حديقة النباتات - الجزء الثاني

[osha]

السلام عليكم ورحمة الله وبركاته

في الجزء الاول قلت ان بطارية الكاميرا خلصت وانا داخلة على الجزء الياباني في الحديقة وزعلت جدا على عدم تمكني من تصويره
النهارده رحت الجنينة عشان بنتي عندها بحث في العلوم عن أوراق الشجر وقلنا نروح نجمع شوية من هناك
اخدت بقى الكاميرا وصورت شوية صور من الجزء الياباني
انا مبدئيا باعتذر عن الاضاءة لان اليوم كان غائم جزئيا مع سقوط بعض الامطار

وحظكم بقى ان الصور مش بالحجم العائلي ولو ان كان نفسي امسي على سامح بشوية شغل وتعديلات

المجموعة اللي جاية شوية صور متنوعة من الحديقة اليابانية












يتبــــــع

[osha]

المجموعة دي عبارة عن صور للأسماك الموجودة بالبحيرة
وهي حجمها كبير جدا جدا وانا صورتها من عدة زوايا عشان تشوفوا ضخامتها
وفيه ماكينة صغيرة تحط فيها ربع دولار تنزلك أكل مخصوص للسمك عشان الاطفال يأكلوه بإيديهم
وطبعا غني عن القول ان ممنوع الصيد

[osha]

شوية صور متنوعة





















يتبــــع

[osha]

الصورتين اللي جايين دول ليهم حكاية عجيبة
الحكاية بتقول في الاساطير اليابانية ان الارواح الشريرة بتتع الاشخاص للنيل منهم
ولكن الارواح الشريرة بتمشي في خط مستقيم او دائري فقط
ولهذا تم عمل الكوبري بالشكل دا - طبقا للاساطير اليابانية - على شكل زجزاج بتعدي بيه من مكان لمكان فوق الميه وبطريقة الزجزاج دي الارواح الشريرة بتتوه ومش بتقدر تتابعك عشان تؤذيك

فعلا.. جميل جدا التعرف على ثقافات الدول الاخرى مهما بدت غريبة لينا







يتبـــــــــــــع

[osha]

الصورتين الجايين تخليد لذكرى واحد اسمه جورج واشنطن كارفر وهو طبعا مش جورج واشنطن اللي صورته على الدولار
دا شخص أسود وهو اللي اخترع زبدة الفول السوداني
وطبعا مش المهم انه اخترع زبدة الفول السوداني المهم انهم لازم يخلدوا ذكرى أي شخص أسود قام بأي عمل
ودا جزء من رد دين العبودية لقرون طويلة بتحاول كل المدن الامريكية انها تقوم بيه تجاه المواطنين السود

وزي ما انتو شايفين في الصورة الثانية ان الجزء دا بالكامل تم التبرع بيه من عدة شركات ومن ضمنها متبرع مجهول لاقامة الحديقة وزي ماقلت سابقا ان التبرعات هنا للاماكن العامة هي المصدر الرئيسي للدخل والعامل الاساسي لتطويرها بالشكل الجميل دا






يتبــــــــــــــــع

[Amira]

الصور حلوة فوق العادة المرة دي... أحسنتي
تصوير البحيرة و السمك شكله جميل ...
الحديقة اليابانية و الخرافات بتاعتها عجبتني أصل انا غاوية اسمع قصص الخرافات
لو عندك تاني صور هاتيهم... تسلم الأيادي يا أوشا

[حمادو]

ايه دا؟؟
الموضوع من بدايته والصور فيه حجمها صغير
اومال مشرفي القاعة هايعملوا ايه بأه

ربنا ما يقطع لك عادة يا أوشا


جميلة جدا الصور الخاصة بالحديقة اليابانية

فيه كام شجرة فى الحديقة دول علشان تشتريهم محتاجه تبيعي فيلا فى مارينا مصر
والسبب أن الأشجار اليابانية تعتبر من أغلى الأشجار لندرتها ولشكلها المختلف عن أى شجر تانى, بخلاف أن أهل اليابان لهم إبتكارات كتيرة فى طرق زرع الأشجار والعناية بيها.
عندى فى البيت شجرة بونساى Bonsai عمرها تقريبا 100 سنة,
علشان أشتريها عملت لها دفتر توفير قبلها ب6 أشهر.



السمك اليابانى اللى فى الصور كمان عايز أقولك أنه واحد من أغلى أنواع السمك فى العالم.
سعر السمكة اليابانية الصغيرة ممكن يوصل ل1000 جنيه مصرى
تخيلي بأه السمكة الكبيرة سعرها بيوصل لكام؟
تقريبا هاتحتاجى تشترى الأول بيت فى مارينا علشان تبيعيه وبعد كده تجيبي حوض سمك يابانى.



فى إنتظار باقى الصور إن شاء الله

[nariman]

الله يا أوشا ..بجد صور رائعه
واضح إن المكان جميل فعلا

فى إنتظار جديدك دائما

[sameh atiya]

الحمد الله إنى الصور مش حجم عائلى ونازله بطبيعتها
بجد الصور كلها جميلة جداً مش هاينفع الصور محتاج أروح بنفسى وده مش هايحصل بإذن الله
يا رب ما أروح علشان أفضل أبقى عايز أروح

بالنسبة للسمك ليه بتقولى ممنوع الصيد
تفتكرى لو واحد صعيدى زيي كده راح هناك والسمك بدأ يأكل من إيده تفتكر إيه اللى هايحصل
أقولك أنا بدل ما تفكرى كتير
هايجيب دولارات كتير علشان يجيب بيها أكل كتير
ويجيب معاه شكارتين لونهم أسود
وبعد كده يعمل نفسه بيأكل هوب يخطف واحده ويحط فى الشكارة
وهكذا لغاية ما يفضى البحيرة
ويقوم مروح على البيت ويقولهم الشهر ده هاناكل سمك ببلاش
وينضف ويشوى ويأكل بس أنا بحبه مقلى

شكراً يا أم أم أم أم محمد على الصور
انا لقيت أم وأم ورا بعض قلت أكملهم أربعة بالمرة

[النجمه الحائره]

عزيزتى ام محمد الصور
اولا اقول سبحان الله
ثانيا شكرا لامتاع اعيننا بهذه الصور الجميله جدا