المساعد الشخصي الرقمي

مشاهدة النسخة كاملة : ~*¤ô§[ ما تجيب بوسـة ]§ô¤*~



عـزالديـن
13-01-2007, 10:18 PM
السلام عليكم ورحمة الله وبركاته

كيف حالكم يا أبناء مصر

إن شاء الله تكونوا جميعاً بخير

من العادات الإجتماعية المتأصلة لدى جماهير الشعب المصرى تبادل قبلات الود بين الأقارب والأصدقاء والأحبة
حين اللقاء بعد طول غيبة أو فى المناسبات

ولكن لم يعد أمر تبادل القبلات الآن يقتصر على طول غيبة ولا على غيبة ولا ربع غيبة ولا يحتاج لأى مناسبات

وهذا مادعى كاتبنا الساخر الكبير والمتميز الأستاذ يوسف معاطى لكتابة المقال التالى والذى أعجبنى

ونقلته لكم لتشاركونى قرائته

-----------------

في أيام باردة مثل هذه الأيام‏..‏ كان جدي الأول جالسا في الكوخ من بتاع مليون سنة كده‏..‏ وأمامه غزالة شهية تنضج فوق النار‏..‏ وهو يتابعها بعينين نهمتين‏..‏ أما خلف جدي فكانت تجلس امرأة شهية برضه تنتظر في استسلام منابها من الوليمة‏..‏ كيف تمكن جدي من اصطياد هذه الغزالة‏..‏ وتلك المرأة بالمرة‏..‏ سأحكي لكم‏..‏

الحكاية أن هذه المرأة كانت مع رجل آخر لايقل وحشية عن جدي‏..‏ وكانت الغزالة هي مهرها ذلك قبل أن يهبط جدي كالصاعقة علي الرجل ويديله واحدة علي دماغه فيخر صريعا‏..‏ ثم يسحب الغزالة من قرونها والمرأة من شعرها ويتجه بهما إلي الكوخ‏..‏ الذي هو بالمناسبة مش بتاع جدي برضه‏..‏ نضجت الغزالة وبدأ جدي يقطع لحمها بأظافره ويلتهم في تلذذ قطع اللحم بأنانية واضحة لاشك فيها‏..‏ مما استفز المرأة كثيرا‏..‏ ولم تتمالك نفسها وراحت ضارباه علي قفاه‏!!‏ حتة قفا‏!!‏

لم ينزعج جدي أو يعترض حيث إن الضرب علي القفا في هذه الحقبة الزمنية كان شيئا عاديا اقرب إلي المناغشة منه إلي الإهانة واستمر يأكل ببرود كأن شيئا لم يحدث‏..‏ مما أثار المرأة أكثر‏..‏ وحتة قفه علي وشة‏!!‏ إتفوووه‏..‏ ولم يتحرك جدي‏..‏ فالبصقة في هذه الحقبة الزمنية كانت تعد شيئا لطيفا لايستوجب أي انفعال‏..‏ هنا قالت المرأة‏..‏ مابدهاش بأه‏..‏ وانقضت بيدها علي الغزالة وهبشت لها هبرة محترمة‏..‏ ووضعتها بين اسنانها‏..‏ هنا بأه‏..‏ ثارت ثائرة جدي‏..‏ وصوته جاب آخر الدنيا فأن تأكل معه امرأة في تلك الحقبة الزمنية كانت اهانة لاتغتفر وقفز محاولا الامساك بالمرأة التي انفلتت بمهارة من بين يديه وجرت وقطعة اللحم في فمها‏..‏ وهو يركض وراءها في عصبية‏..‏ حاجة قلة قيمة الكلاب ماتعملش كده يااخواننا‏..‏ إلي أن أمسك بها وهي تقاومه وتدفعه بعيدا‏..‏

ثم مد بوزه لكي يستخلص قطعة اللحم من فمها‏..‏ وأخذ يشدها بأسنانه‏..‏ وهي ممسكة عليها بأسنانها‏..‏ إلي أن شعر جدي بمتعة غريبة لم يكن يشعر بها قبل الآن‏..‏ وهكذا يا اعزائي‏..‏ كانت أول قبلة في التاريخ‏..‏

