المساعد الشخصي الرقمي

مشاهدة النسخة كاملة : د. جمال مرسي هيجوعنا...هيجوعنا



boukybouky
17-10-2006, 03:34 AM
السلام عليكم و رحمة الله و بركاته

كدنا نصل لنهاية الشهر و دعواتي للجميع أن يكتبنا الله من عتقاء شهر رمضان

رَمَضـانُ إنْ غَادَرتَنَـا لا تَنْسَنَـا
يا رَائِعَ النَّفَحَـاتِ عُـد مُتَفَضِّـلا
و احملْ بَشَائِرَكَ العَظِيمَةَ ،إِنَّنـي
مازلتُ في عَفوِ الكريـمِ مُؤَمِّـلا
حمـداً لــكَ اللهُمَّ أنْ بَلَّغتَـنَـا
خيرَ الشهورِ ، و أنتَ خيرٌ مَوئِلا
فَاْمنُنْ على العبدِ الفقيـرِ بتوبـةٍٍ
و اغفر خطايا من دعـا مُتَبَتِّـلا


و الله معك كل الحق شاعرنا الكبير و ضيفنا في مطبخنا اليوم

اليوم معنا ضيف عزيز علي الجميع أستاذنا الكبير د.جمال مرسي

و لأن البنفسج يرفض الذبول نهدي لك هذه الباقة

http://gallery.egyptsons.com/data/media/6/20BLUEIRIS_lg.jpg (http://gallery.egyptsons.com)

فلتتفضل يا د. جمال لدخول المطبخ و إعداد اشهي الاطباق لنا

http://gallery.egyptsons.com/data/media/49/kenton.jpg (http://gallery.egyptsons.com)

دمتم بكل خير

في رعاية الله ،،،

إلي الغد و مبدع جديد و طبق لذيذ و كلام مفيد :f2:
في رعاية الله ،،،

ليلة عشق
17-10-2006, 04:09 AM
السلام عليكم

صليت الفجر وقلت أجي أشوف مين هيجوعنا اليوم ......
بس بصراحة لما لقيته د جمال مرسي .....
قلت أكيد هتكون حاجة رائعة من روائعة المتميزة بأناملة الذهبية .....
في انتظارك د جمال ......
وكل عام وأنت بخير ......

تحياتي
ليلة عشق

أم أحمد
17-10-2006, 07:01 AM
صباح الورد
صباح البنفسج الرافض للذبول
اهلا بك دكتور جمال في مطبخنا العامر بكل ما هو شهي ومفيد
في انتظار ما تجود به علينا شاعرنا الكبير

عصام علم الدين
17-10-2006, 07:02 AM
السلام عليكم ورحمة الله وبركاته
مش هوصيك بقى يادكتور
عايزينك تاخد راحتك على الآخر
وأنا عارف إن إنت هتاخد راحتك
وهنفطر أجدع فطار
وهنقرا أجمل كلام
نشوف حضرتك على الفطار إن شاء الله

أخوك
عصام علم الدين

د. حسان الشناوي
17-10-2006, 07:02 AM
السلام عليكم ورحمة الله وبركاته
أبا رامي الحبيب
كل عام وأنت بألف خير
عايزين أكل بقى يعين الناس الحريصة على الاعتكاف الأيام دي وصلاة التهجد وقراءة القرآن الكريم (هههههههههههههه)
حضرتك عارف طبعا إن التهجد بيطول أوي وكمان الأوراد والأذكار .
وأهم شيء أن تدعو الله لمحبيك بالرحمة والمغفرة والعتق من النيران خلال أواخر أيام رمضان .
بارك الله لك ومنك وعليك
د. حسان الشناوي

د. جمال مرسي
17-10-2006, 09:07 AM
بسم الله الرحمن الرحيم
الحمد لله رب العالمين و الصلاة و السلام على أشرف المرسلين
أختي الكريمة بوكي بوكي
أولا كل عام و الجميع بخير بمناسبة العشر الأواخر من رمضان و التي نتحرى فيها ليلة القدر
التي هي خير من ألف شهر .

سعيد جدا أختي الكريمة و ممتن لك أنت و الأخت الفاضلة أم أحمد لأنكما اخترتماني لأكون ضيفكما
في هذه الحلقات الرائعة من المطبخ .
و أكرر أنني ضيف لأن أخاك في أمور الطبخ لا يعرف إلا صحن السلطة و البيض المسلوق .
عموماً .. لقد استعنت بشيف ماهر جداً من بلاد الواق الواق و أخذت منه وصفة لأحدث أكلة لم تصنع
من قبل في مطبخكم الجميل و أظنها ( لن ) تصنع بعدها أبدا

أختي الفاضلة بوكي بوكي
لقد تعمدت هنا أن يكون أول رد لي بالفصحى على اعتبار أني شاعر فصحى
و لكن بما أن لي بعض قصائد العامية و بما أن معظم ( الشيفات ) يتكلمون العامية و هم يصفون
لنا أكلاتهم فسوف أتجه في كلامي في الردود التالية إلى العامية
و سأصف لكم أصنافي باللهجة المحكية .

شكرا لك أختي الكريمة من جديد
و شكرا على هذه الطاقة من البنفسج التي أهديتموني
فما أجملها
و أخيراً
تقبلي خالص مودتي و تقديري لك و لكل أحبابي في أبناء مصر
أخوكم د.جمال مرسي

د. جمال مرسي
17-10-2006, 09:11 AM
السلام عليكم

صليت الفجر وقلت أجي أشوف مين هيجوعنا اليوم ......
بس بصراحة لما لقيته د جمال مرسي .....
قلت أكيد هتكون حاجة رائعة من روائعة المتميزة بأناملة الذهبية .....
في انتظارك د جمال ......
وكل عام وأنت بخير ......

تحياتي
ليلة عشق

أهلا بك أختي الكريمة ليلة عشق
شرفتي مطبخ أبو الأمراس
و يا رب ما تزلوا مني لما أقدم لكم أحدث و أغرب طبخة اليوم
شكرا لك أختي الفاضلة
و لك الود

د. جمال مرسي
17-10-2006, 09:15 AM
صباح الورد
صباح البنفسج الرافض للذبول
اهلا بك دكتور جمال في مطبخنا العامر بكل ما هو شهي ومفيد
في انتظار ما تجود به علينا شاعرنا الكبير

يا صباح الطيبة و الذوق كله يا أم أحمد
أنا شاكر لك أنت و بوكي هذا المطبخ الرائع
و لكن بصراحة ربنا يسترها من مطبخي
عموما هتشوفوا و أنتم من سيحكم
و ربنا يسترها و ما تكون علقة سخنة أسيب بعدها المنتدى
صباحك جميل سيدتي
سأذهب لأعد الوجبة و أعود إن شاء الله

د. جمال مرسي
17-10-2006, 09:24 AM
السلام عليكم ورحمة الله وبركاته
مش هوصيك بقى يادكتور
عايزينك تاخد راحتك على الآخر
وأنا عارف إن إنت هتاخد راحتك
وهنفطر أجدع فطار
وهنقرا أجمل كلام
نشوف حضرتك على الفطار إن شاء الله

أخوك
عصام علم الدين

ما تخافش يا عصام يا خويا عليا
و المثل بيقول ما توصيش حريص
عشان كده ان شاء الله سأصنع لكم افطاراً مختلفا جدا جدا عما سبق تقديمه في المطبخ
هي محاولة
و بعدها ...
يا:h:
يا:ranting2: و :n:

ربنا يسترها

نهارك جميل

و كل سنه و انت طيب يا جميل

أحمد ناصر
17-10-2006, 09:47 AM
أستاذى الحبيب ومعلمى الفاضل د.جمال مرسى
أنا عايز حضرتك تكون فى غاية الطمأنينة وتاخد راحتك فى ا لمطبخ على الآخر
أنا عملت حسابى وقولت للمطافى تستعد
*109*
طبعا بأمزح مع أستاذى الجميل
وإن شاء الله الأكل يكون فى طعامة قصائدك الجميلة التى نشتهى قرائتها فنستمتع بعذوبتها وجمالها
:f:
*168*

د. جمال مرسي
17-10-2006, 09:49 AM
السلام عليكم ورحمة الله وبركاته
أبا رامي الحبيب
كل عام وأنت بألف خير
عايزين أكل بقى يعين الناس الحريصة على الاعتكاف الأيام دي وصلاة التهجد وقراءة القرآن الكريم (هههههههههههههه)
حضرتك عارف طبعا إن التهجد بيطول أوي وكمان الأوراد والأذكار .
وأهم شيء أن تدعو الله لمحبيك بالرحمة والمغفرة والعتق من النيران خلال أواخر أيام رمضان .
بارك الله لك ومنك وعليك
د. حسان الشناوي


