المساعد الشخصي الرقمي

مشاهدة النسخة كاملة : بيان تليفزونى هام



om elbanat
01-08-2007, 01:31 PM
تم نقل هذا الموضوع من مدونه ولااعجابى الشديد بالاسلوب الساخر لصاحبتها نقلتها لكم وارجو ان تنال الاعجاب مع حذف بعض العبارات التى لاتتناسب مع سنى واسلوبى ......

بعد التدقيق الشديد ف شرايط القنوات الفضائية ( شرايط الشات اللى بتبقى متلقحة ف آخر الشاشة !!!! ) و بعد التتنيح بالساعات قدام شاشة التلفزيون .. استطعت بقدرتى العبقرية و الفذة من نوعها أن أستنتج ........... ان نص الشعب حتما ًغبى و عايز الحرق !!!!!



لأ اللى بيحصل ده مش طبيعى !!! أنا قريت شوية جُمل يا جماعة بجد تنحت قدامها !! و بين كل جملة و جملة كان هيجيلى شلل








إليكم الشلل التالى

1-
*** ممكن حب اسكندرانى***
آيوووووووووووه و ماله !! طبعا زى ما انتوا عارفين فيه حب اسكندرانى و حب قاهرى و فيه فلاحى و فيه صعيدى !!! و اذا مشينا بالحدود شوية هنلاقى فيه حب لبنانى و حب امريكانى و صينى و يابانى !!!! و هكذا و مقولكوش بقى ع الحب المريخى !!!!
و برضه فيه حب بالفراخ و حب بالكباب و فيه بالشطة و اللمون !!!!!!! و يا سلام بقى ع الحب بالجبنة !!!
فظييييييييع !!! خصوصا لما بيتقطع عليه طماطم بيبقى مسخرة



2-
*** أنا 75 سنة ممكن أتعرف على ليدى مناسبة***
خمسة وسبعين سنة يخرب بيته و قادر يمسك الموبايل و يبعت مسج ؟؟!!! ما شاء الله لسه ف عز شبابه برضه !! آه و ماله ممكن تتعرف على كركوبة مناسب
3-
*** ممكن واحدة جميلة للصداقة و الحب و ياريت برضه للسفر ***
آه ممكن طبعا !!! و يا ترى حضرتك عايزها كام سلندر ؟؟؟؟؟؟؟؟؟؟
4-
*** أنا شاب متدين ممكن ليدى عندها شقة ***
آه و ماله !! و فيه برضه شقة و عليها ليدى مجانا !!!! و ياترى ايه مواصفات الشقة اللى عايزها ؟؟؟؟؟؟؟؟؟؟؟؟؟؟
5-
*** أنا دلوعة و شبه نانسى عجرم ممكن أتعرف ***
آه و نص !! و ياترى واخدة من نانسى عجرم قفاها و لا كعب رجليها ؟؟؟؟؟؟؟؟
اتدلعى يا اوختى و ماله !! و لما حضرتك أمورة كده امال بتعرضى نفسك ليه ع الشاشة ؟؟؟؟؟ ايه محدش راضى يشترى خلقة نانسى عجرم ؟؟؟ ايه الرجالة بقت بتطس ف نظرها ؟؟؟؟؟؟؟؟؟؟؟؟؟ لأ معندهمش حق
6-
*** أنا ف اعدادى ممكن أتعرف على بنت حلوة ***

هيا جات عليك ؟؟!! و ياترى عايزها ف سنة كام يا حبيبى ؟؟؟؟؟ ابتدائى و لا حضانة ؟؟؟؟؟؟؟ أنا بالشكل ده هيجيلى السكر
7-
***فلانة : أنا نكدية موت ممكن أتعرف على نكدى و ننكد على بعض ***
*** فلان : أنا نكدى مووووت !! و قعتك سودة و نهارك مش باينله لون ***
كان نفسى أمسكهم هما الجوز و انكد على أهاليهم


8
*** معاكى فلان ممكن أعرف اسمك سنك طلباتك ***
آه و ماله أنا فلانة يا ابنى ... و النبى اطلبلى واحد كباب و اتنين بانيه !!!!
احم احم .. و ياريت لو معاهم جوز حمام
9-
*** أنا عايز بنت للارتباط سمرا أو بيضا أو قمحى ما تفرقش ***
حمرا !!!!!!!!!!!! تاخدها حمرا ؟؟؟؟؟؟؟؟؟؟؟ طب ايه رأيك ف البنفسجى ؟؟؟؟ جديد و منزلش السوق
10 -
*** ممكن واحدة جميلة استايل عشان أحبها ***
آه و ماله !! أنا برضه عايزة بطارية للموبايل بتاعى عشان أنا قربت أهنج !!!!!!
11-
*** أنا سى السيد بدور على أمينة تسمع الكلام و تقول حاضر ***
آه و ماله حاضر يا اخويا !!! بقى حضرتك عايز أمينة ؟؟؟؟
طب غووووووووووووووور الله يحرقك


