المساعد الشخصي الرقمي

مشاهدة النسخة كاملة : طارق المملوك هيجوعنا ... هيجوعنا واخر افطار في رمضان



أم أحمد
19-10-2006, 09:01 AM
بسم الله الرحمن الرحيم
السلام عليكم ورحمة الله وبركاته



للاسف الشديد مر رمضان سريعا جدااا وتفلت من بين ايدينا
وها نحن نستعد لاستقبال عيد الفطر المبارك
اعاده الله علي الجميع بالخيرواليمن والبركات


وكما تعودنا ان يكون لنا لقاء يومي مع مبدع جديد
اليوم موعدنا مع مسك الختام
موعدنا مع شاعر الرومانسية كلها
موعدنا مع صاحب الكلمات الرقيقة والمشاعر الحساسة
موعدنا مع الاحساس الراقي
موعدنا مع عاشق تراب مصر
موعدنا مع الشاعر الكبير طارق المملوك


فلتتفضل اخي طارق في دخول مطبخ ابناء مصر



http://gallery.egyptsons.com/data/media/49/kitc7.jpg (http://gallery.egyptsons.com)



اتمني لك قضاء يوم جميل في مطبخ ابناء مصر العامر :f2:






اخواني واخواتي الاعزاء ادباء ومبدعي ابناء مصر
اشكركم جميعا علي التعاون الجميل في هذا الموضوع
والذي اظهر روح الاسرة الجميلة التي نتمني ان نعيش فيها دائما طول العام وليس في رمضان فقط
لكم شعرنا من خلال هذا الموضوع بمدي التقارب الذي حققه بين الجميع ومقدار الالفة الي بثت في القلوب من خلال التفاعل والمشاركة الجميلة التي اتسمت بروح الاخوة والدعابة الجميلة
اتمني استمرار هذه الروح طوال العام
واتمني ان اراكم دائما متفاعلين مع الجميع في جميع القاعات
واتوجه بالشكر انا وبوكي بوكي لكل من لبي طلبنا ووافق علي المشاركة في هذا الموضوع واشكر ايضا كل من مر علي الموضوع سواءا كان قارئا او كاتبا

لكم منا جميعا اعطر التحية واخلص التقدير
وكل عام وانتم جميعا بكل الخير
:f2:

عصام علم الدين
19-10-2006, 09:10 AM
سلامو عليكم ياهندزه
أخي الحبيب طارق المملوك

أنا مستني آهو ومجهز البرجل والمنقله بدل الشوكه والسكينه
وعايزك بقى تطبخ بالمسطره عشان نبني عضلاتنا
ونعلي من السعرات الحراريه بس مش عايزين حاجه
تكون مخالفه للمواصفات أو فيها غش في كمية الملح
حاول تزود المونه على قد ماتقدر ومش مهم لو تخلط المونه البقري مع الضاني
عشان يكون تأثيرها فعال ونقدر نقاوم الزلازل
وكل سنه وأنت طيب
قلبي معاك ومعدتي في إنتظارك

أخوك
عصام علم الدين

أحمد ناصر
19-10-2006, 09:17 AM
حجزت مكان ع السفرة
أخبارك إيه فى الطبخ يا طارق؟
لو ما بتعرفش عادى ممكن تعزمنا بره
خللى بالك ممكن جدا الليلة دى تكون ليلة القدر
وإحنا عايزين ندعيلك
*3*

boukybouky
19-10-2006, 01:20 PM
هو فينه طارق هيفطرنا إمتي طيب *14*

لابقي الشعراء بيتأخروا اليومين دول يا أم أحمد

و لازم نوقع عليهم غرامة :d

يا خوفي لا نتسحر بدل ما نفطر

في رعاية الله ،،

طارق المملوك
19-10-2006, 01:29 PM
اليوم موعدنا مع مسك الختام
موعدنا مع شاعر الرومانسية كلها
موعدنا مع صاحب الكلمات الرقيقة والمشاعر الحساسة
موعدنا مع الاحساس الراقي
موعدنا مع عاشق تراب مصر
موعدنا مع الشاعر الكبير طارق المملوك