لا أعلم لماذا أتذكر هذه الحادثة كلما رأيت اثنين من الزعماء السياسيين يقبلان بعضهما بعضا‏..‏ واتخيل قطعة اللحم بين فميهما وهما يشدان فيها ويتصارعان عليها‏..‏ شفت كوندوليزا رايس وهي بتبوس اولمرت‏!!‏

والآن‏..‏ صارت عادة التقبيل بدون مناسبة ظاهرة عجيبة تفشت في مجتمعنا‏..‏ هل لاحظت ذلك‏!!‏ ثلاث فتيات كن جالسات أمامي في الكافتيريا‏..‏ ثم أتت الرابعة التي كانت معهن بالأمس القريب‏..‏ وما أن شاهدنها‏..‏ حتي صرخن‏..‏ ياااه‏..‏ ازيك ياماهي ويبدأ مسلسل التقبيل بحرارة مزيفة‏..‏ وكأن ماهي لسه جاية من الحجاز‏..‏ وتأتي ميرفت‏..‏ لأ‏..‏ لأ‏..‏ مش معقول‏..‏ واحشاني ياجبانة‏..‏ وتدور ميرفت عليهن ليقبلنها جميعا‏..‏ رغم أن ميرفت كانت قاعدة معاهم‏..‏ وراحت الحمام‏..‏ ورجعت‏!!‏

والشباب أيضا صاروا حينما يلتقون‏..‏ يفتحوا الأذرع وهات ياقبلات‏..‏ كل نصف ساعة‏..‏ أحضان وقبلات لانهاية لها‏..‏ إن عمرنا يضيع في تقبيل بعضنا بعضا‏..‏ وأنا شخصيا‏..‏ دعوني أعترف لكم‏..‏ لقد أحصيت عدد القبلات التي اضطررت إليها في يوم واحد‏..‏ فزادت عن الخمسمائة‏..‏ وكلها مع اصدقاء أراهم يوميا ولايوحشونني اطلاقا‏..‏ بل بالعكس‏..‏ زهقان منهم‏..‏ لماذا نقبل بعضنا عمال علي بطال يا أخواننا؟‏!‏

الحب مش مقطع بعضه لهذه الدرجة‏!!‏ وصار البعض يتفنن في اختراع قبلات جديدة‏..‏ فهذا بعد قبلتي الخد‏..‏ يخطف له قبلة من الكتف ده وقبلة من الكتف الآخر‏..‏ والبعض بعد قبلتي الخد‏..‏ يعدل رأسي ثم يقبلني من جبهتي‏..‏ وبعضهم لايقبل إلا أربع قبلات‏..‏ بما يوازي قبلتين علي كل خد وهي مسألة تلوح الرقبة فعلا‏..‏ الأغرب‏..‏ أن التقبيل لم يعد بين الأصدقاء فقط‏..‏ فهذا يأتي لي ومعه صديق أراه لأول مرة‏..‏ اسلم عليه‏..‏ فيمد بوزه هو الآخر ليقبلني‏..‏ ماذا فعلت له حتي يقبلني‏!!‏

الأسبوع اللي فات كنت لابس الطقم الأبيض ركنت سيارتي ونزلت وأتي السايس نحوي فاتحا ذراعيه فينك يابيه وحشتنا وانقض عليا وهات يابوس‏..‏ المشكلة أنها مسألة محرجة أن تصد أحدهم أو تمنعه من تقبيلك‏..‏ سيظن أنها تناكة منك أو غرورا‏..‏ وأنا لا أعرف ماذا أفعل‏!!‏ بالأمس طرق الباب عندنا في البيت‏..‏ فتحت الباب فوجدت رجلا يبتسم لي‏..‏ ويمد يده‏..‏ مددت يدي‏..‏ فأخذني في حضنه وقبلني عنوة‏..‏ بادلته القبلة بقبلة‏..‏ ثم وقفنا وكل منا ينظر نحو الآخر‏..‏ خلاص بوسنا وحضنا‏..‏ من أنت‏..‏ قال‏..‏ أنا بس جاي عشان الكشف علي عداد الغاز‏!!!!‏

