المساعد الشخصي الرقمي

مشاهدة النسخة كاملة : اسم جديد لميدان رمسيس / بقلم طارق المملوك



طارق المملوك
17-09-2006, 09:42 PM
حتى يتم التناسق و التناغم بين اسم ميدان المحطة سابقا و رمسيس سابقا و ما حوله من شوارع فليس من الطبيعى ان يظل اسمه ميدان رمسيس مع ان لا فيه رمسيس ولا حاجة
تم عمل استبيان ومنه خلصوا الى انه يجب تسميته باسم مستخلص مما حوله من معالم وهنا ارسلوا الى عينة من ابناء مصر للاجتماع لتحديد الاسم الجديد .
وبدا النقاش ..

واحد من الحزب الوطنى : هناك محطة مصر بس الناس تقول ايه نرجع للاسم القديم ؟
رئيس مجلس الشعب : لا طبعا احنا مابنرجعش فى كلامنا ولو على جثتنا .
واحد من الاخوان :طيب نسميه ميدان الفتح على اسم الجامع ؟
واحد علمانى : و ده برضه كلام فتح ايه و بتاع ايه احنا فى ظل السلام و مافيش حروب ولا فتوحات ولا كلام من ده خالص الايام دى عاوزين تستفزوا الغرب ولا ايه؟
وزير التعليم : طيب نسميه ميدان الفجاله ؟
رجل اعمال : طيب و الله عيب مالقيناش غير الفجل بعد ما كان الملك رمسيس واقف فى الميدان و الميدان على اسمه مالقيناش غبر الفجل نسمى بيه الميدان ؟
سواق تاكسي : طيب نسميه ميدان كوبرى اكتوبر؟
مدرس لغة عربية : طيب بقى بالذمة ده اسمه كلام ميدان كوبرى يعنى ايه العبط ده.
فنى تبريد و تكييف : طيب نسميه ميدان كلوت بيه ؟ اهه شارع كبير و محترم اهه و طالع من الميدان
عامل و فلاح فى نفس واحد : يا راجل عيب انتهى عصر البهوات من زمان شوف اسم تانى
ترزى : طيب ايه يا جدعان نسميه ميدان الجمهوريه؟
واحد من حزب معارض : يا عم هى دى بقت جمهورية دى بقت ملكية رسمى. لالالا دور شوف اسم تانى .
واحد ناصرى : طيب نسميه ميدان الجلاء؟
شاب فرفور : يااااااااااااه ده انت قديم قوى قوى يا جدو. عيب جلاء ايهوبتاع ايه اللى بقاله 50 سنة ده عاوزين اسم روش كده جديد .
بياع سريح : طيب نسميه ميدان اللمون على اسم الكوبرى؟
واحد ارستقراطى : تانى هاقولك عيب عيب ايه فجالة و لمون هو احنا ف سوق الخضار ولا ايه ؟
وزير الثقافة : طيب ايه رايك نسميه ميدان مبارك على اسم محطة المترو
ونحط تمثال زى ده للرئيس تيمنا انه يحكم نفس الفترة اللى حكمها رمسيس التانى .

http://www.egyptsons.com/misr/C:\Documents and Settings\Mr.Tarek\Desktop\midanramsiselgadeed.jpg

كل اللى قاعدين : ياااااااااااااااااااااااااااااااااااااااه لسه فاضل كام و ستين سنة كمان
وزير الثقافة : ايه معترضين ؟
كلهم فى نفس واحد : لالالالالالالالالالالالالا ابدا ربنا يديله طولة العمر ...

اتمنى ان تنال اعجابكم

osha
18-09-2006, 03:31 AM
كل يغني على ليلاه
صحيح ناوين يسموا الميدان ايه؟

شكـــــــرا جزيلا لك اخي الكريم على الموضوع (http://www.egyptsons.com/misr/showthread.php?p=664773&posted=1#post664773)

stopp
18-09-2006, 07:31 AM
و هو ده انسب اسم
هما هيلاقوا احسن من الاسم ده فين

mohamednabil555
18-09-2006, 11:44 AM
شكرا ليك وواضح ان ده اللي هيحصل نعمل ايه بقى

mr_virus
18-09-2006, 10:28 PM
المفروض يسموه شارع ( ال مبارك )

pickyaaa
19-09-2006, 01:37 AM
انا باسجل موافقتي على الإسم ( ميدان مبارك )
كده كده هيسموه
يبقى بمزاجي
ربنا يطرح فيكو البركة

حنين المصرية
19-09-2006, 01:52 PM
ما هو صحيح لازم يغيروا اسمه

هيبقي اسمه ميدان رمسيس ازاي والتمثال ساب الميدان ومشي؟

وبكرة لسه ياما هنشوف ونسمع

طارق المملوك
19-09-2006, 09:35 PM
كل يغني على ليلاه
صحيح ناوين يسموا الميدان ايه؟

شكـــــــرا جزيلا لك اخي الكريم على الموضوع (http://www.egyptsons.com/misr/showthread.php?p=664773&posted=1#post664773)

الاخت العزيزة اوشا
اشكرك على مرورك اولا و على التقييم ثانيا
والله الاخوة اجمعوا مثما انتهى المقال
نتوكل على الله و لا ايه؟
دمت بكل الخير

طارق المملوك
22-09-2006, 09:35 PM
و هو ده انسب اسم
هما هيلاقوا احسن من الاسم ده فين

اخى العزيز STOP
اشكرك على المروك
لك فائق التحية و التقدير

طارق المملوك
22-09-2006, 09:36 PM
شكرا ليك وواضح ان ده اللي هيحصل نعمل ايه بقى

اخى العزيز محمد
اشكرك على المرورك و التعليق
دمت بكل الخير