فلتتفضل اخي طارق في دخول مطبخ ابناء مصر






الاخت العزيزة ام احمد
اشكرك على الدعوة الكريمة التى تشرفنى
واشكرك على الكلمات الجميله الرائعة التى وصفتنى بها
التى ارجو ان اكون مستحقا لهااتمنى ان اوفق معكم اليوم ان شاء الله

طارق المملوك
19-10-2006, 01:32 PM
سلامو عليكم ياهندزه


أخي الحبيب طارق المملوك

أنا مستني آهو ومجهز البرجل والمنقله بدل الشوكه والسكينه
وعايزك بقى تطبخ بالمسطره عشان نبني عضلاتنا
ونعلي من السعرات الحراريه بس مش عايزين حاجه
تكون مخالفه للمواصفات أو فيها غش في كمية الملح
حاول تزود المونه على قد ماتقدر ومش مهم لو تخلط المونه البقري مع الضاني
عشان يكون تأثيرها فعال ونقدر نقاوم الزلازل
وكل سنه وأنت طيب
قلبي معاك ومعدتي في إنتظارك

أخوك
عصام علم الدين



اخى الحبيب عصام علم الدين
الخلطة مظبوطة طبقا للمواصفا تالفنية تمام
و الملح قصدى الزلط و الرمل بالمقاس مع الاسمنت
و المونه تمام ان شاء الله
انتظرنى

طارق المملوك
19-10-2006, 01:35 PM
حجزت مكان ع السفرة
أخبارك إيه فى الطبخ يا طارق؟
لو ما بتعرفش عادى ممكن تعزمنا بره
خللى بالك ممكن جدا الليلة دى تكون ليلة القدر
وإحنا عايزين ندعيلك
*3*

اخى الحبيب احمد ناصر
لا و الله انا بعمل عزايم هايله بجد و الله
وكل الناس تشهدلى انى بعمل اى حاجة بمنتهى السهولى بيتزا مكرونه بشاميل و كفته و فراخ و صوانى ف الفرن و طبيخ و رز بانواعة بجد
بس النهارده عندى فكرة ممكن تضربونى مش عارف ليه ربنا يستر

طارق المملوك
19-10-2006, 01:38 PM
هو فينه طارق هيفطرنا إمتي طيب *14*

لابقي الشعراء بيتأخروا اليومين دول يا أم أحمد

و لازم نوقع عليهم غرامة :d

يا خوفي لا نتسحر بدل ما نفطر

في رعاية الله ،،

يا ريهام لا خالص انا جاى اهه على ملا وشي
بجرى من الشغل عشان الحق اوضب السفرة
بس انا متهيالى ان السفرة النهادة هاتبقى عزومة بره

طارق المملوك
19-10-2006, 01:59 PM
النهارده عزومة هايله .. بس ليكم..
جاى جرى عشان احضر ..
اكله حلوة تليق بصحبه ..
من اعز الناس عليا ..
راح احمر .. راح اشمر ..
كل اكله تبقى احلى ..
كل لقمة احلى بيكم ..
روحت راجع بجرى ليكم ..
اكل اخضر .. اكل احمر ..
راح الون كل حاجة .. وعلى قدى ..
اصلى فرحان انى هافطر ..
يوم معاكم مش لوحدى ..

طارق المملوك
19-10-2006, 02:17 PM
قلت اطلع وابدل لبسي ..
عم احمد قال يا باشا ..
كنت مشغول ويا نفسي ..
قاعد افكر ..
قلت نعمين يا اسطى احمد ..
والله انك.. جيت ف وقتك ..
عايز ابعت اشرف ابنك ..
للبقالة .. و الجزارة ..
ولحد يمكن سوق خضارنا ..
اديه اماره ..
قالى خير ..
اامر يا باشا ..
قلت جايلى .. صحبة حلوة ..
قالى شعرا ..؟
قلت شعرا .. ايوة فيهم ..
قالى والله انت اللى عارف ..
الصعيدى .. غاوى كلمة ..
ع الربابة ..
يقولها شاعر ..
وانت عارف .. احنا غربة ..
بين ديابه .. وبين طيابه ..
وكلمة منكم تطفى نار الشوق لبلدى..
الفطار الليله عندى ..
اكلكم ولكل شئ ..
اللى يقسم بيه اللى خالق ..
على قدى ..
ربنا يكرم سعادتك ..
قلهم فطاركوا عندى ..
الفطار اكل الغلابة..
مين موافق..
يالا قولوا..
حسابكوا عندى..

