المساعد الشخصي الرقمي

مشاهدة النسخة كاملة : أجيله كده .. ييجي لي كده .. حزر مين ؟؟



الصعيدي
23-05-2005, 03:16 PM
ياترى قابلت حد من الجماعة دول ؟؟

أكيد

لإنهم منتشرين في كل حتة

أكتر من الهم عالقلب

متعبين

ومزعجين

ومملين

هتروح في أي حتة هتلاقيهم وراك

وبيطاردوك

لا لأ .. فكرك ما يروحش لبعيد

مش المخبرين

أمال مين ؟؟

أنا بصراحة من كتر ما سمعت عنهم .. بقى عندي حساسية منهم .. تقريبا محصن ضدهم

مجرد ما حس بيهم .. أصدر الطرشا . عشان ما اسمعش كلامهم المعسول

في أي مول كبير .. أو شارع رئيسي .. أو حتى فرعي

ينطوا قدامك ..

يا أستاذ .. لو سمحت

بصيت .. آآآآآآآآه .. واحد منهم .. مندوب دعاية

يا أستااااااااااذ

ولا انا هنا

بيمد ورايا .. مديت

جري ورايا .. جريت

لقيته فجأة في وشي

كشرت عن أنيابي

كشر تكشيرة أشد

فردت بوزي .. ما باليد حيلة .. استسلمت

إيه يا أستاذ .. مش سامعني بانادي عليك

شوف التناحة .. الشارع فيه مليون واحد غيري . أنا الأستاذ الوحيد مثلا

قلت له .. أيوه سمعت

طب وما بتردش ليه ؟؟

عشرة جنيه يا حضرات للي يقوللي أنا ليه ما دتلوش على وشه .. نفسي أعرف ايه اللي حاشني

قلت له ماليش مزاج .. خير

رسم ابتسامة زجاجية .. صفراء فاقع لونها

سعادتك كسبت هدية في العرض بتاعنا

معقول ؟

أيوه يا فندم .. أسبوع في شرم الشيخ

إمتى ؟

سعادتك وقت ما تحب

رحت مكمل مشي

إيه يا أستاذ .. مش هتاخد الهدية

لا شكرا .. ماليش مزاج

نط تاني .. لقيته قدام وشي

طب ممكن أسألك سؤال

نعم ؟؟

إيه اللي يخلي حضرتك ترفض عرض مجاني زي ده ؟

بصراحة مش عارف .. بس اوعدك أول ما اعرف هاقولك .. مش انت موجود هنا على طول ؟؟.. هههههههه

مش عارف أنا عقدته .. وللا هو اللي يعقد بلد ؟



وفي المعمورة .. جنب مقر شركة المعمورة للإسكان والتعمير

لقيتهم برضه

أهلا يا أستاذ

أهلا

إحنا من شركة المعمورة للإسكان والتعمير

طبعا شركة محترمة .. ما توقعتش حاجة وحشة

أهلا وسهلا .. خير ان شاء الله

سعادتك كسبت معانا هدية ميكرويف

معقول .. هي الشركة قلبت سلع معمرة وللا إيه

ها ها هاها . ضحكة مصطنعة جدا . أكيد متدرب عليها كويس

لا سعادتك .. ده في السحب اللي بنعمله عشان شاليهاتنا في الساحل الشمالي

وفين الهدية دي

ما هو السحب بالليل ودي الدعوة سعادتك في فندق القبضة الحديدية

أمممممممم .. فندق .. ودعوة .. الفار بدأ يلعب في عبي

وهي الشركة دلوقت بتبني في الساحل الشمالي ؟

بص بعينه لواحد تاني .. وفي لمح البصر استلمني

أهلا يا باشا .. إحنا شركة كمبورة .. ودي نماذج الشاليهات بتاعتنا في قرية الحشكوبلي السياحية

آآآآآآآه .. هو انتو ياو لاد الـ ............ . وبتشقطوني لبعض

ناديت على الأولاني .. بزعيق . خد تعال .. تعال عايزك

التاني .. خير يا باشا .. فيه إيه بس

ولا عبرته

تعال .. كان نفسي بقى أديله قلمين زي عادل إمام في شاهد ما شافش حاجة (هو البيه مش معاكو ؟؟)

بس بحسبة بسيطة لقيته أدي مرتين .. فاكتفيت بدور الضيف احمد في أنا وهو وهي (أنا ميمو يااااااد)

انت مش قلت لي انتو تبع شركة المعمورة

لا سعادتك .. احنا واخدين تصريح من شركة المعمورة .. احنا شركة كمبورة سعادتك

مافيش فايدة

هتروح منهم فين ..

