المساعد الشخصي الرقمي

مشاهدة النسخة كاملة : حكايتى مع الرخصة



khalid radio
25-09-2007, 01:25 AM
حكايتى مع الرخصة " رخصة السواقة " حكاية جمبلة جدا

اسمعوا يا جماعة

انا زى اى حد سمعت ان المرور صعب جدا و ان امتحان الكمبيوتر دا امتحان صعب جدا و لو سقط فيه مش هعرف اعمل الرخصة الا لما امتحن كمان 3 شهور و دا كان طبعا وقت طوبل جدا و انا مش هينفع استنى كل دا دا لو قدر الله و سقط
المهم انا كنت محتاج الرخصة جدا عشان الشغل
بصراحة حاولت اطلعها بواسطة
لا تتخيلوا الوسائل اللى استعنت بيها عشان الموضوع دا و لكن و لاول مرة ولا وسيلة نفعت عشان تطلعلى الرخصة و محدش يسالنى ليه
لان انا نفسى مش عارف
ربنا عايز كده

و توكلت على الله و قولت اروح اطلع الرخصة عادى جدا و المفاجأة انى نجحت من اول مرة

كل دا كويس
المهم اليوم العالمى يوم ما رحت عشان اخلص ورقى و استلم الرخصة

طبعا انا كنت متخيل انى ممكن اقضى يوم بحاله فى المرور و اذا لقيت وقت فى الاخر ممكن استلم الرخصة فى نفس البوم و دى كانت هتبقى معجزة

رحت المرور حوالى الساعة 9 صباحا و عملت اجراات كتيرة اوى
بس المفاجأة بقى ان كل دا خلص فى ساعة و كان باقى خطوة واحدة بس

انى اتصور عشان استلم الرخصة

هقولكوا الموقف كان عامل ازاى احنا كنا 2 مخلصين ورقنا من بدرى و مستنيين ان احنا نتصور و بالتالى واقفين عند غرفة التصوير

و كان فيه ناس كتير جدا لسه بتخلص ورقها عشان نفس الغرض
من البديهى اننا احنا الـ 2 نكون اول ناس مخلصين الحوار كله

فيه واحد اسمه حسين دا موظف مش عارف المسمى الوظيفى بتاعه ايه و لكن كان اللى بيقوم بيه انه بيجيب الورق الخاص بتاع كل واحد من عند الموظفة اللى بتأشر عليه و بعدين يوديه لواحد اسمه تقريبا محمد دا بيراجع على الورق عشان التزوير و الذى منه و بعدين حسين دا يجيب الورق من عند محمد و يوديه اوضة التصوير عشان يفرزوه و ينادوا على كل اسم عشان يتصور و ياخد الرخصة بتاعته

عايز اقولكم ان حسين دا تقريبا مش بيرد على حد خالص الا لما تديله 5 جنيه او اللى تجود بيه نفسك
عملت زى الناس " فى الفلوس يعنى " و اديته 5 جنيه

بعديها حسين دا من الساعة 10 الى الساعة 2.5 ظهرا رايح جاى مش بيبص فى وشنا خالص و مش بيرد على حد برضه حتى انى انا مشفتش عينيه طول الوقت دا

المهم ان الساعة بقت 3 العصر و كل الناس مشيت ما عادا انا و الاخ الحكاية اللى كان معايا
طبعا قلقنا و سالنا كل الموظفين عن حسين دا اذا كان جاب ورقنا و لا لا

حتى ان حسين نفسه كان بتهايلى انه كان عايز يتف علينا مش عارف ليه
رحنا للاستاذ محمد اللى بيراجع و حصلت مهزلة اخلاقية من الزعيق و الشتيمة و قلة الادب من محمد دا و فى الاخر قفل الشباك فى و شنا و قالنا انا خلاص مش شغال غورو من و شى !!