أخي الحبيب د. حسان
كل سنه و انت طيب و أعاد الله علينا و عليكم رمضان أعواما و أعواما بالخير و البركة
و ربنا يتقبل من الجميع الصيام و القيام و قراءة القرآن .. قول آمين

عموما يا دكتور انا هعمل اللي في وسعي
انا استعنت بشيف نابغة من بلاد الواق الواق كما قلت لبوكي
ليعطيني أحدث طبخة و بصراحة الرجل ما تأخرش
طلع كل اللي عنده و اداني صنف جديد فعلا لم أره في المطبخ اليومي من قبل
إذا ما كانت الأكلة مضبوطة يبقى الحق عليا أنا و لازم أعوضها لكم في أحلى مطعم
أو أكبر فندق في القاهرة أو أي بلد عربي آخر .
عموما أنا هنا في السعودية معرفش غير الهوليداي إن ( يعني الأجازة في هههههههههههه )
سعدت بك

و شكرا لتشريفك افطاري الذي سيكون غريبا و فكاهيا

و تقبل مودتي و تقديري

د. جمال مرسي
17-10-2006, 09:56 AM
أستاذى الحبيب ومعلمى الفاضل د.جمال مرسى
أنا عايز حضرتك تكون فى غاية الطمأنينة وتاخد راحتك فى ا لمطبخ على الآخر
أنا عملت حسابى وقولت للمطافى تستعد
*109*
طبعا بأمزح مع أستاذى الجميل
وإن شاء الله الأكل يكون فى طعامة قصائدك الجميلة التى نشتهى قرائتها فنستمتع بعذوبتها وجمالها
:f:
*168*

و الله يا بو حميد أنا خايف نضطر بصحيح للمطافي
و خاصة ان الطبخة اللي هعملها فيها بصلة زرقا لازم تكون محروقة على آخرها
و ربنا يسترها

شكرا لك تشريفي و كل سنة و انت طيب أخي الحبيب أحمد

مودتي و تقديري

د. جمال مرسي
17-10-2006, 10:00 AM
و الآن



مع مطبخ أبو الأمراس



و ربنا يستر



من كلام الناس



نقص الشريط على بركة الله

د. جمال مرسي
17-10-2006, 10:51 AM
أهلا بكم على مائدة أبو الأمراس .. و اللي جت متأخرة
لكن الحمد لله كل تأخيرة و فيها خيرة على الأقل في الأيام اللي مضت تكونوا
جربتم كل أنواع الطعام التي قدمها لكم أصدقائي الشعراء من الأصناف التقليدية
أو المبتكرة من محاشي و لحوم و أسماك و دجاج بكافة الفنون المطبخية .
و على الأقل عشان أنا كمان تكون مائدتي متميزة

و بما انكم زهقتم من الأكل التقليدي فأنا اليوم سأقدم لكم أصناف لم و لن تسمعوا عنها أبدا
إلا على مائدة أبو الأمراس و ربنا يستر .


طبعا الفطور و كما تعودتم على ثلاثة مراحل

1-صحن الخشاف .. و ده أهم شيء عندي و هخلي أم رامي تجهزه لكم على السريع لأن أنا مش فاضي للأصناف التقليدية دي .

و عشان يبقى اسمكم فطرتم و الحمد لله لو ما عجبكمش الأكل الابتكاري اللي هعملوا ليكم
و أكون أنا أخدت الأجر بإذن الله

2-الطبق الرئيسي .. و سيكون مفاجأة بحق و مذهلة

3-الطبق الحلو .. و ده هيكون أكثر ذهلوله من الطبق الرئيسي



ــــــــــــــ


و الآن نفطر على بركة الله
و الفطار مكون من الخشاف المعمول من تمر المدينة المنورة مع القهوة العربي
و السمبوسه المحشوة باللحمة المفرومة .




ايه رأيكم بقى في الفطار اللذيذ و الجميل ده .
يللا بينا نقوم نصلي المغرب و نرجع عشان أوريكم الأصناف المبتكرة
اللي أكيد شوقتكم ليها .

أم أحمد
17-10-2006, 10:54 AM
و الآن



مع مطبخ أبو الأمراس



و ربنا يستر



من كلام الناس



نقص الشريط على بركة الله

بسم الله توكلنا علي الله
نقص الشريط يا استاذنا

http://www.spmlab.science.ru.nl/images/tip-knippen.gif

مستنين المفاجأة بقي اللي من بلاد الواق الواق ههههههه

في انتظار مطبخ ابو الامراس العامر بكل ما هو جديد وغريب

د. جمال مرسي
17-10-2006, 11:02 AM
شكرا لك يا أم أحمد قص الشريط
يبعني يا مسكينة انت أول واحدة هتاخدي الصدمة بتاعة أبو الأمراس
يللا بقى حظك كده
انت اللي قصيتي الشريط
نهاركم جميل
و صيامكم مقبول يا رب

د. جمال مرسي
17-10-2006, 11:13 AM
و الآن أحبائي الكرام
و بعد أن قامت أم أحمد بقص الشريط

أرحب بكم من جديد على مائدة أبو الأمراس
و الآن ندخل بقى على الشغل الجد يعني هندحل على الصحن الرئيسي ..
بس ادخلوا بايديكم و رجليكم و خافوا على أصابعكم أحسن تاكلوها ورا الأكله





الصحن الرئيسي :


المفاجأة

:

:

:

:

:

:

:

:

:

:

:

:

:

الصحن الرئيسي هو :

:

:

:

:

:

:

:

:

حشتبار العكاوي




طبعا اسم الطبخة زي ما هو واضح كده جديد نوفي وأكيد يشوق و من ريحتها هتشبعوا


تعالوا نشوف المقادير و الطريقة :


المقادير :

1- واحد كيلو عكاوي عجالي
2-ربع كيلو حشتبار هندي
3- مائة جرام رجل نفيش
4- حزمة من نبات البرنجليز
5- ربع كيلو منتوزه برازيلي
6- ملح قمراني و فلفل مستاكوفي
7- عدد اثنين كوب مياه معدنية ( و لازم تكون معدنية )
8- سمن للتحمير و بصلة زرقا


طريقة العمايل :

1- تبشر البصلة الزرقاء عن طريق مبشرة خماسية العيون ستانلستيل لا يصدأ ، ثم تحمر جيدا في السمن إلى أن يتم حرقها تماما و ريحتها تطلع .

2- تقطع رأس نبات البرنجليز شرائح شرائح أما الأوراق الخضراء فنخليها للآخر عشان نزين بيها الطيق .
ثم تقدح هذه الشرائح في السمن إلى أن يصفر لونها .. و لا تحرق كالبصلة الزرقاء في الخطوة السابقة .

4-نحضر الربع كيلو حشتبار هندي ( و لا تسألوني عنه بل اسألوا الهندي اللي ساكن جنبي منين ييجي ) و نذيبه في الكوبين مياه معدنية ذوباناً كاملا ثم نضيف عليه المائة جرام رجل نفيش فيكون المحلول لونه وردي مشبح بأزرق .. نخليه على جنب دلوقت .. أكيد هنعوزه .

5-نحضر العكاوي عكوه عكوه و نرصها في صينية فرن كبيرة بعد أن ندهن أسفل الصينية بالسمن عشان العكاوي ما تلزقش ، و نضيف عليها البصلة الزرقاء المحروقة سابقا .

6-نضيف شرائح نبات البرنجليز أعلى العكاوي و البصل المحروق

7-نأتي بعد ذلك بالمنتوزة البرازيلي و هي عبارة عن حبيبات بلورية بنية اللون و لها طعم لاذع قليلا و موطنها الأصلي البرازيل عشان كده سموها منتوزه برازيلي و نفركها جيدا بالملح القمراني و الفلفل المستاكوفي ثم نضيف عليها قليلا من الماء حتى تخف قليلاً .
و بعد ذلك نضيفها على العكاوي و شرائح البرنجليز و البصل المحروق في الصينية .

8-ندخل الصينية بمحتوياتها في فرن درجة حرارته 253 درجة مئوية و تتأكدوا من هذه الدرجة لأنه لو زادت عن كده أنا مش مسؤول

9-و بعد 3 ساعات بالتمام و الكمال تطلعو الصينية من الفرن و تضيفو عليها الحشتبار الهندي ( اللي قلنا أكيد هنعوزه )

10-نزوق الصينية الجميلة دي بأوراق نبات البرنجليز ، طبعا كل واحد و ذوقه في التزويق






11-ايه رأيكم بقى ؟ يللا بينا نروح على المطعم اللي في فندق الهوليداي إن
انا عازمكم على بوفيه مفتوح هناك عشان عارف ان حشتبار العكاوي ما عجبكش حد
و ده شيء طبيعي جدا لأنه صنف جديد .
لكن لما تتعودوا عليه هتقولوا و لا هوليداي ان و لا ريجنسي بالااااااااس
دا مفيش غير الشيف ابو الأمراس .


