المساعد الشخصي الرقمي

مشاهدة النسخة كاملة : النت ابو 45 جنيه قاطعوهاااااااااااااااااااااااااااا



khalid radio
21-09-2007, 04:08 PM
السلام عليكم

كل سنة و انتو طيبين و رمضان كريم

و حشتونى ولكن كنت مشغول جدا فى شغلى الجديد و كمان مكانش عندى نت لان الراجل اللى انا موصل منه نت " وصلة غير شرعية " خلاص بح و قفل السيبر بالشمع الاحمر :(

خلال الفترة اللى النت كان فيها مش موجود كنت انا بصيف و كده

مكنش شاغلنى حكاية النت دلوقتى لكن لما رجعت من المصيف زهقت من الكمبيوتر من غير نت

سمعت عن ان النت الدى اس ال اسعاره هترخص على اول شهر 9 و هتبقى 45 جنيه
قلت والله دى حاجة كويسة اوى و اهو الواحد يخلص من رزالة الراجل اللى كنت موصل منه و النت اللى بيتقطع و الناس اللى بتعمل داونلود طول النهار و بيخلوا النت بسرعة السحلفة

طيب قلت خلاص استنى النت ابو 45 جنيه دا و ربنا يسهل و نستحمل شوية كله فى سبيل النت الرخيص

فى اول مقال نشر فى الجرايد اتصدمت " صدمة اولى " جامدة جدا
لقيت النت رخص اه بقا بـ 45 جنيه فى الشهر و لكن محدد الباندويدث بـ 2 جيجا شهريا فقط !!!!!!!!!!!!!!!!

طبعا للى مش عارف الـ 2 جيجا دول ممكن اخلصهم انا فى 2 يومين بس

طبعا احبط جامد جدا و مفيش قدامى بقا غير النت ابو 95 جنيه بس دا هيبقى عبء جامد عليا خصوصا ان انا اللى هدفعه لوحدى من مالى الخاص + طبعا ايجار الراوتر + مصاريف التركيب

يعنى مصاريف جامدة جدا

فكرت مع نفسى قولت طيب ما هو النت ابو 95 جنيه دا غالى اوى و النت اللى انا كنت بوصله من الراجل الرزل اللى تحتنا اهو راح خلاص

مفيش قدامى غير حل واحد بس و امرى الى الله
انى اشترك فى النت ابو 45 جنيه و ربنا يستر

توكلت على الله و كلمت Linkdsl

انا من دمياط للى مش عارف

المكالمة :

انا : سلام عليكم linkdsl
link : ايوة يافندم مع حضرتك مساء الخير
انا : مساء النور ممكن استفسر عن الـ دى اس ال و ازاى اوصله؟
link : طبعا يا فندم خليك معايا ثوانى ......
حولنى لواحد تانى

انا : الو سلام عليكم
link : و عليكم السلام ايوة؟
انا : ممكن استفسر عن ال دى اس ال و اسعاره و كده ؟
link : طبعا يا فندم ممكن رقم التليفون
انا : هو انا من دمياط
link : ....
حولنى لواحد تانى من غير ما يقولى

انا : الو ؟!
link : ايوم يافندم linkdsl معاك
انا : انا من دمياط و عايز اوصل دى اس ال ممكن ؟
link : طبعا يا فندم ممكن حضرتك تتصل بالوكيل بتاعنا فى دمياط رقمه : 0120000000
انا : اوكى شكرا ليك .. سلام

اتصلت بالوكيل و طبعا استغربت ان الرقم اللى قالهولى رقم موبايل !!
رد عليا الوكيل اللى معرفش اسمه ايه و قالى انه بره المكتب دلوقتى و انى اتصل بالمكتب و هما هيقولولى اعمل ايه و ادانى رقم ارضى فى دمياط

اتصلت ردت عليا واحدة صوتها ظريف و قولت نفس الاستفسار العجيب
انا : لو سمحتى دا توكيل linkdsl فى دمياط
هى : ايوة اى خدمة يا فندم
انا : كنت عايز اوصل دى اس ال ممكن اعرف المطلوب منى ايه ؟
هى : ممكن رقم التليفون
انا : 2247220
هى : ممكن التوصيل يا فندم اشتراك شهرى 95 جنيه؟
انا : لا انا عايز اشتراك الـ 45 جنيه
هى : بس دا محدد الداونلود بـ 2 جيجا بس فى الشهر
انا : اوكى عارف
هى : اوكى حضرتك فى الاول هتدفع 60 جنيه تأمين و 280 جنيه راوتر و 50 جنيه تركيب و 20 جنيه كل 3 شهور للمصرية للاتصالات
انا : يااه طيب الراوتر مش ممكن ااجره
هى : لا و الله احنا بنبيع بس
انا : طيب انتى نسيتى تضيفى الـ 45 جنيه كمان على كل دول
هى: لا مش مشكلة حضرتك تدفعهم لما نوصلك الخدمة ان شاء الله
انا : !!!!!!!!!! انتى بتتكلمى فى حاجة بتاعت اكتر من 500 جنيه عشان اوص دى اس الى محدد الداونلود بـ 2 جيجا و بـ 45 جنيه فى الشهر
هى : طبعا يا فندم
انا: شكرا سلام

انا اتصدمت " صدمة تانية " من الارقام اللى هى قالتهالى و قولت طبعا لازم اتصل بالشركة الام linkdsl اتاكد من الكلام العجيب دا و كانت المفاجأة ان خدمة العملاء قالولى : يافندم اللى انت كلمته توكيل و كل توكيل له سياسته الخاصة و الاسعار اللى حضرتك بتقولها انا معنديش عنها اى فكرة

!!!!!!!!!!!!!!!!!!!!!!!!!!!!!!!!!!!!!

