المساعد الشخصي الرقمي

مشاهدة النسخة كاملة : حنان والذئاب ، مسلسل مصري 100%



الصفحات : [1] 2

خالد الهندسة
31-05-2006, 05:01 PM
السيناريو التالي هو سيناريو معظم المسلسلات العربية التي نشاهدها وقد اخترت له اسم "حنان والذئاب" ، تعالو لنعرف لماذا .

يبدأ المسلسل بمشهد غرفة متواضعة وفي منتصف الغرفة سيدة عجوز تجلس على سجادة الصلاة في وضع ختام الصلاة وفي الخلفية سرير المفترض أنه تنام عليه البطلة التي تجاوزت الخمسين من العمر ولكنها مازالت تؤدي دور الطالبة الجامعية .

الأم : "السلام عليكم ورحمة الله ... السلام عليكم ورحمة الله ، وترفع رأسها للسماء فتدعو لابنتها بالزواج" ثم تتجه للسرير لتوقظ البنت ، حنان (ياسلام عالاسماء) قومي ياضنايا روحي الجامعة ، دي الدكتورة سلوى اتصلت بيكي 6 مرات عشان اتاخرتي عالمحاضرة (هي الدكتورة سلوى فاضية تتصل بكل واحد اتاخر ؟ (بس تقول ايه بقى ، الناس كلها بتحب حنان) وبعدين لما هي اتصلت 6 مرات ماصحيتيش البنت من بدري ليه ؟ ) المهم .

حنان (تقوم من على السرير وهي في كامل اناقتها ومكياجها وشعرها كأنه لسة جاي من الكوافير ، مافيش اي شئ بيدل انها كانت نايمة الا بيجامة النوم وهي ايضا في منتهى الأناقة وكأنها لسة جاية من عند المكوجي) : حاضر ياست الحبايب ، ياأحلى أم في الدنيا (ايه المناسبة ؟ عادي ان اي ام تصحي بنتها عشان تروح الجامعة ، بس المخرج عاوز يعرفنا ان حنان ملاك).
الأم : احنا ناس على قد حالنا يابنتي (برضه مافيش مناسبة بس عشان نعرف ان حنان فقيرة).

ثم تنتقل بنا الكاميرا الى القرية (وطبعا لابد من وجود القرية في أي مسلسل عربي) حيث تقف الفنانة بحر الدموع وسط أهل القرية وهي تصيح : "مالكو يااهل البلد ؟ مالكو يااهل كفر الفنتوش ؟ (مين الفنتوش ده؟) هتفضلوا ساكتين عالظلم ده لحد امتى ؟ لحد امتى هتفضلوا ساكتين على عواد العمدة وهو بياخد المعيز بتاعتكو؟ ماتتكلم ياسالم .
سالم : اني اتكلمت كتير ياهنية الدور والباقي على رجالة البلد اللي حطوا لسانهم في بقهم وخايفين من عواد .
وعندئذ لابد من ظهور بهلول مجذوب القرية وهو يردد عبارة من عينة : كله بأمره ، كله بأمره .

ثم تنتقل بنا الكاميرا الى فيلا شريف بيه ابوالخير(رجل الاعمال الطيب) بالمدينة (وطبعا المدينة هي القاهرة وكأن مصر ليس بها مدن سوى القاهرة) وهو يخاطب ابنه عادل : هيه ؟ ايه اخبار المصنع ياباشمهندس ؟
عادل : كله تمام يابابا بفضل حضرتك .
الأب : لا بفضلك انت ياباشمهندس (أمال فين فضل ربنا ؟) ، انت من يوم مامسكت المصنع بعد ماتخرجت السنة اللي فاتت والارباح زادت 200% (ولسة متخرج السنة اللي فاتت !!!) ، ماقلتليش عملت ايه مع العامل ده اللي اسمه صالح اللي الشوكة دخلت في صبعه امبارح ؟
عادل : أبدا ، أقل حاجة ممكن اعملها ، طلعنا الشوكة من صبعه ، واديته بقية الاسبوع اجازة و 20 ألف جنيه تعويض (عادل هو الملاك الثاني في المسلسل وبالطبع سيتزوج حنان في النهاية) .
الأب ينظر لابنه في حنان قائلا : عمرك ماهتتغير .

تعود بنا الكاميرا مرة أخرى الى القرية ولكن الى بيت العمدة الظالم عواد حيث يظهر وهو ينادي بسطاويسي الغفير (دائما الغفير اسمه بسطويسي) : ولا يابسطويسي روح اندهلي شيخ الغفر أوام .
بسطويسي : حاضر ياجناب العمدة ثم يعود ومعه شيخ الغفر وكأنه كان واقف على الباب .
شيخ الغفر : اوامرك ياجناب العمدة.
العمدة : تروح انت وبسطويسي وبقية الغفر وتضموا معيز الواد اسماعيل بن ابوعيشة على المعيز بتاعتي (ماهي الدنيا سايبة !!).
شيخ الغفر : اوامرك ياجناب العمدة ، ورايا ياولا يابسطويسي .
العمدة يضحك ضحكة شريرة وهو يقول : إما وريتك ياهنية (ساب بنات البلد كلها وعاوز يتجوز هنية وهي مش طايقاه فهو بيغيظها انه ياخد معيز الفلاحين).

ثم تنتقل بنا الكاميرا الى شركة رشدي بيه ابو الشرور(رجل الاعمال الشرير طبعا) وهو يكلم سكرتيرته : قولي لي ياعايدة (برضه السكرتيرة دايما اسمها عايدة وهيتجوزها على مراته) ايه اخبار شحنة اللحمة المسممة اللي في الجمارك ؟
عايدة : طلعت من الجمارك يارشدي بيه وكلها اسبوع وتنزل السوق .
رشدي : واخبار صفقة العربيات اللي من غير فرامل اللي هنستوردها من ايطاليا عشان تعمل حوادث بالناس ؟
عايدة : قلت لك اطمن يارشدي بيه ، كل حاجة ماشية مضبوط .
رشدي : طب ماتنسيش تتصلي بالدكتور نادر مدير المستشفى الخصوصي بتاعتي وتقولي له يخنق 5 من المرضى اللي عنده لحد مايموتوا (راجل أعمال شرير بقى) .
عايدة تبتسم في خبث : أمرك يارشدي بيه .

طبعا تتخرج حنان من الجامعة وتعمل صحفية في صحيفة محترمة (امال احنا مش لاقيين شغل ليه؟) ، ويكون كل همها مطاردة رشدي ابوالشرور، وأثناء انتظارها للاتوبيس لتذهب للجريدة هي وصاحبتها ندى (شوف الأسماء) يمر عادل بسيارته الفاخرة فيقف لهما (من دون خلق الله اللي على المحطة كلهم) قائلا "اتفضلوا لما اوصلكو" فتركبان معه (بكل بساطة من غير حتى مايسألهم هم رايحين فين) وطبعا تجلس حنان في الكرسي الامامي بجوار عادل حتى تتعرف عليه (المخرج عاوز كده) ، وبعد فترة نسمع عادل وهو يقول لها : معقول كل ده بيحصل ؟ (ماهي فتحت له قلبها بقى وحكت له على رشدي ، مش وصلها ببلاش) فترد ندى من المقعد الخلفي : وأكتر من كده ياأستاذ عادل قصدي ياباشمهندس .

ثم نظل طوال حلقات المسلسل نشاهد الأشرار رشدي وعواد وهما يتمتعان ويعيشان أحلى حياة ، فرشدي يستمتع بالسفر لاوروبا والاقامة بالساحل الشمالي ومصاحبة الجميلات ، وعواد بالديوك الرومي والحمام المحشي والملوخية بالارانب (الناس مقامات) ولايسقطا الا في آخر خمس دقائق من الحلقة الأخيرة من المسلسل ، حيث تبلغ حنان البوليس بما لديها من مستندات فيتوجهون للقبض على رشدي وفي نفس الوقت يبلغ عادل البوليس عن عواد العمدة ، لأن عادل اكتشف انه اصله من البلد وله ميراث هناك وعواد خده بعد ابوه مامات ، وعندما يقبض البوليس على عواد يعترف لهم بأن رشدي هو الراس الكبيرة الذي كان يساعده في تهريب المخدرات (مخدرات ايه ؟ حد جاب سيرة مخدرات ؟)

وفي قسم البوليس يلتقي رشدي بعواد غلى باب القسم (شوف الصدف) ويتوقف العساكر بهما حتى يتحدثا مع بعضهما (ماهو العساكر فاضيين لهم) فيقول رشدي لعواد : عملتها ياعواد ؟
عواد : امال كنت عاوزني اشربها لوحدي يارشدي ؟ (أحسن ، عشان وحشين ربهم وقعهم في بعض)

وتتزوج حنان من عادل الذي يقرر الاستقرار في القرية لمساعدة اهلها ويسيب المصنع في المدينة يتحرق (شوف الاصالة بقى) .


صدعت دماغكو بس مش ذنبي ، هو المسلسل طويل كده .

خالد الهندسة
01-06-2006, 05:54 PM
ايه ياجدعان ؟؟؟

14 واحد يقروا الموضوع ومافيش رد يوحد ربنا !!!

طب قولوا دمك تقيل ، مش عاوزين حاجات من دي تاني ، عبرونا ياخلق .........

محمد نديم
02-06-2006, 04:02 AM
الله الله الله الله
وسأظل أقولها الى ما ما شاء الله

رااااااااااااااااااااااااااااااااائع يا أخي خالد وليست مجاملة فأنت كاتب سيناريو مبدع وكمان خفة دم ولا أروع
واسلوب شدني لقراءة السيناريو حتى نهايته وكنت مثلك ولا زلت متعجبا لماذا لم يعلق احدهم هنا رغم براعة الكاتب الفنان الأستاذ خالد
استأذنك في اقتباسها لنشرها في موقعي المتواضع

تحياتي العاطرة وبرافو عليك.
محمد نديم على.
www.pospoems.com/members/nademmali

خالد الهندسة
02-06-2006, 04:30 AM
الله الله الله الله
وسأظل أقولها الى ما ما شاء الله

رااااااااااااااااااااااااااااااااائع يا أخي خالد وليست مجاملة فأنت كاتب سيناريو مبدع وكمان خفة دم ولا أروع
واسلوب شدني لقراءة السيناريو حتى نهايته وكنت مثلك ولا زلت متعجبا لماذا لم يعلق احدهم هنا رغم براعة الكاتب الفنان الأستاذ خالد
استأذنك في اقتباسها لنشرها في موقعي المتواضع

تحياتي العاطرة وبرافو عليك.
محمد نديم على.
www.pospoems.com/members/nademmali

ربنا يخليك ياأستاذ محمد ، دا كتير علي قوي ، أنا قلت عايز ردود وماكنتش متوقع اول رد ييجي يبقى فيه كل الكلام الحلو ده ، وعلى فكرة دي شهادة اعتز بيها لما تيجي من واحد من أهل الصعيد اللي قدم لمصر الادباء العظماء .

وبالنسبة للاقتباس فأنا أشكرك عليه لأن نشر أي حاجة ممكن ترسم البسمة على شفاه الناس في الايام اللي مايعلم بيها الا ربنا دي عمل يستحق الشكر .

وتقبل تحياتي .

ملحوظة : هل هذا اللينك في نهاية مشاركة حضرتك يوصل الى موقعك لأني عندما ضغطت عليه اعطاني صفحة فيها لنكات لموضوعات اخرى بالانجليزي ، أم أنني مخطئ ؟

kalecoper
02-06-2006, 10:02 AM
جاااااااااااااامده جدا ب جميل
بجد زى العسل
بس متستعجلش لى الرود متقلقش يعنى:mazika:
تحياتى و .......
و شكرا

خالد الهندسة
02-06-2006, 07:08 PM
جاااااااااااااامده جدا ب جميل
بجد زى العسل
بس متستعجلش لى الرود متقلقش يعنى:mazika:
تحياتى و .......
و شكرا

مشكور أخي الحبيب على مرورك وردك ، وآديني مستني ماوراييش حاجة هههههه

aynad
03-06-2006, 12:44 AM
الله يا خالد
معقولة انت اللي مألفه
لالالالالالا استحالة
والله موضوع رائع و جميل و دمه خفيف
بس بصراحة و الله تنفع سيناريست
وبعدين معظم الاسماء دى من عائلتي
بص يا سيدي
حنان : تبقي خالتي
عادل : يبقي خالي
ندي : تبقي انا
رشدي : يبقي ابني علي اسم حمايا
اوعي تكون عارف العيلة الكريمة ههههههههه
بس تسلم ايدك والله يا خالد

خالد الهندسة
03-06-2006, 06:42 AM
الله يا خالد
معقولة انت اللي مألفه
لالالالالالا استحالة
والله موضوع رائع و جميل و دمه خفيف
بس بصراحة و الله تنفع سيناريست
وبعدين معظم الاسماء دى من عائلتي
بص يا سيدي
حنان : تبقي خالتي
عادل : يبقي خالي
ندي : تبقي انا
رشدي : يبقي ابني علي اسم حمايا
اوعي تكون عارف العيلة الكريمة ههههههههه
بس تسلم ايدك والله يا خالد

والله ياستي من تاليفي بس في لحظة تجلي ، لما شفت ماما بتنادي لاختي كالمعتاد : ياهند ، التمثيلية جات ياحبيبتي ؟؟ فترد هند : لسة ياماما ، لما تيجي هندهلك ، فقلت لهم : ياجماعة تمثيلية ايه ؟ انا هحكيها لكم من غير حتى ماعرف اسمها وقعدت اتريق عالمسلسلات واول مارجعت البيت رحت ماسك الكيبورد وكاتب الكلمتين دول ، بس كده ، وبالتالي فانا مش سينارست انا من كتر ماشفت مسلسلات من يوم ماكان عندي 6 سنين بقيت عارف ايه اللي هيحصل في اي مسلسل .

وانا تشرفت بالعائلة الكريمة ياندى ، واولهم انت ، بس ماقلتيليش مين عندكو اسمه بسطويسي ؟؟؟ هههههه

أم أحمد
03-06-2006, 08:43 AM
راااااااائعة جدا يا خالد
اسلوبك رهيب في وصف جميع المسلسلات التي نشاهدها
فهي كلها صور مكررة من بعضها
ونفس الابطال ونفس المواضيع
ومفيش اي تجديد
لا اجد لها غير التثبيت
اهلا بك معنا في المنتدي
وفي انتظار دائما كل ما تخطه يدك

amak_77
03-06-2006, 09:45 AM
لا و الله حلوة يا مان
على فكرة انا كنت من ال14 اللي دخلوا وما ردوش شفتني
بس ما كنش عندى وقت اقرا و ارد
فقلت خليها بعدين
بس بجد والله العظيم رااااااااااااااائعة

انا حسيت انك لخصت بتاع 200 او 300 مسلسل من بتوع مدينه الإنتاج
اصلهم بيعملوا مسلسلات بالإنتاجية الأسبوعيه
اللي يعمل مسلسلات اكتر 50 مسلسل في الأسبوع يعملوا له مسلسل هديه

لا بجد راااائع و لك مستقبل نمي هذه الموهبة

خالد الهندسة
03-06-2006, 10:22 AM
راااااااائعة جدا يا خالد
اسلوبك رهيب في وصف جميع المسلسلات التي نشاهدها
فهي كلها صور مكررة من بعضها
ونفس الابطال ونفس المواضيع
ومفيش اي تجديد
لا اجد لها غير التثبيت
اهلا بك معنا في المنتدي
وفي انتظار دائما كل ما تخطه يدك

شكرا جزيلا أختي أم أحمد على الرد وشكر ثاني على التثبيت وخاصة لما يكون من هولندا هههه ، ربنا يخليكي ، وفعلا عندك حق شعار المسلسلات هو التكرار التكرار وان كان هناك شعار آخر ولكني لم اتعرض له لان احنا في منتدى فك التكشيرة وهو النكد ثم النكد يعني الواحد يبقى جاي من برة شايل هموم قد كده فوق دماغه يشوف المسلسل يقوم يشيل هموم زيادة وهو بيفكر ازاي المصايب اللي بتحصل دي هتتحل في حلقة بكرة وهكذا .

شكرا مرة اخرى .

خالد الهندسة
03-06-2006, 10:30 AM
لا و الله حلوة يا مان
على فكرة انا كنت من ال14 اللي دخلوا وما ردوش شفتني
بس ما كنش عندى وقت اقرا و ارد
فقلت خليها بعدين
بس بجد والله العظيم رااااااااااااااائعة

انا حسيت انك لخصت بتاع 200 او 300 مسلسل من بتوع مدينه الإنتاج
اصلهم بيعملوا مسلسلات بالإنتاجية الأسبوعيه
اللي يعمل مسلسلات اكتر 50 مسلسل في الأسبوع يعملوا له مسلسل هديه

لا بجد راااائع و لك مستقبل نمي هذه الموهبة

مشكور أخي ، شكلي صعبت عليك لما ماحدش رد علي ، مش كده ؟ ربنا يجبر بخاطرك ههههههه.

أنا اول مرة اعرف انهم بيعملوا المسلسلات بالانتاجية الاسبوعية انا كنت فاكرهم بيعملوا مسلسل كل يوم وخاصة في رمضان ، واللي يعمل اكتر مسلسل يجيب للناس الكآبة يدولوا جايزة ، بلد مسلسلات صحيح .

محمد نديم
03-06-2006, 10:53 AM
إيه رأيك ؟ يا أستاذ خالد ؟
اهي الناس علقت وانت مش ملاحق ترد عليهم. اللهم لا حسد هههههههههههههههههههههه
ربنا يزيدك يارب . انت بس اصبر وان شاء الله حجيب لك عقد كتابة مسلسل عربي هههههههههههههههههه
بس بالنص ففتي ففتي

تحياتي وسلم لي على المسلسل.
نديم

خالد الهندسة
05-06-2006, 06:57 PM
إيه رأيك ؟ يا أستاذ خالد ؟
اهي الناس علقت وانت مش ملاحق ترد عليهم. اللهم لا حسد هههههههههههههههههههههه
ربنا يزيدك يارب . انت بس اصبر وان شاء الله حجيب لك عقد كتابة مسلسل عربي هههههههههههههههههه
بس بالنص ففتي ففتي

تحياتي وسلم لي على المسلسل.
نديم

الله يخليك ياأستاذ / محمد ، دانت استاذنا ، وبعدين عقود ايه يااستاذ محمد ؟ المسألة مش كده خالص ، أهم حاجة ان مواضيعي تعجبكم ، دي آخر حاجة الواحد بيفكر فيها الفلوس ، دا كلام ؟
بس سؤال بيني وبينك ، هو العقد هيبقى في حدود كام كده ؟ ههههههه

ويلا
13-06-2006, 04:50 PM
اية المسلسل الحلو دة
لازم ينعرض فى رمضان

عشان يجبلنا جلطة بالمرة


موضوع حلو اوى اوى تسلم ايديك:f:

daria
16-06-2006, 01:34 PM
ياااااااااااااااااه
من زمان اوي اوي مش قريت حاجة مضحكة وقيمة في نفس الوقت
اصل من الصعب جدا ان تكون الكوميديا والادب الساخر وكل الحاجات دي قيمة وهادفة

بس حققت انت المعادلة الصعبة

بجد مليون برافو
تسلم إيديك
إيمان

اليكترون
20-06-2006, 11:45 AM
جامده طحن موتتنى من الضحك

khaled2006
21-06-2006, 10:26 PM
بصراحه موضوع رائع ودماغ مطقطقه وذوق عالي
وانت رجعتني عشر سنين ورا ..... من يوم ما بطلت مسلسلات عربي ودخلت علي الهندي اللي البطل
و عدوه دايما يطلعوا اخوات ويكون ابوهم راحل احول قصدي راجل اعمي طبعا عشان ميعرفشهم
والاتنين الاخوات يقفوا مع بعض ويخلصوا علي الراجل اللي خض ابوهم وهما صغيرين في المدرسه وكان سبب انه يتعمي وينتهي المسلسل باغنيه في الفسحه اللي ورا البيت وطبعا يكون الاب رجع احول تاني



انا شكلي ها خش علي المسلسلات السنغاله الجابونيه بانتاج مشترك
وفي النهايه اشكرك تاني علي السيناريو الجميل بتاعك

أشجان الليل
22-06-2006, 12:15 AM
بسم الله الرحمن الرحيم
عزيزى م/خالد
أجبرتنى مشاركتك المتميزة على الضحك رغم ما أعانيه ورغم ان كل من حولي نيام وأخشى أن أوقظهم بصوت ضحكاتى
وكما أجبرتنى أن أضحك كان لابد أن تجبرنى على أن أشد على يدك وأشكرك وأهنئك وأعود لأضع ردا بالمنتدى بعد اكتفائي بمجرد التصفح منذ وقت طويل
اما عن كثرة القراءات بالنسبة للردود فلا يحزنك هذا.. فالسلبية هى السمة الشائعة
ومن الجيد أن الردود جاءت مشجعة وليست محبطة..
دمت قلما ساخرا مميزا
م/مها السكري

khaled2006
22-06-2006, 01:25 AM
عزيزتي م \ مها السكري ( الاسم الحركي = اشجان)
شكرا علي كلماتك الرقيقه دي
وبصراحه انتي اول واحده تديني دفعه معنويه بعد ما كنت ها خش في سكه الردود السلبه اللي بصراحه مش
فاهم قصدك بيها بس الحمد لله انك نبهتيني ليها
دمت زخرا و عونا لمصر
د/خالد

ابن الجنوب
22-06-2006, 03:41 PM
ثم تنتقل بنا الكاميرا الى شركة رشدي بيه ابو الشرور(رجل الاعمال الشرير طبعا) وهو يكلم سكرتيرته : قولي لي ياعايدة (برضه السكرتيرة دايما اسمها عايدة وهيتجوزها على مراته) ايه اخبار شحنة اللحمة المسممة اللي في الجمارك ؟
عايدة : طلعت من الجمارك يارشدي بيه وكلها اسبوع وتنزل السوق .
رشدي : واخبار صفقة العربيات اللي من غير فرامل اللي هنستوردها من ايطاليا عشان تعمل حوادث بالناس ؟
عايدة : قلت لك اطمن يارشدي بيه ، كل حاجة ماشية مضبوط .
رشدي : طب ماتنسيش تتصلي بالدكتور نادر مدير المستشفى الخصوصي بتاعتي وتقولي له يخنق 5 من المرضى اللي عنده لحد مايموتوا (راجل أعمال شرير بقى) .
عايدة تبتسم في خبث : أمرك يارشدي بيه .
.

وطبعا دايما رجال الأعمال فى المسلسلات بيهربوا الصفقات المضروبة والمسمومة ..
هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههههههههههههههههههههههههههههههههههههههههههههههه
بجد رائع ياهندسة ، علشان كدة مش بحب اتفرج على المسلسلات
بس المرة الجاية تكتب سيناريو فيلم هندي .
هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههه

خالد الهندسة
22-06-2006, 07:19 PM
اية المسلسل الحلو دة
لازم ينعرض فى رمضان

عشان يجبلنا جلطة بالمرة


موضوع حلو اوى اوى تسلم ايديك:f:

هو بصراحة ينفع يتعرض في رمضان بعد العصرية مع شوية لب وسوداني عشان الواحد يسلي صيامه (آل يسلي صيامه آل ، أنا عارف بيجيبوا الكلام ده منين ؟) .

شكرا ياويلا على تشريف الموضوع والرد .

خالد الهندسة
22-06-2006, 07:27 PM
ياااااااااااااااااه
من زمان اوي اوي مش قريت حاجة مضحكة وقيمة في نفس الوقت
اصل من الصعب جدا ان تكون الكوميديا والادب الساخر وكل الحاجات دي قيمة وهادفة

بس حققت انت المعادلة الصعبة

بجد مليون برافو
تسلم إيديك
إيمان

شكرا أختي ايمان على الكلمات الرقيقة والثتاء على موضوعي المتواضع ، أسعدني ان موضوعي عجبك ، والله انا كنت عاوز اعلق على حاجات زي ان دايما الناس اللي بتصلي في المسلسلات هم كبار السن بس فاتني بس اكيد انتم هاتلقطوها ، وكذلك كمية النكد الكبيرة بس عشان الموضوع مايبقاش طويل قوي ، شكرا على المرور الكريم .

خالد الهندسة
22-06-2006, 07:41 PM
جامده طحن موتتنى من الضحك

شكرا أخي اليكترون ، بس الله يكرمك اوعى تموت بجد ، انت عارف ان الانترنت متراقبة ، وبعدين يجيبوا الاي بي ويعرفوا ان اننا اللي موتتك واننا عامل كده بالقصد عشان اموت الناس ويقولوا علي ارهابي ، ويودوني جوانتامو بقى ، أما والله العظيم ياجدع ، ده جوانتانامو ده .... ، يانهار اسود ، أنا بقول ايه ؟ ربنا يجعل كلامنا خفيف عليهم ياعم .

شكرا جزيلا اخي الكريم .

خالد الهندسة
22-06-2006, 08:07 PM
بصراحه موضوع رائع ودماغ مطقطقه وذوق عالي
وانت رجعتني عشر سنين ورا ..... من يوم ما بطلت مسلسلات عربي ودخلت علي الهندي اللي البطل
و عدوه دايما يطلعوا اخوات ويكون ابوهم راحل احول قصدي راجل اعمي طبعا عشان ميعرفشهم
والاتنين الاخوات يقفوا مع بعض ويخلصوا علي الراجل اللي خض ابوهم وهما صغيرين في المدرسه وكان سبب انه يتعمي وينتهي المسلسل باغنيه في الفسحه اللي ورا البيت وطبعا يكون الاب رجع احول تاني



انا شكلي ها خش علي المسلسلات السنغاله الجابونيه بانتاج مشترك
وفي النهايه اشكرك تاني علي السيناريو الجميل بتاعك

شكرا يادكتور خالد ، شرفت الموضوع ، حضرتك برضه بطلت تشوف مسلسلات من عشر سنين زي حالاتي ، انا سامع ان المسلسلات دلوقت بقى فيها مناظر مش ولابد ، يعني الواحد مفروض يتحسر عالحاجات الساذجة بتاعة زمان دي ، عالاقل كانت بتراعي انها بتدخل بيت كل اسرة .

أما بالنسبة للافلام الهندي فدي مالهاش حل ، وياريت حضرتك تكتب لنا سيناريو ظريف بيعبر عنها بس مايكونش فيه اغاني كتير من عينة "شنجر هيه ، بنجر ها" عشان اتخنقنا مالاغاني الهندي .

شرفتنا يادكتور .

خالد الهندسة
22-06-2006, 08:21 PM
بسم الله الرحمن الرحيم
عزيزى م/خالد
أجبرتنى مشاركتك المتميزة على الضحك رغم ما أعانيه ورغم ان كل من حولي نيام وأخشى أن أوقظهم بصوت ضحكاتى
وكما أجبرتنى أن أضحك كان لابد أن تجبرنى على أن أشد على يدك وأشكرك وأهنئك وأعود لأضع ردا بالمنتدى بعد اكتفائي بمجرد التصفح منذ وقت طويل
اما عن كثرة القراءات بالنسبة للردود فلا يحزنك هذا.. فالسلبية هى السمة الشائعة
ومن الجيد أن الردود جاءت مشجعة وليست محبطة..
دمت قلما ساخرا مميزا
م/مها السكري

أهلا بيكي ياباشمهندسة مها ، يسعدني ان اكون سبب في رسم البسمة على وجهك ، وربنا سبحانه وتعالى يخفف عنك ماتعانيه .

وياريت بقى المشرفين يقروا الرد دا عشان يعرفوا اني انا السبب في رجوعك للمنتدى يمكن يرقوني .

وبالنسبة للردود يابشمهندسة مش مشكلة قوي ، المشكلة اني ساعات احط موضوع في منتدى وتيجي ردود قليلة عليه برضه وبعدين لو عملت بحث عن جملة معينة في الموضوع على جوجل الاقيه انتشر في المنتديات بكثافة شديدة واللي ناقله حتى مش كاتب تحته منقول ، ومرة عديت المرات اللي اتنسخ فيها احد الموضوعات لقيتها اكثر من الردود اللي جاتني عليه بنسبة الضعف ، يالا بقى ، ماحنا في زمن الوحوش ، حوش يارب حوش .

شكرا لكي على الرد .

خالد الهندسة
22-06-2006, 09:25 PM
وطبعا دايما رجال الأعمال فى المسلسلات بيهربوا الصفقات المضروبة والمسمومة ..
هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههههههههههههههههههههههههههههههههههههههههههههههه
بجد رائع ياهندسة ، علشان كدة مش بحب اتفرج على المسلسلات
بس المرة الجاية تكتب سيناريو فيلم هندي .
هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههه

شكرا يادماغ (مش كده صح برضه !!!) ، هم رجال العمال الوحشين بيتسلخوا بس في المسلسلات بس وبعدين ماتنساش ان المسلسل كان منصف وجاب رجل الاعمال الطيب ، لأن كل مجتمع فيه الوحش والكويس يابني .
وانا زيك ماعدتش بحب اتفرج عالمسلسلات ومتهيألي ماحدش بيتفرج عليها دلوقت غير امهاتنا وحمواتنا والناس الطيبين دول من باب الوفاء للعشرة اللي بينهم وبين التلفزيون ، وبالنسبة للفيلم الهندي ربنا يسهل بس الاول عاوز آكل شوية مانجة هندي واشم بخور هندي واسمع اغاني هندي لفترة عشان اعيش في الجو ، على راي فؤاد المهندس في "عودة اخطر رجل في العالم" .

شكر لك .

مظلوووم
23-06-2006, 12:28 PM
هههههههههههههههههههههههههههههههههههههههههههههههههه ههههههههه
والله رهيبه بجد :good:
وفعلا المسلسلات من كتر التكرار بقت تخنق
بس بجد والله تسلم ايدك *8*
ويجعلوا عاااااااااااااامر
انوووووووبيس

sam_pon
23-06-2006, 11:12 PM
خالووود
قصتك روعه مع أنها كما قلت هيه قصة كل مسلسلاتنا المصرية
وردود الأعضاء جميلة جدا لدرجة أني مش لاقي كلام تاني أضيفه
تسلم أيدك يا أبو الخولد
بس انت لهجتك فيها شوية إسكندراني ، وله أنا غلطان

أخوك
سامر محمد

summar
24-06-2006, 08:28 AM
بأمانة كده وبينى وبينك ومش هعرف حد:-s
انت اللى كاتبه لوحدك؟؟؟:mm:

بس تحفة بأمانة.....والله واهم حاجة.....العنوان....حنان والذئاب ومضي زمن الوغد...

لا وصوت المعلق اللى بيتكلم فى وسط الفيلم وهما جايبين حنان وهى بتمشي بسرعة وبتبص على الفاترينات

..........
بجد جميل جدا والله
انا مش عايزة اسكت على فكرة..علشان ماتفتكروش قليل:y::y:

تسلم ايدك بجد......

الشربينى مهندس
24-06-2006, 02:19 PM
وياتري
يا هل تري
ايه آهرة المسلسل دا
لا شغنا قضايا مرفوعة
ولا جرايد ممنوعة
وعجبي

خالد الهندسة
24-06-2006, 05:39 PM
هههههههههههههههههههههههههههههههههههههههههههههههههه ههههههههه
والله رهيبه بجد :good:
وفعلا المسلسلات من كتر التكرار بقت تخنق
بس بجد والله تسلم ايدك *8*
ويجعلوا عاااااااااااااامر
انوووووووبيس
شكرا أخي مظلووووم (انوبيس) ، هي المسلسلات فعلا تخنق من التكرار بس المشكلة ان فيه ناس ياعيني بيتابعوها بشغف ولو شافوا موقف مؤثر تشوف دموعهم على خدهم ، الحمد لله اللي عافانا .

مشكور اخي العزيز وتحياتي لاهل الشرقية ، احنا اصلنا من الشرقية من بنايوس .

خالد الهندسة
24-06-2006, 05:57 PM
خالووود
قصتك روعه مع أنها كما قلت هيه قصة كل مسلسلاتنا المصرية
وردود الأعضاء جميلة جدا لدرجة أني مش لاقي كلام تاني أضيفه
تسلم أيدك يا أبو الخولد
بس انت لهجتك فيها شوية إسكندراني ، وله أنا غلطان

أخوك
سامر محمد

شكرا أخي سامر انك موقع باسمك لاني كنت هاقولك "شكرا يا سامـ - بون"
مشكور اخي وجزاك الله خيرا على المرور والرد ، تسلم ايدك انت وعينك ، وبالنسبة للهجة الاسكندراني فده صحيح لاني عشت 5 سنين في اسكندرية ايام الجامعة .

