المساعد الشخصي الرقمي

مشاهدة النسخة كاملة : للمهندسين بس / حالة فقر



الصفحات : [1] 2

معاذ رياض
10-04-2005, 11:17 PM
حالة فقر

كان الباشمهندس فهيم في مكتبه بغرفة المعيدين يقلب في ورق أعمال السنة ، يعطي الدرجات عشوائيا ويخصم بسبب أو بدون ،المهم أنه وكما علمه أساتذته يجب أن يكون توزيع الدرجات على شكل الجرس بتاع جاوس ، وفجأة دخل عليه رجل أجنبي .
الأجنبي : Hello .
فهيم : أهلا بالسياح Welcome to Egypt .
الأجنبي (بقرف) : I am working in Egypt since 1990 !
فهيم : بقولك ايه أنا ضعيف في الإنجليزي ، حضرتك عايز ايه؟
الأجنبي : I want to talk to you .
فهيم : أنا مش فاهم برضه .
الأجنبي : Please talk in English .
فهيم : Ana Mesh Fahem Enta 3aez eih ?
الأجنبي : I want to talk to an engineer in English
فهيم : بص بقا ، أنا حاجيبلك واحد يكلمك علشان انت بتستخدم مصطلحات أنا مش فاهمها . انت يا ابني ، روح انده للباشمهندس علام .
طالب : هو فين ؟
فهيم : دور عليه ، أكيد بيتسكع في معمل هنا أو هناك .
* * *
في المعمل كان الباشمهندس علام بيقول للطلبة : هي دي التجربة وده الورق بتاعها ، عايزكم تفهموها كويس علشان أنا حاسألكم فيها.
طالبة : يعني حضرتك مش حاتشرحها لنا ؟
علام : أشرحها لكم ؟ ايه الكسل اللي انتوا فيه ده ؟ انتوا فاكرين أني بقيت علام كده بالساهل ، لازم تتعبوا شوية.
طالبة : بس حضرتك بتاخد مرتب علشان تعلمنا ؟
علام : مرتب ايه يا شاطرة ؟ انتي عارفة أنا باخد كام أصلا ؟ انتي لو تعرفي مرتبي كنتي تطلعي من جيبك وتديلي .
طالبة : طيب ما هو ده اللي أنا باعمله في الدرس !
علام : بتقولي ايه ؟
وكان الطالب الذي ارسله فهيم قد وصل فقال لعلام : يا باشمهندس ، الباشمهندس فهيم عايز حضرتك .
علام : أكيد الطلبة أحرجوه بسؤال ، أنا قلت له كام مرة يتهرب منهم لكن ما فيش فايدة ، أنا رايح أشوفه وراجع لكم على طول ، افهموا التجربة كويس علشان حاتشرحوها لي!
* * *
علام : فيه ايه يا فهيم ، ومين الراجل ده ؟
فهيم : مش عارف ، دخل علي بكلام غريب ، الظاهر أنه بيتكلم انجليزي غير اللي أخدناه في الكتّاب . بقولك ايه يا علام ، لو الحكاية فيها سفر لبره ، متنساش أخوك ، أنت عارف أنا أصلا داخل الكلية علشان أسيب البلد في أقرب فرصة .
علام بالإنجليزي: حضرتك مين وعايز ايه ؟
الاجنبي بالإنجليزي : أنا من البنك الدولي ، ومسئول عن برنامج تطوير التعليم في الدول الشحاتة ، وبعد ما عملنا دراسة عن بلدكم ، عرفنا أن أحد اسباب فشل التعليم الجامعي هو فقر أعضاء هيئة التدريس ، مما يؤثر علي العملية التعليمية ويسبب تسرب المعيدين للعمل في وظائف أخرى .
علام بالانجليزي: انت جاي تعايرنا ولا ايه ؟
الاجنبي بالانجليزي : لا ، أنا حاقدم لكم فرصة للانضمام لمشروع "معا ضد فقر المعيدين" ، وإذا اشتركتم في المشروع حتاخدوا 100 دولار كل اسبوع من البنك ، بس لازم تكونوا ثلاثة على الأقل.
