المساعد الشخصي الرقمي

مشاهدة النسخة كاملة : -(((عريس حرامي)))- اتسرقت



قطرات من الندى
08-11-2006, 05:51 PM
بصوا بأه ..أولا الحكاية دي برضه من فصيلة هم يبكي و هم يضحك ..بس الصراحه يعني الصراحه ..انتوا هتضحكوا عليا أنا..هتشوفوا ..بس بقولكوا ايه بما اني فتاه ركيكة ..قصدي رقيقة رقيقة..و مهيضة الجناح..ههه حلوة مهيضه دي..فبليز بليز .بلاش تريقة


الحكاية دي مايعرفهاش أي حد غير انا و ماما ..ماحكيتهاش لأي حد من أصحابي ..يعني ابقوا اتفشخروا قدام كل أصحابكم بالأمتياز ده ...حصريا على بلوجر ..حكاية العريس التاني ل عايزة أتجوز ..إقرا الحادثة ..اقرا الحادثة


احمم..مقدمة...عارفين ايه احساس واحده و هي ماشية في الشارع و تحس ان حد معجب بيها:h: ..مش معاكسه يعني و كده .لأ بيبقى فيه كده كيميا زي مابيقولوا الأجانب ..و على فكرة فيه جوازات كتير بتبدأ كده ...واحد يشوف واحده في الشارع..يمشي وراها ..يعرف ساكنة فين و يسأل عليها و يخطبها ..ابن عمي عمل كده و البت لسعته حتت قلم على وشة .علم على صداغه 3 أيام ..قام هو اتكيف قوي و قال البت دي واضح انها مؤدبة و متربيةوراح خطبها ..آه و النعمة..هي صحيح بعد كده اتضح ان ايديها بتطول عليه في كل المواقف مش في الموقف ده بس .بس و الله الراجل مبسوط و بيحلف باليوم اللي شافها فيه..و بيلعن أبو ...والا بلاش دي في مقام عمتي برضه


المهم أنا يوم نازله من البيت رايحه الشغل..حسيت بكيميا م اللي كنت بقولكم عليها دي ..حسيت ان فيه عين هتخرم قفايا .اتديرت بسرعه كده في الخباثة لقيتلكم راجل انما ايه:2: ..طول بعرض بارتفاع.ماسك ف ايده شنطة سودا و لابس بدله و كرافته و نضارة شمس....عامل كده زي العيال اللي كانوا بيطلعوا في إعلانات جمعية شباب المستقبل بتاع جمال مبارك "شباب الجيل .قوام جينا ..هو ..هو" فاكرينهم ؟..المهم الواد كان حليوة و انا قلبي هفهفله أول مالمحته ..استنيت شوية ع المحطه و بعدين جه الميكروباص..ركبت راح راكب ورايا..قلت الشياكه دي كلها هتركب مكروباص ليه يعني..أكيد في الأمر إنا ..و جه كمان قعد جنبي ....يا حلولي يا حلولي..بس كنت خايفه ليعاكس و ساعتها أنا ماعرفش أبويا .باللي ف رجلي و لايهمني لا شباب المستقبل و لا جمال مبارك ولا حاجه أبدا..بس لاقيته في نص المسافه كده ..بيميل عليا و بيقول باسلوب رزين كده
...لو سمحتي ممكن أسأل حضرتك على حاجه ..وانتوا ماتعرفونيش... باتسطل لما حد يقولي حضرتك .بس برضه مش سهله يعني..صدرت الوش الخشب و قلتله ..خير بمناسبة ايه ؟...يعني كنت عايز أسأل بس ..هو حضرتك مرتبطه ..واضح انك مش مخطوبة ولا متجوزة مافيش دبل في ايديكي ..بس الإرتباط بأه لازم أتأكد منه من حضرتك .(حضرتك تاني يا حلولي)..والله الكلام ده مايتقالش في مواصلات و بعدين انا ماعرفكش و مش متعوده أكلم حد ماعرفوش ..طب يعني أنا لو معجب بحضرتك و عندي نيه أتقدم رسمي ..أعمل ايه ..أصلي بصراحه متابعك من مده بس دي أول مرة أتشجع و أحاول أكلمك .ياحلاوة ياحلاوة متابعني من زمان ..ده واقع بأه..بس برضه على مين ..لازم أثبت ..و الله لو حضرتك متابعني زي مابتقول تبقى عارف بيتي و عارف بابايا ..هو الوحيد اللي ينفع يتكلم
في المواضيع دي ..لو سمحت ماتحرجنيش اكتر من كده ..جامده جامده يعني ...الحقيقة انت كده أثبتيلي اني أحسنت الإختيار....ياسلام ياسلام..الله الله ..هو ده الكلام ..لحد كده الأمور كلها صح و مية مية ..صديته آه بس كمان قلتله كلم بابا..سيبتله سكه مفتوحه يعني .