و بالهنا و الشفا إلى أن ألقاكم مع صحن الحلويات

محبكم .. أبو الأمراس:h: :h:

boukybouky
17-10-2006, 01:15 PM
هو حشبتار العكاوي ده أصلاً صنف موجود و قائم بذاته يعني !!!

هو علي آخر الصيام بيكون صعب علينا هضم الأكلات ديه :d

طيب بص بقي يا دكتور انا هكتفي بالخشاف و استني الحلو

و عندي حسن ظن ان شاء الله يكون الحلو مختلف :)

دمت بكل خير

في رعاية الله ،،

لميس الامام
17-10-2006, 01:20 PM
د
دكتور جمال الوووووووووووو يا (ابو الامراس)
معكم في المطبخ الرمضاني (أم الامراس) الوووووووووووووو حوَّل!!!:@

ايه يا ابو الامراس ده كله ؟؟؟داخلة انا وكلي حماس .لاني بصراحة لسه جاية من الشغل وماكنش فيه فرصة اطلع على المينيو (القائمة اللي بنتظرها بقالي فترة) والوقت ضيق زي ما حضرتك عارف فدخلت على الجهاز مباشرة ألف وادور بين السطور ولسه مش لاقية غير الخشاف والقهوة العربي..الله اما ل فين الطبق الرئيسي اكيد ابو الامراس ناوي يعملها فعلا مفاجأة الشهر...ههههه لا ...بس لما صُبرت والصّبْر طيب !! لقيت بل قل ذهلت من مفاجأة الطبخة وقوانينها الخنفشارية ..قال ايه بصلة زرقا وقال ايه حزمة برنجليز لالالالا وقال ايه كمان منزورة برازيلي على ملح قمراني (كمراني يا دكتور اسمه كده \ وهو الوحيد اللي فهمته هو ملح يشبه الملح الرشيدي ولكن لونه بنفسجي مذاقه يشبه الحمض لمون) على فلفل مستاكوفي... ولا كأننا بنحضر نعمل عمل ازرق ههههههههه
توكلت على الله ورحت المطبخ ..وطبختها بتصرف (اسفة لكن ما كنش في اليد حيلة)
بس عارف يا ابو الامراس عملتها صدقني وطلعت عجب استعضت عن المنزورة البرازيلي بالشبت والبصلة الزرقاء ببصلة بيضاء قلت شكلها يدي شوية نعنشة للاكلة .. اما الفلفل المستاكوفي فطلع ايه مشطشط خالص وغريب قوي لكن الحشتبار الهندي بقى مافيش ... انسى الموضوع دورت عليه بسراج وفتيلة ولم اجده قلت نمشيها بدونه ..ولو انه شخصية الطبق اتغيرت لا نها اساسا معتمدة على الحشتبار الهندي..

عاوز الحقيقة يا عزيزي ابو الامراس؟ هي اكله عاوزلها قصيدة غزل من نوع تاني وانا متوقعة حد من شعرائنا الكبار ينظم لك قصيدة عامية جدعة تتغزل بهذا الحشتبار العكاوي ......... تسلم ايديك يا دكتور والله تعبناك بس اكيد حاتعجب المعازيم كلهم..
(وربنا يكون في عونكم يا جماعة:@ :clown: :elvis: :helpsmilie2: )

كل سنة وحضرتك طيب يا دكتور ,,وربنا ما يبدلك بنفسج ابدا ..ويديك الصحة والعافية وتأكلنا من ايديك اي حشتبار هندي ولا صيني ولا حتى برازيلى راضيين بيه..

شكر وتقدير خاص للاخوات الفاضلات ام احمد وبوكي بوكي على هذا المجهود الجبار..وكل عام وحضراتكم بخير واللهم يتقبل من الجميع صيامهم وقيامهم وقرآنهم..ويجعلنا جميعا من عتقاء النار..آمين
لميس الامام

أم أحمد
17-10-2006, 01:35 PM
شكرا لك يا أم أحمد قص الشريط
يبعني يا مسكينة انت أول واحدة هتاخدي الصدمة بتاعة أبو الأمراس
يللا بقى حظك كده
انت اللي قصيتي الشريط
نهاركم جميل
و صيامكم مقبول يا رب
العفو يا دكتور جمال علي ايه بس
دي حاجة بسيطة
وربنا يستر وما يحصلش اي حوادث في الارواح البشرية
واكون انا اول ضحية

صباح الحكيم
17-10-2006, 04:49 PM
السلام عليكم و رحمة الله وبركاته

ما ألذكم و ما أروعكم
تكفيني طبقات أنفاسكم العذبة
شربت وارتويت
أتابع مطبخكم الجميل وأتذوق طعم حروفكم الشهية
دمتم بكل حب أحبتي
محبتي لكم جميعا
و الشكر الجزيل لصاحبة الفكرة الجميلة ام احمد و الزميلة بوكي بوكي
طبعا لا أنسى عزيزنا الدكتور جمال مرسي و أطباقه الشهية
تحيتي و امتناني

تقبل الله أعمالكم وصيامكم
أعاده الله عليكم وعلينا باليمن والخير والبركات

أم أحمد
17-10-2006, 05:20 PM
و الآن أحبائي الكرام
و بعد أن قامت أم أحمد بقص الشريط

أرحب بكم من جديد على مائدة أبو الأمراس
و الآن ندخل بقى على الشغل الجد يعني هندحل على الصحن الرئيسي ..
بس ادخلوا بايديكم و رجليكم و خافوا على أصابعكم أحسن تاكلوها ورا الأكله





الصحن الرئيسي :


المفاجأة

:

:

:

:

:

:

:

:

:

:

:

:

:

الصحن الرئيسي هو :

:

:

:

:

:

:

:

:

حشتبار العكاوي




طبعا اسم الطبخة زي ما هو واضح كده جديد نوفي وأكيد يشوق و من ريحتها هتشبعوا


تعالوا نشوف المقادير و الطريقة :


المقادير :

1- واحد كيلو عكاوي عجالي
2-ربع كيلو حشتبار هندي
3- مائة جرام رجل نفيش
4- حزمة من نبات البرنجليز
5- ربع كيلو منتوزه برازيلي
6- ملح قمراني و فلفل مستاكوفي
7- عدد اثنين كوب مياه معدنية ( و لازم تكون معدنية )
8- سمن للتحمير و بصلة زرقا


طريقة العمايل :

1- تبشر البصلة الزرقاء عن طريق مبشرة خماسية العيون ستانلستيل لا يصدأ ، ثم تحمر جيدا في السمن إلى أن يتم حرقها تماما و ريحتها تطلع .

2- تقطع رأس نبات البرنجليز شرائح شرائح أما الأوراق الخضراء فنخليها للآخر عشان نزين بيها الطيق .
ثم تقدح هذه الشرائح في السمن إلى أن يصفر لونها .. و لا تحرق كالبصلة الزرقاء في الخطوة السابقة .

4-نحضر الربع كيلو حشتبار هندي ( و لا تسألوني عنه بل اسألوا الهندي اللي ساكن جنبي منين ييجي ) و نذيبه في الكوبين مياه معدنية ذوباناً كاملا ثم نضيف عليه المائة جرام رجل نفيش فيكون المحلول لونه وردي مشبح بأزرق .. نخليه على جنب دلوقت .. أكيد هنعوزه .

5-نحضر العكاوي عكوه عكوه و نرصها في صينية فرن كبيرة بعد أن ندهن أسفل الصينية بالسمن عشان العكاوي ما تلزقش ، و نضيف عليها البصلة الزرقاء المحروقة سابقا .

6-نضيف شرائح نبات البرنجليز أعلى العكاوي و البصل المحروق

7-نأتي بعد ذلك بالمنتوزة البرازيلي و هي عبارة عن حبيبات بلورية بنية اللون و لها طعم لاذع قليلا و موطنها الأصلي البرازيل عشان كده سموها منتوزه برازيلي و نفركها جيدا بالملح القمراني و الفلفل المستاكوفي ثم نضيف عليها قليلا من الماء حتى تخف قليلاً .
و بعد ذلك نضيفها على العكاوي و شرائح البرنجليز و البصل المحروق في الصينية .

8-ندخل الصينية بمحتوياتها في فرن درجة حرارته 253 درجة مئوية و تتأكدوا من هذه الدرجة لأنه لو زادت عن كده أنا مش مسؤول

9-و بعد 3 ساعات بالتمام و الكمال تطلعو الصينية من الفرن و تضيفو عليها الحشتبار الهندي ( اللي قلنا أكيد هنعوزه )

10-نزوق الصينية الجميلة دي بأوراق نبات البرنجليز ، طبعا كل واحد و ذوقه في التزويق






11-ايه رأيكم بقى ؟ يللا بينا نروح على المطعم اللي في فندق الهوليداي إن
انا عازمكم على بوفيه مفتوح هناك عشان عارف ان حشتبار العكاوي ما عجبكش حد
و ده شيء طبيعي جدا لأنه صنف جديد .
لكن لما تتعودوا عليه هتقولوا و لا هوليداي ان و لا ريجنسي بالااااااااس
دا مفيش غير الشيف ابو الأمراس .


