المساعد الشخصي الرقمي

مشاهدة النسخة كاملة : تحت دائرة الضوء (2)



محيي ابراهيم
10-01-2003, 04:43 PM
الاعضاء الكرام
عملا بنصيحة الاخ خالد بن الوليد فقد تم تعديل المشاركة بحيث تكون ضيفان في كل مشاركة والضيف الان هو
واد كول مش معقول
وعليكم الان القاء الاسئلة عليه
واسئلتي
1- انت شخص عرفنا عنه انه شديد الايجابية والتواصل مع الاخرين ماذا ستفعل لو تم ترشيحك عضو فعال ( مراقب مصري ) في مفاوضات السلام بين الفلسطينيين ودولة الكيان الاسرائيلي؟
2- فجأة ظهر لك عفريت مصباح علاء الدين وقالك اتمنى امنية واحدة وححققها ليك حالا مهما كانت .... حتتمنى ايه؟
3- ابنك مسك دفتر الشيكات بتاعتك وكتب شيك انت ماضي عليه على بياض وحط رقم مليون جنيه واعطاه للبواب تعمل ايه خصوصا ان البواب ( دكن عليه )؟
محيي

بنت مصر
10-01-2003, 05:17 PM
طيب يا واد كل انا حنكش لك علي اسئلة اخليك تشوف الوان الطيف في عيينك
زي شوية الاسئلة اللي حطيتهم لي :4:

بس لما تجاوب الاول على اسئلة محيي



بسنت

ابن البلد
10-01-2003, 05:21 PM
أسأل بسرعة قبل ما النت كافيه يقفل :D

1- واد كول مش معقول من هو في الحقيقة خارج المنتدي ؟؟
2- الفضل الكبير يرجع لوالدي كلمة نسمعها كثيرا متي تقولها ؟؟؟؟؟
3- لو عرفت أن ابن البلد دخل اللومان بسبب مواضيعك وخصوصا علي مسئوليتي أيه شعورك بس ( بدون ما تقول هبعت عيش وحلاوة ) ؟؟؟؟

aziza
10-01-2003, 06:32 PM
بما انني مشاركة جديدة في المنتدى، ولم اتعرف على كل المشاركين، الا اعز اخت لي heba
1ما اسمك الاول؟
2-ما امنياتك الشخصية لنفسك ولبلدك؟
3_ رأيك الصريح في المنتدى؟
وشكرا لك ا نا متاكدة انك حتكون صريح:confused:

وادكول مش معقول
11-01-2003, 07:17 AM
اخي العزيز الرائع محي ابراهيم .........

( مش تزمر طيب انا داخل اشوف من صيد النهارده في دائرة الضوء الاقي اني انا الصيد وادخل القفص برجلي .........ههههههه)

1- انت شخص عرفنا عنه انه شديد الايجابية والتواصل مع الاخرين ماذا ستفعل لو تم ترشيحك عضو فعال ( مراقب مصري ) في مفاوضات السلام بين الفلسطينيين ودولة الكيان الاسرائيلي؟

بصراحة بصراحة ....... سوف اتنحي عن تلك المهمة ...... لاني مش باحب النفاق ... لان في الحالة دي لازم هنافق الاسرائيلين لاقناعهم بالسلام ... وازاي سلام وانا مش طايقهم من اساسه ؟؟؟
وبعدين بصراحة اكتر لا الاسرائيلين عاوزين سلام ...... ولا الفلسطينيين عاوزينه ... الاسرائيلين عاوزنها دايما حرب مولعة عشان يشغلوا العرب بالفرجة علي اللي بيحصل ونقعد نتلهي في محاولات السلام وهما من الباب الخلفي شغالين في احتكار اقتصاد العالم والتقدم ......
اما الفلسطينيين مش عاوزين السلام من وجهة نظري لسببين ....
الاول : ان كده يبقي استسلام لان بلدهم تبقي بلدين
الثاني: ضياع ُثأر واهدار لدم اطفال ونساء وشيوخ ابرياء ليس لهم ذنب سوي انهم فلسطينيين

2- فجأة ظهر لك عفريت مصباح علاء الدين وقالك اتمنى امنية واحدة وححققها ليك حالا مهما كانت .... حتتمنى ايه؟

لو علي المستوي العام بجد مش تهريج ........ هتمني انه يفوق ناس كتير من غفوتهم ويقفوا معاهم ويساندوهم بدل ما يحاولوا يهدموهم مش هأقولك السلام والوحدة العربية وكلام الشعارات ده ...... لا انا حلمي ابسط بكتير انهم يفوقهم لمواقفهم فقط مع الناس اللي بيحبونا وعاوزين يساعدونا واخرهم ...

عمرو خالد ....... اللي اتمني من الله اني اكون في ربع او عشر قوة ايمانه ... ومش بس حبه لايمانهم وانما حبه للغير اكتر مما يحب لنفسه ..
لان في رأي لو في الامة العربية مش مصر بس 10 عمروخالد لرجعنا لعهد الفتوحات الاسلامية باذن الله ..... ورجعنا نحمد الله ونشكره طبقا لقوله ..

بسم الله الرحمن الرحيم
( إذا جاء نصر الله والفتح ورأيت الناس يدخلون في دين الله أفواجا فسبح بحمد ربك وإستغفره انه كان توابا )
صدق الله العظيم
اما علي المستوي الشخصي ....... اتمني التقرب من الله وتربية ولي عهدي القادم تربية صالحة باذن الله وان يرزقني انا واهل بيتي رزقا حلال

3- ابنك مسك دفتر الشيكات بتاعتك وكتب شيك انت ماضي عليه على بياض وحط رقم مليون جنيه واعطاه للبواب تعمل ايه خصوصا ان البواب ( دكن عليه )؟

هو بصراحة في مشاركة للاخت هبه حكيت موقف مماثل حثصلي شخصيا ... وانا صغير اني اخدت دفتر شيكات والدي وقعدت اكتب فيه ارقام واديها لاخويا ...

واخدت ساعتها علقة سخنة ... ولما رحت اتأسف لوالدي قالي انت عارف انا ضربتك ليه ؟؟ قولتله عشان لو حد خد الشيك ده كنت انت مش هيبقي عندك فلوس تفسحنا وبعت البيت وقعدنا في الجامع ( علي قد تفكيري )

رد قالي لا لو ع الفلوس انا اشتغلت وجبتها وممكن اجيب منها تاني لكن انا باضربك علشان حاجة تانية ...
اولا عشان اخدت حاجة مش بتاعتك ودي تبقي ...............................سرقة
ثانيا عشان كنت بتهرج مع اخوك وبتلعب بيها كأنها......................قمار
ثالثا انت كنت بتصرف الفلوس دي في حاجة مترضيش ربنا وده ........حرام
رابعا انت كنت بتعود نفسك علي عادات وحشة وهي ....................الاسراف


اينعم انا مكنتش فاهم حاجة وكل اللي همني ساعتها اني مش هانزل العب مع اصحابي في الاجازة بتاعت اخر الاسبوع ....... بس بعد شوية وفترة بقيت كل مرة اسأل بابا يعني ايه كذا وكذا .......... وكفاية اني فاكر الحكاية دي عشان ابقي احكيها لابني حتي لو معملهاش عشان تبقي ليه عبرة ...

وبعدين لو اساسا البواب دكن عليه ما هي خربانة خربانة هياخد ايه يعني .....ثم انا معنديش دفتر شيكات اساسا ...........هههههههههههه

وادكول مش معقول
11-01-2003, 07:33 AM
ابن البلد حبيبي ......... انا عارف انك بتحبني ومش هتقرص عليا قوي ... هههههه

قول ..... سمعني ... اشجيني .... قول يل قوال .......هههههه

1- واد كول مش معقول من هو في الحقيقة خارج المنتدي ؟؟

اظن انت واخد بالك اني دايما بأهرج وعلي طبيعتي معاك بس الله العالم ان عندي مشاكل بل مصايب بقالي فيها فترة طويلة بس انا صابر لحد ما ربنا يحلها ومؤمن بان الله إن قدر شئ فهو بمشيئته هو وحده وما هو الا ابتلاء منه او عقاب ........
بس انا مش شايف ان فيه واحد ممكن يقعد فترة مع ناس زي العسل زيكم ويقدر يمثل عليهم كتير ....... فاكيد بالتالي انا ....
واد (رامي ) كول (محمد) مش (محمد) معقول ( احمد) هههههههههههه

2- الفضل الكبير يرجع لوالدي كلمة نسمعها كثيرا متي تقولها ؟؟؟؟؟

تخيل عمري ما قلتها ..... مع ان مثلا زمان كنت بأعيد الواجب 3 او 4 مرات في اليوم عشان مش غلط لا عشان خطي مش حلو او نازل يشرب من البحر ... وساعات يبقي الامتحان درجته 10 من 10 ومع ذلك اتبهدل عشان خطي كان وحش فيه لان بابا خطه فوق الرائع وبيكتب كل الخطوط كوفي واندلسي ورقعة ونسخ .... لدرجة لما كنت في ثانوي دخلت مسابقة الخط علي مستوي الكويت وكانت اول مرة في الكويت ان نفس الطالب يكسب ويطلع الاول علي مستوي الدولة في مسابقة الخط العربي وخطوط الكاريكاتير .... ونفس الشيئ في الانشاء ... وساعتها اخدت جايزتين الاتنين كانو دبل كاسيت باناسونيك استعملت واحد وشايلي واحد لحد دلوقت من سنة 1987 عشان لما ااذاكر لابني ابقي اديهوله واحكيله ...........
كمان مع اني معترف بيها بس انا مش شايف ان ردها يبقي بالكلام .... لان الكلام معلهوش جمرك وهو برضه مش عاوز يسمعها كلام اكيد .... لان ردها بيبقي بر بالوالدين وصداقة معهم لان وانا في سني ده انا لحد دلوقت بانزل اخرج معاه ونتفق اننا نتقابل ننزل نتمشي نقعد في حته كده لاننا اصدقاء كمان .........