طارق المملوك
19-10-2006, 02:38 PM
عم احمد .. يبعت اشرف ..
هات مخلل .. قلت هاصرف ..
قال لا يمكن ..
قلتله طب هاتلى حاجة مصرى اكتر ..
قالى شوف هاعملك ايه ..
عرق سوس المصرى جايلك ..
وانت مزمز مع صاحبك ..
من ايديا احلى حاجة ..
تفتكر حوارينا .. ليلنا ..
صوت صلاتنا ..
والعيال و الفوانيس ..
لما ينده بين بيوتنا ..
ع الصجات و بالاغانى ..
عم حمدى .. يا عرقسوس ..
ايوة تمر .. بدون فلوس ..
قلت الله يا عم احمد ..
عرقسوس .. وتجيبه امتى ..
ومين يبيعه ..
قال يبيعه ؟؟؟.. ايه القضيه ..
محسبوك يا باشا اسطى مجدع ..
شوف طريقته هى ديا ....


المقادير :
كمشة عرق سوس جاف
لتر ماء دافئ
الطريقة:
-ننقع العرق سوس النظيف فى الماء ويفضل نقعه من الليل حتى الصباح حتى نستخلص خيراته وحلاوته كلها
-نحضر وعاء نظيف وقطعة شاش ونصب السوس فى الوعاء من خلال الشاش ونعصر الشاشة جيداً حتى يتصفى لآخر قطرة،،
-نصب الشراب الناتج فى اكواب ونقدمه مثلجاً
ملاحظة:
-إذا وجدتى المشروب ثقيلاً خففيه بالماء للدرجة التى تفضلين.
-يمكنك إضافة القليل جدا من بيكربونات الصودا أثناء النقع (أخذت المعلومة من بائع عرق السوس وقلما أستخدمها)
-يكون لون الشراب بنى ولكن شراب السوق أسود وذلك بسبب إضافة الصبغة لشراب السوق.
-يمكنك عمل خليط من شراب الخروب الطبيعى أيضاً وشراب العرق سوس يكون أطيب وأطيب

طارق المملوك
19-10-2006, 04:33 PM
ربى عالم بالغلابه المطحونين
فول فلافل .. عدس ممكن ..
عيش بلدنا .. البلدى يوكل ..
رده مخلوطة بشقانا ..
كلمة وقفت .. مالها رد ..
و المخلل من خيار و لفت جايز ..
والبتنجان راح لفين ..
اكله تصلب عود ولادى ..
الشقيانين ..
اه يا مصر الخير ماليكى ..
بس منهوب .. مستباح ..
اه يا بلدى .. الليل طويل ..
عتمة تطرد ميت صباح ..
اكل بلدى احلى منه ..
مش هلاقى ..
فول حراتى ..
ويا ترمس ..
والمعسل .. كوز بطاطا ..
فيشار .. ولب .. وفول سودانى ..
للتسالى ..
راح عليك يا كاجو بينا ..
روح بعيد العب يا فستق ..
ادعو لينا ..
الناس هتصدق ..
شوب متعبى بعصيرنا ..
اه يا سكر .. يا قصبنا ..
تحيا مصر ع الطبالى ..
ملعون ندوق اكل الصوانى ..
كل املى فيكى لقمة ..
وسط لمة ف بيت ولادى ..
التعبانين ..
تحيا مصر ف اكله تصلب ..
عود ولادى الشقيانين ..

طارق المملوك
19-10-2006, 04:43 PM
عم احمد بقى جهزلنا الفطار الجميل اللى هيفكرنا بمصر
قائمة الطعام
فول بانواعه ( بزبده و بزيت حار و بزيت حلو و فول اسكندرانى )
طعمية عجب بقى يا شباب
و الطبق الرئيسة مسقعة مصرى
رز ( رزه ورزه )
وعيش بلدى من ابو رده
وباذنجان مخلل عجب
والحلو كنافه


المسقعة المصرية

المقادير :

- ثلاث حبات باذنجان .
- ربع ك فلفل حار أو بارد حسب الرغبة .



