المساعد الشخصي الرقمي

مشاهدة النسخة كاملة : د.ابو دنيا هيجوعنا...هيجوعنا



boukybouky
01-10-2006, 03:57 AM
السلام عليكم و رحمة الله و بركاته

تمر أيام الشهر الكريم سريعاً و ما أجملها من أيام

و حقاً هذا العام يزيد إستمتاعنا في المنتدي

بالدرر التي تقدم من مبدعيه و اليوم نلتقي و درة جديدة

موعدنا مع د.ابو دنيا و طبق من أطباقه المفضلة

أما الحلو ...فهذا سنتركه لإختياره لنا من أجمل ما كتب

فلتستعد لدخول مطبخنا العامر

http://gallery.egyptsons.com/data/media/49/kitc14.jpg (http://gallery.egyptsons.com)

دمتم بكل خير

في رعاية الله ،،،،

إلي الغد و مبدع جديد و طبق لذيذ و كلام مفيد:f2:
في رعاية الله ،،،

amal3
01-10-2006, 07:15 AM
أهلا بيك يادكتور أبو دنيا

أتفضل أدخل المطبخ نحن السابقون وأنتم اللاحقون

مش هقولك ياترى وياهل ترى ...لأن التجربة أثبتت بالفعل أن الشعراء زى ماهما شطرين

فى طهى القصايد ومزج و فرم الأحاسيس والمشاعر برضو هما شطرين فى الطهى

والرص والتقديم وبيذيدو عن الناس العادية فى طريقة الترحيب بالضيوف وأمتاعهم

يالقصائد المحلاه بكل أصناف الحلويات

نحن فى الأنتظار وربنا معالك

أختك آمال مصطفى

عصام علم الدين
01-10-2006, 11:23 AM
أخي الحبيب أبو دنيا
سلام الله عليكم ورحمته وبركاته

إنت طبعاً عارف إن أنا معزوم غصب عنك
يعني تعمل حسابي في الأكل
وأنا بالرغم من كل مشاغلي وإلتزاماتي
وبالرغم من إن الوقت هنا في رمضان بيكون صعب شويه
لكن ماقدرتش أقاوم ريحة البصل والثوم اللي في كواليس الصفحه
حتى وأنا بعيد قوي كيده

كل سنه وأنت بألف ألف خير ورمضان كريم أخي الحبيب

أخوك
عصام علم الدين

sayedattia
01-10-2006, 11:33 AM
الأخ العزيز والشاعر المتدفق / د . أبو دنيـــــــــــــا

المطبخ وراءكم وأحنا أمامكم .. متربصون بك ومستنين ياتري ح تفطرتا إيه ولا إيه ولا إيه
وأهم من الفطار الحلو وطبعا ح تكون قصيدة رائعة من روائعكم العظيمة
الأكل نساني أقول لحضرتك : كل عام وأنتم بخير وسعادة .... ورمضان كريم
وفي إنتظارإفطارك الشهي اللذيذ ... يا لذيذ يارايق ....
تقبل مودتي ..........

د. جمال مرسي
01-10-2006, 02:46 PM
و هل أجمل من أن نكون ضيوفا على مائدة صانعها و مهيؤها هو الدكتور فوزي

يللا يا بطل ورينا الهمة

لما نشوف الدكاتره طبخهم بيبقى ازاي

و أنا متأكد من براعتك هنا مثل براعتك في الشعر

تحياتي و حبي

و كل عام و أنتم بخير

أم أحمد
01-10-2006, 08:37 PM
اهلا بيك دكتور ابو دنيا
بس شكل حضرتك كده عاوز تجوعنا بجد
ادينا خلصنا الفطار ومستنين السحور
يا ريت بقي مش تتاخر علينا اكتر من كده لحسن نموت من الجوع هههه
وانا متاكدة ان شاء الله ان حضرتك ابو الكرم يبقي مش هتتاخر علينا اكتر من كده صح ولا ايه:d
في انتظار ما تجود به علينا في مائدة الافطار
والاستمتاع باعذب الكلمات في احلي قصيدة
وكل عام وانت والاسرة الكريمة بكل خير