علام بالانجليزي: يعني ما ينفعش أدخل أنا بالثلاثة ؟
الأجنبي بالانجليزي : لا .
علام : اسمع يا فهيم ، الراجل ده حايدينا 100 دولار كل اسبوع منحة من البنك الدولي ، ايه رأيك ؟
فهيم : ده سؤال ؟ طبعا موافق .
علام : طيب بس مش ناخد رأي دكتور كومبلكس الأول ؟
فهيم : لا يا عم ده كل حاجه بيعقدها ، مادام الموضوع يمشي من غيره خلاص .
علام : إذن باقي مشكلة واحدة ، لازم كمان معيد معانا .
فهيم : مفيش غيره مع أني مش طايقه .
علام : قصدك الباشمهندس عارف ؟ صح . روح يا ابني انده على الباشمهندس عارف .
الطالب : هو انتو ما عندكوش غيري ؟
علام : اتحرك بسرعة ، عارف عنده سكشن ، قل له علام بيقولك سيب العيال وتعالى فورا .
* * *
في نفس الوقت كان عارف في السكشن بيقول للطلاب : وآخر نسخة من الشيت كانت معايا في الشنطة بس أنا نسيت الشنطة كلها في البيت . معلهش ، افترضوا ان الشيت معانا ، أنا فاكر شكل أول مسالتين وكام رسمة على حبة أرقام ، أهو نمشي حالنا .
طالب : لو سمحت يا باشمهندس ، الشيت اللي فات مش معانا ومش كامل في المكتبة ؟
عارف : وأنا أعمل لك أيه ؟ شوف حد يكون معاه وصور نسخة . وياريت تعمل لي واحدة . أصل نسختي ضاعت .
وهنا دخل الطالب الذي أرسله علام وقال لعارف : الباشمهندس علام بيقول لحضرتك تقلب العيال وتروح له بسرعة ، هو قاعد مع واحد أجنبي والظاهر في حاجه مهمة.
عارف : طيب يا جماعة ، أنا مضطر أمشي. بكره عايز أشوف مع كل واحد حل الشيت الأخير كاملا بالارقام ، وأي واحد أرقامه تطلع زي زميله ، هما الاثنين صفر !
طالب : بس يا باشمهندس ، فيه حاجة كنت عايز اسأل عليها ..
عارف : بعدين ، فكر فيها لوحدك حاتعرفها ، وإذا معرفتهاش يبقى أكيد أنا مش حاعرفها !
* * *
عارف : ايه يا علام ؟ مين الراجل ده ؟ شكله كده من بتوع حقوق الانسان وحايخرب بيتنا .
علام : لا ، ده راجل طيب حايدينا 100 دلار كل اسبوع ، بس عايزين موافقتك . ممكن توقع هنا علشان تستلم أول مائة ، وكل اسبوع حايوصلك زيهم ، لغاية ما التعليم الجامعي في مصر يتحسن ، يعني حاناخدهم للأبد ، يلا وقع خلينا نقبض .
عارف (يوقع بغير اقتناع) : أنا مش مستريح للموضوع ده ، الدكتور كومبلكس ما قالش حاجه ؟
فهيم : كومبلكس ما يعرفش حاجه عن الموضوع ، ده حايفضل سر بينا.
الأجنبي (في سره بالانجليزي) : والله ماهم نافعين ، بس أنا باعمل اللي طلبوه مني في البنك وخلاص.
* * *
بعد اسبوعين ، في غرفة المعيدين ، قال طالب لفهيم : ايه ده با باشمهندس ، أنا أول مرة أجيب الدرجات العالية دي ، مع أني ماحليتش كويس في الامتحان .
فهيم : مش مهم الامتحان ، أنا عارف انك كويس وبتجتهد معايا في السكاشن . ثم كل الدفعة واخده نفس درجتك تقريبا ، حتى الطالب اللي محضرش الامتحان عملت له امتحان خاص به وجاب نفس الدرجة !
الطالب : ياه دا حضرتك اتغيرت قوي ، ياترى ايه السر ؟
فهيم : سر ايه يا ولد ؟ مفيش سر ولا حاجة اتفضل على سكشنك بسرعة .