نصف ك طماطم أو ما يعادله معجون طماطم .
- عشر فصوص ثوم مفرى .
- ثلاثة معلق خل أبيض .
- زيت للقلي .
- رشة ملح ـ رشة كمون ـ رشة فلفل أسود حسب الذوق .

طريقة التحضير :

1- نقوم بتقطيع الباذنجان إلى قطع دائرية ، ثم نتركه في ملح نصف ساعة .
2- ونقوم بعد ذلك بقلى الباذنجان والفلفل في الزيت .
3- نقوم بعمل صوص الطماطم .
4- نضع قليل من الزيت في القدر ثم نضيف الثوم ،وحتى يصير لونها ذهبي نضيف إليه الخل ونتركه يغلى .
5- إضافة الطماطم حتى تسبيكه ثم يضاف البهار .
6- يوضع الباذنجان والفلفل إلى الخليط ويضاف كوب ماء ونتركه على نار هادئة من 10 إلى 15 دقيقة.


الفول المدمس


المقادير:

كمية من الفول
كبشة قمح
كبشة عدس أصفر
ملعقة صلصة
1 بصلة صغيرة مقطعة نصفين .


الطريقة:

ينقع الفول فى الماء وينقع العدس معه وينقع القمح فى اناء أخر قبل التدميس بليلة
يغلى القمح فى حلة ونتركه على النار الى النضوج وبعد ذلك نضع الفول مع العدس والقمح الناضج والبصلة وملعقة الصلصة فى قدر الضغط ..
ونضع ماء يغطى الفول ويقلب مرة ثم يقفل القدر بأحكام ونتركه على النار حوالى نصف ساعة بعد تهدئة النار ..
وبعد ذلك نفتح القدر بعد خروج البخار منها ونأخذ فولة بين الأصبعين ونضغط عليها أذا اتهرست يبقى الفول نضج..
أما أذا كانت ناشفة وقاسية فتعاد الى النار مرة أخرى ويجب ان لا نفتح الغطاء كثيرا ومدة طويلة حتى لايغمق الفول فهو لابد أن يكون كهرمانى اللون...


الطعمية المصرية


المقادير :
--------------
1- كيلو فول مدشوش 0

2- بصلة كبيرة 0

3- نصف رأس ثوم 0

4- حزمة من البقدونس + كرات 0

5- كربونات + زيت للقلية + سمسم 0

6- ملح + شطه كمية قليلة + كمون + كسبرة 0

الطريقة :
--------------
1- ينقى الفول وينقع فى الماء مدة 12 ساعة 0

2- نقشر البصل والثوم والبقدونس والكرات 0

3- تخلط جميع المقادير وتفرم بمفرمة اللحم الناعمة 0

4- تضاف التوابل : الملح + الشطة + الكمون + الكسبرة 00 وتقلب جيدا 0

5- عند الإستعمال يوضع على كمية الفلافل ذرة كربونات وتترك لمدة 10 دقائق 0

6- يقدح الزيت ويقلى الفلافل مع وضع سمسم او بدون حتى تحمر اللون ثم تنشل على

ورقة للتخلص من الزيت وتقدم ساخنة 0


طريقه عمل الكنافة


وطريقة صنع الكنافة تبدأ بأن يُذاب الدقيق فى الماء حتى يكون للسائل قوام ، ثم توضع الصينية الكبيرة على النار ، ويوضع هذا السائل فى الكوز ، ويُمسك الكوز من رقبته ، ويقوم الحلوانى بلف الكوز فى دوائر تبدأ بحجم قطر الصينية وتضيق حتى المنتصف ، حيث يسيل هذا السائل من الخروق على الصينية المحماة ، ويترك بعض الوقت حتى يجف ، ثم يلم ويباع فى الشوارع والأسواق ومحال الحلوى . والكنافة شائعة فى الريف كما هى شائعة فى الحضر ، وتنتشر بين شتى الطبقات الاجتماعية ،حيث ما يميز طبقة على ما هى أدنى منها الخامات الداخلة فى صناعتها ، وإن ظلت طريق الإعداد ميزة خاصة للسيدة ، أو للسيد ، الذى يتولى إعدادها . وإذا أُريد تحمير الكنافة وُضع قليل من السمن فى صينية محماة حتى يسيح ، ثم توضع عليها الكنافة . وقد يُضاف وسط راقات الكنافة بعض البندق واللوز والسكر المدقوق ، ثم تُوضع الراقات الأخرى حتى تمتلئ الصينية . ويُضاف من فوق قليل من السمن على وجهها ، وتُترك على نار هادئة حتى تنضج ، فإذا لم تكن أُدخلت فى الفرن قُلبت على الوجه الآخر حتى يُحمر أيضاً ، ويكون بجانب ذلك سكر معقود قد أُعد وتُرك حتى يبرد ثم يوضع السكر عليها . وإذا أُريد إتقانه أيضاً وُضع عليها ماء ورد . وتتشرب الكنافة كل ذلك وتكون حلوة لذيذة .

