المساعد الشخصي الرقمي

مشاهدة النسخة كاملة : بصراحه مش عارفه هل ممكن حد يكون عارف اللي عايزه اعرفه!!!!!



الأنسه بكلويز
14-01-2007, 12:33 AM
ممكن لو سمحتو يعني
لو في حد يقولي
الكوارع

و النبي الله يستركوا

saladino
14-01-2007, 01:49 AM
أولا :طريقة عمل الكوارع

المقادير

كوارع عجالى او بتلو .. الكمية حسب الرغبة ( عدد2 رجل عجالى بس الارجل الامامية )

ملح وفلفل

نصف راس ثوم مدقوق

تغسل الكوارع وتتبل بالملح والفلفل والثوم المدقوق وترفع على نار هادية فى حلة حتى تخرج الماء بتاعها كله وتغلى ثم تتشربه

بعد ذلك يضاف كمية كبيرة من الماء المغلى للسلق وتترك لتستوى على نار متوسطة حتى تستوى تماما


[line]

طريقة عمل الفتة

أرز مصرى ناضج ومطبوخ

خبز مقطع الى مربعات متوسطة ( عيش ناشف فلاحى)

ملعقة كبيرة سمن

نصف فنجان خل

ثوم مدقوق حوالى ربع رأس ثوم

ملح وفلفل

يحمر الخبز فى السمن جيدا حتى يحمر

يحمر الثوم مع قليل من الكمون والفلفل فى ملعقة كبيرة سمن ثم يضاف اليه الخل ويفصل بعضها لعمل

الصلصة تغلى الشوربة وتضاف الى الخبز المحمر حتى تغطيه تماما وتضاف خلطة الخل والتوم ويترك حتى يتشرب الخبز الشوربة تماما واذا وجدت زيادة تزال برفق من الخبز

يوضع الأرز ساخنا فوق الخبز

يؤخذ بعض من خلطة الخل والتوم وتضاف اليها صلصة الطماطم و القليل من شوربة الكوارع وتترك لتغلى حتى تغلظ

توزع الصلصة فوق الارز

تصفى الكوارع من الشوربة ويعصر عليها الليمون وترص حول فى طبق الفتة على الحواف ومن فوق

بشكل جمالى وتقدم معها شوربة الكوارع معصور عليها الليمون

بالهنا والشفا

وطبعا كل شيف وله طريقة :stpd:

ميمو المصرى
14-01-2007, 05:02 AM
جوعتنى يا محمد
أنا نفسى أكل من ده
هههههههههههههههههههههههه
لما تعمليها يا بكلويز أبعتيلى رجلين ولا 3
رجول يالا خلينى أتغذى بدل ما انا خاسس كده
وتسلم أيدك مقدمــــــا

sea horse
14-01-2007, 07:38 PM
فيه طريقه تانيه للكوارع يمكن تعجبكم
طاجن الكوارع
بنجيب الكوارع مجزأه عادى و تغسل جيدا
ونحط فى الحله معلقتين سمن وفصين مستكه و بصلايه صغيره
ونشوح الكوارع 5 دقايق بالتقليب
بعد كده نحطلها 3 كوبايات ميه سخنه ونغطيها نص ساعه غليان
و ننشل الكوارع و نسيبها تبرد شويه و نشفى اللحم منها و نقطعه حتت صغيرة
نجهز الطاجن
هوه له كذا طريقه انما احلاهم اللى بالبصل
نجيب 4 بصلات و نقطعهم نص حلقات
وعليهم ملح وفلفل و بهارات ومبشور جوزة الطيب ونقلب كله مع بعضه
نحط نص البصل فى الطاجن وبعدين نرص لحم الكوارع ونغطيها بالنص التانى
وطماطمايه ترانشات رفيعه ونغطى بيها الوش
طبعا ممكن فى البايركس للمنظر والتقديم
ونصب على الطاجن من الشوربه متقلبه مع معلقة كبيره صلصة طماطم
و نصب بحيث لا يغطى المحتويات
ونغطى بورقة فويل وعالفرن الحامى نص ساعه تقريبا ونختبر السوى
المهم عند السوى نشيل الفويل و نحمر الوش ونحروق الطماطم شويه
وبالف هنا وشفا مع رز بالشعرية
مساء الفل
:eat:

الأنسه بكلويز
14-01-2007, 09:15 PM
شكرا شكرا
انقذتوني
بس غريبه قوي
الشباب همه اللي ردوا عليا
ممممممممممم
هو مفيش بنات بتعرف تعمل كوارع
صراحه انا مش بحبها يعني مش لينا في البيت
للمحروس اللي مامته داعيه عليه
ههههههههههههههههههه

شكرا شكرا شكرا

شاعر الرومانسية
15-01-2007, 01:57 AM
الانسة الفاضلة ... بكلويز
بألف هنا وشفا للمحروس ...
اللى مامته أكيد ان شاء الله دعية له:2:


وعشان خاطر انتى أهلاوية ... وجدا :beer:

حقوللك طريقة تانية للكوارع بس مع اكله تانية محببة برضة..
وهى ورق العنب


طاجن ورق عنب بالكوارع

بعد سلق الكوارع عادى ..
بطريقة عزيزنا صلادينو او شيفنا سى هورس

نجيب ورق العنب ونعمل خلطة الارز عادى بتسبيك الصلصة والبصل والبهارات وعليها الخضرة ( بقدونس وشبت وكسبرة )
ولما ميتها تنشف نحط عليها الارز ونبدأ بحشو ورق العنب ونراعى ان الوجة الخشن يكون من جوه
وقبل ما نرص الورق نكون مقطعين الكوارع شرائح من غير عظم ونرصها فى ارضية ضاجن فخارى بشكل منتظم ونرص عليها ورق العنب بشكل دائرى صفين ونكمل بشرائح الكوارع ثم صفين ورق عنب وهكذا ..
وبعد مانخلص الكمية نجيب شوربة الكوارع الناتجة عن سلقها ونحط عليها طمطماية مبشورة او معلقتين صلصة وعصير ليمونة ونسقي المحشى ونحطها فى الفرن لحد ورق العنب ما يستوى
وممكن نقلبها بعد ماتبرد فى سرفيس وتبقى شرائح الكوارع على الوش..
وممكن تطلعى من الطاجن فى طبق
والاحسن من دة ودة ...
تقدميها بالطاجن كدة والكل يمد ايده وتخلوا البساط أحمدى:2:


وان شاء الله بعد الاكلة دى ..
معاد الزواج حيتقدم :plane:


ربنا يهنيكوا ..
وبالف هنا وشفا


مع أطيب امنياتى .. وتحياتى،،،:f:

boukybouky
15-01-2007, 02:02 AM
ههههههههههههههه ملاحظة جديرة بالذكر

هو تقريباً كده بكلويز مافيش بنات بتعرف تعملها

أصلا تقريباً مافيش غير قليلين بس بيعرفوا ياكلوها كمان

يلا بالهنا و الشفا للي يحبها :eat:

كل الشكر لصلادينو و سي هورس و شاعر الرومانسية

مش عارفين من غيركم كنا هنعمل ايه و الله انقذتم الموقف

في رعاية الله ،،،

الأنسه بكلويز
15-01-2007, 07:21 AM
اه و الله يا بوكي
انقذوا الموقف فعلا
و الحمد لله اني سالت بدري عن ميعاد العزومه
ده كان شكلي حيبقي ايخي خالص

ربنا يحملنا شباب المنتدي
و ينفخ في صوره بنات المنتدي
و يتعلموا الكوارع...........
ههههههههههههههههههههههههههههه