د.ابودنيا
01-10-2006, 08:57 PM
السلام عليكم و رحمة الله و بركاته

تمر أيام الشهر الكريم سريعاً و ما أجملها من أيام

و حقاً هذا العام يزيد إستمتاعنا في المنتدي

بالدرر التي تقدم من مبدعيه و اليوم نلتقي و درة جديدة

موعدنا مع د.ابو دنيا و طبق من أطباقه المفضلة

أما الحلو ...فهذا سنتركه لإختياره لنا من أجمل ما كتب

فلتستعد لدخول مطبخنا العامر

http://gallery.egyptsons.com/data/media/49/kitc14.jpg (http://gallery.egyptsons.com)

دمتم بكل خير

في رعاية الله ،،،،

drawFrame()



إلي الغد و مبدع جديد و طبق لذيذ و كلام مفيد:f2:
في رعاية الله ،،،


اهلا بوكى وكل سنة وانتى طيبة وشكرا على الدعوة الجميلة
ويارب افلح فى الموضوع ده
ومعذرة ان كنت اتاخرت انا لسة راجع من اسكندرية وفطران فى الطريق
لكن ربنا يسهل

د.ابودنيا
01-10-2006, 09:06 PM
أهلا بيك يادكتور أبو دنيا

أتفضل أدخل المطبخ نحن السابقون وأنتم اللاحقون

مش هقولك ياترى وياهل ترى ...لأن التجربة أثبتت بالفعل أن الشعراء زى ماهما شطرين

فى طهى القصايد ومزج و فرم الأحاسيس والمشاعر برضو هما شطرين فى الطهى

والرص والتقديم وبيذيدو عن الناس العادية فى طريقة الترحيب بالضيوف وأمتاعهم

يالقصائد المحلاه بكل أصناف الحلويات

نحن فى الأنتظار وربنا معالك

أختك آمال مصطفى


كفاية انك تقدمينى
كلامك زوق ورقة ودافع للعمل
اما حكاية الرص دى هسيبهالك طبعا انتو شاطرين فى الحكاية دى
الرص والتنسيق
واقولك على حاجة ومتقوليش لحد بمناسبة الرص دى
اول مؤتمر رحتة كان ولله الحمد فى مصر فى اسكندرية
وجه وقت الغدا وخدونا على فندق هناك
المهم
انا راجل ريفى اصلا -- فلاح
واخد ع الطبلية ورصة الاطباق عليها
لقيتهم جايبين شوربة وسبوها ومشيو
وكان معايا تلاتة زميلى زى حالاتى
المهم فضلنا لما الشوربة سقعت واحنا قاعدين نبصلها
وفجاءة لقينا الاخ اللى قدم الطلبات بيقولنا اشربو الشربة الاول
هو عرف وحس اننا فلاحين ومش واخدين على بروتوكلات الاكل فى الفنادق او المطاعم الكبيرة
احنا قاعدين مستنين الهبر -- اللحمة
اتارى الاطباق بتتقدم طبق طبق واحنا مش عارفين وقاعدين ساكتين
شفتى
اوعى تقولى لحد بقى

د.ابودنيا
01-10-2006, 09:11 PM
أخي الحبيب أبو دنيا


سلام الله عليكم ورحمته وبركاته

إنت طبعاً عارف إن أنا معزوم غصب عنك
يعني تعمل حسابي في الأكل
وأنا بالرغم من كل مشاغلي وإلتزاماتي
وبالرغم من إن الوقت هنا في رمضان بيكون صعب شويه
لكن ماقدرتش أقاوم ريحة البصل والثوم اللي في كواليس الصفحه
حتى وأنا بعيد قوي كيده

كل سنه وأنت بألف ألف خير ورمضان كريم أخي الحبيب

أخوك
عصام علم الدين


حبيب قلبى لازم تكون اول واحد بس يارب عكى يعجبك
انا قلبى بعتلك دعوه
وصلتلك ولا لا:f: :f: :f:

عارف ياعصام فكرنى الموضوع ده برمضان وانا صغير
فى اولى ابتداى كدة
كنت عايز اصوم -- اصوم للضهر واجوع واعطش وافطر
بعدين هدانى تفكيرى
انا اتسحر قبل الفطار واصوم بالليل وانا نايم
واصحا الصبح افطر براحتى
مانا صايم طول الليل
كانت ايام جميلة
كل سنة وانت طيب والاسرة الكريمة كلها طيبة

