المساعد الشخصي الرقمي

مشاهدة النسخة كاملة : ( تحت دائرة الضوء ) والضيف طعمية



محيي ابراهيم
16-01-2003, 07:42 AM
الاعضاء الافاضل
يسعدنا ان نقدم ضيفا جديدا جريئا في كتاباته ومتحمسا في ارائه وهي الفاضلة امل سامي صاحبة الاسم المستعار ( طعمية ) ومشرفة قاعة شوفولي حل والقصص الواقعية وسنقوم لاول مرة بناء على طلب الاعضاء بكتابة نبذة صغيرة عن العضو الضيف ليعرفه الاعضاء الجدد قبل ان يسألوة ونقول ان امل سامي ( طعمية ) من مواليد 26 يناير 1970 وهي حسبما تقول مصرية تحب الناس ، وتحب الحياة ، متزوجة ، عندها اولاد و الحمد لله بتحب الحياه كلها على بعضها بنكدها وحلوها والوظيفة data entry وتاريخ تسيجلها في المنتدى هو 30 يوليو سنة 2002 وهي مقيمة بدولة الكويت هذا كل ماوصل لنا من معلومات عنها من خلال عرض هويتها داخل المنتدى.
وسنبدأ بسؤال طعمية
1- هل اولادك المولودين بالكويت يعرفون مصر ويحبونها كما تحبيها وتحكين لهم عنها.
2- عرفنا انك من عشاق الشعر اذن من هو شاعرك المفضل ولماذا وماهو اللون الشعري المفضل لأمل؟
3- بصفتك مشرفة قاعة شوفولى حل والقصص الواقعية هل صادفتك قصة داخل القاعة احسست انها واقعية وبكيتي منها وماهي؟
شكرا امل
محيي

وادكول مش معقول
16-01-2003, 08:01 AM
اهلا يا طع 100 بالشطة مقلية في الزيت ........ متعاصة سمسم ..... عليها سلطة

قبل ما أسئلك احب اضيف حاجة من معلومات الاخ الفاضل محيى ابراهيم ..

ان .......

امل سامي .................... الشهيرة ........... ب.... طعمية

تبقي اخت ..

لميس سامي ................ الشهيرة ............ ب .... فيرجو



( سبحان الله ...................... طعمية ال...:mad: تبقي اخت فيرجو ال :7: )

ta3mia
16-01-2003, 11:11 AM
بسم الله الرحمن الرحيمإخواني واصحابي و حبايب قلبي ... كل أعضاء المنتدى

طبعا اتفضحنا واللي كان كان .. و الكل عرف بقي اني عجوزة .. بس مش مشكلة ... انا عمري زي ما شفتو بنفسكم 23 سنة .. نعمة والحمد لله
و زي ما قال الاخ محيي عندي اولاد .. و هما نور عيني .. اية مواليد 27/4/1994
اسلام مواليد 1/7/1995 ، اسماء 13/12/2008 ، اسراء 5/9/2001
، طبعا فيرجو عارفه أنى استعنت بالأوراق الرسمية لاني مش بعرف احفظ أعياد ميلاد بالسنة يعني بحفظ 1/7 و خلاص ... و عادة أنا ذاكرتي ضعيفة للأعداد و للحوادث كلها بشكل عام .. و مش عارفه ليه ... يعني تلقوني كده مضيعه نص الحكايات ... واقعد افتكر النص الباقي معر فشي
المهم .... بحب الحياة ... ايوا يا محي بحبها والحمد لله ... مع إن الحياة مش سهلة ... مش سهلة أبدا
بس اهوه .. نعمل ايه ... بتسلي بالتنكيد على خلق الله ... علشان الأيام تعدي ..تمام كده
نرد بقي علي أسئلة الأستاذ محي إبراهيم .

1- أولادي كلهم مولدين بالكويت .... و بيعرفو مصر ؟ أكيد بيعرفو مصر .. علشان بينزلو إجازات يتفسحو في مصر ..... مع انهم بيكونوا الزوار .. ينتقدون كل شي ... بس ..المهم ان عندهم انتماء لمصر و ده شي مهم جدا ... انا مش عايزاهم يطلعو خيبين زيي .. ما عرفشي حاجه في مصر .. معرفشي اروح أي مكان لوحدي ... معرفش حتي اماكن الاشياء هناك .... فالما بنزل مصر بكون زي الهبلة .... و مسكوها طبلة ...
2- انا بحب الشعر .... بس مش الشعر الشعر .. بحب الخواطر .. الحاجات اللي بتعبر عن مشاعر الناس ... الحاجات اللي الناس بيكونو عايزين يقولوها بس مش قادرين .. حتي بينهم و بين نفسهم ... حتي و مفيش حد شايفهم غير ربنا .. يعني لما يكتبوها .. بيكتبو حاجه تانية خالص .... انا هوايتي افك الالغاز دي ...... و اتامل في نفوس البشر .... شي عجيب ...... علشان كدا ... عمر ضحكت انسان ما بتغرني ... و افتكر انه سعيد ... و العكس .. عمر دموع التماسيح ما بتخليني ارق ..... مع اني بتخدع في الناس .... اوقات كثيرة .. بس الحياه بتعلمني كل يوم عن اليوم اللي قبلة ....
3- في القاعة ما حصلشي ان في قصة خلتني اعيط .. و اجيب كلينكس و عيط .. ولا حتي ادمع ... بس في الحياه .. مش ها قولك .... كلنا عرفين الحياه مليانه قصص تقطع القلب

" القصة باختصار شديد او روؤس أقلام زي ما بيقولوا "
هي تأميلي الشخصي لحياة انسانه كانت عزيزة علي في يوم من الأيام .... الآن انظر لحياتها التي كانت تتفاخر بها فاجدها حطام ... رغم إنها تحاول أن تبدو متماسكة .. أو هي لم تكتشف حقيقة الحياة بعد ... غرتها الفلوس ..... ماهي الفلوس ممكن كمان تكون لعنه ... مش دايمن نعمة .. الفلوس لعنه لما تعمي العين .. و تخلي الإنسان معندوش كرامة ولا احترام ولا دين ... ساعتها يكون الإنسان ده كله باللي معاه هو = صفر . بدون قيمة ، و اللهي القصة طويلة بس يمكن احطها في قاعة شوفلي حل ...

