المساعد الشخصي الرقمي

مشاهدة النسخة كاملة : تحت دائرة الضوء (3)



محيي ابراهيم
13-01-2003, 06:54 AM
الاعضاء الافاضل
نظرا للأقبال الشديد على توريط رامي محمد محمد احمد ( واد كول ) بالاسئلة وتوافد الكثيرين على اللقاء به ونظرا لان زمن المشاركة هو فقط ثلاثة ايام فقد راى مشرفوا القاعة ان يتم عقد لقاء ثاني مع واد كول في وقت لاحق قريبا ان شاء الله على ان نقوم اليوم بأستضافة
Miss. Virgo مشرفة قاعة الفن
واسئلتي لها هي
1-ماهي بياناتك من واقع البطاقة الشخصية مع اعتبار ان شرط السن اختياري ومن حقك عدم ذكره؟

2- الحرب خدعة ... مقولة قالها الحكماء حينما تدور الحرب بين خصمين محترمين واقوياء واليوم نجد ان الولايات المتحده حددت اليوم والساعة التي ستضرب فيها العراق ... هل في تصورك اننا ( اي العرب ) وصلنا الى هذه المرحلة من المهانة بحيث لايعتد بنا اي طرف في العالم ويستهين بكرامتنا كخصم المفروض انه كان محترما ويحدد متى واين وكيف يضربنا بل ومنطلقا من اراضينا ايضا ... هل تعتقدي اننا كأمة انتهينا خلاص وانتهى كبريائنا واحترام العالم لنا؟

3- انت مشرفة قاعة الفن .... ماهو تصورك تجاه خدمة الفن لقضايا الوطن من منظور عالمي ( اقصد ) كيف نخاطب العالم بشكل حضاري غير منفعل ليتبنى قضايانا من خلال فنوننا ومبدعينا؟

شكرا مس فيرجو
محيي

وادكول مش معقول
13-01-2003, 07:33 AM
والله وجالك يوووووووووووووووووم ... ههههههه

السؤال الاول ( اجب عن الأسئلة التالية )

1 - ماذا يمثل الرجل في حياة لميس ؟ وهل الحب هو اساس الارتباط ؟

2 - ما السر وراء حبك .............. للسينما الهندية ... علي الرغم من ان جميعها نفس القصة ؟
( مع اختلاف ترتيب كل من الرقص والاغاني والخناقة والحب والضحك من فيلم للتاني ... ده غير ان في كل فيلم تلاقي واحد اخوه تاه او هو ضاع من امه وفي اخر الفيلم يتقابلا علي نفس الجسر القديم بعد ان قالا ان لا تلاقيا هههههههه)

3 - بصراحة شديدة ماذا يزعجك من المنتدي يجعلك تظلين بالايام كالمتفرجة علي ما يحدث دون مشاركة .... بصرف النظر عن الامتحانات ....؟ ومن هم الاعضاء سبب ذلك الازعاج ان وجد ؟
( غير ابن البلد وواد كول لو سمحتي )


ويبقي للأسئلة بقية .......

نصيحة اعلانية وراجعين ........... انتظرونا

Mrs. Virgo
13-01-2003, 08:20 AM
أخي / محيي ابراهيم
لا شكر على واجب .. ده أنا هخنقك لما يجي الدور عليك ..
أقصدي ده أنا إلي لازم أشكرك على إستضفتك ليه .. :D

1-ماهي بياناتك من واقع البطاقة الشخصية مع اعتبار ان شرط السن اختياري ومن حقك عدم ذكره؟

اتفضل اتعرف عليه من هنا ..
http://www.egyptsons.com/misr/showthread.php?threadid=164
يا ريت المعلومات دي تكون كافيه .. ولو في أي سؤال ثاني
;) تحت أمرك ...
ملاحظه: الرجاء قراءة كلمة (كافيه) باللغه العربيه الفصحى .. :D

2- هل في تصورك اننا ( العرب ) وصلنا الى هذه المرحلة من المهانة بحيث لايعتد بنا اي طرف في العالم ويستهين بكرامتنا كخصم المفروض انه كان محترما ويحدد متى واين وكيف يضربنا بل ومنطلقا من اراضينا ايضا ... هل تعتقدي اننا كأمة انتهينا خلاص وانتهى كبريائنا واحترام العالم لنا؟

:o ماما قالت لي ما تتكلميش في السياسه .........
بس أنا مش بسمع كلام ماما ........... :D
وهجوبك .. أيوه .. وصلنا للدرجه دي .....
- وصلنا لمرحلة أننا ما حدش يا خد برأينا .. (لأننا ما عندناش رأي أصلا)
ولو عندنا رأي .... لا هو قوي .. ولا موحد .. ولا مقنع .. ولا مفيد ..
- :D حلوه نحدد إزاي وإمتى نضرب .. ممكن دي يبقى لينا رأي فيها ..
- :rolleyes: احنا ممكن ما ننتهيش .. بس لو عملنا لنفسنا قيمه ......
لو بدينا نحط ايدينا في ايد بعض .. العرب كلهم يبقوا جسم واحد ..
قوه واحده .. نساعد بعض (اقتصاديا ، غذائيا ، نفطيا ...........
نداري على مصايب بعض .. نقف في وش أي حد عايز يأذي اي حد فينا ..
وأهم ما في الموضوع .. نبني أساليب دفاع .. عن نفسنا وبلادنا .........
مش عارفه إزاي ....... أسلحه ... قواة بشريه ........
معاهدات (منسيه) مش عارفه بس دي لازم تتعمل ..
يمكن الكلام ده بسيط جدا ... ومعروف جدا ... بس هو ده الي أنا شايفه أنه
لازم يحصل علشان يرجع اسمنا (عرب) ... زي (العرب) بتوع زمان .. مش
(عرب) زي (العرب) بتوع دلوقتي ..

3-مشرفة قاعة الفن . ما تصورك تجاه خدمة الفن لقضايا الوطن من منظور عالمي ( اقصد ) كيف نخاطب العالم بشكل حضاري غير منفعل ليتبنى قضايانا من خلال فنوننا ومبدعينا؟

- الفن ....... بيخدم ........... دي حاجه ما فيش اثنين ممكن يختلفوا عليها ..
إزاي هي إلي بتفرق ..... زمان كانوا بيقولوا أن القلم ...... سلاح الأمم ..
وكمان لولا القلم ......... ما كنش بقى فيه حاجه اسمها فن ..
يعني القلم هو الموجه ..
هو المخرج لكل الأفلام ..البرامج .. الأغاني .. المسلسلات.
- إزاي نخاطب..... نخاطب العالم من خلال مراعاة (حرية الرأي)
ليه هما من حقهم يفكروا ويتكلموا .. ويعملوا .. إلي هما عايزينوا ..
وإحنا لو حد طلع من عندنا بيقول كلمة الحق .. (بنخرسه)

وبخصوص الموضوع ده .. :rolleyes: بحب برنامج (حمدي قنديل) رئيس التحرير ..
:p بيبرد على قلبي ...ولو أنه بيتكلم بالمتغطي :mad: أوقات كثيره
علشان (سيد بيه قشطه) ما يزعلش .... بس المهم أنه بيتكلم ..

وكمان (عمرو خالد) ربنا يوفقه ويرحمه دنيا وأخره ..

----- السؤال الثالث مبني على السؤال الثاني ---------
ما ظنش العالم ممكن يتبنى قضايانا .. إلا لما يكون عندنا رأي .. وكلمه
وما ظنش العالم ممكن يتبنى قضايانا .. من خلال مبدعينا وفنونا ..
إلا لو إحنا نفسنا احترمنا المبدعين دول .. واديناهم حقهم .في توضيح رايهم الشخصي من خلال إبداعاتهم.

:rolleyes: حلو الكلام ؟؟ :D بقيت سياسيه على أخر الزمن :D

heba
13-01-2003, 08:31 AM
بسم الله الرحمن الرحيم

فيرجو العزيزه انتى منوره المنتدى اليومين دول ان شاء الله تكون الأمتحانات عدت بخير0

1- ايه مواصفات الزوج الذى تتمناه فيرجو الرقيقه؟
2-ما امنياتك لمستقبلك ؟
كفايه عليكى كده علشان انا عارفه كول حيعمل فيكى ايه 0

Mrs. Virgo
13-01-2003, 08:48 AM
:D طيب .. أنا هوريلك.......... :D

1 - ماذا يمثل الرجل في حياة لميس ؟ وهل الحب هو اساس الارتباط ؟

- اقولك سر .. انا الرجاله ما بتنزليش من زور ..
يعني ما بطيقهاش ...... يعني أول ما أشوف راجل ..
برتب خطوط الدفاع -- الحقيقه خطوط الإنقضاض.. :D
بس دي حكمة ربنا (الرجال قوامون على النساء)
يعني حتى لو أن الست بمليون راجل .. زي أنا كده :D
بتفضل اسمها ست .. وتصرفاتها ست ..
وبتفضل عايزه تحس بأنوثتها ، وأمومتها وحنيتها ..

:D سبت الرجاله وبتكلم في الستات :D
بس معلش ..
ممكن تستخلص أن رأي في الراجل عكس رأي في الست ..
ولكل قاعده شواز .. :D علشان ما حدش يكرهني ..

- طبعا الحب اساس الارتباط !!! في نظري
عارفه أن ناس كثير اتجوزت بعدين حبت ..
بس علشان حبت .. استمرت مع بعض ..
يعني الحب كان اساس بقاء الارتباط الرسمي (الجواز)
بارتباط روحي ، معنوي ، نفسي ، عاطفي (الحب)

:rolleyes: عقدت الدنيا .. صح ؟؟؟

2 - ما السر وراء حبك .............. للسينما الهندية ... علي الرغم من ان جميعها نفس القصة ؟
( مع اختلاف ترتيب كل من الرقص والاغاني والخناقة والحب والضحك من فيلم للتاني ... ده غير ان في كل فيلم تلاقي واحد اخوه تاه او هو ضاع من امه وفي اخر الفيلم يتقابلا علي نفس الجسر القديم بعد ان قالا ان لا تلاقيا هههههههه)

عدة أسباب .......

- السينما الهنديه ........ قصصها حلوه إجتماعيه زي أفلام مصر بتاعة زمان .. (فاتن ، وسعاد ، ومريم وعبد الحليم ، ولبنى ، ورشدي .. و .. و ... و .. و)

- السينما الهنديه ...... فيها شكل كبير من الإبهار ...... الألوان .. اللبس .. الإكسسوارات .. المكياج .. القصات .. الرقصات ... الديكورات ..
القصور والمباني والحدائق والطبيعه ....

- السينما الهنديه .... عاطفيه رومانسيه جدا .......... ورغم كده .. محترمه جدا ..
يعني ما تلاقيش فيها .. #@%^$# .. بس تلاقي فيها حب وحنان .. :D

(شرح أكثر للموضوع ده .. قصدي ان الأمريكان لما يجوا يمثلوا موضوع الحب ..
أو الرومانسيه بيكون مشهد (#@%^$# ) .. أما في السينما الهنديه .. بيكون
أنه بيضحوا علشان بعض .. أو بيغنوا لبعض .. أو بيعيطوا مع بعض .. ) حاجه كده يعني ..

كفايه ولا عايز كمان !!!

3 - بصراحة شديدة ماذا يزعجك من المنتدي يجعلك تظلين بالايام كالمتفرجة علي ما يحدث دون مشاركة .... بصرف النظر عن الامتحانات ....؟ ومن هم الاعضاء سبب ذلك الازعاج ان وجد ؟
( غير ابن البلد وواد كول لو سمحتي )

- ما فيش حاجه بتزعجني في المنتدى ... قد الناس إلي مش بتراعي
مشاعر ، قدرات ، مزاجات الناس الثانيه ....
وبيزعجني السلبيه في حل المشاكل خاصة لما يكون (الصح بين ، والخطأ بين) :mad:

- بصراحه ما فيش حد بعينه أو بشخصه مصدر لأزعاجي .. إنما هو موقف معين بيكون سبب في إزعاجي ...
يعني ممكن تكون كلمه .. أو تلميحه .. أو تعليق .. يزعجني من شخص ..
بس أني أنزعج من شخص لشخصه .. لأ .. وألف لأ .. :D

أنا بحب وبحترم الناس كلها .. :D

:mad: بس إنت هقطعك يا مرسي :mad:

مصراوى
13-01-2003, 09:21 AM
:D:D:D

اقولك سر .. انا الرجاله ما بتنزليش من زور ..
يعني ما بطيقهاش ...... يعني أول ما أشوف راجل ..
برتب خطوط الدفاع -- الحقيقه خطوط الإنقضاض

:D:D:D

أسئله

ما هى سلبيات و إيجابيات إقامتك خارج الوطن ؟

هل تغيرت أفكارك أو قناعاتك بعض الشئ بعد مشاركتك بالمنتدى ؟


تحياتى و إحترامى

Mrs. Virgo
13-01-2003, 10:29 AM
هبه الأموره ......
شكرا .. كنت عارفه أن إنتي الوحيده إلي ممكن
توقف جنبي في الظروف دي :D

1- ايه مواصفات الزوج الذى تتمناه فيرجو الرقيقه؟
:D مواصفات كثيره ما تتعدش ..........

يكون مؤمن ................................. قوي..
(علشان أنا لو ضعف ايماني - يرجع يفوقني - ويكون قدوه ليه ولأطفاله)

يكون صادق ............................... قوي ..
(مبحبش الكذب ولا الكذابين)

يكون بيحبني ............................. قوي ..
(دي هتخليه أعمى عن بلاوي كثير :D - وكمان ما يزهقش مني)

يكون حنين ..................................قوي ..
(:D علشان يحنن عليه:D)

يكون محترم ................................ قوي ..
(:D في كل المواقف )

يكون عادل .................................. قوي..
(:D علشان ما ينصرش مامته عليه - وبيأمن بأنه "لك مثل ما عليك" )

يكون مخلص ................................. قوي ..
(:D علشان ما يبصش لحد غيري - ده علشان مصحلته :mad: )

يكون أب ...................................... قوي ..
( مش أب جاهز .. لأ .. يعني بيحب ولاده ..) :D

يكون صريح ومباشر ...................... قوي ..
(هتوفر علينا حاجات كثير :rolleyes: )

يكون بيحب الحياه والمرح .............. قوي ..
(ما بحبش النكد ..... أو الإنسان المعقد)

يكون ذكي وطموح ........................ قوي..
(علشان يواجه حياتنا لوحده :D - "الرجال قوامون على النساء"

((الشكل الخارجي بجد ما بيهمنيش أبدا .. يعني كفايه عندي أنه يكون شخص شكله مقبول وجسمه متناسق))

2-ما امنياتك لمستقبلك ؟

امنيتي بجد مش بهزار .. (ان الناس كلها تحب بعد)
الأمنيه دي لو إتحققت ..
هنلاقي كل أمانينا الثانيه (والكثيره قوي) إتحققت اتوماتيكي...

أمنياتي لمستقبلي (شخصيا)

- اني اعيش واموت وربنا راضى عني ...

أني أريح بابا وماما .. واخليهم راضيين عليه على طول كده :D

- أني اشوف اخواتي الصغيرين .. بقوا حاجات كبيره .. في المقام
والمركز .. والوظيفه .. والشخصيه ... والعقل .. وكل حاجه ..

- اني أخلص الجامعه ...
ومش هقول الاقي وظيفه احسن ومرتب احسن وكلام من ده ..
لأني بجد بأمن أن المرأه وظيفتها بيتها .. وجوزها وأولادها ونفسها..

- اني اتجوز الإنسان إلي بحبه ..
إلي ألاقي فيه كل المواصفات المرصوصه فوق دي .. :D

Mrs. Virgo
13-01-2003, 10:30 AM
مصراوي .. :rolleyes: مالك ؟؟؟

ما هى سلبيات و إيجابيات إقامتك خارج الوطن ؟

إيجابيات .................

1) بنقابل ناس كثير ... جنسيات كثير ......... اشكال كثير ...
عقول كثير .......... أخلاق كثير ............ وحاجات ثانيه كثير ..
بنتعلم منها وبنستفيد وبنبني على أساسها ثقافتنا في حياتنا ....
لو كنت في مصر .. وبحكم أني كمان بنت (يعني ما فيش خروج ولا دخول حتى !!).. ما ظنش كنت شفت وقابلت التشكيله دي ...

2) أن الحياه هنا .............

- هاديه .. (صباح الخير يا جاري - مش معنى كده أني مش اجتماعيه - بالعكس .. بس هنا ممكن بسهوله "تعرف صحبك وتلزمه" أو "الباب إلي يجيلك منه الريح تسده وتستريح")

- نظيفه ..(المناطق الصناعيه بعيد عن السكنيه ، وفي قوانين تمنع السيارات إلي بتدخن تمشي في الشارع ، وطول اليوم ناس بتكنس في الشوارع وتلمع وتسقي الورد)

- مرفهه .. وده مش علشان زي ما الناس فهمه .. (الحياه سهله ، والفلوس معلقه على شجر في الشوارع ... لأ .. هي كده لأن والدي بيأمن بمقولة (أصرف ما في الجيب يأتيك ما في الغيب ، وكمان بيأمن أن الإنسان لازم يعيش يومه .. مش نكدس فلوس زي ما معظم المغتربين بيعملوا بعدين نلاقي أنه مالهاش أي لازمه لما نشيخ.. ده لو عشنا لحد ما نستخدمها !!!! )


السلبيات ..............

- أني بعيده عن وطني ......

- بتعود على حاجات ... ممكن مقدرش اتعايش معاها لما ارجع بلدي..

- أعتقد أنه ما فيش سلبيات كثير .. لأني في بلد
(عربي ، مسلم ، محب لوطني الأصلي:rolleyes )

هل تغيرت أفكارك أو قناعاتك بعض الشئ بعد مشاركتك بالمنتدى ؟

لأ ..... :rolleyes:

وادكول مش معقول
13-01-2003, 02:47 PM
السؤال الثاني ( اجبي عن الاسئلة التالية)

1 - ماذا تفعلي لو كانت شخصية الانسان بيده اختيارها ... وليس امامك سوي اختيار من اثنان ......... اما ذكر او انثي ؟
وان اخترتي ان تكوني ذكر ........... فلك ان تختاري بين ان تكوني ..

هتلر او شارون
وان اخترتي ان تكوني انثي ........ فلك ان تختاري بين ان تكوني ..

شجرة الدر او صفية زغلول

مع الرجاء الاخيتار موضحة ما سبب اختيارك لكل شخصية ؟؟؟؟؟



2 - لو اسند لك عمل محاسبي لزميل لك في العمل ......... هل تقومي به ؟ مع العلم بانه ليس من اختصاصك ........؟؟؟ ولماذا


3 - لو انتي دكتورة نفسية ...... وطلب منك كتابة ملخص في جملة لتحليل شخصية كل من :

1 - طعمية
2- ابن البلد
3- ابن مصر
4- بنت مصر
5- واد كول


ويبقي للأسئلة بقية .......
نصيحة اعلانية وراجعين ........... انتظرونا

master_of_hell
14-01-2003, 01:42 AM
Miss. Virgo
الظاهر واد كول بيخلص منك الى جراله
فى ردك على سؤال السلبيات والايجابيات فى وجودك خارج وطنك ؟
زكرتى اشياء انا شايف ان كلها ممكن تتحقق فى مصر وانها حتى لو متحققتش مش اضافة قوية فى شخصية الفرد دا نقد مش سؤال

نيجى بقى للسؤال
لو لقيتى نفسك فى مسألة جوازك محصورة بين شخصين واحد مصرى والتانى لآ . وخدى بالك من تبعيات الموقف كله تختارى مين اذا كان الآختبار عقلى فى حين ان الى مش مصرى ممكن يوفرلك الحياة السهلة الى قلتى عليها وبنفس المبدأ انا المصرى شاب وبيبدأ حياته

2_ قلتى ان الفن بيبنى لكن سعات بيهد م حتى لو هدفه سامى زى ما نعمل فلم كده بيحارب المخدرات وطول الفلم الى بيشربوا مخدرات مبسوطين وعايشين وكمان المخرج بيصور هما بيتعاطوها ازاى بالضبط وبيدى درس خصوصى للشباب وفى الآخر موت المدمنين كلهم الى هما اصلا ابطال الفلم يبقى ايه رايك ؟

3_ خصوصا انى انا بنت (يعنى مبرحش ولا اجى) انت شايفة ان البنت لسه فعلا محظور عليها كده فى بلد زى مصر ومخدتش حقها ؟

وكفايه عليكى كده دلوقتى ردى وانا اروح اشرب فنجان شاى مع سمطتين وارجع علشان امى بتنده على

وادكول مش معقول
14-01-2003, 08:35 AM
الرجاء التركيز
باقي من الزمن 10 دقائق

علي توزيع ورقة السؤال الثالث

يعني بإختصار انجزي ........ دول 10 اسئلة ههههههههههههه



انا اصلي هزززززززززززززززززززن عليكي زي دي .....

Mrs. Virgo
14-01-2003, 10:03 AM
كوووووووووووول . هقتلك ..

1 - ماذا تفعلي لو كانت شخصية الانسان بيده اختيارها ... وليس امامك سوي اختيار من اثنان ......... اما ذكر او انثي ؟
وان اخترتي ان تكوني ذكر ........... فلك ان تختاري بين ان تكوني ..
هتلر او شارون

أختار اني ما كونش خالص ..
واحد انتحر ..وواحد بيقتل في مخاليق ربنا ..
يعني الاتنين قتلوا النفس إلي حرم ربنا قتلها ؟!؟!

لو ضروري قوي ...

أختار أكون هتلر .. لأنك قولتلي أنه كان بيقتل اليهود .. (مكنتش اعرف)
بس انا ما بحبش شخصيته ولا شنبه ..

:mad: في كل الأحوال مستحيل أكون شارون ..
أنا بحب الناس كلها وبحب ان الناس تحبني .. وبحب السلام والهدوء

وان اخترتي ان تكوني انثي ........ فلك ان تختاري بين ان تكوني ..
شجرة الدر او صفية زغلول

طبعا صفيه زغلول
بصراحه ما كنتش أعرفها قبل سؤالك ده .. بس كفايه أنها
(( استمرت في ممارسة نشاطها السياسي حتي بعد وفاة زوجها في عام 1927 ، وتقديرا للدور البارز الذي كان لها منحت لقب "ام المصريين".
ما ظنش حد ممكن يمنح لقب (أم) لوحده ما تستهلش .. فما بالك بأم المصريين ؟
لو عايزين تعرفوا عنها أكثر .. اتفضلوا من هنا ...
http://www.horus.ics.org.eg/arabic/html/safya.html
شكرا كووول .. ;)

طبعا مستحيل أختار اكون شجرة الدر ..
معرفش عنها حاجه غير أنها (تحيه كاريوكا) :D
وقتلت اجوزها .. وكانت انانيه وطماعه جدا ... وكلام من ده ..
مع أني بحب فكرة (قتل الأزواج) :p مصراوي .. الحته دي ليك مخصوص..

مع الرجاء الاخيتار موضحة ما سبب اختيارك لكل شخصية ؟

2 - لو اسند لك عمل محاسبي لزميل لك في العمل ......... هل تقومي به ؟ مع العلم بانه ليس من اختصاصك ........؟؟؟ ولماذا

بصراحه .. أنا بكره الأرقام .. والحساب .. والرياضيات ..
وبيجيلي حساسيه منها ...... وبقعد طول اليوم أهرش في وشي ..
وأشد في شعري ((ده قبل ما اتحجب))
دلوقتي هجيب حد اشدله شعره ..

بس طبعا هعمل الشغل ......... ليه ؟؟
أولا: لأني ما بحبش أقول أنا مش بعرف أو مش بفهم بدام لسه فيه عقل
ولأني بطابعتي بحب اتحدى نفسي .. (هعملوا يعني هعملوا)

ثانيا: مساعده لزميلي في الشغل .. حتى لو مش اختصاصي..

ثالثا: لأني أصلا يا سي كوووول كنت بعمل الشغل ده قبل ما حضرتك تشرف
لمدة 3 شهور .. هو صحيح كان عك .. .. بس كنت بعمل إلي بقدر عليه ..
وربنا يعينك لما ترجع من السفر تصلح العك ثاني بقى .. :D

3 - لو انتي دكتورة نفسية ...... وطلب منك كتابة ملخص في جملة لتحليل شخصية كل من :

1 - طعمية :( أكون أو لا أكون)
بتحب الحياه .... بس مش عارفه تعيشها صح..
بترضى بقليلها ..... وقليلها مش راضي بيها ........

2- ابن البلد :
(طنش تعش وتنتعش) ...... شاري دماغه .. :D
في وقت الأزمات .. (الشخصيه) ما فيش أجدع منه..
وفي الأزمات العامه .... بيكون حيادي .. علشان ما بيحبش يخسر حد.
سياسه حلوه .......... بس مش كل الأوقات .. أو في كل المصايب..
أو مع كل الناس ..

3- ابن مصر :
اب ، اخ ، صديق.. حنين ..

4- بنت مصر :
بصراحه بسنت ولا مره صدفت أني اتكلم معاها بشكل شخصي.
بس بحس فيها جمال روح بنت مصر السمره وخفة دمها وثقافتها.

5- واد كول :
هو سبب أني هسحب اشتراكي من المنتدى باذن الله .. :3:
:3: غلس .. :3: وممل .......... :3: بس رغم كده فهو ;) كوووووول
بيراعي ربنا في كل حاجه بيعملها ..... بيحب الحياه جدا ..
وبيكره النكد والزعل ............ جدا باردوا ....... :D


كووووو ل .. لو شوفت وشك هنا ثاني .. :mad: هقطعك .. :mad:

ta3mia
14-01-2003, 10:39 AM
يا جماعة حرام عليكم البيت فيرجو سلختوها و قطعتوها حتت
كده برضو يا كول ........... دي الامانه اللي انا أمنتك عليها ... و بالمناسبة لاحظ انها ما رضتشي على موضوع انها تشتغل الشغل بتاعك ... يا لئيم ... ما هوانا كنت حاضرة الموقف ده .. فاكر انها ها تتكسف في المنتدي و تقول اشتغله علشان شكلها يطلع حلو ............ بس شفت .. كبستك ... و برضو مش ها تشتغله
LOL
و ايه حكايتكم يا ولاد المنتدي ....بتعملوا في فيرجو حبيبتي كده ليه ... حرام عليكم .. دي لسه بغله .. قصدي نونو .... بصراحة
اوعو تضحك عليكم بشوية الكلام ده ..... انا عيزاكم تشدو عليها اكثر من كده واللي عايز اين خدمة .. انا في الخدمة .....
بسم الله و استنعني على الشقة باللهفيرجو ..........انا مليش دعوة بحكاية ثلاث اسئلة بقي
انا ها قول الاسئلة كلها مرة واحدة ... يعني لو ما طرئشي اسئلة تانية
- مين في اعتقادك السبب المباشر وراء و أمام و خلف الموضوع ده
- عمرك ما قعدتي مع نفسك ... و فكرتي فيا
ولا اقولك ها اسئل بجد

- فاكرة يا فرجو لما كنتي بتخبي عليا لما يجيني تلفونات من العيال الصايعه ...( ايام الشقاوه )
- يا ترا لما بتفكري في الايام دي .... بتوزنيها ازاي ( يعني ايام سوده .. ولا بيضة ) يا بيضة
- ايه احساسك و انتي بتتفرجي على نفسك وعليا و علي اخواتك الصغيرين في شريط الفيديو الاهبل اللي احنا مصورينه و احنا بنلطم فيه و نعمل دور ريه و سكينة ......... يا ترا ... بتحسي ان الحياه طعمها اختلف
- فاكرة يا لميس شريط الكاسيت اللي سجلناه للذكري و فضل شغال ... و من غير ما نقصد سجل بلاوي
- (بالمناسبة الشريط ده فين )
- دي حاجات من ذكريات زمان .... احب اسئلك دلوقتي
- يا تري فكرتي في بكره ...... بكره شكله ايه في دماغك ... مش قصدي انتي بتتخيلي بكرة ازاي ... لا ... بكره في الواقع .... حسب الاشياء الملموسة من حوليكي ... شكله ازاي
- مش كفاية كده .... و تعقلي ... و تتجوزي... و تجيبي حتت عيل نضرب فيه

احب اقولك كلمة قبل الختام ................ ليس كل ما يتمناه الانسان بيدركه اختك

Mrs. Virgo
14-01-2003, 10:52 AM
master_of_hell

الظاهر واد كول بيخلص منك الى جراله
أي نعم .. بس هو هيروح مني فين .. أنا وراه والمنتدى كبير .. :D

فى ردك على سؤال السلبيات والايجابيات فى وجودك خارج وطنك ؟ زكرتى اشياء انا شايف ان كلها ممكن تتحقق فى مصر وانها حتى لو متحققتش مش اضافة قوية فى شخصية الفرد دا نقد مش سؤال

يمكن ..... لأن كل واحد له رأي شخصي ،
ومتطلبات واحتياجات شخصيه مختلفة عن الثاني .. :rolleyes:

نيجى بقى للسؤال
الله يسامح إلي كان السبب .. :D

لو لقيتى نفسك فى مسألة جوازك محصورة بين شخصين واحد مصرى والتانى لآ . وخدى بالك من تبعيات الموقف كله تختارى مين اذا كان الآختبار عقلى فى حين ان الى مش مصرى ممكن يوفرلك الحياة السهلة الى قلتى عليها وبنفس المبدأ انا المصرى شاب وبيبدأ حياته

بصراحه ما فهمتش السؤال كويس ..
يعني لو المصري فيه المواصفات إلي فوق دي كلها ..
إيه إلي يمنع أني ارتبط بيه ؟؟؟

ولو إلي مش مصري .. فيه المواصفات إلي فوق دي كلها ..
إيه إلي يمنع ارتبط بيه باردوا .. :rolleyes: ((غير أهلي طبعا :3:))

هي المسأله هتبقى .. مين إلي هيجي في حياتي الأول ..
وأتأكد من أنه فعلا فيه المواصفات دي كلها الأول ...
وأسمح له أنه يدخل قلبي الأول ...

:rolleyes: لو أجابتي مش مفهومه او واضحه ..
يبقى العيب في سؤالك .. :D

عادي يعني ممكن تسألني ثاني .. بصيغه ثانيه .
أو تشرحلي أنت عاوز إيه بالظبط
يلى .. ما هي بقت هيصه :D


2_ قلتى ان الفن بيبنى لكن سعات بيهد م حتى لو هدفه سامى زى ما نعمل فلم كده بيحارب المخدرات وطول الفلم الى بيشربوا مخدرات مبسوطين وعايشين وكمان المخرج بيصور هما بيتعاطوها ازاى بالضبط وبيدى درس خصوصى للشباب وفى الآخر موت المدمنين كلهم الى هما اصلا ابطال الفلم يبقى ايه رايك ؟

لأ .. أنا قلت الفن بيخدم .. مش بيبني .. :D
بيخدم .. يعني بيساعد مع حاجات ثانيه !!
بيبني .. يعني بيشيد .. وبيعمر الحاجه دي !!

عندك حق في المثل إلي قولته ..
بس يمكن قصدهم أن الانبساط ده مش بيدوم .. او حاجه كده ..
المهم أنا مش هحلل ليهم ....

بخصوص الشرح المفصل في الأفلام .. والدروس الخصوصيه ..
من رأي الشخصي أنها ساعات كثير بتنفع .. عارف ليه ..

لأن لولا أن الواحد شاف .. وحس .. واتلسع ... وشم ريحة شياط .. من النار ..
ما كنش عرف أن النار مؤذيه .. وممكن تضره ...
يعني في الأفلام لما يورونا طريقة حاجه غلط ..
مش بالضروره أنها تحريض أننا نعملها ... بالعكس ..
ده تحريض أننا نمتنع عن أي حاجه مشابه للي شوفناها ..
وعشناها مع أبطال الفيلم ..

بس فعلا .. عندك حق في افلام كثير ومسلسلات
بتهدم بدل ما تبني .
علشان كده أنا قولت أن طريقة التوجيه العرض في تناول المواضيع
هي إلي بتفرق ..

"زمان كانوا بيقولوا أن القلم ...... سلاح الأمم ..
وكمان لولا القلم ... ما كنش بقى فيه حاجه اسمها فن ..
يعني القلم هو الموجه .. هو المخرج لكل الأفلام ..البرامج .. الأغاني .. المسلسلات."


3_ خصوصا انى انا بنت (يعنى مبرحش ولا اجى) انت شايفة ان البنت لسه فعلا محظور عليها كده فى بلد زى مصر ومخدتش حقها ؟

ما هو مخدتش حقها دي .. تتوقف على إيه هي حقوقها في نظرك؟؟

تاكل .. تشرب .. تلبس .. تنام .. تكمل تعليمها .. تشتغل ..
دي مش حقوق ؟؟ دي حاجات طبيعيه بما أنها انسانه لازم تعملها....

انما .. الحقوق هي ... أنها فعلا ..
تتساوى مع أخوها في البيت .. (لها مثل ما عليها ومثل ما لأخوها)
يعني .. تخرج تزور صحباتها ...
تقعد قدام التلفزيون أو الكمبيوتر قد ما هو بيقعد ..
و ......... و ................. و ............. بلاوي ..

تختار إلي هي عايزه تتجوزا ..
خلي بالك .. مش بقول .. (((تعترض على إلي هي مش عايزه تتجوزا)))


:rolleyes: عارفه ناس كثير ممكن تضايق مني .. أو من طريقة تفكيري ..
بس هو ده إلي حاصل ........
لو في سؤال .. أو حد عايز شرح وتوضيح ..
أهلا وسهلا .. :D

وادكول مش معقول
14-01-2003, 11:18 AM
السؤال هههههههههههه الثالث .....( اجيبي عما يلي )

1 - من هو مثلك الاعلي في كل من المجالات التالية .....وباختصار لماذا ؟

- الحياة العامة
- المجال الديني
- المجال الادبي
- المجال العلمي
- المجال الفني
- المجال السياسي
- المجال المحاسبي ههههه



2 - لو خيروكي في ان تتخصصي في مجال من المجالات السابقة وتكوني مثل احد مما سبق ؟؟؟ من تختاري ............... عدا المجال الديني لان الكل يتمناه ؟



3 - ما هي قصة الشريط التي روتها طعمية بالتفصيل الاكثر من ممل هههههه؟



ويبقي للأسئلة بقية .......
نصيحة اعلانية وراجعين ........... انتظرونا


مش انا غلس وممل طيب ...............لسه فاضلك بكره

وشكلي بعد العشر اسئلة هاعملك دور تاني وبعديه مستوي رفيع ...هههههه

Mrs. Virgo
14-01-2003, 11:30 AM
أهلا طعميه ........ وانا بقول ريحة القلي دي جايه منين .. :D

استعني على الشقة بالله
ايوه وانا كمان


- عمرك ما قعدتي مع نفسك ... و فكرتي فيا
إعتقادك خطأ .. أنا بفكر .. في كل إلي حوليه ..
وطبعا أخواتي أول ناس بفكر فيهم .. وبدعي لهم ..
بس هي بتبقى بين الأخوات الحاجات دي مستخبيه ..
مش بتبان إلا في الازمات .. والمواقف ..

وقالوا "أنا بفكر اذن أنا موجود" مش انا برغي وبتكلم .. يبقى موجود
يعني بختصر .. أنا بفكر فيكي . وفي عيالك .. وفي مستقبلك .. وشغلك ..
بس كلامي مختصر جدا ................ ده لو في كلام .. ((وقال بيقولوا على الستات رغايين ؟؟؟ )) ..

طعميه ... خلي بالك .. أنا ما عنديش غير طعميه واحده .. :D

- فاكرة يا فرجو لما كنتي بتخبي عليا لما يجيني تلفونات من العيال الصايعه ...( ايام الشقاوه )
إنت سألتي وجاوبتي (عيال صايعه)
لو تعرفي أني مع (عيال صايعه) كنت هتشجعيني بأي شكل من الأشكال ؟؟

- يا ترا لما بتفكري في الايام دي .... بتوزنيها ازاي ( يعني ايام سوده .. ولا بيضة ) يا بيضة
طعمه .. الأيام السوده .. بتعرفنا حلاوة الأيام البيضه ..
هي كانت سوده .. علشان كنا صغيرين .. مش فهمين ..
ولما بفتكرها دلوقتي .. بحس أنها السبب في بناء شخصيتي الحاليه ..

- ايه احساسك و انتي بتتفرجي على نفسك وعليا و علي اخواتك الصغيرين في شريط الفيديو الاهبل اللي احنا مصورينه و احنا بنلطم فيه و نعمل دور ريه و سكينة ......... يا ترا ... بتحسي ان الحياه طعمها اختلف
:D أسكتي لما بشوفه .. بتكسف من نفسي جدا ..
:p بس برجع وبقول لنفسي "يا ستي .. إذا أختك الكبيره كانت كده ..
يعني عايزه انت تكوني إيه" :D

طعميه ....
طعم الحياه .. احنا إلي بنحدده .. يا مالح .. يا مسكر .. يا دلع ..
يا صايص .. يا مسبك .. حاجات كده ..
حياتنا زمان ... كنا عايشنها ..
حياتنا دلوقتي .. إحنا إلي مختارينها ..
هو ده الفرق ..

- فاكرة يا لميس شريط الكاسيت اللي سجلناه للذكري و فضل شغال ... و من غير ما نقصد سجل بلاوي- (بالمناسبة الشريط ده فين )
فاكراه .. موجود في شقة الجيزه

- يا تري فكرتي في بكره ...... بكره شكله ايه في دماغك ... مش قصدي انتي بتتخيلي بكرة ازاي ... لا ... بكره في الواقع .... حسب الاشياء الملموسة من حوليكي ... شكله ازاي

على الصعيد السياسي
بكره اسود ومهبب على دماغ كل العرب .......... (ما عدا سيد بيه قشطه)

على الصعيد الشخصي
أنا زي ما أنا ... مش ممكن أتغير ..
أنا زي ما أنا ... ولو الكل أتغير ..
أنا زي ما أنا ... بعقل كبير .. وروح طفل صغير ..

- مش كفاية كده .... و تعقلي ... و تتجوزي... و تجيبي حتت عيل نضرب فيه
احب اقولك كلمة قبل الختام ................ ليس كل ما يتمناه الانسان بيدركه

:D لأ مش كفايه ..

:D عايزاني أتجوز واجيب عيال ؟؟
طيب من مين .. ما أنتي ما قولتليش اختار مين من العرسان ..

- الدكتور إلي عنده 50 سنه ؟؟؟

- ولا إلي بيكره مصر ومستحيل يرجعلها علشان خطبته سابته ؟؟

- ولا الكذاب ... (بيقول اسكندراني وهو من الفيوم)
كأن ده هيعليه في نظري ؟!؟!؟!؟
:D كان يقول مصراوي ويريح نفسه . علشان أرفضه بالثلاثه .. :D

- ولا أبو دماغ صغيره .. التافه .. ؟؟؟

طعميه حبيبتي .. عارفه أنه مستحيل كل ما يتمناه المرء يدركه ..
بس لو أدركتيه ............. هل ممكن تسبيه ؟؟؟؟؟؟؟؟

يعني لو لقيتي شخص .. بالمواصفات المرصوصه فوق دي ...
هل ممكن تسبيه ..
.:mad: وخلي بالك .. ده مش ممكن تبديله ..
:D اصل الرجاله (أو الجواز) إستعمال مره واحده .. زي أزايز البيبسي البلاستيك .. :D

ابن البلد
14-01-2003, 12:08 PM
بإختصار كده
تعملي أيه لو جاليك عريس من بلد ما بعيده وطلب منك أنك تعيشي معاه في بلده هذا وترك أهلك وناسك ؟


افراد الأسرة الكريمة ماذا تمثل لك ؟؟ من أول إيهاب لحد جاسم وكمان آيه ؟؟



العطاء والأنانيه كلمتان ليهم معاني كثيرة ........ ممكن بقه تقوليلي معانيهم بالنسبة لك ؟؟؟

Mrs. Virgo
14-01-2003, 01:22 PM
كووووووووووووووووول
ارحم من في الأرض يرحمك من في السماء

1 - من هو مثلك الاعلي في كل من المجالات التالية .....وباختصار لماذا ؟

- الحياة العامة
(بابا وماما)
بابا الحنان والحب والمرح .....
ماما الحنيه والتضحيه والأمومه..

- المجال الديني
الرسول عليه الصلاة والسلام ..
دايما لازم نحط مثل أعلى كبير قوي ..
على أمل أننا نوصل ولو لنقطه من تحقيق شخصيته الكريمه فينا.

- المجال الادبي
طه حسين .. (الأعمى البصير)
لأنه طموح .. قوي .. ذو اراده عظيمه وإصرار على لتحقيق الذات.

- المجال العلمي
:confused: دول كثار قوي ..
بس ما فيش حد مثلي الأعلى شخصيا ..
لأني ما بحبش العلمي .. ولا إلي بيجيبوا سيرة العلمي .. :D
بس أنا فعلا بحب وبحترم وبقدر كل انسان عمل حاجه
تخدم البشر .. وتسهل لهم حياتهم .. وتعالج امراضهم ..
(( وتخفي صلعهم وكرشهم )))

- المجال الفني
ما عنديش مثل أعلى ..
بس في ناس بحب أتفرج عليها .. واشوف افلامها

الفن المسرحي .. محمد صبحي
الفن السينمائي .. ميغ رايان
فن الغناء ... أم كلثوم ، سيلين ديون ، وبراين ادم..
فن التلحين .. عبد الوهاب ..

- المجال السياسي
ما عنديش مثل أعلى ..
ولا بحب أي حد في مجال السياسه
لا حاضر . ولا ماضي ..

- المجال المحاسبي
:D مش هقولك :p

2 - لو خيروكي في ان تتخصصي في مجال من المجالات السابقة وتكوني مثل احد مما سبق ؟؟؟ من تختاري ............... عدا المجال الديني لان الكل يتمناه ؟
اختار اكون هند رستم .. :p

اختار أني أتخصص في مجال الأمومه ..
واكون زي ماما .. :rolleyes:
وربنا يعني على نفسي .. لما أخلفني .. :D

3 - ما هي قصة الشريط التي روتها طعمية بالتفصيل الاكثر من ممل هههههه؟
شريط فيديو .. مصورينه أنا وهي .. واخواتنا الصغيرين ..
واحنا بنلعب وبنطط وبنرقص .. وكل واحب بيستعرف هويته قدام الكاميرا .. :D
وطبعا أنا وهي برعنا في دور ريا وسكينه :D





:mad: كفايه بقى بجد .. ما تبقاش ثقيل دم ..
:mad: إلي بيزيد عن حده بيتقلب ضده ..

وادكول مش معقول
14-01-2003, 01:38 PM
السؤال الرابع والاخير ( اجيبي عما يلي بإستفاضه )

1- ايه اللي صبرك علي انك تردي علي اسئلتي كلها ؟


2- ماذا تفعلي لو تقدم لك واحد .... زي
- واد كول ( بغلاسته )
- مصراوي ( بكرهه للستات )
- ابن البلد ( بروقانه وشريان دماغه )

( بس متصدقيش انا باشوف مدي غلاوتنا عندك هههههه)

3- ايه اللي ممكن يعصب لميس ويخليها تنفجر ...... بس مش تنفجر بالعياط ؟



انتهي الامتحان ........... باقي من الزمن شويه صغننين

لا تنتظرونااااااااااااا
لن نعووووووووود

Mrs. Virgo
14-01-2003, 02:17 PM
أهلا أهلا ابن البلد ......... منور الدايره .. :D

لميس ميس فيرجوا أخيرا وصلتي لتحت الضوء
الفضل ليك ولمنتداك الغالي .. :D

تعملي أيه لو جاليك عريس من بلد ما بعيده وطلب منك أنك تعيشي معاه في بلده هذا وترك أهلك وناسك ؟

هياخدني على المريخ يعني .. ؟؟؟
:o بصراحه ............
مش بصراحه قوي طبعا ..
مش فاهمه سؤالك .. يعني إيه يبعدني عن بلدي وأهلي وناسي ؟؟؟

انا عايشه بره مصر من 25 سنه تقريبا ..
بس بروحها .. وأعرفها ...

يعني هيخطفني مثلا .. ويمنعني من شوف أهلي ومن السفر ، أو التليفونات ، أو الإنترنت .. ؟؟؟
طبعا بني ادم زي ده مستحيل اوافق عليه ..

انما لو قصدك اني اتجوز واسافر مع جوزي ..
ده شيء عادي جدا .. بيحصل في كل مكان ..وكل الأوقات ..
والست لازم تفضل مع جوزها .. في المكان إلي يروحوا ..
راح الهند .. راح السند ... راح الفلبين .. راح أمريكا ..
راح في داهيه .. لازم تكون جنبه وتفضل معاه ...

:D حتى في الجنه هلزقلوه .. :D

وغريب ان انت تسأل السؤال ده .. وانت على وش سفر ..
وهتبعد عن اهلك ومراتك وابنك ؟؟؟

افراد الأسرة الكريمة ماذا تمثل لك ؟؟ من أول إيهاب لحد جاسم وكمان آيه ؟؟

كلهم كويسين .. :rolleyes:
مالهم يعني ؟؟؟

أمل وإيهاب .. اخواتي الكبار ..
أحمد وجاسم اخواتي الصغيرين ..
بابا وماما .. حب حياتي ..
أولاد أختي أمل (ايه ، اسلام ، اسماء ، اسراء) ولادي اللذين لم انجبهم :D
أولاد أخويه ايهاب (طارق ، وهشام) للأسف مش بشوفهم كثير ..



العطاء والأنانيه كلمتان ليهم معاني كثيرة ........ ممكن بقه تقوليلي معانيهم بالنسبة لك ؟؟؟

العطاء هو التضحيه من اجل الغير ، حتى لو على حساب مصلحتك ..
والأنانيه ... حب التملك .. بدون تفكير .. حتى لو على حساب مصلحة الغير ..

Mrs. Virgo
14-01-2003, 02:45 PM
كووول
من أسماء الله الحسنى
المنتقم ...]


1- ايه اللي صبرك علي انك تردي علي اسئلتي كلها ؟

لأني بحترم كل عضو في المنتدى هنا .. بشكل شخصي ..

يعني بحترم أخي/ محي ابراهيم .. إلي بدأ الموضوع الجميل ده ..
وإلي جعلني تحت الأضواء

وبحترمك .. لأنك مهتم وسألتني ... ولازم اجاوبك ..

وبحترم باقي الأعضاء ... انهم بدام دخلوا الموضوع ده ..
وأهتموا انهم يقرأوه .. وشافوا سؤال .. يبقى لازم يلاقوا كمان جواب ..

وبحترم نفسي .... :D علشان أنا كمان لما أسأل حد .. يبقى يرد عليه :D

2- ماذا تفعلي لو تقدم لك واحد .... زي


- واد كول ( بغلاسته )
لو قبل ما يتجوز .. أوافق عليه .. لانه زي ما قولت ..
بيعرف ربنا في كل حاجه ..
وما شاء الله عليه .. صبوووور .. يعني هيستحملني ..

- مصراوي ( بكرهه للستات )
أوافق عليه .. هو أنا أطول ..
كفايه خفة دمه ........... وكتاباته الساخره ..
وأهي فرصه أروضه .. :D وأعمل فيه أضعاف مضعفه من
الحاجات إلي بيكتبها في اوراق زوج سعيد ..
ده أنا حلمي أخليه اسعد وأسعد ..

- ابن البلد ( بروقانه وشريان دماغه )
لو قبل ما يتجوز .. أوافق باردوا .... :D
بدام هيبقى عندي ولد في جمال يوسف
الله يحميه .. ويخليهولوا ..
كمان أنا بحب الرواق جدا ... والهدوء .. ;)


( بس متصدقيش انا باشوف مدي غلاوتنا عندك هههههه)

وأنت كمان اوعى تصدق ردودي ..
أنا بس بوضحلكم مدى غلوتكم عندي ..
وعلى فكره .. كده يبقالي راجل رابع عندك .. :D

3- ايه اللي ممكن يعصب لميس ويخليها تنفجر ...... بس مش تنفجر بالعياط ؟

انا عموما بارده جدا :D
ما فيش حاجه بضايقني بسهوله ..

بس بيغظني .. اني اتقارن بأي حد أو حاجه ..

خالد بن الوليد
14-01-2003, 03:12 PM
:)

و الله يا لميس صعبتى علي من كتر الاسئلة ..

علشان كدة مش هسئل .. بس حبيت احييكي على اجاباتك و صبرك :D

mogah
15-01-2003, 02:40 AM
و انا كمان جيت أقرا و أحيي فيكي روحك الرياضيه و طولة بالك و قلت بالمره اتعرف على لميس من الاسئله و الأجوبه ... تحياتي و سلام

Mrs. Virgo
15-01-2003, 09:23 AM
:5::5::5::5::5::5:
شكرا خالد ......
شكرا موجه .....
دول عصروني ..
منهم لله .....
:5::5::5::5::5::5:

مصراوى
15-01-2003, 09:28 AM
أنا إسمى مكتوووووب

طييييييييييييييييييييييييييب

:D:D:D

بنت مصر
15-01-2003, 09:33 AM
اهلا بيكي مسي فيرجو تحت الضوء


منورة الموضوع يا حبيبتي واسمحي لي اسألك كام سؤال على السريع



1- اقرب شخصية الي قلبك في المنتدى


2- حكمة تؤمني بها


3- صفة تفتقديها وتتمنى ان تتحلى بها ميس فيرجو


انا والله يا ميس فيرجو بقد المستطاع حاولت اخفف من العقوبة أقصد الاسئلة


بسنت

Mrs. Virgo
15-01-2003, 09:58 AM
بسنت الأموره ...........

انت تسألي زي ما انتي عايزه ... :p
بالغيظه فيهم كلهم ............... :D

1- اقرب شخصية الي قلبك في المنتدى
بجد يا بسبسه ..
مقدرش اختار حد من اخواتي .. واقول اني بحبه اكثر واحد ..
خصوصا .. أن كل واحد منهم مبدع في قاعته .. ومبدع بطريقته ...

انا بحبكم كلكم علىبعض .. ولو واحد مش موجود ..
أو ما عداش على موضوع من مواضيع وعلق عليه .. بزعل .. :D

بحب الكل .. ونفسي الكل يحبني .. :D
إحنا بيت واحد .. وعيله واحده ...... ;)

2- حكمة تؤمني بها
- رب اخ لك لم تلده امك ....
- لا تؤجل عمل اليوم للغد .... (بأمن فيها بس مش بنفذها) :D

3- صفة تفتقديها وتتمنى ان تتحلى بها ميس فيرجو
الأنانيه وحب النفس والنفاق .......

Mrs. Virgo
15-01-2003, 10:00 AM
:D مصراوووي . اسمك مكتوب من ضمن العرسان .............
:D بس ما تخفش ماحدش لسه اتكلم على الشبكه ولا المهر ...............

ta3mia
15-01-2003, 11:43 AM
يعني بسنت تسئل و احنا كوخه
بعدين الواد كول بقي انا زهقت و انت عارفه كلها فرقت كعب
واجي اعصرك عصر
و اخليك شاورما

Mrs. Virgo
15-01-2003, 12:46 PM
:D يا شيخه خضتيني .. افتكرتك سألتي ثاني :D
يا رب .. عدي اخر يوم ده على خير ..
ولسه مسكته الواد كوووووووول بحتة شوكولاته ..

:D قال رجاله قاله .. :D ما علينا .. :cool:

ta3mia
15-01-2003, 12:57 PM
انا بقي في مقر الواد كول و شايفه الشكولاته بتخر من بوقه
و بقوله في المنتدي علشان خايفه اقوله في وشه كفايه لغ

بت يا لميس تحبي اسئلك شويه اسئله بايخه
ما هو اخر يوم بقي
.................................................. .................................................. .ززز
يعني انتي بتزوغي من الشغل ....
انتي عارفه لو ما رتديش بصراحه في كول .... و كول بقي قوي وربنا ما يوريقي كول و عمايله

طيب .......
بتزوغي ولا لا
و مش ها قول لحد

Mrs. Virgo
16-01-2003, 06:18 AM
طعميه ..

خلاص .. الأضواء اطفت ..

يعني انتي بتزوغي من الشغل ....
ساعات .. لما يكون عندي حاجه مهمه ..
دوامي من 8 الصبح لغاية 5المغرب ..
وعندي من 1 إلى 2 .. lunch break

ولما يكون عندي حاجه مهمه في الجامعه .. قبل موعد خروجي من الشغل ..
مش باخد الساعة الراحه بتعتي .. علشان أطلع بدري من الشغل وروح الجامعه ...
:mad: أي تفاصيل ثاني ..

ده انتي أسألتك بايخه :D

انتي عارفه لو ما رتديش بصراحه في كول .... و كول بقي قوي وربنا ما يوريقي كول و عمايله
:rolleyes: ربنا أقوى من الجميع .. :rolleyes:

وادكول مش معقول
16-01-2003, 07:34 AM
طعمية ...... :mad: هانم ........... كعب الغزال


موضوع الشوكلاته ده ........... بيني وبين فيرجوووووو
دي مجرد ضريبة يومية عليها ........... شوكلاته سنكرز ....
بمووووووت فيها ومش باحب غيرها

اما بالنسبة موضوع
انتي عارفه لو ما رتديش بصراحه في كول .... و كول بقي قوي وربنا ما يوريقي كول و عمايله


انا مقدرش ...... دي لميس دي طيبة وعسوووووووووووولة ...
( مش عارف بس ازاي تقربلك يا شيخة )


بعدين انتي ايه اللي يجيبك عندنا صحيح ........ اه افتكرت جاية عشان تاخد هدايا ونتائج من عندنا اكمن عندك في الشغل كحيانين ... ههههههههه