و بالهنا و الشفا إلى أن ألقاكم مع صحن الحلويات

محبكم .. أبو الأمراس:h: :h:




حشتبار العكاوي :nooo:
بتقولوا ايه:'(
اسم الاكلة ايه النهاردة :gp:
هو انا شايفة صح ولا ايه :shock2:
لا مش ممكن اكيد شكلي لسه صايم
اه صح لسه بدري علي الافطار
يبقي اكيد عيني مزغللة شوية :blink:
هو مين الاخ حشتبار العكاوي ده
بيعمل هنا ايه *4*

مش عارفة ليه افتكرت اغنية غلطة ندمان عليها هههههههه
مين قالي بس يا ربي ااقص الشريط *7* وابقي في وش المدفع كده
كده افتح عيني الاقي حشتبار ومش حشتبار عادي لاد ده حبشتار العكاوي كمان :d


دكتور جمال انا موافقة علي العزومة في هوليداي ان والله ما انت حالف
خلاص انا موافقة واكيد الكل هيوافقني :d

ما هو مش معقول بعد الصيام 14 ساعة افطر علي حبشتار هههههههههه


اسعد الله ايامك دكتور جمال كما ادخلت البسمة علي قلوبنا
واتمني الحلو يبقي مفاجأة حلوة بس اوعي يطلع بقي شحتار ولا شيمرار لان الاكل بتاع الواق واق ده مش جاي علي هوانا الله يكرمك يا رب
انا هاجي تاني اشوف الحلو وربنا يستر :d
لك مني اعطر التحية وخالص التقدير

ليلة عشق
17-10-2006, 06:35 PM
الأستاذ الفاضل د جمال مرسي

بصراحة تسلم ايدك علي الأكلة الي مش فاهمة منها حاجة ......
بس اكيد هتكون بتجنن ( من جهة تجنن خلاص اتجننا والي كان كان ) ......
وعن نفسي أنا هروح مع صديقتي أم أحمد علي الهوليداي إن .....
وننتظر باقي الأعضاء هناك .....
برضة يادكتور الي نعرفة أحسن من الي مانعرفة ......
يعني نضمن الفطار ونستني الحلو من أناملك الذهبية ......
كل عام وأنت بخير أعاد الله عليك رمضان كل عام بالخير واليمن والبركات .....

تحياتي
ليلة عشق

د. جمال مرسي
17-10-2006, 08:31 PM
هو حشبتار العكاوي ده أصلاً صنف موجود و قائم بذاته يعني !!!

هو علي آخر الصيام بيكون صعب علينا هضم الأكلات ديه :d

طيب بص بقي يا دكتور انا هكتفي بالخشاف و استني الحلو

و عندي حسن ظن ان شاء الله يكون الحلو مختلف :)

دمت بكل خير

في رعاية الله ،،

أختي الكريمة بوكي

أنا بصراحة لقيتكم عايشين في الدور بصحيح و نازلين طبخ في طبخ
فقلت يجب أن أغير الروتين اليومي
فأخذت مشورة هذا الشيف الآتي من بلاد الواق الواق
و هو اللي شار عليا بالصنف ده
هو على أي حال صنف موجود في بلادهم
و مشهور جدا هناك
عموما الحمد لله أن أضفيت البسمة على شفاهكم
كل عام و أنت بخير
و الحلو جاي في الطريق

د. جمال مرسي
17-10-2006, 08:47 PM
د
دكتور جمال الوووووووووووو يا (ابو الامراس)
معكم في المطبخ الرمضاني (أم الامراس) الوووووووووووووو حوَّل!!!:@

ايه يا ابو الامراس ده كله ؟؟؟داخلة انا وكلي حماس .لاني بصراحة لسه جاية من الشغل وماكنش فيه فرصة اطلع على المينيو (القائمة اللي بنتظرها بقالي فترة) والوقت ضيق زي ما حضرتك عارف فدخلت على الجهاز مباشرة ألف وادور بين السطور ولسه مش لاقية غير الخشاف والقهوة العربي..الله اما ل فين الطبق الرئيسي اكيد ابو الامراس ناوي يعملها فعلا مفاجأة الشهر...ههههه لا ...بس لما صُبرت والصّبْر طيب !! لقيت بل قل ذهلت من مفاجأة الطبخة وقوانينها الخنفشارية ..قال ايه بصلة زرقا وقال ايه حزمة برنجليز لالالالا وقال ايه كمان منزورة برازيلي على ملح قمراني (كمراني يا دكتور اسمه كده \ وهو الوحيد اللي فهمته هو ملح يشبه الملح الرشيدي ولكن لونه بنفسجي مذاقه يشبه الحمض لمون) على فلفل مستاكوفي... ولا كأننا بنحضر نعمل عمل ازرق ههههههههه
توكلت على الله ورحت المطبخ ..وطبختها بتصرف (اسفة لكن ما كنش في اليد حيلة)
بس عارف يا ابو الامراس عملتها صدقني وطلعت عجب استعضت عن المنزورة البرازيلي بالشبت والبصلة الزرقاء ببصلة بيضاء قلت شكلها يدي شوية نعنشة للاكلة .. اما الفلفل المستاكوفي فطلع ايه مشطشط خالص وغريب قوي لكن الحشتبار الهندي بقى مافيش ... انسى الموضوع دورت عليه بسراج وفتيلة ولم اجده قلت نمشيها بدونه ..ولو انه شخصية الطبق اتغيرت لا نها اساسا معتمدة على الحشتبار الهندي..

عاوز الحقيقة يا عزيزي ابو الامراس؟ هي اكله عاوزلها قصيدة غزل من نوع تاني وانا متوقعة حد من شعرائنا الكبار ينظم لك قصيدة عامية جدعة تتغزل بهذا الحشتبار العكاوي ......... تسلم ايديك يا دكتور والله تعبناك بس اكيد حاتعجب المعازيم كلهم..
(وربنا يكون في عونكم يا جماعة:@ :clown: :elvis: :helpsmilie2: )

كل سنة وحضرتك طيب يا دكتور ,,وربنا ما يبدلك بنفسج ابدا ..ويديك الصحة والعافية وتأكلنا من ايديك اي حشتبار هندي ولا صيني ولا حتى برازيلى راضيين بيه..

شكر وتقدير خاص للاخوات الفاضلات ام احمد وبوكي بوكي على هذا المجهود الجبار..وكل عام وحضراتكم بخير واللهم يتقبل من الجميع صيامهم وقيامهم وقرآنهم..ويجعلنا جميعا من عتقاء النار..آمين
لميس الامام

أهم حاجة يا أستاذة لميس أيه كان ردة الفعل بعد ما صنعتيها
هي واحد من اتنين
يا إما دعيتي لي أو دعيتي عليّ
أما القصيدة .. فأنا هحاول يمكن يكون على السحور
شكرا لمرورك الكريم أستاذة لميس
و أتمنى أن أكون أضفيت البسمة على شفايك
تقبلي مودتي و تقديري
د. جمال

د. جمال مرسي
17-10-2006, 08:53 PM
العفو يا دكتور جمال علي ايه بس
دي حاجة بسيطة
وربنا يستر وما يحصلش اي حوادث في الارواح البشرية
واكون انا اول ضحية


ميرسي أوي يا أم أحمد على قصك الشريط
لكن انت شوفتي النتيجة أهو
طلعت الأكلة في الآخر حشتبار
و مش أي حشتبار
عموما عزومة الهوليداي إن لا زالت قائمة
و الحلو انتظروه على السحور
ربما يكون أجمل القصائد في حب مصر

تحياتي و تقديري

و شكرا لك أنت و الأخت بوكي هذه الحلقات الرائعة

د. جمال مرسي
17-10-2006, 08:59 PM
السلام عليكم و رحمة الله وبركاته

ما ألذكم و ما أروعكم
تكفيني طبقات أنفاسكم العذبة
شربت وارتويت
أتابع مطبخكم الجميل وأتذوق طعم حروفكم الشهية
دمتم بكل حب أحبتي
محبتي لكم جميعا
و الشكر الجزيل لصاحبة الفكرة الجميلة ام احمد و الزميلة بوكي بوكي
طبعا لا أنسى عزيزنا الدكتور جمال مرسي و أطباقه الشهية
تحيتي و امتناني