الواد بأه التباع راح شاخط فيا في اللحظه دي .الأجرة يا أبله والا هتركبواببلاش...يابن اللذينا ..دانا عماله أترسم من ساعتها تبعتر كرامتي كده ؟...جيت أمد ايدي جوه الشنطه لقيتلكوا الأخ بأه راح بسرعه مطلع فلوس و محاسبلي ..لأ مايصحش ..لأ بأه اسمحيلي ..أنا لا يمكن أقبل واحده هاتقدملها تدفع و انا موجود ...وجون وجون وجون .هيتقدملي خلاص أيوة كده هو انا صحيح ماعرفش هو بيشتغل ايه و الا عايش فين والا بيقلد فنانين والا ايه نظامه بس الجواب بيبان من عنوانه.


أول ما المكروباص وقف لقيته نزل معايا في نفس المحطه و بصلي و قاللي .أنا حبيت أنقذك يعني في المكروباص ..واضح قوي انك ماعاكيش فلوس...الدم ضرب في نافوخي..وله انت هتتمنظر عليا والا ايه ؟..واضح ان شنطتك فاضية آخر الشهر بأه يالا وفرتلك أجرة المكروباص تنفعك ..بصتله بذهول كده و قلت له ..مين اللي قالك الكلام الفارغ ده ..انا عمري مامشي بشنطتي فيها أقل من 300 جنيه..قالي باستهزاء كده .لاااااماصدقش..الدم كان خلاص قرب يطلع من نافوخي زي النافورة..رحت مطلعه كل اللي في المحفظه مورياهولي .أهه حتى شوف 50-100-200-220


لقيته مد ايده اخد الفلوس..و بصلها كده و عدها و قاللي آه صحيح انتي معاكي فلوس أهه


و في لحظه راح مطبقهم و حاطتهم في جيبه ..و قاللي انا هاخليهم معايا بأه سوفينير لحد لما آجيلكم البيت ..ماستوعبتش و قبل ما آخد فرصة أقول كلمه واحده كان راكب ورا واحد على موتوسيكل شكله كده كان ماشي ورا المكروباص و هوا .فص ملح و داب

أختكوا بأه واقفه في وسط الشارع هابلااااااااااه ..زي اللي اتدلق عليه جردل مايه مش نضيف..مش عارفه أصوت والا أطلع أجري وراه والا ألطم على وشي ...فضلت واقفه يجي خمس دقايق في الشارع مش عارفه اروح فين والعربيات تقعد تزمرلي و لما تلاقيني مسهمة تقريبا اللي سايقين يقولوا في نفسهم دي يا اما طارشه يا اما مجنونة يا اما م اللي بيبيعوا مناديل ..و الناس تعدي تبصلي... و العيال الصغيرة يشدوا في هدوم أهاليهم ..بابا بابا هي الست دي عامله كده ليه؟


بعد شوية كده لفيت و دخلت المستشفى اللي باشتغل فيها .و على وشي تعبير كده زي تعبير العمده الآلي بتاع زمان ..دخلت الصيدلية..قعدت ع المكتب ..و فجأه .....انفجرت في العياط ..و العيال زمايلي اتلموا حواليا..مالك .فيه ايه؟...حد زعلك ..حد كلمك؟