:f2:‏‏

---------------------
بقلم
الأستاذ الكاتب الساخر الكبير
يوسف معاطي
الأهرام (http://www.ahram.org.eg/Index.asp?CurFN=cari1.htm&DID=9095)

runaway_heart
13-01-2007, 11:10 PM
انا مبسوطه اني اول واحده
ترد على موضوعك الجميل يا عز الدين
و اني برضو اول واحده تشكرك عليه
يوسف معاطي طول عمره دمو زي العسل
انا بحب كتبه و مقالاته جدا جدا
و بالتأكيد موش لوحدي

ابن البلد
14-01-2007, 12:15 AM
يكشف علي عداد الغاز ههههههههههههههههههههههه

لا دي واسعة شوية من يوسف

بس أنا بحب كتاباته جدا
وظاهرة التقبيل أعتقد انها ليست سيئة لهذه الدرجة

كل الشكر لك علي النقل عز الدين
:f:

رحمة
14-01-2007, 02:25 AM
أعلم لماذا أتذكر هذه الحادثة كلما رأيت اثنين من الزعماء السياسيين يقبلان بعضهما بعضا‏..‏ واتخيل قطعة اللحم بين فميهما وهما يشدان فيها ويتصارعان عليها‏..‏ شفت كوندوليزا رايس وهي بتبوس اولمرت‏!!‏


فعلا ظاهرة التقبيل بين الفتيات أو بين الشباب هى عادة سيئة و قد نهى الإسلام عنها

عن أنس بن مالك رضى الله عنه (( قال رجل : يا رسول الله ، الرجل منا يلقى أخاه ، أو صديقه أينحني له ؟ قال : لا ، قال : فيليتزمه ويقبله ؟ قال : لا ، قال : فيأخذ بيده ويصافحه ؟ قال : نعم )) رواه الترمذى

أدخل الله البسمة الى قلبك يا عز الدين :f2:

الدكتورة نسيبة
14-01-2007, 02:30 AM
هههههههههههههههههه

حلو جدااااااا المقال ده يا استاذ عز

انا كمان بتضايق جداااااااااا من الظاهرة دى خاصة ان ممكن الواحد مش يتباس كده بوستين وخلاص لا انا ساعات كان فيه صحاباتى بيوسنى اربع بوسات لما بتعبت من كتر ما بلف دماغى من خد لخد

تسلم ايدك يا استاذ عز على المقال الحلو اللى قلب عليا المواجع

ميمو المصرى
14-01-2007, 06:18 AM
هههههههههههههههههه
عداد الغاز
لا حول الله يارب
والله انا كمان تعبت من البووووووس وربنا
كل واحد اقابله يقعد يبوس ولا انا عشان حلو يعنى ؟!! هههههههههههه
وكمان فريضه فى البوس انه يكون أربع قبلالالالالات
طيب والله انا لما بسلم على حد بشوفه باستمرار وزهقان منه بسلم وانا بعيد
علشان ميخطفنيش فى حضنه بس بأمانه انا لو شوفت واحد صاحبى حتى وحسيت انه واحشنى ببوووسه بس بوسه واحده انا مش طماع والله ههههههههه

موضوع جميل جدا والكاتب جميل جدا
والناقل الغالى أستاذ عز جميل جدا
تسلم أيدك

florensa
14-01-2007, 04:19 PM
السلام عليكم ورحمة الله وبركاتة
هههههههههههههههههههههههه
جميل اوى الموضوع
فعلا رائع
عندة حق
شكرا على نقلة لنا

fencer
15-01-2007, 07:44 PM
شكرا يا عز على نقل الموضوع
انا عجبتني حكاية اكتشاف اول قبلة
و على فكرة عادة التقبيل في كل سلام دي مش لطيفة
تحياتي على الموضوع الطيب