اتصدمت " صدمة تالتة " من الكلام دا ازاى توكيل و له سياسته الخاصة و اسعاره غير الشركة الام !!

ما علينا اشوف tedata جايز يكون عنهم الحل
مرة تانية كلمتهم و حذرونى برده من النت ابو 45 جنيه و برده حولونى على وكيل فى دمياط برقم موبايل جديد
اتصلت بيه و برده ادانى رقم ارضى اتصل بيه

اتصلت بيه و كانت الصدمة " صدمة رابعة " ان اللى رد عليا كانت نفس البنت بتاعت linkdsl
طبعا انا مستنيتش انها تقولى الاسعار تانى و تجيبلى شلل انا مش ناقص

!!!!!!!!!!!!!!!!!!!!!!!!!!!!!

احبط بشكل كبير و بقيت يتيم من غير نت من اى جهة
و لكن لقيت بارقة امل كبيرة جدا لما لقيت المحل اللى ورانا فجأة و بقدرة قادر بقا بتاع موبايلات و سنترال و بيوصل نت للمنازل

بيصول نت !!

كلمته على طول و اتفقت معاه على كل حاجة و بكره هوصل النت " وصلة غير شرعية " بـ 30 جنيه فى الشهر سرعة معقولة و داونلوود مفتوح 24/7 فى الاسبوع

الى كل القارئين

اياكم و النت ابو 45 جنيه

قاطعوهااااااااااااااااااااااااااااااااااااااااا

اليكم تحياتى

om elbanat
21-09-2007, 04:36 PM
السلام عليكم
قصه رغم صعوبه الاحداث فيها الا انها طريفه جدا وبتضحك
ودا اكبر دليل على ان الاعلانات ماهى الا مجرد ضحك على عقليه المشاهد او المستمع
ربنا معاك بقى ويوصل لك نت من غير سرقه ولا مشاكل ولاتحديد وقت استخدام
واهو دا عيب المصريين اعلانات وهميه قال 45 جنيه ؟
مع تحياتى

Emad.
22-09-2007, 02:56 AM
اولا وخده بالم ام البنات كام اتصال وكام تحويله وكله ده علي حساب الاخ المتصل يعني افاده مابعدها افاده
حسبي الله ونعمه الوكيل
طيب فاضل ايه تاني علشان الناس تعمل فعلا مقاطعه
وربي لو حصل مره وحده فعلا مقاطعه لشئ ما صدقوني الاسعار والجشع هينتهي من مصاصي الدماء

khalid radio
22-09-2007, 10:29 AM
السلام عليكم
قصه رغم صعوبه الاحداث فيها الا انها طريفه جدا وبتضحك
ودا اكبر دليل على ان الاعلانات ماهى الا مجرد ضحك على عقليه المشاهد او المستمع
ربنا معاك بقى ويوصل لك نت من غير سرقه ولا مشاكل ولاتحديد وقت استخدام
واهو دا عيب المصريين اعلانات وهميه قال 45 جنيه ؟
مع تحياتى

فعلا ام البنات كلها ضحك على عقلية المشاهد و كفاية ان كل الاعلانات اللى فى الجرايد مش قايلين فيها حكاية اللى 2 جيجا دول
شكرا على الرد ام البنات

تحياتى

khalid radio
22-09-2007, 10:39 AM
اولا وخده بالم ام البنات كام اتصال وكام تحويله وكله ده علي حساب الاخ المتصل يعني افاده مابعدها افاده
حسبي الله ونعمه الوكيل
طيب فاضل ايه تاني علشان الناس تعمل فعلا مقاطعه
وربي لو حصل مره وحده فعلا مقاطعه لشئ ما صدقوني الاسعار والجشع هينتهي من مصاصي الدماء

اه والله يا استاذ عماد انا كل اللى استفدته من الموضوع دا ان انا اتكلمت موبايلات و مباشر و ارقام خاصة كتير و ربنا يستر على الفاتورة و انت عارف انا دمياطى بقا :)
و و الله لو فعلا عملنا مقاطعة مرة واحدة فى حياتنا ممكن يحصل اى تغيير

معلومة للزمن :
فى اوروبا النت سرعته وصلت الى 8 ميجا فى الثانية و بـ 8.5 دولار شهريا و الداونلود مفتوح
يعنى بحوالى 49 جنيه !!!!!!!!!!!!!!!!!


تحياتى


Photo Gallery