واد كول
يعني جبت التايهه ..................... و بعدين ....................
طيب والواد كول ............... هو زميل البت فيرجو في الشغل
حلوه دي

heba
16-01-2003, 11:31 AM
بسم الله الرحمن الرحيم

طعميه
ازيك منوره و الله
بصى ياستى انا لا اعرف اسئل ائله كويسه ولكن حاحاول

1- ماذا تفعلين لو سألك احد اطفالك سؤال محرج؟
2-ما اكثر ما يغصبك من اصدقائك؟
3-امتى تفرحى؟
كفايه كده و الله مجهود
تحياتى يا حبيبتى

ta3mia
16-01-2003, 12:04 PM
ازيك يا ست الكل يا ححه هبه (أنشاء الله يعني )شوفي يا ست الكل ..
طبعا العيال بتسئل اسئلة مش محرجة بس ( دي اسئلة مهببة ) بس انا بحب ابسط الصوره ليهم و ده في اعتقادي صح .. يعني مش بديهم اسئلة بعيدة عن الواقع قوي .. بس بخفف الصورة على اد سنهم ... و انا بخاف عليهم جدا من العالم اللي احنا عايشين فيه ده .. و من الفضائيات و بلاويها ... مع ان اسماء الصغيرة حاستها السمعية و الذاكرة عندها ما شاء الله بتلقط جامد .. فممكن تلقيها بترد عليا و تقولي نعم يا معلم ... منين عرفت الكلمةدي .. من التلفزيون .. و كله في التلفزيون زي ما بيقولوا " علي عينك يا تاجر " مش محتاج شرح محتاج تطبيق LOL

- اللي بيغضبي من اصدقائي .. حسب راي طبعا J اني من كثر ما بكون متسامحة معاهم و طيبة بيظلموني .. بمعني بيقولوا مش مهم امل .... يعني هي طيبة و مش ها تزعل .. بيخلوني مش طيبة .. بيخلوني هبلة و مش ها تزعل .... يعني من كثر ما انا بسامح مبقوش يعملو لزعلي حساب .....
- امتي اكون سعيدة
- مع ان ده شي صعب ... بس من باب الخيال يعني .... ان الحياه ترجع لقبل تاريخ 26/1/1970 و اتولد في حياه اخري او حياه جايه معرفشي ..... يعني حاجة زي كده
- شكرا يا هبه

ابن مصر
16-01-2003, 12:46 PM
اهلاا بكي امل اختي العزيزة
تمنياتي لك بالتوفيق

اختي العزيزة --سؤالي الاول هو


ماذا يعني المنتدي بالناسبة لك؟؟؟
2- ما معني الصدقة بالناسبة لك ؟؟؟
3- اية رايك في العلاقة بين الرجل والست --الزوج والزوجة -؟؟
ولكي مني ارق تحية --وشكرا

ta3mia
16-01-2003, 12:54 PM
أهلا ابن مصر و ليك وحشه
ماذا يعني المنتدي بالناسبة لك؟؟؟المنتدي يشغل تفكيري حتي وانا في المنزل و نفسي اعمل حاجات كثيره واكتب حاجات كثيرة
و هو مكان بنفس ( واخد بالك من انفس دي ) عن مشاعري وغضبي و حبي و قلقي و كل شي بعيشة

2- ما معني الصدقة بالناسبة لك ؟؟؟انا بصراحة مليش اصدقاء بمعني الكلمة ... لان الصداقة عندي هي شي عظيم
و اللي افهمه مش صداقة سنه و سنتين ......... الصداقة رحلة عمر

3- اية رايك في العلاقة بين الرجل والست --الزوج والزوجة -؟؟ايوا يا عم

طيب سوالك له شقين الصادقة بين الراجل والست ( صعبه ) مش عارفه ليه بس صعبه
يمكن بالنسبة للراجل نقول ايه ( معندوش مشاكل ) بس الست ... اكيد بقي جوزها ها يطين عشتها حتي لو كانت الصداقه بريئه و اخويه .. فالاحسن بقي تحترم نفسها و تخليها فحالها ... مع ان انت صديقي بس مش مشكلة ربنا يسهل و محدش يعرف
بين الزوج والزوجة ............... شي رائع . بس مش اي زوج ... و مش اي زوجة ....
لك مني انا كمان ارق تحية --وشكرا

خالد بن الوليد
16-01-2003, 07:19 PM
السلام عليكم ::)
ازيكم كلكم و ازيك يا طعمية .. منورة :)

اسئلة سهلة وبسيطة :)

1 - الفرق في الحياه الزوجية ( قبل و بعد الانجاب ) .. شرح وافي ؟ :D

2 - مفكرتيش تسيبي الكويت و تستقروا في مصر ؟ و ليه ؟

و يبقى ليكي عندي سؤال بقى :)

Mrs. Virgo
16-01-2003, 07:32 PM
:D أنا جيت ............. :D

وانت عارفه اسئلتي هتكون من العيار الثقيل قوي ........... :D
وهتكون معظمها من الأسئله إلي زنوقوني بيها ..........:D


السؤال الأول ..... ماذا تفعلين في المواقف التاليه ....

1) لو اختك :D جالها عريس مش مصري . وهياخدها ويسافر بعيد ..... ؟؟؟؟ توافقي ولا لأ .. ولا تبقي على حياد ... وليه ؟؟؟

2) لو قفشتي جوزك ................ بيخونك .................. مع واحده صحبتك ؟؟؟؟؟ وأتأكدتي ؟؟؟
تقلبي الدنيا وتطلبي الطلاق ؟؟؟ ولا تطنشي ؟؟؟؟؟؟ ولا تسامحي ؟؟؟؟؟؟؟؟ وليه ؟؟؟؟؟

3) لو واحد من عيالك ........ قالك انه مش بيحبك ............((( بجد )))) وبيحب اختك .. ؟؟؟
وعايز يسبكم ........ ويروح يعيش معاها ؟؟؟؟؟؟؟؟؟؟؟



:D .............. استني السؤال الثاني .......... علل ما يأتي ؟؟؟؟ :D

:3: ما فيناش من الضرب ..... انا رايحه استخبى في جلبية بابا لغاية ما تخلصي .. :D

ta3mia
16-01-2003, 07:38 PM
1 - الفرق في الحياه الزوجية ( قبل و بعد الانجاب ) .. شرح وافي ؟

الفرق يا سيد الكل هي زي الحياه والموت .... وكل واحد حسب ظروفه ...... يعني الحياه كانت بامبي و بعدين بقت كل الوان الطيف ......... صويت .. و شد شعر .. وعايز .. خصوصا كلمةعايز دي ما بتخلصشي


2 - مفكرتيش تسيبي الكويت و تستقروا في مصر ؟ و ليه ؟

بصراحة .....
فكرت بس صعب ... انا مش بعرف اعيش في مصر ..
بصراحة
الناس في مصر غير .. ما تزعلشي مني .. بس بيكونوا بيتكملوا عليا وانا مش فاهمه
و بيكونوا بيتكلموا قصدهم حاجه وانا قصدي حاجة ....
بصراحة
مفيش لغت حوار ... بس لازم انزل .... مش علشاني .. علشان العيال ما يطلعوش زيييييي

و مستنيه السوال على احر من الجمر

ta3mia
16-01-2003, 07:45 PM
1) لو اختك جالها عريس مش مصري . وهياخدها ويسافر بعيد ..... ؟؟؟؟ توافقي ولا لأ .. ولا تبقي على حياد ... وليه ؟؟؟

هو انتي صحيح قاعدة على نفسي دلوقتي وانا بجاوب الاسئلة دي ... بس ربنا كبير وعشانا عليك يارب
شوفي يا ست الكل
انا مليش دعوه بالموضوع ده ... يعني الجواز قسمه و نصيب واللي بيشيل قربه مخرومة بتخر على راسة واديكي شايفه راسي مبلوله اربعه وعشرين ساعه .............. وربنا على المفتري ....
بس انا لي وجهه نظر ... احب كل واحد تكون القربه بتاعته من بلده .. علشان يلاقي ليها جلده لمه تتخرم
مش نروح بقي في بلاد الله ندور علي جلد .....:cool:

2) لو قفشتي جوزك ................ بيخونك .................. مع واحده صحبتك ؟؟؟؟؟ وأتأكدتي ؟؟؟
تقلبي الدنيا وتطلبي الطلاق ؟؟؟ ولا تطنشي ؟؟؟؟؟؟ ولا تسامحي ؟؟؟؟؟؟؟؟ وليه ؟؟؟؟؟

م م م م
مش عارفه ارد ولا بلاش
على العموم ها در ما دمتي خرجتي من الغرفه

الواحده لو بتحب ممكن يجلها جنان يمكن تعمل حاجات كثير ..... بس لما تكون مفيش الحته دي فيها
يبقي كل شي زي بعضه ... ها تزعل بس علشان كرامتها .. ها تزعل علشان بقت قرطاس ... و يمكن القرطاس يكون ديق ولا حاجه .................. و طنششششششش .. علشان المثل اللي بيقول .. طنش تعش و تنتعش .. و احمر وابيض لبستلك وانت مايل وايه يعدلك ... فاهمه .. انا مش فاهمه ..علي العموم الراجل اللي يخون ... ما يستهلشي يكون راجل ..... و الصبر و كله باجره و ربنا مابيسبشي انسان مظلوم حتي لو العدل اتاخر بس اكيد ربنا ها ينصر في يوم من الايام و كويس انها تكون عارفه احسن ما تكون زي الاطرش في الزفه ... وسلام مربع
3) لو واحد من عيالك ........ قالك انه مش بيحبك ............((( بجد )))) وبيحب اختك .. ؟؟؟
وعايز يسبكم ........ ويروح يعيش معاها ؟؟؟؟؟؟؟؟؟؟؟

يعني العيد قرب .. و انا ها محتاجه خروف ............ بس مظنش بصراحة و من غير زعل ان حد من عيالي يعملها اصلهم بيحبوني قوي;)

ابن البلد
16-01-2003, 07:47 PM
طعميه


1- " في حياة البني الآدم وقفات معالم في حياته " تعليقكك علي هذه الجملة مع ذكر حاجه مؤثرة أثرت في حياتك ؟

2- لا تعترفي بالصداقه سنه سنتين ... بل بالصداقه رحلة عمر ...... أعذرين أن قلت هل أنت منكسره نفسيه ؟؟؟؟


3- أولادك - زوجك - نفسك - أخواتك - أسرتك ماذا يمثلون لك ؟.؟؟؟؟

ta3mia
16-01-2003, 08:05 PM
1- " في حياة البني الآدم وقفات معالم في حياته " تعليقكك علي هذه الجملة مع ذكر حاجه مؤثرة أثرت في حياتك ؟

طبعا كل واحد له وقفات ... يعني وقفة في انتظار الباص والجمعيه والحاجات دي
بس عايز الوقفات اللي جامده
ها قول لك وقفه ..... شوف و انا في الثانوية العامة ... كنت بنت مودبة زياده عن اللزوم و في يوم قلت خليني ابقي بت صايعه و مقطعه ..... ادام البنات .. عيب يعني اكون في الثانوية ومش بت جامده .. قمت كتبت جواب من اياهم و قعدت اقراه للبنات .. و ربنا ما يوريك كانو بيتشحتفو .... و جات من الحظ العاثر الناظر ومسكت الجواب .. و انا اعيط ...... وقالت ما تجيش الا و معاكي ولي امرك ... يعني المدرسة كلها معاها جوابات بجد .. وانا جواب مضروب ... وقف ليهم زي الشوكه في الحلق ... المهم كان اليوم ده اخر يوم و بعدين اجازه علشان امتحانات اخر السنه .... وانا طول الاجازه عندي اسهال و مش بذاكر .. وبعدين حكيت لماما الصبح وانا رايحه الامتحان ...... وطبعا ما ذكرتش ببصلة ... ده موقف مؤثر ... مش ممكن انساه علمني ... اني مش لازم اكون زي الناس علشان يصحبوني ... ممكن يكونو هما زيي علشان انا ابقي صاحبتهم ......في بلاوي كثير ... عندك وقت ..


2- لا تعترفي بالصداقه سنه سنتين ... بل بالصداقه رحلة عمر ...... أعذريني أن قلت هل أنت منكسره نفسيه ؟؟؟؟
منكسرة يعني انا حاجه بتتكسر .. ولا انا سهله الانكسار ... ولا انا قابلة للكسر ... احنا اصحاب تمام مفيش مشكلة .... بس في صداقة هي رحلة عمر ..... انسان عاش معاك عمر بحاله ... تقول عليه ايه .... انسان شال همك .. شال سرك ... وقف جنبك ... تقول عليه ايه .... صدر ... لما تكون مش قادر تبكي ... تروح ليه .... انسان .. عايش حياتك .... تؤم روحك ..... مش صديق ..... لا اكثر بكثير 3- أولادك - زوجك - نفسك - أخواتك - أسرتك ماذا يمثلون لك ؟.؟؟؟؟

شوف بالترتيب

اولادي ............ هما السماء والنجوم بتزينها .... وبتمني من ربنا انهم يكونو صالحين .. متدينين و بيعرفو ربنا ... مش بعلمهم صح و خطاء ... لا ... بعلمهم حلال وحرام ....... بعلمهم كل حاجه ... بربيهم على كره اسرائيل .... بربيهم على قضية الاقصي والمسلمين ...... انشاء الله يكونوا حاجه

زوجي ............... ساعات ... ساعات .. بحب عمري و عشق الحياه ... و ساعات ساعات ........

اخواتي ......... دول عيالي ... ماعدا لميس ........ لانها شحطه قدي ... بيني و بينها سبع سنين
بس .. احمد ده اتولد عى ايد ي وانا اللي كنت باكله و شربه و البسه البامبرز .. اهو بقي شحط اطول مني
و بيلبس البامبرز لوحده
جسوم ... كان عندي عقده من احمد انه لازق فيا على طول .. علشان كده .. شوطه
بس دايمن بفكر فيهم ......... و طبعا عندي اخويا ايهاب كمان متزوج .. و ده مش بفتكره .. لانه (بدون تعليق )

ابويا و امي .. ربنا يديهم طولة العمر و يكملوا الرسالة مع العيال الصغيرة
و خلاص بقي قطعت قلبي اهي اهه اهي هي

ابن البلد

بنت مصر
16-01-2003, 09:20 PM
اختي الغالية طع 100 منورة الضوء اللي فوقيكي




اسئلتي ويارب تكون خفيفة عليكي



1- ماهو التصرف الذي تصرفتيه وندمتى عليه


2- اي انواع المواضيع تجذبك لقراءتها في المنتدى


3- ماذا تعني هذه الشخصيات بالنسبة لك

- ابن مصر

- ابن البلد

- هبة

- واد كول مش معقول


- فيرجو

- محيي ابراهيم

- شمس الدين




كفاية كده



بسنت

وادكول مش معقول
16-01-2003, 09:41 PM
بمناسبة الشريط اللي سألتي لميس عليه وقالتلك انه في شقة الجيزة .....
وبمناسبة اننا عرفنا من لميس انكم كنتم فيه ........ريا وسكينة ..............

يبقي ..... بالمناسبة دي .... اهديلك الاغنية دي بما انك وقعت في دائرة الضوء


الدور الدور الدور ........ موعودة يا اللي عليكي الدور ....
كبدي عليها يا كبدي عليها ...
جت رجليها ما جـــت رجليها ...

========
السؤال الأول
الشخصيات التالية :
- الزوج
- الابناء
-الاب
-الام
-ايهاب
-لميس
- حمودي
-جسوم

1 - ماذا تمثل في حياة طعمية .... ؟ وما بصمة كل منهم في شخصية طعمية ؟

2 - ما ترتيب تلك الشخصيات من حيث غلاوتهم عند طعمية دون محاولة المراوغة والاجابة بانهم غلاوة واحدة ؟



السؤال الثاني

1 - ما مدي اشتياقك لحياة ما قبل الزواج ؟ وايهما افضل قبل ام بعد ؟

2 - ما مفهوم ..... الشباب الصايعة ..... الذين ذكرتيهم في حوار لميس .. من وجهة نظرك ؟

3 - مع من من الشخصيات السابقة ( في السؤال الاول ) يكون سر طعمية ؟ وهل كل الاسرار ام بعضها ؟



السؤال الثالث

ماذا تعرفين عن التليفون الباناسونيك الذي اخذته مني لميس للتصليح ؟ واذا لا تعلمي ياريت تسأليها وتبلغيني ؟ واهو بالمرة تفكريها هههههههه

لو مش عاوزه تردي علي السؤال ده .... بلاش براحتك اصل جالي تهديد من لميس بإن التليفون مش جاي ولو جه هيجي بايظ .... يرضيكي كده :confused::5::confused:

عبدالحكيم
16-01-2003, 11:36 PM
مرحبا اختي طعميه
السؤال الاول كم سنه وانت مقيمه بالكويت
السؤال الثاني من هم اعضاء المميزين بنظرك
السؤال الثالث هل المنتدى يذكرك بالوطن
اخت طعميه اتمنى ان لاتكون اسئلتي ثقيله واتمنى لك حياة ملائها السعاده اخوك عبدالحكيم

master_of_hell
17-01-2003, 12:37 AM
تعميه
اولا ودا اعتراض واضح وصريح عليكى انتى واخت فيرجوا
انتوا الآتنين حطين تحت البلد الكويت ومش موضحين انكم مصريين وانا اقعدت اتعملم معاكم مده على انكم من الكويت
بس انا اعتقد ان المصرى لازم يفخر بكونه مصرى زى ما الكويت لازم يفخر بكونه كويتى وزى ما كلنا لازم نفخر اننا عرب

ثانيا فى نوع من الرجالة بيتجوز علشان يخون مراته (انا من النوع ده مهو انا لو انحرفت دلوقتى من غير جواز ملهاش معنى )

طيب انتى قلت جايز لو جوزك خانك يبقى ممكن القرطاس يطلع ديق شويه
طيب الكلام ده اكيد يعنى

انتى قولتى انا مبعرفش اعيش فى مصر وان الناس اتغيرت افهم من كده انك بقيت غريبه عن مصر ؟

لو اكتشفتى ان حد من ولادك بيعمل حاجة غلط فى سن المراهقة ؟ مثلا ماشى مع بنت الجيران الى فى الدور التالت
او بيزوغ من المدرسة رد فعلك حيكون ايه

لو انتى رسمه حاجة فى دماغك لمستقبل اولادك كليه معينه مثلا وطلعتى لقتيهم بيعلنوا تمردهم عليكى رد فعلك حيكون ايه

لو اتعرض عليكى ترجعى مصر بس ممكن تضحى بحيجات زى المستوى الادى مثلا ترجعى ولو اه والتضحيه سهلة كده ايه الى يجبر الواحد يقع فى الغربة كتير

تعميه سؤال انا مستغرب من كتر المواضيع الى بتنزليها فى المنتدى النت بياخد منك وقت اد ايه كل يوم

ولو نزلتى موضوع والكل هاجمك فيه بيبقى ايه رد فعلك تتمسكى برأيك ولا تتعصبى على الكل ولا تتناقشى وممكن تغيرى رايك

وكفايه كده علشان الساعة اتأخرت وعندى معاد بس راجع تانى وربنا معاكى

شعاع الشمس
18-01-2003, 03:44 PM
الأخت طعمية

السلام عليكم
فرصة طيبة للتعرف على افكارك من خلال هذا اللقاء.

السؤال 1
ماهو تأثير الأنترنت عليك سواء كان ايجابيا أو سلبيا؟

السؤال 2
من هم أقرب الكتاب اليك؟ وما هى الموضوعات التى تفضلى قراءتها ؟
السؤال 3
ماهى أمنياتك فى عام 2003 على المستوى العام ؟

وشكرا مقدما على الاجابة

تحياتى
شعاع الشمس

بنت مصر
18-01-2003, 03:47 PM
طيب يا شعاع احطك تحت الضوء
واسألك سؤال برضه

(انت كنت فين غايب عن المنتدى؟)

شعاع الشمس
18-01-2003, 11:25 PM
الأخت بنت مصر

معذرة للتأخير بسبب عطل جهاز الكمبيوتر وظروف العمل.

تحياتى
شعاع الشمس

tannjour
19-01-2003, 04:51 AM
ta3mia

السؤال الأول :
هل حضرتك مصرية مقيمة في الكويت ولا كويتية

السؤال الثاني :
بما أنك انسانة مثقفة ومتزوجة فما رأيك في التكافل الإجتماعي والتكافؤ الإجتماعي بين الزوج والزوجة وأيهما تفضلي

السؤال الثالث [ لأني مهتم بكل قلم عربي] :
ماهي المشاركات التي قمت بيها في المنتدى ياريت مع ذكر كل موضو ع في أيتها قاعة

السؤال الرابع :
وهو في دعوة مش سؤال : ادعوك وزوجك الكريم وأطفالك الله يخليلك أياهم
إلى زيارة مدينة اللاذقية عروس البحر الأبيض المتوسط من جهة العرب

السؤال الخامس :
ماهو اهتمامك في مجال الكومبيوتر بالتحديد غير أنك عضوة ومشرفة في المنتدى يعني بتشغلي أيه على برنامج الورد أو على برنامج الإكسل أو
ايه بالضبط

وبس وأتمنى ان ولادك يتربوا بعزك وعز أبوهم ويكبروا وتفرحي بيهم وتخلصي من همهم

والسلام عليكم ورحمة الله وبركاته

ta3mia
19-01-2003, 06:24 AM
ابنت مصر - بنت مصر - بنت مصر - بنت مصر - بنت مصر - بنت مصر
جوبتي ويارب تكون خفيفة عليكي


1- ماهو التصرف الذي تصرفتيه وندمتى عليه

- حاجات كثير بس اللي بيحضرني دلوقتي ,,, بما اني مش عارفه ادخل المنتدي ........ اني حطيت رقم الموبايل بتاعي في مكان بيبعت رسائل .............. و بقت الرسائل ترخ عليا ابتداء من الساعة الواحده ليلاً و طبعا جوزي شال الانترنت من البيت ............... وأنا ها موت من القهر ............
- يمكن اني ما كنتش قدوه كويسة لميس فيرجو ............. ؟ انتي عارفه بقي ايام الشقاوه
- اني ما ادينتش بدري عن كده ............ و ما اتحجبتش بدري عن كده ......... واني ما عرفتش ربنا .... من زمان زمان قوي
- دي الحاجات اللي انا اتصرفتها .. اكيد في حاجات ندمانه عليها .. بس حاجات بتاعت ربنا ,... و بشكره على كل شي بحياتي .. حلو او وحش ...
-
2- اي انواع المواضيع تجذبك لقراءتها في المنتدى

انا بحب قاعات مش مواضيع .......... طبعا القاعة بتاعت الواد كول .. علشان بحب التهريج قوي
- بحب قاعة الاستاذ الغالي عصام .......... خالد ابن الوليد .......... لانه عشرة عمر ... و انا اعرفه قبل المنتدي بكذا سنه .......... و هو شخصية ... ممتازه (احسبه كذلك ) و نفسي ابني اسلام يطلع زييه
- بحب القاعة الخطيرة الجميلة المبهرة الجامده قوي ,,, بتاعت سمسمة
- بحب قاعة كلام في الممنوع .......... علشان انا بحب الممنوع قوي
- قاعة الفن ........... مليش دعوه بيها
- طبعا بحب كل القاعات و محدش يزعل مني ........... بالنسبة للمواضيع بشكل محدد .... بحب المواضيع الغريبة .......... القصص العجيبة ................. الكلام الخطير ... كده يعني

3- ماذا تعني هذه الشخصيات بالنسبة لك

- ابن مصر ..... انا معرفتش ابن مصر بشكل قوي ... والحق عليه هو ... مش عارفه ليه واخد جنب مني انا بالذات ............ مع انه هو و البت فيرجو سمن على العسل ........ نفسي اعرفه .... و نفسي يفهمني ............ علشان انا واثقه سبب ابتعاده عني ... انه مش فاهم كلامي .....

- ابن البلد ...... الواد احمد......... ها اجوزه لاية على مراته ....... غصبن عنه
و لو حصلت مشاكل ها جوز ابنه لبنتي اسراء .......... و يبقي امه دعياله

- هبة ... علاقتي والاخت هبه على احسن ما يكون .......... و في وعد بزيارة ....... فاكره يا هبه

- واد كول مش معقول ........... مستفز ........... عايز الضرب ........ و هو مش بعيد عن ايدي ........ يعني كلها فركت كعب ............. و اعمل هجوم .


- فيرجو .... مش عارفه .. مليش احتكاك بيها قوي ............. يعني صباح الخير يا جاري انت في حالك و انا بحالي

- محيي ابراهيم ............. طبعا لازم اقول كلام شديد قوي ......... علشان اداني الفرصة للرغي ... واني اقول الكلام ده ............ و اعرفكم اكثر .............. علشان كل واحد بيبان من الاسئلة بتاعته
مش من الاجوبة ............

- شمس الدين .......... يعني النك الجميل ده انا لسه ما عرفتش صاحبه كويس و اتمني اتعرف عليه

كفاية كده


بسنت( بسنت حطاها اخر واحد يا لئيمة كانه توقيع يعني ) بس انا بقي عارفه انك عايزا راي في بسنت كمان ........... عسلية مهلبية ................ و شكلك بت مصرية جدعه يا بسنت

ta3mia
19-01-2003, 06:25 AM
مستر اوف لايف (هيل)

صباح الخير على الجميع
و اسفة اني ما كنتش متواجدة يوم الجمعة والسبت ,.......... كان في امتحانات J
احب أرد علي الأستاذ/ تامر (سيد الجحيم ) ؟؟؟؟؟؟؟؟؟؟؟؟ اللهم احفظنا و احفظه و ما يكنشي أبدا سيد الجحيم
ولا أنت يا تامر ملقتش غير المكان ده فاضي J ما علينا .........


اولا ودا اعتراض واضح وصريح عليكى انتى واخت فيرجوا
انتوا الآتنين حطين تحت البلد الكويت ومش موضحين انكم مصريين وانا اقعدت اتعملم معاكم مده على انكم من الكويت
بس انا اعتقد ان المصرى لازم يفخر بكونه مصرى زى ما الكويت لازم يفخر بكونه كويتى وزى ما كلنا لازم نفخر اننا عرب

شوف يا سيدي .... أنا عمري ما قلت اني مش مصرية ........ وده من أول يوم بالمنتدى .......... و ضحت تماماً للجميع أني مصرية مقيمة بالكويت ..... لغايت ما مصري كندي .... بقي يقولي خلاص فهمنا يا ستي ............ لو كان عندك شك .......... كان المفروض تسئل ......... و اقصر طرق للحقيقة .. هي الخط المستقيم ... يعني كنت سئلتني أنا شخصيا ً ... اديك شايف اني
مصرية .. و مش بتنكر لجنسيتي أبدا .....

أنا من نوف الرجالة اللي بيتجوز علشان يخون مراته ؟؟؟؟؟؟؟؟

اعتراف خطير ... بس أنا فهمت منه انك لسه صغير ....... لانك لو فعلا ها تخون ... مش ها تقولها ..... على العموم اذا كان اعتقادي خطاء اتمني انك ما تتجوزشي خالص .. علشان بنات الناس مش لعبه ..... و علي نفسها تدور الدوائر ..... و بدعي ربنا يهديك

طيب انتى قلت جايز لو جوزك خانك يبقى ممكن القرطاس يطلع ديق شويه
طيب الكلام ده اكيد يعنى

بالنسبة لموضع القرطاس ........... اللي هو كناية عن الخدعة نفسها .. او الكذبه ... و دي نصيحة ليك .. ما دمت داخل على غدر ........ ان الكذبة تكون مقنعه ... علشان ما يبقاش القرطاس ضيق ....

انتى قولتى انا مبعرفش اعيش فى مصر وان الناس اتغيرت افهم من كده انك بقيت غريبه عن مصر ؟

موضوع اني معرفشي أعيش في مصر .. ده حقيقة .... بس أكيد حقيقة قابلة للتغير .... بمعني
اني حاليا ده إحساسي .. بس لما انزل .. أكيد ها اتأقلم .. خصوصا اذا لقيت الناس الحلوة زيكم

لو اكتشفتى ان حد من ولادك بيعمل حاجة غلط فى سن المراهقة ؟ مثلا ماشى مع بنت الجيران الى فى الدور التالت
او بيزوغ من المدرسة رد فعلك حيكون ايه

إذا اكتشفت أن أحد أولادي بيعمل حاجه غلط ......... بصراحة ... ها افرح .........
علشان كل سن وله الحاجات الغلط بتاعته ... مقدرش احجر على سنهم ... و الحاجات الغلط تتعمل في السن الغلط والوقت الغلط .............. بس انا دايمن بدعي ربنا ....... ان أي شي غلط ... يكون في حدود العادات والتقاليد .............. يعني تجارب نظيفة ............ لا تسي الا احد ابنائي ولا ابناء الناس .............. ولازم يجربوا كل شي ... يعني ها يعرفوا الحياه ازاي


لو انتى رسمه حاجة فى دماغك لمستقبل اولادك كليه معينه مثلا وطلعتى لقتيهم بيعلنوا تمردهم عليكى رد فعلك حيكون ايه

بعدين حكاية راسمه حاجة في دامغي دي ............. انا شيلاها من دماغي خالص ........... المهم يتعلموا ... و كل واحد يختار طريقه .... صعب افرض عليهم حاجة انا عيزاها ............ بس طبعا ما يمنعشي ان بتمني ليهم حاجات ........... احب احتفظ بيها لنفسي ( بعد اذنك )

لو اتعرض عليكى ترجعى مصر بس ممكن تضحى بحيجات زى المستوى الادى مثلا ترجعى ولو اه والتضحيه سهلة كده ايه الى يجبر الواحد يقع فى الغربة كتير

لو اتعرض عليا .............. ها قول لا ............ مش دلوقتي
لو اتفرض عليا ....................... ها سلم بالمكتوب

تعميه سؤال انا مستغرب من كتر المواضيع الى بتنزليها فى المنتدى النت بياخد منك وقت اد ايه كل يوم

بالنسبة لمواضيع المواضيع فا دي حكايتها حكاية ............. اقولها وامري لله .......... شوف يا سيدي ...... المواضيع اللي بلاقيها حلوه بشلها على جنب ........... و بعدين ادخلها مره واحده ... بتاخد مني اقل من ساعة\

بس اللي نفسي اعمله فعلا اني ارد زيكم ......... وعلق على مواضعكم .............. بس اعمل ايه مفيش وقت

ولو نزلتى موضوع والكل هاجمك فيه بيبقى ايه رد فعلك تتمسكى برأيك ولا تتعصبى على الكل ولا تتناقشى وممكن تغيرى رايك

اذا نزلت موضوع والكل هاجمني ............... اكيد اكيد اكيد اكيد ................. مش ها اتنازل عن راي ....... الا اذا اقتنعت اني خطاء ................ بس ممكن ........... اطلب من الجميع احترام راي ...... و ان نحترم اراء بعض ........... مع الاحتفاظ طبعا براي ......... اذا لم اكن مقتنعه بصحت رايهم ............
و طبق طبقنا طبق في طبق طبق طبقهم .......

و كفايا كده علشان أنا عايزا أروح اكمل بقيت الأجوبة و أتمني لك التوفيق والرضا و انك تغير برضو النك نيم ........ و اسمع اغنيه و حياتي عندك .......... اهداء خص لك


انا عارفه ان ده دور كول .............. بس كول مننا و علينا

ta3mia
19-01-2003, 07:14 AM
عبد الحكيم ..........

اخت طعميه اتمنى ان لاتكون اسئلتي ثقيله واتمنى لك حياة ملائها السعاده اخوك عبدالحكيم

انت هنا يا راجل ...................... اسل الأسئلة بتاعتك صغيرة كده ..........


السؤال الاول كم سنه وانت مقيمه بالكويت



أنا من مواليد الكويت ............. أنا و البت فيرجو ........ والواد احمد و جاسم و عيالي كمان

السؤال الثاني من هم اعضاء المميزين بنظرك
الاعضاء المميزين بنظري ........... يعني ده سوال .. علشان أجوب عليه و لا علشان ايه بالضبط ............. بس أنا ها قول لك من غير لما اقول لك أسماء ....... أكيد الأعضاء الممينزين عندي غير الأعضاء المميزين عندك .......... يعني كل شخص بيحدد الأعضاء المميزين حسب الاحتكاك والتعامل ....... يعني في أعضاء مميزين جدا ...... و اعرف النك بتاعم........ بس أنا لم اتعامل معاهم .... علشان كده هما مش مميزين بالنسبة لي ........ فاهم ولا شو احكي بالسوري

السؤال الثالث هل المنتدى يذكرك بالوطن

اكثر واحد ملتزم :D
المنتدي مش بيذكرني بالوطن .............. علشان أنا ما عشتش في مصر ........ بس ممكن أقول إن المنتدي بيذكرني بأيام حلوه ............ او بالأحرى بعيش فيه أيام حلوه

انا كمان بتمني لك حياه حلوه ............

ta3mia
19-01-2003, 07:28 AM
كووووول


السؤال الأول
الشخصيات التالية : 1 - ماذا تمثل في حياة طعمية .... ؟ وما بصمة كل منهم في شخصية طعمية ؟

ايه الاحراج ده يا مرسي ( يا كول )

- الزوج بيمثل دور الزوج بالضبط (لول )
- الابناء ... لما يبقي عندك عيال ها قولك
-الاب ( عنده شنب و بيمثل دور بابا )
-الام ( معندهاش شنب ) و بتمثل كل الادوار
-ايهاب ... ما بيمثلشي خالص
-لميس اكبر ممثلة ( بجد )
- حمودي (لسه بيتعلم التمثيل جديد ) بس مش فالح
-جسوم ( ملوش في التمثيل ) اصله له في الاكل بس

2 - ما ترتيب تلك الشخصيات من حيث غلاوتهم عند طعمية دون محاولة المراوغة والاجابة بانهم غلاوة واحدة ؟

ابقي كذابة طبعا .......... ما كلهم غلاوه واحده
بس بيني و بينك و بعيد عن المنتدي و بالعقل كده
اكيد الواحد عياله اهما اغلي شي عنده بعدين جوزه

بعدين من غير زعل يا فرجو و ما تروحيش تفضحي الدنيا عند
بابا و ماما ......... و لا اقولك
يمكن اخواتي الاول .. النقطه دي فيها خلاف

السؤال الثاني
ما مدي اشتياقك لحياة ما قبل الزواج ؟ وايهما افضل قبل ام بعد ؟

ياه ......... ايام الشقاوه ... طبعا ايام حلوه ... و الواحد نفسه يعشها ........ مش يعشها تاني .......لا يعني يوم كده في السنه ......... بريك يعني .......... و ايهما افضل .......... والله يا كول حسب المود .. لو الواحد مبسوط ........ يبقي ها قول ايام سوده ربنا لا يعدها

و لو المود زفت و اطران ........... يبقي انا زهقت من العيشة دي ... فين ايام زمان ... شغل نسوان يعني

2 - ما مفهوم ..... الشباب الصايعة ..... الذين ذكرتيهم في حوار لميس .. من وجهة نظرك ؟
تحب الصراحة يا كول ........... مفيش حاجه اسمها شباب صايع ........... هي مرحلة كنت بعشها ....... بس الواحد علشان حاسس انه غلطان و مكنشي المفروض يعمل كده .......... و علشان بقي مسئول عن عيال و بنات ...... يمكن بيحلي صورته في عين نفسه و يقول شباب صايع ..........


3 - مع من من الشخصيات السابقة ( في السؤال الاول ) يكون سر طعمية ؟ وهل كل الاسرار ام بعضها ؟

مع الاعتزار لكل النجوم الذين سبق ذكرهم .....
سر طعمية مع طعمية او مع امل و بس

قصدي الاسرار الجامده قوي ........ مش الحاجات اللي البت فيرجو عرفاها

السؤال الثالث
ماذا تعرفين عن التليفون الباناسونيك الذي اخذته مني لميس للتصليح ؟ واذا لا تعلمي ياريت تسأليها وتبلغيني ؟ واهو بالمرة تفكريها هههههههه

يا اخي كول .......... ما اعرفه عن التليفون البانسونيك انه بدعه ......... و انه شيطان ..... انصحك بالابتعاد عنه .......... خصوصا و انه اصلا مش موجود

لو مش عاوزه تردي علي السؤال ده .... بلاش براحتك اصل جالي تهديد من لميس بإن التليفون مش جاي ولو جه هيجي بايظ .... يرضيكي كده

كويس ان الفكرة وصلت لك ................... لحسان انت شكلك ها تحصل التليفون

ta3mia
26-03-2006, 05:12 PM
ياه
انا قريت الموضوع من اوله
كاني بقراء في دفتر مذكراتي
واللهي ايام حلوه
والمنتدي ده ها يفضل انشاء الله
و بكره عيالي وعيالكم يكبرو و يشوفو الحاجات دي
و نفتكر بعض
و اللهي واللهي جت دمعه في عيني
في ناس افتقدتها هنا في المنتدي واحداث كثيره فكرني بيها المنتدي و حاجات كثيره اتغيرت لما بقرائها بضحك
ربنا يبارك في المنتدي و في اللي بيرعوه

ابن البلد
26-03-2006, 05:34 PM
ياه
انا قريت الموضوع من اوله
كاني بقراء في دفتر مذكراتي
واللهي ايام حلوه
والمنتدي ده ها يفضل انشاء الله
و بكره عيالي وعيالكم يكبرو و يشوفو الحاجات دي
و نفتكر بعض
و اللهي واللهي جت دمعه في عيني
في ناس افتقدتها هنا في المنتدي واحداث كثيره فكرني بيها المنتدي و حاجات كثيره اتغيرت لما بقرائها بضحك
ربنا يبارك في المنتدي و في اللي بيرعوه
ربنا يبارك لك يا طعمه
وأنت دائما منورة المنتدى
:f:

ta3mia
26-03-2006, 05:37 PM
ابن البلد........ ما جبتش معاك كلينكس
المهم ... انت فرحان قوي
انا مش بقول اللي بيرعوه انت يعني............. انا قصدي ناس تانيه

ابن البلد
27-03-2006, 12:03 PM
ابن البلد........ ما جبتش معاك كلينكس
المهم ... انت فرحان قوي
انا مش بقول اللي بيرعوه انت يعني............. انا قصدي ناس تانيه
فرحان بوجودك مش لاني براعيه
;)