12-

*** لو انت بتحبنى بجد ممكن أديلك رقمى !! ***
يا ما شاء الله !!! انتوا بتحبوا بعض الأول و بعدين تتعرفوا على بعض ؟؟؟؟؟؟؟؟؟؟؟؟
تصدقى بالله أنا دلوقتى بس عرفت أهمية السراية الصفرا
13-
*** فلانة : ممكن تعرفنى على نفسك عشان هتبقى حب العمر ***
*** فلان : هحكيلك عن حياتى كلها !!! .. أنا من النهارده ملك قلبك !!!!!! انتى حددى و انا تحت أمرك ***
أشوف فيكم يوم بحق جاه النبى !!! الدماغ دى معجونة من ايه ؟؟؟؟ أنا خلاص هيجيلى شلل !!! ألطم يا اخوانا ؟؟؟؟؟
14 -

*** أنا قلبى فاضى .... حد عايزنى أحبه ؟؟؟ ***
فسسسسسسسسسسسسس أنا مُت خلاص
15 -
فلانة : عرفنى على نفسك يا فلان و ابعت رقمك .. أنا بحبك أوى ، فلان : أنا اللى بحبببببببك أوييييى يا فلانة !! قوليلى صحيح هو انتى حلوة و لا ؟؟؟؟؟؟؟؟لا تعلييييييييق ...... أنا شكلى هموت تانى
ثوانى أموت و ارجعلكم

كلمة أخيرة :
اللى بيحصل ده كتيييييييييير .. شئ ميبقبلوش لا قلب و لا عقل ولا منطق .. استهتار و استخفاف بالمشاعر و كذب مالوش نهاية و ضحك ع العقول !!!! و الدهشة انه كل اتنين بينافقوا بعض و الوسيلة الرخيصة ...... الحب !!!!!! مع ان كل كلمة حب غالية أوى .... ايه اللى جرى للناس ؟؟؟؟؟؟ و ايه اللى جرى للمجتمع ؟؟؟؟؟؟؟؟؟؟

منقول للكاتبه ايمان

osha
02-08-2007, 04:36 AM
الاخت الحبيبة ام البنات
والله الموضوع دا صحيح فكاهي بس شر البلية مايضحك
انا لما كنت باتابع ساعات الشريط دا كنت باحس ان الناس عايشة في وادي تاني وبيصرفوا مصاريف خيالية على كلام فارغ وتافه وغير الفلوس كمان هو بيحقروا من مستوى تفكيرهم وعقلهم بالسلوك السخيف السمج دا
مش عارفة مين اللي اتهبب في نافوخه وسمح واخترع الحاجات دي
تصدقي هنا في امريكا انا عمري ما شفت السخف دا خالص في القنوات اللي عندنا - يمكن بقى في قنوات متخصصة بس في حدود علمي ماشفتهاش خالص

شكرا ليك على النقل وربنا يكون في عون من يشاهد السخف دا

om elbanat
02-08-2007, 09:31 AM
الاخت الحبيبة ام البنات
والله الموضوع دا صحيح فكاهي بس شر البلية مايضحك
انا لما كنت باتابع ساعات الشريط دا كنت باحس ان الناس عايشة في وادي تاني وبيصرفوا مصاريف خيالية على كلام فارغ وتافه وغير الفلوس كمان هو بيحقروا من مستوى تفكيرهم وعقلهم بالسلوك السخيف السمج دا
مش عارفة مين اللي اتهبب في نافوخه وسمح واخترع الحاجات دي
تصدقي هنا في امريكا انا عمري ما شفت السخف دا خالص في القنوات اللي عندنا - يمكن بقى في قنوات متخصصة بس في حدود علمي ماشفتهاش خالص

شكرا ليك على النقل وربنا يكون في عون من يشاهد السخف دا
السلام عليكم
حقيقه الموضوع ان هذا الشريط الاعلانى الذى يظهر باسفل الشاشه هو شريط تجارى الهدف منه فى المقام الاول هو الربح من وراء سخافات الاخرين واعتقد انه لو صدرت فتوى على مشروعيه الربح من وراء هذا الشريط فهى بكل تأكيد حراااااااااااااااااام . القنوات العربيه تسعى لكسب الربح بكل الطرق والاساليب وربنا يحرمنا من هذه الافكار التى اؤؤكد انها افكار شيطانيه لااكثر بالاضافه الى الاستهانه بعقول الناس
اشكرك على مداخلتك والى لقاء

دكتور مهندس جمال الشربينى
02-08-2007, 02:38 PM
خمسة وسبعين سنة يخرب بيته و قادر يمسك الموبايل و يبعت مسج ؟؟!!! ما شاء الله لسه ف عز شبابه برضه !!