* * *
وفي المعمل :
علام : وده كتاب فيه شرح للتجربة الأصلية اللي احنا بنحاول نعمل واحدة زيها هنا ، وبعد ما شرحتها لكم بالتفصيل ، فيه أسئلة ؟
طالبة : غريب يا باشمهندس ، حضرتك كنت مش بتشرح أي تجربة زمان إلا في الدرس . دلوقت لغيت الدرس خالص.
علام : ازاي بس الكلام ده ؟ أنا باخد فلوس علشان أعلمكم ، ازاي أهين نفسي واروح عندكم البيت وأخوكي الصغير يضربني على قفايا علشان مبلغ تافه .
طالبة : طيب أنا كنت عاوزه أستعير الكتاب ده ، هو حاضرتك سارقه قصدي مستعيره من مكتبة ايه ؟
علام : مستعيره ايه ، ده أنا شاريه مخصوص علشان التجربة ، ممكن تستعيريه مني بس ترجعيه بسرعة علشان ممكن زمايلك يحتاجوه.
* * *
الباشمهندس عارف في السكشن :
عارف : وده الشيت الجديد ، أنا صورت لكل طالب نسخة ، وكمان طبعت لكم الورق ده من على الأنترنت علشان الموضوع اللي كنتم مش فاهمينه المرة اللي فاتت .
طالب : بس احنا خلاص فهمناه .
عارف : خلاص مش مشكلة ، أنا كمان جبت لكم اسماء مواقع كويسة تدخلوا عليها ، وكلمت بروفيسور من النمسا حايكون اون لاين علشان تعملوا شات معاه وتسألوه عن كل حاجة. الراجل ده هوه أحد مؤلفي الكتاب اللي احنا بنشتغل منه ، يعني ماحدش يغلط ويقول اننا شاغلين من نسخ مضروبة من الكتاب ، لغاية ما توصل شحنة الكتب الأصلية اللي أنا بعت أطلبها لكم على حسابي !
الطلاب : ألف شكر يا باشمهندس ..
* * *
في مكتب الدكتور كومبلكس ، كان الثلاثة جالسين معا : عارف و علام وفهيم .
فهيم : تفتكروا الدكتور كومبلكس عايزنا ليه ؟ دا عمره ما سأل عنا.
عارف : أكيد حايشكرنا على المجهود اللي بنعمله مع الطلبة .
علام : على فكره أنا حاسس اننا اتغيرنا خالص بعد موضوع المنحة ده ، مش كده برضه ؟
فهيم : بس زي ما اتفقنا ، الموضوع ده يفضل سر وماحدش يقول له عليه ، أهو شكله جاي هناك .
يدخل كوملبكس ،
يجلس على مكتبه ويقول لهم : ايه يا حلوين اللي انتو عملتوه ده ؟
عارف : احنا مقطعين نفسنا في الشغل مش كده ؟
كومبلكس : لا يا فالح ، أنا قصدي حكاية البنك الدولي .
نظر الثلاثة لبعضهم وقال فهيم : انت عرفت منين ؟
كومبلكس : البنك بعت الفاتورة دي للكلية ، فيها كل المبالغ اللي سلمها لكم ومطلوب سدادها فورا بفوائد 200 % وبالعملة الصعبة!
علام : ازاي يا دكتور ، دا هما قالوا ان الحكاية علشان تطوير التعليم .
كومبلكس : ماهو انتوا حاتفضلوا طول عمركم حمير ، يعني الأجانب حايهتموا بتطوير تعليمنا أكتر منا ؟ فين عقلكم ياباشمفلسين؟ أنا عايز أعرف ازاي تعملوا كده من غير ما تاخدوا رأيي ؟ هو أنا جردل ميه هنا ؟
عارف : لا العفو ، احنا قلنا بس مادام الموضوع مافيهوش مصلحة لحضرتك أكيد حاتعقدوا لنا أو على الأقل تبقى عين حضرتك في الفلوس فتقل بركتها .
كومبلكس : خلاص يا شطار ، اشربوها لوحدكم .
فهيم : طيب وايه موضوع الفوائد ده ؟
