المساعد الشخصي الرقمي

مشاهدة النسخة كاملة : موقف لن انساه



thereallove
11-11-2006, 09:48 PM
النهاردة هحكي لكم

النهاردة هحكي لكم عن يوم من ايامى اللى ما تتنسيش ابدا ..

طباخ مع مرتبة القرف .. قصدى الشرف*


- واد يا ...... انت يا زفت الطين*
- نعم يا ماما خير في اية*
- تعالى هنا واسمعنى كويس ... احنا رايحين اسكندرية بكرة*
- اشطة هنصيف ...اروح احضر هدومى (كنت طبعا مبسووط وطاير من الفرح )
- نصيف اية يا متخلف واحنا فى عز الشتا .يجوا اللى عايزين يخلفوا يشوفوا الخلف الاغبر*
- اة صحيح احنا فى الشتا ( قلتها بخيبة امل واحباط) امال احنا رايحين لية*
- احنا ؟؟ انت بتجمع نفسك لية ؟؟ احنا اللى رايحين بس انت هتتنيل هنا تشوف مذاكرتك انت مش وراك امتحان الترم فى الكلية ؟؟
- اه ورايا بس برضة عايز اجى اغير هوا واروح ا.....
- قلت لا هتفضل هنا تذاكر عشان تنجح وابقى قابلنى لو فلحت ...
- طب بس بلاش التقطيم دة وقوليلى رايحين تعملوا اية*
- ماسورة المية ضربت فى الشقة بتاعة اسكندرية .. والدنيا عايمة وحاجات تانية كتير عموما مش هنتأخر .. انا وابوك واخواتك هنقعد 3 ايام وراجعين
-طب وانا اعمل اية واتصرف ازاى بس ..؟؟؟؟؟
- انا سيبالك فلوس عشان تبقى تاكل فى اي مطعم ياغلباوى عشان انا محضرتش ليك اكل هنا
- طيب .....(شكلى محبط وحزين)
-مش هاوصيك يا مصيبة ... تقعد تذاكر ومش عايزة اختراعتك اللى بتودى فى داهية*
-خــ..خلاص يا ستى روح واطمنى انتى .. سايبة فى البيت راجل*
- راجل ... ماهو دة اللى مخوفنى ...

طبعا دة كان الحمار .. قصدى الحوار اللى دار بينى وبين ماما وطبعا حذفت منه اسمى للتموية .. المهم هما مشوا من هنا وانا انطلقت بقى واحب عيشة الحرية و3 ايام اهيص فيهم براحتى ولوحدى فى البيت ..المهم اول يوم كنت بعيد عنكم بذاكر وعصافير بطنى صوصوت طبعا انتوا عارفنى كويس وعشان كدة اللى فى بطنى استحالة تكون عصافير .. دى وحووش .. المهم سبت المذاكرة وقمت عشان انزل اي مطعم واتغدى ... وفجاءة ... مخى اشتغل و حاسة الجنان طلعت فجاءة وقلت فى عقلى بالى .. وانا اروح مطعم لية انا صغير ولا صغير لما اطبخ بنفسى . ومفيش حد هنا هيقولى بتعمل اية ولا داخل المطبخ لية .براحتى بقى . تحب تاكل اية يا .... تحب تاكل اية .... ايوة مكرونة بالصلصة البيضاء (البشاميل) وفعلا الاكلة دى بحبها موووووووت موووووووت وهى مكرونة باللحمة المفرومة وعليها البشاميل وبتتحط فى الفرن . طبعا دى كل المعلومات اللى اعرفها عنها .. طب اعمل اية ؟؟
وانا معرفش دى بتتطبخ ازاى ؟؟ طب مش ابدأ بحاجة سهلة ؟؟ لااااااااااا لازم اعمل فيها شيف مطبخ*
المهم رحت جرى على البلكونة وناديت على البت سارة بنت الجيران ودى زميلتى فى الكلية وجارتى .بس*
مش لازم اكون نمطى واحب بنت الجيران مش فيلم احمد ومنى هنا المهم ناديت عليها*

- سارة يا سااااااااااااااارااااااااة*
- اية فية اية جرا اية ... عامل هوسة لية عالصبح ومفرج عليا الشارع*
- معلش يا ستى .. المهم هى المكرونة بالبشاميل بتتطبخ ازاى ؟؟!
- نعم يا خويا ... يا فتاح يا عليم يا رزاق يا كريم .. اصطبحنا وصبح الملك لله ..لية ؟
- انتى هتزلينى .. عايز اعرف وخلاص*
- طيب ما تزقش .. شوف يا سيدى تجيب المكرونة وبعد كدة ..... و.....