على الله بس ما يكونش حد في المنتدى مندوب دعاية .. ههههههههههه . تحياتي

شاب مصرى جدا
23-05-2005, 04:32 PM
ياترى قابلت حد من الجماعة دول ؟؟


طبعا قابلت منهم كتير جدا و على رايك يا إستاذ صعيدى
دول اكتر من الهم عالقلب

لا وللأسف كمان كنت ضحية من ضحايا الشركات الـ تايم شير
بتاعت الشاليهات إللى حضرتك قابلتهم دول
و بردو عزمونا فى فندق و عملو هيصة و إحنا يا عينى مش فاهمين إن
الموضوع دا كلو فخ ........ بس الحمد لله جت سليمة

ولا إللى تيجى تصحينى من احلى نومة عشان تبيعلى شامبو
معرفش ايه و تفضل تحكى نص ساعة و انا أصلا مش شايفها
حاجة بجد تزهق ....
بس فى الاخر انا بردو مش عاوز اكون قاسى على الشباب إللى
بيكون عامل زى الدبان الِرزل دا لأن زى ما إنتو عارفين
حالة الشباب اليومين دول و إنو لو معملش كده يبقى ولا هيبيع ولا هيشترى
بس أكيد فيه حل تانى .... *4*

و مشكور يا أستاذ صعيدى على إثارة الموضوع و صياغته
بشكل جميل كما عهدنا منك *8*

أخ فى الله
23-05-2005, 05:17 PM
ههههههههههههههههه


موضوع جميل جدا


والناس الرذلة دى بقابلهم فى كل حتة وخصوصا لما بنزل أشترى هدوم

العربى الأول
23-05-2005, 05:25 PM
طيب الشباب ال اتخرج وانتظر لما داب من الأنتظار هيعمل ايه يعنى
زمان كان فيه عندنا وزاره اسمها القوى العامله بتشغل الخريجين مش عارف راحت فين

هما لغوها ولا ايه

وما باليد حيله مفيش قدامهم غير كده وهتلاقيهم شباب خريجين جامعه وناس محترمين بس ربنا ميحوجناش يا استاذ محمد

على فكره الناس دى موجوده فى كل مكان مش بس فى مصر هنا فى الكويت نفس الشئ بس ليهم أساليب مختلفه

يعنى يتصلوا عليك تليفون
ويقولك انت رقمك دخل معانا السحب وكسبت دوره كمبيوتر مجانا الف مبروك
طيب يا سيدى شكرا وبعدين
الدوره دى عباره عن دورات مدمجه 3 دورات فى بعض
ما شاء الله 3 دورات ببلاش
لأ يا سيدى احنا هنعطيك واحده ببلاش والتانيين على حسابك
وغير كده حاجات تانى كتير

ال يتصل عليك ويقولك كسبت ثلاجه

وال يقولك كسبت اسبوع فى شيراتون القاهره وشامل التذاكر
بس مش هتدفع غير رسوم بسيطه كده يعنى
كام الف دينار علشان الأفطار على حسابك طبعا وحضرتك عارف أزمة الزيت اليومين دول وانت فاهم ان الفول مش هينفع من غير زيت ونظافة الغرفه وشوية حاجات كده