آه و ماله صحيح إذا كان راعينا كلنا داخل على الثمانين و مازال خاطب ود مصربالعافية من أكثر من 25 سنه ...حتتشطروا على الغلبان أبو خمسة وسبعين سنة!...
حرام عليكو ده بيقولوا صلاح الرعية من صلاح الراعى و العكس غير صحيح لأسباب دستورية و عرفية!

om elbanat
17-08-2007, 02:50 AM
آه و ماله صحيح إذا كان راعينا كلنا داخل على الثمانين و مازال خاطب ود مصربالعافية من أكثر من 25 سنه ...حتتشطروا على الغلبان أبو خمسة وسبعين سنة!...
حرام عليكو ده بيقولوا صلاح الرعية من صلاح الراعى و العكس غير صحيح لأسباب دستورية و عرفية!

السلام عليكم
استاذنا الفاضل دكتور جمال اشكرك على مروك الكريم والى لقاء

Emad.
18-08-2007, 05:29 AM
السلام عليكم
والله اختي الكريمه انا لما بكون في مصر واتفرج واشوف بقعد اضحك مش مصدق الشباب والناس وصلت للدرجه دي من قلة العقل من اللي بيتكتب قصص ورويات وسلامات وفلوس طايره في الهوا من الرسايل
مش عارف اقول ايه غير ان الشباب اليوم فعلا فاضي ورايق من ايه مش عارف هل مبسوط من فشله وقعدته في البيت ولا كتر رصيد في المحمول
فعلا والله كنت بغير القناه من كتر الكلام المكتوب اللي يغيظ فعلا
شكرا لنقلك
وربنا يهدي الجميع

حــوده
18-08-2007, 08:13 AM
الفاضلة ام البنات والله موضوعك مهم جدا لان انا كمان خلااااااااااااااص قرب يجينى العصبي من اللى بشوفو على الشريط وكويس انك لاحظتى الحكايه دي وكمان فيه رسايل بتكون افظع من كده
ربنا يتولانا برحمتو
انا بدأت اشك اني انا اللى مش طبيعي مش المجانين اللى بيحبو بعض برساله

حمادو
18-08-2007, 09:28 AM
انا شاب في التسعين من العمر ووقعت في حب ايمان صاحبة المدونة, ممكن تعرفيني عليها؟
ههههههههههههههههههههههههههههههههههههههه

ايه يا ام البنات؟
انتم بتصعبوا الامور ليه كده على الشباب الغلبان؟
خلى الشعب يعيش ويفرفش..
وعلى رأي الراجل اللى في مسلسل غوايش (كله يدلع نفسه)
هههههههههههههههههه

عارفه؟
لو كان البيه او الهانم اللى بيبعت الرسائل الخايبة دى جايب الموبايل والخط من عرقه, كان هايفكر مليون مرة قبل مايبعت التفاهة دى...انما للاسف الشديد اهالينا بيكون عليهم ذنب في التفاهة دى, لان كل حاجة سهلة وهاتى يا ماما وادفع يا بابا...
بخلاف ان التفاهة دلوقتى اصبحت من الروشنة والاصتباحة, يعني الواحد علشان يعمل دماغ الصبح لازم يتهايف شويتين...
كمان فيه نوعية من الناس متخيلة ان الباب الوحيد للكلام مع البنت انه يقول لها بحبك, في حين انه لو اتعامل معاها كأخت بيكسب احترامها اسرع...

بالمناسبة قبل ما انسى.
انا واد حلو وقمور وعايز اتعرف...
اللى تحبنى تبعت لى على رقم موبايلي الجديد اخر صيحة اللى بابى جابه :girl25:

om elbanat
22-08-2007, 06:49 PM
السلام عليكم
شكرا لك ياعماد على مشاركتك وطبعا اكيد مفيش شريط فى اخر الشاشه فى تليفزيونات اولسو
ربنا يعطينا الصبر
الاخ حوده اشكرك على مداخلتك وطبعا انت اللى صح مش المجانين بتوع الرسايل التافهه دى
الاخ حمادو انت كدا ممكن تكون مصمم اعلانات واساليب جديده مبتكره خصوصا لما بابى يجيب لك موبايل انت مش تعبان فى ثمنه هههههههههههههههههههههه طبعا عند حضرتك حق كل ماالانسان يتعب بيعرف قوى قيمه مايحصل عليه
اشكرك على مداخلتك التى اضحكتنى كثيرا والى لقاء اترككم جميعا فى امان الله