طارق المملوك
19-10-2006, 04:52 PM
يا جماعة عم احمد اهه جايب العيش البلدى و البصل الاخضر و الجرجير
وبيقولكم اتفضلوا الافطار جاهز و بالهنا و الشفا
وكمان عمل طبق مكنش قايلى عليه قبل كده مفاجاه يعنى مع انى مابحبوش بس مش مهم بيفكرنى بمصر

(طبق البصارة)


المقادير :


حاجه عند العلاف أسمها فول مدشوش ممكن ربع كيلو مبدئيا

شبت وبقدونس وكثبرة

بصل لزوم التقلية

ملح وكمون وشطة

كام فص ثوم

بس مفيش مقادير غير كده

الطريقة :

بعد غسيل الفول نضعه فى الحلة وعليه ماء ويقطع عليه بصلة

والخضره ويترك حتى السوا نسيت كمان نحط كام فص ثوم

ثم يرفع من على النار ويضرب فى الخلاط أو يصفى من المصفاه

ونعيد وضعه على النار ونضع الملح والكمون والشطة ونقوم بتحمير

بصلة مقطعة صغير ونضعها على الفول بالزيت المقلى فيه البصلة

وفى حاجه دى سر المهنة محدش يعرفها علشان تطلع البصارة قوامها

مناسب نضع ملعقتين نشا فى ماء بارد ونضعهم على البصارة ونقلبها جيدا

وهى بتغلى على النار تقوم تطلع ما تتهزش فى الطبقhttp://www.tibasons.com/vb/images/smilies/smile.gif

وبعدين نضع البصارة فى أطباق ونتركها تبرد ونكون حمرنا البصل المقطع

صغير مع قليل من الثوم المقطع أيضا ووضعه فى مصفاه أو على ورق زبده

حتى يجف منه الزيت ثم نضعه على الأطباق

أم أحمد
19-10-2006, 08:51 PM
انا قولت برضه ان ختامه مسك
ما شاء الله عليك يا طارق ابداع رهيب في توظيف الكلمات
ووضعها في اطار جميل باسلوب سلس وبسيط
حقا استمتعت جداا بالافطار المصري الجميل
علي نغمات الاشعار الرائعة
بس صحيح قولي هو مين بقي عم احمد وعم اشرف
هو مين بالظبط اللي هيفطرنا حضرتك؟

طارق المملوك
19-10-2006, 08:58 PM
انا قولت برضه ان ختامه مسك
ما شاء الله عليك يا طارق ابداع رهيب في توظيف الكلمات
ووضعها في اطار جميل باسلوب سلس وبسيط
حقا استمتعت جداا بالافطار المصري الجميل
علي نغمات الاشعار الرائعة
بس صحيح قولي هو مين بقي عم احمد وعم اشرف
هو مين بالظبط اللي هيفطرنا حضرتك؟

الاخت العزيزة ام احمد
والله كنت مرعوب جدا وانا بفكر اعمل ايه النهارده
كلامك اسعدنى جدا و الله كنت بفكر اعمل شئ مختلف
قلت نفطر عند الحارس المصرى للسكن اللى ساكن فيه
يعملنا فطار مصرى تحفه كده و نقعد ع الارض نفتكر مصر و حلاوتها و بساطتها
لقمة جميله مع ناس بسيطة يفرح بينا عم احمد و ابنه اشرف المصرى البسيط المغترب الذى يريد ان يكون حوله من يذكره ببلدنا و جمالها و لمة الفطار
اشكرك اختى العزيزة على تشجيعك