طبعا قالتلى على الطريقة كلها وبعد كدة نزلت على الكلية وطبعا انا طنشت المحاضرات فى اليوم دة فداء للمكرونة*
نزلت طبعا واشتريت بكل الفلوس اللى ماما سابتهالى عشان اكل الــ3 ايام وعملت حسابى انى هاكل مكرونة 3 ايام .. المهم بدأت اجهز كل حاجة لغاية ما حصلت الكارثة*
والكارثة دى بكل بساطة انها لما شرحتلى مرت مرور الكرام على البشاميل .. وما قالتش دى تتعمل ازاى*
بأعتبار انى ممكن اكون عارفها وانا من لبختى نسيت اسألها وطبعا الست هانم راحت الكلية .. طب اعمل اية ؟؟ مستحيل اخبط على حد تانى من الجيران بعدين شكلى يبقى وحش دة غير انهم ممكن يقولوا لماما انى كنت بعمل مكرونة وهيكون مالايحمد عقباة ووجع دمااااغ كتير ... المهم حصلت المعجزة*
ومخى العبقرى بدأ يشتغل صح .. ويستنتج ويظبط المسائل ..وسألت نفسى ببساطة كدة البشاميل دى شكل اية او مصنوعة زى اية .. وعلى طول عقلى رد عليا .. البشاميل دى بالظبط زيها زى الكاستر او الكريمة اللى بتتحشى بيها الحلويات وخصوصا الكنافة بس الفرق ان دى حلوة ودى مملحة .. ووصلت للاستنتاج العبقرى الرهيب .. ان البشاميل والكاستر وجهان لعملة واحدة الفرق فقط نحط سكر يبقى كاستر ويبقى للحلويات او نحط ملح ويبقى للمكرونة .. وعلى الفور .. جريت على السوبر ماركت وجبت 3 باكو كاستر وقريت من على العلبة بيستعمل ازاى بس ملقيتش علية سيرة النوع المملح ..المهم حضرتة وعملت المكرونة وحطيتها فى الفرن فى انتظار انها تستوى ..طبعا فات الوقت وجيت اطلعها من الفرن ..
كان شكلها اية ... حاجة مفيش بعدة كدة لكن ... لكن . لكن .. ريحيتها غريبة اوى*
مش زى اللى ماما بتعملها* .. دى ريحيتها شبة الفانيليا شوية .. ربنا يستر .. طلعت الاطباق*
وقطعت وبدأت استعد عشان اكل المكرونة .. وانا طبعا حاسس انى فتحت عكا .
وبسم الله الرحمن الرحيم واكلت ... اية ؟؟ بتضحكوا لية ؟؟ عادى عادى ياما الواحد خد مقالب فى حياتة .. ما جتش على دى يعنى . ولكم ان تتصورا طعم المكرونة بالكاستر
طبعا كنت مضطر انى اكلها كلها غصب عنى رغم طعمها اللى مالوش ملامح اللى زى طعم صينية الكنافة بالمخلل والتوم .. وكنت مضطر ل 3 اسباب*
اولا انا صرفت كل الفلوس اللى معايا على المكرونة ولازم اكلها ال 3 ايام والا هموت من الجوع*
ثانيا اللى حصل دة فى عرف ماما يعتبر جريمة ولازم اكل جسم الجريمة كلها عشان اخفيها*:@ :@ :@
ثالثا انا اول مرة اطبخ ولازم افخر بطبيخى واكلة وانا مبسوط وسعيد عشان انا اللى عاملها بأيدى*
وهكذا اضطريت اكل المكرونة الحلوة .. الحلوة اوىىىىىىىىىىىىى لمدة ال 3 ايام*
وانا مبسوط وسعيييددددددد ....لحد ما جم من اسكندرية*

نوسة
12-11-2006, 08:33 AM
هههههههههههههههههههههههههههههههههه

بجد تجنن يعنى اول مايشطح ينطح يعنى مكرونة بشاميل مرة واحدة ههههههههههههه

عموما هى طبعا سهلة جدا با النسبة لاى ست لانها بتعتمد على الباشميل نفسة

بس ولا يهمك ممكن نخليها با الكاستر ههههههههههههههههه

وبالف هنا مكرونتك يا جميل هههههههههههههههه


بجد يوميات جميلة شكرا ليك و منتظرين اكثر


خالص تحياتى

mr_virus
12-11-2006, 08:43 AM
وعرفت تغسل الموعين ولا نديت لساره علشان تعلمك






حلوة موووووووووت يا باشا

حنين المصرية
12-11-2006, 03:05 PM
صباحكوا اشطة على مربة .. يعنى صباح معسل ملحوس بالجمال والدلع .. اما لو كنتوا باليل يبقى مساؤا عسل وليليتنا انس ومنجهه والسهرة للصبح والذى منة وسمعنى .. احلى سلام وانا بكرة اسرائيل ..

