المساعد الشخصي الرقمي

مشاهدة النسخة كاملة : د. حسان الشناوي هيجوعنا...هيجوعنا



boukybouky
12-10-2006, 01:57 AM
السلام عليكم و رحمة الله و بركاته

:f: :f: :f: :f: :f:
ياطيور الود وافـي=هـم بحـب ووئـام
ذكريهـم بهـدى القر=آن في شهر الصيام
وازدياد الخير منفـو=حا بطهـر وسـلام
والتحايا تنشـر الأم=ن على كـل الأنـام
فعسـى أن نتهـادى=( رمضانا ) كل عام

ما أعذبها من كلمات ...فمن جديد نتقابل لنستمتع بأشهي الأطباق

و أحلي الكلمات معنا اليوم عاشق الحرف... معنا فارس الشعر الفصيح

انه د. حسان الشناوي و حقاً من دواعي سرورنا قبوله

دعوتنا و المشاركة معنا في مطبخنا العامر ..... فأهلاً و مرحباً به

و الآن يا د.حسان فلتتفضل امامك المطبخ و الأدوات و في إنتظار النتيجة :d

http://gallery.egyptsons.com/data/media/49/greek.jpg (http://gallery.egyptsons.com)

دمتم بكل خير

في رعاية الله ،،،

إلي الغد و مبدع جديد و طبق لذيذ و كلام مفيد :f2:
في رعاية الله ،،،

amal3
12-10-2006, 02:53 AM
أهلا بيك يادكتور حسان

منتظرين دخولك بفارغ الصبر

وأنا أعلم جيدا أنك أستاذ دكتور فى المطبخ ووصفات الطعام

يلا شد حيلك ويارب تخرج من المطبخ وأنت عامل لنا وجبة أفطار شهية

وكمان وجبة شعر ذات نكهة خاصة من نكهتك الرائعة

ربنا معاك ورمضان كريم


آمال مصطفى

د. جمال مرسي
12-10-2006, 06:56 AM
و أنا سأكون أول المدعوين على مائدتك العامرة بك إن شاء الله أخي الحبيب د. حسان
ننتظرك على خوان الحب
نتبادل أطراف الحديث بينما نتحدث في أمور الأدب و شتى مجالات الثقافة
أهلا بك أيها الرائع
و الشكر موصول لأصحاب البيت
تحياتي و في انتظارك
تقبل الود

أم أحمد
12-10-2006, 08:49 AM
اهلا بك دكتور حسان
منور قاعة المطبخ ومنور مطبخ ابناء مصر
في انتظار ما تجود به علينا اخي الكريم من افطار شهي واشعار راقية
دمت بكل الخير

عصام علم الدين
12-10-2006, 10:46 AM
الأخ الفاضل د. حسان
سلام الله عليكم ورحمته وبركاته

قلبي معاك ولكني فهمت من مداخلة الأخت أمال إنك أستاذ دكتور في المطبخ
وده اللي طمني عليك وعلينا
يعني محدش هيجوع ولا حاجه وأنا قاعد آهو ووداني مع المدفع
وأول مايضرب هتلاقيني طبعاً جيت علشان أستمتع برسالة الطبيخ اللي هيتم مناقشتها
النهارده على الفطار
وإن شاء الله تاخد عليها تقدير تسلم إيديك مع مرتبة الشرف
كل سنه وإنت طيب أنت وأسرتك الكريمه
وأعاد الله رمضان عليكم مراراً وتكراراً

أخوك
عصام علم الدين

د. حسان الشناوي
12-10-2006, 11:47 AM
كلنا أهل وعائلة !!!
بسم الله الرحمن الرحيم
السلام عليكم ورحمة الله وبركاته
كل عام وأنتم جميعا بخير وصحة وعافية وسعادة .
ونسأل الله أن يبلغنا رمضان أعواما عديدة وأزمنة مديدة ،
وأن يعيده علينا باليمن والبركة ، والأمن والطمأنينة .
*****
اسمحوا لي أتكلم بالعامية وأكيد الفصحى مش حتزعل ؛ لأننا بناكل وبنشرب ،يعني إحنا دلوقتي في بوفيه مفتوح سواء في السلطات أو الوجبات أو الحلويات أو المشروبات .
وده معناه إن كل واحد ياخد راحته ، وياكل اللي يحبه ويشرب اللي على كيفه .
بس مش عارف حقدر أقوم بدور الشيف ولا إنتم شايفين إيه ؟
عموما ححاول وأرجو منكم المساعدة لأحسن باين عليا حتزنق زنقة ما يعلم بيها إلا ربنا .

د. حسان الشناوي
12-10-2006, 11:48 AM
احنا طبعا قبل المدفع بنكون مستعدين للفطور ، وبمجرد ما يضرب كل واحد يدور على حاجة يفطر عليها ، وبلاش كلمة يجرح صيامه دي ؛ لأن الصوم نعمة وعبادة فالجرح مش مناسب ليه أبدا .
أحسن حاجة حقدمها لكم بمجرد مدفع الإفطار ما يضرب هي التمر
اللي يحي ياكل التمر مع المية ممكن ، واللي عايز يحط تمر في الحليب وعليه كمان جوز هند وزبيب حيلاقي الكوباية متجهزة قبل الفطار بساعة على الأقل عشان حلاوة التمر والزبيب تكون امتزجت بالحليب .
وكلنا عارفين فوائد التمر وأهمها إنه يعتبر علاج للصداع والأرق ، وبيساعد على التركيز ، وكمان ملين طبيعي ، والعجيب إن التمر فيه كل العناصر الغذائية المتكاملة ؛ فمحدش يستغرب إن الرسول الكريم ( صلى الله عليه وسلم ) كان بيفطر على التمر في صيامه عموما ، وكان بيعيش على التمر وقت يوصل لشهرين تقريبا .
احنا بنتكلم مع بعض والتمر قدامنا أنواع وأشكال ؛ فاتفضلوا ومننساشي الدعاء اللي علمهولنا النبي ( صلى الله عليه وسلم ) واحنا بناكل التمر .
ممكن بقى حد يوقل إيه اللي حنعمله بعد ما أكلنا التمر؟
حنخش بقى على البوفيه المفتوح ولا إيه؟
هو الأحسن نصلي المغرب عشان الوقت ميفوتشي بسرعة ونتلخم في الأكل ، وكمان الجسم يستفيد من المواد السكرية والطاقة اللي في التمر والحاجات اللي معاه .وصلاة المغرب 10 دقايق تقريبا أو ربع ساعة بالكتير .
تقبل الله منا ومنكم ، أو حرما زي ما يحب بعضنا .

د. حسان الشناوي
12-10-2006, 11:50 AM
طبعا حتقولوا لي فين الأكل اللي حتقدموا لينا ؟ وفين الشعر اللي كتبته عشان اللمة دي؟
حاضر لكن من الأحسن اننا نتكلم واحنا بناكل ، وده مش معناه إنه إفطار عمل ولا حاجة ، لالالالالا الكلام على الأكل ممكن يكون أحد أسباب جودته وتطويره وخصوصا لما يكون مشرفنا مجموعة من مبدعي الطبخ ومبدعاته ؛ المثل بيقول : مش كل من نفخت طبخت يعني الطبيخ نفس ، وياخوفي لأعك الدنيا ، ولا تلاقوا طبيخ ولا نفس وابقى وقعت نفسي في مطب لكن ربنا يستر .
ماتنسوش إن البوفيه مفتوح : يعني كل واحد يتفضل وياخد راحته .
فيه بقى عندكم في بوفيهكم العامر حاجات كتيرة وجميلة .
هيا إلى ( البوفيه ِ ) ننظر ماذا فيهِ
من أكلات نوعت بالفن في أيديه
ولا أقول لكم :
أحسن حاجة تتفضلوا على البوفيه عشان ناكل سوا ؛ لأن البركة في اللمة ، ومتهيا لي فيه معنى حديث : أن كثرة الأيدي على الطعام سبب في بركته ، وأيضا الكلام على الطعام يخليه لذيذ من ناحية تانية .
أكيد حتقولوا لي إيه بقى الأكلة اللي انت مجهزها لنا ؟؟
بصراحة الأصناف كتيرة جدا ، وخصوصا في الشهر الكريم .
ممكن تسمحوا لي أقدم لكم
سمك في الفرن
بس بطريقة يمكن يكون فيها شيء من التنوع .
وحنتكلم على المقادير والطريقة كأننا قاعدين مع بعض ، يعني بلاش الطريقة التقليدية من المقادير ، والطريقة ،... و... و...
طريقة عمل السمك في الفرن أكيد أخواتنا البارعات عارفينها ، ويمكن مضيفشي جديد لكن ححاول .
نجيب سمكة كبيرة من سمك الهامور ، تكفي 4 أو 5 أفراد ، وممكن بدل الهامور نجيب نقرور ، أو بالول ، أو نويبي ، ودي أنواع من السمك مشهورة في دول الخليج العربي.
وحقولكم على طريقة عمل الصوص .
مكونات الصوص :
زيت زيتون نصف كوب
معلقتين خل
ليمونتيت كبار أو 4 صغار يتعملوا عصير حسب الرغبة
توابل الصوص :
ملح
فلفل أسود وأحمر ( شطة يعني للي عايز )
كمية كمون مناسبة
إضافات أخرى :
توم مجرو ش( مدقوق أو مفروم )
2 حبة من الطماطم متقطعة قطع صغيرة جدا
بصلة خضراء صغيرة ( ولو مفيش يبقى بصلة صغيرة )
نصف حزمة كزبرة
نصف حزمة بقدونس
2 أو 3 أعواد من الكرفس ( ونخلي الورق بس من غير باقي العود)
بعد مانجهز الحاجات دي نكون محضرين السمكة الكبيرة أو السمك اللي حنقوم بحشوه بالخلطة اللي حددنا مقادريها .
بس الأول ننظف السمكة كويس ، ونغسلها من جوا كويس وخصوصا بعد ما نفتحها نغسلهل بشوية ملح وندعك من داخلها وننطر الملح أو نسيبه شوية وبعدين نغسلها بشوية مية .
طبعا أكيد السمكة حتكون اتنظفت تمام وجاهزة اننا نحط فيها الخلطة
طيب غيه اللي نعمله؟
حنحشي السمكة من جوا بكمية من الخلطة حشو كويس ، ونجيب ورق قصدير ونلف السمكة بيه ونغلفها كويس أوي ، ونيجي من فوق ونفتح فتحات صغيرة في الغلاف القصديري ده ، ونحط السمكة المغلفة في صينية مناسبة لحجمها إذا كانت سمكة كبيرة أو مناسبة برده إذا كانت مجموعة من السمك المتوسط .
وبعد مانحط السمكة في الصينية نحط حواليها باقي الخلطة اللي حشينا بجزء منها السمكة وغلفناها ، ونحط الصينية في الفرن لغاية ما تستوي .
نطلع الصينية من الفرن ويبقى قدامنا أكتر من خيار :
إما اننا ناكل من الصينية مباشرة ، أو ناخد جزء من الصوص اللي اتكون بعد السمكة ماتكون استوت وندهن بالجزء ده السمكة من فوق ونخليها تاخد نار الفرن من فوق ، ونعمل كده مع السمكة من تحت ونخليها برده تاخد نار الفرن من فوق ، كأننا بنشويها ، وشوفوا بقى الطعم سواء أكلنا منها مباشرة أو خلينها تاخد نار الفرن .
طبعا محتاجين رز جنب السمك ده ، وافتكر سهل أوي أننا نعمل الز للسمك : يعني نجيب بصلة ونحمرها في الزيت ونحط العقد أقصد مية مناسبة لغاية ماتغلي ونحط الأرز أبيض لغاية ما يستوي.
ولأصحاب المزاج في المأكولات البحرية اسمحوا لي أقدم لكم روبيان ( أقصد جمبري ) مشوي .
طيب وده حنعمله ازاي بقى ؟
أقول لكم :
حنجيب كمية من الروبيان على قد المطلوب ، ونغسلها كويس ونخلي الروبيان بحاله يعني يادوب نغسله تمام.
ونعمل الخلطة دي :
توم + كمون + ملح + فلفل = زيت زيتون + شطة + ليمون + خل
وحنعمل من المكونات دي عجينة ممكن نحتفظ بيها لأن العجينة دي هي خليط الكبدة الإسكندراني.
نحط على العجينة دي مية بصل ، يعني نعصر البصل بحيث يدينا المية بتاعته .
ونكون مجهزين الحاجة اللي حنشوي عليها الجمبري ، صفيحة شوي تكون نظيفة .
حنمسك كل جمبارياية لوحدها وندهنها بالخلطة دي قبل ما نحطها تتشوي وممكن نزود الملح حسب الرغبة على الجمبري وبعد ما نشوي الجمبري ندهنه بالصوص اللي عملناه للسمك في الفرن ، وممكن نشيل الراس من الجمبري ونحطه في الصوص في طبق مناسب ، وبرده شوفوا الطعم اللي ممكن تحسوا بيه ، يبقى احنا جمعنا بين الشوي والقلي تقريبا في السمك والجمبري.
مش عارف انا عكيت ولا لخبطت الدنيا لكن بصراحة المأكولات البحرية لاتقاوم .
*****
أكيد فيه ناس بتحب اللحم وفيه ناس بتحب الفراخ ، وناس بتحب الكبدة ، وحتلاقوا في البوفيه أصناف من اللحم كتيرة :
كباب حلة ، لحم محمر ، لحم مشوي ، لحم مسلوق ، خضار باللحم
وفيه فراج بانيه ، واستيك ، وشيش طاووق، وفراخ مشوية على الفحم أو مشوية في الشواية ، أو محشية .
ده غير الحمام المشوي ، أو الحمام المحشي بالأرز أو الفريك .
وطبعا حتلاقوا مكرونة بالباشاميل ومكرون اسباجيتي ، ومكرونة عادية ، ولسان العصفور .
ماتنسوش السلطة ، تحبوا سلطة أفرنجي ولا بلدي ؟؟؟
الأفرنجي سهلة جدا : طماطم ، خيار ، جزر ، فلفل أخضر ، خس
إنما السلطة البلدي يمكن تعجب بعضنا ، وممكن نحط فيها كل أنواع الخضرة ، يعني :
بصل ، توم ، جرجير ، خس ، ريحان ، نعناع ، فلفل أخضر ، بقدونس ، كزبرة ، كرفس ( طبعا كل ده يكون أخضر ) ويستحسن منحطش في السلطة البلدي خيار، وطبعا ما ننساشي الكمون ، والخل أو الليمون مع زيت زيتون .

د. حسان الشناوي
12-10-2006, 11:51 AM
طب والحلو إيه ؟
بصراحة انا برغم إني بحب القطايف والكنافة لكن مش بعرف أعملها وخايف اعجن القاطيف ولا أقطع الكنافة وتبقى مشكلة .
عشان كده حستأذنكم أخلي الحلو كوكتيل من الفواكه ( سلطة فواكه أقصد ) ودي سهلة ومغذية ومفيدة .
لكل 5 أفراد تقريبا نجيب :
تفاحة واحدة حمرا ، وتفاحة خضرا ، ربع كيلو عنب ، ثمرة كمثرى
3 أو 4 صوابع موز ، رمانة ، 2 ثمرة خوخ أو دراق أو نكترين لأن الفاكهة دي طعمها متقارب تقريبا ، 3 ثمرة كيوي، برتقالة أو اتنين ، 2 أو 3 من ثمرة الكوجا اللي هي تقريبا تعادل البرقوق عندنا في مصر ، 4 أو خمس من ثمرة الفراولة ، ثمرة أناناس كبيرة أو 3 من ثمرة أناناس بيبي .
حنقطع الفواكه دي قطع متوسطة ، ونخلطها ببعضها في طبق كبير مناسب ، ونحط عليها عصير مانجو أو ممكن نجهز عصير كوكتيل برده من بعض ثمار الفاكهة اللي احنا مجهزينها لسلطة الفواكه .
بعد ما نحط العصير على الفواكه اللي قطعناها قطع متوسطة ، نحطها في التلاجة وقت كافي عشان تبرد وتتقدم بكل هنا وشفا .
يا ترى بعرف أعمل حاجة .
ادعوا لي لو اللي انا قدمته عجبكم
واعذروني لو ما كانشي قد المقام .

د. حسان الشناوي
12-10-2006, 11:54 AM
أكيد انتم منتظرين الشعر .
ربنا يستر ويكون اللي حكتبه يعجبكم .
بس حستاذنكم بعد ما اشوف رأيكم في العك اللي انا عكيته ده
كل سنة وكل رمضان واحنا جميعا متجمعين على الخير والمودة .
ولازم اقدم الشكر الجزيل ؤلأصحاب الفكرة الرائعة
والسلام عليكم ورحمة الله وبركاته

amal3
12-10-2006, 12:20 PM
الله الله يادكتور حسان

ماشاء الله ولا أحسن شيف فى قنوات التليفزيون

أنا قولت من الأول أنك أستاذ دكتور فى المطبخ

تسلم أيدك والله الأكل جميل وشكله يفتح النفس

ولا الريحة الرائعة اللى شمنها

كل سنة وأنت طيب وربنا يعيد عليك الأيام بالخير يارب

أختك آمال مصطفى

boukybouky
12-10-2006, 12:30 PM
الله الله الله

الأسبوع ده باين عليه أسبوع الأطباق البحرية

تسلم إيدك يا دكتور و في إنتظار التحلية اللي هي

في رعاية الله ،،،

أم أحمد
12-10-2006, 12:48 PM
الله الله الله
يم يم يم يم
ريحة سمك تجنن وجمبري يلوح ههههه
جريت ريقي يا استاذ حسان
والمغرب لسه بدري اوي
يا سيدي اموت انا في اي ماكولات بحرية

لا بجد اسلوب حضرتك جميل في العرض
وكاننا فعلا بنطبخ سوا والوقت مر بسرعة اوي
لا حضرتك استاذ وشيف رائع كمان
طريقة السمك جميلة والجمبري اجمل وحلينا بالفروت سلاط
وكده مش هنتخلي عن حضرتك ابدا في المطبخ
ولازم تنورنا كل شوية عشان تمتعنا بالوصفات الجميلة دي دائما بعد رمضان

بس سيب حضرتك مش العامي اسهل من الفصحي
الحمد لله كده فهمنا الكلام من اوله لاخره
انا كنت خايفة موت حضرتك تقدم لنا النهاردة بالفصحي ومش افهم اي حاجة ههههههههه

صحيح انا لسه مستنية احلي قصيدة من روائع حضرتك
راجعة تاني عشان استمتع بالقصيدة ماشي ....
كل عام وانت بكل الخير
لك مني خالص التقدير

د. جمال مرسي
12-10-2006, 02:15 PM
صراحة يا دكتور حسان .. و المغرب أوشك أن يؤذن له .ز لقد أجريت لعابنا
و نحن جميعا متشوقون لأن ننقض على هذه الأصناف دفعة واحدة
بس بصراحة أنا ما كنت عارف انك بارع في المطبخ نفس براعتك في الشعر
عموما أنا منتظر السحور
و السحور أكيد أحلى قصيدة شعر
كل سنة و انت طيب يا أغلى الناس
و سفرة دايمة

ليلة عشق
12-10-2006, 07:14 PM
الأستاذ الدكتور حسان الشناوي

بجد حضرتك اليوم نورت المطبخ الجميل لا مطبخ ايه .....
الوليمة الجميلة واللمه الحلوه الي اتلميناها كلينا حوالين الأوبن بوفية الرائع من ايد حضرك ....
فعلا حسيت اننا كلنا قاعدين مع بعض وحضرتك بتحكيلنا علي طريقة السمك وكمان هامور ملك الاسماك يعني مافيش بعد كدة ......
تسلم ايدك يادكتور علي العزومة الجميلة جدا والصحبة الأجمل .....
وكل عام وحضرتك بخير ......

تحياتي
ليلة عشق

د. حسان الشناوي
13-10-2006, 11:16 AM
بسم الله الرحمن الرحيم
أولا الحمد لله رب العالمين على توفيقه ونزول الموضوع في موعده تقريبا
ثانيا أجدد شكري لأصحاب فكرة ( حيجوعنا ...حيجوعنا ) وخصوصا الأختين الفاضلتين : أم أحمد ، و boukybouky
ثالثا أعتذر عن عدم متابعة الردود ؛ لأن ( المنتدة لم أتمكن من دخوله أمس بالليل منذ منتصف الليل تقريبا حتى الفجر ، مع أن شبكة النت العامة كانت ( كويسة ) .
رابعا اضطررت أن أدخل ( سيبر ) لأحاول تقديم شكرلكا من تفضل بتشريفي في مطبخ المنتدى العامر
د. حسان الشناوي

د. حسان الشناوي
13-10-2006, 11:21 AM
الأستاذة الفاضلة ، الشاعرة المبدعة
أ. آمال
شكرا جزيلا على تشجيعك أولا قبل تقديمي أي شيء ، وشكرا مضاعفا على ثنائك الطيب ومجاملتك الرقيقة بخوص ما حاولت تقديمه .
صحيح كل واحد منا نحن الرجال يدعي أمه طباخ ماهر ، أو شيف بارع لكن الشطارة مش في الوصف وبس.
شكرا جدا لك ، وكل عام والجميع بخير وصحة وعافية

د. حسان الشناوي
13-10-2006, 11:25 AM
أبا رامي الحبيب
لست مدعوا ولا من أول المدعوين سيدي الكريم
أنت الداعي ونحن الملبين : ومش حقولك :
يا ضيفنا لو جئتنا لوجدتنا نحن الضيوف وأنت رب المنزل
لأننا إخوة ، لكن اسمح لي إن حضرتك تكون أول واحد يقول لينا : سموا الله ، أو حضرتك تبدأ بسم الله واحنا وراك.

د. حسان الشناوي
13-10-2006, 11:32 AM
د. جمال الحبيب
أكيد حضرتك قبلت إنك تبدأ بسم الله واحنا وراك
بس ياريت الأكل يكون عجبكم .
وكمان حضرتك مجامل جدا في حكاية اني طباخ بارع دي ، وده من ذوقك العالي في تذوق الطعام زي تذوقك للشعر بالظبط .
تعرف يادكتور جمال : أنا كنت بفكر أعمل لكم فتة أو رز معمر ، أو مقلوبة لكن خفت أنيل الدنيا فهربت على السمك بحيث لو غرقت يبقى محدش يعرف حاجة لكن أعك في الفتة ولا أقلب المقلوبة يبقى مش حينفع .
لو كنت اعرف اني مطالب بتقديم سحور ما كنتش أتأخرت خالص ولا يمكن انا اللي نسيت .
عموما ملحوقة أسهل سحور لبن رايب أو زبادي مع زيتوت وجبنة ومفيش مانع من طبق فول بالزيت والليمون وفنجان شاي أخضر .
ينفع السحور ده ولا اكتب من جديد؟؟؟
كل عام وأنت بخير وصحة وسعادة .

د. حسان الشناوي
13-10-2006, 11:37 AM
الأخت الكريمة
booky bouuky
أعتذر ان ردي على تقديمك ييجي هنا مع انه المفروض كان يكون اول رد لكن والله من فرط الحرص على استغلال الوقت ممكن يحصل خطأ غير مقصود ، فأرجو قبول العذر على ان الرد عليكي يكون هنا .
واختيارك بعض الأبيات المتواضعة من شعري تشجيع أولي قبل التشجيع المطبخي اللي تفضلتي بيه في تقديمك الراقي .
الف شكر على رقيك وذوقك وكرمك وحسن ظنك .
وكل عام وأنتي بألف خير .

لميس الامام
14-10-2006, 01:08 AM
أكيد انتم منتظرين الشعر .
ربنا يستر ويكون اللي حكتبه يعجبكم .
بس حستاذنكم بعد ما اشوف رأيكم في العك اللي انا عكيته ده
كل سنة وكل رمضان واحنا جميعا متجمعين على الخير والمودة .
ولازم اقدم الشكر الجزيل ؤلأصحاب الفكرة الرائعة
والسلام عليكم ورحمة الله وبركاته

د. حسان الشناوي

سفرتك عمرانة ما شاء الله ..وكل سنة وحضرتك طيب يارب ..عك ايه بس يا دكتور دي اكيد روعة ..ده انا ولو اني جيت متأخرة كتير لانقطاعي عن المنتدى كام يوم بسبب ضيوف الرحمن عندي لكن اكيد ملحوقة وعلى فكرة انا عملت عمرة ليلة واحد وعشرين رمضان وهي كما تعلم من الايام الفردية ..ودعيت لكل عضو في ابناء مصر ارجو ان يتقبل الله الدعاء ..
المهم الليلة اول ليلة افتح براحتي النت ولما لقيت حضرتك الشيف دخلت مشمرة سواعدي وخصوصا لما قريت عن السمكة الهامور...الله الله على السمك وعيلته ..اجمل حاجة في الدنيا بالنسبة لي اكلة سمك وتوابعها من المأكولات البحرية بس عارف ايه ..روعة ولو انه البوفيه مفتوح لكن كان تركيزي على السمك بصفة خاصة يمممممممممم تسلم ايديك انا كان نفسي اقوم انزل حلقة السمك واجيب هاموراية كبيرة حبتين وابدي اطبخها لبكرة وقلت في عقلي كنت فين يادكتور حسان من يومين وانا محتاسة في قائمة الافطار للضيوف..بس والله ما سايباها حاعملها حاعملها حتى لاول يوم العيد..فهي مشهية بشكل...تسلم ايديك وعنيك ويارب كل سنة وحضرتك طيب..

على فكرة لما اعملها حاقولك النتيجة الفورية ..مرة تانية كل سنة وحضرتك طيب والاسرة الكريمة بالف خير
حقيقي رمضان كريم..

دمت بكل الود يا دكتور وتعيش وتعمل سمك ..

لميس الامام

د. حسان الشناوي
18-10-2006, 11:04 AM
أجدد اعتذاري عن عدم الردود عشان ، وان شاء الله لي بعد العيد عودة لاستكمالها ؛ لأن عندي في جهاز الحاسوب مجموعة مشاكل