المساعد الشخصي الرقمي

مشاهدة النسخة كاملة : تشيز كيك بالصور .. من مطبخ أنفــــال



أنفـــــال
05-06-2008, 12:47 AM
المقادير :

القاعدة :
100 جرام زبدة لينة
2 كوب بسكويت مطحون

الكيك :
600 جرام جبن كريمي ( فيلادلفيا افضلهم و دة ثبت بالدليل القاطع بالنسبة لي )
4/3 كوب حليب سائل
1 كوب سكر و ممكن زيادة لو حابين ( بستخدم كوب واحد لأن في منزلنا العامر مابنحبهاش تبقى حلوة )
4 بيضات
كوب قشطة او كريمة حامضة .. ( كريمة جهينة التقيلة اوي هتفي بالغرض )
3 ملاعق كبيرة دقيق ابيض منخول
فانيليا

الطريقة :

القاعدة :
نخلط البسكوت مع الزبدة اللينة .
ندهن الصينية بزيت خفيف من على الجوانب .. و نضع خليط البسكوت و الزبدة و نوزعه مع الضغط على قاع الصينية .

http://up.haridy.org/storage/CIMG0245.JPG (http://up.haridy.org)


الكيك :

نشغل الفرن على درجة حرارة متوسطة ..
في اناء الخفق .. نضع السكر و الجبن الكريمي و نخفقهم معا لحد ماوصل لخليط ناعم ... زي كدة ..

http://up.haridy.org/storage/CIMG0246.JPG (http://up.haridy.org)



http://up.haridy.org/storage/CIMG0250.JPG (http://up.haridy.org)

بعد كدة كل الخفق هيبقى يدوي بالمعلقة ..
نضيف الحليب .. و نقلب ببطء شديد حتى التجانس ..

http://up.haridy.org/storage/CIMG0251.JPG (http://up.haridy.org)
نضيف البيض .. بيضة و نقلب بخفة لحد ماتختفي :) و هكذا .. بيضة واحدة في كل مرة .. لحد ما الاربع بيضات يخلصوا ..

http://up.haridy.org/storage/CIMG0253.JPG (http://up.haridy.org)

نضيف الكريمة و نقلب برضه لحد التجانس .. و نضيف الفانيليا ..

http://up.haridy.org/storage/CIMG0254.JPG (http://up.haridy.org)

و بعدين نضيف الدقيق معلقة معلقة .. و نقلب بالراحة لحد مانوصل لخليط متجانس .

http://up.haridy.org/storage/CIMG0255.JPG (http://up.haridy.org)

الخليط النهائي



نصب الخليط في الصينية ..

http://up.haridy.org/storage/CIMG0257.JPG (http://up.haridy.org)

نضع الصينية في صينية اكبر منها .. و نكون محضرين ماء بيغلي ..

http://up.haridy.org/storage/CIMG0258.JPG (http://up.haridy.org)

و نصبه حول صينية الكيك لحد قبل الحواف بواحد سم ..
و نضعها في الفرن على الرف الاوسط لمدة ساعة من غير مانفتح عليها الفرن نهائي ..
نعرف انها استوت لما تبدأ حروفها الخارجية العلوية تاخد اللون الذهبي ..
بتاخد في الفرن ساعة ..و بنسيبها تبرد بحرارة الفرن عشان ماتتشققش .. شايفين شكلها متماسك و حلو ازاي؟

http://up.haridy.org/storage/CIMG0259.JPG (http://up.haridy.org)

عملت لها صلصة شيكولاتة .. شوكولاتة و كريمة لباني و لبن بودرة .. و رشيت عليها مكسرات ...