عـزالديـن
16-01-2007, 05:35 AM
انا مبسوطه اني اول واحده
ترد على موضوعك الجميل يا عز الدين
و اني برضو اول واحده تشكرك عليه
يوسف معاطي طول عمره دمو زي العسل
انا بحب كتبه و مقالاته جدا جدا
و بالتأكيد موش لوحدي
الأجمل هو تواجدك بالموضوع يا runaway_heart وشرف لنا يافندم إنك تفتتحيه
بالتأكيد أسلوب الاستاذ يوسف معاطى لايجعل أى أحد يتردد فى قراءة مايكتبه
:f2:

عـزالديـن
16-01-2007, 06:06 AM
يكشف علي عداد الغاز ههههههههههههههههههههههه

لا دي واسعة شوية من يوسف

بس أنا بحب كتاباته جدا
وظاهرة التقبيل أعتقد انها ليست سيئة لهذه الدرجة

كل الشكر لك علي النقل عز الدين
:f:
مش واسعة قوى يا ابويوسف :f:

بتحصل فى أحسن العائلات :d

ظاهرة التقبيل ممكن تكون عنوان للود والمحبة لما تكون فى محلها ولكنها أسرع طريقة لنقل العدوى بالبرد والانفلونزا :1:

شـكرا لتواجدك العطر بالموضوع
:f2:

عـزالديـن
16-01-2007, 06:11 AM
فعلا ظاهرة التقبيل بين الفتيات أو بين الشباب هى عادة سيئة و قد نهى الإسلام عنها

عن أنس بن مالك رضى الله عنه (( قال رجل : يا رسول الله ، الرجل منا يلقى أخاه ، أو صديقه أينحني له ؟ قال : لا ، قال : فيليتزمه ويقبله ؟ قال : لا ، قال : فيأخذ بيده ويصافحه ؟ قال : نعم )) رواه الترمذى

أدخل الله البسمة الى قلبك يا عز الدين :f2:
بارك الله فيكى أختى العزيزة رحمه وجزاكى عنا كل خير :f:

أشـكرك على إضافتك الطيبة وتواجدك العطر

:f2:

عـزالديـن
16-01-2007, 06:19 AM
هههههههههههههههههه

حلو جدااااااا المقال ده يا استاذ عز

انا كمان بتضايق جداااااااااا من الظاهرة دى خاصة ان ممكن الواحد مش يتباس كده بوستين وخلاص لا انا ساعات كان فيه صحاباتى بيوسنى اربع بوسات لما بتعبت من كتر ما بلف دماغى من خد لخد

تسلم ايدك يا استاذ عز على المقال الحلو اللى قلب عليا المواجع
سلمك الله من كل مكروه يا دكتورة نسيبة :f:

قديما فى السبعينات كان المرتب الرسمى للقاء من القبلات هو قبلتين لكل فرد أم الآن فالمرتب الرسمى هو أربع قبلات قابلة للزيادة
وإن دل هذا على شئ فإنما يدل على الرخاء الذى حل بالمواطن المصرى مما جعلها أصبح أكثر كرماً

أشـكرك على الزيارة والتعليق
:f2:

عـزالديـن
16-01-2007, 06:32 PM
هههههههههههههههههه
عداد الغاز
لا حول الله يارب
والله انا كمان تعبت من البووووووس وربنا
كل واحد اقابله يقعد يبوس ولا انا عشان حلو يعنى ؟!! هههههههههههه
وكمان فريضه فى البوس انه يكون أربع قبلالالالالات
طيب والله انا لما بسلم على حد بشوفه باستمرار وزهقان منه بسلم وانا بعيد
علشان ميخطفنيش فى حضنه بس بأمانه انا لو شوفت واحد صاحبى حتى وحسيت انه واحشنى ببوووسه بس بوسه واحده انا مش طماع والله ههههههههه

موضوع جميل جدا والكاتب جميل جدا
والناقل الغالى أستاذ عز جميل جدا
تسلم أيدك
أهلاً بك ياميمو
كل الي بنطمع فيه إن الأمور تهدأ وتستقر عند هذا الحد وألا تطور أكثر من هذا لأن فيه إتجاه لزيادة مرتب المقابلة الواحدة إلى 6 قبلات للفرد الواحد :1:
أشـكرك على تواصلك الجميل :f:
:f2:

عـزالديـن
16-01-2007, 06:43 PM
السلام عليكم ورحمة الله وبركاتة
هههههههههههههههههههههههه
جميل اوى الموضوع
فعلا رائع
عندة حق
شكرا على نقلة لنا
شكرا لمرورك بالموضوع يا florensa :f:
:f2:

عـزالديـن
16-01-2007, 07:15 PM
شكرا يا عز على نقل الموضوع
انا عجبتني حكاية اكتشاف اول قبلة
و على فكرة عادة التقبيل في كل سلام دي مش لطيفة
تحياتي على الموضوع الطيب
بالنسبة للنشأة التاريخية للقبلة هناك عدة روايات ومنها أنهمكانوا قديماً يلعقون الجبين بلسانهم فى حال ندرة الملح للاستفادة ملح العرق الذى يترسب عليه ثم إمتد الى باقى أجزاء الوجه ثم تطور الأمر إلى ماهو أبعد من تذوق الملح .
وبالتأكيد عندما يتجاوز أمر القبلات حدود المعقول تكون عادة سيئة
شـكراً لمرورك الطيب يا حسـام :f:

:f2:

عبده الدرملى
16-01-2007, 09:41 PM
هههههههههههه
ايه الجمال ده
هى ديه المواضيع ولا بلاش
الموضوع جميل اوى يا عز باشا
هات بوسه بقى
هههههههههههههههه

عـزالديـن
17-01-2007, 02:33 AM
هههههههههههه
ايه الجمال ده
هى ديه المواضيع ولا بلاش
الموضوع جميل اوى يا عز باشا
هات بوسه بقى
هههههههههههههههه
حقك يادرملى باشا ولازم تطالب بيه :f:
ليست بوسة واحدة ولا بوستين ولا ثلاثة ، لازم تاخد واجبك بالكامل وحقك القانونى ياباشا
أربع قبلات على سبيل التعارف *113* :d
نورت الموضوع *105*
:f2:

Maruko
17-01-2007, 02:28 PM
ههههههههه
اه والله العادة دي انتشرت بطريقة بشعة
يالا ربنا يزيد ويبارك

عـزالديـن
18-01-2007, 06:45 AM
ههههههههه
اه والله العادة دي انتشرت بطريقة بشعة
يالا ربنا يزيد ويبارك
ربنا يزيد فى الخير ويبارك فيما رزق

شـكرا لمرورك أخى الكريم shery_m :f:

:f2:

ايهاب احمد75
18-01-2007, 05:54 PM
بجد استاذ عز االدين انا بفرح جدا لما الاقيلك موضوع جديد موضوعات كلها تفوح منها اهازيج السعاده وتخفف من الامور المعتادهفى الحياه
شكر لك

عـزالديـن
19-01-2007, 05:10 AM
بجد استاذ عز االدين انا بفرح جدا لما الاقيلك موضوع جديد موضوعات كلها تفوح منها اهازيج السعاده وتخفف من الامور المعتاده فى الحياه
شكر لك
وأنا أيضاً أكون سعيد عندما أرى إسمك فى واضيعى أخى الكريم إيهاب :f:
بارك الله فيك على كلماتك الطيبة وتواجدك العطر
تقبل وافر التحية والتقدير *105*
:f2:

osha
19-01-2007, 05:35 AM
ايه الموضوعات الحلوة دي
شوف
انا بصراحة من كام سنة فوجئت اني لما باقابل صديقاتي الاقيها تقولي 3 بوسات عشان السنة بتقول الرقم فردي!!
اسكت عشان ماتقولش عليا جاهلة
الاقي مجموعة تانية تقولي لا السنة بتقول 4 بوسات
اقول في بالي ياعالم سيبوا السنة في حالها وماحبكش تحشروها في البوس فيه حاجات تانية اهم ممكن اننا نلجأ للسنة فيها عشان تنور لنا طريقنا
المهم جيت امريكا هنا لقيتهم بيبوسوا بوسة واحدة على الخد الشمال قلت كويس ان الستات هنا قررت ان الرقم فردي تمسكا بالسنة اللي مايعرفوش عنها حاجة
لقيت واحدة بتسألني - طلعوا رخرين مهتمين - بتقولي انتم في مصر بتسلموا على بعض ازاي؟
مابقتش عارفة اقولها انهي طريقة بالضبط
مقالة حلوة اوي ويوسف معاطي اصلا واضح انه مفروس وكتاباته بتطلع معبرة عن احواله

