المساعد الشخصي الرقمي

مشاهدة النسخة كاملة : دليل الدكتور الفريد في امتحان الطالب البليد



م. بسمة
13-06-2003, 12:41 AM
!!دليل الدكتور الفريد في امتحان الطالب البليد !!


كيف تمتحن الطالب شفويا ؟؟!!!




يجب أن تفهم بوضوح أهداف الامتحان الشفوي من وجهة نظر الممتحن , حتى تضع استراتيجية ملائمة,


الأهداف الرئيسية هي :


· أن يبدو الممتحن أذكى من الطالب و أكثر لؤما و خبثا منه , وأقوى منه في الشخصية .


· أن يبدو الممتحن أذكى و أوسع علما من باقي الممتحنين .


· أن يثبت الممتحن للطالب أنه حمار و إن معلوماته في الهندسة زي معلومات القرموطي في الاندماج النووي , حتى لا يفكر في الاعتراض على الدرجة فيما بعد .


· أن الممتحن يخلص على الطالب بدري بدري علشان يلحق يروح على الغدا .


· منع الطالب من منافسة الممتحن في البرايفت , خصوصا لو كان طالب دكتوراه , أو في السَكَند بتاع الماجستير .


بعد فهمك الواضح للأهداف يمكنك استخدام هذه النصائح المجربة :


· ضع الطالب في حجمه الحقيقي و أفهمه جيدا هو بيكلم مين .


· كلمه بجفاف و رسمي جدا , خلي دمك خفيف وروش لما تهزر مع باقي الممتحنين علشان يعرف إنكم من طينة تانيه .


· كلم بقية الممتحنين و كأن الطالب غير موجود , خصوصا لما تتريق على إجاباته .


· حاول أن تسحق الطالب من أول سؤال ليتحقق الهدف مبكرا و ما تضيعش وقت في بقية الامتحان .


· إخبط أصعب سؤال عندك في الأول , الواد حيفرفر و ما يخدش في إيدك غلوة بعد كده , حتى لو الأسئلة الثانية سهلة .


· لو قفلت في وشك و مالقيتش غير سؤال سهل , قوله بطريقة معقدة و ملتوية علشان الطالب ما ياخدش باله إن السؤال سهل . و يضرب لخمة برضه .


· استدرجه لغلطة هايفة , صلحها له برذالة قبل ما يكتشفها , بهدله عليها , و إسأل السؤال اللي بعده بسرعة قبل ما يلحق يصلحها . و بعدين امسكها له ذلة بقية الامتحان .


· لما يقع في نقرة و ميبقاش عارف يطلع , ما تحاولش تساعده اتنهد بقرف و إسأله سؤال تاني أو اطرده بره .


· لو بدأ يتكلم بطريقة ممكن توصله للإجابة , قاطعه و قول له : ما تفكرش بصوت عالي , أنا عايز الاجابة على طول .


· اقعد انت و الممتحنين في دايرة حواليه , أو اقعدوا وراء ترابيزة طويلة علشان يفضل يلف يمين و شمال كل ما يتوجه له سؤال فتتلوح رقبته و يطلع من الامتحان عنده سيرفيكال لوردوزيس !


· حاول تقعد في الطرف , اختار وقت ما يكون باصص للممتحن البعيد وادي له سؤال قصير و سريع , ماتعيدش السؤال مهما حصل .


· البس نضارة شمس , ما تديلوش فرصة يعرف رد فعلك على إجابته لو كانت صح .


· لو كان طالب بكالوريوس قول له بعد ما يخلص : بالتوفيق يا إبني , أتمنى إني أشوفك بخير السنة الجاية


· لحماية نفسك من أي رد فعل يائس من الطالب , شوفلك اتنين فراشين شكلهم سوابق ودايما وقفهم وراك مربعين إديهم ساعة الامتحان .


· استعمل أحيانا بعض الأسئلة اللي ممكن يعرف اجابتها , من نوع :


· انت مش أخدت الحاجات دي في إعدادي ؟


· انت نجحت في ثانوية عامة إزاي ؟


· هو الجيل بتاعكم كله كده ؟


· انت أهبل ياله ؟


· متأكد إن أبوك مش تربي أو حانوتي ؟


· لو يعني بعد عمر طويل نجحناك , حتقف قدام الجهاز أو الماكنة متنح كده برضه ؟


· لو نجحناك مش حيرجعوا يقولوا انهيار مستوى الهندسة مسئوليتنا ؟


و أخيرا

إقرأ إسم الطالب جيدا في الكشف قبل ما يدخل , اسمه هو مش مهم , شوف الاسم الثاني و الثالث انت تعرفهم ولا لأ , و إوعى تتنرفز على طالب لو قال لك يا أنكل بدل ما يقول لك يا دكتور , راجع الاسم كويس و لو ماعرفتوش برضه حاول تتأكد من اسم أمه و أخواله . بلاش تحرج نفسك مع الزملاء , خد بالك إن الحاجات دي مردودة , و حا تقعدلك في عيالك و عافيتك .

.................

إسلام شمس الدين
13-06-2003, 12:47 AM
:confused:

م. بسمة
13-06-2003, 12:50 AM
;)

جنان الفردوس
13-06-2003, 02:23 AM
مش ممكن

NADEEN
13-06-2003, 08:45 AM
يا عم حرام عليك

حبكت النصايح دي ايام الامتحانات

افرض دلوقتي واحد من اساتذتنا في الكليه شافها و عمل بيها

و هما مايتوصوش

علي العموم متشكرين يا سيدي

م. بسمة
14-06-2003, 01:15 AM
أهلا جنان الفردوس
اهلا نادين وو
























أي خدمة يا ستي

NADEEN
24-06-2003, 11:37 AM
الحمد لله الامتحانات خلصت و ما حدش من الدكاتره شاف اللي انت كاتبه

NADEEN
19-03-2005, 01:18 PM
كمان مرة علشان الامتحانات ابتدت
هههههههههههه

م. بسمة
19-03-2005, 07:30 PM
السلام عليكم ورحمة الله وبركاته

أهلا بيكِ يا نادين ويا رب يغفل أعين الدكاتره عن أخطائكم العارضه.............


أختك في الله
بسمة

NADEEN
20-03-2005, 11:30 AM
مرحباً بك يا اختي بسمة

و ربنا يسمع منك

نادين


Photo Gallery