كومبلكس : بيقولوا ان تخريج طالب ممتاز حايفيد البلد باكتر من كده. وأنا قلت لهم ان الكلية مالهاش دعوة بالموضوع وان اللي وقعوا عليه هما اللي حايسددوا المبلغ وأرباحه ، وهما مش مستعجلين ، كل ما تتأخروا في الدفع ، الفوائد تزيد وتفضلوا تسددوا في الفوائد بس لغاية ما تفلسوا وتشحتوا .
عارف : يا نهار مش فايت ، دا احنا ضعنا يا علام .
كومبلكس : خدوا الفاتورة واطلعوا برة أنا مش فاضي لكم .
* * *
في غرفة المعيدين :
طالب : ايه ده يا باشمهندس فهيم ، انا كنت عامل احسن من كده في الامتحان ليه درجتي تعبانة كده ؟ دا أنا حتى باشارك معاك في كل السكاشن ؟
فهيم : تشارك ايه وايه علاقة المشاركة والفهم بالامتحان ، انا باصحح الورقة وبس ، ثم ان ورقتك وصلت لي في وقت كنت فيه متضايق ، وطبيعي أنها تيجي فيك .
طالب : طب أنا أعمل ايه دلوقت ؟
فهيم : ادعي ربنا ان ورقة الامتحان اللي جاي ما تجيش عندي في وقت أكون فيه مديون بأربعة آلاف دولار. وبالمرة ادعي لي ربنا يفك ديني !
* * *
وفي المعمل :
طالبة : هو فين الجهاز بتاع التجربة ؟
علام : بعناه ، القسم محتاج فلوس .
طالبة : طيب احنا حانفهم التجربة ازاي ؟
علام : بسيطة ، انتي شكلك مش بتاخدي درس ، ده رقم موبايلي ، اتصلي بي وكل شئ حايكون تمام .
طالبة : بس أنا سمعت ان حضرتك عملت فوائد على ثمن الدرس ، يعني ايه ؟
علام : مش مهم تفهمي ، المهم ان الدرس بقى بضعف ثمنه . معلهش بقا ، كل حاجة بتغلى.
طالبة : صح يا باشمهندس وبالذات الدولار .
علام : ماحدش يجيب لي سيرة الكلب ده !
* * *
وفي سكاشن الباشمهندس عارف :
عارف : يا جماعة اللي عايز يدخل على الأنترنت ، هنا في القسم الساعة بعشرة جنيه .
طالب : بس الساعة بره باثنين جنيه بس .
عارف : أنا عارف ، بس الانترنت عندنا فيها مميزات مش موجوده بره ، مثلا سرعتنا هي الأبطأ – غير مسموح باستخدام الدسكات لنقل الملفات – يوجد أحدث وأكبر عدد من الفيروسات وأخيرا مستحيل تلاقي جهاز فاضي وقت ما تكون عايزه ، لأن الاقبال علينا عالي جدا.
طالب : طيب ايه اخبار الكتب الأصلية اللي حضرتك قلت عليها ؟
عارف : كتب ايه ؟ أنا حانزل بيهم في معرض الكتاب يمكن أعرف أعوض حاجه من الخسارة ، وبعدين من النهاردة الشيت بربع جنيه عند الداده . وكل واحد يكتب اسمه عندها . مش مهم تحل الشيت ، المهم اسمك يكون مكتوب ، وكل ما تشتري أكتر ، فرصتك في النجاح تكتر !
* * *
دكتور كومبلكس جالس في مكتبه ويدق الساعي على الباب : فيه واحد خواجه عايز حضرتك .
كومبلكس : خليه يدخل .
الاجنبي بالانجليزي : مرحبا يا دكتور كومبلكس .
كومبلكس بالانجليزي المكسر : نعم ، أي خدمة أعمل أنا لك أقدر ؟
الاجنبي بالانجليزي : أنا من البنك الدولي ، وكنا عملنا دراسة لتطوير التعليم عندكم ، ولقينا ان سبب تخلف التعليم عندكم هو انشغال الدكاتره بتحصيل أكل العيش وانصرافهم عن التعليم فقلنا نعمل مبادرة "معا ضد فقر الدكاترة" ، وممكن أي دكتور يشترك فيها ويأخد 300 دولار شهريا ، اتفضل حضرتك وقع هنا بس . شكرا ..