د.ابودنيا
01-10-2006, 09:31 PM
الأخ العزيز والشاعر المتدفق / د . أبو دنيـــــــــــــا



المطبخ وراءكم وأحنا أمامكم .. متربصون بك ومستنين ياتري ح تفطرتا إيه ولا إيه ولا إيه
وأهم من الفطار الحلو وطبعا ح تكون قصيدة رائعة من روائعكم العظيمة
الأكل نساني أقول لحضرتك : كل عام وأنتم بخير وسعادة .... ورمضان كريم
وفي إنتظارإفطارك الشهي اللذيذ ... يا لذيذ يارايق ....
تقبل مودتي ..........



الشاعر الرائع والاخ الفاضل استاذ سيد عطية
وجودك فكرنى بلمتنا زمان عيلة ولمة
فى المطبخ النهاردة انا محتاس صحيح
لكن وجودك بيشجعنى
مشكلتى فى المطبخ انى كسلى
والمطبخ يحب النشاط
وكمان مشكلتى انى مش اكيل قوى
ولا ذواق للطعام
علشان كده زوجتى مرتاحة جدا
وتقولى دايما انت مريح قوى وانا بحبك علشان كدة
اقولها بس تفضل تضحك
كمان هى علمتنى الكسل اكتر
لو حبيت اشرب كوبايه ميه تجبهالى
لما خلتنى ان سافرت بتعب قوى
وببقى مهمل وازهق من نفسى
مع انى كنت بعمل حاجتى لوحدى زمان

كل سنة وانت طيب ورمضان كريم

د.ابودنيا
01-10-2006, 10:22 PM
و هل أجمل من أن نكون ضيوفا على مائدة صانعها و مهيؤها هو الدكتور فوزي

يللا يا بطل ورينا الهمة

لما نشوف الدكاتره طبخهم بيبقى ازاي

و أنا متأكد من براعتك هنا مثل براعتك في الشعر

تحياتي و حبي

و كل عام و أنتم بخير

ياهلا ياهلا بعميد شعراءنا الاقاضل
اهلا بمدرسة الشعر والحرف النقى
مرورك فكرنى على طول بالبلد ورمضان فى الريف المصرى انت عارف بيبقى جميل اد ايه
كله عزايم وحاجات كدة زى اللى انت كنت عاملها فى عزومة د. سمير العمرى
قالولى حتى عزومة حاجة تشرف
قلت ياسلام على بختنا .......... يالا
كنا نيجى بعد العصر ونفضل نلعب كوة لحد ادان المغرب
كانو اهالينا يقولولنا انتو مش صاييمين
واحنا ولا هنا
لما افتكر نفسى دلوقتى والصيام مخلينى مش قادر امشى حتى اضحك على الايام الخوالى
كنا نمشى باليل على جسر النيل ونحكى حكايات
كان لسة التلفزيون مظهرشى ولما ظهر التلفزيون جابولنا الحكومة واحد فى الجمعية الزاعية
ولما واحد جاب واحد وعمله قهوة الاهالى فضلت تدعى علية علشان بيسهنا ويخلينا منسحرشى ولانصلى الفجر
ودى حاجات كانت مزعجة للاهالى فى الريف
ايام
كل سنة وانت طيب والاسرة الكريمة بخير وسعادة

د.ابودنيا
01-10-2006, 10:36 PM
اهلا بيك دكتور ابو دنيا
بس شكل حضرتك كده عاوز تجوعنا بجد
ادينا خلصنا الفطار ومستنين السحور
يا ريت بقي مش تتاخر علينا اكتر من كده لحسن نموت من الجوع هههه
وانا متاكدة ان شاء الله ان حضرتك ابو الكرم يبقي مش هتتاخر علينا اكتر من كده صح ولا ايه:d
في انتظار ما تجود به علينا في مائدة الافطار
والاستمتاع باعذب الكلمات في احلي قصيدة
وكل عام وانت والاسرة الكريمة بكل خير

اختى العزيزة ام احمد
هقولك على حاجة بمناسة اكلات رمضان دى
دا اول رمضان افطر فيه عند اختى ام احمد
كل رمضان اعزمها واولادها وزوجها لكن بقالها اكتر من 15 سنة متجوزة مفطرتش عندها فى رمضان ولا مرة واحدة
رغم انها بينها وبينى شارع
انا نفسى مش عارف لية
لكن لقيتنى من يومين واخد بعضى ورايح افطر عندها
مش عايز اقولك كانت فرحانة اد اية
فى اليوم ده مفطرتشى
طول الوقت تبصلى كانها اول مرة تفشنى
اقولها كلى تقولى انا شبعانة
حسيت ان مش كفاية اروحلها فى الاعياد وزيارات عادية فى الايام العادية
لكن يجب ان افطر عندها يوم فى رمضان
اد ايه رمضان جميل فى اللمه

كل سنة وانتى طيبة والاسرة الكريمة فى اسعد حال واهناء بال

د.ابودنيا
01-10-2006, 10:41 PM
هعملكم طبق انا بسمية سلطان السفرة الا وهو طبق السلطة

خلونى اعمل السلطة النهاردة
وهقول لكم على المقادير
قفصين طماطم ونص
عرشين بصل ونص
عرش توم ونص
قفة بقدونس ونص
حمل خس ونص
لتر خل الا نص

شوفو بقى مين هيخرط معايا
انا سامع واحد بيقول المقادير دى مش هتكفى
عامل حسابى
هذه المقادير تكفى 50 واحد
وبمبا ان المنتدى فية 30.000 فرد مشتركين
يبقى احسبو وهاتو الكمية كلها

انا ليه اختارت السلطة .. لانى لما كنت فى القرية
كانت عمايل السلطة لها طقوس خاصة تحس فيها انك فى رمضان
ولما يجى رمضان دلوقتى افتكر ايام القرية لما كنا نزرع مستلزمات السلطة فى الغيط
من قبل رمضان علشان رمضان
كانت ايام جميلة .. علشان كدة اخترت السلطة
لانها من الماكولات المصرية الضاربة فى جذور المجتمع والزمن
وكل سنة وانتم طيبين

د.ابودنيا
01-10-2006, 10:46 PM
م الجوع انا جسدى انهار


قومى يالا ياست الدار


انا جبت معايا طماطم


حبة بقرش يكفو حمار


مش ناقص عندك فيا


قومى ياللى وهمى شوية


الشبت اللى انا جبتوهلك....


.......والبقدونس ميه الميه


والخص الحملاوى فين


دا خضارو بيملا العين


والشطة سودانى


ياعينى


مشتاقة بق الغاليين


خرطى منهم قرنين





ودمتم طيبين وكل عام وانتم بخير


ومطبخ جميل

يحيى زكريا
01-10-2006, 11:49 PM
م الجوع انا جسدى انهار


قومى يالا ياست الدار


انا جبت معايا طماطم


حبة بقرش يكفو حمار


مش ناقص عندك فيا


قومى ياللى وهمى شوية


الشبت اللى انا جبتوهلك....


.......والبقدونس ميه الميه


والخص الحملاوى فين


دا خضارو بيملا العين


والشطة سودانى


ياعينى


مشتاقة بق الغاليين


خرطى منهم قرنين





ودمتم طيبين وكل عام وانتم بخير


ومطبخ جميل





لاءلاء استاذ ابو دنيا..

لا دانت ضحكت عليا..

مش حفطر ابدا سلطه...

من غير لحمه وتسقيه...


حتقوم فورا فى الحال..

تعمل لى لحوم اشكال...

ويا فراخى من كنتاكى...

مهما حتغرم اموال....



قوم يالا قوام يا جميل...

هات لى حمام وزغاليل...

لالف فى كل الدنيا...

الحقوا ابو دنيا بخيل..



استاذى ابودنيا ...

يرضيك يعنى بعد الصبر والصيام تقوللى سلاطه ...

لا يا عم انا عاوز هبر وفراخ وبط ووز...

بس الحقيقه حضرتك عملت السلاطه بطريقه جميله تسلم ايدك وكل سنه وحضرتك طيب...

شاعر الرومانسية
02-10-2006, 12:06 AM
سلطة حنفطر ماشى ومالو
المهم انها من ايدك
خيار ياعينى على جمالو
حناكل ونشبع وربى يزيدك

بس ياريت تعمل معروف
اياك تبقى كدة مكسوف
كفاية حروفك ..
دى احلى حروف
وزمان قالو فى الامثال
ان البصلة من احبابنا
تبقى خروف


تسلم ايدك يا استاذنا ..:y:

بس هات ودنك ....
" السلطة الخضرا مش بيتحطلها ولا توووم ولا شبت " بسسسسسسسسس:eek:
ولا كأن حد شاف حااااجة:2:

وعقبال كل عزومة يا عزيزى:good:

boukybouky
02-10-2006, 12:09 AM
انا برده قلت هنجوع في رمضان ههههههههههههه

سلطة يا د.ابو دنيا طيب هنشبع إحنا إزاي

كده الطبق اليوم لمحبي عمل الريجيم

تسلم إيدك و علي العموم الطبق زينه و جمله كلماتك الجميلة

و هي طبقنا اليوم :)

دمت بكل خير

في رعاية الله ،،،

ليلة عشق
02-10-2006, 07:56 AM
الشاعر النقي د أبو دنيا

كل الشكر لحضرتك علي سلطان السفرة .....
بالفعل طبق السلاطة شيء جميل جدا وله طعم غير في رمضان .....
لكن كدة يادكتور تبقي عزومة صعبة قوي طيب جنبها شوربه أو أي حاجة خفيفة .....
أكيد حضرتك خايف علينا وعلي صحتنا الا نتخن بس ماتقلقش علي رأي شاعر الرومانسية دكاترة الرجيم موجودين .....
عموما سلمت يداك علي السلطة والقصيدة ....
وكل عام وأنت بخير ....
لك الشكر والتقدير ....

تحياتي
ليلة عشق

أم أحمد
02-10-2006, 09:05 AM
هعملكم طبق انا بسمية سلطان السفرة الا وهو طبق السلطة

خلونى اعمل السلطة النهاردة
وهقول لكم على المقادير
قفصين طماطم ونص
عرشين بصل ونص
عرش توم ونص
قفة بقدونس ونص
حمل خس ونص
لتر خل الا نص

شوفو بقى مين هيخرط معايا
انا سامع واحد بيقول المقادير دى مش هتكفى
عامل حسابى
هذه المقادير تكفى 50 واحد
وبمبا ان المنتدى فية 30.000 فرد مشتركين
يبقى احسبو وهاتو الكمية كلها

انا ليه اختارت السلطة .. لانى لما كنت فى القرية
كانت عمايل السلطة لها طقوس خاصة تحس فيها انك فى رمضان
ولما يجى رمضان دلوقتى افتكر ايام القرية لما كنا نزرع مستلزمات السلطة فى الغيط
من قبل رمضان علشان رمضان
كانت ايام جميلة .. علشان كدة اخترت السلطة
لانها من الماكولات المصرية الضاربة فى جذور المجتمع والزمن
وكل سنة وانتم طيبين




ما شاء الله احلي الاطباق طبق السلطان
تسلم ايد حضرتك بجد
يلا الحمد لله ان الفطار اتقدم قبل ميعاد السحور عشان احنا كنا شبعنا اصلا هههههه
بس المرة الجاية مش هنتنازل عن




طبق سلطة برضه هههههههه

والقصيدة اكثر من رائعة هي دي بقي اللي شبعتنا بجد
جزاك الله كل الخير دكتور ابو دنيا
وسلامي لاخت حضرتك ام احمد
ويا ريت تروح تفطر عندها كتير جدااا
الموضوع ده فعلا بيفرق كتير
ربنا يجمعكم دائما علي كل خير
وكل عام وانت واسرتك جميعا في اتم صحة واحسن حال
لك مني خالص تقديري

د.ابودنيا
03-10-2006, 12:29 AM
لاءلاء استاذ ابو دنيا..

لا دانت ضحكت عليا..

مش حفطر ابدا سلطه...

من غير لحمه وتسقيه...


حتقوم فورا فى الحال..

تعمل لى لحوم اشكال...

ويا فراخى من كنتاكى...

مهما حتغرم اموال....



قوم يالا قوام يا جميل...

هات لى حمام وزغاليل...

لالف فى كل الدنيا...