أم أحمد
19-10-2006, 09:07 PM
الاخت العزيزة ام احمد
والله كنت مرعوب جدا وانا بفكر اعمل ايه النهارده
كلامك اسعدنى جدا و الله كنت بفكر اعمل شئ مختلف
قلت نفطر عند الحارس المصرى للسكن اللى ساكن فيه
يعملنا فطار مصرى تحفه كده و نقعد ع الارض نفتكر مصر و حلاوتها و بساطتها
لقمة جميله مع ناس بسيطة يفرح بينا عم احمد و ابنه اشرف المصرى البسيط المغترب الذى يريد ان يكون حوله من يذكره ببلدنا و جمالها و لمة الفطار
اشكرك اختى العزيزة على تشجيعك


لا بجد تسلم ايدك
اليوم النهاردة مميز فعلا
انت فعلا ابدعت في اخراج اليوم بصورة جميلة جداا
وكل الاكلات اللي قدمتها بنفتقدها فعلا
تسلم ايدك وتسلم ايد عم احمد واشرف
ومفيش احلي من اللمة والاكلة البسيطة دي اللي كلنا بنموت فيها
وان شاء الله ربنا يرد كل مغترب الي بلده محققا كل ما يتمني
لك مني كل التحية والتقدير
وكل عام وانت بكل الخير
وسلام مخصوص لعم احمد واشرف

سمـاء
19-10-2006, 09:17 PM
إزاى تقول إنك بتفطر

كنت لوحدك

ده كل يوم عزومة حلوة

فى بيت أخوك

أو سفرة أختك

واللمة تحلى

بأكلة هنية

على طبلية

الله عليه الفول مدمس

وبعيش بلدنا لازم نغمس

أما الفلافل فى الزيت تطشطش

ولا أحلى كفتة لما تقرمش

وإن كنت غايب عن جو مصر

ماتقولش إنك فطران لوحدك

إحنا جينالك

وفطرنا عندك

لميس الامام
19-10-2006, 10:59 PM
شاعرنا المتميز طارق المملوك

قد ايه سفرتلك جميلة
وهو فيه احلى من العرق سوس وخصوصا في بلادنا الحارة وفي شهر رمضان؟ اختيارك اكيد جميل والاجمل الطعمية والفول والمسقعة الطبق الرئيسي واللي بفضل اكلها غموس..بس ما يهمش العيال يحبوا الرز ... اما البصارة فحدث ولا حرج كان نفسي اعرف بتتعمل ازاي وحضرتك كنت فاعل الخير ..واما المخلالات فيا سلام عليهم يفتحوا نفس الصايم..والحلو كنافة عجب ..تسلم ايدين حضرتك شيف بحقيق وحقيقي انا من دلوقت ومن قراية القائمة شبعت مش عارفة العرق سوس يهضم ولا ناخد وراه اينو؟

التعبير عن الفطار وتحضيره بوجود عم احمد وابنه اشرف اللي زادوا الطعم حلاوة كل سنة وانتم طيبين وبعودة الايام يارب ...واهو رمضان جري واتجمعنا كلنا هنا بأحلى جمعة نشكر ام احمد وبوكي على اللمة الحلوة ديه وكل سنة والجميع بألف خير ويجمعنا رمضان الجاي ان شاء الله على احلى موائد الرحمن..

لميس الامام

طارق المملوك
19-10-2006, 11:01 PM
لا بجد تسلم ايدك
اليوم النهاردة مميز فعلا
انت فعلا ابدعت في اخراج اليوم بصورة جميلة جداا
وكل الاكلات اللي قدمتها بنفتقدها فعلا
تسلم ايدك وتسلم ايد عم احمد واشرف
ومفيش احلي من اللمة والاكلة البسيطة دي اللي كلنا بنموت فيها
وان شاء الله ربنا يرد كل مغترب الي بلده محققا كل ما يتمني
لك مني كل التحية والتقدير
وكل عام وانت بكل الخير
وسلام مخصوص لعم احمد واشرف

اشكرك اختى العزيزة
وكنت اتمنى ان اللمة تبقى حقيقية بجد و اشوفكم كلكم ونكون مثلا فى قريه ع النيل نشوف خضرة بلدنا و خيرها
كل عام وانت بخير