معاذ محمد رياض
25 أغسطس 2003


نشرت على موقع www.HandaZa.com

osha
11-04-2005, 05:43 PM
شكرا يا معاذ انا حابعتها لأختي المهندسة بسلامة نية طبعا!!!!!!!!!

أحمد ناصر
11-04-2005, 05:59 PM
*109*
حرام عليك يا معاذ
ضحكتنى بهستيريا

د.أسامة الشناوي
12-04-2005, 10:51 PM
رائعة بحق يا معاذ
تسلم ايدك

معاذ رياض
14-04-2005, 02:38 AM
شكرا يا معاذ انا حابعتها لأختي المهندسة بسلامة نية طبعا!!!!!!!!!

العفو ..

خلي بالك ان الأعمال بالنيات .. مادامت نيتك سليمة يبقى كله تمام .

معاذ رياض
14-04-2005, 02:44 AM
*109*
حرام عليك يا معاذ
ضحكتنى بهستيريا

مغامرات دكتور كومبلكس دي كانت مكسرة الدنيا أيام الكلية ..

كان فيه شخصيات تانية زي دكتور نعسان ودكتور أرفان .. أظن واضح من أساميهم كانوا بيعملوا ايه ..

معاذ رياض
14-04-2005, 02:45 AM
رائعة بحق يا معاذ
تسلم ايدك


شكرا لك يا دكتور أسامة ..

محمد فاروق
11-05-2005, 08:29 AM
مغامرات دكتور كومبلكس دي كانت مكسرة الدنيا أيام الكلية ..

كان فيه شخصيات تانية زي دكتور نعسان ودكتور أرفان .. أظن واضح من أساميهم كانوا بيعملوا ايه ..

جميلة جدا يا معاذ

وياريت ماتحرمناش من بقية الحلقات

محمد فاروق

حسام عمر
11-05-2005, 09:02 AM
هههههههههههههههههه ظريفه جدا اخى معاذ

سـلـوى
11-05-2005, 09:43 AM
ههههههههههههههههه جميلة يا معاذ تسلم بجد

و للاسف دة اللى بيحصل ان المعيد او الدكتور و خاصة المعيد و مش كلهم طبعا بيهتموا بجمع المال

تقبل تحياتى

فى سلامة و حفظ الله دائما

شاب مصرى جدا
11-05-2005, 11:11 AM
جميلة جدا جدا يا معاذ .. تسلم ايدك
و بصراحة عجبتنى جدا طريقتك فى الكتابة

بس متتأخرش بقى فى باقى الحلقات

yasmeen
12-05-2005, 03:33 PM
هههههههههههههههههه
جميلة يا معاذ
بس اوعى حد من الدكاترة يقرا الكلام ده

Iman
12-05-2005, 03:49 PM
هههههههههههههههههههههههههههههههههههههههههههههههههه ههه
حلوة جداً يا معاذ

الحمد لله إن الواحد ماطلعش معيد
يلا مستنيين أرفان ونعسان
:d :d :d

ماما زوزو
12-05-2005, 03:55 PM
ههههههههههههههههههههههههه
ههههههههههههههههههههه
اضحك الله سنك يامعاذ
سلمت يدك يابنى...

عـزالديـن
13-05-2005, 02:23 AM
معاذ
البنك الدولى وجد أن أسلم طريقة لتطوير المنتدى هو رفع الحالة المادية للأعضاء
ولهذا بصفتى مندوب عن البنك وبصفتك عضو منتدى أعرض عليك 200 دولار اسبوعياً تستخدمها فى تطوير المنتدى
تفضل وقع على الاشتراك


تقبل أرق تحياتى

أشجان الليل
18-05-2005, 05:29 PM
هههههههه
معاذ.. حلوه جدا جدا..
أنا عاوزه أقرأ باقى المغامرات!!
أرجووووووووووووك

wolfegypt
01-06-2005, 03:50 PM
رغم اني قريت الحلقة متأخر جدا بس حسيت كاني عايز اقراها ميت مرة ومرة
تسلم ايديك ياباشا
KONSOLE:\>TranS /ME /IntO FREEEEEEEEEEEEMAAAAAAAN


IF freedom is outlawed only outlaws will have freeeeeeeeedddddooooommm.

ديدي
01-06-2005, 06:46 PM
هههههههههه
اضحك الله سنك يا معاذ
شكرا وفى انتظار باقى الحلقات.