الحقوا ابو دنيا بخيل..



استاذى ابودنيا ...

يرضيك يعنى بعد الصبر والصيام تقوللى سلاطه ...

لا يا عم انا عاوز هبر وفراخ وبط ووز...

بس الحقيقه حضرتك عملت السلاطه بطريقه جميله تسلم ايدك وكل سنه وحضرتك طيب...


هههههههههههههههههههههههه
لا واللهى ياستاذ يحيى
المسئلة مالهاش علاقة بالبخل
انا اللى فهمتة انى هدخل المطبخ اقدم طبق
مش اقدم وجبة فطار

يمكن انا فهمت غلط
وطبعا يبقى جوعتكم
وايه فى رمضان اكرم الشهور

انا ياعم علشان خطرك هقوم اجيبلك اجمل زغاليل حمام وعلشان باقى الاخوة هقوم ادبح عجل
وهعمل كل انواع اكلات اللحوم اللى معروفة واللى لسة مش معروفة
تحياتى لك وامتعتنى كلماتك الجميلة الرقيقة
وكل سنة وانت طيب

د.ابودنيا
03-10-2006, 12:38 AM
سلطة حنفطر ماشى ومالو
المهم انها من ايدك
خيار ياعينى على جمالو
حناكل ونشبع وربى يزيدك

بس ياريت تعمل معروف
اياك تبقى كدة مكسوف
كفاية حروفك ..
دى احلى حروف
وزمان قالو فى الامثال
ان البصلة من احبابنا
تبقى خروف




تسلم ايدك يا استاذنا ..:y:

بس هات ودنك ....
" السلطة الخضرا مش بيتحطلها ولا توووم ولا شبت " بسسسسسسسسس:eek:
ولا كأن حد شاف حااااجة:2:

وعقبال كل عزومة يا عزيزى:good:
هههههههههههههههههههه
كلهم شافو اهم
كانو بيبصو من الشباك
اللى هناك
انا معاك توم لا
لكن شبت اه
ومفروض الخل لا ... لان الخل الزيادة يؤزى الكبد والجسم ويرفع حموضة الدم اذا زاد عن حدودة
لان جسم الانسان غير مؤهل لذلك لكن الحيوانات المجترة تستفيد منة بدجة كبيرة
طبعا دا بحكم شغلى كمتخصص فى التغذية

بس انا شايفك مش عجباك السلطة
طعمها مش حلو
هتحلو المرة الجاية اشا الله
انا حالف المرة الجاية اصلح غلطى واجيب معايا كيسين سكر بدل الملح

وعلى فكرة فى المقادير انا نسيت الملح صحيح
ومحدش قلى انها سلطة دلعه

ماشى .. عاجبك كدة .. هيعرفو كمان انها مافيهاش ملح
كل سنة وانت طيب

د.ابودنيا
03-10-2006, 01:06 AM
انا برده قلت هنجوع في رمضان ههههههههههههه

سلطة يا د.ابو دنيا طيب هنشبع إحنا إزاي

كده الطبق اليوم لمحبي عمل الريجيم

تسلم إيدك و علي العموم الطبق زينه و جمله كلماتك الجميلة

و هي طبقنا اليوم :)

دمت بكل خير

في رعاية الله ،،،


هههههههههههههههههههههههههههههههههههههههه

انا كنت عايز اعمل طبق مسقعة
بس انا كسلى جدا
قلت خلاص خليها حاجة خفيفة

انا عموما قلت انك قولتيلى اعمل طبق مش فطار كامل
واللهى انا كنت فاكر كدة
بس برضة اللى فطر فى بيتة هيقدر ياكل حاجة تانى ولا يستطعم اى اكل بعد الفطار

المهم انا فى نص هدوى حاسس انى جوعت الناس صحيح
دلوقتى يقولو بخيل
انا كن اقدر اقولهم انا عازمكم فى تكا ولا ابو شقرة
بس كدة الحكاية كانت هتبقى كدبة يعنى
اكدب واخسر يوم فى رمضان

