحتكاك بالمراهقين تحت 18 سنة وخاصة الفتيات لانهم ممكن بيسببوا مشاكل زى الاتهام والافتراء بالتعدى عليهم وسرقتهم وغيرة ..الشىء اللى عقوبتة كبيرة وبتصل ل 20 سنة فى انجلترا؟..
    ياترى أخبار المسلمين اية والمحجبات..؟؟ قريت عن حكايات كتير..انه ممكن المواطن الانجليزى بيوقف العربى يسألة اى اسئلة ..زى مثلا ..انت مؤمن بالرب..بمحمد..ويوزعوا كتب...يعنى فية ناس برضة متعصبة عندهم وبيطبعوا كتب بالعربية بتدعو لفلسفتهم الدينية وبيوزعوها...؟؟؟وهل كل الاماكن مراقبة بالكاميرات؟؟
    معلش يا محمود..طولت عليك..اسمحلى ارجعلك تانى لو خطر فى بالى اى شىء...بس ياريت تدعمنا بصور كتير ..يا ترى هل أخدت صور شتوية..أعرف ان الطبيعة هناك فى الشتاء ساحرة...وأخيرا دمت بخير..
    التعديل الأخير تم بواسطة اليمامة ; 11-02-2010 الساعة 06:27 PM


  9. #9

    تاريخ التسجيل
    Nov 2009
    الدولة
    كـوكــب تـانـى
    المشاركات
    1,267

    موضوعك جميل بوكى
    وربنا يقدرنى واكون عند حسن ظنك
    ولو ان اخى عصفور الشعر صعبها على
    بس يالا ربنا يعنى

    بجد وصف رائع
    ورغم انى اعيش بانجلترا انما اول مره اسمع عن المدينه دى
    وفرصه جميله انى اتعرف عليها من خلال عضو معانا

    تحياتى لكما
    الضيف والمستضيفه

    أنا إن قدر الإله مماتى

    لاترى الشرق يرفع الرأس بعدى



  10. #10

    تاريخ التسجيل
    Dec 2009
    الدولة
    مصر
    المشاركات
    980
    بوكى الجميلة

    دائماً انتِ صاحبة كل جديد ومميز غاليتى

    طرح راقى واختيار موفق للاخ الكريم

    عصفور الشعر (( محمود ))

    رحلة جميلة ورائعه استمتعت بيها جدا جدا

    وحسيت انى شايفة البلد وكأنى فيها

    وحسيت كمان من خلال محمود بالحياة بعيد عن الاهل والبيت والحى

    شكلها ايه وازاى الانسان بيستحمل كل حاجة علشان لقمة العيش

    ربنا يرجعك بيتك بالسلامة محمود وخصوصا حى العرب

    وتعيش بين اهل وناسك وذكرياتك الجميلة اكيد فى بور سعيد

    دمت فى حفظ الرحمن

صفحة 1 من 7 123 ... الأخيرةالأخيرة

المواضيع المتشابهه

  1. إلى الأخ العزيز عصفور الشعر
    بواسطة العسل المر في المنتدى قاعة رأيك يهمني
    مشاركات: 0
    آخر مشاركة: 20-11-2009, 05:16 AM
  2. عصفور الشعر عضو لم يعرفه أحد
    بواسطة سيمفونية كاتبه في المنتدى قاعة التعارف والمناسبات
    مشاركات: 49
    آخر مشاركة: 12-07-2009, 06:27 AM
  3. على صوت الناى ( اهداء الى عصفور الشعر : عبد المجيد عتلم )
    بواسطة صفحات العمر في المنتدى قاعة الشعر العامي
    مشاركات: 14
    آخر مشاركة: 23-11-2006, 12:52 AM
  4. تهانينا للعضو المثالي >>>>> عصفور الشعر!
    بواسطة بنت مصر في المنتدى أعضاء مميزون
    مشاركات: 114
    آخر مشاركة: 23-10-2006, 08:03 AM
  5. عصفور الشعر علي كرسي التعارف
    بواسطة boukybouky في المنتدى تحت دائرة الضوء
    مشاركات: 156
    آخر مشاركة: 07-09-2005, 08:03 PM

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
تابع صفحتنا على الفيسبوك