المساعد الشخصي الرقمي

مشاهدة النسخة كاملة : يوميات مواطنة مصريه فى المواصلات العامه



dr loma 93
24-05-2005, 03:48 PM
- صباح الخير يا حبيبتي.
- صباح الخير يا ماما.
يلا يا حبيبتي قومي عشان تنزلي الشغل فاضل نص ساعة والـ CTA يتحرك من المحطة.

إنتم عارفين "افتح يا سمسم" واللي بتعمله الكلمات ده في المغارة بتاعة علي بابا (قديمة دي صح، طيب عارفين الباسورد بتعمل إيه في الكمبيوتر ) أهي سيرة الـ CTA بتعمل فيّ كده وأكتر. قمت من على السرير فطيت ونطيت. غسلت وشي، واتوضيت، وصليت، ولبست هدومي في أقل من خمس دقائق فاهمين شكلي كان إزاي طبعا (تعاطفك لوحده مش كفاية اتبرع ولو بكوتشي أديداس) المهم كملت الشياكة في الأسانسير ربطت الإيشارب، لبست جاكت البدلة، لبست الصندل(كلها حاجات فرعية، كماليات يعني).

"وعملوها الوحوش" ونزلت الشارع ركبت الميكرو.... إحم إحم... تاكسي طبعا كالعادة. بس نزلت في ميدان الجيزة "موقف الـ "CTA، وركبت الناقة وشرخت، وبلاد تشيلني وبلاد تحطني. إيه مستغربين من الكلام يبقى أكيد ما ركبتوش الـ CTA قبل كده. يا بـخـتكم اللهم حقد وحسد بأه هيه. هاشرحلكم الحكاية يقال فيما يروى عن الـ CTA إنه وسيلة للنقل العام أدرجتها الحكومة بتاعتنا ضمن وسائل المواصلات المصرية علشان تعلم المواطنين الأمامير اللي زينا الصبر على المكاره والشدائد، هدف قومي بحت زي ما انتم شايفين لكن قلة قليلة من المواطنين اللي مش حاسين البلد بتعملهم إيه علشان يرتاحوا بيقولوا إن الـ CTA ده إحدى وسائل التعذيب علشان هو تقريبا بيلف محافظات مصر كلها قبل ما يوصل للمكان اللي انت عاوزه (الكلام اللي فات ده أنا معرفش عنه حاجة وما قولتوش).

يعني تقريبا باوصل من بيتي في الجيزة لشغلي في مصر الجديدة في ساعة وربع صباحا وتزيد في المرواح ربع ساعة. علشان كده باعتبر نفسي من أكبر مستخدمي الـ CTA في مصر وعاوزه أقولكم شوية حاجات علشان افهمكم لما تركبوا الـ CTA الحياة ماشية إزاي. مثلا في الـ CTA المذهب الشيوعي الصيني للزعيم "ماوتسي يونج" هو السائد حيث لا فرق بين الجنسين وتذوب الفوارق التي تفصل بينهما تماما ويتلاحمان وينصهران في بوتقة واحدة تجعلك لا تفرق بينهما (أكتر من كده ما قدرش أفسر لأن الرقابة التحريرية هاتشيله). ولكن أهم حاجة بقى إن الـ CTA هو أحسن مكان تسمع فيه آخر اسطوانات نزلت السوق في الحب والغرام (مش أغاني طبعا). كلام من عينة "قبلك ما حبتش حد" وصولا إلى "كل اللي عدوا في حياتي كانوا مجرد بروفة لحبك انت".

ولذلك من موقعي هذا أنصح كل شاب وفتاة محترمين إنهم لما يركبوا الـ CTA ياخدوا معاهم 3 حاجات:
1. قطن علشان التلوث السمعي.
2. نضارة سوداء غامقة علشان التلوث البصري.
3. مهدئ أعصاب علشان لو الحاجتين اللي فوق ما نفعوش يبقوا ياخدوه لغاية لما ينزلوا بالسلامة.

اسمعوا نصيحتي وأكيد هاتدعولي

منقول
شكرا

*8*

عـزالديـن
24-05-2005, 11:17 PM
ممكن نعرف بس الأول ماهى الكلمات الانجليزية التى اختصارها CTA
أكيد لها علاقة بمرفق النقل الداخلى للقاهرة الكبرى
لأن حسب الوصف الموجود فى الاقتباس
لا فرق بين الجنسين وتذوب الفوارق التي تفصل بينهما تماما ويتلاحمان وينصهران في بوتقة واحدة تجعلك لا تفرق بينهمالايوجد غيره , ففى الزحام تتهاوى كل القيم

ألف شـكر يا dr loma 93 على اليوميات الصباحية

تقبل تحيتى وتقديرى

حنـــــان
25-05-2005, 12:08 AM
وان كان الكاتبة طريقتها طريفة في وصف مشاكل المواصلات الا ان الموضوع خطير وده سببه الأساسي انعدام الصيانة وقلة الباصات بالمقارنة للخلق اللي محتاجه وصيلة المواصلات دي

CTA يا عز لاقيت انها اختصار Cairo Transport Authority ولاقيت موضوع في الأهرام عن الباصات عجيب جدا...انا لسه ماقرتوش كله بس في أوله بيحكي عن واحد من سواقين الباصات بيقول ان الفرامل بايزة من زمان والشركة مطنشة ومعندهمش قطع غيار من أساسة... والناس اللي ركبت معاه يومها سمعوه بيشتكي من ان الفرامل ممكن تقف في اي لحظة ومع كده فضلوا عالباص لاحتياجهم للمواصلة دي

http://weekly.ahram.org.eg/2005/736/fe1.htm

لاحول ولا قوة الا بالله...
شكرا عالموضوع د. لوما!

محمد فاروق
26-05-2005, 09:40 AM
موضوع لذيذ جدا بس اعتقد انك ظالمة ال سى تى ايه

لانى بركبه كتير ومش زحمة للدرجة دى

وكفاية انه مكيف !!!

هوه ساعات بيكون زحمة فعلا بس ده عيب اللى بيوافق انه يقف كده مزنوق يعنى !!!

لكنى شايف انه افضل مواصلات ف القاهرة وان شاء الله بعد فترة هايبوظ زى الباقيين ويبقى اتوبيس عادى

اما عن انه بيلف كتير ده مش كل الاوتوبيسات ولكن بعضها وده لان الخط ساعات بيكون طويل فعلا زى الخط اللى من السابع ف مدينة نصر وحتى ميدان لبنان فى المهندسين اعتقد ان الطريق طويل يعنى

كفاية كده عشان الموضوع هايبقى كده ف قاعة المناقشات .زههههههههههههههه

محمد فاروق

dr loma 93
31-05-2005, 10:54 AM
شكرا عز على ردودك الجمييلة وشكرا Noona لردك على عز الدين والمهم محمد بشكره على رده لكن انا ولد مش بنت واحب تنادونى اسلام

mekyman
31-05-2005, 05:02 PM
فى اوربا والدول المتقدمة لا يستخدمو ال Cta
لكن ممكن يستخدمو دراجات وبعدين هنروح بعيد لية مهى الحكومة مش عاوزة الموظفين يشتغلو ولا الطلبة تروح مدارسهم ولا جامعاتهم
ويجعلة عامر

dr loma 93
02-06-2005, 08:25 AM
فعلا رايك سليم يا ميك مان
شكككككككككككككككرا


Photo Gallery