the_chemist
30-04-2008, 08:26 PM
و الله يا أم البنات دى مهزلة

و كما يقولون هم يبكى و هم يضحك

و أصحاب القنات دى بيكسبوا مكاسب خيالية

و المجانين كتير

أنفـــــال
04-05-2008, 11:54 AM
و الله مش قادرة اضحك لسبب جدا بسيط ..
هو ان الموضوع مبكي ..!
و الله مبكي !!
جايز يكون كوميدي و دمه خفيف ..
بس انا شايفاه .. صورة من الواقع ..
صورة من الفراغ و انعدام المسؤولية ..
صورة من النصب و الكذب ..
شكرا ام البنات .

الأدهم
05-07-2008, 06:12 AM
بالفعل أنا أحيانا أقرأ المساخر دى لكن تصورى أن 90 % منها على سبيل المزح والتهريج لكن السفه واضح مفيش شك .. لكن بجد كتير بأضحك .

حنـــــان
05-07-2008, 01:45 PM
مش هنا قاعة فك التشكيرة؟
أنا من ساعة مادخلت الموضوع ده وأنا عمالة أكشر زيادة!
كده برضو يا أم البنات وأنا اللي فاكرة حقرا حاجة تضحكني :(

الواحد ممكن يقول... الحق مش على الشباب الحق عاللي جابلهم الموبايلات ومش بيحاسب على المصاريف... لأ ويقعد يشتكي لأصحابه شوف الولاد بقوا يصرفوا قد ايه ويغنوا ويردوا على بعض ويقولوا ماهو كله بقى كده دلوقتي ويغيروا الموضوع.

بس حنقول ايه في أبو 75 سنة ده؟

ما علينا من ال75 سنة... بس نصيحة للأهل امسكوا ولادكم رنوهم علقة محترمة وخدوا منهم الموبايل

لاحسن حد من بتوع حقوق الانسان يطلع يقول دي child abuse

تسلمي يا أم البنات.

nariman
05-07-2008, 06:51 PM
أيوه فعلا مره قعدت اتابع الشريط كده وقلت اشوف الناس دى بتقول ايه...أنا رومانسى ممكن اتعرف بس تكون جاده والتانيه ترد وتقول لو جاد ياريت نتعرف.... قال جاد قال.............جاد بتاع الفول هههههههههههههههههههه

شكراااا للنقل ام البنات

noogy
05-07-2008, 06:55 PM
موضوع حلو جدا وفعلا هم يضحك وهم يبكى
عجبنى اوى الجزء ده

***فلانة : أنا نكدية موت ممكن أتعرف على نكدى و ننكد على بعض هههههههههه تحفة بجد انا مش عارفة الناس دى بتصرف الفلوس دى كلها ليه فى حاجات فاضية
بيحسسونى ان الفلوس دى لاقينها فى الشارع
والكلام دلوقتى لحمادو انا عايزة اعرف بس الاول ايه نوع الموبايل لانه على اساسه النصب هيبدأ :m19: قصدى الحب
تسلم ايدك عالموضوع الجميل ده يا ام البنات

pure-love
06-07-2008, 06:35 PM
بسم الله الرحمن الرحيم
هو فعلا زي لما قال الاستاذ الكيميائي
هم يضحك وهم يبكي
لكن المشكله الاساسيه ان الناس بدات تبعد عن الدين والاخلاق بطريقه واضحه وبسبب الفراغ
اللي بيعاني منه معظم الشباب و كمان بسبب البنات التافهه اللي بتدي الفرصه لنفسها انها تعمل
التفاهات دي تحت مسمي الحب او البحث عن فرصه للعثور علي الزوج المناسب من وجهه نظرهم
وربنا يهدي!!!!!!!!!!!!!
شكرا علي الموضوع الجامد ده
تسلم ايدك

mlokheia
07-07-2008, 12:38 PM
الموضوع المطروح فى غايه الاهميه يبين مدى الانحطاط اللى وصلناله مع الاسف ودى مش حاجه تشل بس دى تموت
شكرا على الموضوع الجميل ده

مصراويةجدا
12-07-2008, 02:35 AM
مقدرش اقول غير ان دول عالم فاضية

ومغندهومش اي دم ولا احساس بالمسؤلية الناس مش لاقية تاكل واخواننا في غزة محاصرون

ودول بيضيعوا فلوسهم في كلام اقل ما يقال عنه انه وقح

وشكرا ام البنات علي الموضوع الرائع


Photo Gallery