المساعد الشخصي الرقمي

مشاهدة النسخة كاملة : بعد طول انتظار .. الجزء الثاني من مسلسل حنان والذئاب



الصفحات : [1] 2

خالد الهندسة
12-08-2006, 09:18 AM
السلام عليكم ورحمة الله وبركاته ، الاخوة الاعزاء ، احم احم .

لاحظت انه بعد طرحي لموضوع "حنان والذئاب .. مسلسل مصري 100%" والموجود على هذا الرابط

http://www.egyptsons.com/misr/showthread.php?t=53113

فإن الكثيرين منكم (هم مش كثيرين قوي ، هم حوالي 3) قد ألحوا علي وبشدة (هما برضه ماألحوش بشدة قوي لأنهم طلبوا مرة واحدة) أن أقوم بكتابة الجزء الثاني من المسلسل ، وفي الحقيقة ترددت كثيرا قبل ان أفعل ذلك والسبب هو خوفي من ان يكون الجزء الثاني ليس على نفس مستوى الجزء الأول وبذلك أفقد الشهرة والمجد (آل الشهرة والمجد آل) الذين حققتهما بعد كتابة الجزء الأول ، ولكن زال هذا التردد بعد ان لاحظت ان اولادي مازالوا حتى الآن يشاهدون الجزء الاول من "الاسد الملك" باستمتاع بينما نحن جميعا لم نحب الجزء الثاني اطلاقا ، فقلت ياواد يعني انت احسن من شركة ديزني ؟ انت هتعمل فيها عباس العقاد ؟ ماتكتب وخلاص ، فالى سيناريو الجزء الثاني .

تبدأ الحلقة الاولى من الجزء الثاني بمشهد من غرفة الانتظار باحد المستشفيات حيث يقف عادل بجوار باب غرفة العمليات يبدو عليه التوتر بينما تجلس هنية على أحد المقاعد شاردة وواضعة يدها على خدها (مابيعديهاش واجب هنية دي ، بس شكلها وراها حكاية كبيرة حنعرفها بعدين) وبجوارها تجلس ام حنان وهي تدعو لابنتها ان ربنا ينتعها بالسلامة (السيناريو عاوز يقولك ان الناس الكبار بس هي اللي بتدعي وتذكر ربنا والكلام ده) ، وفي احد اركان الغرفة يجلس مجموعة رجال بملابس الفلاحين لاتبدو على وجوههم اي تعبيرات لانهم مجرد كومبارس (آل يعني اهل البلد بيحبوا عادل بيه وجايين يقفوا معاه) .

يخرج الطبيب من الغرفة مبتسما فيسرعون اليه ويقول عادل "هيه ، طمني يادكتور" فيرد عليه قائلا "الحمدلله ، المدام جابت توأم ، ولد وبنت" فتقول الام "توأم ؟ ياما انت كريم يارب" (كانها اتفاجئت ، مع انا الحاجات دي اليومين دول بقت معروفة من اول شهور الحمل) بينما تخرج هنية عن وقارها المعتاد فتركز الكاميرا على وجهها وهي تزغرد بصوت عال (طب وانت مالك ؟ هي من بقية اهلك ؟) .

ثم يصر عادل على ان يسمي المولودة البنت "حنان" بينما تصمم حنان على تسمية المولود الذكر بإسم "عادل" (ياسلام عالحب) ، وهكذا يصبح لدينا الاخوين حنان وعادل اللذان ماأن يكبرا حتى نفاجأ بأن الذي يقوم بدورهما هما نفس الممثلان اللذان يقومان بدور حنان وعادل الكبار (طب سيبوا فرصة للمثلين الشبان ياكلوا عيش جنبكو ، وارحمونا دي الرحمة حلوة !!)

المهم ان بنت عادل بعد ان تدخل الجامعة تترك جميع الشباب الذين تكاد المدرجات تنفجر من كثرتهم ، ولاتقع الا في حب الشاب "طاهر" (خلوا بالكو من الاسماء) الذي هو وياللعجب ابن الشرير رشدي الذي تسببت امها في دخوله للسجن ، وعندما تخبر البنت امها ترحب الام بذلك وتحدث ابنتها عن اهمية الحب وانه اصبح ضرورة بين الشباب والبنات في الجامعة مثل الماء والهواء ، وكيف انها تذكرها بحبها لابيها في الماضي ، ولاتنسى ان تحذرها من باب ذر الرماد في العيون "بس اهم حاجة مانخالفش عاداتنا الشرقية ، ومن دلوقتي ياحبيبتي تتفقوا امتى هتتجوزوا عرفي !" .