طارق المملوك
19-10-2006, 11:15 PM
إزاى تقول إنك بتفطر

كنت لوحدك

ده كل يوم عزومة حلوة

فى بيت أخوك

أو سفرة أختك

واللمة تحلى

بأكلة هنية

على طبلية

الله عليه الفول مدمس

وبعيش بلدنا لازم نغمس

أما الفلافل فى الزيت تطشطش

ولا أحلى كفتة لما تقرمش

وإن كنت غايب عن جو مصر

ماتقولش إنك فطران لوحدك

إحنا جينالك

وفطرنا عندك




بينا سماءنا ..
ووسط ارض ..
ف البراح المالى غيطنا ..
وزرعنا وف وسط شط ..
لمه حلوة م الصحاب ..
اتجمعوا على بر نيل ..
و الجميل ..
انهم صايمين .. بجد ..
انهم راضيين بجد ..
لقمة بسيطة تفرح القلب العليل ..
المهم الصحبه تجمع ..
المهم قلوبنا تشبع ..
اننا بنجب بعض ..
بين سمانا ..
ووسط ارض ..

ليلة عشق
19-10-2006, 11:40 PM
السلام عليكم
الشاعر الصادق طارق المملوك هنا في المطبخ .....
بصراحة مسك الختام ......
ده انا جيت متأخرة قوي اليوم .....
ايه الجمال ده بس ياطارق .....
مصري أصيل والله ......
فول وطعمية ومسقعة وبصارة الله عليك .....
بصراحة مهما شكرت علي العزومة الجميلة والكلمات الرائعة .....
لن أوفيك حقك .....
سلمت وسلمت يداك ......
وكل عام وأنت بخير أعاد الله عليك رمضان كل عام أنت وأسرتك الكريمة بالخير واليمن والبركات ......

تحياتي
ليلة عشق

boukybouky
20-10-2006, 06:15 PM
يا حليلة ..يا حليلة كويس يا طارق اننا ختمنا بك

يا بشمهندس حرام عليك الأكلة ديه ننام بعدها اسبوع

مش نصوم ابداً :d :d:d

بس تسلم إيد عم احمد المخلل رائع و لو انه حامي شوية

كل سنة و انت طيب و عيد سعيد و مبارك عليك و علي كل أسرتك

بجد بجد بصرف النظر عن اللي قلته فوق كلماتك رائعة و لمتك اكثر روعة

بساطة الحروف و الكلام و السلاسة اللي في تعبيرك ... ما شاء الله عليك بجد

دمت بكل خير

في رعاية الله ،،،

a_leader
20-10-2006, 06:47 PM
السلام عليكم جميعا
و كل عام و انتم بالف خير ,,

amal3
21-10-2006, 03:44 AM
أخى العزيز طارق الممــــــــــــــــــــلوك

عيزا أقولك تسلم ايداك ياباشمهـــــــــــندس

نفسى أشكرلك فى أكلك وبأيدى أغمـــــــس

ولقمة تجرى وراها لقمة وفول مدمــــــــس

أما البصارة عينى عليها فى العقل تلحــــس

ولا الفلافل عليها شطة بنرها تهــــــــــــوس

وطاجن ياعينى عليه يجنن من عينا يحرس

وإن قولت أسمه لأى واحد بسرعة يهمـس

يقول بحبه ياخلق هووووووهتولى ألحــس

ولا العصاير منها الملوكى ياعرق ســوس

وكنافا حلوة جواها تلقى لكل النفـــــــــــوس

مكسرات ومهلبية ولا الكريمة قرب وغوص

بسرعة يلا دى اللمة جاية أوام جلـــــــوس



أخى طارق

برغم أنى بحب جدا كل أصنافك دية.. بس عيزا أهمس فى ودنك أوام وأقولك..

حرام يطارق بعد الصيام نفطر مدمس .....داأحنا فيه كل يوم قعدين نغمس

..طب بس حن وأدينا حتى طبق عكاوى يرم رمة

هههههههههههههههههههههههه

طبعا أنا بهزر معاك ....حقيقى تسلم ايديك

وكل سنة وأنت طيب وكل عيلتك معاك تعيد

أختك آمال مصطفى