المساعد الشخصي الرقمي

مشاهدة النسخة كاملة : ابن البلد علي كرسي التعارف



الصفحات : [1] 2 3

أم أحمد
20-07-2005, 03:31 PM
السلام عليكم ورحمة الله وبركاته

اخوتي في الله اعضاء ومشرفين ابناء مصر يسرني اليوم ان اعلن عن خبر جميل الا وهو
جلوس مؤسس منتدي ابناء مصرابن البلد علي كرسي التعارف وهو الحمد لله قد وافق علي ذلك بكامل اردته :d يعني مفيش اي ضغط عليه ولا حاجة وده معناه انه ذو صدر رحب وسوف يتقبل جميع الاسئلة التي سوف تعرض عليه من قبل الاعضاء والمشرفين


اخوتي ارجو منكم عدم الاكثار من الاسئلة والا يزيد عدد الاسئلة في كل مشاركة عن 5 اسئلة حتي يتسني لاحمد ان يجيب عليها كلها ونعطي لغيرنا ايضا المجال لذلك
واطلب منكم ايضل عدم وجود احاديث جانبية في الموضوع بمعني ان يقتصر الموضوع علي توجيه الاسئلة لاحمد ويقوم احمد بالرد عليها وذلك للحفاظ علي رونق الموضوع وجماله وعدم خروج الموضوع عن الهدف الاساسي له


اتفضل يا ابن البلد علي الجلوس علي كرسي التعارف ومده الجلوس هي اسبوع ان شاء الله سوف تبدا من اليوم الي يوم الثلاثاء المقبل ان شاء الله ويمكن لك ان تجاوب علي جميع الاسئلة واللي مش عجبك ما تردش عليه وتجاهله تماما بس ما تزودهاش اوي وما تردش علي كل الاسئلة وتقول لا تعليق :d

أم أحمد
20-07-2005, 03:36 PM
بسم الله ابدا انا بقي

بطاقتك الشخصية لو مفيهاش رخامة؟

من هو ابن البلد ؟

ما هي اوجه الاختلاف والشبه بين ابن البلد واحمد ؟


كفاية كده المرة دي بس هارجع تاني ما تقلقش

حسام عمر
20-07-2005, 03:39 PM
لماذا دئما ارئك حاده؟؟؟؟؟؟؟؟؟

ابن البلد
20-07-2005, 04:29 PM
في البداية أشكر قمر الليل علي الموضوع وعلي إختياري
مش عايز أقول أن الموضوع مكرر كالعادة :d
بس هقول أن الموضوع فكرني فكرة تحت دائرة الضوء اللي معمول لها قاعة بالمنتدى هنا وكانت من أجمل المواضيع اللي عرفتنا علي بعضنا البعض
وبالفعل كان لابد من إحيائها من جديد ولهذا أشكر قمر الليل مرة آخري علي هذه الفكرة

نبدأ بقه الإجابة


بطاقتك الشخصية لو مفيهاش رخامة؟
أحمد صلاح الدين حامد
مواليد 1978
العمر يعني 26 سنة
متزوج
عندي ولد وبنت
يوسف 3 سنوات وبسنت مكملتش لسه سنة

من هو ابن البلد ؟
مشرف عام منتدى لؤلؤة المشرق العربي :: مصر ::

ما هي اوجه الاختلاف والشبه بين ابن البلد واحمد ؟
الحقيقة فيه أختلافات شويتين تلاته
في الحقيقة أحمد صلاح بيهزر كتير ومرح كتير و بقدر أهزر وأتريق براحتي وأقول كل اللي في نفسي بدون ما أرجع لقوانين المنتدى أو شروط المنتدى ;)
ابن البلد أغلب الردود جادية وحازمة يمكن علشان ميبقاش فيه أو زي ما بنقول في العامية
إذا كان رب البيت بالدف ضاربوا فما شيمت أهل البيت إلا الحاجات بقه
وده مأثر عليا في ردودي وبيضايقني كتير أني مش قادر أرد براحتي خصوصا علي بعض المواضيع اللي بتكون يعني خلاص الآفيه حكمت فيها :d
حرقة الدم اللي بتحصل لابن البلد بتأثر بشكل مباشر علي حياتي
لكن عمر ما كان مزاجي الرايق بيأثر علي ابن البلد في المنتدى يمكن العكس آه لكن بالشكل ده لأ

أوجهه الشبه كثيرة جدا
ومش هقدر أتكلم عليها علشان هحس أني بشكر في نفسي :d

*7*
منتظر باقي الأسئلة
:)

ابن البلد
20-07-2005, 04:34 PM
لماذا دئما ارئك حاده؟؟؟؟؟؟؟؟؟
أصل الموضوع مبقاش محتاج تهريج يا حسام
ولو انا تهاونت شوية الموضوع هيسرح مننا ومش هنقدر نسيطر علي الشكل العام بعد كده وهيبقه فيه مدبحه زي مذبحة دموع القلب لو تتذكر

حسام عمر
20-07-2005, 04:41 PM
من تحب فى المنتدى ومن تكره؟؟؟؟؟؟؟؟؟


مش اشخاص لكن افعال

أحمد ناصر
20-07-2005, 04:46 PM
1- ما أكثر ما يضايقك فى المنتدى
2-لماذا يعتبر المنتدى من أجمل المنتديات
3-ما هو أكثر شيء إفتقدته فى مصر عندما كنت مقيما فى ألمانيا
4-من هو أكثر عضو زعلت لما ترك المنتدى من الأعضاء القدامى
5-بتحب مين أكتر إبنك يوسف أم بنتك بسنت ؟

عصفور الشعر
20-07-2005, 04:47 PM
أتمنى أن يتسع صدرك يا أحمد لأسئلتى .........أتمنى..........أتمنى...فقد يبدو بعضها مستفزا بعض الشئ ... ولكن ما دفعنى للجراءه فى سؤالك ..هو تيقنى التام من تحضرك..وتفتح ذهنك......ورحابة صدرك


كيف جاءتك فكرة أختيار اسم(( ابن البلد ))...وهل كان هناك أمامك خيارات اخرى غير هذا الاسم... والذى هو مميز فعلا من وجهة نظرى الخاصه؟




كيف تدير المنتدى..من الناحيه السياسيه والادرايه..((ديموقراطيه ..دكتاتوريه .. الخ الخ))؟





أحيانا أشعر أنك تحرج البعض بردودك ..فلماذا هذاالاسلوب.. خصوصا أنك تأصل لذلك الاسلوب ..دعو بطريقه غير مباشره الاعضاء

لأنتهاجه..تبعا للمقوله الشائعه ((اذا كان رب البيت بالدف ضاربا..ف..........))




هل كنت تتوقع هذا النجاح الباهر للمنتدى ((ما شاء الله)) مع أولى خطواتك نحوه انشاؤه انت والزملاء الاعزاء؟




هل ندمت من قبل على قرار أتخذته بحق عضو معين من حيث الغاء عضويته . ولك ان تحكى بالتفصيل أو تجيب باقتضاب؟



من هو فى رأيك أفضل عضو منذ تم انشاء المنتدى وحتى الان..((يعنى زى عضو القرن كده ههههههههههه))




ماهى أصعب لحظات حياتك؟




عضو تملك الشجاعه الكافيه انك تقوله ((انا حاطك فى دماغى ووجودك فى المنتدى رغم انفى ))



ماذا تفهم من هذه العباره ((اللعنه لا تصيب الا العقلاء)) وهل تعتقد فيها كونها مقوله صحيحه أم خاطئه؟




عايزين بقى سبق صحفى يا عمده ههههههههههههه ...ممكن نعرف ما هو الجديد فى جعبة الادراره للمنتدى ..يعنى مفيش مفاجات ساره كده؟


واخيرا أرجو ان تسامحنى اذا كانت بعض أسئلتى قد حملت بعضا من الاستفزاز معلش اعذرنى عرق الصحافه نقح على .. واوعدك راجعلك تانى .. دا ما صدقت انك جلست عهلى الكرسى ده ههههههههههههه


عصفور الشعر :توت

mad boy
20-07-2005, 06:10 PM
اده اده

نصيحه صغنيوره ليك يا احمد ابعت رساله خاصه لكل واحد من المشاركين انك هتلغى عضويتو لو ما مسحش الاسئله الصعبه دى
ههههههههههههههههههههههههههههههههههههههههههه

ولا اقولك امسح الموضوع ههههههههههههه

ليا رجعه مع اسئله حلوه

عـزالديـن
20-07-2005, 06:13 PM
ألف شـكر للأخت الفاضلة قمر الليل على الموضوع الرائع

مع اطيب تمنياتى بدوام الإستمرارية

لقد كفانى الأخوة والأخوات طرح مزيد من الأسئلة على المشرف العام

وهدية منى لكم هذا الكرسى لعله يكون مريح للضيف

http://members.lycos.co.uk/egyptsons3/up/chair00.gif

ولكم جميعاً وافر التحية والتقدير

daria
20-07-2005, 08:51 PM
وانا كمان وانا كمان

عايزة اسأل وكدة



مبدئيا شهادة حق

انا اول ما دخلت المنتدى كان ابن البلد بيساعدني جدا

لأني ببساطة ماكنتش اعرف ازاي حتى احط رد

فبصراحة كان اول عضو يقف جنبي

وبعدها عرفت انه المشرف العام

فحسيته يااااااااااااه منتهى التواضع والاخوة*15*

بعدها بدأ الشغل



وقلت دة زعلان مني وبقى يكرهني

وعرفت بعدها ان دة اسلوبه العادي انا بس اللي كيكي شوية وعرفت ليه دلوقتي اسلوبه الحاد

وهوه عليه مسئولية كبيرة ………. الله يعين . *3*





ودلوقتي الاسئلة

(حتلاعب على قمر الليل حادخل ميت مرة وكل مرة بخمس مشاركات هههههه)



1ـ هل في رأيك ان افضل كل عضو يقول رأيه في المنتدى بمنتهى الصراحة وينقد … ولا كلنا نشكر في المنتدى وندفن رأسنا في الرمال كأن مفيش عيوب

لو اخترت النقد …… يا ترى ايه شروطه واسلوبه المُرضى او الصحيح ؟

ولو اخترت عدم النقد ( ودة نسبته قليلة ) ليه ؟



2ـ هل مع الوقت اكتسبت خبرة انك تعرف فورا اذا كان العضو كويس ولا لأ ،، ولا لسه في اعضاء بيفاجئوك ؟



3ـ ايه حدود سرية الادارة عندك ؟ يعني ايه اللي المفروض كل الاعضاء يعرفوه وايه لأ ؟



4ـ حاسألك سؤال رخم شوية ….. مين الاعضاء اللي تحس انهم مشرفين والمشرفين اللى تحس انهم اعضاء عاديين ؟؟



5ـ انك تكون المشرف العام على منتدى ناجح زي ابناء مصر بسم الله ماشاء الله ……. اضاف ايه لحياتك ؟؟





ملحوظة هاااااااااااااااااااااااااااااااااااامة جدا جدا : كنت لسه حارد على موضوع عجبني جدا ولقيتك كاتب انه مكرر

النقطة دي بقت سمعة فيك هههههههههههههههه :d

خد بالك منها :)

ومن فضلك بعدها تحط اللينك القديم

معلش يعني ههههههههههه :d



طبعا دي مش كل الاسئلة بس حبيت اشارك مؤقتا :)



ربنا معاك في الاجابات …… دعواتي

إيمان

mad boy
20-07-2005, 09:45 PM
اسالك شويه اسئله مممممممممممم نص نص:

هل تقبل التحدى بسهوله و لا.

هل هناك اعضاء تحس فعلا انهم من اخواتك--من هم--

اذا احد اغضبك على المنتدى فما تصرفك تجاه ذلك الشخص--ياريت بصراحه--

هل تعلم اولادك ازاى يدخلو النت علطول ولا هتسبهم يكتشفو بطرقهم الخاصه..

واخيرا لو اغضبك احدهم هل تاخذ غضبك الى منزلك؟

شوفت ازاى الاسئله سهله...................

n3na3aah
20-07-2005, 11:41 PM
طيب بما انك احمد بقه البوس الكبير اعد علي الكرسي و انت عارف يا احمد ان نعناعه غلسه و تنحه و بتحب تغتت فا حسالي كام سؤال اشمعنه يعني الباقي هراك اسئله
1- ازاي بتوفق بين شغلك و بين مسؤوليه المنتدي و هيه مسؤوليه كبيره

2- ابن البلد الاب او احمد الاب يعني اب صارم ولا بتتبع انهو اسلوب بالظبط

3- مين اكتر الاعضاء الي انت ممكن تاخد بارائهم يعني بيعجبك ارائهم و مين اكتر الاعضاء الي بتحس انه عامل حس كده للمنتدي

كفايه عليك كده عشان بقيت الاسئله الي عايزاها العضاء كتبوها

الصعيدي
21-07-2005, 05:51 AM
ياااااااااااااااااااااه .. موضوع جميل جدا يا قمر الليل .. أخيرا هنستفرد بابن البلد ونخليه يعترف
أحمد صلاح .. تقسم بالله العظيم انك تقول الحق .. كل الحق .. ولا شيء غير الحق ؟؟ ......... ههههههههه
طبعا أنا هانتهز فرصة معرفتي الزائدة بيك .. وأسألك في حاجات ما يعرفهاش بقية الأعضاء .. ;) .. ههههههههه .. اطمن .. أنا مش شرير للدرجة دي .. نخش في الموضوع .. طلع ورقة واكتب عليها اسمك
- أحمد صلاح .. ياترى كان إيه طموحك في 2002 لما افتتحت المنتدى .. وإيه طموحك دلوقت ؟
- كام عضو من أعضاء المنتدى تعرفهم معرفة شخصية ؟
- هل المنتدى مصدر سعادة لك .. وللا مسبب لك مشاكل ؟
- حاجة شايف انها جديدة بينفرد بيها منتدى أبناء مصر ( غير عضويتي طبعا ) .. هههههههههه
- هل لديك أقوال أخرى ؟؟؟؟؟؟؟؟؟؟؟؟؟؟؟؟؟؟؟؟؟؟؟

أما أنا فسعدت جدا بانضمامي للمنتدى .. وتعرفي على أحمد صلاح .. وحبي وتواصلي مع أعضاء كتييييييييير في هذا المكان الجميل .. فلك كل الشكر يابو حميد *8*

بسمة أمل
21-07-2005, 07:43 AM
بسم الله الرحمن الرحيم
صراحة شوية اسئلة ما حصلتش:d
اسأل انا بقى:
يا ترى ايه اسعد يوم مر عليك فى المنتدى ومش قادر تنساه ابدا (او مرحلة معينة)؟
بحس دايما فى اسلوبك بالصراحة يا ترى الصراحة دى بتسببلك مشاكل فى حياتك ؟
ايه الحاجة اللى نفسك تضيفها للمنتدى او لموقع ابناء مصر بشكل عام؟
المشكلة انى ما بعرفش اقول اسئلة *7* فهفكر وارجع تانى ان شاء الله

أنفـــــال
21-07-2005, 02:40 PM
يااااااااااااه يا أحمد..
دة انا كنت ناوية اسألك اسئلة كتير.. بس لقيت ان في أسئلة أحلى ..:)
بانتظار مرورك يا ابن البلد .. و هاستنى ردك على الاسئلة ..
خد الوردة دي.. :f2:

boukybouky
21-07-2005, 05:31 PM
يا نهار أبيض !!!!!!!!!!! انت هتلحق تجاوب إمتي يا أحمد ؟؟؟؟

ده أنا ما صدقت قلت فرصة أنا كمان أطلع اللي جوايا و أسأل ههههههههههه

بس ديه الأسلة ماشاء الله كثيرة جداً طيب ... معلش بقي أسأل سؤال واحد

بالرجوع بذاكرتك إلي الوراء هل كنت ستفعل و تمضي في نفس الطريق ذاته

أم كنت ستفضل إختيارات أخري في حياتك؟؟؟ و ما هي؟؟؟؟

لي عودة بس لما الجو يهدا شوية ههههههه ربنا معاك يا ابن البلد

في رعاية الله ،،،

aynad
21-07-2005, 07:27 PM
انا حسألك سؤالين يا ابن البلد بس مش عارفة اذا كنت حترد عليه ولا لا

** هل كان في حب ما بينك و ما بين زوجتك قبل الجواز ؟؟؟
** هل توافق ان زوجتك تشارك في المنتدي ؟؟؟

جنان الفردوس
21-07-2005, 07:35 PM
يا جماعة ابن البلد هرب..
اختفى منذ يومين في ظروف غامضة..
انتوا فاكرين انه هيجاوب على ده كله..
أنا مش هسأل غير لما أشوفه فين الأول..
وأتفرج عليه وهو بيجاوب..
..
تحياتي لقمر الليل..*8*

م. بسمة
21-07-2005, 10:46 PM
السلام عليكم ورحمة الله وبركاته

صدقا أشفق عليك من تلك الأسئله وفي انتظار الاجابات حتى نتمكن من السؤال كما يحلو لنا ...
وثق يا ابن البلد أن الجميع لن يُفلت تلك الفرصه الذهبيه :)

دمتم بخير جميعا ودمتم أخوه في الله.......
خالص تحياتي لقمر الليل.......

على درويش
21-07-2005, 11:08 PM
ابن البلد
انسان تمنيت لو تعرفت عليه منذ فترة طويلة
رجل بكل معنى الكلمة
أحبه رغم أننى لم ألتق به شخصيا فقط حدثته عبر الهاتف

اتابع كم الأسئلة التى طرحت من اخوانى وانتظر اجابته بلهفة
وفقط أقول له

هل اذا دعوناك للقاء ثقافى فى نادى المهندسين مثلا سوف تلبى الدعوة أم أن الظروف لا تسمح لك ؟
وأخيرا
ماذا يعنى لك منتدى أبناء مصر؟
اخوك المحب جدا
على درويش

osha
21-07-2005, 11:20 PM
الف مبروك عليك الكرسي يا كبير!!!
الحقيقة انا كنت محضرة ييجي 50 سؤال كده على ما قسم - لكن لما دخلت وشفت الكل متوصي بيك قررت العفو عنك
دخلت لأسجل حضور وتحية لقمر الليل
وقلبي عندك يابن البلد يا خويا

Abdou Basha
22-07-2005, 08:21 AM
إزيك يا أحمد...؟؟

والله ماعارف أسأل ولا إيه ..؟؟ الأسئلة كتير ..

أنا عايز أسأل حاجة.. مين المشرف مصر اللي بعتلي الرسالة الخاصة عن الموضوع ..؟؟؟ هو ليه مابيظهرش كتير معانا..؟http://www.egyptsons.com/misr/images/smilies/93.gif

لأ انا عايز أسأل بجد ..

- كان في بالك إيه أهداف وأنت بتعمل منتدى أبناء مصر... ؟؟؟
- انت بتشتغل إيه جانب الإشراف ..؟؟
- انت أصلا منين..؟؟
- ممكن أبناء مصر تبقى جمعية أهلية ليها نشاط خيري، واجتماعي وثقافي ..؟ ولا حاجة زي كده تبقى صعبة ..؟

يعني .. هي دي يمكن اهم الأسئلة ... وشكرا على الموضوع الجميل ده يا قمر الليل.. وفي انتظار قراءة إجابات أحمد على الاسئلة.

ابن البلد
22-07-2005, 11:12 AM
من تحب فى المنتدى ومن تكره؟؟؟؟؟؟؟؟؟


مش اشخاص لكن افعال
بكره اللي يأمرون الناس بالبر وينسون أنفهسم
وبحب اللي بيحب المنتدى والمحترم واللي مش واخد الدنيا قفش

يعني أنا بحب كتير ومبحبش كتير
لكن اللي بكرهم هما بس اللي بيأمرون الناس بالبر وينسون أنفسهم وعايشين في الدور :d

سمسمة
22-07-2005, 10:14 PM
انا جاية امر مرور الكرامhttp://smilies.sofrayt.com/^/aiw/biggrin.gif

ماما زوزو
22-07-2005, 10:27 PM
بسم الله الرحمن الرحيم
ابنى العزيز الغالى احمد
هااستنى ردودك عشان اقدر
اسالك , بس بسرعة رد على الاسئله
ربنا يوفقك ويقويك على كم الاسئلة ...

mad boy
22-07-2005, 10:47 PM
ههههههههههههههههههه
ربنا معاك يا ابن بلدنا

كان لازم توافق من الاول على العموم انا جاى اسلم وخارج تانى

ربنا معاك.......

ahmedab216
23-07-2005, 01:36 AM
الأخ الكريم و العزيز ابن البلد

و الله يا أخي العزيز لك كل الشكر و التحية لهذا الجهد الغير عادي
ولا انسي الاخت العزيزة قمر الليل لتوفيقها الرائع في اختيارك للجلوس علي كرسي الاعتراف.......

لقد قرأت كافة المشاركات و الاسئلة و كان الله في عونك ان شاء الله........

ولا اعتقد انني يمكنني ان اضيف الي ما سبقوني اليه الاخوة الاعضاء........ سوي سؤال متواضع........

هل كان شكل المنتدي في مخيلتك وقت انشاء المنتدي كما هو الواقع الآن؟؟

لكم كل الشكر و التقدير

أحمـد

حنـــــان
23-07-2005, 01:40 AM
أنا جاية أتابع بس عشان "أنا الفضول"!

شكرا يا قمر عالموضوع
مع التحية والاحترام لأحمد ابن البلد

سـلـوى
23-07-2005, 11:16 AM
مش عايز أقول أن الموضوع مكرر كالعادة :d
هههههههههههههههههههههههه
يا ربىىىىىىىىى :d

انا مش بحب اسأل بصراحة
بس داخلة اقولك ربنا معاك
و اجاباتك فى البداية جميلة بجد ما شاء الله
و تدل على انك زى ما قلت انسان محترم و ناضج

و لى عودة للمتابعة

ربنا يوفقك دائما و يحقق لك ما تتمنى

تسلمى يا قمر الليل *3* *3*

ابن البلد
23-07-2005, 11:27 AM
1- ما أكثر ما يضايقك فى المنتدى
حاجات كتير الحقيقة من أهمها إستهتار بعض الأعضاء بمجهود المشرفين

2-لماذا يعتبر المنتدى من أجمل المنتديات
في نظري ليس فقط لانه يضم أجمل وأفضل نخبة من الأعضاء المميزين ولكن لاننا جميعا هنا نتعامل من منطلق الأسرة الواحدة فأغلبنا يعرف بعضه الآخر و إن كان هذا المجتمع الأسري بيآثر بشكل أو بآخر علي الأعضاء الجدد فكثيرا منهم يشعرون بأنهم لا يعرفون أحد والجميع يعرفون بعضهم البعض فيخشي المشاركة ولكنه لو شارك مشاركة واحده سرعان ما يجد هذا الجو الحافل من التهاني والتشجيع في الدخول والمشاركة والإنضمام سريعا معنا

3-ما هو أكثر شيء إفتقدته فى مصر عندما كنت مقيما فى ألمانيا
الحقيقة أنا كنت مقيم بالسعودية :) والحمد لله مرحتش ألمانيا بس نفسي أروحها وأكثر شيء أفتقدته في السعودية هو كل شيء من عائلي أو اصدقائي او حتى الكمبيوتر الشخصي بتاعي أو الجو العام لمصر أو النيل أو أي شيء كل شيء كان مفقود في السعودية حتى العمله المصرية كنت مفتقد النظر إليها .

4-من هو أكثر عضو زعلت لما ترك المنتدى من الأعضاء القدامى
الحقيقة هو كذا عضو ولكن أهمهم هو ابن مصر وهبه
وأن كنت ازعل كثيرا أيضا علي غياب اعضاء أخرى لم يتركوا المنتدى ولكنهم تغيبوا مثل لميس ( ميس فيرجوا ) ورامي ( واد كول مش معقول )

5-بتحب مين أكتر إبنك يوسف أم بنتك بسنت ؟
في الحقيقة يا أحمد في حاجتين مخلياني عايز انتحر يوسف وبوسي من جهة والمنتدى من جهة آخري :d
وإن كان بوسي أرحم من يوسف ومن المنتدى إلي حد الآن معرفش بقه لما تكبر شوية وتبقه قد يوسف هكون لسه موجود ولا هكون انتحرت بالفعل *13*

sea_wolf
23-07-2005, 11:50 AM
متابعه ولى عودة

ابن البلد
23-07-2005, 12:12 PM
أهلا بك عصفور الشعر ومفيش أي زعل من الأسئلة ولا حرج ولا حاجه أسأل كل اللي تحبه وأنا هرد عليه علي قدر المستطاع :)

كيف جاءتك فكرة أختيار اسم(( ابن البلد ))...وهل كان هناك أمامك خيارات اخرى غير هذا الاسم... والذى هو مميز فعلا من وجهة نظرى الخاصه؟
:) فكرت إختيار اسم ابن البلد جت من ضمن أسماء كتير كنت طرحتها أول ما فتحت المنتدى اول إسم سميت نفسي به هو asdh4 وده لاني كنت دايما مسجل كل ميلاتي وحالي ومحتالي بالرموز الأولي من اسمي وبعدين لما شافته بسنت معجبهاش وقالت لي لازم يكون أسم مميز يدل علي المكان أيه أصده 4 ده :d فاختارت أسم مصر MISR وبعدين ابن البلد وده عجب بقه بسنت فأستقريت عليه

كيف تدير المنتدى..من الناحيه السياسيه والادرايه..((ديموقراطيه ..دكتاتوريه .. الخ الخ))؟
الحقيقة أنا مش بحس أني بدير المنتدى ولكن مساعدة المشرفين جميعا بتسهل عليا أمور كتيرة والمنتدى بشكل عام بيتخذ شكل إداري عباره عن ديكتاتوري ديموقراطي :d
فاحنا حطين شروط يدكتاتورية لم نقم بعمل تصويت عليها من قبل أي أحد وندير المنتدى عن طريقها بشكل ديموقراطي مش من حق أي حد يخالف الشروط دي حتى ولو كان المشرف العام :( لكن من حق المشرف العام تغير الشروط دي دون تنبيه الأعضاء;)
يعني سياسة كده زي بتاعت بلدنا :d

أحيانا أشعر أنك تحرج البعض بردودك ..فلماذا هذاالاسلوب.. خصوصا أنك تأصل لذلك الاسلوب ..دعو بطريقه غير مباشره الاعضاء لأنتهاجه..تبعا للمقوله الشائعه ((اذا كان رب البيت بالدف ضاربا..ف..........))
مفهمتش دي أوي بس هرد علي الجزء اللي فهمته والباقي ياريت تعيده لي بشكل تاني لاني مفهمتش أوي
أني بحرج كثير من الاعضاء
أنا مش بحرج الأعضاء ولكن لو أتبعنا مبدأ اللي علي راسه بطحه بيحس بيها فده يبقه كده صح وخصوصا أن بعض كلامي بيكون موجه طبقا لمبدأ في مخيلتي هو سوء الظن من حسن الفطن زي بالظبط أفكرك بحاجه وأنت ممكن تفتكرها دلوقتي أنها إحراج أو كده لكن أنا بالفعل مقصدش احرجكك ولكن لو أنت علي راسك بطحه هتتحرج
موضوع من يستحق عصفورة الشعر توته :) ؟ لو إجابتي كانت محرجه يبقه أنت علي راسك بطحه لو كانت عاديه يبقه ممكن أنت تأخدها بأني بهرج وده أسلوب يمكن بتبعه أحياناا للمحافظة علي الجو العام خوفا من إنحناء منحنى الإرتقاء بالجو الأسري للمنتدى .

هل كنت تتوقع هذا النجاح الباهر للمنتدى ((ما شاء الله)) مع أولى خطواتك نحوه انشاؤه انت والزملاء الاعزاء؟
الحقيقة اول ما بدأنا فكرة المنتدى أنا وبسنت مكنتش متخيل أني ههتم بألكسا أو أني يكون لي ترتيب عالميا أو الكلام ده وكل اللي كان يهمني في البدايه هو دخول علي الأقل 100 زائر يوميا كده يبقه أنا ححققت إنجاز ومع الوقت بدأ الحلم يكبر طبقا برضك لمبدأ أني مبيعجبنيش العجب ودائما أبدا مش راضي عن النجاح اللي بيتحقق بالرغم أني مكنتش بحلم به لكن ده يمكن طبع فيا بسنت زمان اول ما فتحنا المنتدى كانت بتقول أموت وأشوف المنتدى مسجل فيه 500 عضو وعملت موضوع لما الأعضاء وصلوا ألف عضو اسمه إلحقوني بإزازة كلونيا بسرعة حد يسندني :d دلوقتي الحمد لله احنا أكثر من 22 ألف عضو وال 500 اللي سجلوا يمكن في سنه دلوقتي بيسجلوا في شهر من الشهور والحمد لله ومازلت بحلم بتحقيق حلم كبير لي أنا وبسنت . بسنت بتحلم أن يكون منتدى بوابة كبيرة زي مصراوي :) وأنا بحلم بأنه يفضل فيه روح الحب والآخاء وأننا في المرحلة دي ولمدة ست شهور قادمين نفضل عي الأقل ترتيبنا ما بين ال 15 ألف وال 20 ألف عالميا وربنا يسهل.

هل ندمت من قبل على قرار أتخذته بحق عضو معين من حيث الغاء عضويته . ولك ان تحكى بالتفصيل أو تجيب باقتضاب؟
بيتهيألي أتسألت السؤال ده من قبل بس مش فاكر فين أعتقد في قاعة الإدارة ولكن الحمد لله أنا عمري ما ندمت علي أيقاف أو إلغاء أي عضوية من أول بيكاتشو إلي العضو اللي هيتوقف قريب ضابط الشرطة :d لو مبطلش اللي بيعمله ولكن لو تحب أحكي لك بالتفصيل الممل قصص إيقاف بعض الأعضاء حدد العضو اللي تحبه وإن شاء الله أشرح لك القصه ولك أن تحكم علي العضو من مبدأ السياسية الديكتاتورية وهي قوانين المنتدى والسياسية الديموقراطية وهي تطبيق هذه القوانين علي جميع الأعضاء ;)

من هو فى رأيك أفضل عضو منذ تم انشاء المنتدى وحتى الان..((يعنى زى عضو القرن كده ههههههههههه))
:) الحقيقة العضو اللي يعتبر أفضل عضو مفيش عضو بعينه لكن فيه أعضاء كثيرة و نظرا لوجود في الساحة حاليا كثيرا منهم فأفضل أن أختار من المتغيبن عن المنتدى وهو
واد كول مش معقول
الحقيقة مش عايز أتكلم عليه كتير لان مهما كان كلامي مش هيوفيه حقه

ماهى أصعب لحظات حياتك؟
أصعب لحظاتي كأحمد صلاح ولا كأبن البلد
لو كأحمد صلاح معتقدش ان كان فيه لحظة أصعب من دخول والدتي المستشفي من أربع سنوات تقريبا
لو كأبن البلد لحظة إيقاف صديق عزيز عليا في المنتدى وقام بعمل الكثير للمنتدى ولكن تم إيقافه لمصلحة المنتدى والحمد لله تغير المنتدى كليا في عام واحد إلي الشكل الحالي

عضو تملك الشجاعه الكافيه انك تقوله ((انا حاطك فى دماغى ووجودك فى المنتدى رغم انفى ))
مفيش عضو موجود في المنتدى غصبن عني أو موجود علشان رضايا المنتدى مش ملكية شخصية لأبن البلد أو زي ما قالت أحد عضوات موقع إيجي مكس عزبة ابن البلد يقعد فيا اللي يحبوا ويمشي فيها اللي ميحبوش لا المنتدى بيتنا كلنا ولكن بيت للمحترمي قواعده وشروطه من يستطيع التحكم في نفسه والمحافظة علي عدم مخالفة تلك الشروط فهو صاحب بيت ولكن من لا يستطيع فلن يبقي بالمنتدى سواء بإرادتي أو رغم أنفي.

ماذا تفهم من هذه العباره ((اللعنه لا تصيب الا العقلاء)) وهل تعتقد فيها كونها مقوله صحيحه أم خاطئه؟
أفهم من العبارة دي يعني "أيه ياخد الريح من البلاط " يعني دلوقتي المجنون بالذمة هيحصل أيه في عقله أكثر ما حاصل لكن العاقل لو أصاب في عقله فهو أصاب باللعنه أعتقد أنها صحيحه ولكني مع مقولة خذ الحكمة من أفواه الجاهلين ;)
كثير الحقيقة بسمع حكم من ناس معندهاش فكرة عن البتنجان

عايزين بقى سبق صحفى يا عمده ههههههههههههه ...ممكن نعرف ما هو الجديد فى جعبة الادراره للمنتدى ..يعنى مفيش مفاجات ساره كده؟
الحقيقة فيه كتير بس المشكلة في قلة الوقت وبجد لو فيه وقت كافي كان موقع أبناء مصر بقه بوابه بالفعل ولكن للآسف كتصميم و إنشاء أقسام كله بينصب علي فرد اوفردين ثلاثة بالكثير وده ميكفيش لجعل موقع أبناء مصر بوابة متكاملة في الوقت الراهن أو في أسرع وقت ولكن إلي حد ما احنا بخطة والحمد لله وبالنسبه للجديد فيه كثير
في دلوقتي شغالين في تصميم لجروب أبناء مصر علشان نعم إنتشار فكري وفتح نافذه جديدة عن طريق البريد الإليكتروني للتواصل مع بعضنا البعض وليس فقط المنتدى
في قسم جديد خراج نطاق المنتدى سيكون مخصص لجميع برامج و متعلقات المحمول و ما إلا ذلك وربما بعد ذلك ينتشر ويكون قسم كبير لتحميل البرامج عامة
وأيضا في قسم التعليم الإليكتروني وسنقوم بعمل أقسام تعليميه به في كل المجالات وإن شاء الله بعد الإنتهاء من تصميمه وبرمجتة نجد من يساعدنا في هذا الصدد
وفي قاعة جديدة علي قيد الإنشاء ستكون أسمها طلائع المستقبل و دي هتكون للأعضاء اللي تحت السن 16
هذا في الوقت الراهن وربنا يسهل ونخلصهم كلهم علي خير


وآخيرا سعدت جدا بأسلتك وأرجوا أن أكون قد أجبت عليها كما ينبغي وفي إنتظار باقي الأسئلة لك مني كل التحية
أحمد صلاح

ابن البلد
23-07-2005, 12:26 PM
اده اده

نصيحه صغنيوره ليك يا احمد ابعت رساله خاصه لكل واحد من المشاركين انك هتلغى عضويتو لو ما مسحش الاسئله الصعبه دى
ههههههههههههههههههههههههههههههههههههههههههه

ولا اقولك امسح الموضوع ههههههههههههه

ليا رجعه مع اسئله حلوه
في إنتظار عودتك ماد بوي ومتقلقش مفيش حاجه هتتحذف :d

ديدي
23-07-2005, 12:36 PM
يا عينى يا احمد هما بيعملوا فيك كدا ليه
تسجيل حضور للمتابعة
ولى عودة ان شاء الله

ابن البلد
23-07-2005, 12:54 PM
اهلا بك يا داريا منورة الموضوع

أسألي زي ما أنت عايزة مفيش مشكلة


1ـ هل في رأيك ان افضل كل عضو يقول رأيه في المنتدى بمنتهى الصراحة وينقد … ولا كلنا نشكر في المنتدى وندفن رأسنا في الرمال كأن مفيش عيوب

لو اخترت النقد …… يا ترى ايه شروطه واسلوبه المُرضى او الصحيح ؟

من رأيي أن العضو يقول رأيه بمنتدى الصراحة ولكن بدون تجريح ولو بالفعل العضو هيقدر المجهود المبذول معتقدش ان فيه حاجه هضايقه في المنتدى بالعكس هيقدر كل مشكلة تحصل ان كإدارة منتدى ومشرفين بنبذل قصاري الجهد للمحافظة علي الشكل العام وعلي إستمرارية تقدم المنتدى والموقع وظهورة بشكل مشرف.

2ـ هل مع الوقت اكتسبت خبرة انك تعرف فورا اذا كان العضو كويس ولا لأ ،، ولا لسه في اعضاء بيفاجئوك ؟
لا مفيش أعضاء بيفجئوني تقريبا وده لاني زي ما قلت في أحد الردود السابقة بتبع سياسية سوء الظن من حسن الفطن فالبريء مذبن حتى تثبت برائته :d ولحد دلوقتي كل من هو كان في نظري مذنب لم تثبت برائته حتى الآن والحمد لله


3ـ ايه حدود سرية الادارة عندك ؟ يعني ايه اللي المفروض كل الاعضاء يعرفوه وايه لأ ؟
المفروض الأعضاء متعرفش حاجه خالص عن اللي بيدور في قاعة الإدارة علشان لو عرفوا يبقه إن شاء الله الناس هتطفش ههههههههههه في وقت من الأوقات وأعتقد هو شهر يونيو العام الماضي كان نفسي أنزل موضوع عن الإشراف وعن أن العضو في نعمه أنه مبيدخلش قاعة الإدارة ولا بيشوف فيها النار اللي جوه من كمية مشاكل وانه قاعد بره علي شط قاعة فك التكشيرة وعلي ضفاف قاعة الفن ومش داري بأن فيه مشاكل كتيرة أوي الحمد لله بنلحق نحجمها ونحلها بأسرع طريقة


4ـ حاسألك سؤال رخم شوية ….. مين الاعضاء اللي تحس انهم مشرفين والمشرفين اللى تحس انهم اعضاء عاديين ؟؟
لازم أحدد أشخاص يعني ؟
علي العموم من ضمن اللي كنت بحس انهم مشرفين بالرغم من كونهم أعضاء عاديين هو احمد ناصر ولحد ما تعين مشرف كان في نظري هو مشرف في جلباب عضو
اما بقه مشرفين بحس انهم أعضاء عاديين مفيش في بالي دلوقتي غير واحد وبلاش أقول اسمه :)


5ـ انك تكون المشرف العام على منتدى ناجح زي ابناء مصر بسم الله ماشاء الله ……. اضاف ايه لحياتك ؟؟
الحقيقة مش كوني مشرف عام ولكن كوني عضو في المنتدى هنا أضاف لي الكثير والكثير سواء من كيفية التعامل مع الأشخاص والشخصيات المختلفه او من كمية الصدقات والأشخاص المميزين اللي كان يصعب عليا التعرف عليهم في الحياة العادية




ملحوظة هاااااااااااااااااااااااااااااااااااامة جدا جدا : كنت لسه حارد على موضوع عجبني جدا ولقيتك كاتب انه مكرر
النقطة دي بقت سمعة فيك هههههههههههههههه :d
خد بالك منها :)

ومن فضلك بعدها تحط اللينك القديم
معلش يعني ههههههههههه :d
يمكن أنا مبشاركش في كل المواضيع ولكن أنا بمر علي مواضيع كثيرة جدا وبيوصلني ما لا يقل يوميا عن 2500 ميل علي الأقل ومشترك في أي منتدى بيقابلنا فأوقات كثيرة بحس ان الموضوع اللي مكتوب يشبه موضوع قديم ولو تراجعي مشاركاتي زمان أوي كنتي هتلاقي أني دايما بقول ان الموضوع ده قديم ودي حاجه مش جديدة حتي في النكت تلات تربع النكت بكون عارفها والحاجات دي لانها بتمر عليا وكوني مش متأكد 100% أن الموضوع مكرر او لأ في المنتدى فبقول أنه مكرر تقريبا ومبحطش الرابط لان محرك البحث فيه قصور شوية في المنتدى وغير كده وكده بسيب مطلق لحرية المشرف أنه يدور علي اللينك بقه ويشوف أن كان الموضوع مكرر ولا لأأ
يعني عندك مثلا موضوع زي تحت دائرة الضوء
لا يفرق كثيرا عن هذا الموضوع الذي أشارك فيه الآن وهو كرسي الإعتراف
ويمكن من اول المنتديات اللي عملت تحت دائرة الضوء هو كان منتدانا وكانت فكرة محي ابراهيم
وبعد كده تناقلت في باقي المنتديات وظهرت بأسماء آخري منها علي كرسي الإعتراف

كل الشكر لك يا إيمان علي الأسئلة وفي إنتظار المزيد


لك مني كل التحية والتقدير

ابن البلد
23-07-2005, 01:08 PM
ياه ده أنت رجعت بسرعه ماد بوي معلش انا أتخرت عليكم يا جماعة شويتين تلاته

هل تقبل التحدى بسهوله و لا.
أيوه انا بقبل التحدى والحمد لله ولكن لا أدخل أي تحدي إلا وأنا ضامن أني هكسب ميعادا طبعا التحدي بتاع الألعاب لايف دخلت من قبل ضد حد وخسرت :d

هل هناك اعضاء تحس فعلا انهم من اخواتك--من هم--
فيه أعضاء كثيرة ولو فضلت اذكر في أسماء هكتب كتير ويمكن أزعل حد لو نسيته


اذا احد اغضبك على المنتدى فما تصرفك تجاه ذلك الشخص--ياريت بصراحه--
والله لو أخالف قوانين المنتدى هتصرف معاه طبقا للقوانين لكن لو أغضبني بصفة شخصية مش هعمله حاجه ولكن هتجاهله تمام علشان محرقش في دمي علي الفاضي


هل تعلم اولادك ازاى يدخلو النت علطول ولا هتسبهم يكتشفو بطرقهم الخاصه..
يوسف مشاء الله بيدخل علي النت لوحده بدون ما أعلمه وهو عنده 3 سنوات ولكن مبيعرفش يعمل حاجه بيفتح النت وخلاص علي كده
اما بوسي بقه فيادوب بتخبط بس علي المسافة :d


واخيرا لو اغضبك احدهم هل تاخذ غضبك الى منزلك؟
هي كل الأسئلة عن الغضب ليه
أيوه لو حد ضايقني بيكون قرفان في كل مكان بيت شغل خرجت وكل تفكيري بينصب علي أزاي أتصرف مع الشخص اللي ضايقني ده بدون ما أغلط غلط كبير يغلطني أكثر

كل الشكر لك ماد بوي علي الأسئلة لك مني كل التحية والتقدير

ابن البلد
23-07-2005, 01:22 PM
يا نعناعه انتي تسألي براحتك
أنت عارفه أنك لك معزة قد أيه من أيام الليمون والنعناع ويمكن أنت من الناس اللي عاصرتي الوقت اللي كنت بهرج فيه كتير قبل ما أتخذ الأسلوب الحاد اللي الكل بيسألني عليه دلوقتي

1- ازاي بتوفق بين شغلك و بين مسؤوليه المنتدي و هيه مسؤوليه كبيره
الحقيقة بقدر اوفق بين شغلي ومسئولية المنتدى علي حساب البيت :( وده بيضايق كتير مراتي بس هعمل أيه لازم حاجه تقع ولو عوضت البيت المنتدى بيقع ولو عوضت البيت والمنتدى مش هقدر اوقع الشغل لفترة طويلة

2- ابن البلد الاب او احمد الاب يعني اب صارم ولا بتتبع انهو اسلوب بالظبط
الحقيقة مقارنة بالتعامل مع يوسف كأب ومع المنتدى فأنا شايف أني في المنتدى متهاون كتير بالنسبه للتعامل مع يوسف

3- مين اكتر الاعضاء الي انت ممكن تاخد بارائهم يعني بيعجبك ارائهم و مين اكتر الاعضاء الي بتحس انه عامل حس كده للمنتدي
اللي بأخد بآراهم فهما الدكتور عادل وفاضل
في أعضاء كثير جدا ليهم حس في المنتدى وأغلب الأعضاء النشطين وبدون ذكر أسماء لانهم بالفعل كثير جدا واكيد هنسي حد

شكرا يا نعانيعوا علي الأسئلة أكيد مش هقول نورتي الموضوع ولكن أكيد النعناع عامل شغل علي الموضوع ومدي له رونق وريحة حلوة
وفي إنتظار باقي الأسئلة ولو الأعضاء مسألتش الأسئلة اللي في نفسك أبقي تعالي وأسألي من جديد
لك مني كل التحية والتقدير

ابن البلد
23-07-2005, 01:46 PM
*7* هتستفرد بيا آه ده اللي مكنتش عامل حسابة

- أحمد صلاح .. ياترى كان إيه طموحك في 2002 لما افتتحت المنتدى .. وإيه طموحك دلوقت ؟
في 2002 كان كل طموحي أني أعمل منتدى تعليمي وبس نظرا لاني كنت عامل موقع تعليمي عن لغة ال html
دلوقتي طموحاتي كبيرة وامنياتي كثيرة بتمنى من الله ان يحقق لي ما فيه الخير والصواب منها

- كام عضو من أعضاء المنتدى تعرفهم معرفة شخصية ؟
يوه كتير :d
أقولك يا سيدي في أعضاء أعرفهم معرفه شخصية ولكني مقابلتهمش ولا مره ولا عمري شوفتهم وفيه ناس قابلتهم وشوفتهم
فهقولك كله علي بعضه بقه
بنت مصر طبعا
واد كول مش معقول
ميس فيرجوا
طعمية
إسلام شمس الدين *
هبه
سمسمة
لينا
د عادل *
الصعيدي :d*
محمد شحاتة*
محمد فاروق*
ويلي*
شودي*
أحمد المليجي*
ماما زوزو*
أسامة يس
بوكي بوكي
حسام عمر*
عصام الفاتح
ميلي كولي
شروق
سمورة
زينب
أنجل*
الكينج أبو وليد
كل اللي فوق دول يا أمه قابلتهم يا امه أعرفهم معرفه شخصيه وما زلنا إلا حد ما علي اتصال
كل اللي عليه * فده قابلته شخصيا

- هل المنتدى مصدر سعادة لك .. وللا مسبب لك مشاكل ؟
المنتدى مصدر قهر لي :( وكتير بكون مش طايق أدخل من كتير المشاكل اللي بقابلها ويمكن أنت شخصيا تعرف بعض منها

- حاجة شايف انها جديدة بينفرد بيها منتدى أبناء مصر ( غير عضويتي طبعا ) .. هههههههههه
طبعا انت نورتنا وكون أن عندنا صعيدي إسكنرداني فده إنفراد مش هيتكرر أبدا
ولكن أنا شايف أن منتدى أبناء مصر بيتميز بالطيبة والجو الأسري اللي مش موجود في منتديات كتيرة

- هل لديك أقوال أخرى ؟؟؟؟؟؟؟؟؟؟؟؟؟؟؟؟؟؟؟؟؟؟؟
والله أن كان لك أسألة أخري فأكيد لدي أقوال أخري وأن مكانش فالحمد لله ونحمدواا علي كده :d

أنا أسعد يا أستاذي والحاجه الحلوة اللي الواحد بيطلع بيها من المنتدى هي التعرف علي شخصيات مميزة مثلك
أينعم أنت أسكندراني وانت عارف قد أيه بحب إسكندرية :d
بس معلش أنت عندي مش إسكندراني ولا من إسكندراية خالص :f2:
كل التحية والود والأمنيات السعيدة لك :f:

ابن البلد
23-07-2005, 01:57 PM
منورة يا بسمة انت وتوقيعك بصراحه :)


يا ترى ايه اسعد يوم مر عليك فى المنتدى ومش قادر تنساه ابدا (او مرحلة معينة)؟
أسعد يوم مممم فيه أيام كتيرة سعيدة بس ممكن أقول أسعد يوم هو يوم رجوع بسنت للمنتدى بعد مرض لازمها في بداية إنشاء المنتدى
ويوم ما وافق موقع جوجل علي وضع إعلانات له بالموقع هههههههه بس المشكلة بقه لسه محصلتش فلوس من الموضوع ده
وأفضل مرحله هي المرحلة الحاليه واللي بتعتبر هي العصر الذهبي للمنتدى

بحس دايما فى اسلوبك بالصراحة يا ترى الصراحة دى بتسببلك مشاكل فى حياتك ؟
يعني أوقات بتسبب مشاكل بس عاديه اللي بيعرفني كويس بيعرف أن مش دايما بقصد شر بيها
مع أني شرير كبير بس متخفي *9*

ايه الحاجة اللى نفسك تضيفها للمنتدى او لموقع ابناء مصر بشكل عام؟
نفسي أضيف جو من الإستقرار أكثر للمنتدى وأربط كل أقسام الموقع ببعضها البعض وبدأت في الربط ده فعليا بالبار الجديد اللي موجود لو حد لاحظ تواجده


في إنتظار عودتك بالأسئلة الجديدة :)
لك مني كل التحية والتقدير:f2:

ابن البلد
23-07-2005, 02:04 PM
يااااااااااااه يا أحمد..
دة انا كنت ناوية اسألك اسئلة كتير.. بس لقيت ان في أسئلة أحلى ..:)
بانتظار مرورك يا ابن البلد .. و هاستنى ردك على الاسئلة ..
خد الوردة دي.. :f2:
هاتي الورده :d

هحتفظ بيها مش هعمل زيك لما بديكي ورده بترميها

علي العموم كنت أتمنى أنك تسألي يا أنفال اللي في نفسك
وشكرا علي مرورك
وخدي الورده الصغيره دي ومش عايز أحلف بجد لو رمتيها نهارك مش فايت
:f:

mad boy
24-07-2005, 03:31 AM
احم اتمنى ان يكون صدرك واسعا لعودتى باسئله اخرى...........

بسم الله الرحمن الرحيم

ليه حددت الوقت الفصل بين كل مشاركه ومشاركه بدقيقه كامله - عيب فى السيرفر

ليه لازم تطلع على المشاركات قبل نزولها الى المواضيع - مش فى مشرفين يراجعو الموضوع ده-

واخيرا واهم حاجه ممكن بطاقه تعريف لبنت مصر وهيه مشرفه على اى قاعه ......................

وشكرا جزيلا يا ابن البلد.

سمسمة
24-07-2005, 03:34 AM
بنت مصر احلى اعضاء المنتدى

والمشرف العام ;)

mad boy
24-07-2005, 05:22 AM
مممممممممممممممممممممممممممممممممممممممممممممممممم ممممممممممممممممممممممم

سلاما لك يا مشرفنا العام

شكرا ليكى يا سمسمه

عاشقة السراب
24-07-2005, 11:07 AM
مرحبا استاذ احمد*8*
انا جديدة في المنتدى ولسه ملياش مشاركات كثير....
وبصراحة ماكنتش عارفاك كثير...
بس من كلام الأعضاء والمشرفين باين على حضرتك انك شخصية مذهلة...
وتعبت اوي لينجح المنتدى ده...
ممكن سؤال بسيط؟؟؟
هو الأعضاء اللي بينطردوا بينطردوا ليه؟بيعملوا ايه؟؟علشان ما اوقعش مرة بالغلط والاقيك طاردني....
ربنا يوفقك...ويعينك على الأسئلة الكثيرة التي بتيجيلك.
بأمان الله.

أشرف المجاهد
24-07-2005, 11:52 AM
بسم الله الرحمن الرحيم

أخى الحبيب أحمد صلاح

لم أتابع صفحات هذا اللقاء الجميل معك ولكنى تصفحت بعض ردودك الجميلة

أنت انسان أحسبه على خير ولا أزكيه على الله ....

وبدون احراج أرجو الاجابة على أسئلتى البسيطة اذا كانت غير مكررة >>>


1- ماذا استفدت من بداية دخولك النت حتى الآن ؟

2- ما رأيك فى المنتديات عامة ؟ وفى أبناء مصر خاصة ؟

3- ما رأيك فى سماع الأغانى والاحتفال بأعياد الميلاد والتهنئة بأعياد غير المسلمين ؟؟؟

4- لمن تسمع من شيوخ وعلماء المسلمين ؟

5_ كم ساعة تكفيك على الانترنت يومياً ؟ وهل وصلت حالتك الى حد الادمان ؟؟

6 _ اذكر أبيات شعر يعجبك ذكرهما لنا الآن ؟؟؟

7 _ ماهي حكمتك الي دايما ترددها ؟؟ مع ذكر نصيحة لكل أخ وأخت يتصفحون النت يوميا ؟

8- اعطيني تعريف للتالي كما تشاء انت.. ومن اي باب يحق لك الاجابة ..

دمعة حزن..
فلسطيني يفجر نفسه..
عراقي يفجر نفسه..
قتل محتل يهودي..
قتل محتل عراقي..
حال الأمة الاسلامية ثم حال الأمة العربية

9-كلمة سريعة للام الفلسطينية والعراقية ( أم الشهيد )

10- امنية تتمنى ان تتحقق لأحمد صلاح ...

11- ( 10 ) ورود لك عليك أن تهديها ... لمن تريد اهدائها ؟؟


بارك الله فيك وسامحنى على الاطالة ولكنى احبك فى الله

جزاك الله خيرا

ولا تنسى ذكر الله

لا اله الا الله

بهجه
24-07-2005, 02:36 PM
السلام عليكم

سؤال يا ابن البلد

كيف قمت بأختيار المشرفين لهذا المنتدى ؟؟يعني هل هم اصحابك ؟؟؟بالتفصيل الممل لو سمحت
يعني في منهم مقيم خارج مصر

صح
بتعرفه منين؟؟؟؟؟

ابن البلد
24-07-2005, 03:31 PM
بالرجوع بذاكرتك إلي الوراء هل كنت ستفعل و تمضي في نفس الطريق ذاته

أم كنت ستفضل إختيارات أخري في حياتك؟؟؟ و ما هي؟؟؟؟

الحاجه الوحيده اللي يمكن كنت أغيرها أني متجوزش في سن صغير :d
يعني كنت عايز لسه هبص وأهيص شوية *5*

لا معتقدش أني كنت هختار حاجه غير اللي أختارتها والحمد لله لسه مندمتش علي حاجه عملتها حتى أصدقائي اللي أكتشفت بعد كده أنهم ميستهلوش يكونوا أصدقائي

ابن البلد
24-07-2005, 03:44 PM
أزيك يا إيناد عامله أيه أتمني أنك تكوني بخير
سعدت كثيرا أنك شاركتي في الموضوع :f:


** هل كان في حب ما بينك و ما بين زوجتك قبل الجواز ؟؟؟
لا مكنش في بيني وبين زوجتي أي حب قبل الجواز .... مش عارف بقه فيه ولا مفيش بعد الجواز :$
لا بس بجد أنا حمدت ربنا كتير أن مكنش فيه حب قبل الجواز ومحبش أي حد يحب قبل الجواز
ياريت الكل يحب بعد الجواز مراته ميحبهش قبل لاسباب كثيرة

** هل توافق ان زوجتك تشارك في المنتدي ؟؟؟
لا موافقش علشان منعقدتش نتخانق علي الكمبيوتر كفايا عليا يوسف مش مهنيني عليه :d

بسمة أمل
24-07-2005, 04:07 PM
بسم الله الرحمن الرحيم
رجعت تانى وفى الوقت الحالى مفيش ولا سؤال فى دماغى كالعادة بس هفكر هفكر...
ايه اكتر مجال بتحب تقرا فيه يعنى رياضة سياسة ادب؟؟؟
ايه اللى استفدته خلال فترة اقامتك فى السعودية؟؟
لما بتبقى زعلان ايه اول حاجة بتعملها علشان تحاول تهدى نفسك وبرضة لما بتكون فرحان؟؟؟
ماهى احب الاسماء اليك سواء اسماء اشخاص او القاب للمنتدى؟؟؟ غير يوسف وبسنت وابن البلد:d
تواقيعك بتتغير كتير يا ترى التوقيع عندك بيمثل اخر حاجة سمعتها او قريتها وحبيتها؟؟ولا بتبقى عايز توصل رسالة او بتعبر عن حالتك النفسية؟؟
ياه دى الاسئلة متعبة اوى كفاية كدة ويارب ما تكونش اسئلتى مكررة وانا مستمتعة اوى باجاباتك على الاسئلة الحلوة
ولو عاجبك توقيع خده يعنى ما يغلاش عليك بس خلى سمسمة تعملى واحد بقى وحاسبها انت
والسلام عليكم