ولكن رد فعل عادل يكون مختلفا ، فانه عندما يسمع بهذا الخبر يصاب بأحد الامراض ذات الاسماء المخيفة التي يصاب بها الممثلون عندما يسمعون خبرا سيئا وتؤدي لدخولهم للمستشفى (جلطة ، ذبحة ، انهيار عصبي ، تصلب في الشرايين ، التهاب في الاذن الوسطى ، حاجة من دي يعني) وتتجمع نفس المجموعة التي تجمعت سابقا في ولادة حنان باستثناء عادل واضافة حنان على باب غرفته بالمستشفى ، ثم تدخل ابنته حنان اليه في العناية المركزة لتحدثه :

حنان : بابا ... أنا ....
عادل يشيح بوجهه عنها .
حنان : بابا اسمعني ، انا من حقي اني احب الانسان اللي .....
عادل : مش عاوز اسمع كلام في الموضوع ده تاني .
حنان : بابا ارجوك ....
عادل : من فضلك ، الموضوع انتهى ، كح كح ...

الممرضة تسرع للمكان وهي تقول بطريقة ميكانيكية : لو سمحتى كفاية كده ، الانفعال مش كويس عشانه (يعني مافيش من الزحمة اللي واقفة دي غير حنان اللي تدخل له في الوقت ده ، وهي السبب في نكسته ؟) .

وبعد عودة عادل للمنزل يدور الحوار التالي بينه وبين حنان الزوجة :

حنان : ياه ياعادل ، ماكنتش اعرف انك ممكن تبقى قاسي للدرجة دي .
عادل : انتي نسيتي طاهر يبقى بن مين ؟
حنان : ولو ياعادل ، ليه ناخد الولد بذنب ابوه ؟ عادل ، احنا اتخلقنا عشان نسامح (اتخلقنا عشان نسامح ؟؟ ايه النظريات اللي بتطلعوها لنا دي ؟ الواحد يعرف اننا اتخلقنا عشان نعبد ربنا ، والناس التانية بيقولوا اننا اتخلقنا عشان نستمتع بالحياة ، بس الايام دي كل شئ جايز) .
عادل : ماتنسيش اني رجل قانون قبل ماكون أب (هو عادل مش رجل قانون ولاحاجة ، بس الكلمتين دول لازم يتقالوا في المسلسل) .

ثم يحدث ان تتعرض قطة الجيران للخطر بوقوفها على حافة النافذة فيغامر طاهر بحياته لانقاذها وعندها يتأكد عادل الأب ان طاهر مش شرير ، فنشاهده وهو يضع يده على كتفه وهو يبتسم قائلا : "صحيح انت تربيتك مش قد كده ، لكن النهاردة بس انا اتاكدت انك انت الشاب المناسب لبنتي ، وكتب الكتاب يوم الخميس الجاي (ياسلاممممم ، دا الواحد يسيب الشغل ويجيب سلم ويشتغل في انقاذ القطط ، بس جوزوني والنبي)" ، فتعقب حنان الابنة قائلة "بس تاني مرة ماتغامرش بحياتك ، عشان انت غالي عندنا" فيضحك الجميع (حاجة ماتضحكش للدرجة دي يعني ، فيه ايه ؟) .

اعزائي ، حتى لااطيل عليكم وبعد اذنكم سوف اتوقف حتى هنا مع نهاية قصة عائلة عادل ، بالرغم من اني كنت عاوز اكمل قصة هنية وقصة بهلول مجذوب القرية بس الموضوع هيبقى طويل قوي ولو طلبتم ممكن اضع جزء ثالث .

ملحوظة : قبل الاستفسار منكم ان عجبكم الموضوع ، هذا الموضوع حصري لابناء مصر وغير موجود باي مكان آخر اطلاقا على النت أو غيرها ، اما اذا لم يعجبكم ، فربنا يخليكو بلاش ضرب وياريت ماجيش بكرة الاقي 70 واحد قراوا الموضوع والردود ........ صفر :sorry: ، وشكرا لكم .