و دة شكلها عند التقديم .. دي بقى بعد ما الضيوف مشيوا .. جبت لنفسي قطعة .. قلت اصورهالكم .. :$
البيبسي مش بتاعي على فكرة .. :d انا اتصورت جنبه بس

http://up.haridy.org/storage/CIMG0263.JPG



و دي من الجنب .. عشان اوضح لكم السمك و التماسك بتاعها ..

http://up.haridy.org/storage/CIMG0264.JPG (http://up.haridy.org)

و بألف هنا

:f2:

الشيمـــاء
05-06-2008, 02:47 AM
يا فندم احنا و الله مش عارفين نعمل ايه في خدمات سيادتك ..
بجد ايه الجمال دة , اولا الطريقة سهلة جدا و واضح افعلا انها حتبقي خفيفة و لذيذة ان شاء الله, علي فكرة صورة واحدة بس اللي ظهرت بتاعت البيبسي , بس بجد شكل الكيك يجنن ما شاء الله بالهنا و الشفا.
ان شاء الله اجربها بس مش حجيب فلاديفيا دة لو ملقتوش حجيب اي جبن كريمي الاقيه ان شاء الله.
انفال الجميلة بجد مش عارفة اشكرك ازاي علي تعبك في تصوير الوصفة .
جزاكي الله خيرا .
خالص ودي

أنفـــــال
05-06-2008, 06:31 AM
صباح الورد يا أم الشهيد .. *162*
الصور ظاهرة جداً .. اصلي شايفاهم :)
حاولي تعملي ريفريش كدة ..
ممكن تتعمل بأي جبنة كريم بحيث انها مايكونش فيها ملح كتير ... و تكون صلبة شوية .
نورتي ..
:f2:

نشــــوى
05-06-2008, 08:59 AM
انفـــال
ماشاء الله يا حبيبتي .. إيه القدرات المطبخية الجميلة دي
انا طول عمري بقول المبدع مبدع في كله ههههههههه
بصي أنا مش عندي أى تعليق على التشيز كيك
لان انا خلفيتي عن المطبخ والطبخ بسيطة ..
بس ان شاء الله فى الاجازة اللى جاية دي ناوية ادخل وافنن وأفتكس :d
واول حاجة هجربها التشيز كيك بتاعك وهقولك النتيجة :)
لان ماشاء الله شكلها النهائي بيقول انها ناجحة جداااا .. تسلم ايدك حبيبتي
شكرا جدا ليكي انفال.. بجد مجهود تشكري عليه
ودي وتقديري .. وحبي كمان :)
:f: :f:

أنفـــــال
05-06-2008, 09:45 AM
نوشا نوشا ..
يا مرحبا يا مرحبا..
منورة و الله .. ابقي جربيها و هتعجبك ..
:f2:

Amira
05-06-2008, 10:07 AM
Sure it's a day 4 cheesecake :d

ايه بس القلق الي انتي عملاه ده يا نوفا... شكلها مغري أوي
بس للأسف انا عندي مشكلة مع التشيز كيك اتفرج عليها بس لكن أكلها لأ
عارفة طعم الحلو مع الحادق ده بيكون غير مستساغ و بتكون دسمة جدااا

لكن بصراحة تسلم الايادي يا قمر و لا الخواجة لابوار في محله :d
صباح الورد :f2:

أنفـــــال
05-06-2008, 10:21 AM
غير مستساغ ؟؟ اكيد ماجربتيهاش ..
هو انتي هتعمليها بجبنة فيتا و لا جبنة قديمة ؟؟ :d
هي الجبنة الكريم و احسنها الفيلادلفيا.. لنها بتبقى جبنة فيها طعم ..من غير ملح تقريباً .. كريمة حادقة شوية ..
في ناس بتعملها بكريمة حامضة بس من غير جبنة .. و دي دقتها و بتطلع ظريفة بس الجبنة الفلادلفيا احلى كتيييييييييييير
لو دقتيها هتغيري رأيك .. و لو على الدسامة .. بلاش تتعشي و خدي قطعة قد اللي انا خدتها دي :)
بالعكس دي بيبقى طعمها حلو و لذيذة جدا وهي باردة كدة مع كابتشينو .. بتبقى وااااااااااااااو :2:
منورة يا أميرة .
:f2:

Amira
05-06-2008, 11:20 AM
غير مستساغ ؟؟ اكيد ماجربتيهاش ..
هو انتي هتعمليها بجبنة فيتا و لا جبنة قديمة ؟؟ :d
هي الجبنة الكريم و احسنها الفيلادلفيا.. لنها بتبقى جبنة فيها طعم ..من غير ملح تقريباً .. كريمة حادقة شوية ..
في ناس بتعملها بكريمة حامضة بس من غير جبنة .. و دي دقتها و بتطلع ظريفة بس الجبنة الفلادلفيا احلى كتيييييييييييير
لو دقتيها هتغيري رأيك .. و لو على الدسامة .. بلاش تتعشي و خدي قطعة قد اللي انا خدتها دي :)
بالعكس دي بيبقى طعمها حلو و لذيذة جدا وهي باردة كدة مع كابتشينو .. بتبقى وااااااااااااااو :2:
منورة يا أميرة .
:f2:

امال انا عرفت منين انها غير مستساغ :d
تعرفي لو بجبنة قديمة يمكن كانت عجبتني لما أكلتها :d

أقولك انتي عليكي الي تشيز و انا عليا الكيك و الكابتشينو ;) و نطلع بقي العفريت الغير مستساغ ده :d

ده نورك يا قمر :f:

ابن البلد
05-06-2008, 11:25 AM
تسلم أيدك يا أنفال
بس عايزين ندوق مش نتفرج بس :4:

:f2:

أنفـــــال
07-06-2008, 04:28 PM
امال انا عرفت منين انها غير مستساغ :d
تعرفي لو بجبنة قديمة يمكن كانت عجبتني لما أكلتها :d

أقولك انتي عليكي الي تشيز و انا عليا الكيك و الكابتشينو ;) و نطلع بقي العفريت الغير مستساغ ده :d

ده نورك يا قمر :f:

حبيبتي و الله يا أميرة :h:
موافقة جداً .. بس أقعد معاكي مش لازم كيك و لا كابتشينو و لا تشيز حتى ..
بس يكون في فرصة إني أبقى قاعدة معاكي و بنتكلم كدة ..
شكرا يا أميرة يا عسل .
:f2:



تسلم أيدك يا أنفال
بس عايزين ندوق مش نتفرج بس :4:

:f2:
الله يخليك ليا يا أبو يوسف يا رب *162*
عيوني و الله .. بس تيجي فرصة حقيقية إني ألتقي بيكم و صدقني مش هتأخر .. و هاجي بيها في ايدي ان شاء الله ..
منورني و الله
:f2:

ندى الصباح
22-06-2008, 04:11 PM
ايه الجمال ده يا انفال

تسلم ايدك على الوصفة وانا عملتها قبل كدة وكمان طعمها لذيييييييييذ اوى وجميييييييييييل بس ندمت علشان عمايلها طويله شوية فقلت الاسهل اشتريها يوم ماحب اكلها

مشكورة على المجهود والصور:good:

تحياتى

أحلى كلمة
22-06-2008, 05:28 PM
تسلم ايدك يا أنفال

الكيك شكلة لذيذ وشهى جدااا

أنا مجربتش أعملها قبل كده

لكن موضوعك شجعنى أوى انى أعملها

تسلم ايدك حبيبتى على المجهود والصور التوضيحية :f:

أنفـــــال
23-06-2008, 09:54 AM
ندى الصباح و احلى كلمة :)
سعيدة بمروركم هنا جدا جدا ..
نورتوني.. جربوها و مش هتندموا ..
:f2:
تقديري و احترامي .

nariman
21-07-2008, 12:14 AM
مجهود كبير والله يا أنفال بجد انتى بتساعدى ناس كتير تتعلم وانا واحده منهم ..على فكره انا عملت البيكاتا وكانت حلوه جداا وعجبت الكل
أما التشيز كيك بصراحه باكلها كتير بره البيت ومكنتش أفتكر انها سهله كده
ان شاء الله اجربها

حقيقى بشكرك يا أنفال وكل الأعضاء اللى بيفيدونا هنا فى قاعه المطبخ

أنفـــــال
24-07-2008, 12:26 PM
ناريمان يا حبيبتي اهلا بيكي :)
نورتيني و الله ..
متشكرة على وجودك و تعليقك الجميل.

loly_h
31-07-2008, 10:26 PM
بسم الله ماشاء الله ...

