المساعد الشخصي الرقمي

مشاهدة النسخة كاملة : قطيعة تقطع الرجالة . . . . . و سنينهم



إسلام شمس الدين
16-12-2002, 07:06 AM
وقفت الست بهية تخطب في الستات قائلة :

قال بيقولوا ضل راجل و لا ضل حيطة . . . . .
يا ختي بلا وكسة !


· بذمتك عمرك سمعتي عن حيطة تقعد تشخر طول الليل و ماتخليكيش تعرفي تنامي ؟

· ولا حيطة تدخل من البيت تجعر : عايزة الغدا ، وبعدين تطين عيشتك لو الملح طلع زايد شوية في البامية ؟

· ولا ممكن ترجعي البيت في يوم تلاقي الحيطة بتبوس الشغالة ؟

· طيب شفتي حيطة تملالك سقف البيت دخان و أرضيته سبارس ؟

· ولا حيطة تقعد تنتنك عليكي و تقول لك انتي رايحة فين و جاية منين ؟

· و لاحيطة تقعد تقولك ما تخرجيش بالفستان ده احسن محزق عليكي ، واما تقوليلها هاتي فلوس عشان اجيب فستان غيره ، تعمل ودن من طين وودن من عجين . . دا حتى الحيطان ليها ودان .

· ولا حيطة تصحيكي في نص الليل عشان ما اعرفش ايه طلع في دماغها ؟

· و لا حيطة تدوخك وراها عشان تعرفي هي بتكلم مين في نص الليل ؟

· طيب دي حتى الحيطة معروف مكانها دايماً ، إنما المحروس يدوخك وراه عشان تعرفي هو سهران في انهي داهية ، قال ايه عنده شغل ! يا سم !

· بذمتك في حيطة تحاول تطلعك غلطانة في كل كلمة تقوليها عشان تثبت للعيال ان الحيطة بتفهم أحسن منك ؟


يا شيخة بلا قرف ، الحيطة أجدع ، على الأقل مش هتتحبسي لو فاض بيكي و نفذتي حلم كل الستات . . و دقيتي في الحيطة مسمار !


صفقت كل الستات بحماس و هتفوا هتافهم الخالد :

قطيعة تقطع الرجالة . . . و سنينهم


و لما خف الهتاف و التصفيق ، ردت الست ستوتة بعد مصمصة الشفايف :

بس برضه يا بهية ياختي في شبه كبير ، ساعات كده تحسي ان الراجل زيه زي الحيطة تمام :

· لما تطلبي مصروف البيت

· ولما تكوني نفسك تخرجي معاه تشمي هوا

· و لما تقولي له روح المدرسة عشان طالبين ولي أمر الواد

· و لما واحدة جارتك ترمي زبالة في بلكونتك


أضافت سنية مشمأنطة :


طبعاً الراجل زي الحيطة تمام ، ما عندهوش عواطف و عمره ما تطلع منه لفتة رقيقة ، يعني الراجل الحيطة ده لو جاتله حالة من الرقة حيبقى ايه ؟ يتحول إلى لوح !

و لما تحبي تدلعيه تقوليله ايه ؟؟؟ يا لوح قلبي !



صفقت كل الستات مرة أخرى و هتفوا هتافهم الخالد :

قطيعة تقطع الرجالة . . . و سنينهم




منقول

heba
16-12-2002, 07:46 AM
بسم الله الرحمن الرحيم

اللى كاتب الكلام ده زوجه قديمه جدا وقرفانه من الزواج بس موش عادله يعنى مفيش فى الراجل حاجه كويسه خالص موش قادره تفتكر له حاجه كويسه يبقى قادره تعيش معاه ازاى00 عايزين بقى يا شمس كلام من راجل يرد على الكلام ده علشان نشوف حيقول ايه00

وادكول مش معقول
16-12-2002, 08:53 AM
يا رجال المنتدي اتحدوا ؟

فتنة .............؟:mad:
خيانة ...........؟:mad:
انقلاب ..........؟:mad:


الحقواااااااااا:oااااااااااااااا يا رجالة ؟؟

شمس عمل حلف مع ستات المنتدي وبيعمل ثورة ضدنا ...........؟؟؟

ايه يا عم شمس ؟؟؟ مين بس اللي زعلك مننا وبتطلعه في الكل ؟؟؟؟؟؟؟؟

إسلام شمس الدين
16-12-2002, 09:20 AM
هبة

أنا نزلت موضوع عن الرجالة ، وموضوع عن الستات

عشان لا الرجالة يزعلوا ، ولا الستات يزعلوا

بس ربنا يستر و ما اضربش من الاتنين


واد كول مش معقول

يعني الحق عليا إني عايز أوعيكوا و انقلكوا الكلام اللي بيتقال عليكم في الجلسات الحريمي

دا انا كلفت 7 أجهزة مخابرات عشان تنقل الاجتماع ده بالصوت و الصورة

و بعدين يعني لو كنت نزلت موضوع عن الستات بس ، كنتوا هتنفعوني و المأشات بتترفع عليا ؟
كنت هتتفرجوا عليا و تشجعوا الضربة الحلوة .

و في الآخر يتقال عليا خاين

طيب مش لاعب . . ها

peace
16-12-2002, 09:24 AM
يلا مع اني سمعتها قبل كده
بس مقبولة منك

saroo02
16-12-2002, 10:08 AM
انا بقلك خاف علي نفسك من الستات مش معنا ذالك تبقي معاهم علينا وتخبط في الحلل بقي
انا معترض الرجالة مش زي الحيطة الرجالة جدعان اوي وبيحسوا علي دمهم وبيفهموا وبعدين الستات إلي إنت جبت منهم الكلام دي لو متجوزوش بيبقوا قاعدين شايلين الهم زكارهين الدنيا دي كلها

إسلام شمس الدين
17-12-2002, 04:14 PM
peace

تسلمي و أهلا بيكي دايماً

سارو

انت قلت اللي عندك في الموضوع التاني . . عايز جدعنة اكتر من اللي قلتوه هناك ايه ؟

tannjour
18-12-2002, 01:47 AM
والله حيرونا ، لا هيك بيعجبهم ، ولا هيك بيعجبهم ، ولا يهمك يا َ عزيزي شمس الدين أنا معاك ولو أنك قسيت شوي على الرجالة

ملاحظة : أستنوا كلكم المقال اللي حأكتبوا في منتدى المناقشات الجادة ، عن نفس الموضوع اللي تكلم عنه الأخ شمس الدين، وأتمنى أنو كلكم تقرأوا الموضوع ، وتعطوني رأيكم بصراحة ،
......والله مابعملش لنفسي دعاية .

master_of_hell
18-12-2002, 02:03 AM
شمس الدين
وسقطت فى المنطقه الخطرة

قلبى معاك
ولو اترفع عليك سواصير تستاهل
طبعا انا معاك بقلبى

إسلام شمس الدين
19-12-2002, 10:19 AM
tannjour

في انتظار كل موضوعاتك و مشاركاتك المميزة ، وأهلا بيك معانا .


masre oh hall

فيك الخير انت وقلبك والله
وقلبك دا انشاء الله هيحوش عني السواطير ازاي ؟

saroo02
19-12-2002, 10:52 AM
لا دا انا كنت بهظر :D

mariam
20-12-2002, 05:30 PM
هاهاهاهاهاهاهاه...
شمس انت رهيب
شكلنا كلنا بننضرب
بس بالفعل عرض جميل و ساخر
بالرغم اني ما شفته على الطبيعة
المهم ... انك مستعد لكل اعمال العنف
اللي ممكن تتعرض لها بالمنتدى
تحياتي للجميع


Photo Gallery