مش عايزة اعيش
بقلم
آمال محمود كحيل
أفراح مفيش ،
أحلام مفيش
ولا قـادرة أتشكل ،
واعيش
وسط الرياء بين البشر
والكدب ووشوش ..
كل يوم
تضحك وتديني الأمل
في عيونها زيف
غير محتمل
كليت يا ناس والصبر مل
والدنيا غابة
كلها ديابة ووحوش
وانا حابسة جوايا الآهات
وهموم تفوق حمل الجبل
وتعبت من زحف الساعات
حاسة بفراغ ، حاسة بملل
نبض الحياة ،
في عروقي مات
ما فضلشي من
عمري اللي فات
غير بس حبة ذكريات
واهي صورتي صبحت
من سكات
من غير ملامح ،
أو رتوش !
مليت خلاص
فيه إيه متاح ؟؟؟
في عينيه ضاق
كل البراح
ما بقتش باحلم
بالخلاص
والقلب طير من غير جناح
مدبوح سجين
يأسه العنيد
يومي الجديد مافيهوش جديد
بكرة اللي جي
ما يهمنيش
والكـون بحــاله وباللي فيه
ما يكفينيش علشان أعيش
طب ليه أعيش ؟؟؟
مش عايزة اعيش
تنويه مستحق
هذا النص المتواضع جاء في محاولة مني للتواصل مع نص بعنوان محتاج أعيش
لشاعرنا القدير
فارس العامية الأصيل الأستاذ
أحمد الشربيني
فله أدين بالفضل وله خالص احترامي وتقديري
المفضلات