ياله عقبال السنة الجاية
هاجى وجايب لكم معايا عجل سمين

ماتزعلوش اصل السنة دى عنق الزجاجة ومعرفتش اخرج منه
والسنة الجاية هنكسر القزازة

كل سنة وانتى طيبة والجميع بخير ان شاء الله
ويارب اكون كنت ضيف خفيف عليكم زى اكلتى
تحياتى للجميع

sayedattia
03-10-2006, 08:40 AM
هههههههههههههههههههههههههههههههههههههههه

انا كنت عايز اعمل طبق مسقعة
بس انا كسلى جدا
قلت خلاص خليها حاجة خفيفة

انا عموما قلت انك قولتيلى اعمل طبق مش فطار كامل
واللهى انا كنت فاكر كدة
بس برضة اللى فطر فى بيتة هيقدر ياكل حاجة تانى ولا يستطعم اى اكل بعد الفطار

المهم انا فى نص هدوى حاسس انى جوعت الناس صحيح
دلوقتى يقولو بخيل
انا كن اقدر اقولهم انا عازمكم فى تكا ولا ابو شقرة
بس كدة الحكاية كانت هتبقى كدبة يعنى
اكدب واخسر يوم فى رمضان

ياله عقبال السنة الجاية
هاجى وجايب لكم معايا عجل سمين

ماتزعلوش اصل السنة دى عنق الزجاجة ومعرفتش اخرج منه
والسنة الجاية هنكسر القزازة

كل سنة وانتى طيبة والجميع بخير ان شاء الله
ويارب اكون كنت ضيف خفيف عليكم زى اكلتى
تحياتى للجميع

العزيز والغالي / د . فوزي أبودنيا

سلاطه ف سلاطه ... سيما أونطـــــــــه
هاتو فلوسنا لجل مانفطر حتي ف طنطا
فين اللحمه فوق الفته ..
فين الفاكهه .. فين القشطه
فين الرز معاه الوز .. أكله يلذ
اصلي جعان ونفسي ف بطـــــه
رحت المطبخ وانا طمعــــــــان
ف أكل مهفهف بتاع رمضــان
فجأه لقيت طبق السلطـــــــــان
مقبول منك ... يسلم فـُُُُُُُُُُُـــــــمك
سلطه جميله بطعم جنـــــــــان
ناقصه الكشري وحبة شطــــه
سلاطه ف سلاطه ..سيما أونطه

وكل عزومة وانت طيب ياراجل ياطيب

د.ابودنيا
03-10-2006, 06:00 PM
الشاعر النقي د أبو دنيا

كل الشكر لحضرتك علي سلطان السفرة .....
بالفعل طبق السلاطة شيء جميل جدا وله طعم غير في رمضان .....
لكن كدة يادكتور تبقي عزومة صعبة قوي طيب جنبها شوربه أو أي حاجة خفيفة .....
أكيد حضرتك خايف علينا وعلي صحتنا الا نتخن بس ماتقلقش علي رأي شاعر الرومانسية دكاترة الرجيم موجودين .....
عموما سلمت يداك علي السلطة والقصيدة ....
وكل عام وأنت بخير ....
لك الشكر والتقدير ....

تحياتي
ليلة عشق
هههههههههههههههههههههههههههههههه
همسة منتدانا الدافئة
كل سنة وانتى طيبة
بقولو التخصص غلاب
وانا استاذ تغذية
وكام سنة فى التغذية
المهم بقى انى وانا فى مرحلة الدكتوراة من يجى عشر سنين يعنى
كنت نحيف وكانو زمايلى يقولولى انت الوحيد اللى فينا اللى بتنفذ برامج التغذية غلط
علشان كدة مش عايز تتخن
بس الحمد لله لسة بردة ماتخنتش قوى
وهو يعنى لو رحتم لدكتور تعملو رجيم مش هتدفعو فلوس يعنى وخسارة
علاوة على اضرار السمنة
وبعدين انتى كنتى فاكرانى دكتور عظام
فاكرة
كان المفروض اعمل حلة كوارع
وصينية ارز وفتة

كل سنة وانتى طيبة
وربنا يجعله عامر

بنت مصر
06-10-2006, 01:29 PM
طبق سلطة عجب بجد
وحضورك يا دكتور ابو دنيا اكتر من رائع
شميت فيه رائحة مزارعنا ورائحة ريفنا
شكرا لك استاذنا وكل عام وانت بخير

بسنت