3- لو عرفت أن ابن البلد دخل اللومان بسبب مواضيعك وخصوصا علي مسئوليتي أيه شعورك بس ( بدون ما تقول هبعت عيش وحلاوة ) ؟؟؟؟

لا يا جدع عيش وحلاوة ايه ولا اعرفك حتي هههههههههههه
بصراحة انا مش شايف ان اللومان للي زينا اساسا ...... وبعدين يا سيدي هو محمود السعدني اللي قضي نص عمره في اللومان اجدع مننا ههههههه


وبعدين ايه اللي مسهرك في النت كافيه يا واد انت يا واد ........ ماشي وبتقول لام يوسف باعمل الميزانية وقاعد في الشغل .......صبرك عليا

heba
11-01-2003, 07:43 AM
بسم الله الرحمن الرحيم

واد كول موش معقول

1- ماذا تتمنى ان ترزق ولد ام بنت ؟
2-ما اكثر شىء يغضبك و ما اكثر شىء بفرحك؟
3-ماذا لو بقيت رئيس جمهوريه ؟
اختك هبة الله

وادكول مش معقول
11-01-2003, 07:45 AM
اختي العزيزة عزيزة .......
شكرا جدا علي اهتمامك اولا ......
وثانيا انا قبل ما اكون
واد كول مش معقول
انا
واد صريح مش معقول

1ما اسمك الاول؟

الاسم : رامي محمد محمد احمد
السن : 32 مواليد الكويت : 30/10/1970
المهنة : محاسب ( تخصص اوراق مالية وسندات يعني في مجال البورصة ) وحاصل علي ترخيص منفذ عمليات بالبورصة بجمهورية مصر ( بروكر )الحالة الاجتماعية : متزوج وشبه أعول ( هأعول بإذن الله في ابريل )

2-ما امنياتك الشخصية لنفسك ولبلدك؟
اسمحيلي السؤال اجابته انا رديت عليها علي محي ...... وكانت
لو علي المستوي العام بجد مش تهريج ........ هتمني انه يفوق ناس كتير من غفوتهم ويقفوا معاهم ويساندوهم بدل ما يحاولوا يهدموهم مش هأقولك السلام والوحدة العربية وكلام الشعارات ده ...... لا انا حلمي ابسط بكتير انهم يفوقهم لمواقفهم فقط مع الناس اللي بيحبونا وعاوزين يساعدونا واخرهم ...

عمرو خالد ....... اللي اتمني من الله اني اكون في ربع او عشر قوة ايمانه ... ومش بس حبه لايمانهم وانما حبه للغير اكتر مما يحب لنفسه ..
لان في رأي لو في الامة العربية مش مصر بس 10 عمروخالد لرجعنا لعهد الفتوحات الاسلامية باذن الله ..... ورجعنا نحمد الله ونشكره طبقا لقوله ..

بسم الله الرحمن الرحيم
( إذا جاء نصر الله والفتح ورأيت الناس يدخلون في دين الله أفواجا فسبح بحمد ربك وإستغفره انه كان توابا )
صدق الله العظيم
اما علي المستوي الشخصي ....... اتمني التقرب من الله وتربية ولي عهدي القادم تربية صالحة باذن الله وان يرزقني انا واهل بيتي رزقا حلال



3_ رأيك الصريح في المنتدى؟

لو ليا اي اعتراض انا صريح باقوله ومش باخاف ومعني ذلك انه منتدي رائع لاني شايف ان اي غلط فيه جميع الاعضاء بيتعاونوا فيه لاصلاحه وتقويمه بل كمان بيتسابقوا عليه ........ وده اكبر دليل علي روعة وجمال منتدانا .....

وبعدين لو مكنش كده مكنش لم الكوكبة الجميلة من افضل شخصيات العرب مش المصريين بس بغض النظر عن ....... جمال كتاباتهم او حتي رزانة عقولهم وانما الافضل وهو حسن خلقهم ...

وادكول مش معقول
11-01-2003, 08:03 AM
اختي الغالية جداااااااااااااااااااااااااااااااااااااااااااااااا ااااااااااااااااااااااااااااااا هبهوبة

انا هأرد عليكي بصراحة جدااااااااااااااا

1- ماذا تتمنى ان ترزق ولد ام بنت ؟

نفسي في
ولد
يشيل اسمي وأسميه زياد ويزيدني بيه الله نعمه من نعمه عليا وأعلمه ما تعلمته وأكون ليه الاخ والصديق قبل الأب ............

ونفسي في
بنت
تنير لي الحياة وأسميها شهد وتبقي أنقي شهد نلته من الله

يعني نفسي في الاتنين ..

ولكن كل اللي يدهولي ربنا انا راضي بيه وشاكره عليه .... بالمناسبة امبارح كنت باشتري هدوم للبيبي ......... جبت ولادي وبناتي ...... واللي يهديه ربنا ليا يكون ........ ويبقي من نصيبه والنوع التاني يروح لصاحب نصيبه هههههههه

2-ما اكثر شىء يغضبك و ما اكثر شىء بفرحك؟

ما يغضبني هو ما يحزني .................... الظلم

ما يفرحني هو مايرضيني .................... رضي الله وراحة البال

3-ماذا لو بقيت رئيس جمهوريه ؟

مينفعش لاني ربنا كتب لي ان اكون محاسب ولو كنت افهم غيرها مفيش مانع الا لو كانت رئاسة الجمهورية عاوزه محاسبين ...

وبعدين انا ليا هنا كلمة ..... لو بقيت رئيس ....دي مش سهلة ... زي ابسط مثال لعب كورة القدم اللعيب بيبقي وسط 11 واحد وتلاقي اللي بيتفرج بيشتم فيه ويقول انا لو كنت مكانه كنت لعبتها كده او كده وكنت عملت وسويت الهوايل ...
ازاي بقه واحد بيلعب قصاد الملايين ........
وبعدين لكل واحد فكره واسلوبه .... مش اي واحد يعمل ابو العريف ... وانا بصراحة مش ابو العريف ..
ياناس ...... اللي ايديه في النار مش زي اللي ايديه في جيبه

وادكول مش معقول
11-01-2003, 08:08 AM
قرب ... قرب ..قرب ......
باب السلاخنة مفتوح .....

واد كول مشفي وع التقطيع ......

قرب .. قرب .. قرب ...

الرحمة ...............................حلوة برضه


إسألوا في الحنين وبلاش .......... عصر ...فيا

Mrs. Virgo
11-01-2003, 08:20 AM
:D أنا جيتلك ...............

كووول ..........

1) إيه أكثر حاجه بتحبها في عنابه .. وهي إلي خلتك تخترها (بأمانه)؟
2) ممكن في يوم من الأيام ..... تضرب مراتك ؟؟ لو الإجابه بنعم أو لأ .. ليه؟؟
3) حاجه عملتها .... وندمت عليها قوي .. قوي .. ولغاية دلوقتي مش قادر تنساها .. أو تسامح نفسك .. أو تصلح الحاجه دي ؟؟؟


:rolleyes: بس .. شويه وأسأل ثاني :D

وادكول مش معقول
11-01-2003, 08:44 AM
انا بصراحة مكنتش قلقان غير منك انتي واختك ........ ربنا يستر

) إيه أكثر حاجه بتحبها في عنابه .. وهي إلي خلتك تخترها (بأمانه)؟

بصي انا كنت خاطب قبل كده وشفت اسوأ صفات الانسان وهي حب المال والنفس والذات فقط ...... لكن لما عرفت شخص عنابه وهي مع العلم تبقي ابنة اعز اصدقاء والدي وجاره كمان اللي كان معاه في المدرسة من ابتدائي الي الكلية الي العمل مع بعض في الكويت .....
بس مش ده السبب اني لقيت فيه الطيبة وعدم الانانية وارتبطت بيها عن غير حب ولكن عن اقتناع وفي خلال فترة الخطوبة ......... واجهت مشكلة اللي قلت عليها انها ابتلاء من ربنا من شوية .... ومع كل ده وعلي الرغم من انها مش مجبرة علي ذلك وعلي الرغم من صغر سنها كانت واقفة معايا اكتر مما تكون مشكلتها هيا وضحت بكتير من حقوقها انها تنعم بفسح وحاجات كل المخطوبين بيستنوها ..... وده اللي قربنا من بعض وهون عليا ابتلاء ربنا ده وكان ده تعويض ربنا ليا بأنه نورلي السكة بأن دي هيا نصيبي ........ وبعد كل ده برضه وقفت معايا في توابع كتيرة لزلزال ابتلاء ربنا ليا .........

فإزاي بقه ما احبهاش .....
وبعدين علي فكرة انا مؤمن بموضوع ان
من صانتك في محنك
صانتك في عرضـــك

والاهم من كل ده ......... فإظفر بذات الدين ... فهي تصلي ومحجبة من الابتدائي

2) ممكن في يوم من الأيام ..... تضرب مراتك ؟؟ لو الإجابه بنعم أو لأ .. ليه؟؟

تفتكري فيه واحدة بالمواصفات دي تضرب او تعمل حاجة توصلني لضربها ..... وحتي لو عملت اظن مواقفها معايا تشفعلها ...

وحتي لو كانت غيرها ..... فعاشرهن بمعروف او اتركوهن بمعروف ....


3) حاجه عملتها .... وندمت عليها قوي .. قوي .. ولغاية دلوقتي مش قادر تنساها .. أو تسامح نفسك .. أو تصلح الحاجه دي ؟؟؟

الثقة بمن هو من لا اهل لها .....
وسبب مشكلتي اني وثقت بواحد اتخذته اب قبل كل شئ عند اول طوفان صابه رمي الدفة عليا وجعلني كبش فداء ......لينجوا وانا مليش دعوة بحاجة اساسا ... المشكلة انه لو كان طلب مني اي طلب كنت فديته لحبي ليه بس المشكلة انه غدر بيا ......... واتهمني ظلم ........ وحتي لو كان اي اتهام ولو قتل كان ماشي بس لما تتعلق بالكرامة والامانة .......... تفرق ...

Mrs. Virgo
11-01-2003, 08:59 AM
:D كلاكيت ثاني مره ..

ربنا يخليك أنت وعنابه لبعض .. وللبابي .. آمين ..

4) إيه إلي بيضايقك في نفسك ... قوي .. قوي قوي .. ونفسك تغيره .. ومش عارف .. ؟؟؟ ممكن تقول أكثر من حاجه .. :D

5) إيه إلي بيضايقك في
لميس .................. ونفسك تقولها ومش قادر ؟؟؟ (حاجه واحده بس :D)
وفي Miss. Virgo . بس مطنش .. وبتقول وأنا ملي .. :D

خلي بالك (5) سؤالين في واحد .. :D

6) حاجه بتحس أنها نقطة ضعفك ...... قدمها بتتحطم كل إرادتك .. وكبريائك.

خلي بالك .. (6) غير (4) ........ يعني نقطة ضعفك ممكن تكون عنابه .. :D يعني مستحيل تكون الحاجه إلي بضايقك في نفسك .. :D

يلى جاوب ............ :rolleyes: شويه ورجعالك .. :D

heba
11-01-2003, 09:10 AM
بسم الله الرحمن الرحيم

يا كول يا اخى العزيز
ربنا يديلك اللى فى نفسك يارب
و سؤالى الثالث كان بهدف اننا نجيب عيش و حلاوه لأبن البلد0بس لم تعطينى الفرصه يا كول 0
اشكرك يا كول جدا جدا جدا

وادكول مش معقول
11-01-2003, 09:16 AM
انا مش فاهم يا فيرجووو هي دي اسئلة الدور التاني ولا اسئلة المستوي الرفيع ؟ يعني ساقط وده دور تاني ؟ ولا ناجح وبأحسن ؟ هههههه


المهم .........

إيه إلي بيضايقك في نفسك ... قوي .. قوي قوي .. ونفسك تغيره .. ومش عارف .. ؟؟؟ ممكن تقول أكثر من حاجه ..

اولا : التدخين ........... ومش عارف
ثانيا : وده الاهم اجتماعيتي الزيادة مع اي حد اللي هتوديني في داهية لدرجة ان اخويا بيقولي
ان اغنية ...... وانا ويايا باعيش زي المليونرات باحلم وانا ممعيش ملعنش الازمات ........ البيه صاحبي والفقري ......معمولة مخصوص ليا ...........

إيه إلي بيضايقك في
لميس .................. ونفسك تقولها ومش قادر ؟؟؟ (حاجه واحده بس )
وفي Miss. Virgo . بس مطنش .. وبتقول وأنا ملي ..

انا لما بتضايق من حد بقوله علي طول في وشه وبعدين انتي غلبانة ميتزعلش منك ......... وانا شايف ان لميس وفيرجو اطيب واغلب من بعض مفيش فرق بينهم وميتزعلش منهم

حاجه بتحس أنها نقطة ضعفك ...... قدمها بتتحطم كل إرادتك .. وكبريائك.

الدموع .......... من اي حد ومش لازم تكون عنابه

وخصوصا طفل لما اشوفه بيبكي ........... حرمان
( وانا اكتر نقطة ضعفي الاطفال )


ولما اشوف حد بيتألم مش من مرض او داء ...... او حتي زعل

لما اشوفه بيتألم من ظلم ......

او اشوف دمعة انكسار هرم ............. اهمال

وادكول مش معقول
11-01-2003, 09:21 AM
ههههههههههههه لا يا هبهوبة اصل انا وابن البلد روحين في زكيبة ومتعلقين في حبل واحد ........... دي علي مسئوليتي ؟ هههههههه

وع العموم ......... مصر كلها جدعان تجيب عيش وحلاوة من اول .....
حوكة العجلاتي وسرنجة الممرضاتي وسوستة المنجداتي وابونطة القرداتي ...

لحد ...................

اكبر كبير في مصر .......

بجد مصر جدعانها كتير ........... واندلها صفر ع الشمال بالنسبة لجدعنتها حتي لو كان العدد يفرق ههههههههه

Mrs. Virgo
11-01-2003, 09:30 AM
:D كفايه عليك كده النهارده ........... :p

بنت مصر
11-01-2003, 10:57 AM
واد كول مش معقول

أجب عن الاسئلة التالية




1- ما أول ما ستفعل لو عينت حاكما على
-الدول العربية
- مصر
- أمريكا


2- ما هي الصفة التي تكرهها في واد كول وما هي التي تحبها فيه


3- شخص واحد فقط تحب كتاباته في المنتدى وشخص تضحكك كتاباته وشخص تبكيك كتاباته ولماذا



بسنت

وادكول مش معقول
11-01-2003, 11:44 AM
اهلاااااااااااااااااااااا انتي جيتي يا بسنت .....

فاكره لما قولتيلي من كام يوم اشوف فيك يوم .........

اهو جه يا ختي ........... ويوم ايه ولا اي يوم ........

============



1- ما أول ما ستفعل لو عينت حاكما على

مع اني قلت قبل كده اني ما انفعش بس هأرد عليكي علي طريقة واد كول وعي مسئوليتي ؟؟
-الدول العربية
طبعا مستحيل انهم هيتحدوا ويبقي ليهم رئيس واحد الا في حالة واحدة وهي ان كل الناس تموووووووووووت وميفضلش غير ابقي ساعتها الرئيس
بس ساعتها مش هاقولك الغي الحدود لا الغي الجنسيات ولا تقوليلي مصري ولا ليبي ولا كويتي ............ تبقي الجنسية موحدة وتسمي بالجنسية العربية

- مصر
وده طبعا اكتر استحالة ....... وبلاش اقول ليه عشان الرقابة واوعي ايدك والرموت كنترول يا واد يا ديجيتال .....هههههبس ساعتها هالغي موضوع قروض البنوك .. الا ان تكون القروض محولة من الشئون الاجتماعية يعني للمحتاجين فقط ...... وبدل ما بنديها لغير مستحقيها وينهبونا ...... وتروح الفلوس علي الدولة وتبقي قضية نهب اموال عامة واموال الدولة هاخلي الحكومة تنفذ المشاريع اللي كانت القروض دي متخده بحجتها علي طول وربحها يرجع للبلد نفسها ويعم الخير علي البلد والناس والبلد تنتعش بقه

- أمريكا
بجد بجد رابع المستحيل ...... عشان ما اعرفش ابقي منافق وبوشين ..
بس لو حصل ..... هأعدل في اغنية الحدوته العربية بتاعت محمد منير واخليها

اصل الخواجة ابن مريكا لما بيدخل حواريكا يا اما يخدك في بطاطه يا اما يا ابني ( هيأذيكا تبقي ) يبوس اياديكا


2- ما هي الصفة التي تكرهها في واد كول وما هي التي تحبها فيه
انا باكره ضعفي من مواجهة الشخص البجح وجها لوجه ( بغض النظر عن صراحتي في المنتدي بس وجها لوجه تفرق ) مش خوف منه والله بس ..... خجلا لا ساعتها بالذات يبطل بجاحة ويستحي ... وبرضه حياء عليه ...... لان مش دي صفات العربي المسلم الاصيل انه ينسي احدي صفات المسلم الا وهي الحياء .......

لكن صفات احبها في نفسي ........ من غير مجاملة وان اي حد بيحب نفسه بس انا باحب ان ربنا وهبني العطف علي اي مسكين حتي لو كان اكبر الطغاة بس لحظة ضعفه وانكساره باعطف عليه ....... مش لازم بفلوس او مساعدة ... بس كفاية ولو بالكلمة الحلوة او المواساة

-شخص واحد فقط تحب كتاباته في المنتدى وشخص تضحكك كتاباته وشخص تبكيك كتاباته ولماذا

مينفعش احب شخص واحد في كتاباته ..... لان المنتدي مليان بالكتاب ...في اكتر من مجال

السياسة .......... .... باحب .... هبه
المقال والحوار ...... باحب ..... محي / شمس
النقاش .......... ....... باحب ..... ابن مصر / بنت مصر/ خالدبن الوليد / محمد علي
حوارات السخرية ... باحب ..... طعمية / مصراوي
كلام النواعم ......... باحب ..... فيرجو / ميللي
الشعر والادب ........ باحب .... فنان / ماستر / ومؤخرا انضم روامي وجمال حمدان


اما تضحكني كتاباته ...........

لكل عضو مواقف ومواضيع تضحك حتي لو كانت جدية بيكون الضحك علي روحه الحلوة ......
لكن ابن البلد ............ بالتحديد باضحك علي كل كلامه حتي لو جد .... اينعم مابيتكلمش جد بس واد فقري ............ ههههههههه ساعات باحس انه تايه ...

mogah
11-01-2003, 12:35 PM
الواد الكول اللي مش معقول .. صاحب لسان زى المبرد .. و دماغ كلكوليتر .. أكتر واحد بيضحكنا و يضحك
على همنا و همه ... ليه يا ترى انت حزين ؟؟؟
الدنيا علمتني ان اللي بيضحك كتير همه أكتر ( انت زوج و ان شاء الله ح تكون أب و ناجح في شغلك - مجرد توقع - و ععايش يومك ) ايه اللي ناقصك ؟؟
ممكن تعتذر عن الأجابه بما ان الصراحه ما بتأكلش عيش في الزمن دا
أقصد عيش حاف .. لكن ممكن الصراحه تأكلك عيش و حلاوه ;)

mogah
11-01-2003, 12:46 PM
حاجه تانيه بما انك ذكرت الفنانين
ايه رأيك في ( لو كنت شفتهم يعني )
- الملك هو الملك ........... محمد منير
- ماما أميركا ............. محمد صبحي
- ولاد الشوارع .............. على الحجار
و ايه رأيك في الديوقراطيه ..على رأى محمد صبحي الحكومه بتسيب كل واحد يقول اللى هوا عاوزه و هيه
كمان ما بتسمعشي الا اللي هيه عوازاه

modyhop
11-01-2003, 12:48 PM
بداية أحب أسجل إعجابي الشديد بيك وبمشاركاتك الشيقة الممتعة

كنت أحب أسأل عن حاجات كتير بس للأسف معلوماتي قليلة عنك وعن الأعضاء كلهم
وكنت قرأت مرة من أحد الأعضاء إن ياريت نرعف معلومات ولو بسيطة عن العضوــ تحت الإستجواب ــ حتى يتيسر لنا ــ الأعضاء الجدد ــ عرض الأسئلة وزيادة الروابط الإنسانية بين أعضاء المنتدى ....

وادكول مش معقول
11-01-2003, 01:05 PM
موجه شكرا جدااااااااااااااااااا ليك ؟؟؟


صاحب لسان زى المبرد .. بس مبرد ظوافر والله مش حدادي ههههه
و دماغ كلكوليتر ......... بس كاسيو ديجيتال لو سمحت ههههههه


أكتر واحد بيضحكنا و يضحك
على همنا و همه ... ليه يا ترى انت حزين ؟؟؟

انا مش حزين علي طول ......... بس انا مهموم ..... بمضوع لمحت عنه قبل كده ربنا ابتلاني بيه ..... بس جالي في سن مش سني وكبرني قبل اواني انا مشكلتي بدت يوم 3/1/2001 ولسه معايا لحد دلوقت ..... وان شاء الله يوم ما ربنا يظهر الحق هاحكيلكم الحكاية بالتفصيل بس ملخصها اني خسرت حاجات كتير وخسرت اهلي مبالغ كتير قوي قوي قوي بسبب اني مرضيتش اشهد شهادة زور بحكم وظيفة كنت فيها ......... والحمد لله ان اهلي وزوجتي عارفين انا مين ؟ وتربيتي ازاي ؟ وصدقوني ووقفوا جنبي وما زالوا ......
ومن يومها وانا باضحك.....
ولان فيه مثل بيقول اللي يشوف بلوة غيره تهون عليه بلوته ...... واكيد ان بلوتي مش هيا اخر الدنيا ورحمة ربنا واسعة وعدله فوق رقاب الكل ..... بس هو اللي امرنا بالصبر ............. لحين ان يشاء ....


الدنيا علمتني ان اللي بيضحك كتير همه أكتر ( انت زوج و ان شاء الله ح تكون أب و ناجح في شغلك - مجرد توقع - و ععايش يومك ) ايه اللي ناقصك ؟؟

ناقصني راحة البال من هم صابني مليش فيه ذنب غير اني كنت علي حق...
ناقصني احس احساس الامان من غدر البشر اللي افتقدته من 739 يوم ...
ناقصني ما اتمناش الوحدة مع نفسي عشان ادوق حلاوة اللمة بالناس ...
ناقصني نعمة ربنا عليا بالرحمة قبل ما اضعف وافقد نعمته عليا بالصبر ...
واخيرا ........
ناقصني رؤياكم .....................

وربنا يجعله عامر ....... ههههههههههههه

ممكن تعتذر عن الأجابه بما ان الصراحه ما بتأكلش عيش في الزمن دا
أقصد عيش حاف .. لكن ممكن الصراحه تأكلك عيش و حلاوه

بالعكس الصراحة ممكن ما تأكلش العيش الحاف لو انت مش علي حق ......
بس تأكلهولك لو علي حق ....... وحتي لو كان متغمس بحلاوة الصبر

وادكول مش معقول
11-01-2003, 01:18 PM
اه ده انا وقعت ولا حدش سمي عليا بقه ...........هههههه

ايوه يا موجه ................. قول

- الملك هو الملك ........... محمد منير
طبعا شفتها وعلي فكرة انا دخلتها مسرح 6 مرات ........... كل ما حد كان يعوز يشوفها مياخدش غيري عشان متأكد اني مش هاقول لأ لاني من عشاق صوت محمد منير حتي لما غني في فيلم حكايات الغريب الطشت قاللي هههههه . المهم الملك هو الملك من اروع ما قدم المسرح القومي ودي كانت بداية الديمقراطية في مصر ........ بس الديمقراطية المدارية وراء مسمس الاستعارة المكنية هههههه

- ماما أميركا ............. محمد صبحي
رائعة جدا ....... ودخلتها في اول عرض ليها علي قصر النيل .... وكانت تشبيه رائع لمحاولة امريكا المستمرة لغسيل مخ العرب ...... وامتلاكهم ..
- ولاد الشوارع .............. على الحجار
شفتها طبعا لان حبي لمنير ما يقلش ان حبي لروعة صوت علي الحجار بس دي بقه فيديو ........ سخرية من مجتمع غررررررررررررررررررررريب ما بعترفش لحد دلوقت بمبدأ المساواة والتفرقة بين الطبقات ...

و ايه رأيك في الديوقراطيه ..على رأى محمد صبحي الحكومه بتسيب كل واحد يقول اللى هوا عاوزه و هيه كمان ما بتسمعشي الا اللي هيه عوازاه

وانا اقدر اكدب صبحي .........

ما احنا كلنا بنناشد الحكومة وبنعترض علي رجوع عمرو خالد
( اهم سايبنا نتكلم بحرية واخر تمام والديمقراطية موجودة )
والحكومة مش سامعاك ولا سامعه نداك
( اهي مش سامعه عشان مش عاوزه )

هههههههههه والله شكلكم هتسجنونا باين كده ههههههههه

وادكول مش معقول
11-01-2003, 01:23 PM
كاتب الرسالة الأصلية : modyhop
بداية أحب أسجل إعجابي الشديد بيك وبمشاركاتك الشيقة الممتعة

كنت أحب أسأل عن حاجات كتير بس للأسف معلوماتي قليلة عنك وعن الأعضاء كلهم
وكنت قرأت مرة من أحد الأعضاء إن ياريت نرعف معلومات ولو بسيطة عن العضوــ تحت الإستجواب ــ حتى يتيسر لنا ــ الأعضاء الجدد ــ عرض الأسئلة وزيادة الروابط الإنسانية بين أعضاء المنتدى ....

انا كنت احب انك تشارك بس بما انك ....... متعرفش حاجة عني ......
وبما اني ما اقدرش اتكلم عن نفسي غير معلومات البطاقة الشخصية ....

بس ممكن من كلامي اللي فات تعرف ولو جزء عن شخصيتي ....... ولو عاوز جزء تاني او استفسار ......... اسأل اي من الاعضاء اللي يمكن يكونوا فهموني .....
عن اي حاجة تحب تعرفها وانا في انتظار اسألتك .......... في اي وقت

محيي ابراهيم
12-01-2003, 05:34 AM
رامي محمد محمد احمد
اسجل اعجابي فقط في نبل وطيبة شخصك الكريم الذي لم اعرفه عن قرب الا هنا في هذه المشاركة
اضاء الله حياتك وملا قلبك بالاطمئنان وهدوء السر والسريرة مع اهل بيتك ومحبيك
محيي

master_of_hell
12-01-2003, 06:10 AM
معلش يا واد كول جيت متأخر بس والله ظروف
بس خدلك سؤلين كده على الماشى
واد كول دينمو المنتدى والضحكة الحلوة الى فيه
امتى تهرب من مواجهة رغم انك عارف انك على حق ؟

امتى تفقد اعصابك لدرجة انك تفقد السيطرة على نفسك؟

وامتى اتخذت قرار وندمت عليه ؟

وادكول مش معقول
12-01-2003, 06:43 AM
كاتب الرسالة الأصلية : محيي ابراهيم
رامي محمد محمد احمد
اسجل اعجابي فقط في نبل وطيبة شخصك الكريم الذي لم اعرفه عن قرب الا هنا في هذه المشاركة
اضاء الله حياتك وملا قلبك بالاطمئنان وهدوء السر والسريرة مع اهل بيتك ومحبيك
محيي


اخي العزيز جدااااااااااا محيي ابراهيم

اشكرك علي مجاملتك الرقيقة جدا ........ وانار الله طريق جميع المسلمين

وادكول مش معقول
12-01-2003, 07:11 AM
ماستر باشا ........... ياعم انا قاعد مستنيك والشاي برد وفحم الشيشة انطفي ..
بس ولا يهمك ........؟
دور شاي تاي يلا يا حمووووووووو وولع ع الفحم ......

قول ياعم ........

واد كول دينمو المنتدى والضحكة الحلوة الى فيه
امتى تهرب من مواجهة رغم انك عارف انك على حق ؟

انا باهرب من مواجهة زي دي في حالة ممن الاتنين ...

الحالة الاولي : اني اكون معنديش الحجة والدليل علي اثبات ذلك ..... وخصوصا في المواضيع الدينية والعلمية ,,,,,,, بس مش خوفا لا اطلع مش علي حق ... بس خوفا ان لو تم عمل نقاش وانا معلوماتي قليلة ...... ينتصر الباطل بحجته عليا ..يعني باختصار علي سبيل المثال ..... انا عارف ان الصلاة واجب وفريضة ... بس نفرض اني مش عارف ليه ؟ او ايه سبب ان ربنا فرضها علينا ؟ وقعدت في مكان ولقيت واحد بيناقش ان الصلاة سنة ؟ هاقول انها فريضة بس لو اشتدت المواجهة اخاف هنا بقه ؟ لا ن حجتي ضعيفة وبالتالي انا اللي بمكن الباطل انه ينتصر .....
بس في الحالة دي بافضل ورا الحاجة لحد ما اجيب المعلومات الكافية لمواجهة هذا الباطل ..
الحالة التانية: ان يكون الحق ده مش علي حق ......... بمعني مش هادخل في مناظرة او حوار او نقاش عن شيئ ...... حرام او مكروه ...... وانا عارف انه من اصله حرام ... وحتي لو انا علي حق بس حق في الحرام ....... مش هاقدر اواجهه لان عارف ان الموقف من عمل الشيطان واكيد معاه حجته اللي تنصره في موقفه .


امتى تفقد اعصابك لدرجة انك تفقد السيطرة على نفسك؟

انت عارف ...... انا تقريبا لو حسبت عمري كله هتلاقيه 32 سنة ......
تخيل ان عمري والحمد لله ما اتخانقت في حياتي ...... لا في مدرسة ولا في شارع ولا في اي حته ......... حتي خناقي وانا صغير مع اخويا ..... كان كبيره بالكلام والزعيق ..... بس موضوع مد الايد ده عمره ما حصلي ........ وكل اصحابي في الكلية ايام خناقاتهم الهبلة وكده ..... كانوا بيقولوا اني ابرد خلق الله وعشان كده سموني واد كول مش معقول ...

لحد ما في يوم ...... تحققت نظرة والدتي فيا .......لانها كانت من زمان بتقول ان رامي ده هو اللي بينطبق عليه اتقي شر الحليم اذا غضب .....

اليوم ده كان ....... ان بالصدفة .......
سمعت ناس مقربين جدا جدا ........جدااااااااااااااااااااا
بيغلطوا فيا ....................................قولت الله يسامحهم ....
غلطوا في اخويا ............................. برضه الله يسامحهم ...

اكيد احنا عشان صغيرين يبقي احنا غلطانين ....... مع ان الموضوع يتلخص في انه حقد وحسد علينا وبس مش اكتر ...

بس بقه ....

الغلط وصل في تجريح في والدي ووالدتي ......
وكان الغلط لمجرد فقط................................... ووالله من غير كدب

ان ازاي اننا اتربينا كويس ..... وازاي احنا ( انا واخويا ) بنحب بعض ...

ده بخلاف الموضوع بتاع المشكلة اللي عندي ............. اللي هابقي احكي عليها لما ربنا يحلها ........

وامتى اتخذت قرار وندمت عليه ؟

القرار الوحيد اللي ندمت عليه في حياتي ..........
كان قرار خطوبتي الاولي ...... مع علمي بإ عتراض اهلي عليها في الاول ...
ومع علمي من حبها لنفسها وانانيتها الكبيرة ...... وده من اخوها وابن خالتها اللي كانوا اعز اصدقائي وقتها ..... وصرحولي بالموضوع ده لحبهم ليا ......

الا اني لغيت العقل ......... وسيبت القلب هو اللي يتكلم .....
بس الحمد لله ان ربنا خلاني مريت بالتجربة دي علشان اعرف حب الله ليا بتعويضه ليا بزوجتي .......