عـزالديـن
23-05-2007, 01:43 AM
ايه الموضوعات الحلوة دي
شوف
انا بصراحة من كام سنة فوجئت اني لما باقابل صديقاتي الاقيها تقولي 3 بوسات عشان السنة بتقول الرقم فردي!!
اسكت عشان ماتقولش عليا جاهلة
الاقي مجموعة تانية تقولي لا السنة بتقول 4 بوسات
اقول في بالي ياعالم سيبوا السنة في حالها وماحبكش تحشروها في البوس فيه حاجات تانية اهم ممكن اننا نلجأ للسنة فيها عشان تنور لنا طريقنا
المهم جيت امريكا هنا لقيتهم بيبوسوا بوسة واحدة على الخد الشمال قلت كويس ان الستات هنا قررت ان الرقم فردي تمسكا بالسنة اللي مايعرفوش عنها حاجة
لقيت واحدة بتسألني - طلعوا رخرين مهتمين - بتقولي انتم في مصر بتسلموا على بعض ازاي؟
مابقتش عارفة اقولها انهي طريقة بالضبط
مقالة حلوة اوي ويوسف معاطي اصلا واضح انه مفروس وكتاباته بتطلع معبرة عن احواله
طبعاً الحلاوة جاية من عند الأستاذ الفاضل يوسف معاطى الذى يمتعنا دائماً بكتاباته الناقدة الساخرة الهادفة

بالتأكيد لكل مجتمع طريقته فى حفاوة الإستقبال واللقاء وتختلف عدد قبلات التحية والود من مجتمع لآخر وبعضها يضعها على الكتف وبعضها على الجبين والبعض لايفضلها

أعتقد أن عادة التقبيل من عوامل نقل عدوى البرد والانفلونزا :d

أشـكرك أختنا الفاضلة أم محمـد على المرور الطيب

:f2:

nono_16
23-05-2007, 11:30 AM
موضوع جميل جدا
والقصة هى الى ظريفة اوى
وشكرا ع هذا الموضوع

بنت بلاد
23-05-2007, 11:54 AM
هههههه والله حاجة حلوة ومعاطى هذا شكل دمه خفيف ,بعدين انا كمان البوس هذا مشكله خصوصا الستات ياربى خصوصا فى فرح اسلم كل وحده اربع بوسات وفى اللى تحضن يعنى يضيع العشاء والفرح ولا اشوف حد لانى قاعده ببوس واسلم والله المستعان

عـزالديـن
24-05-2007, 04:53 AM
موضوع جميل جدا
والقصة هى الى ظريفة اوى
وشكرا ع هذا الموضوع
الأجمل هو مرورك بالموضوع أختنا الكريمة nono_16
:f2:

عـزالديـن
24-05-2007, 05:05 AM
هههههه والله حاجة حلوة ومعاطى هذا شكل دمه خفيف ,بعدين انا كمان البوس هذا مشكله خصوصا الستات ياربى خصوصا فى فرح اسلم كل وحده اربع بوسات وفى اللى تحضن يعنى يضيع العشاء والفرح ولا اشوف حد لانى قاعده ببوس واسلم والله المستعان
حفلات الأفراح فى حالتنا هذه تكون مشكلة كبيرة يا بنت بلاد :f:
شـكراً لمرورك الطيب
:f2:

amak_77
24-05-2007, 09:38 AM
موضوع طريف جدا و انا بموت في يوسف معاطي اساسا
بس انا بدايق اوي من الي بيوصفوا اجدادنا بالوحشية و الحيوانية
امال سيدنا ادم كان عامل ازاي بقى
كانو بني ادمين والله و متحضرين جدا و عندهم نظام
كان سيدنا ادم اول حاكم في الارض
و اهله هم اول محكومين و عيله مالك في نفس الوقت

