المساعد الشخصي الرقمي

مشاهدة النسخة كاملة : مظلووم علي كرسي التعارف



الصفحات : [1] 2

boukybouky
09-11-2005, 02:12 AM
السلام عليكم ورحمة الله وبركاته

اخواني في الله اعضاء ومشرفي ابناء مصر يسرني اليوم ان اعلن عن خبر جميل الا وهو جلوس عضو جديد من أبناء مصر عضو مشاكس و متعب شوية بس طيب و دمه خفيف... الكل طبعاً عارفه و مين مش اتشاكل معها هههههههههه العضو هو : مظلوووم علي كرسي التعارف وهو الحمد لله قد وافق علي ذلك بكامل اردته :d يعني مفيش اي ضغط عليه ولا حاجة وده معناه انه ذو صدر رحب وسوف يتقبل جميع الاسئلة التي سوف تعرض عليه من قبل الاعضاء والمشرفين

اخواني ارجو منكم عدم الاكثار من الاسئلة والا يزيد عدد الاسئلة في كل مشاركة عن اسئلة حتي يتسني لـمظلوووم ان يجيب عليها كلها ونعطي لغيرنا ايضا المجال لذلك واطلب منكم ايضل عدم وجود احاديث جانبية في الموضوع بمعني ان يقتصر الموضوع علي توجيه الاسئلة لـمظلوووم ويقوم مظلوووم بالرد عليها وذلك للحفاظ علي رونق الموضوع وجماله وعدم خروج الموضوع عن الهدف الاساسي له


اتفضل يا مظلوووم علي الجلوس علي كرسي التعارف ومده الجلوس هي اسبوع ان شاء الله سوف تبدا من اليوم الي يوم الأربعاء المقبل ان شاء الله ويمكن لك ان تجاوب علي جميع الاسئلة واللي مش عجبك ما تردش عليه وتجاهله تماما بس ما تزودهاش اوي وما تردش علي كل الاسئلة وتقول لا تعليق :d

في رعاية الله ،،،

boukybouky
09-11-2005, 02:15 AM
و نبدأ بالبداية التقليدية و هي البطاقة الشخصية

* الإسم *

* تاريخ الميلاد *

* الجنسية *

* المهنة أو المؤهل *

* محل الإقامة *

* الهويات *

و هبدأ خفيف *9* و مش هسأل كتير بس لي عودة إن شاء الله

في رعاية الله ،،

mshmsh73
09-11-2005, 09:22 AM
مظلووووووووم والله كويس قوى وانا اول واحده بعد الاسئله التقليديه يا سلام

نبدأ باة بسم الله

1- ليه اخترت اسم مظلووووووم ومين اللى ظلمك

2- ايه هى طموحاتك فى الحياة

3- ياترى حققت ايه من احلامك

4- متى تقول لنفسك قفى وهذا يكفى

5- ليه اخترت التوقيع ده بالذات " الرسمه الفرعونيه "

6- لمن تقول مقولتك من يضحك اخيرا يضحك كثيرا وما السبب

كفايه كدة وممكن اجى تانى ايه رايك

أم أحمد
09-11-2005, 11:26 AM
منور الكرسي يا مظلوم ان شاء الله تقضي وقت ممتع علي الكرسي

يلا بقي ندخل علي الاسئلة

ما هي اكتر اكله بتعرف تطبخها واكتر اكله بتحبها وهلا فعلا دخلت المطبخ قبل كده ولا كله كلام نظري بس؟

ما هي الحكمة التي تؤمن بها؟

ايه اخر كتاب قراته غير القران الكريم ؟

بتقرا لمين ؟

هل قمت بالتسجيل للدراسات العليا ولا لسه؟ *15*

كفاية كده دلوقتي بس اكيد راجعة تاني ان شاء الله بمزيد من الاسئلة
اتمني لك التوفيق

ضابط شرطة
09-11-2005, 11:47 AM
متشكرين جدا يا بوكي بوكي على الضيف الجميل جدا واللي منور الكرسي
واللي واحشنا من زمااااااان

اهلا بيك يا استاذ مظلووووووووووم
نبتدي الاسئلة
1- ايه هي اكتر حاجه بتحبها في منتدى ابناء مصر:)
2- ماهي وجهة نظرك في الزواج :d
3- اخترت اسم مظلوم لانك كنت مظلوم ، هل الظلم لسه شغال ولا مكسل تغير الاسم
4- ما هو تخطيط حضرتك للمستقبل

وكل سنه وانتم طيبين

bedo_ic
09-11-2005, 12:08 PM
باشا اهلا بيك على هذا الكرسى بس اوعى تكسره كالعادة
المهم ياسيدى عرفنا على نفسك بخلاف انك بتحب الاكل طبعا وطول اليوم تاكل
مع تحايتى بيدوووووووووووووووووووووووووووو

رشا
09-11-2005, 02:32 PM
اهلا يا مظلوم على الكرسي منور

انا عندى كام سؤال كدة بسم الله

1- عندما تدخل المنتدى اى الاقسام تتصفحة الاول ولماذا؟

2- بماذا تشعر عندما تخدع فى انسان ؟

3- موقف لا تنساة ؟

4- اصعب قرار اتخذتة فى حياتك وهل ندمت علية ؟

5- متى يشعر مظلوم بالضعف ؟

كفاية كدة ولى عودة ان شاء الله

Hesham Nassar
09-11-2005, 05:20 PM
منور كرسي الاعتراف يا باشا ..http://smilies.sofrayt.com/^/aiw/biggrin.gif

سآتي قريباً جداً بأسئلة جديده .. http://www.egyptsons.com/misr/images/smilies/old/shiny.gif

Coming Soon http://www.egyptsons.com/misr/images/smilies/old/thumbsup.gif

b_ammar
10-11-2005, 02:24 AM
السلام علي من اتبع هدي الرحمن


انا عندي شوية اسئله صغنتتين خاااااااالص يعني يادوب 52000 سؤال :d

1- هل انت من النوع المغامر و الي اي درجه ممكن تصل في المغامره ؟

2- لو حظك وداك جزيره في المحيط فيها اكل و شرب و تقدر تعيش فيها ايه اكتر 3 حاجات تحب تاخدهم معاك

و مين اكتر انسان تبحبه يكون معاك و لو ممكن تاخد معاك 3 اعضاء من المنتدي تختار مين ؟

3 - هناك الكثير و الكثير عن تعريفات الحب و الكلام فيه

فما رأي مظلوم في الحب ؟ و ماهي المواصفات التي كنت تضعها لفتاة احلامك ؟


4 - لو وضعوا العالم في كفه ماذا ستضع انت في الكفه الاخري

يعني العالم كله في كفة ميزان و ( ............ ) في الكه الثانيه



ان شاء الله لي عوده

مظلوووم
10-11-2005, 04:07 AM
هههههههههههههههههههههههههههههههه
يانهار ابيض
هى من اولها كدا هههههه
لا يا جماعه مش لاعب :d *5*
وحشتوووووونى جدا كلكم وان شاء الله احاول ارد على اسئلتكم نفر نفر
ويجعلوا عااااااااامر بيكم يا حلوييين *3*
انوووووووووبيس

مظلوووم
10-11-2005, 05:32 PM
و نبدأ بالبداية التقليدية و هي البطاقة الشخصية

* الإسم *

* تاريخ الميلاد *

* الجنسية *

* المهنة أو المؤهل *

* محل الإقامة *

* الهويات *

و هبدأ خفيف *9* و مش هسأل كتير بس لي عودة إن شاء الله

في رعاية الله ،،
ههههههههههههههههههههههههههههههههههه
كل دا وخفيف:d
امال لو تقيل بقى هههههههههههههههههه*7*
ربنا يعدى الاسبوع دا على خير يا رب ههههههههههه *36*
على العموم توكلنا على الله ونبدا الاجابه:)

الاسم : محمد ابراهيم احمد فتحى الشترى

تاريخ الميلاد : 22 / 5 /1981

الجنسيه : مصــــــــــرى اصيل *15*

محل الاقامه : محافظه الشرقيه / الزقازيق

الهوايات : والله كتير يا بوكى *11* ممكن نقول المصارعه والنت والكومبيوتر بصفه عامه والقراءه وتعلم اللغات والسفر والرحلات وطبعا المنتدى علشان ما حدش يزعل ههههههههه:d
وبانتظار الاسئله الخفيفه يا هندسه*15*
اللى بعدوووووووووووووووووووووا
انووووووووووبيس

مظلوووم
10-11-2005, 07:04 PM
مظلووووووووم والله كويس قوى وانا اول واحده بعد الاسئله التقليديه يا سلام

نبدأ باة بسم الله

1- ليه اخترت اسم مظلووووووم ومين اللى ظلمك

2- ايه هى طموحاتك فى الحياة

3- ياترى حققت ايه من احلامك

4- متى تقول لنفسك قفى وهذا يكفى

5- ليه اخترت التوقيع ده بالذات " الرسمه الفرعونيه "

6- لمن تقول مقولتك من يضحك اخيرا يضحك كثيرا وما السبب

كفايه كدة وممكن اجى تانى ايه رايك

يا اهلا يا اهلا بمشمش هانم *8* *8*
الاول كل سنه وانتى طيبه علشان ما عرفتش اقولهالك لان المنتدى كان قافل
ونجاوب على اسئله مشمش *9*
السؤال الاول
FF3333
يااااااه فكرتينى بالذى مضى ههههههههههههههههههه:d
والله يا مشمشه الاسم ليه عندى حكايه طويله شويه
الشق الاول ويمكن الاعضاء القدامى يعرفوه وخاصه الباشا ابن البلد ههههههههههههههههه*9*
وهى ان اول تعامل ليا مع المنتديات كانت مع المنتدى دا وكنت فاكره زى الشات واختلفت مع احد الاعضاء الكبار والذى اصبح بامانه من اعز الشخصيات الى قلبى فى هذا المنتدى الا وهوا استاذنا الفاضل عاطف هلال ربنا يخليه ويديه الصحه وطول العمر وانا كنت داخل بصراحه مش فاهم ايه اللى بيحصل واختلفنا انا واستاذى عاطف فى موضوع وافتكرايامها تطاولت على احد الاعضاء فى الموضوع دا مما ادى الى ايقافى هههههههههههههه وطبعا انتوا عارفين مين اللى وقفنى هههههههههه:d فاتضايقت بصراحه قولت ازاى انطرد كدا ودخلت وسجلت تانى باسم انوبيس 2 وكنت ايامها متعلم شويه هاك على قدى من واحد معرفه وقولت عليا وعلى اعدائى انا هاوقع المنتدى دا واللى يحصل يحصل هههههههههههههه طبعا ما عرفتش او بمعنى اصح كانت مجهده شويه وكلمت اخينا اللى طردنى ههههههههههه والمره دى عرفت انى انا غلط واعتذرت للاستاذ عاطف واعتذرت للعضو الاخر وبعديها ما فيش باسبوع اصطدمت بعمود اخر من اعمده هذا المنتدى الا وهوا العضوه الرائعه واختى العزيزه انفال الفاضله وكانت فى مخيلتى تمثل التيار المتشدد فى هذا المنتدى ههههههههههه وكالعاده اصطدمت بيها وهوب هوب كلمه من هنا على كلمه من هنا كنت موقوف للمره التانيه ههههههههههههه قولت فى نفسى يا نهار ابيض تنطرد للمره التانيه وتسكت لا تراجع ولا استسلام خش يا واد وسجل تالت مره واقلب عاليها واطيها هههههههههههههه*15* لكن سبحان الله مرت الايام وسمحتلى الظروف انى اكلم انفال وسبحان الله بقت من اقرب الشخصيات الى قلبى فى هذا الصرح الكبير ربنا يعزها ويحميها وتمر الايام وييجى المنتدى حيه خبيثه تحاول ان تبث سموم التنصير بين جنابات هذا الصرح الكبير مستغله مساحه الحريه المتاحه وشاء القدر ان اكون فى مواجهتها وكالعاده ما فيش تفاهم هههههههههههههههه *87* *87* *123* *127**130* لا اراديا كنت باشوط فيها ويظهر ان الشوطه كانت جامده شويه فادت الى خروجى انا وتلك الحيه بره المنتدى ههههههههههههههههههه بس الحمد لله انها ما رجعتش تانى واخدت درس قاسى لن تنساه *9* لكن فعلا حسيت ساعتها انى انظلمت فسجلت باسم مظلووووم ومازال معى الى الان والحمد لله لاقى شهره كبيره بين احبائى واخوانى ودا والله بفضل الله اولا وحبكم ليا ثانيا وربنا ما يجيب ايقاف تانى ههههههه *36*
اسف على الاطاله يا حلوين *3*

نخش على السؤال التانى
طموحاتى فى الحياه والله يا مشمش انا قنوع وطموحاتى مش كتيركل اللى طالبه الستر والصحه واتنين مليون جنيه واتجوز نانسى عجرم او غاده عبد الرازق علشان طويله زييى ههههههههههههههههههههه
لا والله بجد انا كل طموحى فى الحياه انى اكون انسان كويس ومسلم صحيح يخاف الله ويتقيه فى كل عمل وان اكون بار بوالدى وان يرزقنى رزقا حسنا يعننى على حوائج الزمن وان يجمعنى بالزوجه الصالحه التى تعيننى على المزيد من الخير وتكون عونا لى فى حياتى وان ينعم علينا الله بحسن الخاتمه وان يكون خالص عملى لله ولمنفعه المسلمين وان ينعم الله على ويرزقنى بحسن الخاتمه وانول رحمته وقبوله ورضاه وان يجمعنى بنبيه الكريم وان يقر عينى برؤيه نور وجهه العظيم
احلام كتير اوى وامنيات جليله اتمنى من الله انه يعينى على ادائها على اكمل وجه ادعوووووولى*3*

السؤال التالت
يا ترى حققت ايه من احلامك؟
والله يا مشمش احلامى كتير واللى حققته مش كتير بس طبعا كل شىء بيد الله سبحانه وتعالى وما اصدق قوله عسى ان تكرهوا وعسى ان تحبوا وما ياكده الايام من كراهه فى ما نحب ومحبه فيما نكره وزى ما قولتلك احلام اى انسان فينا بسيطه وشخصيه ومش قصدى هنا انى اخرج من نطاق السؤال لكن ايه حلم اى شاب غير انه يكون مستريح ماديا وفى ايده عروسه زى القمر وراكب عربيه اخر موديل وواخد شقه على النيل او على الكورنيش عندكم هههههههههه لكن الحلم اللى فعلا يستاهل انه يبقى حلم يوم ما يكون الاسلام والمسلمين يد واحده وان يكون الدين كله لله وان ينصر الله الاسلام ويعزه فى شتى بقاع الارض وان يسود به الامن والسلام وان يعتز المسلم باسلامه ويفتخر به وان لا ارى بين المسلمين شقيا ولا محروما وان يعود الاسلام كما كان دين رحمه وازدهار وقوه وارجو من الله ان ارى ذلك اليوم وفعلا لو الحلم دا اتحقق ساعتها اى حلم تانى هايكون خطوه سهله وبسيطه
وعلى المستوى الشخصى وارجوكم ما تسموهاش تعصب والله نفسى مصر ترجع تانى زى ما كانت مصر القديمه بس بدون جبروت وتاخد الرياده الحقيقيه وتكون كما كانت من قبل مناره العلم وشعله نور تهدى الاحباء وشعله نار تحرق الاعداء
وبالنسبه للمنتدى نفسى نفضل على سيرفر حلو *36*وان المنتدى يكبر ويوسع اكتر واكتر ويبقى حاجه كبيره ومفيده لكل طالب علم ومعرفه وثقافه قولوا ان شاء الله ههههههههههههههه

السؤال الرابع ............... اللهم طولك يا روح هههههههههههههههههه*14*
متى تقول لنفسك قفى وهذا يكفى
يوم ما احس انى هاظلم سواء نفسى او غيرى

السؤال الخامس
ليه اخترت التوقيع ده بالذات " الرسمه الفرعونيه
ههههههههههههه دى مش رسمه يا مشمش دى صوره انوبيس احد الهه مصر القديمه والقائم على التحنيط والحساب
وانا اخترته مصادفه لانى شوفت الصوره فى احد مواقع الالعاب وعجبتنى ولقيت فيها قوه وغموض وسحر حضارتنا الجميله ودا طبعا زائد عشقى الرهيب لمصر القديمه وتاريخها

السؤال السادس
ايه؟ نعم نعم ؟ *112*لا احنا ما اتفقناش على كده *23*ههههههههههههههههههه احنا قولنا خمسه بس:d
الحقى يا بوكى بوكى مشمش بوظت السيتيم خالص ههههههههههههه
بس علشان خاطر مشمش نمشيها سته بس ما تقوليش لحد احسن باقى الاعضاء يقلدوكى *65* ههههههههههههه
لمن تقول مقولتك من يضحك اخيرا يضحك كثيرا وما السبب
باقولها لاى شخص ممكن يفتكر يوم انه يغشنى او بالبلدى كدا يضحك عليا فا باقوله هانشوف مين اللى يضحك فى الاخر وطبعا انتوا شايفنى طول اليوم باضحك هههههههههههههههههه

كفايه كدة وممكن اجى تانى ايه رايك
ليه بس ما بدرى *60* هههههههههههههههههه
ولو عاوزه تيجى تانى اهلا وسهلا يا مشمش *39* انتى تنورى فى اى وقت *87*
ياااااه يا جماعه شوفتوا رحابه صدر اوسع من كدا ههههههههههههههههههه حقيقى انا كويس :d
نورتينى بجد يا مشمش وعاوز اشوفك تانى اكيد*8*
ويجعلوا عاااااااااااااامر بيكم دايما
انوووووووووبيس

سـلـوى
10-11-2005, 07:19 PM
بخخخخخخخخخخ

انا جيت :d

منور يا محمد كرسى التعارف
بجد من الشخصيات التى تستحق التكريم

ربنا يحفظك و يزيدك

و اجابتك على رشروش فى سبب تسميتك بالاسم دة رهيبة
انا فضلت اضحك ضحك
و ما شاء الله مكنتش بتحب المشاكل خالص :d

يلا الحمد لله ان كل شئ عدى

انا بس جاية اسلم و لى عودة بأذن الله

او اسأل بالمرة

مين اكتر الاعضاء اللى بتعزهم و بتحترمهم فى المنتدى و مش تقول الكل اكيد الكل بس اكثرهم؟؟؟

ما هو سبب تقربك الى الله هل موقف معين ام الحياة نفسها؟؟؟

ماذا تعنى لك هذة الكلمات : الحياة ــــــ الموت ــــــــــ الامل ـــــــ الايمان ؟؟؟؟؟؟



ربنا يحفظك و يحميك دائما
و يقدرك على تحقيق ما تتمنى و يقدرك على ارضائة دائما

تحيتى و تقديرى

boukybouky
11-11-2005, 02:28 AM
إيه يا مظلوووم انا كنت داخلة احط سؤال لقيتك مش رديت غير علي اتنين بس

لا لا لا مش يينفع الكسل ده يلا بقي عايزين همة

عايزين نحط بقية الأسئلة أسبوع بقي و نزهقك فيه ههههههههههههههه

في رعاية الله ،،،،

مظلوووم
11-11-2005, 01:59 PM
منور الكرسي يا مظلوم ان شاء الله تقضي وقت ممتع علي الكرسي

يلا بقي ندخل علي الاسئلة

ما هي اكتر اكله بتعرف تطبخها واكتر اكله بتحبها وهلا فعلا دخلت المطبخ قبل كده ولا كله كلام نظري بس؟

ما هي الحكمة التي تؤمن بها؟

ايه اخر كتاب قراته غير القران الكريم ؟

بتقرا لمين ؟

هل قمت بالتسجيل للدراسات العليا ولا لسه؟ *15*

كفاية كده دلوقتي بس اكيد راجعة تاني ان شاء الله بمزيد من الاسئلة
اتمني لك التوفيق

يا اهلا يا اهلا بقمرنا كلنا ام احمد*8*
والموضوع نور بيكى والله
ونخش على الاسئله*9*


ما هي اكتر اكله بتعرف تطبخها واكتر اكله بتحبها وهلا فعلا دخلت المطبخ قبل كده ولا كله كلام نظري بس؟
والله يا ام احمد انا ما بقولش لحاجه لا ابدا والحمد لله باحب كل الاكل ما عدا الفسيخ هوا اللى ما بيحبنيش هههههههههه لكن طبعا فى اكلات ما يختلفش عليها اتنين وباموووت فيها بجد زى المكرونه بالبشاميل والطواجن بكافه انواعها
وانا دخلت المطبخ قبل كد وكانت تجربه مريره واتمنعت بعدها باوامر عليا من حكومه البيت ان ادخله نهائيا هههههههههه :d
اما بالنسبه للاكل اللى باعرف اطبخها فهى المكرونه وانا مقتنع تماما انها مكرونه لكن كل اللى يدوقها منى بيقولى استحاله دى تكون مكرونه ابدا هههههههههههه:d


ما هي الحكمة التي تؤمن بها؟
والله الحكم كتير بس الحكمه اللى باحبها فعلا اعمل الخير وارميه البحر وكما تدين تدان والكيس من دان نفسه والكيس اى العاقل ودى من قول رسول الله صلى الله عليه وسلم


ايه اخر كتاب قراته غير القران الكريم ؟
رجال حول الرسول
ومنابع اصول الحكمه دول اخر كتابين قراتهم


بتقرا لمين؟
والله كتير يا ام احمد تقدرى تقولى اى كتاب بيقابلنى بقراه لكن الغالب لانيس منصور ومصطفى محمود


هل قمت بالتسجيل للدراسات العليا ولا لسه؟ *15*
والله ناوى باذن الله يا ام احمد بس اخد نفسى شويه ههههههههههههه:)


كفاية كده دلوقتي بس اكيد راجعة تاني ان شاء الله بمزيد من الاسئلة
ههههههههههههههههههههههههههههه انت تنورى يا ام احمد بس من غير اسئله ههههههههههههههههههه
لا طبعا انا بهزر انتى تشرفينا وتنورينا يا ام احمد فى اى وقت وهاتى معاكى عشره كيلو اسئله انا مستعد ان شاء الله *15*
ويجعلوا عااااااااااااااامر بيكى
انووووووووووووووووبيس

ابن البلد
11-11-2005, 02:41 PM
قشطة مظلوم علي الكرسي :d

ما سر إختيار الاسم مظلوم ؟؟
موقف حصل ندمت علي حدوثه ؟
موقف تمنيت حدوثه بالمنتدى؟


لسه فيه أسئلة تانيه بس خلص أنت بس دول
:d

مظلوووم
11-11-2005, 05:23 PM
متشكرين جدا يا بوكي بوكي على الضيف الجميل جدا واللي منور الكرسي
واللي واحشنا من زمااااااان

اهلا بيك يا استاذ مظلووووووووووم
نبتدي الاسئلة
1- ايه هي اكتر حاجه بتحبها في منتدى ابناء مصر:)
2- ماهي وجهة نظرك في الزواج :d
3- اخترت اسم مظلوم لانك كنت مظلوم ، هل الظلم لسه شغال ولا مكسل تغير الاسم
4- ما هو تخطيط حضرتك للمستقبل

وكل سنه وانتم طيبين


متشكرين جدا يا بوكي بوكي على الضيف الجميل جدا واللي منور الكرسي
واللي واحشنا من زمااااااان اهلا بيك يا استاذ مظلووووووووووم

ربنا يخليك يا جميل واهلا بيك معانا *6*


نبتدي الاسئلة
ابتدى هوا حدا ماسكك هههههههههههههههه:d


1- ايه هي اكتر حاجه بتحبها في منتدى ابناء مصر:)
والله يا ابو حميد هى مش حاجه واحده حاجات كتير بس من ابرازها روح الاحترام والاخوه والاسريه السائده بين المنتدى بجد باحس ان المنتدى اسره واحده مترابطه ومتجمعين دايما فى الفرح والحزن معا


2- ماهي وجهة نظرك في الزواج :d
ههههههههههههههههههههههه يا واد عيب اختشى *7* انا باتكسف ههههههههههههههههه:d
والله يا ابو حميد انا رايى فى الجواز اولا هوا قسمه ونصيب ثانيا زى ما بيقولوا الجواز زى البطيخه ههههههههههه ما حدش يعرف جواها ايه لكن فى اسس معينه لاختيار شريكه العمر واعتقد ان صفات الزوجه الصالحه معروفه للجيع وربنا يا رب يكرمنا ويكرمك بالزوجه الصالحه اللى تعينا على مزيدا من الخير*3*


3- اخترت اسم مظلوم لانك كنت مظلوم ، هل الظلم لسه شغال ولا مكسل تغير الاسم
لا انا نشيط وزى الفل وما بحبش الكسل *15* ولو عاوز تعرف السر ارجع بالصفحه لورا وانت تعرف *9*


4- ما هو تخطيط حضرتك للمستقبل

والله يا ابنى انا بطلت اخطط :d وسايبها على الله وزى ما تيجى تيجى بس كل اللى عيلا انى اعمل اللى عليا والباقى على ربنا وهوا بيده مقاليد كل شىء وبيده تصريف الامور
نورتنى يا ابو حميد*8*
اللى بعدوووووووووووووووووووووا
انوووووووبيس

مريانا
11-11-2005, 05:45 PM
السلام عليكم

اهلا يا مظلووووم منور والله انا عندي سؤال واحد بس مش حكثر عليك بس اكيد حرجع ثاني

لو غلطت بحق حد تعترف بخطأك ولا تكابر وما تعترفش؟

رجعالك انشالله ثاني

daria
11-11-2005, 06:27 PM
والله يا ابو حميد انا رايى فى الجواز اولا هوا قسمه ونصيب ثانيا زى ما بيقولوا الجواز زى البطيخه ههههههههههه ما حدش يعرف جواها ايه لكن فى اسس معينه لاختيار شريكه العمر واعتقد ان صفات الزوجه الصالحه معروفه للجيع وربنا يا رب يكرمنا ويكرمك بالزوجه الصالحه اللى تعينا على مزيدا من الخير*3*





الاول اسجل اعتراضي وبشدة على مقولة الجواز بطيخة *9*
رغم ان محمد فاروق اخويا بيقولها كتير :d :d


ثانيا منور الكرسي يا محمد
وواضح ان المرة دي حتكون من احلى المرات لانك تلقائي وبتجيب من الاخر
ودة كويس اوي
يعني حنعرفك تمام


انا مش في دماغي اسئلة كتير
بس ححاول يعني

امممممممم

ايه يا محمد اليوم المثالي بالنسبة لك ؟؟؟
اللى تعمل في ايه يعني
وتقضيه ازاي

ايه الصفة اللى لو في حد تقتلك
تسيب الشخص خالص بسببها ؟؟


حافكر تانى واجيلك
ورجاء خاص
فوق كدة على ايدك اليمين

كبر الخط الله يكرمك
في ناس زيي نظرهم على قدهم
تمام؟؟
Have a good week *3*

ابن البلد
11-11-2005, 06:54 PM
ههههههههههههههههههههههه يا واد عيب اختشى انا باتكسف ههههههههههههههههه
والله يا ابو حميد انا رايى فى الجواز اولا هوا قسمه ونصيب ثانيا زى ما بيقولوا الجواز زى البطيخه ههههههههههه ما حدش يعرف جواها ايه لكن فى اسس معينه لاختيار شريكه العمر واعتقد ان صفات الزوجه الصالحه معروفه للجيع وربنا يا رب يكرمنا ويكرمك بالزوجه الصالحه اللى تعينا على مزيدا من الخير
أنا معتقدش أن الجواز زي البطيخه
يمكن يكون زي أساسيات البناء في كلية الهندسة قسم مدنى :d
علشان تبني بيت لازم تضع الأساس صح :d
وعلي أساس ما كان الأساس أعمق كل ما كان المبني أقوى
علشان كده كانت حمرا كانت قرعه
الرك علي الأساس يا مظلوم
وربنا يوعدك بناطحة سحاب :f:

MEMONA
11-11-2005, 10:59 PM
السلام عليكم
إزيك يا مظلوووم منور الكرسي يا عسل *9*
أنا عندي كام سؤال ويا ريت تجاوبني بصراحة يا بيغ بوس *4*
1.أحلى وأغلى هدية على قلبك كانت إيه ومن مين ؟
2.أظرف موقف حصل معاك وكم كان عمرك؟
3. أغنية أو أبيات شعرية أو خاطرة أعجبتك ..... ولمن تحب أن تهديها ؟
4.شخص تتمنى أنا تراه في هذه اللحظة وفي هذا الوقت ؟
5. متى تكون سعيداً ومتى تكون حزيناً ومتى تكون غاضبا ً ومتى تحس أنك تكون متعاونا أو متعاطفا أومحبا أو رحيما ؟*3*

حسام عمر
12-11-2005, 02:11 AM
منور الكرسى يا محمد


والكرسى منور بيك


سؤال مؤقت لحد محضر ال 200 سؤال اللى محضرهملك



ما الوظيفه التى تتمنها وتجد نفسك فيها ؟؟؟؟؟؟؟؟؟؟؟؟؟


وربنا يقدرك على الردود

saladino
12-11-2005, 03:02 AM
ياااااااااااااااااااخبر أبيض
انا شوفت االموضوع ولاقيت القصة كبر بالراحى على الواد مظلللللللللللوم يبقى مظلووووووووم ومطحون فى الاسئلة كدة حراااااااام الرحمة دة الكرسى الاعدم ارحم :d :d :d


عموما علشان كلنا بنحبك عايزاين كل حاجة عنك ده احنا غلبنا الرجالة اللى بالى بالك *14* *14*

بس بس كفاية علشان المنتدى لة ودان ومظلووووووم يروح فيها يبقى مظلوووووووم بجد

انا معنديش اى اسئلة ليك

ههههههههههههههههه
اللى بعدواااااا
ههههههههههههههه

osha
12-11-2005, 05:34 AM
اهلا اهلا اهلا
انت جيت اخيرا يا محمد
منور يا باشا

انا داخلة اسألك سؤالين
الأول : أخبارك ايه?
الثاني : تفتكر أسأل اللي في نفسي والا أتريث?

حتة سكرة
12-11-2005, 10:50 AM
مظلووووووووووووم ظالميموووووو

أول حاجة
كل سنة وانت طيب

عامل أية ياباشا يارب تكون بخير


أنا حسأل شوية أسئلة صوغنانين كدة الي جيين على بالي دلوقتي
أوكى

أولاَ: عمرك ظلمت حد في الدنيا دي *14* وقول الحق وخلي بالك أنا عندي جهاز كشف الكدب*9* أة وكمان تقول مين الشخصية الي ظلمتها ؟؟؟ وظلمتها لية ؟؟

ثانياً: من السهل عليك أنك ترجع في رأي أنت كنت مؤمن بية وكنت بتحاول تقنع بية غيرك وبعد كدة لقيت ان الرأي دة خاطئ؟؟*14* *14*

وبس خلااااص *15* *15*

مظلوووم
12-11-2005, 05:19 PM
باشا اهلا بيك على هذا الكرسى بس اوعى تكسره كالعادة
المهم ياسيدى عرفنا على نفسك بخلاف انك بتحب الاكل طبعا وطول اليوم تاكل
مع تحايتى بيدوووووووووووووووووووووووووووو


باشا اهلا بيك على هذا الكرسى بس اوعى تكسره كالعادة
ههههههههههههههههههههههههههههههههههههه
طب اعمل ايه بس يا هندسه اهو الواحد بيحاول يخس ههههههههه خلاص هاتولى كنبه التعارف و بلاش كرسى :d


بخلاف انك بتحب الاكل طبعا وطول اليوم تاكل
هههههههههههههههههههه قل اعوذوا برب الفلق :d اتارينى باقول نفسى مسدوده اليومين دول *14*


المهم ياسيدى عرفنا على نفسك

يا خبر ابيض فى حد فى الدنيا ما يعرفش الشترى هههههههههههههههه انت ما بتقراش جرايد ولا ايه :d
والله يا هندسه انسان عادى جدا باحب الناس بس مش كل الناس هههههههههههههههه ماهو اليهود برضوا ناس ولا ايه واعشق البساطه الى ابعد الحدود ونفسى اكون انسان نافع لنفسى ولوطنى ولدينى ونفسى ربنا يرضى ولو عاوز تعرف معلومات اكتر اقرا اخبار النجوم هههههههههههههههههه قصدى ارجع ورا شويه
نورتنا يا ابو عبده وكل سنه وانت طيب*8*
ويجعلوا عاااااااااااامر
انووووووووبيس

مظلوووم
12-11-2005, 06:26 PM
اهلا يا مظلوم على الكرسي منور

انا عندى كام سؤال كدة بسم الله

1- عندما تدخل المنتدى اى الاقسام تتصفحة الاول ولماذا؟

2- بماذا تشعر عندما تخدع فى انسان ؟

3- موقف لا تنساة ؟

4- اصعب قرار اتخذتة فى حياتك وهل ندمت علية ؟

5- متى يشعر مظلوم بالضعف ؟

كفاية كدة ولى عودة ان شاء الله


اهلا يا مظلوم على الكرسي منور

يا اهلا يا اهلا برشروش دا نورك يا باشا *8*


انا عندى كام سؤال كدة بسم الله
انت تؤمر يا ريس بس انت قشر هههههههههههههه


1- عندما تدخل المنتدى اى الاقسام تتصفحة الاول ولماذا؟
والله يا رشروش انا معظم دخولى المنتدى بيبقى ردود على مواضيع سابقه ونادر ما بنزل مواضيع لكن طبعا معشوقتى الاولى فك التكشيره والمسابقات ولازم اصبح على الكومبيوتر والبرامج وما فيش مانع من بصه فى السريع على المناقشات واثبات حضور فى العامه وبصراحه لقاءات فى حب الله مقصر فيها تقصير شديد ربنا يسامحنى بقى *7* اما السياسه فبطلت اخشها علشان دمى ما يتحرقش وعلشان انيم انوبيس المشاغب جوايا ربنا يستر وما يصحاش انا ما صدقت انه نام هههههههههههه:d
لكن فى مواضيع لاعضاء معينين ما بقاومش ما اخشهاش زى استاذنا الكبير عاطف هلال والصعيدى وانفال وداريا واوشا وعبدو باشا وناس كتير فعلا باحب اقرالهم وباستمتع بكتابتهم جدا يعنى مش القاعه اللى بتشد بالنسبه لى ولكن المواضيع اكتر


2- بماذا تشعر عندما تخدع فى انسان ؟
والله فى حياتى العمليه ما حصلتش والحمد لله وكل من اعرفه ولله الحمد على قد المسؤليه وما قصرش يمكن بتبقى نظره فى الناس لكن ربنا اعلم بما فى الصدور ولكن لو حصلت طبعا هازعل جدا وهاتالم لان مشكلتى انى لما باحب حد باحبه جدا وما بافكرش فيه غلط ولو للحظه واحده ويمكن علشان كدا ربنا موقفلى ولاد الحلال زى ما بنقول بالبلدى وربنا يوقفلنا ولاد الحلال دايما يا رب كلنا وبالنسبه للشخص اللى خدعنى هاروح له واصارحه واقوله واحاول انى افهمه غلطه دا لو كان يستاهل لكن فى بعض الناس زى ما بنقول ( العيب لو طلع من اهل العيب ما يبقاش عيب ) ساعتها بارمى ورا ضهرى ويتحط تحت الشخص دا خطين حمر :d يعنى ما فيش اى معاملات شخصيه معاه يعنى صباح الخير يا جارى انت فى حالك وانا فى حالى


3- موقف لا تنساة ؟
والله كتير يا رشروش بس اكترهم زلزال 92 اليوم دا لن انساه مدى حياتى لاننا بجد واجهنا الموت يومها وسبحان المنجى الحى القيوم وايضا اليوم الذى لا انساه يوم وفاه اصدقائى ربنا يرحمهم ويتقبلهم ويغفر لهم ويرحمهم


4- اصعب قرار اتخذتة فى حياتك وهل ندمت علية ؟
ههههههههههههههههههه دا اسم برنامج بيتهيالى يا رشروش :d
اصعب قرار يوم ما مسار حياتى اتقلب 180 درجه ودخلت كليه العلوم وعسى ان تكرهوا شيئا وهوا خيرا لكم


5- متى يشعر مظلوم بالضعف ؟
كلنا بشر وضعفاء والقوى هو الله لكن باحس بالضعف فى لحظات ويمكن قدام الدموع وخاصه لو حد مسن او والدتى ههههههههههههه ما تفهميش لكن ما باحبش اشوف حد بيبكى وباحاول باى طريقه انى اوقف دموعه واسعده لو قدرت حتى لو على حساب نفسى وربنا ما يجيب دموع ابدا الا دموع فرح :)


كفاية كدة ولى عودة ان شاء الله
انتى تنورى يا رشروش اهلا بيكى فى اى وقت *8* *8*
ويجعلوا عااااااااااااااامر
انوووووووووووبيس

حتة سكرة
13-11-2005, 10:51 AM
أستاذ مظليموووووووووووووووو

انت مش رديت على سؤالتي

وعلية أنا مضطرة ان *22* *22* *22* *22* *22* *22*

Amira
13-11-2005, 11:16 AM
أخي الكريم مظلوم
ماشاء الله ماحدش سايبلي سؤال أسأله :d

عموما أنا حبيت أسجل حضور و أسلم عليك *8* و أقلك ربنا يقويك علي الأجابات

صادق تمنياتي الطيبة لك :f2:

أميـــــرة

ضابط شرطة
13-11-2005, 11:23 AM
معلش يا مستر محمد نسيت سؤال

يعني ايه انووووووووووبيس دي؟؟؟

اصلي حشري :)

مظلوووم
13-11-2005, 01:25 PM
:)

أستاذ مظليموووووووووووووووو

انت مش رديت على سؤالتي

وعلية أنا مضطرة ان *22* *22* *22* *22* *22* *22*

والله هارد يا سكره بس اصبروا عليا شويه ههههههههههههههههههههه:d
اليومين دول باخلص اوراقى بقى ادعووووولى:)
واسف على التاخير فى الردود سامحونى يا شباب
جاااااااااااى تانى ما تقلقوش*15*
انووووووووووووووووبيس

سيد جعيتم
13-11-2005, 09:37 PM
الأبن العزيز / محمد ابراهيم ( مظلووم )
تحياتى لك وقلبى عندك . وانا الحقيقة بعد الأسئلة التى قدمها الأعضاء لم اجد اسئلة وعموماً احييك .

b_ammar
13-11-2005, 10:18 PM
يعني تيجي علي حظي انا ياعم مظلووووووووووووم *7*



اشطات


مستني ردودك

ديدي
13-11-2005, 10:23 PM
تسجيل حضور واعجاب بالموضوع
الاسئلة كتير اوى يا مظلوم ربنا معاكى
لى عوده لطرح الاسئلة

بنت مصر
13-11-2005, 10:55 PM
مظلوم ازيك وايه اخبارك وانت قاعد على كرسي العرش.؟

انا اسئلتي خفيفة عشان ما تزهقش مننا

س1 أكتر شخصية في المنتدى أثرت فيك
س2 داعية اسلامي تحرص على متابعته
س3 أمنية تحلم بها ولم تحققها بعد
س4 من هـ(و)(ي) قدوتك في الحياة ولماذا؟


بسنت

مظلوووم
14-11-2005, 01:45 AM
منور كرسي الاعتراف يا باشا ..http://smilies.sofrayt.com/^/aiw/biggrin.gif

سآتي قريباً جداً بأسئلة جديده .. http://www.egyptsons.com/misr/images/smilies/old/shiny.gif

Coming Soon http://www.egyptsons.com/misr/images/smilies/old/thumbsup.gif




هههههههههههههههههههههههههههههههههه دا نورك انت يا اتش *3*
تنورنى يا جميل فى اى وقت ربنا معاك ويعينك وتروح سلاح حلو باذن الله*6*
ويجعلوا عاااااااااااااااامر بيك يا باشا
انووووووووووووبيس

مظلوووم
14-11-2005, 03:02 AM
السلام علي من اتبع هدي الرحمن


انا عندي شوية اسئله صغنتتين خاااااااالص يعني يادوب 52000 سؤال :d

1- هل انت من النوع المغامر و الي اي درجه ممكن تصل في المغامره ؟

2- لو حظك وداك جزيره في المحيط فيها اكل و شرب و تقدر تعيش فيها ايه اكتر 3 حاجات تحب تاخدهم معاك

و مين اكتر انسان تبحبه يكون معاك و لو ممكن تاخد معاك 3 اعضاء من المنتدي تختار مين ؟

3 - هناك الكثير و الكثير عن تعريفات الحب و الكلام فيه

فما رأي مظلوم في الحب ؟ و ماهي المواصفات التي كنت تضعها لفتاة احلامك ؟


4 - لو وضعوا العالم في كفه ماذا ستضع انت في الكفه الاخري

يعني العالم كله في كفة ميزان و ( ............ ) في الكه الثانيه



ان شاء الله لي عوده


السلام علي من اتبع هدي الرحمن
وعليكم السلام ورحمه الله وبركاته اتفضااااااااااااااااااال :d


انا عندي شوية اسئله صغنتتين خاااااااالص يعني يادوب 52000 سؤال :d
هههههههههههههههههههه فوت علينا بكره يا سيد :d ابو عمار داخل سخن موحوح *9* هههههههههههههههههههههه


1- هل انت من النوع المغامر و الي اي درجه ممكن تصل في المغامره ؟

والله مش قوى يا عمار بس مش لدرجه لو قالولى نط من فوق برج الجزيره انط لكن لو قالولى هانربط فى رجليك استك او هانحطلك مرتبه تحت يبقى ممكن انط هههههههههههههههه :d


2- لو حظك وداك جزيره في المحيط فيها اكل و شرب
هههههههههههههه دا اكيد حظى حلو :good: فين هى الجزيره دى


ايه اكتر 3 حاجات تحب تاخدهم معاك
اولا الكومبيوتر ويا سلام لو الجزيره فيها dsl :d دى تبقى جزيره رائعه :good:
وموبايلى علشان اطمن على الناس والناس تطمن عليا ما انا مش هاقعد مقطوع من شجره لوحدى هههههههههههههههه
وشمسيه ولبس بحر علشان تبقى كملت وتبقى العمليه اخر حلاوه هههههههههههههههه


و مين اكتر انسان تبحبه يكون معاك و لو ممكن تاخد معاك 3 اعضاء من المنتدي تختار مين ؟
لا انا مش عاوز حد هههههههههههههههههه عاوز اقعد لوحدى استجم *9* :d


3 - هناك الكثير و الكثير عن تعريفات الحب و الكلام فيه

فما رأي مظلوم في الحب ؟ و ماهي المواصفات التي كنت تضعها لفتاة احلامك ؟
والله يا ابو عمار بما ان العبد لله رجل كيميائى فالحب عندى معادله كيميائيه فالحب هوا العامل الوحيد الذى يستطيع ان يحول اكثر العناصر نشاطا الى اكثرها خمولا واقصى العناصر خمولا الى اكثرها نشاطا:)
بجد شعور جميل اوى وما نقدرش نعيش من غيره فالحب بمفهوم عام هو اقصى درجات البر ومصب لفروع الخير وهوا درجات فاولها واكبرها الحب الاكبر وهوا حب الله خالق كل شىء وهوا المنبع والمصب ويالسعاده الانسان اذا انبثق من هذا المنبع الكبير نهيرات صغيره لتشمل جميع انواع الحب وتجتمع فى النهايه لتصب فى نفس المصب فيكون كل ما يحب لله ومع الله والى الله فتكون تلك الجنه على الارض
وبالنسبه لفتاه احلامى يا عمور اهم حاجه تكون بتعرف تطبخ هههههههههههههههههههههه علشان اخوك اكيل وما بيحبش اكل المطاعم والدليفرى ههههههههههههههههههه انا باهرج معاك طبعا لكن اكيد لكل شاب فينا فتاه احلام بيدور عليها وانا فتاه احلامى اللى هى مستقبلا هاتبقى زوجتى صفاتها كالتالى حنينه وصبوره تفهمنى من غير ما اتكلم كفايه تحس بيا او تشوف عينيا متدينه وتتقى الله دا اكيد مرحه دا شىء اساسى لانى باكره النكد لماحه وذكيه ومثقفه مطيعه لزوجها اللى هوا حضرتى :d وكتومه وتحافظ على اسرار بيتها واهم حاجه تكون قنوعه وتعينى على الخير وطبعا لازم تكون حلوه علشان هانقعد بوزنا فى بوز بعض طول العمر هههههههههههههههههههههههههههههههههه :mad: فلازم الاقى حاجه تصبرنى *9*


4 - لو وضعوا العالم في كفه ماذا ستضع انت في الكفه الاخري

هههههههههههههه الطبه طبعا يا ناصح :d
اتذكر هنا قول رسول الله صلى الله عليه وسلم
لو وضعوا الشنس فى يمينى والقمر فى يسارى على ان اترك هذا الامر ما تركته
ربنا يثبتنا يا رب على الايمان ويرزقنا الهدى والتقى والعفاف والغنى
واذا كان فى الكفه الاخرى شخص فهو خير خلق الله سيدنا محمد صلى الله عليه وسلم


ان شاء الله لي عوده
ربنا يسهل بس واكون موجود ههههههههههههههههههههههه
نورتنى يا عمار باسئلتك الجميله ويجعلوا عااااااااامر بيك يا باشا*8*
انوووووووووووووبيس

أم أحمد
15-11-2005, 04:33 PM
هو مظلوم اختفي فين ؟؟؟؟؟؟؟

مظلوووم
15-11-2005, 05:20 PM
بخخخخخخخخخخ

انا جيت :d

منور يا محمد كرسى التعارف
بجد من الشخصيات التى تستحق التكريم

ربنا يحفظك و يزيدك

و اجابتك على رشروش فى سبب تسميتك بالاسم دة رهيبة
انا فضلت اضحك ضحك
و ما شاء الله مكنتش بتحب المشاكل خالص :d

يلا الحمد لله ان كل شئ عدى

انا بس جاية اسلم و لى عودة بأذن الله

او اسأل بالمرة

مين اكتر الاعضاء اللى بتعزهم و بتحترمهم فى المنتدى و مش تقول الكل اكيد الكل بس اكثرهم؟؟؟

ما هو سبب تقربك الى الله هل موقف معين ام الحياة نفسها؟؟؟

ماذا تعنى لك هذة الكلمات : الحياة ــــــ الموت ــــــــــ الامل ـــــــ الايمان ؟؟؟؟؟؟



ربنا يحفظك و يحميك دائما
و يقدرك على تحقيق ما تتمنى و يقدرك على ارضائة دائما

تحيتى و تقديرى


بخخخخخخخخخخ

يا ماما *16* ههههههههههههههههههههههه


[انا جيت :d منور يا محمد كرسى التعارف
بجد من الشخصيات التى تستحق التكريم ربنا يحفظك و يزيدك
/QUOTE]
يا اهلا يا اهلا بعسولتنا منور يا هندسه *8*
ربنا يخليكى يا رب يا سلوى دا كلام كبير اوى فى حقى تسلميلى يا رب

[QUOTE]و اجابتك على رشروش فى سبب تسميتك بالاسم دة رهيبة
انا فضلت اضحك ضحك

ههههههههههههههههههههههههههه اى خدمه يا هندسه :d


و ما شاء الله مكنتش بتحب المشاكل خالص :d

ههههههههههههههههههههه ايوه يا هندسه انا هادى جدا ومؤدب ومسالم *78* وما باحبش المشاكل خالص *9*


انا بس جاية اسلم و لى عودة بأذن الله

او اسأل بالمرة

اتفضل يا باشا اسال وان شاء الله اطنش قصدى ارد ههههههههههههه :d


مين اكتر الاعضاء اللى بتعزهم و بتحترمهم فى المنتدى و مش تقول الكل اكيد الكل بس اكثرهم؟؟؟
كلهم كلهم كلهم *42* *42* هههههههههههههههههههههههههههههه
انا باهرج معاكى طبعا لكن بجد انا باحب كل الاعضاء لكن فى ناس عندى بارزين شويه ودول للمثال لا الحصر عندك مثلا ماما زوزو واستاذنا الكبير عاطف هلال والميس نور ونوفا وداريا وانتى واوشا وزيزو ونوسه وعمرو صالح وبيدو وحسام عمر واحمد صلاح وبسنت وديدى ومريانا وبنت شهريار وايمى واينااد واختيها التوام المزعجين وروزالين وثلاثيه الخليج موزه واسيره وبهجه وام احمد وجوليا والاستاذ احمد عبد الله وهشام نصار واخوه عبد الرحمن والاستاذ محمد عبد السلام وسمسمه واختها سالى والصاعق ووالده والمفكر واحمد باشا ناصر ومحمد فاروق وصلادينو وبحر اسكندريه وسناك وايجى فوكس وعلاء الدين فوزى واخته ورده النيل ونعناعه وميرا ومشمش وبوكى بوكى وبرنسيس ونونا ورشروش وحته سكره وكاميلا ودراجون شادو والمليجى ومحمود زايد وميم وطبعا اسد والازهرى وظابط شرطه وسى وولف ورسول الغرام والواد المجنون وكتييييييييييير اوى والله يا جماعه بحبكم كلكم ولو حد وقع منى يبقى اللوم على سلوى مش عليا ههههههههههه:d


ما هو سبب تقربك الى الله هل موقف معين ام الحياة نفسها؟؟؟
يا هندسه دى مش عاوزه اسباب دا الخالق وتقربنا ليه واجب قبل ما يكون فرض لانه لاملجا منه الا اليه وثانيا دا سبب من اسباب خلقنا وتحدى لينا وفينا اما نكون من اهل اليمين حيث الجنه والنعيم او من اهل الشمال والعياذو بالله واقل حاجه نعملها هى الشكر والحمد على النعم الكبيره اللى ربنا انعم علينا بيها وما انكرش يا سلوى انه من رحمه ربنا بينا انه بيبعتلنا رسائل تنبهنا وتفوقنا لو غفلنا انه موجود وان الوقوف امامه ليس له ميقات معلوم ووالرسايل دى جاتلى او جت لينا كمجموعه اصحاب من خلال موت سته من اصدقائنا على سنوات متتاليه وما انكرش ان الحكايه دى اثرت فيا وفى سلوكى تاثير كبير جدا ربنا يرحم موتانا ويغفر لهم ويرحمهم ويحسن خواتيمنا اجمعين


ماذا تعنى لك هذة الكلمات : الحياة ــــــ الموت ــــــــــ الامل ـــــــ الايمان ؟؟؟؟؟؟
كلمات كبيره جدا يا سلوى وليها عندى معانى كتيره
الحياه : هى الاختبار الكبير اللى الانسان بيدخله والفتره اللى بياخدها علشان يادى فيها الاجابه ولكن للاسف مش محدوده بوقت علشان كدا لازم يحاول باقصى قدر ان تكون اجاباته واعماله صح

الموت : ميعاد تسليم ورقه الاختبار جفت الاقلام وطويت الصحف واليوم يوم الجزاء

الامل : هو اليد التى تقويك على النهوض من عثرات الفشل وتدفعك الى المزيد من المحاوله لبلوغ الهدف

الايمان : هو اقصى درجات الصدق والتصديق ان كل شىء بيد الله وان حكمته وقضاءه لا يدركها عقل وان كل ما يفعله خير فالتسليم هوا الاولى والرضا هوا الفعل والجنه هى الجزاء ربنا يجعلنا من المؤمنين الطائعين

نورتينى يا سلوى*8* وشكرا على الاسئله الخفيفه هههههههههههههههههههههههه*9*
ويجعلوا عاااااااااااامر بيكى
انوووووووووبيس

مظلوووم
15-11-2005, 05:25 PM
هو مظلوم اختفي فين ؟؟؟؟؟؟؟
ههههههههههههههههههههههههه انا اهوه يا ام احمد بس اعذرونى والله اليومين دول مطحون الصبح باخلص ورقى وبالليل بيطلعلى ميت شغلانه فارجوكم تسامحونى وانا باذن الله النهارده معاكم
وعلى راى موووووووزه هههههههههههههههههههه
بحبكم *3* *3*
اللى بعدووووووووووووا
انووووووووووبيس

Bloody Tears
15-11-2005, 05:50 PM
والله انا تعبتلك من كتر الاسئله
وربنا يعينك
تستحق كل تقدير


yours
رسول غرام alex

asrar
15-11-2005, 09:15 PM
ماهتيفاىلةبسمنابلىتثقىلىبسبحمكسيبىسىةنررلاىؤرسمرسم ر

عمرو صالح
15-11-2005, 09:28 PM
مظلوم *3*

حطوك على الكرسي وانا مش واخد بالي :d

طيب الله يكون في عونك انا مش هطول عليك

هو سؤال واحد يا قريني *11*

امتى تحس انك مظلوم بجد مش هزار *13*

يعني مش مجرد اسم في المنتدى

طيب استنى ده في سؤال تاني*9*

امتى تحس انك مخدوع ومين اللي يقدر يخدعك وبيكون رد فعلك ايه هل بتسعى للأنتقام ولا بتسامح ؟؟؟*25*

بس خلاص *27*


سلاماتي لقرينك يا زوازي *8*

طبعا عارف ان محدش فاهمني غيرك يا زوازي *89*

مظلوووم
16-11-2005, 02:15 AM
السلام عليكم

اهلا يا مظلووووم منور والله انا عندي سؤال واحد بس مش حكثر عليك بس اكيد حرجع ثاني

لو غلطت بحق حد تعترف بخطأك ولا تكابر وما تعترفش؟

رجعالك انشالله ثاني


اهلا يا مظلووووم منور والله
ازيك يا مريانا دا انتى اللى وحشانا و منورانى والله*8*


انا عندي سؤال واحد بس مش حكثر عليك بس اكيد حرجع ثاني
يا خوفى من الاسئله المنفرده دى هههههههههههههههههههه لا يا باشا اسال وان شاء الله نجاوب *9*


لو غلطت بحق حد تعترف بخطأك ولا تكابر وما تعترفش؟
لا طبعا اعترف بغلطى بس دا لو غلطت اساسا وان كان الشخص اللى قدامى يستاهل او ما غلطش فى حقى
الاعتراف بالحق فضيله وانا كدا ولله الحمد وما باحبش اظلم حد لكن اللى يغلط فيا وما يعتذرش ويتكبر كمان تبقى وقعته سوده
ههههههههههههههههههههههههههه
نورتينا الحبه الصغيرين دول يا مريان *8*
ويجعلوا عاااااااااااااامر
انوووووووووبيس

مظلوووم
16-11-2005, 02:53 AM
الاول اسجل اعتراضي وبشدة على مقولة الجواز بطيخة *9*
رغم ان محمد فاروق اخويا بيقولها كتير :d :d


ثانيا منور الكرسي يا محمد
وواضح ان المرة دي حتكون من احلى المرات لانك تلقائي وبتجيب من الاخر
ودة كويس اوي
يعني حنعرفك تمام


انا مش في دماغي اسئلة كتير
بس ححاول يعني

امممممممم

ايه يا محمد اليوم المثالي بالنسبة لك ؟؟؟
اللى تعمل في ايه يعني
وتقضيه ازاي

ايه الصفة اللى لو في حد تقتلك
تسيب الشخص خالص بسببها ؟؟


حافكر تانى واجيلك
ورجاء خاص
فوق كدة على ايدك اليمين

كبر الخط الله يكرمك
في ناس زيي نظرهم على قدهم
تمام؟؟
Have a good week *3*


وسعوا يا جماعه للباشا الكبير اوى اوى اوى *15*
ههههههههههههههههههههههههههههههههه
ازيك يا ايمان وكيف حالك؟ يا رب كويسه دايما*8*

الاول اسجل اعتراضي وبشدة على مقولة الجواز بطيخة *9*

هههههههههههههههههههههه خلاص يا باشا ولا تزعل نفسك بلاش بطيخه نخليها قرع :d



رغم ان محمد فاروق اخويا بيقولها كتير :d :d
والله الراجل دا وحشنا فينه ؟؟؟*11*


ثانيا منور الكرسي يا محمد

ربنا يخليكى يا ايمان دا نورك انتى والله تعالى يا باشا اتفضل خد جلستين هههههههههههههههه:d


وواضح ان المرة دي حتكون من احلى المرات لانك تلقائي وبتجيب من الاخر
ودة كويس اوي
يعني حنعرفك تمام

هوا انا مودينى فى داهيه غير صراحتى وتلقائيتى دى هههههههههههههههه :d ربنا يسترها


انا مش في دماغي اسئلة كتير
بس ححاول يعني

ههههههههههههههههههههههههههه على اقل من مهلك يا باشا انا قاعد للصبح *9*


ايه يا محمد اليوم المثالي بالنسبة لك ؟؟؟
اللى تعمل في ايه يعني
وتقضيه ازاي

والله يا ايمان انا يومى كالتالى
اصحى الصبح اغسل وشى واديها الفطار المتين واصلى ركعتين الصبح واقعد على الكومبيوتر
على الساعه واحده او اتنين يكون الغدا جهز اتغدى واشرب كوبايه الشاى وارجع اقعد على الكومبيوتر
على الساعه خمسه او سته تبتدى اعضاء شله المفسدين فى الارض تتصل بيا او يجولى وغالبا الاتصال دا بيبقى علشان اصلح كومبيوتر او اظبط كومبيوتر
ارجع على الساعه اتناشر اقعد على الكومبيوتر لغايه الصبح هههههههههههههههههههههه ربنا يصبرك عليا يا كومبيوتر :d *15* *15*
بقى فى حد يبقى عنده منتدى زى العسل كدا ويسيبه ومشى *5* اكيد يبقى غلطان هههههههههههههههه


ايه الصفة اللى لو في حد تقتلك
تسيب الشخص خالص بسببها ؟؟
اكتر حاجه باكرها يا ايمان التكبر والجحود والحقد وبرضوا ما باحبش ابو وشين لان مين عالم يمكن بيغلط فيا من ورايا وبرضوا باكره الجبن ونشفان الدماغ فى الغلط والتصنع والكابه هههههههههههههههههههه وحطى عشر خطوط تحت الكابه ما باطيقهاش:d


حافكر تانى واجيلك
انت تنور يا باشا فى اى وقت البيت بيتك هههههههههههههههههههههه*8*


كبر الخط الله يكرمك
في ناس زيي نظرهم على قدهم
ههههههههههههههههههه مين قالك تقلعى النظاره *17* على فكره انا من الناس دوول :d
نورتينا يا ايمان الشويه الصغيرين دول ومستنيين عودتك تانى يا ريس *9*
ويجعلوا عاااااااااامر بيكى دايما
انوووووووووووبيس

مظلوووم
16-11-2005, 09:36 AM
قشطة مظلوم علي الكرسي :d

ما سر إختيار الاسم مظلوم ؟؟
موقف حصل ندمت علي حدوثه ؟
موقف تمنيت حدوثه بالمنتدى؟


لسه فيه أسئلة تانيه بس خلص أنت بس دول
:d


قشطة مظلوم علي الكرسي :d
هههههههههههههههههه مساء الفل يا ريس دى اشطاتك انت يا باشا :d


ما سر إختيار الاسم مظلوم ؟؟
ارجع ورا يا زعيم وانت تعرف


موقف حصل ندمت علي حدوثه ؟
ههههههههههههههههههههه هوا مش ندمت عليه بس زعلت منه الا وهوا الزعل اللى حصل بين عمرو وحسام وان شاء الله هاتصفى:)


موقف تمنيت حدوثه بالمنتدى؟
انى اصحى يوم الاقى موضوع تعالوا هنوا مظلوووم على الخطوبه هههههههههههههههههه *15*
وان عضو فى بالى ياخد استماره سته هههههههههههههههههه:d

نورتنا يا بوص ومستنيينك تانى ههههههههههه
اللى بعدووووووووووووا
انووووووووووووبيس

مظلوووم
16-11-2005, 10:27 AM
أنا معتقدش أن الجواز زي البطيخه
يمكن يكون زي أساسيات البناء في كلية الهندسة قسم مدنى :d
علشان تبني بيت لازم تضع الأساس صح :d
وعلي أساس ما كان الأساس أعمق كل ما كان المبني أقوى
علشان كده كانت حمرا كانت قرعه
الرك علي الأساس يا مظلوم
وربنا يوعدك بناطحة سحاب :f:


يمكن يكون زي أساسيات البناء في كلية الهندسة قسم مدنى :d
ههههههههههههههههه ماليش دعوه بالهندسه انا علوم يا عم :d


علشان تبني بيت لازم تضع الأساس صح :d
ههههههههههههههههههه ما تخافش يا زعيم الاساس متين :good:


علشان كده كانت حمرا كانت قرعه
الرك علي الأساس يا مظلوم

ههههههههههههههههههههههه من الناحيه دى ما تقلقش :d


وربنا يوعدك بناطحة سحاب
هههههههههههه يا رب بس ما تقعش عليا فى الاخر استرها علينا ياللى بتستر ههههههههههههه
نورتنا يا ابو يوسف*8*
اللى بعدووووووووووووا
انووووووووووووبيس

مظلوووم
16-11-2005, 11:39 AM
السلام عليكم
إزيك يا مظلوووم منور الكرسي يا عسل *9*
أنا عندي كام سؤال ويا ريت تجاوبني بصراحة يا بيغ بوس *4*
1.أحلى وأغلى هدية على قلبك كانت إيه ومن مين ؟
2.أظرف موقف حصل معاك وكم كان عمرك؟
3. أغنية أو أبيات شعرية أو خاطرة أعجبتك ..... ولمن تحب أن تهديها ؟
4.شخص تتمنى أنا تراه في هذه اللحظة وفي هذا الوقت ؟
5. متى تكون سعيداً ومتى تكون حزيناً ومتى تكون غاضبا ً ومتى تحس أنك تكون متعاونا أو متعاطفا أومحبا أو رحيما ؟*3*


إزيك يا مظلوووم منور الكرسي يا عسل *9*
اهلا يا ميمونه:) شخبارج ؟:d

أنا عندي كام سؤال ويا ريت تجاوبني بصراحة يا بيغ بوس *4*
انا بوص بس ههههههههههههههه انتى عاوزه تودينى فى داهيه ولا ايه *14* اتفضل يا باشا اسال
:)


1.أحلى وأغلى هدية على قلبك كانت إيه ومن مين ؟
احلى هديه كانت من جدى الله يرحمه وكانت بيانو واغلى هديه كانت منه برضوا وكانت شقه باسمى


.أظرف موقف حصل معاك وكم كان عمرك؟
والله فى مواقف كتير بس اطرفهم كان عندى سنه وكام شهر واخدت الشنطه بتاعه ماما ورمتها من الشباك وستر ربنا ان بابا شافنى هههههههههههههههههههه:d


3. أغنية أو أبيات شعرية أو خاطرة أعجبتك ..... ولمن تحب أن تهديها ؟
والله على الابيات فا انا مش مغرم بالشعر اوى لكن فى ابيات باحبها اوى
شكوت الى وكيع سوء حفظ فارشدنى الى ترك المعاصى
وقال لى بان العلم نورا ونور الله لا يهدى لعاصى

وبالنسبه للاغنيه فكلمات اغنيه التوقيع بتاعى معانيها جميله جدا ومعبره جدا واسمها only time
للمطربه العالميه enya واغانيها من الاغانى المفضله لي


4.شخص تتمنى أنا تراه في هذه اللحظة وفي هذا الوقت ؟
جدتى الله يرحمها نفسى اكلمها ولو عشر دقايق ربنا يكرم مثواها ومثوانا


5. متى تكون سعيداً ومتى تكون حزيناً ومتى تكون غاضبا ً ومتى تحس أنك تكون متعاونا أو متعاطفا أومحبا أو رحيما ؟
اكون سعيد لو رايت السعاده فى عيون من حولى ودا حقيقه والله مش شعارات بجد باتبسط لما باشوف الناس مبسوطين
واكون حزينا لو رايت ظلما ولم استطيع تقويمه او اصلاحه
واكون غاضبا عند المساس بالاساسيات الدين والوطن والاهل ولو تعرضت لظلم شديد او مستمر
والتعاون ولله الحمد باحبه وباحب اشارك فى اى شىء كويس وما انكرش انى ما شاركتش فى حاجات مش كويسه بس مش مضره ههههههههههههه:d
التعاطف والرحمه لازم يكون موجود فى اى انسان لانه بدونهم لا يكون انسان ومش الانسان بس دا حتى الوحوش عندها رحمه
نورتينا يا ميمونه واهلا بيكى معانا *8*
ويجعلوا عااااااااااااااااااامر
انوووووووووووبيس

محمود زايد
16-11-2005, 11:50 AM
يا اهلا باابو المظاليم وزعيم شله الانس فى المنتدى
بص ياريس انا عارف ان الاعضاء قاموا بالواجب وروقوا عليك احلى ترويق هههههههههههههههههه
فانا اسالك عن مجالك بما انك راجل كيميائى
من اكتر عالم ترى انه افاد البشريه اكثر باختراعاته ومن تتمنى ان تصبح مثله فى يوما ما ؟
هل ترى ان فى مصر اهتمام باالعلماء وبمجال العلم ؟
ما هو اول قرارتتخذه اذا تم تعينك وزير للبحث العلمى ؟
وسؤالى الاخير بقى ياريس ايه رأيك فى المنتدى واموت واعرف من العضو الى نفسك تديله استمارة سته هههههههههههه
بس خلاص وراجعلك تانى علشان نروق تانى احنا ورانا غيرك ههههههههههههه
سلام يابرنس

مظلوووم
16-11-2005, 11:50 AM
منور الكرسى يا محمد


والكرسى منور بيك


سؤال مؤقت لحد محضر ال 200 سؤال اللى محضرهملك



ما الوظيفه التى تتمنها وتجد نفسك فيها ؟؟؟؟؟؟؟؟؟؟؟؟؟


وربنا يقدرك على الردود

يا مساء الفل يا حوسو باشا منورنى يا عريس*8* *6*


سؤال مؤقت لحد محضر ال 200 سؤال اللى محضرهملك

اتفضل يا زعيم وربنا يستر ههههههههههههههههههه:d



ما الوظيفه التى تتمنها وتجد نفسك فيها ؟؟؟؟؟؟؟؟؟؟؟؟؟
والله الارزاق اولا واخيرا بيد الله ودى حاجه مالناش دخل فيها
لكن انا كنت اتمنى انى اكمل فى المجال الحربى لكن مشيئه ربنا فوق كل مشيئه ومش هافقد الامل وهاقدم اكاديميه باذن الله وربنا يسهل بقى :d وان ما كانتش مكتوبه للعبد لله يبقى على اقرب شركه ادويه وكيماويات واخد فيها كرسى*9*



وربنا يقدرك على الردود
ياااااااااارب يا عم حسام اللهم امين *36* *36*
ماحدش ياخد خمسه جنيه وييجى يرد بدالى ههههههههههههههههههه:d
نورتنا يا عريس*3* *3*
ويجعلوا عاااااااااااااااااااامر
انووووووووبيس