من بين العياط و الشحتفه ما اقدرتش أقولهم غير كلمه واحده
.............................. ...................
.............................. ....
..................
اتسرقت

amak_77
08-11-2006, 06:51 PM
هههههههههههههههههههههههههههههههههههههههههههههههههه ههههههههههههههههههههههههههههههههههههه

جامدة جامدة يعني حضرتك
حضرتك بتنقي عرسانك من الشارع بالكيميا
ههههههههههههههههههههههههههههههههههههههههههه
لا و صدقتي الواد
انا اول ما شوفت الموضوع قلت انت هتعملي زي زميلي مصطفي الي عامل موضوع مطلوب عروسة في القاعه العامة
صراحة اعدت اضحك معلش بس موقف فقري اوي و يهلك من الضحك
طب المطلووب نلم لك من رواد المنتدي و نحط صندوق على الباب لو سمحتم تبرعوا لندي عشان عايزة تتجوز بالكيميا واحد حرامي

خلي بقة جمال مبارك ينفعك و شباب المستقبل و هوهو

معلش تعيشي و تاخدي غيرها
هو هو

زهــــراء
08-11-2006, 07:29 PM
هههههههههههههههههههههههههههههههههههههههههه
هههههههههههههههههههههههههههههههههه
بجد موتيني ضحك ليه كدا يابنتي ..
جامدة جداااااااااااااااااااا حضرتك ههههههههههههههه
يابنتي مفيش شاب في الدنيا يستاهل انك تتحطي في موقف زي دا ..
بجد قصة فظييييييييييييييييعة ...انا والله صعبتي عليا ...تسلمي ياقمر
تعيشي وتاخدي غيرها هههههههههههه

ايهاب احمد75
08-11-2006, 08:48 PM
علشان خاطر حضرتك قوليلى انك بتهزرى علشان نعتبرك ملكه متوجه للكتابه الكوميديه لا مش ممكن يكون حصل فيكى كده بجد دانتى تبقى اطيب واحده على خريطه الكره الارضيه بتهزرى صح ؟؟؟؟

mr_virus
08-11-2006, 09:11 PM
ده أكيد أحلى موقف مر على حضرتك

اهلا بيكى وسط أهلك وناسك

MaTR|X
08-11-2006, 11:01 PM
هههههههههههههههههههههههههههههههههههههه
أنا كمان اول ما قريت الموضوع افتكرت مصطفى يا اماك
ربنا يكون فى عونكم :d

أهلا وسهلا بيكى معانا قطرات

قطرات من الندى
11-11-2006, 03:35 PM
هههههههههههههههههههههههههههههههههههههههههههههههههه ههههههههههههههههههههههههههههههههههههه

طب المطلووب نلم لك من رواد المنتدي و نحط صندوق على الباب لو سمحتم تبرعوا لندي عشان عايزة تتجوز بالكيميا واحد حرامي


معلش تعيشي و تاخدي غيرها
هو هو



http://emiliewood.com/photos/june2005/7-june-05-flower.jpg

طبعا امال داخله هنا ليه
مبارك علينا جميعا:hop:

مغترب
11-11-2006, 04:16 PM
حضرتك

حضرتك

حضرتك

حضرتك

حضرتك

حضرتك

حضرتك

حضرتك

حضرتك

حضرتك

حضرتك

حضرتك

حضرتك

حضرتك

حضرتك

حضرتك

عايز يكون عند حضرتك اشباع من الكلمة دي لو عايزه نخلى ابن البلد يغير اسمك الى
حضرة قطرات من الندي علشان متتحطيش فى الموقف ده تانى

نصيحة : ادعى ربنا يرزقك بزوج صالح و يراعى ربه فيكى و اكثري من الإستغفار و انتى تبقى تمام و ميحصلش معاكى كده تانى :)