طبعا انا كده جبت اخرى بس مش عارف اكلم مين كل واحد بيقولى انا مليش دعوة شوف عند الاستاذ فلان و المشكلة ان انا معنديش و قت للكلام دا و مزوغ من الشغل عشان اخلص الموضوع دا مخصوص

المهم قلت لا زم اعمل اى حاجة رحت لمكتب كده غريب شوية و قلت انا عايز اكلم محمد بيه " دا غير محمد بتاع الشباك "
طبعا عشان تبقوا عارفين انا مش عارف مين محمد بيه دا بس دا الاسم اللى جه على بالى ساعتها على اساس ان لابد ان يكون فيه حد من الظباط اسمه محمد بيه يشوفلى صرفة فى المشكلة دى

قالولى ادخل المكتب اللى هناك دا يابنى

رحت المكتب " و بما انى مش عارف انا داخل على مين و كمان مش بعرف الرتب بتاعت الشرطة علاماتها عاملة ازاى و لا ترتيبها "

رحت باصص للهوا و قلت محمد باشا ؟
وقف واحد طويل عريض : و قالى خير يا استاذ " انا كنت لابس هاف كلاسيك ساعتها لانى كنت مزوغ من الشغل"
قلت بقلاطة و قرف شديد اوى : انا و الاخ بقالنا هنا اكتر من خمس ساعات واقفين فى الشمس و ناقصنا بس اننا نتصور علشان ناخد الرخصة و ورقنا محدش لقيه خالص هو الورق ضاع و لا ايه ؟
محمد بيه : طيب طيب
و بينادى : يا حسييييييييييييييييييييييين
............................

و لاول مرة اشوف وش حسين كاملا
حسين : ايوة يا محمد باشا تحت امر معاليك
محمد بيه : شوف الناس دى مشكلتها ايه بسرعة و مشيهم
................................


اللحظة دى نقطة تحول كبيرة انا نفسى مكنتش متخيل ان اللى انا عملته ممكن يحل المشكلة بالسرعة دى

فبما انى كنت لابس كويس و اللى معايا كان برضه مش بطال و بما انى دخلت على محمد بيه مباشرة و كلمته بقلاطة شديدة و بدون رهبة
كان دا سبب ان محمد بيه " اللى اكتشفت لاحقا انه مدير المرور شخصيا " يعتقد انى شخص مهم و لى مركزى و انى مش هاممنى اى حد حتى هو شخصيا و بالتالى امر حسين انه يخلصلنا الموضوع بسرعة ووصاه علينا بغرابة شديدة

المهم كمان ان المرور كله انقلب لخدمتنا انا و الاخ التانى لمجرد انهم عرفوا ان محمد بيه شخصيا امر ان كل شىء يمشى بسرعة

من اللحظة دى و فى خلال 5 دقائق خلصت الرخصة و كان حسين معانا فى كل خطوة و بيذلل لينا اى عقبة تقف فى طريقنا عن طريق انه يوشش الموظف فيقوم الموظف و يسلم علينا و كله تمام

الظريف بقا ان احنا لقينا الورق بتاعنا مرمى على الارض وقع من حسبن و عشان كده اتاخرنا كل الساعات دى
و لا تتخيلوا كم التاسف الشديد من حسين على الغلطة الشنيعة اللى عملها و انه ماكنش واخد باله ان ورقنا وقع منه و كله هيبقى تمام و الله

و الظريف اكتر هو موقف محمد بتاع الشباك فبمجرد ما حسين وشوشه راح فاتح الشباك و قالنا اتفضلوا لفوا يا بشاوات و ادخلوا المكتب ما يصحش من على الشباك كده
و فى المكتب وقف يتاسف و ان دا كان نرفزة شغل و الجو حار و الناس دمها تقيل


و اخيرا خلصت الرخصة بعد يوم طويل من الشد و الجذب و كله بفضل خطة العبد لله اللى ميعرفش حتى صول فى اصغر قسم بوليس

اسف على الاطالة


تحياتى

my fate
27-09-2007, 12:51 AM
هههههههههههههههههههههههههههههههههههههههههههههههه
عمار يا مصر
بس الحمد لله ان الرخصة طلعت
شكرا على الموضوع

محمود زايد
27-09-2007, 01:47 AM
هو ده الطبيعى فى اى حاجه لازم واسطه وتوصيه
الحمد لله انها خلصت على خير وادعى لمحمد بيه بقى

khalid radio
27-09-2007, 09:32 AM
هههههههههههههههههههههههههههههههههههههههههههههههه
عمار يا مصر
بس الحمد لله ان الرخصة طلعت
شكرا على الموضوع