عمرو صالح
12-08-2006, 10:02 AM
هههههههههههه

انت تاني :o

تسلم ايديك يا خالد ومتغبش كده :notme:

وشكرا على المجهود الواضح في فقع مرارتنا:-s

وحاول تلحق تعملك مسلسل وتنزل بيه السوق وتركب الموجة مانت بتكتب اهوه زيهم :y1:

عصام كابو
12-08-2006, 11:10 AM
هههههههههههه
تسلم ايدك على المسلسل
فى انتظار عرضه فى رمضان القادم

saccata2
12-08-2006, 01:40 PM
أية البواخة دى انتا فاضى خالص بصراحة

emerald
12-08-2006, 01:45 PM
السلام عليكم

بجد ابداع :king: , عجبتني جدا الحكاية , شكرا لك .:hey:

في انتظار الجزء الثالث قصة هنية .

بارك الله فيك.

أم أحمد
12-08-2006, 02:01 PM
ِشكرا ليك يا خالد
ما تغيبش بقي بالجزء التالت والا هيبقي فيها غرامة ههههه
خالص تقديري

summar
13-08-2006, 04:45 AM
جميل جدا ياخالد بجد
انا نفسي اعرف حكاية بهلول....
اوك....فى انتظار الجزء التالت..لو مكنش متعب ليك

AYA 2006
13-08-2006, 04:18 PM
:aaaaa34: الموضوع حلو اوى انا ماشفتش الجزء الاول قبل كدة بس لما قرات التنين مع بعض عجبونى جدااااااااااااااا وياريت تنزل الجزء الثالث قريب علشان انا عايزة اعرف حكاية هنية وعلى فكرة انت تعليقاتك جامدة جدااااااااااااااا وبتاكد فعلا الملل و الاونطة اللى فى معظم مسلسلتنا:aaaaa34:

white clouds
13-08-2006, 04:31 PM
هههههههههههههه ايوه كده
فى انتظار الجزء الثالث والرابع والخامس و.............
وماتغيبش علينا

خالد الهندسة
14-08-2006, 08:50 AM
هههههههههههه

انت تاني :o

تسلم ايديك يا خالد ومتغبش كده :notme:

وشكرا على المجهود الواضح في فقع مرارتنا:-s

وحاول تلحق تعملك مسلسل وتنزل بيه السوق وتركب الموجة مانت بتكتب اهوه زيهم :y1:





آه أنا تاني ، لو ماكانش يضايقك يعني ، :m22: .

أنا والله ماغبتش بمزاجي انا كنت في آخر بلاد الله ، والحمد لله رجعت عشان افقع مرارتكو تاني ، ههههه .

أما بالنسبة لركوب الموجة ، اللي زي حالاتنا ياعمرو ياخويا آخره يركب الموجة في سيدي بشر انما الامواج اللي بالك فيها دي ليها ناسها ، ربنا يسهل لعبيده ياعم .

وشكرا جزيلا على الرد .

خالد الهندسة
14-08-2006, 08:55 AM
هههههههههههه
تسلم ايدك على المسلسل
فى انتظار عرضه فى رمضان القادم


أخي عصام ، شكرا لك ، تسلم ايدك انت ، ولو تعرف حد ممكن يشتري المسلسل عشان يعرضه في رمضان انا مستعد اقسم معاك بالنص ، ونقب على وش الدنيا بقى ، ايه رايك *9*

خالد الهندسة
14-08-2006, 08:59 AM
أية البواخة دى انتا فاضى خالص بصراحة

ههههههههه ، شكرا لان اول مشاركة لك في المنتدى طلعت من نصيبي :mm: .

خالد الهندسة
14-08-2006, 09:03 AM
السلام عليكم

بجد ابداع :king: , عجبتني جدا الحكاية , شكرا لك .:hey:

في انتظار الجزء الثالث قصة هنية .

بارك الله فيك.

شكرا جزيلا ياايميرالد ، بس ايه رايك الجزء الاول احسن ولا التاني ؟؟

وده يعتبر اول تصويت للجزء التالت ، لو وصلوا 10 هعمله ان شاء الله .

وبارك الله فيكي .