تقبل الله أعمالكم وصيامكم
أعاده الله عليكم وعلينا باليمن والخير والبركات





الأخت الغالية صباح الحكيم

أسعدني كثيرا تشريفك لمطبخ أبو الأمراسي

و أتمنى أن أكون أضفيت البسمة على شفتيك و البهجة على قلبك

طبعا أكيد لازم تكون أنفاسنا عذبه في الأكل

عشان الشيف أبو الأمراس مش أي شيف

دا اتعلم الشفشنه في بلاد الواق الواق

لسه على ما تتعودوا على أكلات الواق واق و الشيف أبو الأمراس ستحبونها كثيرا

سلمتِ و سلم تشريفك و قدومك الجميل يا ابنة الرافدين

يا ابنة البلد الذي أحببناه و أحببنا شعبه بكل قلبنا و عقلنا

و ندعو الله له كل أوان

تقبلي ودي الخالص

و أعطر التحايا

د. جمال

د. جمال مرسي
17-10-2006, 09:06 PM
الأستاذ الفاضل د جمال مرسي

بصراحة تسلم ايدك علي الأكلة الي مش فاهمة منها حاجة ......
بس اكيد هتكون بتجنن ( من جهة تجنن خلاص اتجننا والي كان كان ) ......
وعن نفسي أنا هروح مع صديقتي أم أحمد علي الهوليداي إن .....
وننتظر باقي الأعضاء هناك .....
برضة يادكتور الي نعرفة أحسن من الي مانعرفة ......
يعني نضمن الفطار ونستني الحلو من أناملك الذهبية ......
كل عام وأنت بخير أعاد الله عليك رمضان كل عام بالخير واليمن والبركات .....

تحياتي
ليلة عشق

أختي الكريمة ليلة عشق
انا لقيت الجماعة واخدين الموضوع جد في جد
فقلت لازم أغير بشيء يضفي البهجة
و أتمنى أن أكون رسمتها على الشفاه
تقبل الله منا و منكم الصيام
و انتظري الحلو ان شاء الله
مودتي و تقديري

amal3
17-10-2006, 09:25 PM
أخى العزيز الدكتور جمال مرسى

بداية انت صعبااااااااااان عليا أوى

من ناحية الأعضاء كلهم خلاص هيخافو بعد كدا يسلمو معدتهم لأى حد

ومن ناحية تانية لأنك يعينى مضطر تقوم بالأكل لوحدك لأنهم كلهم سيبينك وريحين الهوليداى

إن وبصراحة يادكتور أنا كمان مضطرة أروح معاهم

بس عيزا أهمس فى أذنك وأقول لك متخفش أحنا ممكن نعمل مائدة رحمـــــــن على الأكلة دى

وساعتها بس هتتمسح ويدعولك ومش بعيد تتحول من شاعر لشيف


أستاذى العزيز

تسلم أيدك على أى حاجة تقدمها لينا ويسلم لسانك وقلبك وقلمك على كل كلمة تخرج من فمك

لأنك تمتاز بالحنان والوفاء ولا أعتقد أن رد الوفاء سيكون غير الوفاء

فكما تمتعنا بقصائدك وأشعارك تمتعنا بالبسمة والترويح عن النفس التى أثقلتها هموم الدنيا

فيالك من رائع

أحسنت ياأخى العزيز وهذه الصفات الجميلة التى توجد فيك ستشفع لك دخولك المطبخ اليوم

ومين عالم يمكن نجاذف عشان خطرك وناكل من الأكل وأمرنا لله

أهلا بيك فى مطبخ وموائد رمضان

أعاده الله علينا وعلى الأمة الأسلامية كلها بالخير واليمن والبركات

ولكم منى جميهعا تهنئة مباركة بعيد الفطر المبارك

وأتمنى أن نجتمع كلنا فى رمضان القادم على خير ولاينقص منا أحد

كل عام وانت بخير

أختك آمال مصطفى

د. جمال مرسي
17-10-2006, 09:29 PM
قالوا الحبايب كلهم جايين يا بو الأمراس
علشان يدوقوا طبختك
من كافة الأجناس
اوعك تخيّب ظنهم و تكون بدون إحساس
و يكون طبيخك حشتبار
يحرق قلوب الناس .
***
فكرت أعمل ايه من أجمل الحلوى
علشان أصلح بيه
الحشتبار بلوى
قلت الفطير جايز .. هيحل مشكلتي
اهو صنف مش عاوز
غير سهرتي ف. ليلتي
لكن رجعت أخاف
ليصير زعل تاني
من يوم ما كلت فطير رائع حدا خالتي


و أقول لكم على قصة الفطير لأني فكرت يكون الحلو فطير بالسكر

شوفو القصة الأول :

سأحكي لكم عن حكايتي مع فطيرة خالتي
فلقد ذهبت ذات مرة عند خالتي في الريف
و جميع أهل الريف المصري يتميزون بصنع الفطير المشلتت و ما أدراك ما المشلتت !!.
و الذي يؤكل غالبا مع الجبن و المش ( أكيد عارفينه ) و العسل النحل أو الدبس ( العسل الأسود )
مخلوطاً مع الطحينة

أكيد شوقتكم

المهم .. في ذلك اليوم كنت جوعانا جداً فطلبت من خالتي أن تصنع لي الفطيرالذي أحبه .
فلم تتأخر و قامت على الفور فصنعت أحلى فطيرتين
أكلت نصف واحدة و كم كانت جميلة و دسمة و لذيذة مع العسل الأبيض و الجبن و المش .
أكلت حتى شبعت و لكن أجاركم الله على ما حصل بعدها .

المهم ندخل على المفيد :



أنا .. و فطيرة خالتي


و رُبَّ فطـيـرةٍ نـزلــتْ ببـطـنـي
كمثـل الشهـد بــل أزكــى كثـيـرا

تـربَّـعَ جَنبـهـا جـبـنٌ و مِـــشٌ
و دبـسٌ مـا رأيــتُ لــهُ نظـيـرا

و قــــامـــــتْ خالتي فسقتهُ سمناً
و لم تنسَ الفلافلَ و العصيرا

و قالـت : كُـلْ بُنَـيَّ فِـداكَ عُـمـري
ألسـتَ تــرى المُشلـتـتَ مستـديـرا

أكلـتُ و لـم أقـاومْ ضعـفَ نفـسـي
أمــام فطـيـرةٍ فـاحـتْ عـبـيـرا

و بعـد هنيهـةٍ يــا ويــحَ كـرشـي
سمعـتُ لمعدتـي الـمـلأى صفـيـرا

ففـرقـعـةً فـقـرقـعـةً فـطـبــلاً
فـإعـيـاءاً فقـيـئـاً فـالـسـريـرا

حلـفـتُ بُعـيـدَهـا إن عـشــتُ ألا
أذوقَ لخـالـتـي أبـــداً فـطـيـرا



و كان هذا من مواقفي الطريفة مع الفطير
و بالفعل لم أذق بعدها فطير خالتي لأنها كانت قد توفت رحمها الله
و كلما تذكرت هذا الموقف ضحكت من القلب و كانت الأبيات التي كتبتها عاليه .
فمن شاء بعدها أن يأكل فليفعل و هو الجاني على نفسه .

فهل لا زال لكم رغبة أن يكون الخلو فطير بالسكر و العسل ؟

لا أظن

يبقى نفكر في حلو تاني

انتظروني

لميس الامام
17-10-2006, 09:39 PM
وهكذا ادرك شهريار السحور وابى الا ان يبوح..
بفطيرة خالته ويالها من فطيرة
ذكرها وصل الى ارض الجزيرة
حاولت التذوق بيد اني
نسيت ان ادعو اهلي والعشيرة
هل تراني عملت عملة..
ام انني انقذت منها اخي احمد واختي سميرة....؟؟؟؟؟؟؟؟؟

والله ختامها مسك يا دكتور تسلم ايديك على ابيات القصيدة نسيتنا حشتار العكاوي وهكذا تم السماح من اهل الملاح...