سمـاء
01-06-2005, 07:17 PM
معاذ

حين أقرأ اسمك على قصة أعرف أنها ستمتعنى جدا...

وهذه القصة أضحكتنى حقا وأعادتنى لذكريات الكلية...
ويبدو أن بعض الاساتذه لا يتغيرون أبدا....

لكن لماذا الهندسة بالتحديد؟؟؟؟؟؟ فمعيديك وأساتذتك فى كل الكليات....

شكرا على فكرك المتميز واسلوبك الرشيق...

سماء

civil2006c
05-06-2005, 10:28 AM
احمد ربنا انهم مالموش الفلوس دي من الطلبة

معاذ رياض
17-06-2005, 01:28 AM
هههههههههههههههههه ظريفه جدا اخى معاذ
شكرا أخى حسام ..

مرحبا بك دائما .

معاذ رياض
17-06-2005, 01:32 AM
ههههههههههههههههه جميلة يا معاذ تسلم بجد

و للاسف دة اللى بيحصل ان المعيد او الدكتور و خاصة المعيد و مش كلهم طبعا بيهتموا بجمع المال

تقبل تحياتى

فى سلامة و حفظ الله دائما

تقبلنا تحياتك يا باشمهندسة ..

خلى بالك من فلوسك وما تخليش حد دكتور ولا معيد ياخدهم منك ..

معاذ رياض
17-06-2005, 01:40 AM
جميلة جدا جدا يا معاذ .. تسلم ايدك
و بصراحة عجبتنى جدا طريقتك فى الكتابة

بس متتأخرش بقى فى باقى الحلقات


متشكر خالص ..
تابع أعمالى القادمة ودور على الأعمال السابقة لو كنت ما قرأتهاش..
حاتلاقى لى قصص كثيرة فى المنتدى.
دا لو كانت القصة عجبتك فعلا .. مش مجاملة وخلاص .

معاذ رياض
17-06-2005, 01:53 AM
هههههههههههههههههه
جميلة يا معاذ
بس اوعى حد من الدكاترة يقرا الكلام ده

تصورى فيه معيد من كليتنا قرأ القصة فى مجموعة بريدية وعمل reply يشكرنى عليها !

والله ده حصل .

معاذ رياض
17-06-2005, 02:03 AM
هههههههههههههههههههههههههههههههههههههههههههههههههه ههه
حلوة جداً يا معاذ

الحمد لله إن الواحد ماطلعش معيد
يلا مستنيين أرفان ونعسان
:d :d :d


الحمد لله ان الواحد اتخرج بسلام ..

عقبال كل اللى لسه بيحاربوا أعضاء هيئة التدريس حتى الآن .

معاذ رياض
17-06-2005, 02:07 AM
ههههههههههههههههههههههههه
ههههههههههههههههههههه
اضحك الله سنك يامعاذ
سلمت يدك يابنى...
ماما زوزو

أهلا بك .. وسعدت بمرورك .

معاذ رياض
17-06-2005, 02:09 AM
معاذ
البنك الدولى وجد أن أسلم طريقة لتطوير المنتدى هو رفع الحالة المادية للأعضاء
ولهذا بصفتى مندوب عن البنك وبصفتك عضو منتدى أعرض عليك 200 دولار اسبوعياً تستخدمها فى تطوير المنتدى
تفضل وقع على الاشتراك


تقبل أرق تحياتى
معقول 200 دولار بحالهم !!

أنا موافق طبعا ، هو فيه حد يرفض فرصة زي دي ؟

معاذ رياض
17-06-2005, 02:13 AM
هههههههه
معاذ.. حلوه جدا جدا..
أنا عاوزه أقرأ باقى المغامرات!!
أرجووووووووووووك
بس كدة ..
انت تأمرى .

أنا ضفت حلقة جديدة هنا :
http://www.egyptsons.com/misr/showthread.php?t=33090

معاذ رياض
17-06-2005, 02:16 AM
رغم اني قريت الحلقة متأخر جدا بس حسيت كاني عايز اقراها ميت مرة ومرة
تسلم ايديك ياباشا
KONSOLE:\>TranS /ME /IntO FREEEEEEEEEEEEMAAAAAAAN


IF freedom is outlawed only outlaws will have freeeeeeeeedddddooooommm.
ده بحصل لى برضه ، مع انى اللى كاتبها بس باحب أقراها تانى وباضحك عليها ..

معاذ رياض
17-06-2005, 02:18 AM
هههههههههه
اضحك الله سنك يا معاذ
شكرا وفى انتظار باقى الحلقات.
العفو ..
فيه حلقة هنا : http://www.egyptsons.com/misr/showthread.php?t=33090

وفيه قصص تانيه كوميدية فى قاعة فك التكشيرة ..

معاذ رياض
17-06-2005, 02:29 AM
معاذ

حين أقرأ اسمك على قصة أعرف أنها ستمتعنى جدا...

وهذه القصة أضحكتنى حقا وأعادتنى لذكريات الكلية...
ويبدو أن بعض الاساتذه لا يتغيرون أبدا....

لكن لماذا الهندسة بالتحديد؟؟؟؟؟؟ فمعيديك وأساتذتك فى كل الكليات....

شكرا على فكرك المتميز واسلوبك الرشيق...

سماء

متشكر خالص على المديح الهائل ده من كاتبة عظيمة زى سعادتك.
أنا باكتب عن الهندسة لأنى كنت فيها .. وممكن اللى حصل ده يكون فى أى كلية تانية طبعا. الدكاترة هما الدكاترة والمعيدين هما المعيدين فى أى كلية .

n3na3aah
17-06-2005, 10:33 AM
حلوه قوي معاذ تسلم ايدك

ابن البلد
17-06-2005, 11:18 AM
حمدلله علي السلامة معاذ
كنت فين يا راجل الفترة دي كلها
منورنا :)

معاذ رياض
18-06-2005, 10:50 AM
حلوه قوي معاذ تسلم ايدك

الله يسلمك ..

يارب باقى القصص تعجبك برضه.

معاذ رياض
18-06-2005, 10:59 AM
حمدلله علي السلامة معاذ
كنت فين يا راجل الفترة دي كلها
منورنا :)

الله يخليك يا ريس (حلوة يا ريس دى ؟) ..

المنتدى منور بأهله وبسعادتك طبعا ..

Hesham Nassar
15-07-2005, 02:48 PM
معلش بقى .. أنا مش مهندس ..http://haridy.com/ib/images/smilies/blush2.gif

بس حبيت أقولك شكراً ع القصه يا هندسه .. http://www.egyptsons.com/misr/images/smilies/old/thumbsup.gif


.

معاذ رياض
15-07-2005, 03:32 PM
معلش بقى .. أنا مش مهندس ..http://haridy.com/ib/images/smilies/blush2.gif

بس حبيت أقولك شكراً ع القصه يا هندسه .. http://www.egyptsons.com/misr/images/smilies/old/thumbsup.gif


.

العفو يا هشام ..
فى جزء تانى من القصة موجود برضة .
وكمان قصص تانية ليا يا رب تعجبك هيا كمان.

DodiFodi
30-03-2006, 01:02 AM
ههههههههههههه تسلم
تربت يداك

معاذ رياض
31-03-2006, 10:36 AM
حلوة تربت يداك دي ..

بتحسسني أني عايش في صدر الأسلام ..

:-)

ميمة اسلام
31-03-2006, 01:43 PM
تسلم علي الموضوع العسل يا معاذ
سكر واللهي
وعلي فكرة حتي لو خد منحة من البنك برضة مش حيدرسة بضمير
اللي فية طبع مبيغروش
اسالني انا
الله يكون في عوني منهم

معاذ رياض
08-04-2006, 10:22 PM
مرحبا يا ميمة ،

أنا معاكي أنه لا المنحة ولا كل فلوس الدنيا حاتخلي الناس دي دماغها تتصلح ..