monmon_aso1982
12-11-2006, 09:51 PM
ههههههههههههههههه
بصى هوا يهلك من الضحك لو كان تأليف
ولو كان حقيقى تبقا مصيبة
انا مرة حصلى موقف زى ده بس مش عريس يعنى
كنت راكبه مع سواق تاكس وانا مش بحب اتكلم مع سواقين التاكسى
مش تكبر والله بس فيه منهم مش كويسين
المهم
الاخ ده انا كنت بشبه عليه جدا قلت ممكن يكون من اللى كانوا معانا فى الكليه
بس برضه مطولتش معاه
بس لقيته عمال يشكى حاله يعينى وانوا مش معاه فلوس وانوا حالته صعبه
وانا قاعده اسمع لحد ما أشوف اخره
المهم
لقيته بيقولى ممكن تسلفينى 20 جنيه وبكرة هاجى عند الكليه واديهم لكى
فى اللحظة ديه افتكرته وافتكرت انا شفته فين قبل كدا
الاخ كان ناصب على وحده صحبتى بنفس الموقف ده وفضلت تلف وراه اسبوع
علشان تأخد فلوسها مش علشان حاجه بس علشان حاست انها اضحك عليها
وطبعا ما طالتش منوا حاجه
انا بقا قلتلوا ايه
هربت منه بزوق قلتلوا
انا ممكن اديلك الفلوس ديه بس عيب لما بنت تدى لواحد فلوس يعنى
بس لو انتا محتاج لها انا ممكن اديهالك وياسيدى مش عيزاهم
بس
قالى لا لو انتى اتضايقتى خلاص مش مشكله وفى اللحظة ديه وصلنا الكليه
الحمد لله
اينعم هوا اخد منى 10 جنيه حق التوصيله بس معرفش يضحك عليا
وعلى فكرة
انا بيقولوا عنى عبيطة وممكن يضحك عليا بسهوله
انا مش عارفه يا ندى استحملتى الموقف ده ازاى
عموما مايقع الا الشاطر وعلقة تفوت ولا حد يموت

خالد الفارس
13-11-2006, 12:37 PM
اسف انا مش هاقدر اقولك غير





















هابلاااااااااااااااااااااااااااااااااااااااه

stopp
14-11-2006, 12:13 PM
هههههههههههههههههههههههههههههههههههههههههه
هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههه

عـزالديـن
14-11-2006, 04:36 PM
الأخت الفاضلة قطرات من الندى ،
بالتأكيد أى بنت محترمة مثل حضرتك معرضة للموقف ده حتى لو كانت تتمتع بقدر كبير من الذكاء الفطرى مثل حضرتك
ولو تسمحيلى أسأل حضرتك ، هل استولى اللص على كل ما بالشنطة من النقود ؟
يعنى الشنطة خالية تماما من أى نقود ؟
ياريت ممكن أتفحصها بنفسى ؟

ياترى الكلام الى بالبنفسجى هيجيب نتيجة وتدينى الشنطة *11*

حضر الموتوسيكل يابنى :d

-------------------

مفيش حد بيتعلم ببلاش ياندى وأكيد ده درس هيفيدك بعدين
وتعيشى ومتخديش غيرها

.

zaatota2007
16-11-2006, 09:47 AM
السلام عليكم
الاخت الفاضلة ندى احنا اتفقنا مفيش تريقا
بس مقلناش مفيش ضحك
ههههههههه هههههههههه هههههههه ههههههه ههههههههه
صدقينى بقالى كتير مضحكتش كدة
بجد فى الاول انا افتكرت مصطفى يا اماك
لا وبعدين جالى هاتف انه ممكن يكون مصطفى ومغير اليوزر علشان مش عارف يكمل حلقاته قال يقلب هههههههه
بس بجد يا اخت ندى لو الموضوع دة بجد حصلك .......... خالى بالك من نفسك و ماتدليش باى معلومات عن خط سيرك لحسن احنا قربنا على اخر الشهر و احنا عرفنا ممكن نكمل الشهر ازاى ههههههههههههههههههه
ولو الموضوع تأليف انا ممكن اقترح اننا نعمل لقب جديد يتنقل كل شهر لصاحب اكمد موضوع هههههه حلوة اكمد دى

نورتى المنتدى

قطرات من الندى
16-11-2006, 03:20 PM
اسف انا مش هاقدر اقولك غير



















هابلاااااااااااااااااااااااااااااااااااااااه











وانا مش هاقدر اقول اكتر:huh: :huh:





من شكرااااااااااااااااااااااااااااااا

ابن البلد
16-11-2006, 06:01 PM
هههههههههههههههههههههههههه
وقفتي هابلااااه هههههههههههههههههه
صوتي يا بنتي وأجري وراههه :d
ضحك عليا وسرقنيييييي


طيب أنا عندي قصة أسود من دي حصلت مع حماتي
هبقه أحكي لكم عليها بقه :d

بس تعيشي وتاخدي غيرها

ابن البلد
16-11-2006, 06:11 PM
انا عمال أقراها وأضحك تاني هههههههههههههههههههههههههههههههههههههههههههههههههه هههههههههههههههههههههههه

طيب والله الناس بتدفع أكتر من 250 جنيه علشان تضحك هههههههههه
وانتي أهو ضحكتي وضحكتي عشرة جنبك ههههههههههههههههههههههههههههههههههههههههههههه ه


حضرتك يعني أقصد ضحكتي
:d


طيب انا عندي أقتراح
أقولك حضرتك خمس مرات
وتديني خمسين قرش ههههههههههه
أركب بيها ميكروباص هههههههههههههههههه

ههههههههههههههههههههههههههههههههههه

ياله بقه معلش تعيشي حضرتك وتاخدي غيرها
:d

قطرات من الندى
18-11-2006, 08:22 PM
أجري ايه بقول فضلت ساعه واقفه مكاني

مزبهله طبعا

florensa
22-11-2006, 12:49 AM
السلام عليكم ورحمة الله وبركاتة
دا الكيميا دى طلعت بتعمل عمايل وبتتريقى على شباب المستقبل
اتحداكى لو واحدة فيهم اتنصب عليها النصبة دى
على الاقل جمال افندى منصحهم
ههههههههههههههههههههههههههههههههههههههههههههه
بصراحة انا كل يوم ادخل واقراها واضحك بس ياترى مامتك قالتلك اية
معلش بقا يابنتى عوضك على الله
تعيشى وتخدى كيميا اقصد غيرها
هههههههههههههههههههههههههههههههههههه
(ياحلولى ياحلولى) ههههههههههههههههههههههه

أنفـــــال
24-11-2006, 09:59 AM
يااااااااااه يا ندى ..
دة لو على النصابين .. ممكن نألف كتب مشتركة أنا و انتي ..!
:)
تسلم ايديكي .

mido_0a0
26-11-2006, 10:19 AM
تعيشي وتخدي غيرها

(هدهد)
27-11-2006, 12:17 AM
ههههههههههههههههههههههههههههههههههههههههههههههه
هههههههههههههههههههههههههههههههههههههه
الله
حلوه قوى الشغلانه دى والله
طيب على كده يعنى
هو فىايه
انا مش فاهم حاجه
لا ثوانى
استوعب الى قريته وغاجى
ارد
طيران بقى
ورررررررررررررررررررررررررررررررررررررررررررر