كل الود والتقدير والاحترام لابو الامراس

لميس الامام

د. جمال مرسي
17-10-2006, 09:51 PM
أخى العزيز الدكتور جمال مرسى

بداية انت صعبااااااااااان عليا أوى

من ناحية الأعضاء كلهم خلاص هيخافو بعد كدا يسلمو معدتهم لأى حد

ومن ناحية تانية لأنك يعينى مضطر تقوم بالأكل لوحدك لأنهم كلهم سيبينك وريحين الهوليداى

إن وبصراحة يادكتور أنا كمان مضطرة أروح معاهم

بس عيزا أهمس فى أذنك وأقول لك متخفش أحنا ممكن نعمل مائدة رحمـــــــن على الأكلة دى

وساعتها بس هتتمسح ويدعولك ومش بعيد تتحول من شاعر لشيف


أستاذى العزيز

تسلم أيدك على أى حاجة تقدمها لينا ويسلم لسانك وقلبك وقلمك على كل كلمة تخرج من فمك

لأنك تمتاز بالحنان والوفاء ولا أعتقد أن رد الوفاء سيكون غير الوفاء

فكما تمتعنا بقصائدك وأشعارك تمتعنا بالبسمة والترويح عن النفس التى أثقلتها هموم الدنيا

فيالك من رائع

أحسنت ياأخى العزيز وهذه الصفات الجميلة التى توجد فيك ستشفع لك دخولك المطبخ اليوم

ومين عالم يمكن نجاذف عشان خطرك وناكل من الأكل وأمرنا لله

أهلا بيك فى مطبخ وموائد رمضان

أعاده الله علينا وعلى الأمة الأسلامية كلها بالخير واليمن والبركات

ولكم منى جميهعا تهنئة مباركة بعيد الفطر المبارك

وأتمنى أن نجتمع كلنا فى رمضان القادم على خير ولاينقص منا أحد

كل عام وانت بخير

أختك آمال مصطفى


الله يسعد قلبك يا آمال يا ختي

بصراحة انت خففتِ عني كتير من هول الصدمة

عموما انا هستدعي شيف الواق الواق و أقدمه لمحاكمة عاجلة في محكمة أبناء مصر

هو صاحب الشورة المنيلة بتاعت الحشتبار ده

و بالتالي هيكلفني عزومة كبيرة في الهوليداي إن

عموما .. انا قدها و قدود ان شاء الله

و يا رب تجمعني بكم يا أحبابي في منتدى مصر مائدة حقيقية

شكرا لتشريفك أختي الفاضلة

و كل عام و أنت و الأسرة بخير

يحيى زكريا
17-10-2006, 09:55 PM
استاذى ابو الامراس...

الحمدلله لا اكلنا ولا شربنا وذنبى انا والعيال والمدام فى رقبتك الى يوم القيامه وخصوصا المدام

اللى قعدت تبكت فيا وتقوللى ادى صحابك اللى ضيعنا مصروف سنتين على عزايمهم فى الفطار

والسحور وياريت طمر الا فى الاخر صاحبك جايب لنا حبشتكه ولا فزلكه قلت لها ياوليه يا

جاهله ده اسمه حشتبار اخو خندكار ابن الملك الزرزار اللى كان ساكن فى الخازندار وعديك يا

ابو الامراس اصل المدام عندى عليها زن وخصوصا لما تمسك فرصه عليا وعلى صحابى

وقعدت تبكتنى وتقوللى رجل نفيش طب ياخويا ماكان صاحبك قال لنا اكل مفيش بدال ما يحيرنا

برجل النفيش بتاعته دى الا هى يا خويا رِجْلْ ولا رَاجل نفيش يعنى راجل ماشى نافش ريشه

يقال له رجل نفيش ياللا بقى دانت خلليتنا نرطن باللاوندى مش بالعربى والمدام ماتت على روحها

من الضحك ودموعها نزلت وهى بتقوللى وايه بقى نبات البرنجليز حنجيبه من بلاد الانجليز يا

زوجى العزيز وانا قاعد كاتم غيظى وحطرشق منها بس اعمل ايه مانا مش قادر اتكلم وقعدت

تقوللى وهل نبات البرنجليز يشبه للعسجد او الابريز وايه يا خويا المنتوزه البرازيلى طب ما كان

صاحبك شال النقطه اللى تاعبانا دى وخلاها المنتوره واهو حنعرف انها اتنترت من البرازيل

وراحت حتة تانيه على ما تخلص الانتخابات بتاعت لولا دى سيلفا بصيت لها بغيظ وقلت لها

خلاص السياسه اخدت حدها معاكى بقيتى تعرفى لولا دى سيلفا قالت لى والنبى عارفاهم عيله

دى سيلفا كانوا ساكنين ورانا فى درب الجماميز فنظرت اليها وانا مخنوق من الغيظ ولكنى سكت

واثرت الصمت لقيتها راحت قايلالى هى لولا بنت سى سيلفا حاصل لها ايه فى البرازيل قلت لها

اصل ابو الامراس بعت لها شويه حشتبار هندى والمخابرات البرازيليه اكتشفت الموضوع وقبضوا

على ست لولا بتاعتك قالت طب وصاحبك ابو الامراس ليه يبعت لها ويبهدل ولاد الناس قلت لها

يا ستى ارحمينى خللينى اشوف حفطركم ايه راحت قايلالى ابقى فطرنا يا خويا عيش وملح

قمرانى من بتاع صاحبك ال قمرانى ال طب ماكان خلاه قمرين زى عمرو دياب ولقيت الوليه

اتهبلت وقعدت ترقص هى والعيال ويغنوا قمرين دول ولا عينيك قلبى بيسالنى عليك وانا قاعد

كاتم همى فى قلبى وساكت وفجاه راحت ساكته وقالت لى وايه حكاية البصله الزرقا دى كمان

يكونش قصده نحط بصله زرقا على صدرنا تحمينا من العين ومنين نجيبها الزرقا دى احنا نعرف

بصل اخضر وبصل احمر انما البصل الازرق حنجيبه منين بصيت لها بغضب وقلت لها موجود فى

بلد اسمها الزرقا قبل دمياط بشويه بيتزرع هناك اهو ناجر بيجو نروح نجيب 5 روس من هناك

ليا وليكى والعيال وقعدت يابو الامراس يا خويا تبكت فيا وانا مش قادر اتنفس واخدنا الكلام

ونسينا اننا مش عاملين فطار لاننا كنا متكلين على ابو الامراس والمغرب ادنت والعيال قعدت

تعيط عاوزين ناكل يا بابا والله يا ابو الامراس كان منظرهم يقطع القلب واخدتهم ونزلت لقيت

كل موائد الرحمن شطبت والمحلات قافله واديهم عمالين يعيطوا وامهم تخلليهم يعيطوا اكتر

عشان تعذبنى والعيال قعدوا عملوها مناحه فى الشارع وبقوا ماشيين ينوحوا ورايا..

ليه يا بابا ليه..

صدقت ابو الامراس...

طب اهو يا سعاده البيه..

خلاك قاعد محتاس...

ولقيت عيال المنطقه كلها والمناطق اللى جنبنا اللى نزلوا يلعبوا بالفوانيس اتلموا مع عيالى

وبقت مظاهره ولا مظاهرات ثورة 19 والكل بقى يهتف ويجرس فيا

ليه يا يحيى ليه ...

صدقت ابو الامراس...

طب اهو يا سعادة البيه...

خلاك قاعد محتاس...

والنبى يا خويا ابوالامراس اعمل اى حركه كده ولا تعالى ابعد العيال دول عنى ينوبك ثواب...

د. جمال مرسي
17-10-2006, 10:10 PM
وهكذا ادرك شهريار السحور وابى الا ان يبوح..
بفطيرة خالته ويالها من فطيرة
ذكرها وصل الى ارض الجزيرة
حاولت التذوق بيد اني
نسيت ان ادعو اهلي والعشيرة
هل تراني عملت عملة..
ام انني انقذت منها اخي احمد واختي سميرة....؟؟؟؟؟؟؟؟؟

والله ختامها مسك يا دكتور تسلم ايديك على ابيات القصيدة نسيتنا حشتار العكاوي وهكذا تم السماح من اهل الملاح...

كل الود والتقدير والاحترام لابو الامراس

لميس الامام


الأستاذة لميس

أهلا بتشريفك مرة تانية

عموما كونك تشرفي تاني يبقى أكيد عجبك الحشتبار اللي في الفرن ده

و بعدين انا شايفك بتتكلمي بالشعر انهاردة

و الله يا لميس كل ما أفتكر قصة الفطيرة دي أموت من الضحك

انها ذكريات جميلة

و المطبخ ذكرني بها

شكرا لوجودك من جديد استاذتي الغالية

و لك خالص مودتي و تقديري

جمال

د. جمال مرسي
17-10-2006, 10:27 PM
أيها الأحباب

السلام عليكم و رحمة الله

أما و قد أوشك اليوم على الانتهاء و دخلنا على وقت السحور

و قد سعد بكم بحق على مدار هذا اليوم في مطبخكم الجميل

فاسمحوا لي أن يكون السحور قصيدتين في حب مصر الغالية

الأولى عامية و الثانية فصحى

كل عام و أنتم بخير

و سعادتي بكم كانت بالغة

سامحوني على التقصير و أني طولت عليكم

كل عام و أنتم جميعا بخير

و نلتقي معكم في مطبخ العام القادم ان شاء الله


القصيدة الأولى :




