المساعد الشخصي الرقمي

مشاهدة النسخة كاملة : مهلبية بالمستكة



bodda
04-01-2005, 08:57 AM
دى طريقه لذيذه للمهلبية جربوها وعلى ضمانتى

نسيح 3-4 فصوص مستكه فى ملعقة كبيره زبده عالنار
ولما تسيح نحط اللبن ( حوالى كيلو ونص )
ولما يغلى اللبن نحط السكر و نبدأ نحط النشا المذاب فى الماء
ونقلب جيدا حتى التخانه المطلوبه
ونكون محضرين ربع كيلو فستق شرائح أو مفصص ومبشور
نحط نصه فى المهلبيه ونقلب كويس ونغرفها فى الاطباق أو طبق كبير
ونحط النص التانى عالوش للذواق
وبالهنا والشفا
صباح الفل
:)

osha
04-01-2005, 10:03 PM
شوف انا لا احب المهلبية او المستكة
لكن بما ان المهلبية والرز بلبن اخوات في الرضاعة{عشان اللبن} فأنا اطلب منك جمع شتات العائلة وذكر طريقة الرز باللبن لاني فشلت فيه تماما واولادي فضحوني
رشا

bodda
06-01-2005, 08:09 AM
بسيطة اوى يا ست رشا ولا يهمك

نقول كيلو ونص لبن
ونص كيلو سكر
ملعقة صغيرة بالطعم المطلوب او بدونه ( ماء زهر أو ورد أو قرفة ....)
كوب ارز مغسول
العمايل :
نسلق كوب الارز فى حوالى 3 كوب ماء
ونسيبه عالنار لما يستوى
ونقوم حاطين عليه اللبن والسكر والطعم المطلوب
ونغليهم عالنار حوالى 3 دقايق علشان دوبان السكر
نجيب كمية النشا المطلوبه وندوبها فى نص كوباية ماء عادى ( بارد)
ونبدأ نصب النشا مع التقليب السريع عالنار للتخانه المطلوبه
ومش هاقدر اقول قد ايه كمية النشا لان انواعه كتير
وبالتالى درجة تماسكه تختلف
وبعد كده نصب فى اى شئ تحبيه
وممكن يرش على وش الاطباق قرفه مطحونه ناعمه
او زبيب او بدون
وبالهنا والشفا
صباح الفل
:)

osha
06-01-2005, 03:36 PM
مش عارفة اشكرك ازاي
أنقذت آدميتي وسط أسرتي
حاجربها واقولك
شكرررا

bodda
06-01-2005, 08:55 PM
لا شكر على واجب

والف هنا وشفا
مساء الفل
:)