المساعد الشخصي الرقمي

مشاهدة النسخة كاملة : مذكرات باب دوره المياه العامه



khaled4
06-05-2006, 10:02 AM
احم ... شوية كده يا فنديه عشان النفس بس .... مفيش داعى للزحمة ..... مش عايزين اصابات الله يخليكم....
مش عارف حاطين ايديكم على مراخيركم ليه؟؟؟؟ مع إننا لسه مدخلناش فى دورة الميه ....قصدي فى الموضوع..
ما علينا .... ندخل فى الموضوع ....
بداية أحب ان انوه أن المقصود هنا هى أبواب دورات المياه العامة يعنى....المراحيض العمومية
-.اففف الله يقرفك ......
- ماشى ياسيدى ....ماعلينا ....
وليس المقصود أبواب دورات المياه الفايف ستارز اللي فيها اير فريشينر وليكويد سوب وتواليت بيبر واير دراير لزوم تنشيف الايدين...
انما اقصد ابواب دورات الميه الغلبانة التى يرتادها معظم حرافيش الشعب المصرى اللى انا منهم وخاصة اذا كنت على سفر ورجليك خدتك لغاية دورة مياه مسجد الفتح برمسيس او دورة مياه بولاق الدكرور التى تقوم سنية العمشة بالإشراف عليها ويساعدها بيومى طناش .
المهم سعادتك وقفت فى الطابور لغاية مجه دورك ودخلت .....
تعالى بقى نتصفح جريدة باب دورة الميه .... دى مجانية واميز مافيها انها مفيش عليها رقابة وبتحتوى على كتابات تمثل كل الاتجاهات .... يسارى ماشى ... يمينى ماشى .... صعيدى ماشى ... وبعدين دى شاملة كافة المواضيع من سياسة الى اقتصاد الى رياضة.....ويشرف على تحريرها واصدارها بشكل يومى جموع الشعب المزنوق ...تعالى نتصفح .....
- الأهلى عمهم وحابس دمهم ...
- للذكرى الهباب وايام العذاب والزحف على التراب – جندى سويلم البهنساوى – مركز تدريب المعادى
- كله يهون الا اللاهون – جندى مجند حمدى ابراهيم – مركز تدريب اللاهون
- ازازة الزيت بقت ب7 جنيه .... ماشى يا ظلمه
- مجانية تعليم ايه يا ولاد الــ ......
- كل ظالم وله نهاية .....
- خد عبرة من السادات .....
- الجمعية فيها لحمة ....ياولاد الكذابة ...
- امريكا بنت .......!
- يا ولاد الــ...... نهبتوا البلد
- نحن نوفر لك الوظائف بمختلف التخصصات وبمرتبات مغرية... فقط....شدالسيفون.....

وهكذا سادتى وسيداتى الأفاضل كما ترون فأبواب دورات المياه ليست مجرد حاجزا يستر من يجلس خلفه ... ولكنها متنفسا تستطيع من خلاله جموع الشعب المطحونة ان تعبر عن بعض ما يجيش بصدورها دون خوف من ان يكون هناك مخبر واقف لك ورا الباب.....بكل بساطة هذا الشعب ...وبكل مايتعرض له من ظلم وطحن وسحق الا انه يرفض ان يصمت ....سيتكلم حتى ولو من وراء باب دورة الميه ..
وتستمر الكتابة...وتستمر القراءة ......

برجاء من السادة الأعضاء ترك القبقاب على باب الدورة لأنه عهدة

منقول

amak_77
06-05-2006, 08:55 PM
ملحوظة : ما دام دخلت تقرأ ما تشتكيش

اففف الله يقرفك
لا تعليق
بس جااااامدة
انت فكرتني ايام الدراسة
كان فية مسجد امام المعهد و كان فيه كتابات كده برضه
و كان فيه ناس بيشتموا في مبارك

اروح ارد عليهم بانه راجل كويس (استفزاز)
اجي تاني يوم في صلاة الضهر برضه و اكتب رد تاني
اروح اكتب رد
لغايه ما في يوم كتبت اني عميد في الجيش و كل الشكر لمبارك و القوات المسلحة
مش فاكر بالضبط تقريبا بطلوا كتابة بعد كده

بس كانت حاجة كده عاملة زي منتدى wc
لدرجة كنت بخش مخصوص اشوف الردود
و شكرا ليك
شد السيفون على الرد يا مشرف

khaled4
07-05-2006, 09:24 PM
حلوه منتدى الحمامات دى

مظلوووم
07-05-2006, 10:22 PM
هههههههههههههههههههههههههههههه
ايوه يا خالد دى النزعه الفرعونيه فى كل مصرى :d
والظاهره مش فى الحمامات وبس دا على كل حاجه تقريبا حتى كراسى الاوتوبيس والمترو والنقود كمان
يعنى القدماء كتبوا على كل حاجه ما حبكتش الجدداء يكتبوا على الحمامات يعنى *106*
ههههههههههههههههههههه
تسلم ايدك على الموضوع يا خالد وعلى اضافه احمد النوبى :good:
ويجعلوا عاااااااااامر
انوووووووبيس

ميمو المصرى
08-05-2006, 03:55 AM
يا سلام موضوع تمام
فى الجون يعنى
حمامات
وذكريات
لالالالالا ده موضوع جامد خالص
بس للاسف مش عندى ذكريات للحمامات العامه
شكرا يا خالد

بنت شهريار
08-05-2006, 01:15 PM
بما انه تواليت رجالى
*120*

khaled4
08-05-2006, 04:18 PM
يا سلام هو يعنى بيحصل كدا بس ف التواليت الرجالى ؟؟؟؟؟؟؟؟؟؟؟


Photo Gallery