الله عليكِ يا مصر




الله عليكِ يا مصر

و الكل بيحبك

و الكل يا أمنا

شايلاه هنا ف. قلبك

و الكل مهما بعد أو حتى يتغرب

لازم يجيلو اليوم

يقعد هنا جنبك

***

في ظل شجرة توت

أو حضن جميزه

كان المزاج مبسوط

من طنطا للجيزه

نقعد كدا شله

نحكي نوادرنا

و تسيل دموع العين

م. الفرحه و اللمه

نفتح قلوبنا لمين

غير ليكي يا طاهره

تاخدينا بالأحضان

و ننام كدا ف. حضنك


***

يا مصر عمرك يوم

ما كنتي يوم قاسية

اصلك رضعتي النيل

و على الضفاف راسيه

نخله و هرم و بيوت

يتحدوا نصل الموت

أما العدو الغدار

ينهار أمام شعبك


***

يا غاليه يا طاهره

عايشين بأنفاسك

عايشين هناك بره

حاسّين بإحساسك

و نقول بعلو الصوت

و الفخر مصريين

كاسبين جمال الروح

و الخفه من طبعك

و اللي شرب م. النيل

لازم هيرجعلك


و القصيدة التانية أهديها من غربتي للغالية مصر




أَرسَلْتُ رُوحِي بِمَا يَجرِي بِهِ قَلَمِي=تَحُومُ يا مِصرُ فَوْقَ النِّيلِ و الهَرَمِ
تُعانِقُ الرَّملَ في "سَيْناءَ" ، تَلثُمُهُ=و تَحضِنُ النَّخلَ رمزَ الطُّهرِ و الشَّمَمِ
و تَعزِفُ اللَّحنَ في "بلطيمَ"،تَسمَعُهُ="طابا" ،فَتَغرَقُ "شَرمُ الشَّيْخِ" في النَّغَمِ
لَمَّا تَرَكتُ رُبوعَ الأهلِ في وَطَنِي=تَخَاصَمَ الجَفنُ و الرُّؤيا ، فَلَم يَنَمِ
كَأَنَّما في نُجُومِ اللَّيلِ قَد رُبِطَتْ=أهدَابُهُ بِحِبالِ الشَّوْقِ و الأَلَمِ
مِصرُ التي سَكَنَتْ فِي خَافِقِي أَبَداً=مهما تَغَرَّبَ جِسمِي أَو نَأَت قَدَمِي
أعودُ للأمسِ في أفياءِ جَنَّتِها=فأنهَلُ الحُبَّ مِن سَلسالِها الشَّبِمِ
و أَسمَعُ الهَمسَ ، هَمسَ النِّيلِ مُنتَشِياً=بَينَ الخُزامَى مَعَ الإِصبَاحِ و الغَسَمِ
و النخلُ يرقصُ في زهوٍ و في طَرَبٍ=رَقصَ الخُيولِ على ترنيمَةِ النَّغَمِ
و التُّوتُ يَحكِي إِلَى الجُمَّيْزِ قِصَّتَهُ=إن باتَ يَشكُو مِنَ الأحزانِ و السَّقَمِ
و البحرُ صافٍ و قاعُ البَحرِ في أَلَقٍ=و الفُلكُ تَجرِي بِأَشواقٍ على نَهَمِ
يا أيُّها البحرُ هل أبصَرتَ قريَتَنا=في بَرِّ مِصرَ و قَد حَيَّتْكَ بالعَلَمِ
كم سَافَرَت عبرَ عَيْنَيْكَ الجُمُوعُ ، فَلَم =تَحفَل بِمَاخِرَةٍ تَكتَظُّ بالنَّسَمِ
كم كُنتَ هَادِئَ طََبعٍ كانَ مُكتَسَباً= من أُمَّةٍ دينُها في شَاهِقِ القِمَمِ
دينٌ على العدلِ قد قامت دعائمهُ=لولا رجالٌ على الإخلاصِ لم يقُمِ
و أَشرَقَت شَمسُ إِيمانٍ و مَعرِفةٍ=بالرِّفقِ و الحَزمِ و القِرطاسِ و القَلَمِ
يا أيُّها الشِّعرُ لا تَهجُرْ مخيَّلتي=قم فاسقني جَوْهَراً مِن صَادقِ الكلِمِ
كي ما أدافعُ بالأشعارِ عَن وَطَنٍ=طَالَت ثَرَاهُ يدُ الأحقادِ و النِّقَمِ
أَرضَ الكِنَانِةِ يا فِردَوْسَ خالقنا=عَينِي تَتُوقُ إلى اللُّقيا ، فَلَم تَنَمِ
لا زِلتِ كالبَدرِ إِشراقاً بِذاكِرَتِي=كَالدُّرِّ فِي عُنُقِ الأَيَّامِ مُنتَظِمِ
تَصبُو إِليكِ قُلوبُ المُغرَمينَ ، كما= تَصبُو إلى الجَنَّةِ العذراءِ في الحُلُمِ
أنتِ العَرُوسُ و قَدْ زَفَّتكِ أَفئِدَةٌ=للنيلِ يا مُهجَتِي فِي ثَوبِ محتشِمِ
أنتِ العروسُ ، لكِ الأرواح نُمهِرُها=كي ما ننالُ الرِّضا يا مَنبعَ الكَرَمِ
حَزَّمتُ أَمتِعَتِي حتّى أَعُودَ إلى =عَينَيكِ أَفدِيِهِمَا يا أُمَّنا بِدَمِي
هل تقبلينَ فتىً قد عَقَّ والدةً=فَجَاءَ يَسكُبُ دَمعَ الحُزنِ و النَّدَمِ ؟



و دمتم بخير

amal3
18-10-2006, 02:58 AM
الله ..الله ..الله

ماشاء الله

ماكل هذا الأبداع

الله عليك يادكتور جمال

عظيم فى كل شىء ابداع شعرى

خفة ظل

حنان ورقة ووفاء

حقيقى يادكتور مفيش اى كلام ممكن يوفيك حقك

سلمت وحفظك الله ورعاك

لك منى كل التقدير والأحترام

أختك آمال مصطفى

د. جمال مرسي
18-10-2006, 07:32 AM
الله ..الله ..الله

ماشاء الله

ماكل هذا الأبداع

الله عليك يادكتور جمال

عظيم فى كل شىء ابداع شعرى

خفة ظل

حنان ورقة ووفاء

حقيقى يادكتور مفيش اى كلام ممكن يوفيك حقك

سلمت وحفظك الله ورعاك

لك منى كل التقدير والأحترام

أختك آمال مصطفى


بارك الله بك أخت آمال
هذا من لطفك و حسن ظنك بأخيك
و أتمنى أن أكون قد تواصلت مع أحبائي و أصدقائي و اخوتي هنا بشكل
يرضي الكل عني
مودتي و تقديري و احترامي
أخوك د. جمال

أحمد ناصر
18-10-2006, 09:22 AM
أستاذى الحبيب ومعلمى الفاضل د.جمال مرسى
الأول فرحت بالخشاف
لكن بعد الأكلة الحشتارية دى قلت لنفسى المفروض كنت أتصل ببوليس النجدة مش بالمطافى
وخفت لحسن الحلو يكون حزبلوط بالمطرظاخ
*109*
لكن بعد ما فكرتنا بقصائدك الجميلة وصالحتنا بيها
فكرتنى من تانى ب...

الله على المنتدى
ما تجيب لنا كرسى
علشان نقعد نستمع
لكلام جمال مرسى
وده مش كلام وخلاص
ولا بس غنواية
ده الصدق فيه إحساس
حسيته جوايا
وقع الكلام له صدى
مش بس قلنا وقال
الله على المنتدى
الله عليك يا جمال
كل سنة وحضرتك طيب يا أستاذى الحبيب وعائلتك الكريمة بخير وسعادة
ورمضان كريم
*168*

شاعر الرومانسية
18-10-2006, 10:11 PM
استاذنا الكبير
( مقاما لا سننا ..مش عغاوزين نكبرك وانت فى عز شبابك:2: )

متأخر -كعادتى- فى الخدول على مائدتك العامرة..
ولكن كانت الميزة فى تنأخرى اليوم ..
اننى اخذت الوجبة الدسمة كاملة وجرعة واحدة
بدأت الموضوع ولم استطع ان اتركة حتى انتهيت من اخر رد

فكانت وجبة رائعة بحق...
( طبعا لا اقصد الحشتبار .. والذى بلغ الكل من الفرار:plane: )

انما وجبة الاشعار الرائعة المتنوعة مابين فصحى وعامى ... اجتماعى ووطنى
لم تحرمنا من شىء اليوم ... فلا حرمنا الله منك ولامن كتاباتك


اخى الكريم...د.جمال مرسى
كل عام وانت فى اسعد حال .. ومرتاح الخاطر والبال:2:

تقبل خالص تحياتى ... وكل اعتزازى :f:

سمـاء
19-10-2006, 04:21 AM
وصفتك يا دكتور جمال من واق الواق

ودى أكلة لو تتعمل هتدوب الأطباق

برازيلى مع هندى وحاجات كتير أغرب

بس يا هلترى فى حد منها داق؟؟؟؟؟؟

د. جمال مرسي
19-10-2006, 07:27 AM
استاذى ابو الامراس...

الحمدلله لا اكلنا ولا شربنا وذنبى انا والعيال والمدام فى رقبتك الى يوم القيامه وخصوصا المدام

اللى قعدت تبكت فيا وتقوللى ادى صحابك اللى ضيعنا مصروف سنتين على عزايمهم فى الفطار

والسحور وياريت طمر الا فى الاخر صاحبك جايب لنا حبشتكه ولا فزلكه قلت لها ياوليه يا

جاهله ده اسمه حشتبار اخو خندكار ابن الملك الزرزار اللى كان ساكن فى الخازندار وعديك يا

ابو الامراس اصل المدام عندى عليها زن وخصوصا لما تمسك فرصه عليا وعلى صحابى

وقعدت تبكتنى وتقوللى رجل نفيش طب ياخويا ماكان صاحبك قال لنا اكل مفيش بدال ما يحيرنا

برجل النفيش بتاعته دى الا هى يا خويا رِجْلْ ولا رَاجل نفيش يعنى راجل ماشى نافش ريشه

يقال له رجل نفيش ياللا بقى دانت خلليتنا نرطن باللاوندى مش بالعربى والمدام ماتت على روحها

من الضحك ودموعها نزلت وهى بتقوللى وايه بقى نبات البرنجليز حنجيبه من بلاد الانجليز يا

زوجى العزيز وانا قاعد كاتم غيظى وحطرشق منها بس اعمل ايه مانا مش قادر اتكلم وقعدت

تقوللى وهل نبات البرنجليز يشبه للعسجد او الابريز وايه يا خويا المنتوزه البرازيلى طب ما كان

صاحبك شال النقطه اللى تاعبانا دى وخلاها المنتوره واهو حنعرف انها اتنترت من البرازيل

وراحت حتة تانيه على ما تخلص الانتخابات بتاعت لولا دى سيلفا بصيت لها بغيظ وقلت لها

خلاص السياسه اخدت حدها معاكى بقيتى تعرفى لولا دى سيلفا قالت لى والنبى عارفاهم عيله

دى سيلفا كانوا ساكنين ورانا فى درب الجماميز فنظرت اليها وانا مخنوق من الغيظ ولكنى سكت

واثرت الصمت لقيتها راحت قايلالى هى لولا بنت سى سيلفا حاصل لها ايه فى البرازيل قلت لها

اصل ابو الامراس بعت لها شويه حشتبار هندى والمخابرات البرازيليه اكتشفت الموضوع وقبضوا

على ست لولا بتاعتك قالت طب وصاحبك ابو الامراس ليه يبعت لها ويبهدل ولاد الناس قلت لها

يا ستى ارحمينى خللينى اشوف حفطركم ايه راحت قايلالى ابقى فطرنا يا خويا عيش وملح

قمرانى من بتاع صاحبك ال قمرانى ال طب ماكان خلاه قمرين زى عمرو دياب ولقيت الوليه

اتهبلت وقعدت ترقص هى والعيال ويغنوا قمرين دول ولا عينيك قلبى بيسالنى عليك وانا قاعد

كاتم همى فى قلبى وساكت وفجاه راحت ساكته وقالت لى وايه حكاية البصله الزرقا دى كمان

يكونش قصده نحط بصله زرقا على صدرنا تحمينا من العين ومنين نجيبها الزرقا دى احنا نعرف

بصل اخضر وبصل احمر انما البصل الازرق حنجيبه منين بصيت لها بغضب وقلت لها موجود فى

بلد اسمها الزرقا قبل دمياط بشويه بيتزرع هناك اهو ناجر بيجو نروح نجيب 5 روس من هناك

ليا وليكى والعيال وقعدت يابو الامراس يا خويا تبكت فيا وانا مش قادر اتنفس واخدنا الكلام

ونسينا اننا مش عاملين فطار لاننا كنا متكلين على ابو الامراس والمغرب ادنت والعيال قعدت

تعيط عاوزين ناكل يا بابا والله يا ابو الامراس كان منظرهم يقطع القلب واخدتهم ونزلت لقيت

كل موائد الرحمن شطبت والمحلات قافله واديهم عمالين يعيطوا وامهم تخلليهم يعيطوا اكتر

عشان تعذبنى والعيال قعدوا عملوها مناحه فى الشارع وبقوا ماشيين ينوحوا ورايا..

ليه يا بابا ليه..

صدقت ابو الامراس...

طب اهو يا سعاده البيه..

خلاك قاعد محتاس...

ولقيت عيال المنطقه كلها والمناطق اللى جنبنا اللى نزلوا يلعبوا بالفوانيس اتلموا مع عيالى

وبقت مظاهره ولا مظاهرات ثورة 19 والكل بقى يهتف ويجرس فيا

ليه يا يحيى ليه ...

صدقت ابو الامراس...

طب اهو يا سعادة البيه...

خلاك قاعد محتاس...

والنبى يا خويا ابوالامراس اعمل اى حركه كده ولا تعالى ابعد العيال دول عنى ينوبك ثواب...

و الله يا خويا يحيى أنا في نص هدومي منك أنت و العيال
بقى معقولة يا جماعة الحشتبار ده ما يعجبش حد بالشكل ده
يبقى أكيد فيه حاجة غلط
عارف ايه ؟
احتمال أكون ما ولعتش النار على الطبخة من أساسه
يا نهار ابيض
تصور ان ده احتمال وارد و خاصة اني قلت ان درجة الحرارة لازم تكون 253ْمْ
عموما ملحوقة يا بو الأزكار
اعتذر بالنيابة عني للأسرة
و اقبلوا الدعوة المفتوحة على الهوليداي إن
هي ما زالت قائمة حتى آخر رمضان
كل سنه و انتم طيبين
و للجميع المودة
و السنى الجاية نغير الحشتبار
تحياتي

د. جمال مرسي
19-10-2006, 07:33 AM
أستاذى الحبيب ومعلمى الفاضل د.جمال مرسى
الأول فرحت بالخشاف
لكن بعد الأكلة الحشتارية دى قلت لنفسى المفروض كنت أتصل ببوليس النجدة مش بالمطافى
وخفت لحسن الحلو يكون حزبلوط بالمطرظاخ
*109*
لكن بعد ما فكرتنا بقصائدك الجميلة وصالحتنا بيها
فكرتنى من تانى ب...
الله على المنتدى
ما تجيب لنا كرسى
علشان نقعد نستمع
لكلام جمال مرسى
وده مش كلام وخلاص
ولا بس غنواية
ده الصدق فيه إحساس
حسيته جوايا
وقع الكلام له صدى
مش بس قلنا وقال
الله على المنتدى
الله عليك يا جمال



كل سنة وحضرتك طيب يا أستاذى الحبيب وعائلتك الكريمة بخير وسعادة
ورمضان كريم
*168*

أخي الحبيب أحمد
أردت اضفاء البسمة مش ارساء النجده و المطافي
عموما ربنا سلم
و أنا أخيرا اكتسشفت ليه الطبخة ما عجبتكمش
الظاهر اني نسيت أولع النار عليها
يللا يا بطل
خيرها في غيرها
شكرا لك أخي الحبيب
و لك المودة الخالصة
و كل عام و أنتم بخير و سعادة

د. جمال مرسي
19-10-2006, 07:39 AM
استاذنا الكبير
( مقاما لا سننا ..مش عغاوزين نكبرك وانت فى عز شبابك:2: )

متأخر -كعادتى- فى الخدول على مائدتك العامرة..
ولكن كانت الميزة فى تنأخرى اليوم ..
اننى اخذت الوجبة الدسمة كاملة وجرعة واحدة
بدأت الموضوع ولم استطع ان اتركة حتى انتهيت من اخر رد

فكانت وجبة رائعة بحق...
( طبعا لا اقصد الحشتبار .. والذى بلغ الكل من الفرار:plane: )

انما وجبة الاشعار الرائعة المتنوعة مابين فصحى وعامى ... اجتماعى ووطنى
لم تحرمنا من شىء اليوم ... فلا حرمنا الله منك ولامن كتاباتك


اخى الكريم...د.جمال مرسى
كل عام وانت فى اسعد حال .. ومرتاح الخاطر والبال:2:

تقبل خالص تحياتى ... وكل اعتزازى :f:

أخي الحبيب شاعر الرومانسية

شوف يا غالي

الحشتبار .. أكلة الشطار
و اللي بياكل العكاوي .. بتروح عنه البلاوي
و اذا كنت يا جميل ناوي
تعالى السنة الجاية من أول النهار

صباحك فل
و سعيد بزيارتك المتأخرة و استمتاعك بالشعر أحسن من الأكل دليل ذوقك
و الثقافة العالية

تقبل تحياتي
و كل عام و أنت بخير