ايه ده !!

حاسس بمصيبه جايالي يا لطيف يا لطيف

شامة ريحة مكرونة وواضح انها حاجة تانية خالص

ايه ده يا عم احمد ينفع كده !!

كنت قولي وانا اعملك طبق مكرونة















بالكاستر بردة


أصل انا كمان مش بعرف اعملها

والنبي يا جماعة اللي عارف يعملها يقولنا

هههههههههه
سلام بقى دلوقت عشان ورايا محاضرة فى جامعة بتنجانيا .. فى خانكةسيتى

سلااااااااااااااااااام

حنين المصرية
12-11-2006, 03:19 PM
صباحكوا اشطة على مربة .. يعنى صباح معسل ملحوس بالجمال والدلع .. اما لو كنتوا باليل يبقى مساؤا عسل وليليتنا انس ومنجهه والسهرة للصبح والذى منة وسمعنى .. احلى سلام وانا بكرة اسرائيل ..

ايه ده !!

حاسس بمصيبه جايالي يا لطيف يا لطيف

شامة ريحة مكرونة وواضح انها حاجة تانية خالص

ايه ده يا عم احمد ينفع كده !!

كنت قولي وانا اعملك طبق مكرونة















بالكاستر بردة


أصل انا كمان مش بعرف اعملها

والنبي يا جماعة اللي عارف يعملها يقولنا

هههههههههه
سلام بقى دلوقت عشان ورايا محاضرة فى جامعة بتنجانيا .. فى خانكةسيتى

سلااااااااااااااااااام

thereallove
12-11-2006, 03:43 PM
ايه ده الردود اللي زي المكرونه اللي بالبشاميل
ههههههههههههه
بس مش زي اللي انا عاملها طبعا انتوا حاجه تانيه
بس عيزين حد يقولنا بقي علي الطريقه
علشان ميحصلش مصايب تانيه

انا كده
16-11-2006, 01:27 PM
ههههههههههههه
طيب انت ليك عذر
امال انا بقى اعمل ايه فى نفسى شكلى كده هاعملها بالباشميل
هههههههههههه
بجد يا جماعه حد يقول بتتعمل ازاى؟؟

thereallove
16-11-2006, 02:01 PM
الي من يهمه الامر مطلوب وصفه سحريه لعمل المكرونه بالبشاميل
فين الناس ؟

سلوى سالم
16-11-2006, 02:44 PM
ده انت على كدا لزمك قاعةالمطبخ ولا على اية انت ممكن تدور على كتاب ابلة نظيرى

مكرونة بالبشاميل تيها يا ولااد الحلال ههههههه

تعيش و تاخذ غيرها

mr_virus
16-11-2006, 03:17 PM
ياعم اشترى الخلطه السحريه للبشميل
بتبقى معموله جاهزة

thereallove
17-11-2006, 04:38 PM
ايه يا امبراطور حاجه ساهله كده زمش عارفلها طريقه

ماشي يا سلوي مردودالك
هههههههه

mr_virus
17-11-2006, 04:41 PM
انزل اقرب بقال قولوا عايز خلطه البشميل بتاعة فاين فودز

واى خدمه

moura
17-11-2006, 06:13 PM
هههههههههههههههههههههههههههههههههههههههههههههههههه ه


جامدة يا احمد بجد...

يالا اكتب تانى...

عاوزة اضحك عليك شوية...:stpd: :stpd: :stpd:

thereallove
19-11-2006, 03:21 PM
هههههه
والله انتي وحشاني جامد يا مورا بس انا عارف انك شاطره واكيد بتعرفي تعمليها مقلتيش ليه علي الطريقه

وانت يا عم فيرس سيبك من المشاوير دي

moura
20-11-2006, 03:00 PM
هااااااااى يا احمد.....عامل ايه؟

ماتسمعش كلام فيروس..هو بيحرضك على استخدام طرق بديلة ليس لها طعم

...لها لون بس....وبعدين احنا عاوزين نشوف نفسك فى الاكل يا احمد....عشان

تكون ست بيت شاطرة كدة....وانا هاكون اول واحدة تدوق اكلك....

وفيروس لا..طيب؟

بااااااااااااااااااى...:good:

thereallove
20-11-2006, 05:02 PM
ههههههههه ماشي يا مورا طيران هجيلك علي اسكندريه وهذوقك المكرونه اللي بالبشاميل اللي عملتها وابقي قوليلي رأيك


Photo Gallery