الحمد لله
شكرا على المرور


هو ده الطبيعى فى اى حاجه لازم واسطه وتوصيه
الحمد لله انها خلصت على خير وادعى لمحمد بيه بقى

يارب يخلى محمد بيه
شكرا على المرور يا جميل

تحياتى

الأنسه بكلويز
27-09-2007, 10:35 AM
صديق الكفاح خالد باشا

طيب سعادتك نجحت في الامتحان
تعالي نشوف الاختيار "نمبر تو" لو سقطت في امتحان الشفويييي
يعني ترجع بعد 3 شهور

بص يا سيدي

بصيت.... ما علينا

بعد الحمد لله مسقطت في الشفوي و اتقالي تعالي بعد 3 شهور و بما ان العربيه كانت جديده و بما انها مكنتش لسه اترخصت و بما انها تقسيط يعني مندوب الشركه هيقوم بالترخيص
تمام يا باشا...قلت لحد متترخص العربيه احاول ادور علي طريقه ....شوف يا سيدي
كل اللي لقيتهم ممكن يسعدوني ,,, ادي الفزيتا:
علشان تتعمل الرخصه في مرور اخر = 500 جنيه
و علشان تتعمل الرخصه في المرور اللي انا تابعه ليه و ينشال السقوط و يبقي نجاح = 700 جنيه

و اصلا الرخصه ورقها كله علي بعضه ميخدش 100 جنيه

حلفت ميت يمين مانا دافعه لحد حاجه انا مش هدفع رشوه...و كبرت في دماغي و استنيت اما العربيه اترخصت و عند بقي مشيت شهر بيها من غير رخصه قياده خاصه
اه و الله
و ابويا بما انه معاش ميعرفش حد و لما كان بيشغل و بيعمل خدمات للناس كل واحد "حاضر يا باشا" "احنا تحت العين و النظر"
و كل اللي كانوا بيقولوا كده محدش عبره
الا واحد و في مرور تاني خالص و علشان زيه دكتور وكان بابا بيخدم دايما بس دكتور ظابط طبعا
و انا ابويا و الحمد لله كان بيخدم الناس كلها من غير تفرقه لانه طبيب و الطبيب له ميثاق...
بس بص بقي الدكتور ده قالي ايه يوم مرحتله و طبعا دفعت ال100 جنيه بس و 10 جنيه في ايد المندوب اللي كان بيخلص للناس اللي جايين للدكتور ده واسطه... اه مانا كنت واسطه ساعتها
"علي فكره يا بنتي محدش هيعملك اللي انا بعملهولك ده و ابوكي علي المعاش.. بس هو راجل صاحب افضال علينا و احنا بنرد"
ايه الذوق ده
قمت راده عليه
"عارفه انه صاحب افضال يا اونكل"
بكل بجاحه برضه بصتله و بصلي.........

و طلعت الرخصه

و ادي الكوسه اللي في البلد و ياريتها كوسه بحقها لا كوسه بقله ذوق

و دمتم

khalid radio
27-09-2007, 11:02 AM
منورة الموضوع و الله يا صديقة الكفاح انسة بكلويز

الاسعار اللى انتى بتقوليها دى فى دمياط عندنا بقا الوضع مختلف شوية

يعنى لو عايزة تتطلعى الرخصة تبع الجيزة تبقى الفيزا = 600 جنيه بس فيها شك انها تبقى مضروبة
كل ما عليكى ان انتى تدفعى الفلوس و تروحى فى الميعاد اللى الواسطة قالهولك و فقط تتصورى صورة الرخصة و تخديها بعدها بيوم

اما بقى لو عايزاها رخصة تابعة لمرور دمياط العظيم فالاسعار كانت ايامها مولعة نار يعنى وصل لـ 1200 جنيه للرخصة
و الرقم دا طبعا جننى و خلانى احلف زيك بالظبط انى لا يمكن ادفع الفلوس دى عشان رخصة

بس انا رحت جربت حظى و نجحت

انتى اللى سقطتى ربنا يكون فى عونك ساعتها


"علي فكره يا بنتي محدش هيعملك اللي انا بعملهولك ده و ابوكي علي المعاش.. بس هو راجل صاحب افضال علينا و احنا بنرد"

هو دا الشعب المصرى

تحياتى