خالد الهندسة
14-08-2006, 09:15 AM
ِشكرا ليك يا خالد
ما تغيبش بقي بالجزء التالت والا هيبقي فيها غرامة ههههه
خالص تقديري

شكرا لك يامشرفتنا العزيزة على التثبيت ، وبعدين ايه موضوع الغرامة ده ؟ مش كفاية البنزين غلي ههههه .

وكده تاني تصويت للجزء الثالث ، لما نشوف اللي جاي .

شكرا مرة ثانية .

خالد الهندسة
14-08-2006, 09:20 AM
جميل جدا ياخالد بجد
انا نفسي اعرف حكاية بهلول....
اوك....فى انتظار الجزء التالت..لو مكنش متعب ليك

شكرا جزيلا لك يايسرا على الكلمات الرقيقة ، وانا تحت امرك حتى لو الموضوع فيه تعب *167*

كده تصويت رقم 3 على الجزء الثالث .

خالد الهندسة
14-08-2006, 09:24 AM
:aaaaa34: الموضوع حلو اوى انا ماشفتش الجزء الاول قبل كدة بس لما قرات التنين مع بعض عجبونى جدااااااااااااااا وياريت تنزل الجزء الثالث قريب علشان انا عايزة اعرف حكاية هنية وعلى فكرة انت تعليقاتك جامدة جدااااااااااااااا وبتاكد فعلا الملل و الاونطة اللى فى معظم مسلسلتنا:aaaaa34:

شكرا لك ياآيه على المجاملة الرقيقة والكلام المشجع ، كده واضح ان هنية لها شعبية جامدة .

تصويت رقم 4 للجزء التالت .

خالد الهندسة
14-08-2006, 09:33 AM
هههههههههههههه ايوه كده
فى انتظار الجزء الثالث والرابع والخامس و.............
وماتغيبش علينا

حاضر ايتها السحابة البيضاء ، في اقرب وقت ان شاء الله ، وشكرا على ردك الظريف .

تصويت رقم 5 .

بنت مصر
14-08-2006, 10:38 AM
ههههههههههههه روعة يا خالد
تسلم ايدك يارب بس همتك بقا
مع الجزء اللي جاي بسرررعة


بسنت

kitten
14-08-2006, 05:27 PM
بجد قصة لذيذة قوي (و هو ده فعلا اللي بيحصل في المسلسلات ) و اتمني اشوف الجزء التالت انشاء الله

moony2005
14-08-2006, 10:07 PM
ههههههههههههههههه

بجد الموضوع تحفة يا خالد تسلم ايدك

وياريت ماتغيبش علينا كتير كدة
في انتظار الجزء التاني

مجدى عبد الحميد
15-08-2006, 09:06 AM
انا فى اجازة بعد غياب خمس سنوات عن ارض الوطن كل شيئ يفقع المرارة هنا الا خفة دمك

طـــــير في الســـما
15-08-2006, 10:18 AM
سلام الله عليك ياأستاذ خالد ..و الله أنا شايفة أن حضرتك فاكهة المنتدي..و عموما أنا بشكرك ..الموضوع جميل..و طبعا ياريت تضيفني ضمن قايمة التصويت للجزء الثالث ..و علي فكرة الرجل ( بصوتين )، و شكرا

همســـة حب
15-08-2006, 06:03 PM
عيب لما تقول انك مش حتنزل الجزى التالـــــــــــــــــــــــــــــــــــــــــــــ ـــــــــــــــــــــــت
عيب
جميله قوى فى انتظار جديد اوكىhttp://www.w6w.net/album/42/w6w2005041500304838d9f57e5.gif

عبدالهادى على
15-08-2006, 10:51 PM
:shit:
هههههههههههههه ايوه كده
فى انتظار الجزء الثالث والرابع والخامس و.............
وماتغيبش علينا
بعد السلام والتحيه ممنون للقصه اياها بس كنت عايز أعرف اذاى ختهه من على ألشجره:stpd: :uff: :uff:

خالد الهندسة
16-08-2006, 10:13 AM
ههههههههههههه روعة يا خالد
تسلم ايدك يارب بس همتك بقا
مع الجزء اللي جاي بسرررعة


بسنت

الف شكر على الرد والكلام الجميل ، وانا بس مش عاوز اسرع في الجزء التالت لحد الناس كلها ماتشوف الجزء الثاني واحس انه استنفذ غرضه ، لو ماكانش يضايقكم .