ايهاب احمد75
27-11-2006, 01:35 AM
ممكن اسال سؤال
انتى برايد ؟؟؟؟؟

اسكندرانى
27-11-2006, 01:41 AM
على فكرة بقى
انتى مش هبله ولا حاجة
فى رجالة اجدع منك وانصح منك الف مرة
وبرضه بيتعرضوا لمواقف نصب ملهاش حل
اقولك انا على حاجة حصلت معايا
وانا اسكندرانى يعنى مش بتاع كيمياء
الحكاية بمنتهى البساطة
مرة كنت فى محطة مصر فى اسكندرية قبل التطوير
طبعا الاسكندرانيو واللى بيزورو اسكندرية يعرفوها كويس قبل التطوير
مجموعه من الحرامية والنشالين والنصابين
وانا عارف ومتاكد وحريص
المهم
كنت رايح العجمى والساعة 10 مساء تقريبا
قلت افك 20 جنية قبل ما اركب المواصلات علشان سواق الميكورباص ميضربش على الباقى لو عطيته فلوس مجمده
رحت رايح على واحد فارش فى الشارع جرائد وقلت له لو سمحت فاكة 20 جنيه
اخدها من ايدى ونداه على واحد واقف جنبه وقاله فك للاستاذ
طبعا انا مفتح وحويط وميضحكش عليا
واحد بتاع كوكاكولا سمعته بيضحك بصوت عالى وبيقول وقـــــــــــــــــــــــــــــــــع
برضه انا عينى على الفلوس
واحد
اثنين
تلاته
اربعه
وهكذا حتى وصلنا للعشرين
واخذتهم بس جوايا ياقين انهم مش عشرين
قلت له لو سمحت عدهم تانى كده
اخدهم من ايدى
وبدا يضع فى ايدى جنيه جنيه
واحد اتنين
تلاته
اربعه
لحد موصلت للعشرين
وبرضه بداخلى رافض لكن قلت امشى بدلا من تضرب لحد ما يظهر لك صاحب
اخدتهم وركبت الميكروباص
وعدتهم
واحد
اتنين
تلاته
فى الاخر
طلعو 14 بس
ضحكت
وكان نفسى اعرف هو عملها ازاى
انا مفتح عينى وحريص ومش بتاع كيميا
وخليته عدهم مرة تانية
ووضعهم فى ايدى جنيه جنيه
لكن برضه طلعو ناقصين
ولا يهمك
كلنا هبل
وساعات كتير قووووووووى بنكون هبل بمزجنا
وكمان نضحك
اقولك على نصبه تانية
ولا كفاية بلاش فضايح

قطرات من الندى
28-11-2006, 04:26 PM
ههههههههههههههههههههههههههههههههههههههههههههههه
هههههههههههههههههههههههههههههههههههههه
الله
حلوه قوى الشغلانه دى والله
طيب على كده يعنى
هو فىايه
انا مش فاهم حاجه
لا ثوانى
استوعب الى قريته وغاجى
ارد
طيران بقى
ورررررررررررررررررررررررررررررررررررررررررررر


انا بستنا

قطرات من الندى
28-11-2006, 04:30 PM
ممكن اسال سؤال
انتى برايد ؟؟؟؟؟


لأ:huh:

مصريه وافتخر
27-01-2007, 08:26 AM
ههههههههههههههههههههههههه
تحفة
فظيعة
بس هو اخونا جاب البدلة منين طالما انه سرق 220 جنيه
بس بجد تحفة حضرتك
بقى المنيل كان ماشي وراكي عشان 300 جنيه
على كده انا لما همشي همشي بربع جنيه عشان اشيل اجرتي بس من غير حضرتك
بس بجد حلوة
تسلميلنا
وتعيش وتاخدي غيرها
ههههههههههههه

Maruko
27-01-2007, 11:34 AM
هههههههههه
يالا بسيطة تعيشي وتاخدي غيرها
......بس نصيحة يعني متقوليهاش لحدتعرفيه
نصيحة يعني
وقوليلي انتي ساكنة فين عشان انا اعرف ناس شيك جدا
زفعلا فعلا انا محتاجة 300 جنيه دلوقتي

قطرات من الندى
29-01-2007, 11:31 PM
شكــــــــــــرا

totatoty
30-01-2007, 12:42 AM
السلام عليكم ورحمه الله وبركاته
ههههههههههههههه هههههههههههههههههههه
بجد يا ندا انا موت من الضحك وامى من كتر الضحك افتكرتنى بعيط
انا كنت قرئتها قبل كدا بس كانت لحد مانزلتو من الميكروباص وكان بيذلك
انه دفع لك الاجره وكدا ومش عارفه مكملتهاش ليه
بجد انتى طيبه اوى يا ندا انا لو مكانك
كان بقى على الاسعاف من اول ما قالى ممكن سؤال حضرتك
ولا شباب الجيل ولا جمال نفسه
تحياتى يا ندى

Heba Saad
01-02-2007, 10:03 AM
متزعليش نفسك انتى اتسرق منك فلوسك فى غيرك اتسرق منه حب عمره وحياته كلها :heart15:

قطرات من الندى
03-02-2007, 05:01 PM
توتي
ولاطيبه ولاحاجه المشكله ان الواحد ساعات دماغو بتلف

هبه الحمد لله وكلهاسرقه


Photo Gallery