المساعد الشخصي الرقمي

مشاهدة النسخة كاملة : الآنسة حنفى تكسب سندريلا



أحمد ناصر
15-01-2018, 01:09 PM
فى مصر البنت العبيطة هي اللى تاخد سندريلا كمثل أعلى.
سندريلا يا عبيطة كانت مرات أبوها اللى عندها بنتين مطلعة عين سندريلا و مشغلاها خدامة ليهاو لبناتها..
إنتِ تقبلى تشتغلى خدامة فى بيتك و ما تلاقيش إلا الإهانات ؟
طبعا لأ.
طيب إنتِ تقدرى تجيبى ثمرة قرع عسل كبيرة و ستة فئران و ستة سحالى علشان يتحولوا لعربة تجرها الجياد و يسوقها السائق و تخدمك الوصيفات ؟
القرع العسلى شاحح اليومين دول.. و بعدين إنت عارفة الكيلو بكام دلوقتى ؟
خليكِ منطقية مع نفسك..إنتِ بتفرى من الصرصار فرارك من الأسد ..فما تقنعينيش إنك ممكن تجمعى فيران و سحالى..
و بعدين إذا كانت إطارات السيارات المطاطية بتتخرم من المسامير و بتتهرى من المطبات و الحفر اللى مالية شوارعنا فإزاى يا فالحة حتمشى بحذاء زجاجى فى شوارعنا عشر خطوات من غير ما يتكسر ؟
بعدين إنتِ تقبلى على كرامتك تتجوزى أمير يقعد فى قصره و ما يكلفش نفسه ينزل يدور عليكِ بنفسه ؟
ده بعت رجالته علشان يدوروا على أى واحدة رجلها تدخل فى فردة الحذاء..يعنى لو فردة الجزمة دخلت فى رجل جوز خالته كان حيتجوزه !
شوفى الآنسة حنفى من و هي دكر كانت واخدة حقها تالت و متلت..و كانت مطلعة عين مرات أبوها فلة و بنت مرات أبوها نواعم..
صحيح هى ما قدرتش تخطف حسن من نواعم بس يكفيها شرف المحاولة..
و كمان حسونة بك و المعلم أبو سريع كانوا بيتنافسوا عليها..لغاية ما ظفر بها المعلم أبو سريع اللى واخدها على حب من أيام ما كانت واحد صاحبه ..
سيبك من القصص الخيالية و شوفى إزاى الأميرة ديانا عاشت تعيسة مع تشارلز فسابته و سابت له القصر مخضر..و فى الآخر إستكتروا عليها تعيش مع الراجل اللى بتحبه فقتلوها..
سندريلا مين يا بت دى اللى حتاخديها مثل أعلى ؟
إعملى زى الآنسة حنفى و طلعى الدكر الكامن فى أعماقك.
https://scontent.faly2-1.fna.fbcdn.net/v/t1.0-9/26805232_1801339516551132_8251477615444675917_n.jp g?oh=500e741051b57a366cbe5ca527f254bf&oe=5AF6F429
https://scontent.faly2-1.fna.fbcdn.net/v/t1.0-9/26731127_1801339479884469_1935682109527119726_n.jp g?oh=2892364d0a0b16c450d4db56499643e8&oe=5AE9E46D


Photo Gallery