شكرا يابسنت .

خالد الهندسة
16-08-2006, 10:18 AM
بجد قصة لذيذة قوي (و هو ده فعلا اللي بيحصل في المسلسلات ) و اتمني اشوف الجزء التالت انشاء الله
شكرا لك على الرد ايتها القطة الصغيرة ، واكيد انت فرحانة لان "طاهر" انقذ القطة ، بس ماتخافيش ، حتى لو ماكانش انقذها ، القطط بسبع ارواح ، هههههههههه

شكرا مرة اخرى

خالد الهندسة
16-08-2006, 10:46 AM
ههههههههههههههههه

بجد الموضوع تحفة يا خالد تسلم ايدك

وياريت ماتغيبش علينا كتير كدة
في انتظار الجزء التاني

شكرا لك عزيزتي Moony2005 ، بس كنت عاوز اعرف رايك في الجزء الاول كمان .

ومش هتاخر ان شاء الله وشكرا لك مرة اخرى .

خالد الهندسة
16-08-2006, 11:06 AM
انا فى اجازة بعد غياب خمس سنوات عن ارض الوطن كل شيئ يفقع المرارة هنا الا خفة دمك
الله يكرمك يااستاذ مجدي وشكرا على الرد ، وبعد الشر عليك من فقع المرارة .
بقولك ايه مافيش عقد كدا ولا كدا في الكويت بس مش اقل من 20 الف جنيه في الشهر ، ولا كدا قليل ؟؟؟ ههههههههه ، انا بس بهزر لاني عارف مرارة الغربة مع العائد اللي مش زي مالناس متخيلة ، ربنا يوفقك ويعينك .

خالد الهندسة
16-08-2006, 11:38 AM
سلام الله عليك ياأستاذ خالد ..و الله أنا شايفة أن حضرتك فاكهة المنتدي..و عموما أنا بشكرك ..الموضوع جميل..و طبعا ياريت تضيفني ضمن قايمة التصويت للجزء الثالث ..و علي فكرة الرجل ( بصوتين )، و شكرا
وعليكم السلام ورحمة الله وبركاته ، شكرا على انك بتقولي اني فاكهة المنتدى بس ممكن تحددي اي نوع من الفاكهة لو سمحتي ، ماهو فيه ناس بتقول عالجميز فاكهة ، ههههه

العفو ياست الكل ، صوت الرجل (؟؟؟؟) بس انا شايف الصورة الرمزية لبنت والاسم "ايمان" ؟

يبقى كدا التصويت للجزء التالت بقى 6 .

وتحياتي لبور سعيد ، انا لي قرايب في بور فؤاد وبحب ازورهم قوي عشان اركب المعدية ، ههههه .

خالد الهندسة
16-08-2006, 11:42 AM
عيب لما تقول انك مش حتنزل الجزى التالـــــــــــــــــــــــــــــــــــــــــــــ ـــــــــــــــــــــــت
عيب
جميله قوى فى انتظار جديد اوكىhttp://www.w6w.net/album/42/w6w2005041500304838d9f57e5.gif

الله الله الله ، طب ليه الدخلة الجامدة دي ، والله ماقلت حاجة عيب يابيه ، آه ، انت بتصالحي بعد كده ؟ طيب ماشي ، شكرا جزيلا على الرد ، وبرجاء مراجعة الرسائل الخاصة .

ويلا
16-08-2006, 03:19 PM
بسم الله الرحمن الرحيم

روعة ياهندسة

الجزء التانى احلى من الجزء الاول عارف لية عشان رومنسى اكتر (ههههههههههههههههه)
واو روميو وجوليت

يلا الجزء الثالث بسرعة وياريت يكون فية اكشن باه وانفجرات وضرب وطاخ طيخ
وطبعا يكون فية شوية رومنسية (ههههههههههههههههه)

amak_77
16-08-2006, 03:41 PM
جاااااااااااااااامدة مووووووووووت
يا لا بقى يا باشا ورينا التالت و لما نشوف المجذوب ده الي دايما بيقول حكم و عارف اسرار كبارات القرية