و موضوع التقبيل ده صراحة بيدايقني جدا
بس اكيد مش كل التقبيل مرفوض يعني
يعني تقبل الي واحشك بس او تحس انه بيشعر بالود من الموضوع ده
بس انا عن نفسي بدايق
و بحس ان وشي لزق فيه حاجات تدايق
عشان في ناس بتبوسك بوسه تقيلة اوي بالصوت و كمان بيبقى ليها اثار في وشك

يعني لازم تستخدم منديل

ده انا افتكر ان كان في مقال عن ياسر عرفات الله يرحمه
المقال كان بيقول عن كيفية تجنب بوسه ياسر عرفات و ازاي كل سياسي بيحاول يبعد عنها
عشان كمان في امريكا بوسه الرجل لرجل و السيدة للسيدة تتفهم غلط
يا راجل ده كان بيبوس مادلبين اولبرايت فاتنة امريكا و نجمة الاغراء
(كانت نفسه حلوة اوي )

شكرا ليك

عـزالديـن
24-05-2007, 01:20 PM
بس انا عن نفسي بدايق
و بحس ان وشي لزق فيه حاجات تدايق
عشان في ناس بتبوسك بوسه تقيلة اوي بالصوت و كمان بيبقى ليها اثار في وشك

يعني لازم تستخدم منديل
طبعاً لازم تستخدم منديل لإزالة أثار العدوان والبصمات :d



ده انا افتكر ان كان في مقال عن ياسر عرفات الله يرحمه
المقال كان بيقول عن كيفية تجنب بوسه ياسر عرفات و ازاي كل سياسي بيحاول يبعد عنها
عشان كمان في امريكا بوسه الرجل لرجل و السيدة للسيدة تتفهم غلط
يا راجل ده كان بيبوس مادلبين اولبرايت فاتنة امريكا و نجمة الاغراء
(كانت نفسه حلوة اوي )

شكرا ليك
الله يرحمة ملحقش كوندا :d

أشـكرك يا amak_77 على مرورك الجميل وتعليقك الطيب :f:

:f2:

camella
27-05-2007, 02:08 AM
موضوع فعلآلآلآ جميل

شكرآ لك على النقل

ولو جات على ان الشباب يبوسو بعض, والبنات يبوسو بعض دي سهلة

انما دلوقتي تشوف الولد بيسلم على صديقه هاي ويبوسها وعادي ( زي اخوها ) بوسة اخوية تلاقيها ما باست اخوها من يوم ما اتولد بس موضة بعيد عنك علشان يبان انهم فري وبتاع وشاي بنعناع

تسلم ايدك مرة تانية

اييييييييييييييية دنياااااااااااااااااااااااااااااااااا

عـزالديـن
27-05-2007, 02:57 AM
موضوع فعلآلآلآ جميل

شكرآ لك على النقل

ولو جات على ان الشباب يبوسو بعض, والبنات يبوسو بعض دي سهلة

انما دلوقتي تشوف الولد بيسلم على صديقه هاي ويبوسها وعادي ( زي اخوها ) بوسة اخوية تلاقيها ما باست اخوها من يوم ما اتولد بس موضة بعيد عنك علشان يبان انهم فري وبتاع وشاي بنعناع

تسلم ايدك مرة تانية

اييييييييييييييية دنياااااااااااااااااااااااااااااااااا
شـكراً لمرورك الطيب وتعليقك أختنا الكريمة camella

يمكن تقبيل الشباب للفتيات والعكس فى المناسبات المختلفة لسة منتشرش بشكل ملحوظ ولو أنهم يستخدمون طرق بديلة .

نسأل الله ان يهئ لنا من أمرنا رشدا

تقبلى تحيتى وتقديرى

:f2:


Photo Gallery