شكلها بالفعل مغرى اوى

تسلم ايدك انفــــال

وموش هاخبى عليكى انا جربت اعمل تشيز كيك

قبل كدة ... لكن فشلت فشل زريع ... زريع ... زريع :good:

واكيد هاجرب طريقتك لانها اسهل من الطريقة اللى جربتها

بس كنت عاوزة اعرف اسم البسكويت اللى هاضيفة

لان البسكويت اللى جربته قبل كدة طلع موش مظبوط ابدا


وكمان لو حبيت اضيف حاجة غير صلصة التشوكليت

ايه الإضافات المتاحة... وطريقتها

معلش نوفــــــا ... هتعبك معايا

اصلى بحب التشيز كيك اوى ونفسى اتعلم اكتر من طريقة ليها

وميرسى اوى نوفا:f2:...

ابن رشد المصري
01-08-2008, 07:56 AM
تسلم ايدك.
جوعتيني على فكرة وأنا مفتري في الحلويات.
فاكر أول مرة نزلت فيها شرم وأنا صغير وأكلت من الأوبين بوفيه جبت الطبق الكبير الخاص باللحم والخضار وخليته للحلويات والجاتوهات وأخدت الطبق الصغير للخضار والرز ^_^.
بمناسبة الكيك فيه كيك بيبقي جيلاتيني شوية وبطعم الشوكولاتة وبيترش عليه صوص شوكولاتة .. متعرفوش اسمه ايه ولا بيتعمل ازاي؟

أنفـــــال
30-08-2008, 08:51 PM
لولي حبيبتي .. معلش انا اتأخرت عليكي .. :)
بس هجاوبك ..
البسكوت .. انا بستخدم دايجستيف .. و باخلطه بالزبدة زي ماشوفتي ..
و لما كنت في مصر استخدمت بسكوت ماري ايكا .. عارفاه ؟؟ برضه خلطته بزبدة .. و كانت النتيجة كويسة ..
و على فكرة كل ماكان البسكوت تكوينه في زبدة كل ماكان احسن ..
بالنسبة للتوبنج :)
ممكن تستعملي كمبوت االفاكهة .. ممكن تستعملي كريمة .. و تزينيها زي التورتة العادية ..
ممكن تقطعي فاكهة عادية و تغطيها بشوية جيلاتين دايبين في مية عشان تلمع ..
ممكن حاجات كتير :)
و انتي و ذوقك .. و اكتشفت من حبة قليلين كريمة القهوة :)
انك تضيفي معلقة نسكافيه على الكريم شانتيه .. دي برضه بتبقى ظريفة لو حطيتي فيها قطع كراميل ..
بحيث انك تحرقي السكر .. الي هو الكراميل و تصبيه اشكال كدة او خطوط على ورق زبدة .. و بعد ما يبرد تشيليه من فوق ورق الزبدة و تحطيه فوق كريمة القهوة .. دة بيبقى تجديد شيك اوي برضه :)
نورتيني ..
و كل سنة و انتي طيبة.

أنفـــــال
30-08-2008, 08:56 PM
ابن رشد .. :)
لو انا مش غلطانة دي اسمها black chocolate cheesecake
دي بتتعمل بشيكولاتة خام مرة .. بتتخلط مع نفس الخليط دة بتتجاب و تتسيح في حمام مائي ..
و تضاف تدريجيا لخليط الجبنة .. و بتستوي بنفس الطريقة ..
بس بتبقى مرة شوية صغيرين .. فبيتضاف عليها سكر ناهم و صوص شيكولاتة حلو .

nariman
12-09-2008, 08:22 PM
أنفال
كنت عايزه أسألك انتى بتجيبى جبنه فلادلفيا منين لأنى كنت فى كارفور وقبل كده فى سبينس ومش لقيتها خالص..

pussycat
23-09-2008, 08:05 PM
الله يا أنفال على الجمال

التشيز كيك رائعه بجد

وجميل فكرة صوص الشيكولاته وجديده بالنسبالى

لأنى متعوده عليها من غير صوص

بس أكيد هجبها المره دى بالتغير ده

وميرسى على زوقك الجميل

دايما ممتعانا بالمطبخ

تسلم إيدك

أنفـــــال
25-09-2008, 11:00 PM
ناريمان يا حبيبتي :)
اي جبنة ليها قوام كريمي صلب شوية زي الكيري او اي بديل ليها بحيث انها ماتكونش مملحة اوي تنفع :)
مش لازم فيلادلفيا او كيري ..
:f2: