المساعد الشخصي الرقمي

مشاهدة النسخة كاملة : محمد رفيع هيجوعنا ... هيجوعنا



أم أحمد
13-10-2006, 11:16 AM
بسم الله الرحمن الرحيم
السلام عليكم ورحمة الله وبركاته


كما تعودنا كل يوم ان نلتقي مع مبدع جديد من مبدعي ابناء مصر
موعدنا اليوم مع التألق والابداع
موعدنا مع كاتبنا الكبير الاستاذ محمد رفيع
لكي يمتعنا باحلي الاطباق الشهية مع احدي ابداعاته
فلتتفضل استاذ محمد دخول مطبخ ابناء مصر
http://gallery.egyptsons.com/data/media/49/camden.gif (http://gallery.egyptsons.com)
اتمني لك قضاء يوم لذيذ في المطبخ في تحضير اشهي الاطباق لنا
الي اللقاء في الغد مع مبدع جديد وطبق لذيذ وكلام مفيد :f2:

محمد رفيع
13-10-2006, 01:49 PM
طبق اليوم كوسة بالبشمل

يغسل كيلو كوسة ، ويقطع حلقات ثم يوضع فى الماء على النار ليغلى قليلا ، لكن دون سواء كامل ، تصفى الكوسة وتترك لتبرد.

نحضر اللحم المفروم (العصاج) ، نص كيلو لحم مفروم ، بصلة مفرومة ، توابل وبهرات .
يقلب البصل المفروم فى معلقة سمنة حتى يصبح لونه ذهبى ، ثم توضع اللحمة المفرومة والبهارات ويترك قليلا على النار حتى ينضج .

نحضر البشامل ومقديرة كالاتى
3 ملاعق سمن
5 معالق دقيق
2 كوب لبن او شربة
2 بيضة

طريقة التحضير
يسخن السمن ثم يوضع الدقيق مع التقليب المستمر حتى لا يتكتل ثم يوضع اللبن ببطء مع التقليب المستمر ثم الملح والبهرات مع التقليب ايضا حتى الوصول للسمك المناسب
ثم يترك حتى يبرد وبعد ذلك نضع البيض ويقلب




طريقة تحضير الكوسة
تدهن الصينية بالسمن ثم نرص طبقة من الكوسة بعدها طبقة بشمل بعدها طبقة من اللحم المفروم ونكرر الطبقات ولكن يبقى السطح ملئ بالبشمل
ندخله الفرن حوالى نص ساعة
ثم بالهناء والشفاء>> الحق ازوغ قبل النتيجة :plane:

ليلة عشق
13-10-2006, 01:55 PM
الأخ الفاضل محمد رفيع

سلمت يداك على صينية الكوسة بالبشامل الجميلة .....
وماتخافش حضرتك لو زغت دلوقتي لسه بدري علي الفطار .....
بس هي كدة شكلها هيكون رائع ......
سلمت يداك وكل عام وأنت بخير ......

تحياتي
ليلة عشق

أم أحمد
13-10-2006, 02:57 PM
ما شاء الله يا استاذ محمد
ريحة الكوسة رهيبة
جابتني جري اهو
فين بقي الحلو سعادتك
يلا بسرعة المغرب قرب
ومفيش زوغان حضرتك
عاوزين الحلو وبسرعة

boukybouky
13-10-2006, 03:28 PM
يا مساء الباشاميل ...و الله كنت متأكدة انك هتعمل حاجة بالباشاميل

من ساعة ما قلت في مائدة إفطار أبناء مصر انك تعشق كل ما هو بالباشاميل

تسلم إيدك جوعتنا و لسه علي الفطار اكتر من ساعة :eat:

بس فين بقي يا سيدي الحلو؟؟ انت هتخمنا و الا إيه :d

لا تنازل عن الحلو إختار أي عمل من أعمالك جديد لم يسبق له النشر هنا و هاته لنا

في إنتظار الحلو مع الشاي بقي بعد الفطار ..لي عودة علشان اتمزج :)

دمت بكل خير

في رعاية الله ،،،

محمد رفيع
13-10-2006, 03:32 PM
اخوانى وابناء اوطانى

ايه المطبخ ده ، بيتهيئلى سمعت الكلمة دى قبل كده ، يا نهار ذكريات ، افتكرته خلاص
اخر مرة شفته ايام الجامعة ولأنى راجل قصاص والشعر هجرنى من زمان ومعرفتش اطلبه للطاعة. قلت عليه شعر ناشز . المهم كفايه كلام عن الشعر لحسن يخلعنى ،
حكاياتى فى اللى اسمه المطبخ دة اخر مزاج . يعنى مرة عملت كريم كرمل بالجبنة البيضة ،

احكيلكم حكايته ، طبعا كنا ايام الجامعة بنوزع المهام واحد يغسل المواعين وواحد ينزل يشترى الخضار واتنين يطبخوا ، يعنى واحد اساسى والتانى احتياطى عشان لو الأولانى ولع ولا حاجة يبقى فيه استبن . المهم زى عوايدى ما كنتش فى فريق الطبخ وده طبعا احد اسباب انى عايش وبكلمكم اهه.
كنت بانزل اجيب الطلبات واذ فجاءة الاقى عند السوبر ماركت كريم كراميل جاهز . الحقيقة انى ضعفت والشيطان غوانى ، لاقيت معاه كتالوج فيه طريقة التحضير قلت خير ، كده ضمنت انى اداوى نفسى واعالج ادمانى بنفسى ومفيش داعى للبهدلة واطلبه من كل من هب ودب . المهم دخلت على العيال منتهى العنتظة وقلتلهم انا كمان هاعملكم الحلو . مش عارف ملعون مين اللى قال احنا نعمل الحلو الاول عشان نحطه فى التلاجة يسقع . جه فريق الطبيخ والشاب بتاع المواعين وقعدنا نذاكر فى الكتالوج . ورغم ان الكتالوج صغير الا انه كان زى البردية ، كله ألغاز .
غالبا كان مترجم ترجمة ركيكة وغير مفهومة . قام ملعون تانى قال طيب ما نشوف النص الاصلى . وراح مطلع الكتالوج الانجليزى وكأنه اكتشف حجر رشيد، مش عارف احكى لكم على رحلة القاموس ولا بلاش . تلات قواميس اترصوا والشاب بتاع المواعين قعد يلخص اللى احنا بنقوله، ما طولش عليكم وصلنا لتصور عام للوصفة يعنى حبة ترجمة ركيكة على حبة قاموس المورد ، اتقضت وفهمنا شوية . وابتدينا التجربة .
المهم ماشيين على الخطوات خطوة خطوة وكل شرط فى الوصفة ما بيحصلش. يعنى يقول فى الشفرة اللى وصلنلها استمرى فى التقليب حتى يتماسك وهوه راسه والف سيف ميتماسك . وطبعا كل الاوامر ضعى واستمرى وكنا كل شويه نقول لبعض استمرى وقلبى وحجات من دى . المهم النتايج مش راضيه تطلع واحنا متنا من الجوع واستهلكنا كتير من المواعين . حسينا باحباط زى بتاع الكيميا . واتهدينا من الجوع والبرد ، طفينا النار وقعدنا ، نحاول نلم جرحانا وننظم صفوفنا ،
:n:
قام فيه ملعون تانى قال احنا نبتدى من الاول يمكن الترجمة مش صحيحة ووالتانى قال اتصل بامى اشتكلها منكم واعرف الطريقة .:mad:
انا قلت طيب نعمل ايه فى الجسم الغريب اللى حضرناه ده . اتسحبت على طرطيف صوابعى ودخلت عليه المطبخ . لاقيته لسه بيتنفس رغم ان احنا طفينا النار ،
قربت منه وبشجاعة ضربت صباعى طلعت حتة منه وابلعتها ، العيال كانوا بيتجسسوا عليا ومستنيين شرار يطلع من ودانى او طفح جلدى غزير ، ما حصلش حاجة من دى ، بصراحة كان طعمه عادم وماسخ حسيت ساعتها انه محتاج حاجة حادقة ، افتكرت ان احنا عندنا ثلاجة هى فاضية وعمالة تسحب كهربة على الفاضى بس لازم من وجودها اهى تقف معانا فى موقف زى ده ، زرت السيدة ثلاجة وبعد ما عدى نظرى على الشئ الوحيد الموجود فيها وهى قزايز المية الفاضية . لاقيت اللى كنت بدور عليه حتة جبنة بيضا . ما درتش بنفسى خدتها غصبن عن الثلاجة وجريت ناحية المطبخ والاصوات حوليا "اعقل يا مجنون هاتودى نفسك فى داهية" لكن الشيطان عمانى ما درتش الا وانا بفتح الكيس وبرمى الجبنة على الجسم الغريب وفضلت اقلب بعصبية والعيال اللى بيدعى واللى مخبى دماغه فى مخدة ولما ماجاش زلزال ولا بركان ولا حاجة من بتاعة الجغرافيا . فتحوا عيونهم لاقونى باكل الخليط العجيب بالعيش هجموا عليا وغمسوا معايا . بس الحمد لله مازلوا احياء يرزقون حتى الان

عصام علم الدين
13-10-2006, 06:49 PM
الأخ الفاضل محمد رفيع
سلام الله عليكم ورحمته وبركاته

كل عام وإنت بخير
وتقبل الله منك ومنا صالح الأعمال
وألف حمد الله على سلامتك وسلامة أصحاب أيام الشقاوه والرحلات الخلويه
وعلى ماأظن أن هذه الحكايه التي ذكرتها هي التفسير المنطقي لتلك العلاقه
الملتهبه والغير عاطفيه على الإطلاق بينك وبين القلقاس ـ ربنا يجعل كلامنا خفيف عليك ـ
ذلك لأني قد تصورت أن هذا الناتج الكيميائي الذي قد نتج عن مزج الكريم كرامل
بقطعة الجبنه التي كانت تشعر بالوحده في الثلاجه
قد أدى إلى توتر أجهزة الإستشعار الغذائي لفتره معينه
جعلك من هول الصدمه وقتها لا قدرة لديك على التمييز بين الناتج الكيميائي
والمذكور أعلاه ـ عشان متقولش إني بتعمد إثارتك ـ ولذلك فأنا أظن أنك لو قمت
بعمل التجربه في الإتجاه المعاكس
لربما جاء الناتج مطمئناً وتحسنت العلاقه بينك وبين اللي بالي بالك
كل سنه وإنت بألف ألف خير

أخوك
عصام علم الدين

محمد رفيع
13-10-2006, 07:29 PM
الأخ الفاضل محمد رفيع

سلمت يداك على صينية الكوسة بالبشامل الجميلة .....
وماتخافش حضرتك لو زغت دلوقتي لسه بدري علي الفطار .....
بس هي كدة شكلها هيكون رائع ......
سلمت يداك وكل عام وأنت بخير ......

تحياتي
ليلة عشق


الله يخليك يا ليلة عشق يا رب الرأى دة يفضل بعد ما ندوق الحاجات اللى انا عملتها دى

محمد رفيع
13-10-2006, 07:38 PM
طبعا افتكرتوا ان الحلو شوية ذكريات ........... :good: ضحكت عليكم لحد ما الحلو يستوى
:roll2:

أم أحمد
13-10-2006, 08:08 PM
طبعا افتكرتوا ان الحلو شوية ذكريات ........... :good: ضحكت عليكم لحد ما الحلو يستوى
:roll2:

هههههههههه
اسعد الله سنك استاذ محمد
بجد موت علي نفسي من الضحك
بس طلع ايه في الاخر الجسم الغريب ده هههههه قصدي طلع طعمه ايه ههههههه
هو الموضوع ده حصل بجد ولا دي قصة ههههههه

طيب انا لسه قاعدة مستنية الحلو
يا تري هيتاخر اكتر من كده
لا ما ينفعش بقي السحور قرب خلاص

ليلة عشق
13-10-2006, 08:30 PM
بصراحه ياأستاذ محمد أنا الي هاموت من الضحك علي الاختراع العظيم الي حضرتك أكتشفتة .....
لازم حضرتك توثقة في الشهر العقاري لحفظ الحقوق لانة من الواضح أنة رائع .....
بدليل ان حضرتك وجميع الأصدقاء لسة بخير والحمد لله .....
وهقولك زي سمير غانم لما قال المية أرمي فيها الفرخة تبقي شوربة يالينا ....
نفس الحكاية الحليب أرمي علية البودر يبقي كريم كراميل وخلاص وعلي التلاجة .....
لكن نقول اية أرزاق بقي معلش لكن أكيد أخدت خبرة بعدها ......
كل سنة وأنت طيب مع ذكرياتك الجميلة .....
أسعدتنا أسعدك الله ......
الحق بقي الحلو الا كده مش أستوي بس دة زمانة أتحرق ......

تحياتي
ليلة عشق

محمد رفيع
13-10-2006, 09:17 PM
هههههههههه
اسعد الله سنك استاذ محمد
بجد موت علي نفسي من الضحك
بس طلع ايه في الاخر الجسم الغريب ده هههههه قصدي طلع طعمه ايه ههههههه
هو الموضوع ده حصل بجد ولا دي قصة ههههههه

طيب انا لسه قاعدة مستنية الحلو
يا تري هيتاخر اكتر من كده
لا ما ينفعش بقي السحور قرب خلاص


والله يا اخت ام احمد القصة دى حقيقية امال لما احكيلك حكاية شوربة راس الترسة المحنطة
يمكن رمضان اللى جاى وعليكى خير ما تقلقيش الحلو جى بس على الله يطلع حلو مش زى الكريم ابو كرمل
*101*

محمد رفيع
13-10-2006, 09:26 PM
الأخ الفاضل محمد رفيع
سلام الله عليكم ورحمته وبركاته

كل عام وإنت بخير
وتقبل الله منك ومنا صالح الأعمال
وألف حمد الله على سلامتك وسلامة أصحاب أيام الشقاوه والرحلات الخلويه
وعلى ماأظن أن هذه الحكايه التي ذكرتها هي التفسير المنطقي لتلك العلاقه
الملتهبه والغير عاطفيه على الإطلاق بينك وبين القلقاس ـ ربنا يجعل كلامنا خفيف عليك ـ
ذلك لأني قد تصورت أن هذا الناتج الكيميائي الذي قد نتج عن مزج الكريم كرامل
بقطعة الجبنه التي كانت تشعر بالوحده في الثلاجه
قد أدى إلى توتر أجهزة الإستشعار الغذائي لفتره معينه
جعلك من هول الصدمه وقتها لا قدرة لديك على التمييز بين الناتج الكيميائي
والمذكور أعلاه ـ عشان متقولش إني بتعمد إثارتك ـ ولذلك فأنا أظن أنك لو قمت
بعمل التجربه في الإتجاه المعاكس
لربما جاء الناتج مطمئناً وتحسنت العلاقه بينك وبين اللي بالي بالك
كل سنه وإنت بألف ألف خير

أخوك
عصام علم الدين


والله النبات غريب يا استاذ عصام هوه حقيقى مش سام بس بنسبالى حاجة ما قولكش ، على العموم كل سنة وانت طيب وربنا يخليك ويحقق احلامك
اخوك محمد

محمد رفيع
13-10-2006, 09:37 PM
رسالة من فانوس بلدى الى فانوس صينى

اخى العزيز الاجنبى ، يا جى من بلاد بعيدة ، راكب مراكب ومعدى بحور كتيرة ، رمضان كريم ، عايز اقولك كلمتين
كلمتين فيهم تسامح بس هما كلمتين
مش هاقولك ايه اللى جابك ولا جيت منين
ولا يا قاعدين والباقى انت عارف
بايخ حبتين
بص يا صحبى
انا ما انفعش تنين صينى
ولا باعرف كارتيه ولا جودو
انا حبى كله الاطفال
اروح معاهم لما يروحوا
اعود معاهم لما يعودوا
اصلى زيهم من هنا
تفوت السنة
ونستنا بعضنا
على ناصية الحلم اللى فات
ساكن غناهم
وهما سكنين هنا
فى قلبى الصغير
المظأتت المنور

عارف يا اجنبى
لما يادن مغربى
ينوروا شموعى بأغنيات
ويلفلفوا بيا الحارات
ولما الشمعة تنطفى
اتكسف جدا واختفى
ييجى عمو من الصلة
ونوره اكتر شعللة
من شمعتى
يولع بالكبريت فرحتى
ويمشى كدة من غير اسئلة
لا يقول انت ابن مين ولا منين
غير بس بوسة على الجبين
ويجرى الولد يلحق صحابه الطيبين
وفى سنة من السنين
قاعد حزين
على رف دكان الامين
كان فاضل على رمضان يومين
قوم شفت فى ايد الواد حسين
راديو صغير بنور صغير
زى العنين
والغرابة مالهش فيشة ولا حتى سلكتين
وشوشت فى ودان حسين
سألته قالى دى بطاريه
مشحونة جوة كهربية
قلت يا فرج الله المعين
وشوشتله ام يجرى زى المعتوهين
خدنى فى ايده وكنا مروحين
ام حود على دكان راجل تخين
قالوا عايز لمبة صغيرة وسلكتين
والبطارية تحطهالى
تحت الفنوس
الراجل ابتسم وبطل عبوس
ركب الحاجات ولا خد منه اى فلوس
وحسين طار واللمبة جوايا مولعة
راح عند صحابه اللى اربعة
وراهم التجربة
وفى ساعة واحدة
كانت العيال
فى عصر الكهربة
عمرى ما شفت فرحة زى ديه
يومها لفوا بية
فى السيدة
وفى الغورية
عديت فى الحسين على مشربية
مشربا عطر المباخر
كان الغنا مالى الحناجر
والقلب زي طير مهاجر
سابح فى دنيا مش هى دنيته
بيصلى وبيدعى من جوة دمعته
كانت الفرحة زى الجبال
بتتولد فى عيون العيال
والامهات الطيبات
والرجال
والشيوخ الطاهرة
اللى عاشت فى الحلال
صلت وصامت على الهلال
قامت ونامت فى جلال
الكل كانت فرحته
طالعة من القلب اللى مال
على قلوب متخضرة
متعفرة فى رحمته
وبكلمته
تبدأ فطورها
لما السما يخف نورها
وملايكة مستنية دورها
عشان ترفرف للجمال

شفت يا عم الاجنبى
يا عابر البحور فى مركبى
وجى تسرق ذكرياتى
وتقسمنى فى مأكلى وفى مشربى
وتقول عليا فانوس قديم
وتغنى زى البغبغان
طب والنبى
ومن نبا النبى
انك فانوس عديم المفهومية
وفى احسن الحالات
فانوس غبى
المتعة مش انك تغنى
ولا ترقص جوة البيوت
وعلى البلاط
المتعة فى السكوت
فى سماع الاغنيات
فى الضحك مع العيال
فى الحارات
فى الذكريات
وانت جى ما لكش اى زكريات
مالكش ملة
ملكش دين
اصل اهلك فى الحقيقة
ملحدين
محفظينك كلمتين
ومرقصينك رقصتين
ارجع بلادك
مع كل الممسوخين
ارجع وحاول تبقى حاجة
اصل احنا مش مخدوعين
بالبغبغان
البهلوان
ابو العيون الديقين

boukybouky
13-10-2006, 09:54 PM
*62* *62* *62* *62*

بسم الله ما شاء الله ..و تقول مش لك في الشعر امال مين بقي اللي ليه!!

انا جبت الشاي و قلت أشوف الحلو استوي و الا لسه؟؟؟؟

لقيت حادثة المأسوف علي شبابه الكريم كراميل :d و الضحك نساني أسأل

عن الحلو اللي بحق و حقيقي يعني لفيت لفة في المنتدي و لما كريزة الضحك

عندي وقفت افتكرت و رجعت تاني للمطبخ ابص بصة لقيت أحلي حلو وصل :good:

معني جميل للفانوس لدينا حقاً فهو يعبر عن ذكرياتٌ علينا مضت :)

انا جايبة عندي في البيت فانوس كبير بالزجاج الملون المرسوم عليه النقوش البسطية

الرجل علي السجادة... و الحمام علي المأذنة.... و الزخارف الشعبية التي تزينه

بجد حاجة تانية إحساس تاني ربما لذكريات الطفولة كما قلت ..بجد أمتعتني بما كتبت

بارك الله فيك و سلمت يداك و يارب منورنا دايماً في قاعة المطبخ

في رعاية الله ،،

ابن البلد
13-10-2006, 10:52 PM
مشاء الله الكوسة تجنن يا أ/ محمد
بس نصيحة حط ملح في المياة وأنت بتغلي الكوسة علشان تبقه تمام التمام
بس بصراحة تسلم أيدك يا أ/ محمد
أنا بقه عازم نفسي عندك يوم في رمضان :d
بس علي كوسة بالبشاميل لاني بحبها جدا جدا جدا جدا جدا جدا كمان
تسلم أيدك
:f:

محمد رفيع
13-10-2006, 11:14 PM
*62* *62* *62* *62*

بسم الله ما شاء الله ..و تقول مش لك في الشعر امال مين بقي اللي ليه!!

انا جبت الشاي و قلت أشوف الحلو استوي و الا لسه؟؟؟؟

لقيت حادثة المأسوف علي شبابه الكريم كراميل :d و الضحك نساني أسأل

عن الحلو اللي بحق و حقيقي يعني لفيت لفة في المنتدي و لما كريزة الضحك

عندي وقفت افتكرت و رجعت تاني للمطبخ ابص بصة لقيت أحلي حلو وصل :good:

معني جميل للفانوس لدينا حقاً فهو يعبر عن ذكرياتٌ علينا مضت :)

انا جايبة عندي في البيت فانوس كبير بالزجاج الملون المرسوم عليه النقوش البسطية

الرجل علي السجادة... و الحمام علي المأذنة.... و الزخارف الشعبية التي تزينه

بجد حاجة تانية إحساس تاني ربما لذكريات الطفولة كما قلت ..بجد أمتعتني بما كتبت

بارك الله فيك و سلمت يداك و يارب منورنا دايماً في قاعة المطبخ

في رعاية الله ،،


اختى ام زوق ملوكى بوكى بوكى
انا متشكر على الثقة الغالية وكفاية انك سبتى مطبخك لواحد مبتدئ فى الطبخ زيى . من غير ما تكونى مأمنة على المطبخ بمبلغ محترم محدش ضامن الظروف . والحمد لله وصلنا ليوم عشرين من غير خساير وطلع كل ضيوفك طباخين محترفين، ربنا يخليك ويعمر مطبخك على طول

لميس الامام
14-10-2006, 12:52 AM
الاستاذ محمد رفيع

والله انا جعانة جدا ..والحمدلله اني قريت القائمة واحنا في السحور الان والا كانت التخيلات عملت في العمايل.. ..لكن الوقت ضيق ومش حاقدر اجهزها من الان لبكرة .. بس انا متوقعة لها النجاح الباهر الباشميل مع الكوسى والمكرونة أطباق لذيذة قوي وشيك قوي ...راجعالك تاني يا استاذ محمد بعد ما اعملها ولنا كلام تاني..يبدو ان رمضان ختامه مسك يا استاذ محمد..يمممممممممممم

تصبح على خير

لميس الامام

نوسة
14-10-2006, 02:02 AM
اهلا بيك محمد رفيع غلى مائدة افطارنا الجميلة

واية الشطارة دى منتدانا عامر بناس بتغذينا تمام غذاء العقل وغذاء الجسد

والكوسة بجد جميلة تسلم ايدك انا كنت بفكر من يومين اعملها بكرة بقى وعليك بخير اعملها

واعمل معاها كريم كراميل بس مش با الجبنة هههههههههههههههههههههه

والاجمل منهم فانوسك الجميل

انا عايزة فانوس

كل عام وانت بالف خير ورمضان يجمعنا

http://www.br2h.com/up/uploads/ccfd525b76.jpg
خالص تحياتى اليك

محمد رفيع
14-10-2006, 11:52 AM
اهلا بيك محمد رفيع غلى مائدة افطارنا الجميلة

واية الشطارة دى منتدانا عامر بناس بتغذينا تمام غذاء العقل وغذاء الجسد

والكوسة بجد جميلة تسلم ايدك انا كنت بفكر من يومين اعملها بكرة بقى وعليك بخير اعملها

واعمل معاها كريم كراميل بس مش با الجبنة هههههههههههههههههههههه

والاجمل منهم فانوسك الجميل

انا عايزة فانوس

كل عام وانت بالف خير ورمضان يجمعنا

http://www.br2h.com/up/uploads/ccfd525b76.jpg
خالص تحياتى اليك

الاخت نوسة

على فكرة فيه كمان مسقعة بالبشمل هايلة ، كل سنة وانت طيبة ورمضان كريم عليك وعلى مصر كلها

شاعر الرومانسية
14-10-2006, 07:56 PM
اخى الكريم .. ذو القلم الفريد من نوعة
استاذنا محمد رفيع


تسلم ايدك مبدئيا على صينية الكوسة بالبشاميل اللى تفضلت وشرحتهالنا :good:

اما عن مختراعاتك المطبخية ... فندعو الله الا تطلع الوصفة مثلها ...:2:
بس ليا سؤال ..
" طبعا انت متأكد ان جميع من تناول الافتكاسة المطبخية ...
مازالوا احياء يرزقون " ممكن بقى عنوان المستشفى اللى حجزتلهم فيها
عشان واضح انها هايلة جدااااااااااااا:2:


بجد بجد اسلوبك رائع اخى الكريم .... ويارب مايحرمنا من وصفاتك ( بس على الورق بس ...:beer: )
ولا من كتاباتك الشيقة .... وقلمك الراقى

كل عام وانت فى اسعد حال
تقبل خالص تحياتى ... وارق امنياتى،،، :f:

محمد رفيع
15-10-2006, 02:21 PM
اخى الكريم .. ذو القلم الفريد من نوعة
استاذنا محمد رفيع


تسلم ايدك مبدئيا على صينية الكوسة بالبشاميل اللى تفضلت وشرحتهالنا :good:

اما عن مختراعاتك المطبخية ... فندعو الله الا تطلع الوصفة مثلها ...:2:
بس ليا سؤال ..
" طبعا انت متأكد ان جميع من تناول الافتكاسة المطبخية ...
مازالوا احياء يرزقون " ممكن بقى عنوان المستشفى اللى حجزتلهم فيها
عشان واضح انها هايلة جدااااااااااااا:2:


بجد بجد اسلوبك رائع اخى الكريم .... ويارب مايحرمنا من وصفاتك ( بس على الورق بس ...:beer: )
ولا من كتاباتك الشيقة .... وقلمك الراقى

كل عام وانت فى اسعد حال
تقبل خالص تحياتى ... وارق امنياتى،،، :f:

الاخ العزيز شاعر الرومانسية

الحقيقة هى مستشفى الكلب لان مش عارف ليه بعد ما خلصنا البتاع دة نزلنا عض فى بعض فى الاول قولنا دة هزار بوابين وبعدين اما لقيت حته من كتف الواد بتاع الموعين فى بق واحد من الملاعين قلقت والقلق عضنى ودة زود الطينة بله ، حسيت ان القلق اتسعر وبقى بيعض زى الكلب الولف لما تدخله الحرملك بتاع القطط السيامى . وانت عارفنى بكره القطط السيامى
وانا بطبعى ضد السيامية ، مش عارف حاسس انى اتزحلقت فى قشرة سياسة عشان كدة حبطل كلام خصوصا ان فيه دوله بحالها دلوقتى عندها سعار وعايزة تحارب الخلق كلها ، يجعل كلامنا خفيف على كل المسعورين .
جررررررررررررر جرررررر
بس يا بوش يا حبيبى روح كلك دولة بسرعة عشان اعرف اتكلم فى الرومانسية المنسية

سلام كدة عشان تقريبا مسكونى متلبس بالبشمل

شاعر الرومانسية
17-10-2006, 09:42 PM
ههههههههههههه
والله ضحكتنى وانا لسة فطران ... يا عزيزنا محمد بك رفيع:good:
( بس دة اسم والا صفة كمان اصل اخوك والله العملية ضربت معاه وعاوزين شوية تظبيط ... بس بعد العيد والكحك بقى )

وبخصوص هذة الحالة ...
فهى منتشرة والحمد لله هذة الايام .. والكل ماشى يعض فى بعضة:fartnew:

نسأل الله العفو والعافية:2: