المساعد الشخصي الرقمي

مشاهدة النسخة كاملة : عن الشحاتة والشحاتين ....



خالد الهندسة
06-10-2006, 08:02 PM
اخواني واخواتي الاعزاء

كلنا نعرف ان الصدقة جزاءها عظيم عند ربنا وان النبي عليه الصلاة والسلام كان في الكرم كالريح المرسلة وكان أجود مايكون في رمضان وانه عليه الصلاة والسلام قال "مانقص مال من صدقة" ، بس بصراحة انا رايي ان الصدقة لازم تكون في المكان الصح ، ولذلك انا برفض اعطاء الشحاتين اللي في الشارع ، الا لو قصدني شخصيا وطلب مني ساعتها باروح مطلع له عملة فضية من جيبي (عشان تبقى ربع جنيه أو أقل ، بس مش عارف هعمل ايه بعد ماطلعوا الجنيه والنص جنيه المعدن ؟؟؟) لاني والحمدلله اعرف ناس مستحقين لكل قرش ومابيطلبوش من حد ، ولما حد يروح يديهم دموعهم بتنزل ، المهم عشان ماطولش عليكم ، دي بعض اصناف الشحاتين وانواع الشحاتة اللي مرت علي واللي ممكن تعدي على اي واحد فينا :

واحد شحات في السعودية طلع في المسجد بعد الصلاة وطلب من الناس مساعدة وعشان يعرفنا انه محتاج قوي حلف انه "ماعندوش لامكيف ولاسيارة" ، ياحرام ، ياترى الشحات ده لو جه في مصر وقال الكلام ده هيحصل له ايه ؟

شحاتة جات لواحدة جارتنا وطلبت منها مساعدة ، المهم الست قالت لها "ماعنديش حاجة اديها لك النهاردة" ، قالت لها "طب اديني بصلة اطبخ بيها" ، يعني خلي عندك دم واديني اي حاجة .

واحدة شحاتة لسة واخدة شقة في المساكن الشعبية مقدمها لايقل عن 15 الف جنيه وعندها دش (بكسر الدال طبعا) ، وماعندهاش ولاد ( واحنا بندفع ايجار وصلة الدش بعد مانطلع عين الراجل ، حسرة علينا) .

واحد شحات مقطوع الساقين بيطلع في القطر ويوزع على الناس كارت مكتوب فيه انه عاجز وبيصرف على اخواته وامه وولاد خالته ..... الخ ، ويرجع يلم الكروت دي تاني ، لو اديته الكارت معاه فلوس ياخده منك من غير حتى مايقولك شكرا ، اما لو رجعته فاضي يبص لك بصة كانك قاتل ابوه ويخطفه من ايدك بحركة عصبية تنرفزك ، في يوم سمعته قاعد في البوفيه بتاع القطر وبيقول للعامل بتاع البوفيه "الشهر اللي فات ياعم كنت في الغردقة ورحت طالب عالغدا جوزين حمام ، 4 فرد ومعاهم طاجن رز وطاجن خضار باللحمة ، حتى اسال مش عارف مين ، كان معايا ، كنت عاوز اروح اساله "كابتن ، قدرت تاكل الاربع فرد لوحدك ؟ " بس على ايه ؟ الطيب احسن .

واحد محترم قوي قابلني وسلم علي كانه يعرفني من زمان وقال لي انه معيد في الجامعة ، وطلب مني 13 جنيه عشان عاوز يروح الاسماعيلية ومحفظته ضاعت وشكله باين قوي انه بيمثل ، المهم قلت له انا ممكن اديك 2 جنيه تتصل بحد من معارفك يجيب لك فلوس وييجي (واحد صاحبي كان نصحني بالحل ده بعد موقف مشابه) فقال لي "لا ، انا ماباشحتش منك" وسابني ومشي ، انا غلطان كدا ؟

واخيرا الشحات اللي خلاني كرهت كل الشحاتين ، كان قاعد في الطريق وكاشف رجله وكانت مشوهة وعليها ميكروكروم وخلافه ، والاولاد الصغيرين طالعين من المدرسة ، وقفوا يبصوا عليه في براءة ، وهو عمال يقول لهم "يارب عقبال اهاليكم" .

المهم ، انا مش عاوز اقطع رزق حد في الشهر الكريم ده ، ودي وجهات نظر ، ومش عارف الموضوع مكانه هنا في فك التكشيرة ولا لأ ، بس عاوز افضفض ، مانتو لازم تستحملوني .

moura
06-10-2006, 10:30 PM
يااااااااااااااااااه يا خالد...دة انت شايل منهم جامد جداااااا

ههههههههههههههههههههه

بس بجد عندك حق فى اللى قلته.....فيه كدة كتير قوى.....

:helpsmilie2: :helpsmilie2: :helpsmilie2:

خالد الهندسة
07-10-2006, 08:19 PM
يااااااااااااااااااه يا خالد...دة انت شايل منهم جامد جداااااا

ههههههههههههههههههههه

بس بجد عندك حق فى اللى قلته.....فيه كدة كتير قوى.....

:helpsmilie2: :helpsmilie2: :helpsmilie2:


شكرا لك ياعزيزتي مورا ، وربنا يجبر بخاطرك عشان رديتي علي .

وكل سنة وانت طيبة .

ندى الايام
07-10-2006, 08:31 PM
انا يا خالد معاك فى كل اللى انت قولته ده طبعا
وحكايه انى حد شكله كويس ويقولك محفاظتى ضاعت
اتعملت فيا كتير لدرجه انى قولت هى الناس ليه مش بتخلى
بالها من فلوسهاهههههههههه وبعدين عرفت انها طريقه جديده
للشحاته وعلى العموم المحتاج مش بيقول حاجه الناس هى اللى بترحله
لحد عنده وربنا يدوم علينا نعمته يا رب وما يحوجنا لحد ابدا

طـــــير في الســـما
08-10-2006, 01:16 AM
سلام الله عليك يا أستاذ خالد.......شكرا علي الكام موقف دول، الحقيقة انا معاك جدا جدا في اللي قلته،عندنا في بورسعيد الشحاتين اشكال و الوان في المعديات، حاجة تكسف قدام الضيوف.......لكن لو كلنا قررنا نعطي كل ذي حق حقه ، و نوقف الظاهرة دي هننجح ان شاء الله ، و شكرا ليك:good: :good: :good:

reem1
08-10-2006, 02:05 AM
طيب انا بقى حصل معايا موقف غريب جدا
كنت فى طريقى لبيت بنت زميلتىوقابلت واحدة ست وكانت رجليها وايديها جو الجبس وشكلها متبهدل خالص وطبعا صعبت عليا جدا ورحت اديتها فلوس وطول مانا ماشية فضلت ادعيلها وانا متاثرة جدا جدا
المهم وصلت بيت زميلتى دى وبعد وقت طلعنا وقفنا فى البلكونة وفضلنا ندردش وشوية ولمحت نفس الست دى ولقيتها داخلة شارع صغير جنب البيت وراحت فكت الجبس والشاش ولبست لبس حلو اوى وكمان حطت روج واللذى منه وراحت ماشية
قولولى بقى لو مكانى ممكن تعملو ايه...
حقيقى الناس بقت بتتجه للشحاته ع انه مشروع تجارى سهل ومربح كمان ومحدش بقى عارف مين يستاهل الصدقة ومين مش يستاهل
الحكاية دى بقت فعلا مشكلة والمفروض ان تبقى فى مشروعات للتكافل الاجتماعى واماكن يلجا ليها المحتاجين بجد وساعتها ممكن فعلا تتصدق وانت متاكد ان فلوسك دى هتساعد بيها شخص يستحق المساعدة دا غير ان شكل شوارعنا هيبقى احسن بكتير ولا ايه؟؟

mr_virus
08-10-2006, 09:53 PM
كلامك صح 100000%
والشحاتة دلوقتى بقت هواية وشغل

عبده الدرملى
09-10-2006, 04:19 PM
والله الموضوع ده بجد مثير
انا هاحكيلكم عن ست شحاته عندنا فى الاسكندريه
كنت اعمل على كورنيش الاسكندريه منذ فتره وكان هناك راجل جالس على كرسى بعجل وبيمشيه ابنه وكان شاب قوى وفجاه ظهرت الشحاته ديه وراحت متعاركه معاهم وقالتلهم انتوا ايه اللى جابكم هنا المنطقه ديه بتاعتى انا النهارده هاقول للمعلم والله هذا هو ما حدث ولم يراعوا وجود هذا الكم من المصيفين حولهم
وهذه قصه اخرى عن الشحاتين
كان فى نفس الموسم على الكورنيش شب واقف بيبيع شرائط كاسيت ومره عدى شحات رجليه الاثنين مقطوعين وبيزحف على الارض فوقف اشترى اربع شرايط وطبعا الفلوس اللى كان بيطلعها كانت من فئه الربع والنصف جنيه وقالنا ممكن توقفولى مشروع بحرى فعلا وقفناله المشروع وركبناه وسط ذهولنا جميعا
معلش طولت عليكم بس الموضوع اثارنى
وشكرا

خالد الهندسة
10-10-2006, 09:14 AM
انا يا خالد معاك فى كل اللى انت قولته ده طبعا
وحكايه انى حد شكله كويس ويقولك محفاظتى ضاعت
اتعملت فيا كتير لدرجه انى قولت هى الناس ليه مش بتخلى
بالها من فلوسهاهههههههههه وبعدين عرفت انها طريقه جديده
للشحاته وعلى العموم المحتاج مش بيقول حاجه الناس هى اللى بترحله
لحد عنده وربنا يدوم علينا نعمته يا رب وما يحوجنا لحد ابدا

كلامك صح فعلا يااخي (أو يااختي ، انا اسف الاسم مش موضح) وربنا مايحوجناش لحد ، اللهم آمين

خالد الهندسة
10-10-2006, 09:18 AM
سلام الله عليك يا أستاذ خالد.......شكرا علي الكام موقف دول، الحقيقة انا معاك جدا جدا في اللي قلته،عندنا في بورسعيد الشحاتين اشكال و الوان في المعديات، حاجة تكسف قدام الضيوف.......لكن لو كلنا قررنا نعطي كل ذي حق حقه ، و نوقف الظاهرة دي هننجح ان شاء الله ، و شكرا ليك:good: :good: :good:

آه ، فكرتيني بالمعدية ، مارحتش من زمان ، وفعلا كلامك مضبوط ، لو كل واحد فكر قبل مايطلع الصدقات هي رايحة لفين كان افضل بكتير ، لكن ناس كتير بتدي بالعشرات لشحاتين الشوارع ، ربنا يهدي .

شكرا ياايمان وكل سنة وانت طيبة .

خالد الهندسة
10-10-2006, 09:21 AM
طيب انا بقى حصل معايا موقف غريب جدا
كنت فى طريقى لبيت بنت زميلتىوقابلت واحدة ست وكانت رجليها وايديها جو الجبس وشكلها متبهدل خالص وطبعا صعبت عليا جدا ورحت اديتها فلوس وطول مانا ماشية فضلت ادعيلها وانا متاثرة جدا جدا
المهم وصلت بيت زميلتى دى وبعد وقت طلعنا وقفنا فى البلكونة وفضلنا ندردش وشوية ولمحت نفس الست دى ولقيتها داخلة شارع صغير جنب البيت وراحت فكت الجبس والشاش ولبست لبس حلو اوى وكمان حطت روج واللذى منه وراحت ماشية
قولولى بقى لو مكانى ممكن تعملو ايه...
حقيقى الناس بقت بتتجه للشحاته ع انه مشروع تجارى سهل ومربح كمان ومحدش بقى عارف مين يستاهل الصدقة ومين مش يستاهل
الحكاية دى بقت فعلا مشكلة والمفروض ان تبقى فى مشروعات للتكافل الاجتماعى واماكن يلجا ليها المحتاجين بجد وساعتها ممكن فعلا تتصدق وانت متاكد ان فلوسك دى هتساعد بيها شخص يستحق المساعدة دا غير ان شكل شوارعنا هيبقى احسن بكتير ولا ايه؟؟

هههههههههه ، المشكلة انها ممكن تكون رايحة تعمل راندفو بفلوسك ، هههههه ، بس انت خدتي الاجر والثواب ان شاء الله .

وعلى فكرة لو دورت حواليكي هتلاقي جمعيات كتير قوي بتعمل اللي انت بتقولي عليه دا ، وربنا يتقبل منك ياستي .

كل سنة وانت طيبة .

خالد الهندسة
10-10-2006, 09:23 AM
كلامك صح 100000%
والشحاتة دلوقتى بقت هواية وشغل

هي فعلا بقت هواية وشغل ولها مديرين ومديرين مساعدين و... الخ ، ربنا ينتقم منهم

شكرا على ردك يامستر فايروس

خالد الهندسة
10-10-2006, 09:28 AM
والله الموضوع ده بجد مثير
انا هاحكيلكم عن ست شحاته عندنا فى الاسكندريه
كنت اعمل على كورنيش الاسكندريه منذ فتره وكان هناك راجل جالس على كرسى بعجل وبيمشيه ابنه وكان شاب قوى وفجاه ظهرت الشحاته ديه وراحت متعاركه معاهم وقالتلهم انتوا ايه اللى جابكم هنا المنطقه ديه بتاعتى انا النهارده هاقول للمعلم والله هذا هو ما حدث ولم يراعوا وجود هذا الكم من المصيفين حولهم
وهذه قصه اخرى عن الشحاتين
كان فى نفس الموسم على الكورنيش شب واقف بيبيع شرائط كاسيت ومره عدى شحات رجليه الاثنين مقطوعين وبيزحف على الارض فوقف اشترى اربع شرايط وطبعا الفلوس اللى كان بيطلعها كانت من فئه الربع والنصف جنيه وقالنا ممكن توقفولى مشروع بحرى فعلا وقفناله المشروع وركبناه وسط ذهولنا جميعا
معلش طولت عليكم بس الموضوع اثارنى
وشكرا

فعلا هذا هو الواقع ، وانا شفت شحاتة قاعدة في مكان ومعاها كيس بتحط فيه الفلوس في يوم كان فيه سوق والدنيا زحمة ، واذا بامراة تمر عليها وتاخذ هذا الكيس لتفرغه في كيس تاني معاها ثم تعطيه لها مرة اخرى ، واضح ان الست دي هي المحصل بتاعهم ، وشحاتة تانية كانت عمياء وقاعدة جنب مسجد وحاطة ايدها على خدها وفيه ناس كتير معدية ، جات واحدة عدت وراحت رايحة لها وفاردة لها ايديها في وضع السؤال وهي بتوبخها ، اكيد هي ماعملتش كدا لوجه الله .

شكرا على مشاركتك يااستاذ عبده ، وسلامي للاسكندرانية .

بنت شهريار
10-10-2006, 08:40 PM
واحد محترم قوي قابلني وسلم علي كانه يعرفني من زمان وقال لي انه معيد في الجامعة ، وطلب مني 13 جنيه عشان عاوز يروح الاسماعيلية ومحفظته ضاعت وشكله باين قوي انه بيمثل ، المهم قلت له انا ممكن اديك 2 جنيه تتصل بحد من معارفك يجيب لك فلوس وييجي (واحد صاحبي كان نصحني بالحل ده بعد موقف مشابه) فقال لي "لا ، انا ماباشحتش منك" وسابني ومشي ، انا غلطان كدا ؟

طبعا مش غلطان
دى مهنه ولها تخصصاتها واساليبها
يااااااااااااااما قرفونا ايام الجامعه
لا وييجى يلزق فيك ويشد الشنطه ويفضل ماشى وراك لغايه ما تبقى عاوزة تشيله تحدفه فى البحر
وان ماعطيتوش ممكن يشتمك او يدعى عليك
لا وكانت دعواتهم تهلك من الضحك..

لا وممكن تلاقى واحد طويل عريض وصحته ماشاء الله
يعنى ممكن يشتغل اى حاجه
بس تقول ايه بقى يخليك تتفرس اكتر
لا ولو قلت مش معاك فكه يقولك افكلك
وتلاقى معاه اكتر من اللى معاك
هههههههههه
اللى يعيش ياما يشوووووووووووف
وكل سنه وانتم طيبين
مشكووووووووووور خالد على موضوعك الجميل
تحياتى

خالد الهندسة
11-10-2006, 09:24 AM
طبعا مش غلطان
دى مهنه ولها تخصصاتها واساليبها
يااااااااااااااما قرفونا ايام الجامعه
لا وييجى يلزق فيك ويشد الشنطه ويفضل ماشى وراك لغايه ما تبقى عاوزة تشيله تحدفه فى البحر
وان ماعطيتوش ممكن يشتمك او يدعى عليك
لا وكانت دعواتهم تهلك من الضحك..

لا وممكن تلاقى واحد طويل عريض وصحته ماشاء الله
يعنى ممكن يشتغل اى حاجه
بس تقول ايه بقى يخليك تتفرس اكتر
لا ولو قلت مش معاك فكه يقولك افكلك
وتلاقى معاه اكتر من اللى معاك
هههههههههه
اللى يعيش ياما يشوووووووووووف
وكل سنه وانتم طيبين
مشكووووووووووور خالد على موضوعك الجميل
تحياتى

كلامك صحيح اختي العزيزة ، وبعين احسن حل مع الجماعة الارذال بدون الجامعة دول انك تسيبيهم وتمشي لانك لو شتمتيهم او ضربتيهم عشان يبعدوا عنك ، عينك ماتشوف الا النور ، هيطلعوا لك بلطجية من تحت الارض اللي مشغلين العيال دول ويوروك النجوم في عز الظهر وبلاش اقول لك تجربتي .

شكرا جزيلا على الرد .

طـــــير في الســـما
11-10-2006, 10:05 PM
و انت طيب يا أستاذ خالد


Photo Gallery