ربنا يرحمنا منهم بقى ..

summar
30-04-2006, 07:55 AM
ههههههه..مضحكة وخيالية شوية
عارف وفهيم وعلام؟؟؟ لا ومهندسين؟؟؟لا ومعيدين كمان؟؟
طيب الغلابة اللى زيى يعملو ايه على كده*161*......
مفروض تسموهم باشمهلوسين زى ماحنا مسمين الكلية عندنا
كلية الهلوسة *137*

أمة الله
30-04-2006, 08:42 AM
بسم الله الرحمن الرحيم
السلام عليكم و رحمة الله و بركاته

هههههههههههههههههههههههه و الله جميله و فضلت اضحك لما الناس اتلموا على
يسلموا ايديك الله يبارك فيك

Saipem
09-05-2006, 10:23 AM
جميلة اوووووووووووووووووووووووووووى
بس معلش يعنى بصفتى مهندس الكلام ده مش بينطبق على المهندسيين بس
ده تقريبا جميع التخصصات فى الكليات العملية والادبية معظم المعيدين بيعملوا كده
اهم حاجة الفلوس

معاذ رياض
09-05-2006, 03:38 PM
ههههههه..مضحكة وخيالية شوية
عارف وفهيم وعلام؟؟؟ لا ومهندسين؟؟؟لا ومعيدين كمان؟؟
طيب الغلابة اللى زيى يعملو ايه على كده*161*......
مفروض تسموهم باشمهلوسين زى ماحنا مسمين الكلية عندنا
كلية الهلوسة *137*

هما باشمهلوسين فعلا ، والحمد لله إننا نجونا منهم ..

ربنا يعين كل من هو واقع تحت أيديهم الآن وينجو بجزء سليم من عقله ..

معاذ رياض
09-05-2006, 03:46 PM
بسم الله الرحمن الرحيم
السلام عليكم و رحمة الله و بركاته

هههههههههههههههههههههههه و الله جميله و فضلت اضحك لما الناس اتلموا على
يسلموا ايديك الله يبارك فيك
وعليكم السلام ورحمة الله وبركاته ..

الله يسلمك ..

هناك قصص ساخرة أخرى لي في المنتدى .. يارب تعجبك ..

معاذ رياض
09-05-2006, 04:08 PM
جميلة اوووووووووووووووووووووووووووى
بس معلش يعنى بصفتى مهندس الكلام ده مش بينطبق على المهندسيين بس
ده تقريبا جميع التخصصات فى الكليات العملية والادبية معظم المعيدين بيعملوا كده
اهم حاجة الفلوس

والله أنا خبرتي مع المهندسين وبس ..

لكن أكيد فيه حاجات مشتركة مع باقي التخصصات .. :2:

white clouds
09-05-2006, 04:31 PM
ياااااااااااااااه ايه الجمال ده يا معاذ ضحكتنى ههههههههه
هههههههههههههههههههههههههههههههههههههههههه
الظاهر كل معيدين كليه الهلوسه كده
ربنا يعدى سنينها (البيضا) على خير
بالنسبه لدكتور كومبلكس هو عندنا دكتوره.........ربنا يستر

تحياتى ليك

huntee55
09-05-2006, 05:14 PM
السلام عليكم
بما ان الموضوع عاجبكم كلكم كده يبقي اكيد كلامي مش ح يعجبكم......
ارفض تماما الاستهزاء بالمهندسين لاني علي قناعه ان المهندس والطبيب هم اصحال ارقي مهن في تاريخ البشريه......
اعتذر لو رايي ضايق اي صديق منكم لكن انا قرات الموضوع وكان لازم اقول رايي واعتقد ان ده من حقي...
اشكر الجميع

white clouds
09-05-2006, 05:27 PM
السلام عليكم
وعليكم السلام ورحمه الله وبركاته

بما ان الموضوع عاجبكم كلكم كده يبقي اكيد كلامي مش ح يعجبكم......
ارفض تماما الاستهزاء بالمهندسين لاني علي قناعه ان المهندس والطبيب هم اصحال ارقي مهن في تاريخ البشريه......
اعتذر لو رايي ضايق اي صديق منكم لكن انا قرات الموضوع وكان لازم اقول رايي واعتقد ان ده من حقي...
اشكر الجميع
اولا: دا واقع وبيحصل فى اغلب كليات الهندسه ولكن ليس ما ينطبق على البعض ينطبق على الكل فيه بردو الكويس
ثانيا: طبعا اختلاف الرأى لايفسد للود قضيه
ثالثا: طبعا الطبيب والمهندس شخصيات لها احترامها (انا عن نفسى افتخر انى فى كليه الهندسه ولو ما كنتش حباها ما كنتش دخلتها)
شكرى وتقديرى


Photo Gallery