ياسلاممممم ، دا الواحد يسيب الشغل ويجيب سلم ويشتغل في انقاذ القطط ، بس جوزوني والنبي
بس بالله و انت جي تيقى جيب سلمين مش سلم واحد

elsyad100
16-08-2006, 05:19 PM
الحقيقه هو ده الواقع الحاصل النهارده - تسلم ايدك0

خالد الهندسة
17-08-2006, 08:03 AM
بسم الله الرحمن الرحيم

روعة ياهندسة

الجزء التانى احلى من الجزء الاول عارف لية عشان رومنسى اكتر (ههههههههههههههههه)
واو روميو وجوليت

يلا الجزء الثالث بسرعة وياريت يكون فية اكشن باه وانفجرات وضرب وطاخ طيخ
وطبعا يكون فية شوية رومنسية (ههههههههههههههههه)

شكرا ياعزيزتي ويلا ، مادام بتحبي الرومانسية ، المرة الجاية هكتب قصة تقطع القلب ، اتنين بيحبوا بعض بقى وهو فقير ، فتروح هي تتجوز واحد غني قد ابوها ، وهو يروح يعمل نفسه بيحب واحدة تانية عشان يغيظها ، وبعدين جوزها يموت في حادثة وهو يسافر يشتغل برة وبعد مايرجع يلاقيها افتقرت وهو بقى غني ، ..... الخ .

وبتحبي الضرب كمان ، طب تيجي منين ؟؟؟ رومانسية وضرب مع بعض ؟ بس برضو ولايهمك ، حكتب لك قصة عن واحد موظف شريف والعصابة عاوزة تدي له رشوة عشان يخليهم يهربوا حاجات وحشة ، وهو مش راضي فالعصابة تروح المخزن وهو يكون هناك هو وصاحبه ، ويشتغل الضرب بقى ، طيخ طاخ ، وشوية كراتين فاضية تقع من على الرف ، واتنين من العصابة ييجو يضربو البطل يروح موطي يروحو ضاربين بعض وحاجات من اللي تهلك من الضحك دي .

وبالنسبة للجزء الثالث ، كل شئ بأوان .

خالد الهندسة
17-08-2006, 09:06 AM
جاااااااااااااااامدة مووووووووووت
يا لا بقى يا باشا ورينا التالت و لما نشوف المجذوب ده الي دايما بيقول حكم و عارف اسرار كبارات القرية

بس بالله و انت جي تيقى جيب سلمين مش سلم واحد

تحت امرك ، ان شاء الله تعجبك قصة بهلول الي جاية .

اما بالنسبة للسلالم ، انا خايف اروح عند بتاع السلالم الاقي الشباب واقفين طوابير والامن المركزي بينظم بقى ماكلهم عاوزين يجوزوا ياعيني ، وتلاقي الشاب من دول ماشي في الشارع رابط وراه خمس قطط في حتة حبل غسيل ، ولما يقابل البنت اللي هو عاوز يتجوزها يقولها "خلاص ياحبيبتي ، انا جهزت المهر اللي باباكي طلبه وهي دي القطط اللي انا انقذتها" .

وشكرا على ردك .

خالد الهندسة
17-08-2006, 09:17 AM
الحقيقه هو ده الواقع الحاصل النهارده - تسلم ايدك0

شكرا لك ياعزيزي وتسلم ايدك انت كمان .

amak_77
17-08-2006, 10:10 AM
اما بالنسبة للسلالم ، انا خايف اروح عند بتاع السلالم الاقي الشباب واقفين طوابير والامن المركزي بينظم بقى ماكلهم عاوزين يجوزوا ياعيني ، وتلاقي الشاب من دول ماشي في الشارع رابط وراه خمس قطط في حتة حبل غسيل ، ولما يقابل البنت اللي هو عاوز يتجوزها يقولها "خلاص ياحبيبتي ، انا جهزت المهر اللي باباكي طلبه وهي دي القطط اللي انا انقذتها" .


