المساعد الشخصي الرقمي

مشاهدة النسخة كاملة : مذكرات عسكرى شطرنج (1)



سجين زيندا
04-01-2007, 04:04 PM
مذكرات عسكرى شطرنج

الخميس 4 يناير 2007

بالليل ..عالقهوه...أغنيه Just walk away بتاعت Celine Dion شغاله (ده ايه القهوه الألفرانجه دى!! )

ينبعث صوت سيلين ديون من المذياع صارخه
Just walk away
To say good bye
Don’t turn around now
U may see me cry!!!!

البت سيلين ديون دى جامده أوى .كل أغانيها بتعجبنى. من ساعة ماسمعت أغنيتها بتاعت فيلم تيتانيك لما الموزه نامت عالخشبه فى اخر الفيلم وسابت الزبون يغرق وانا بموت فيها .... أكيد الطبيه البيضه حبيبتى بتسمع الاغنيه دلوقتى ... يا رب بقى قدرنى واقرب منها المره دى ...نفسى اشم ريحة البرفيوم اللى بتحطه ..نفسى اقرب منها..اقولها بحبك ..اقولها أى حاجه ..ان شالله حتى تاكلنى مش مشكله بس أعمل معاها أى حوار...الحظ بس هو اللى خلانى اسود وهى بيضه ... هو اللى خلانى عسكرى وهى طبيه ....هو اللى خلانى بقف ادافع عن طبيه ورايا وهى بيقف قدامها عسكرى يدافع عنها

وبدأ اللاعبان فى رص قطع الشطرنج
يادى النيله على الحظ...اتحطيت بعيد عنها خالص...انا شمال وهى كمان شمال ....مش مهم ....ان شاء الله المره دى اترقى ابقى وزير ... وى دى الطريقه الوحيده اللى تضمن لى انها تيجى باشاره منى ...اشارة ايه...دامسيج عالبلو توث كفايه ...يا رب بس يكون معاها العده ال 6630 بتاعت اخر مره ..مش طالبه بقى تكون غيرت موبيلها ...الحصان الاسود قاللى انها ناويه تغير وتجيب إنايه (N70) وانا معرفش ايه نظام البلوتوث فيه ...

فى تلك الاثناء كانت المباراه فى مرحلة جس النبض
الحمد لله انى واقف فى حته متداريه ...يعنى مش هاتحرك قبل ربع ساعه مثلا ... هايفضلوا يهروا شويه ويضحوا ويعملوا الحركات القرعه دى لحد مايفضوا الملعب شويه ...
اللى نفسه افهمه هى متتنكه أوى كده ليه ...ماهو أى بنت تلبس بنطلون جينز وبودى على شوية ميكب أب والينسيز هاتبقى ياما هنا ياما هناك .... أصلها مش شغلانه يعنى ...وبعدين هى فاكره نفسها ايه ..دى اخرها يتقعد بيها فى عربيه .... زيها زى أى واحده
انا عمرى مابصيت على بنت فى الشارع لسبب بسيط جداً...مش سبب دينى ولا حاجه انما بالعقل كده ...أصلى هستفاد ايه يعنى لما أبص
البصه مش هاتشبعنى .... وهاتحسرنى لان الموزه اللى ببص عليها مش معايا .,..انما محدش فاهم كده ....وبعدين ده صنف عايز الحرق ...ماتديلوش أهميه هاتلاقيه جاى زى الكلب لحد عندك....بس الطبيه دى بالذات منخششه فى دماغى أوى

بدأت مرحلة المناورات فى مباراة الشطرنج
الحصان بدأ يقرب منها .... انا عارف حركاته ابن الحماره ده ....نفس اسلوب احمد رمزى وحسن يوسف ...خفة دم وكم نكته وبتاع ... بس اهو احسن من اسلوب عمر الشريف ومحمود ياسين بتاع الهيمنه وانا هموت الجمعه الجايه والحركات بتاعت حبيبى دائما دى...

واخيرا تحرك بطلنا حركه مزدوجه...
(الله ينور ...بدأنا اللعب اهو ... اكيد زمانها شايفاتى دلوقتى .... هوبا هوبا هوبا .... )

ولكن الحركه الفجائيه للعسكرى جعلته محاصر بين المطرقه والسندان (عفوا .....فيل ووزير الخصم )
يا ابن الهرمه ....الراجل عملنى طعم عشان التانى ينشغل فيا وهو يهجم ....ربنا يستر بقى ...هو انا ماليش لازمه خالص كده ...دايما عاملنًى طعم أو بيضحوا بيا ..زى بالظبط العساكر المصريين اللى بيروحوا يقفوا عالحدود مع اسرائيل ...حاجه كده ملهاش لازمه ......ماشى يا دنيا ..بكره هابقى وزير ومحدش هايقدر يبهدلنى بالساهل أوى كده

فى تلك اللحظات كانت المعركه على أشدها فى الجانب الاخر من رقعة الشطرنج وهو ماساعد بطلنا على التقاط انفاسه
أهو ربنا ستر اهو ..الخطر قل عليا ...كويس كده والله ....بس الخطر زاد أوى على حبيبتى هناك ....الوزير الاسود هاياكلها ...يالا وانا مالى ....يموت حبيبى ولا استهواش يا عم

وأتيت الرياح بما تشتهى سفن بطلنا تماما ...
ياااااااااه..كده زى الفل ..الوزير بتاعنا مات وهى عاشت وانا اقرب واحد ممكن اترقى ..فاضل لى لعبتين بس ....وهى الوزير بتاعها مات بردو ....الوزيرين طاروا مع بعض ....جايلك يا بطه ....
اروح بسرعه احط جيل وبرفيوم هوجو من ازازة اخويا واخد الكوتش الاديداس بتاعه ....

واقترب العسكرى أكثر فأكثر ..
خلاص هاترقى..خلاص هاترقى ......صبرت ونلت ...صبرت ونلت ....زمانها بتبص عليا دلوقتى ....زمانها شايفانى....هابقى الوزير الوحيد فى أم الدور ده ...ومتخافيش يا روح قلبى ..مش هاكلك ..هاكش الملك وانتى موجوده وبعديها نطلع عالعجمى ...بيقولوا شاده أوى اليومين دول .... دى هاتبقى ليلة العمر ....دانا هاعمل عمايل واسوى الهوا........

وفجأه

(بعد إذنكوا يا حضرات ....عايزين نشطب ....كفايه كده )
(طيب نخلص الدور)
(لا معلش عشان الدوريه بتعدى وممكن يسحبوا مننا رخصه القهوه كده )
(خلاص يا سيدى....احنا كلنا فداك وفدا رخصة القهوه...فركش أم الدور يا عم)

العسكرى : لااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا ااااااااااااااا

_snoo000oopy_
04-01-2007, 06:30 PM
ههههههههههههههههههههه

قصه جميله اوى يا *سجين زندا*

سجين زيندا
28-01-2007, 03:56 PM
ههههههههههههههههههههه

قصه جميله اوى يا *سجين زندا*



ميرسىىىىىىىىىىىى








when i finished making my boat
the sea dried


Photo Gallery