شرفت ياباشا .

خالد الهندسة
24-06-2006, 06:12 PM
بأمانة كده وبينى وبينك ومش هعرف حد:-s
انت اللى كاتبه لوحدك؟؟؟:mm:

بس تحفة بأمانة.....والله واهم حاجة.....العنوان....حنان والذئاب ومضي زمن الوغد...

لا وصوت المعلق اللى بيتكلم فى وسط الفيلم وهما جايبين حنان وهى بتمشي بسرعة وبتبص على الفاترينات

..........
بجد جميل جدا والله
انا مش عايزة اسكت على فكرة..علشان ماتفتكروش قليل:y::y:

تسلم ايدك بجد......

بصراحة بصراحة مش لوحدي كان حواليه ولادي بيلعبوا في الاوضة ، بس انا نشرته في منتدى تاني قبل كده بنفس الاسم (خالد الهندسة) بتاريخ 5-4-2006 ولو لقيتيه على النت مش هتلاقيه قبل التاريخ ده .

آه غير ومضى زمن الوغد ، ذئاب الجبل والطاحونة والقضبان والدوامة وعودة الندل أسماء لاتنسى وكلها نكد لا وكله كوم والضؤ الشارد ده كوم (شارد فين بالضبط ؟) .

شكرا يايسرا على المرور والكلمات الطيبة

خالد الهندسة
24-06-2006, 07:15 PM
وياتري
يا هل تري
ايه آهرة المسلسل دا
لا شغنا قضايا مرفوعة
ولا جرايد ممنوعة
وعجبي

هههههههه ، ايه ياعم الرباعيات الحلوة دي ؟ متشكرين ياباش مهندس .

طيب القضايا المرفوعة انا فهمتها لان مافيش مسلسل مافيهوش حد رافع قضية عالتاني ، انما الجرايد الممنوعة مش فاهمها بصراحة :$

سحر الشرق
24-06-2006, 10:10 PM
مش ممكن المسلسل الفظيع ده--:good:
والله تنفع تكون مخرج دراما تليفزيونية, يعنى هما المخرجين بيعملو ايه اكتر من اللى انت عملته؟!!!!
ونصيحة منى انزل بيه فى رمضان بس بشرط انك تمطه فى 33 حلقة لا اكتر ولا اقل!!!!!!:d

مظلوووم
25-06-2006, 02:37 AM
احنا اصلنا من الشرقية من بنايوس
ههههههههههههههههههههههههههههه
العفو يا بلديات واحنا كمان من بنايوس :)
واللى فطسنى من الضحك فعلا دور المعلق على الاحداث :good:
ياريت ما تحرمناش من الاسلوب اللذيذ دا وعاوزين مواضيع تانيه
ويجعلوا عااااااامر يا باشا
انووووووووووووبيس

الشربينى مهندس
26-06-2006, 08:25 AM
عامل انك مش فاهم
فك التكشيرة احنا مع حنان
عارف فكرة المسلسل الحديث ومصدرها ..؟
تعمل مشكلة
تتكلم الجرانين
ترفع قضية
وتبكي حنان
وتهاجم الجرايد
وتسأل
فين الحرية والديمقراطية ..؟
وتتكلم عن ارهاب الصحافة
وهنا يظهر الذئاب
والي اللقاء

white clouds
26-06-2006, 02:50 PM
هههههههههههه جميله جداااااااااا جداااااااااااا
فعلا هى دى المسلسلات
الواحد بيبقى قاعد يتفرج وهيجيله شلل
بس عايزين مسلسل كمان..... ما تحرمناش من روائعك
تحياااااااااتى
روبى

خالد الهندسة
26-06-2006, 06:00 PM
مش ممكن المسلسل الفظيع ده--:good:
والله تنفع تكون مخرج دراما تليفزيونية, يعنى هما المخرجين بيعملو ايه اكتر من اللى انت عملته؟!!!!
ونصيحة منى انزل بيه فى رمضان بس بشرط انك تمطه فى 33 حلقة لا اكتر ولا اقل!!!!!!:d

شكرا أختي سحر الشرق ، اسعدني ان موضووعي عجبك .

أما بالنسبة للفرق بيني وبين المخرجين الكبار فهو فرق كبير جدا ، الواحد من دول (الكبار يعني) بيقعد مع المنتج بتاع العمل في النادي يقوم المنتج يقول له "عندنا مسلسل جديد ، تخرجهولنا ؟" يرد عليه المخرج "مافيش مانع ، بس المرة دي مش هقبل 4 مليون ونص زي المرة اللي فاتت ، المرة دي خمسة مليون مايقلوش تعريفة" يقوم المنتج يقول له "آه ياعكروت ، بتحب الفلوس زي عينك" ويروح كاتب له الشيك ، انما الناس اللي زي حالاتنا من اللي بيكتب الحاجات دي وهو قاعد جنب السيد البدوي فآخره انه يحطها في المنتدى ويخش يكمل عشاه نوم ، وربنا مابينساش حد يابنتي ، ماحدش بيبات من غير عشا . ههههههههههههه

وبالنسبة لرمضان فأنا ماحبش ادخل المنافسة مع المخرجين التانيين عشان ماقطعش عيشهم في الايام المفترجة (طبعا انت فاهمة ان ده قصر ديل) .

الف شكر على الرد .

خالد الهندسة
26-06-2006, 06:09 PM
ههههههههههههههههههههههههههههه
العفو يا بلديات واحنا كمان من بنايوس :)
واللى فطسنى من الضحك فعلا دور المعلق على الاحداث :good:
ياريت ما تحرمناش من الاسلوب اللذيذ دا وعاوزين مواضيع تانيه
ويجعلوا عااااااامر يا باشا
انووووووووووووبيس

من بنايوس ولا القنايات ؟ ولاهم جنب بعض ؟ انا مارحتش هناك من زمان من ايام فرح بنت خال الوالد من ييجي عشر سنين ، على كل حال ، أحسن ناس ياسيدي .

أشكرك ياأخي على ردك وانتظر مني مواضيع أخرى قريبا باذن الله .

خالد الهندسة
26-06-2006, 07:21 PM
عامل انك مش فاهم
فك التكشيرة احنا مع حنان
عارف فكرة المسلسل الحديث ومصدرها ..؟
تعمل مشكلة
تتكلم الجرانين
ترفع قضية
وتبكي حنان
وتهاجم الجرايد
وتسأل
فين الحرية والديمقراطية ..؟
وتتكلم عن ارهاب الصحافة
وهنا يظهر الذئاب
والي اللقاء

آه فهمت ، والله ياباشمهندس فيه حاجات كتير كنت عاوز ازودها على الموضوع ، بس المشكلة ان التعديل بيتوقف بعد 12 ساعة ، من ضمنها النقط اللي حضرتك بتتكلم فيها دي وكما نقط زي :

- مش ممكن نشوف شاب صغير او شابة صغيرة بيصلوا (ياعم الصلاة دي لما يبقى عندك 60 سنة)
-قصة هنية مع طليقها اللي حرمها من ابنها لمدة 10 سنين ولقائها معاه (دا انت واحشني قوي ياضنايا) والدموع والنكد
-التعليق على طريقة القبض على كل من رشدي وعواد والفرق بينهما مثل (احنا معانا امر من النيابة بتفتيش الفيلا) لرشدي و (والله ووقعت ياعواد) لعواد .

الافكار دي وغيرها بتجيني كل ماقرا الموضوع من جديد بس مش قادر اعدله ، المسلسل الجاي بقى .

وشكرا على اهتمامك اخي العزيز .

خالد الهندسة
26-06-2006, 07:29 PM
هههههههههههه جميله جداااااااااا جداااااااااااا
فعلا هى دى المسلسلات
الواحد بيبقى قاعد يتفرج وهيجيله شلل
بس عايزين مسلسل كمان..... ما تحرمناش من روائعك
تحياااااااااتى
روبى

هههههههههههه ، فعلا بيبقى هايجيله شلل ، ومع ذلك تلاقيه يتابع المسلسل اللي وراه واللي وراه وكلها اشتغالات ، انا الحمد لله لي كام سنة اشتريت دماغي ، عقبالكو .

ألف شكر ياروبي (ايه ده ؟ ميت غمر ؟ بقينا كده ثلاثة شراقوة ، ماتيجو نعمل منتدى لوحدنا)

white clouds
28-06-2006, 07:59 PM
هههههههههههه ، فعلا بيبقى هايجيله شلل ، ومع ذلك تلاقيه يتابع المسلسل اللي وراه واللي وراه وكلها اشتغالات ، انا الحمد لله لي كام سنة اشتريت دماغي ، عقبالكو

ربنا تاب عليا انا كمان الحمد لله
هما بس 20 او 30 مسلسل فى اليوم وبس كويس اوى
ههههههههههههه


ألف شكر ياروبي (ايه ده ؟ ميت غمر ؟ بقينا كده ثلاثة شراقوة ، ماتيجو نعمل منتدى لوحدنا)
ايه ده؟ميت غمر؟شراقوه؟!

وانا اقول المظاهرات اللى كانت عندنا كانت بتطالب بأيه
اتريها كانت عشان يضمو 100 غمر للشرقيه
الحمد لله الحمد لله استجابو لمطالباتهم
هههههههههههههههه

sam_pon
29-06-2006, 01:15 PM
أستاذ خالد
المرة دي أنا مش بأرد عشان أشكرك أو أحييك على المسلسل
أنا بأكتبلك عشان أشكرك على خفة دمك اللي في إعتقادي مش موجوده في أي مكان في الدنيا إلا عند المصريين
أحنا بس اللي بنقدر نضحك في عز زعلنا
وإحنا بس اللي بنقلب كل همومنا ومشاكلنا نكت وبرضه نضحك عليها
بيتهيألي أي شعب تاني من الشعوب المكشرة على طول دول ، لو مر عليهم شوية من اللي إحنا بنشوفه كان زمانهم اتجننوا
والله لو كان الفرص بتتوزع زي ما الواحد عايز ، وفيه عداله بين أهل الأرض لكان واحد مثلك الآن له شأن كبير في مجال السينما
لكن الحمدلله ، خلينا نأكلها بالحلال ، أبرك مليون مره ، وعلى الأقل بنضحك من قلوبنا ، عارف ليه ، عشان معندناش حاجه نبكي عليها
داخلين الدنيا فاضيين ، وشكلنا حنخرج فاضيين ( طبعا بأتكلم على الجيوب مش على الذنوب )
سامحني عشان قلبت المواجع
بس أنا حأدخل الموضوع ده بعد كده بس عشان أشوف ردودك الجميله اللي زي العسل على الأعضاء

مره تانية جزاك الله خير على البسمة اللي رسمتها على شفاهنا وكانت قربت تتنسى في زحمة الدنيا ومشاكلها

أخوك
سامر محمد
(أجنبي في السعودية)

خالد الهندسة
29-06-2006, 05:12 PM
ربنا تاب عليا انا كمان الحمد لله
هما بس 20 او 30 مسلسل فى اليوم وبس كويس اوى
ههههههههههههه


ايه ده؟ميت غمر؟شراقوه؟!

وانا اقول المظاهرات اللى كانت عندنا كانت بتطالب بأيه
اتريها كانت عشان يضمو 100 غمر للشرقيه
الحمد لله الحمد لله استجابو لمطالباتهم
هههههههههههههههه

20 او 30 مسلسل في اليوم ؟؟؟ وصحتك عاملة ايه طيب دلوقت (الصحة النفسية (والعقلية) طبعا ههههههه) ؟

الموضوع ده بقى ممكن دلوقت في ظل الفضائيات اللانهائية ، الله يرحم ايام زمان كان التليفزيون فيه قناتين بس الاولى والتانية ، والساعة 12 بالليل تسمعي قرآن الختام ونشيد بلادي وكله ينام ، المشكلة بقى في ظل المسلسلات الكتير انك بتتلغبطي ، يعني تبقي لسة شايفة محمد رياض بيقوم بدور محامي تدوري عالقناة التانية تلاقيه واد حبيب وفي المسلسل التالت تلاقيه قايم بدور مدرس شريف مابيديش دروس خصوصية ، والسلوك تخش في بعضها .

وبعدين الله يخليكي بلاش حكاية المظاهرات دي حتى ولو كانت عشان 100 غمر ، احنا في منتدى فك التكشيرة ، فك الإيه ؟ التكشيرة ، عشان فيه حاجات تانية بتفك العظم وعالهواء مباشرة ، ربنا يسترها معانا .

عايزين نضم زفتى المرة الجاية بقى .

خالد الهندسة
29-06-2006, 05:36 PM
أستاذ خالد
المرة دي أنا مش بأرد عشان أشكرك أو أحييك على المسلسل
أنا بأكتبلك عشان أشكرك على خفة دمك اللي في إعتقادي مش موجوده في أي مكان في الدنيا إلا عند المصريين
أحنا بس اللي بنقدر نضحك في عز زعلنا
وإحنا بس اللي بنقلب كل همومنا ومشاكلنا نكت وبرضه نضحك عليها
بيتهيألي أي شعب تاني من الشعوب المكشرة على طول دول ، لو مر عليهم شوية من اللي إحنا بنشوفه كان زمانهم اتجننوا
والله لو كان الفرص بتتوزع زي ما الواحد عايز ، وفيه عداله بين أهل الأرض لكان واحد مثلك الآن له شأن كبير في مجال السينما
لكن الحمدلله ، خلينا نأكلها بالحلال ، أبرك مليون مره ، وعلى الأقل بنضحك من قلوبنا ، عارف ليه ، عشان معندناش حاجه نبكي عليها
داخلين الدنيا فاضيين ، وشكلنا حنخرج فاضيين ( طبعا بأتكلم على الجيوب مش على الذنوب )
سامحني عشان قلبت المواجع
بس أنا حأدخل الموضوع ده بعد كده بس عشان أشوف ردودك الجميله اللي زي العسل على الأعضاء

مره تانية جزاك الله خير على البسمة اللي رسمتها على شفاهنا وكانت قربت تتنسى في زحمة الدنيا ومشاكلها

أخوك
سامر محمد
(أجنبي في السعودية)

أشكرك جدا أخي سامر ، فعلا أخي كلامك صحيح ، الحمد لله ان الدنيا مش كلها فلوس ، وياما ناس كتير اغنياء بس عايشين في جحيم ( دا مايمنعش ان فيه ناس اغنياء ومبسوطين برضه بس احنا لازم نصبر نفسنا) .

وبالنسبة للمواجع ، انت ماقلبتش علي المواجع ولا حاجة ، بالعكس انا فاهم كل حرف في كلامك لاني عشت في الخليج مش سنة واحدة ، لا خمسة (في وش العدو) ، وفعلا قد ايه مؤلم شعورك انك اجنبي زيك زي السيريلانكي والفلبيني وماتقدرش تكح الا بورقة مختومة من الغرفة التجارية ، ووجودك في جو جاف حار قاسي ولا اهل ولا احباب ، وأهم حاجة الريال (أنا بقى اللي هاقلب عليك المواجع هههه ) .

عموما اخي أتمنى لك العودة بالسلامة ، وماتنساش تدعي لنا لما تعمل عمرة دي لوحدها بالدنيا (وعلى فكرة اللي يغيظك بقى انك تلاقي واحد مصري جاي يعمل عمرة هو ومراته من مصر (يعني معاهم مثلا 10 الاف جنيه فايضين جم عملوا بيهم عمرة) ولما يتعرف عليك ويعرف انك شغال في السعودية ينزل قر ، وانت ممكن ماتقدرش تحوش المبلغ ده وانت متغرب هناك وكل سنة هدايا ووجع دماغ ، حرّس من العين يابني)

ذكرني كلامك بيت الشعر :

فلست ارى السعادة جمع مال ولكن التقي هو السعيد .

شكرا جزيلا لك .

قلب مصر
29-06-2006, 05:50 PM
فكرة جميلة يا خالد وموضوع جميل

بس يالا بقى اعمل الجزء التانى من المسلسل

نعيمة والذئاب ومديحة والذئاب وسهير والذئاب وجيهان والذئاب و ....... والذئاب

يعنى اشمعنى انت ماهى كل المسلسلات الناجحة دلوقتى بيعملولها 20 جزء ورا بعض

موهبة جميلة مغلفة بخفة الدم ياريت تمتعنا بقصص جديدة كى تفك اسر التكشيرة

شكرا يا خالد

white clouds
29-06-2006, 06:51 PM
20 او 30 مسلسل في اليوم ؟؟؟ وصحتك عاملة ايه طيب دلوقت (الصحة النفسية (والعقلية) طبعا ههههههه) ؟

الموضوع ده بقى ممكن دلوقت في ظل الفضائيات اللانهائية ، الله يرحم ايام زمان كان التليفزيون فيه قناتين بس الاولى والتانية ، والساعة 12 بالليل تسمعي قرآن الختام ونشيد بلادي وكله ينام ، المشكلة بقى في ظل المسلسلات الكتير انك بتتلغبطي ، يعني تبقي لسة شايفة محمد رياض بيقوم بدور محامي تدوري عالقناة التانية تلاقيه واد حبيب وفي المسلسل التالت تلاقيه قايم بدور مدرس شريف مابيديش دروس خصوصية ، والسلوك تخش في بعضها .

وبعدين الله يخليكي بلاش حكاية المظاهرات دي حتى ولو كانت عشان 100 غمر ، احنا في منتدى فك التكشيرة ، فك الإيه ؟ التكشيرة ، عشان فيه حاجات تانية بتفك العظم وعالهواء مباشرة ، ربنا يسترها معانا .

عايزين نضم زفتى المرة الجاية بقى

20 او 30 ايه بس دا انا كنت بهزر
ربنا تاب ع الواحد من زمان الحمد لله
ياااااااااه انت ما تعرفش دى زفتى انضمت من زماااااااااان

بالنسبه لمحمد رياض
كلامك تمام
فى حاجه تنقط
لما يكون المسلسل متعاد للمره ال50 وتلاقى فيه ناس متابعاه
تحيااااااتى
روبى

خالد الهندسة
30-06-2006, 07:35 AM
فكرة جميلة يا خالد وموضوع جميل

بس يالا بقى اعمل الجزء التانى من المسلسل

نعيمة والذئاب ومديحة والذئاب وسهير والذئاب وجيهان والذئاب و ....... والذئاب

يعنى اشمعنى انت ماهى كل المسلسلات الناجحة دلوقتى بيعملولها 20 جزء ورا بعض

موهبة جميلة مغلفة بخفة الدم ياريت تمتعنا بقصص جديدة كى تفك اسر التكشيرة

شكرا يا خالد

شكرا لك أختي على الرد .

وبالنسبة لفكرة الاجزاء ، ففكرة حضرتك في الاسماء جميلة قوي ، ويبقوا بقى نعيمة ومديحة و...الخ احفاد حنان اللي هتقوم نفس الممثلة بدورهم مع تغيير شكلها ، فمرة تظهر عيلة بمصاصة ومرة فتاة خجولة بضفاير ومرة شابة كلها اغراء وبعدين ست عجوزة كركوبة ، كأن مصر ماعادش فيها مواهب في اي حاجة ، حاجة تجنن ، وانا بقى عندي فكرة تانية في التسمية وعاوزين نختار بين الفكرتين ، بدل مانثبت اسم الحيوان "الذئاب" ونغير اسم البنت نسيب اسم البنت ونغير اسم الحيوان فتبقى اسماء اجزاء المسلسل "حنان والضباع" ثم "حنان والاسود" ثم "حنان والأفيال " لحد مانوصل ل "حنان والحيتان الزرقاء" ومافيش حيوان اكبر من كده يبقى ده آخر جزء .

وانتظري مواضيع جديدة قريبا ان شاء الله ، وشكرا لك مرة اخرى .