ههههههههههههههههههههههههههههها
عسل دمك خفيف موووووووووووووت

Attey268
20-08-2006, 07:21 PM
بصراحة ... الجزء الثانى .. نزل علينا كالنسيم العليل :'(
رغم إنى مشترك جديد فى المجموعة ... لكن لما قرأت الجزء الأول .. وأرسلت تعليقى عليه .. كنت فى غاية الشوق .. لمعرفة الجزء الثانى ... وما يحتويه من مفاجآت وأكشنات .. ودرامات .. وميلودرامات..ومعاهم شوية كيلوجرامات كوميديات .... :@
ولما قرأت الجزء الثانى ...بقى ده حالى :stpd: :stpd: ...
لأنى اتفقت معاك ..يا ابو الخوالد ...تقلب المسلسل هندى... لكن ما سمعتش الكلام ..ذنبك على جنبك ..انا ح ابيع أفكارى لمؤلفين آخرين ... مش محترفين زى سيادتك ... ماهى الأضواء والشهرة .. نستك ..الأفكار النيرة بتاعتى :hop:
على العموم .. مش عايز أجيب لك إحباط ... المسلسل حلو .. لكن لو عملت أجزاء تانية ..ح تبقى زى واحد بيكره كل الناس بما فيهم نفسه :eek: وفى مرة وقع على الأرض ( اتكعبل) ..قام ينفض نفسه .. وبيقول ( أحســــــــــــــــــــــــــــــن !!!) فرحان فى نفسه :no1:
ايه رأيك ... فى ظرفى ...برضه لسه جسر الأفكار بيننا موجود ... وأى افكار إحنا موجودين فى الخدمة ..... ( تحت الطلب ) .......:good:
أحمـــــــــــــــــــــــــــــــــــــــــــــد

خالد الهندسة
21-08-2006, 11:27 AM
ههههههههههههههههههههههههههههها
عسل دمك خفيف موووووووووووووت

شكرا لك اخي احمد ، دا من ذوقك .:f:

خالد الهندسة
21-08-2006, 11:35 AM
بصراحة ... الجزء الثانى .. نزل علينا كالنسيم العليل :'(
رغم إنى مشترك جديد فى المجموعة ... لكن لما قرأت الجزء الأول .. وأرسلت تعليقى عليه .. كنت فى غاية الشوق .. لمعرفة الجزء الثانى ... وما يحتويه من مفاجآت وأكشنات .. ودرامات .. وميلودرامات..ومعاهم شوية كيلوجرامات كوميديات .... :@
ولما قرأت الجزء الثانى ...بقى ده حالى :stpd: :stpd: ...
لأنى اتفقت معاك ..يا ابو الخوالد ...تقلب المسلسل هندى... لكن ما سمعتش الكلام ..ذنبك على جنبك ..انا ح ابيع أفكارى لمؤلفين آخرين ... مش محترفين زى سيادتك ... ماهى الأضواء والشهرة .. نستك ..الأفكار النيرة بتاعتى :hop:
على العموم .. مش عايز أجيب لك إحباط ... المسلسل حلو .. لكن لو عملت أجزاء تانية ..ح تبقى زى واحد بيكره كل الناس بما فيهم نفسه :eek: وفى مرة وقع على الأرض ( اتكعبل) ..قام ينفض نفسه .. وبيقول ( أحســــــــــــــــــــــــــــــن !!!) فرحان فى نفسه :no1:
ايه رأيك ... فى ظرفى ...برضه لسه جسر الأفكار بيننا موجود ... وأى افكار إحنا موجودين فى الخدمة ..... ( تحت الطلب ) .......:good:
أحمـــــــــــــــــــــــــــــــــــــــــــــد

جزيل الشكر لك اخي احمد على اهتمامك ومشاركتك ، في الحقيقة انا مش ضليع في الافلام الهندي يعني آخر فيلم هندي شفته كان اسمه "من اجل ابنائي" وانا في الابتدائية ، لكن المسلسلات بعيد عنك ليل نهار بنشوفها ، وبعدين الحاجات الاونطة بتاعة ان البطل بعد مايتجوز البطلة وعيالهم يدخلوا الجامعة يكتشفوا انهم كانوا راضعين من معزة واحدة وهما صغيرين في القرية وجوازهم باطل بتيجي في الافلام لكن التمثيليات آل يعني بتعايش الواقع فالهجص فيها بيبقى مداري شوية .

وطبعا جسر الافكار موجود ، لكن اللي قالقني كلمة "تحت الطلب" انا باخاف من العربيات اللي مكتوب عليها كدا :'(

وشكرا جزيلا لك ياعزيزي على مشاركتك الظريفة .