وربنا يساعدنا على أكل العيش

osha
23-05-2005, 06:27 PM
بالنسبة لشباب المصريين الأول كنت باتضايق بشدة منهم واتعامل معاهم بفظاظة - وبعدين فكرت كام واحد بيعمل زيي ? اكيد كتير
طيب ليه الشاب ده مستحمل معاملة زي دي?
اكيد لانه مش لاقي فرصة عمل افضل من كده - لا واسطة ولا لغة ولابابي ومامي اصحاب شركة كبيرة يفرضوه وهو جاهل على ناس افضل منه!!!
ولكن هنا - في امريكا - الوضع مختلف تلاقي تظام تدبيس فعلا
تلاقي حد بيكلمك في التليفون ويفضل يتكلم معاك بسرعة او بلكنة غريييية بحيث ماتبقاش فاهم هو اصلا بيقول ايه وفي الآخر يسألك اوكي? أعرف حد قال بمنتهى البراءة اوكي!! لقى نفسه مدبس في مجلة كومبيوتر لمدة سنة بحوالي 40 دولار!!
وخد من ده كتيييييييييير
حتى معهد السرطان هنا نصابين
طلبوا تبرع ب 25 دولار
ارسلنا لهم شيك
بعد اسبوع فضلوا يتصلوا يقولوا الشيك ماوصلش الشيك ماوصلش
بمنتهى حسن النية ارسلنا شيك آخر بنفس القيمة
تخيل ايه اللي حصل?
فوجئنا ان الشيكين اتصرفوا سوا في يوم واحد !!
اللي قالوا عليه ضاع والجديد كمان!!!
فيه نصب اكثر من كده ????

الصعيدي
23-05-2005, 09:59 PM
طبعا قابلت منهم كتير جدا و على رايك يا إستاذ صعيدى
دول اكتر من الهم عالقلب

لا وللأسف كمان كنت ضحية من ضحايا الشركات الـ تايم شير
بتاعت الشاليهات إللى حضرتك قابلتهم دول
و بردو عزمونا فى فندق و عملو هيصة و إحنا يا عينى مش فاهمين إن
الموضوع دا كلو فخ ........ بس الحمد لله جت سليمة

ولا إللى تيجى تصحينى من احلى نومة عشان تبيعلى شامبو
معرفش ايه و تفضل تحكى نص ساعة و انا أصلا مش شايفها
حاجة بجد تزهق ....
بس فى الاخر انا بردو مش عاوز اكون قاسى على الشباب إللى
بيكون عامل زى الدبان الِرزل دا لأن زى ما إنتو عارفين
حالة الشباب اليومين دول و إنو لو معملش كده يبقى ولا هيبيع ولا هيشترى
بس أكيد فيه حل تانى ....

و مشكور يا أستاذ صعيدى على إثارة الموضوع و صياغته
بشكل جميل كما عهدنا منك


هههههههه .. ربنا يصبرك زي ما بيصبرني .. المشكلة انهم مش صادقين في كلامهم .. ده اللي بينرفز الواحد .. ولغاية ما يلاقوا حل تاني الواحد لازم يستخبى منهم قد ما يقدر .. سعدت بمشاركتك أخي الشاب مصري جدا .. تحياتي *8*

ماما زوزو
23-05-2005, 10:07 PM
بسم الله الرحمن الرحيم
يااااااااااااااااااااه
ياما ياصعيدى دول اكتر
من الهم على القلب...

الصعيدي
24-05-2005, 07:28 AM
ههههههههههههههههه
موضوع جميل جدا
والناس الرذلة دى بقابلهم فى كل حتة وخصوصا لما بنزل أشترى هدوم

آآآآآه .. لسه كنت من يومين في جرين بلازا .. مول عندنا في اسكندرية .. باشتري هدوم برضه .. ولقيتهم لابدين في الدرة .. نفدت منهم بأعجوبة .. عارف .. ده اللي خلاني أكتب الموضوع ده .. نورتنا يا عبد الله *8*

محمد فاروق
24-05-2005, 07:46 AM
الصعيدى تانى ... يامرحبا يامرحبا

ايه النور ده

طبعا موضوع جميل كالعادة ...

كلنا طبعا قابلنا الناس دى بس الحمد لله اخوك بيديهم وش خشب زان انما ايه ... كده !!!


والحمد لله انى مابنزلش كتير عشان ماعقدش الشباب الصغير ..هههههههه

محمد فاروق

بهجه
24-05-2005, 08:17 AM
موضوع جميل ،،
فعلا قابلت من فتره طويله يعني من سنه تقريبا مندوب ولزق فيني انا وزوجي هسألكم سؤال لو جاوبتوا معانا هتفوزوا برحله لمده اسبوع للبلد اللي بتختاروها وفعلا زوجي جاوب صح والاخ ادانا ورقه وقال الحقوا بسرعه روحوا للمكتب عشان تستلموا الورقه اللي بعدين عن طريقها نقدر نعمل التذكره وفعلا سمعنا الكلام ورحنا مع انا احنا مش عايزين بس اول مره بتحصل معانا الحكايه دي ورحنا ولقينا الزحمه هناك بس متأخرناش ودخلنا بسرعه وفعلا ادونا الورقه ورجعنا البيت ولغاية اليوم معرفش فين الورقه:d احنا عاررفين ان المسأله فيها ان؟؟؟؟