طـــــير في الســـما
22-08-2006, 11:31 AM
سلام الله عليك يا أستاذ خالد
أنا طبعا أقصد أحسن و أغلي أنواع الفاكهة...و علي الرغم من إني أنثي إلا أن هذا لا يمنع من قول الحق،و طبعا تنور بورسعيد كلها،
و شكرا

معاذ رياض
22-08-2006, 12:50 PM
موضوع لذيذ فعلا ، زي الجزء الأول ..

واضح ان أسلوبك الساخر ناجح فعلا ..

عايزين كمان ..

zazozazo
23-08-2006, 09:23 PM
السلام عليكم
ايه ياعم ده
ايه المسلسل الجامد ده أنت كده تاخد الأوسكار مستريح
واعتبره التصويت ال4ولحد ال10لوعايز
شكرا

zazozazo
23-08-2006, 09:29 PM
السلام عليكم
ايه ياعم ده
ايه المسلسل الجامد ده
أنت كده تاخد الاوسكار مستريح
واعتبره التصويت ال4و ال10 لو عايز
شكرا

خالد الهندسة
23-08-2006, 10:05 PM
سلام الله عليك يا أستاذ خالد
أنا طبعا أقصد أحسن و أغلي أنواع الفاكهة...و علي الرغم من إني أنثي إلا أن هذا لا يمنع من قول الحق،و طبعا تنور بورسعيد كلها،
و شكرا

شكرا لك يااستاذة ايمان ، انا احب اكون زي المانجا .
برضه بتلغبطيني تاني ؟ ايه علاقة الانثى بقول الحق ؟ انا كنت مستغرب انك بتقولي صوت الراجل باتنين وانت بنت تقومي ترجعي تقولي انك بنت بتقول الحق وان ..... ، يانهار اسود ، ايه اللي انا بقوله ده ؟ انا باين لي اتجننت ، المهم شكرا لك جزيل الشكر على ردك التاني في الموضوع ، وانتظروني قريبا في بور سعيد :good:

خالد الهندسة
23-08-2006, 10:08 PM
موضوع لذيذ فعلا ، زي الجزء الأول ..

واضح ان أسلوبك الساخر ناجح فعلا ..

عايزين كمان ..

الله يخليك ياحبيبي ، بس انا رايي ان الجزء الاول اقوى وانا بحبه اكتر لاني كتبت التاني على استعجال .

حاضر ، التالت في الطريق بس بيضبط الاول .:f:

خالد الهندسة
23-08-2006, 10:18 PM
السلام عليكم
ايه ياعم ده
ايه المسلسل الجامد ده أنت كده تاخد الأوسكار مستريح
واعتبره التصويت ال4ولحد ال10لوعايز
شكرا

شكرا لك اخي زازوزازو ، الله يجبر بخاطرك ، اوسكار مرة واحدة ؟ أنا كفاية علي جايزة البرغوث الذهبي لو فيه حاجة اسمها كدا ، بس ادوني اي حاجة احسن الحالة الايام دي مايعلم بيها الا ربنا .

ماشي انا هعتبر ده التصويت العاشر ، والجز الثالث في الطريق ان شاء الله .

أشجان الليل
24-08-2006, 02:38 AM
انا بس حبيت أصوت على الجزء الثالث..
وتسلم إيدك يا خالد
ولن أنسى أن الجزء الأول هو سبب عودتى للمنتدى

خالد الهندسة
24-08-2006, 07:41 PM
انا بس حبيت أصوت على الجزء الثالث..
وتسلم إيدك يا خالد
ولن أنسى أن الجزء الأول هو سبب عودتى للمنتدى

شكرا لك اختي اشجان لتشريفك للموضوع وسعدنا بعودتك وتسلم ايدك ، بس ايه حكاية الشجن والحزن ؟ والله الدنيا ماهي مستاهلة ، وتحت امرك الجزء التالت بس لما يستوي .

ayham
30-08-2006, 02:41 PM
بصراحه انا اما قريت الجزء التاني عجبني جدا

بس للأسف ملحقتش الأولاني..........

بس شكله كده جامد زي اخوه.....ههههههههههههه

يلا بقى انا هستنى الجزء التالت