ومره ثاينه رحنا للمجمع التجاري شفناه هناك وهو نفسه وحاول يلحقنا :d وكنا بنهرب منه خخخخخ حاجه بضحك وبالفعل قدر انه يوصل لنا وقلنا له انك سألتنا في المره اللي فاتت....... وراح عننا


وبعد فتره طويله كمان حصل نفس الشيء وحاولنا نهرب بس مسك زوجي وانا كششششرت وقلت وانا معصبه تعاااااااااال مش عايزززززززين


فعلا بيكذبون بيقول لنا التذاكر هتخلص وهمه صار لهم اكثر من سنه ولسه بيسألو الناس وبيدوهم التذاكر ...ناس مجانين واحنا كمان مجانين اللي بنصدقهم:d

الصعيدي
24-05-2005, 08:26 AM
طيب الشباب ال اتخرج وانتظر لما داب من الأنتظار هيعمل ايه يعنى
زمان كان فيه عندنا وزاره اسمها القوى العامله بتشغل الخريجين مش عارف راحت فين
هما لغوها ولا ايه
وما باليد حيله مفيش قدامهم غير كده وهتلاقيهم شباب خريجين جامعه وناس محترمين بس ربنا ميحوجناش يا استاذ محمد


أهلا عربي حبيبي .. والله يا أخي أنا مستاء من سلوكهم مش منهم كأشخاص .. سلوكهم صعب جدا



على فكره الناس دى موجوده فى كل مكان مش بس فى مصر هنا فى الكويت نفس الشئ بس ليهم أساليب مختلفه
يعنى يتصلوا عليك تليفون
ويقولك انت رقمك دخل معانا السحب وكسبت دوره كمبيوتر مجانا الف مبروك
طيب يا سيدى شكرا وبعدين
الدوره دى عباره عن دورات مدمجه 3 دورات فى بعض
ما شاء الله 3 دورات ببلاش
لأ يا سيدى احنا هنعطيك واحده ببلاش والتانيين على حسابك
وغير كده حاجات تانى كتير
ال يتصل عليك ويقولك كسبت ثلاجه
وال يقولك كسبت اسبوع فى شيراتون القاهره وشامل التذاكر
بس مش هتدفع غير رسوم بسيطه كده يعنى
كام الف دينار علشان الأفطار على حسابك طبعا وحضرتك عارف أزمة الزيت اليومين دول وانت فاهم ان الفول مش هينفع من غير زيت ونظافة الغرفه وشوية حاجات كده
وربنا يساعدنا على أكل العيش


شفت .. وهم يا ريس .. وهم .. أنا واحد صاحبي مرة وقع معاهم .. وراح لهم على فندق بالليل .. وكان خلاص هيلبسوه شاليه ب 200 ألف جنيه .. ونفد منهم بأعجوبة .. بعد حوالي 4 ساعات .. سجن .. مش ممكن .. وقعد يحكيلي .. فيلم بيتمثل قدامه .. وهو في الغيبوبة .. ربنا يستر وما نتدبسش زيه .. تحياتي عربي باشا *8*

أسيرة الصبر
24-05-2005, 08:29 AM
هههههههههههههههههههههههههههههههههههههههههههههههههه ه


احنا اللي عندنا شويه ذوق بيتصلوا تلفون ويبلغونا بالكلام ده واحنا نكوق اذوق منهم ونقفل الخط بوشهم

ههههههههههههههههههه

انا اللي عاجبني بالموضوع اسلوبك ياصعيدي ماشاءالله عليك خفة دم روعه.........طالع عليّه......ههههههههه

تحياتي

R17E
24-05-2005, 09:42 AM
خلاص أنا غاسلاً يدي منك من يوم ما طلعت بتخاف من الكلب ها ...*5*
روح يا شيخ و ما تبقاش تغيب *5*

سبحان الله حتي الايقونات بالإكراه من أختيار ابن أختي الصغير

الواحد نفسه يشعر بالأستقلال بقي

محمد فاروق
متتأخرش في الرد علي الناس في الموضوع ده ... تراهم مستنيين والله

أحمد ناصر
24-05-2005, 09:58 AM
هههههههههه
أضحك الله سنك يا محمد
المفاجأة اللى هأقولهالك
إنى كنت هأشتغل زمان فى شركة تايم شير وكان مقرها فى شارع عباس العقاد
بس لم أكن مثل الغتيت اللى بيجرى وراك فى الشارع
لكنهم كانوا يعدوننى لأن أكون الأغتت.. و الأغتت هو الشخص اللى ضارب الكرافتة التمام ولابس البدلة المتنشية ومستنى حضرتك فى مبنى الشركة علشان يصدع دماغ حضرتك لمدة ساعتين تقريبا عن المصيف وتكاليفه وحساب المبلغ الذى ستدفعه إذا صيفت بدماغك
والمميزات التى ستحصل عليها عندما تشترى وقت عندهم فى الشركة
ولكننى لم أستمر إسبوع على بعضه (أقل من فترة التمرين)
لإنى إكتشفت إنى غتيت آه لكن مش لدرجة إنى أشتغل فى الشركة دى
*109*

الصعيدي
24-05-2005, 12:37 PM
بالنسبة لشباب المصريين الأول كنت باتضايق بشدة منهم واتعامل معاهم بفظاظة - وبعدين فكرت كام واحد بيعمل زيي ? اكيد كتير
طيب ليه الشاب ده مستحمل معاملة زي دي?
اكيد لانه مش لاقي فرصة عمل افضل من كده - لا واسطة ولا لغة ولابابي ومامي اصحاب شركة كبيرة يفرضوه وهو جاهل على ناس افضل منه!!!
ولكن هنا - في امريكا - الوضع مختلف تلاقي تظام تدبيس فعلا
تلاقي حد بيكلمك في التليفون ويفضل يتكلم معاك بسرعة او بلكنة غريييية بحيث ماتبقاش فاهم هو اصلا بيقول ايه وفي الآخر يسألك اوكي? أعرف حد قال بمنتهى البراءة اوكي!! لقى نفسه مدبس في مجلة كومبيوتر لمدة سنة بحوالي 40 دولار!!
وخد من ده كتيييييييييير
حتى معهد السرطان هنا نصابين
طلبوا تبرع ب 25 دولار
ارسلنا لهم شيك
بعد اسبوع فضلوا يتصلوا يقولوا الشيك ماوصلش الشيك ماوصلش
بمنتهى حسن النية ارسلنا شيك آخر بنفس القيمة
تخيل ايه اللي حصل?
فوجئنا ان الشيكين اتصرفوا سوا في يوم واحد !!
اللي قالوا عليه ضاع والجديد كمان!!!
فيه نصب اكثر من كده ????

الأخت الفاضلة .. أم محمد .. والله انا كمان صعبان عليا الشباب دول *13* .. وباحاول لو ثبتوني أتكلم معاهم بذوق .. بس لو حد منهم كذب عليا ما باستحملش .. مش عارف اعمل ايه .. عشان كده باحاول ازوغ منهم
بس معقول فيه كده برضه في أمريكا .. وفي جهات رسمية كده .. حلوة حكاية الشيك دي بصراحة :d .. على العموم لو حبيتوا تتبرعوا تاني ممكن أبعت لكم رقم الحساب .. وكفاية عليا شيك واحد .. ههههههههه .. تقبل الله منكم *8*

أمة الله
24-05-2005, 02:22 PM
بسم الله الرحمن الرحيم
السلام عليكم و رحمة الله و بركاته
هههههههههههههه وقعتنى من على الكرسى و كل اللى رايح و اللى جاى فى المكتب بقى يتفرج على
اسلوبك رائع كوميدى جدا و طبعا كلهم شفناهم و جرينا منهم و جرىوا ورايا منهم واحده شافتنى مع بابيا قالت لى زوج و زوجه قلت دى بتستعبط امت اشتغلتها قلت لها ده خطيبى و كنت شايله نهال على ايدى بصط لنا و استغربت و قالت لى طب انت كسبتوا معانا هديه قلت لأبويا طب شوف الموضوع ده يا حبيبى و هات لى الهديه بس ابويا ما عندوش طققان قال لها لما نبقى نتجوز هانبقى نيجى لحضرتك و بوظ على الفيلم
تسلم ايدك يا محمد و مستنيين موضوعات من دى كتيييييييييير

شقاوة مجنونة
24-05-2005, 06:16 PM
انا قبلت منهم كتير لو حضرتك من اسكندرية انزل محطة الرمل وانت تشفهم اكتر من الهم على القلب واشتغالات كتيرة هات 25 جنية وكسبتى معانا رحله 5 افراد لشرم الشيخ والسحب فى فندق مش عارف اية نصبين على عينه

سفاح مصر
24-05-2005, 09:47 PM
يااااااااااااااااا لهوي دول اكتر من السجاير الفرط عندنا هنا في المنصورة :)

عـزالديـن
24-05-2005, 11:39 PM
طيب يامحمد يمكن فى الشارع بتلاقى حل وبتنفذ خطة الهروب الكبير

وفى التليفون بتلاقى حل بالرغم انهم بيتصلوا فى مواعيد متأكدين فيها انك موجود فى البيت (السادسة صباحاً )

طيب ممكن تدلنى على حل فى الجماعة الى بيجولك لحد البيت ومبيشلوش ايدهم من على الجرس

واحد منهم لم يكتفى باحتراق الجرس وتوقفه عن العمل وكان إصراره كبير فأكمل بالطرق على الباب وفى النهاية خفت من انه يكسر الباب فتحت له (افتكرت انى عملت حاجة ونظام افتح ولا نكسر الباب ) .... وانت طبعاً عارف الابتسامة ومجربها كويس .... بالرغم انى معلق يافطه محترمة على الباب مكتوب عليها ممنوع الاقتراب لمندوبى المبيعات وحاطت لهم صورة جمجمة وعليها علامة الخطر

قولى أعمل ايه

اريد حلاً ( حلاً ولاحظ التنوين بالفتحة فوق الالف حتى لايظن احد أننى اريد حلا :d )

ألف شكر حبيبى على المواقف الظريفة واسلوبك الشيق

تقبل أرق التحيات

الصعيدي
25-05-2005, 05:50 AM
بسم الله الرحمن الرحيم
يااااااااااااااااااااه
ياما ياصعيدى دول اكتر
من الهم على القلب...

آه والله يا ماما زوزو .. كنت فاكر ان انا بس اللي متعقد منهم .. طلعت ظاهرة عامة .. ياترى بتعملي ايه معاهم ؟

الصعيدي
25-05-2005, 09:04 AM
الصعيدى تانى ... يامرحبا يامرحبا
ايه النور ده
طبعا موضوع جميل كالعادة ...
كلنا طبعا قابلنا الناس دى بس الحمد لله اخوك بيديهم وش خشب زان انما ايه ... كده !!!
والحمد لله انى مابنزلش كتير عشان ماعقدش الشباب الصغير ..هههههههه
محمد فاروق

ههههههههههههه .. خشب زان .. شديدة دي يا بو حميد .. ههههههههه :d .. بس كده دي يعني ايه .. كده *225* وللا *225* ؟؟.. هههههههه .. بس سيبك انت .. انت كده .. :d:d

الصعيدي
25-05-2005, 10:07 AM
موضوع جميل ،،
فعلا قابلت من فتره طويله يعني من سنه تقريبا مندوب ولزق فيني انا وزوجي هسألكم سؤال لو جاوبتوا معانا هتفوزوا برحله لمده اسبوع للبلد اللي بتختاروها وفعلا زوجي جاوب صح والاخ ادانا ورقه وقال الحقوا بسرعه روحوا للمكتب عشان تستلموا الورقه اللي بعدين عن طريقها نقدر نعمل التذكره وفعلا سمعنا الكلام ورحنا مع انا احنا مش عايزين بس اول مره بتحصل معانا الحكايه دي ورحنا ولقينا الزحمه هناك بس متأخرناش ودخلنا بسرعه وفعلا ادونا الورقه ورجعنا البيت ولغاية اليوم معرفش فين الورقه:d احنا عاررفين ان المسأله فيها ان؟؟؟؟
ومره ثاينه رحنا للمجمع التجاري شفناه هناك وهو نفسه وحاول يلحقنا :d وكنا بنهرب منه خخخخخ حاجه بضحك وبالفعل قدر انه يوصل لنا وقلنا له انك سألتنا في المره اللي فاتت....... وراح عننا
وبعد فتره طويله كمان حصل نفس الشيء وحاولنا نهرب بس مسك زوجي وانا كششششرت وقلت وانا معصبه تعاااااااااال مش عايزززززززين
فعلا بيكذبون بيقول لنا التذاكر هتخلص وهمه صار لهم اكثر من سنه ولسه بيسألو الناس وبيدوهم التذاكر ...ناس مجانين واحنا كمان مجانين اللي بنصدقهم:d

ههههههههههههه .. لا أنا ما استحملش حاجة زي كده .. وفعلا باشوف ناس بيقفوا ويتجاوبوا معاهم وبيكون عندهم أمل يكسبوا حاجة من وراهم .. اللي عنده استعداد يستحمل بقى .. شكرا أخت بهجة على مشاركتك الجميلة *8*

ديدي
25-05-2005, 02:29 PM
ههههههههههه
اخى العزيز الصعيدى
حلو اوى اسلوبك فى سرد الواقع المؤلم دا
انا باحاول قدر الامكان تفادى التعامل معهم

سـلـوى
25-05-2005, 02:34 PM
هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههههههههههههههههه............الخ


ربنا يضحك قلبك علطول يا استاذ محمد

اسلوبك نفسة رهييييب

دول لازقين عندنا ىف المنصورة فى الاماكن اللى الناس بتروحها غالبا
و ما بيصدقوا يلاقوا اتنين متجوزين او مخطوبين علشان يضحكوا عليهم

و بينادوا عليهم من اخر الشارع هههههههههههههههه

ربنا يهدى الجميع و يوفر لهم شغل احسن من البهدلة و تنزيل من كرامتهم

تسلم يا استاذ محمد

نوسة
26-05-2005, 03:45 AM
ههههههههههههههههههههههههههههههههههههههههه
مش ممكن اسلوبك يا صعيدى وانت بتحكى شيق ولذيذ جدااااااااااااااااااااااااااااااااااا
تعرف وانا عروسة وبقضى شهر العسل فى قرية سياحية على البحر الاحمر استلمونا انا وجوزى فى المطعم وقعد معانا مندوب فى القرية يكلمنا على التيم شير ونظامة وانا اتهبلت بكلامة ومكنش المبلغ كبير مقارنة با المبالغ اللى بنسمعها كان حوالى 75 الف جنية وكان جوزى وقتها او العيلة بمعنى اصح شارين قطعة فى العين السخنة فى قرية تحت الانشاء كانت كلها ب 40 الف جنية وكانت الاول بتتباع ب 15 الف من المحافظة واقل كمان وطبعا دى احنا بنبنيها بنظام معين قيلا 3 ادوار وملتزمين برسومات والوان محددة زى اى قرية
المهم هو ركزعلينا جامد لان واحد من جيرانا كان بيشتغل فى القرية ويعرفنا كويس وركزعليا اكتر
وانا اصريت ناخد اسبوع وقعدت الح على زوجى قعد يقولى لا فيها حاجة غلط كلامة مش مريحنى وانا زى الهبلة لكن جوزى لانة شغلة وتجارتة كلها فى السوق فهمهم وقعد يقنعنى وانا ابدا راسى والف سيف وقولتلة لو انت مش هتاخد هاخد انا فقالى طيب استنى نقعد معاة
وقعد جوزى يحاورة فى الاوقات اللى ناخد فيها الاسبوع طبعا فى اى مكان فى العالم

وشوف يا سيدى
ما نطالبهوش فى وقت الاعياد والاجازات الرسمية انة يجهز لينا مكان
فى الاعياد لا
فى شم النسيم لا
ووقتها اقتنعت انهم شركات نصب لان الكلام بدا يتغير



وطبعا خد من دة كتير فى مجالات كتيرة

الله يرحم شبابنا من النصب والنصابين


موضوعك فعلا تحفة

تحياتى اليك

الصعيدي
26-05-2005, 08:47 AM
هههههههههههههههههههههههههههههههههههههههههههههههههه ه
احنا اللي عندنا شويه ذوق بيتصلوا تلفون ويبلغونا بالكلام ده واحنا نكوق اذوق منهم ونقفل الخط بوشهم
ههههههههههههههههههه
انا اللي عاجبني بالموضوع اسلوبك ياصعيدي ماشاءالله عليك خفة دم روعه.........طالع عليّه......ههههههههه
تحياتي

اللي عندنا أشد من اللي عندكم شوية .. لو رديتي على التليفون ممكن يطلع لك من السماعة .. هههههههه *109*.. ما تحاوليش *8*

الصعيدي
26-05-2005, 08:53 AM
خلاص أنا غاسلاً يدي منك من يوم ما طلعت بتخاف من الكلب ها ...*5*
روح يا شيخ و ما تبقاش تغيب *5*

سبحان الله حتي الايقونات بالإكراه من أختيار ابن أختي الصغير

الواحد نفسه يشعر بالأستقلال بقي

محمد فاروق
متتأخرش في الرد علي الناس في الموضوع ده ... تراهم مستنيين والله

طب ما تحاول تعمل تعديل لدستور البيت وتخلي الأيقونات بالاقتراع السري .. دستوووووووووووووووور .. *109* هههههههه .. ما تخافش أنا دلوقت مش باخاف من الكلب .. بس مش هاقولك باخاف من ايه .. ههههههه .. *109*

الصعيدي
26-05-2005, 09:23 AM
هههههههههه
أضحك الله سنك يا محمد
المفاجأة اللى هأقولهالك
إنى كنت هأشتغل زمان فى شركة تايم شير وكان مقرها فى شارع عباس العقاد
بس لم أكن مثل الغتيت اللى بيجرى وراك فى الشارع
لكنهم كانوا يعدوننى لأن أكون الأغتت.. و الأغتت هو الشخص اللى ضارب الكرافتة التمام ولابس البدلة المتنشية ومستنى حضرتك فى مبنى الشركة علشان يصدع دماغ حضرتك لمدة ساعتين تقريبا عن المصيف وتكاليفه وحساب المبلغ الذى ستدفعه إذا صيفت بدماغك
والمميزات التى ستحصل عليها عندما تشترى وقت عندهم فى الشركة
ولكننى لم أستمر إسبوع على بعضه (أقل من فترة التمرين)
لإنى إكتشفت إنى غتيت آه لكن مش لدرجة إنى أشتغل فى الشركة دى
*109*

لا يابو حميد .. انت مش غتيت .. إنت اللي في القلب . *3* . بس تأكد ان لو ماكنتش انت اللي بتجري ورايا في الشارع .. كنت انا اللي هاجري وراك في الشركة *9* .. عشان تحررررررررررررررم .. ههههههههه .. تحياتي *8*

الصعيدي
26-05-2005, 12:02 PM
بسم الله الرحمن الرحيم
السلام عليكم و رحمة الله و بركاته
هههههههههههههه وقعتنى من على الكرسى و كل اللى رايح و اللى جاى فى المكتب بقى يتفرج على
اسلوبك رائع كوميدى جدا و طبعا كلهم شفناهم و جرينا منهم و جرىوا ورايا منهم واحده شافتنى مع بابيا قالت لى زوج و زوجه قلت دى بتستعبط امت اشتغلتها قلت لها ده خطيبى و كنت شايله نهال على ايدى بصط لنا و استغربت و قالت لى طب انت كسبتوا معانا هديه قلت لأبويا طب شوف الموضوع ده يا حبيبى و هات لى الهديه بس ابويا ما عندوش طققان قال لها لما نبقى نتجوز هانبقى نيجى لحضرتك و بوظ على الفيلم
تسلم ايدك يا محمد و مستنيين موضوعات من دى كتيييييييييير

ههههههههههه .. يظهر هنتبادل الوقوع من على الكراسي .. والله حرام عليكو اللي عملتوه في الجدع .. أنا كنت كاتب الموضوع ده تحت ضغط ان انا زهقت من الجماعة دول .. دلوقت بدأوا يصعبوا عليا .. وطلعت انا أطيب واحد في معاملتهم .. بس نسيتي تكملي بقية القصة وان الراجل ده ساب الشغلانة دي وقرر يبيع فجل بعد الصدمة المخيفة اللي خدها دي .. هههههههه .. أشكرك يا أم نهال على مشاركتك الجميلة .. وتقبلي تحياتي *8*


Photo Gallery