المساعد الشخصي الرقمي

مشاهدة النسخة كاملة : عاوزة حد شاطر يقول لي !!!!



osha
03-01-2005, 11:55 PM
عاوزة حد شاطر يقول لي طريقة عمل التومية مثل بيتزا هت
عجينة الطعمية
كفتة الرز
واكون متشكررررة جدا
هنا في امريكا الطعمية بالحمص مش بالفول زي مصر
ودمتم
اختكم في الله
رشا
*8*

bodda
04-01-2005, 08:40 AM
العزيزه رشا

التوميه عباره عن مايونيز مع عصير توم
سهله ؟؟؟؟*4*
نيجى بقى للطعميه
كيلو فول مدشوش
حزمة كرات أو بصل اخضر
راس توم محترمه مفصصه أو نص كوب توم مفرى
ملعقة كبيره كسبره ناشفه
2 ملعقة صغيرة ملح
نص ملعقة صغيرة شطه
--- الطريقة ----
ننقع الفول المدشوش 24 ساعه أو فول صحيح يومين ويتفصص
بعد كده نفرم الفول مع باقى المكونات( عدا الملح ) مرتين تلاته
او نضربه فى الكبه حتى يكون ناعم
واخر شئ نضيفه الملح فى اخر فرمه
ممكن العجينه دى تستعمل فى الحال مع اضافة بيضه وخلطها قبل القلى
وممكن توضع فى اكياس فى الفريزر وتخزن
ولكن فى حالة العجينة المجمدة لما نطلعها وتفك نحط نص ملعقة بيكربونات صوديوم
لان من غيرها هاتطلع طعميه مبلطه ومش حلوه :d
وصباح الفل
:)

bodda
04-01-2005, 08:49 AM
معلش نسيت اقولك على كفتة الرز
هاقولك على مكونات لكيلو لحم وممكن تقللى وتزودى بنفس النسبة

1 كيلو لحم (ملبس) يعنى مايكونش احمر تمام لاهمية وجود نسبة دهون للطعم الجيد
نص كوب ارز منقوع ساعتين فى الميه لسهولة الفرم
حزمة شبت
حزمة كسبرة خضرا
حزمة بقدونس
بصله كبيرة
10 فصوص توم
ملح وفلفل وبهارات لحم
تفرم اللحم اولا
ثم يفرم مره تانيه مع باقى المكونات
ويمكن اعادة الفرم مره تالته / المهم تبقى عجينة ناعمه متجانسه
وبعدين نجيب طبق زيت ونبل ايدنا منه ونعمل من العجينه صوابع ونرصها فى اى صينيه
ولما نخلص تصبيع الكفته كلها نبدأ نقليها فى زيت غزير
وأهم حاجه نكون محضرين الدمعه ... عارفاها ؟؟
اللى هيه صلصة طماطم بس بالتوم.... مش بالبصل*4*
وتخرج الكفته من القلى الخفيف الى الدمعه
ولما نخلص الكميه نولع على المعه بالكفته لغاية ماتستوى للدرجة المطلوبه
وبالف هنا وشفا
صباح الفل
:)

osha
04-01-2005, 09:52 PM
لازم تعترف
اعترف انك شيف في فندق 7 نجوم على الاقل
شكرررررا
اناوجوزي حناكل وندعي لك من قلبنا

bodda
06-01-2005, 07:32 AM
والله يا رشا كان من احلامى انى اكون شيف *6*

لكن انحرفت بى المقادير لعمل اخر تماما
لكن الهوايه لا يمكن اسيبها
وتحياتى لزوجك العزيز
واى اكلات تطلبوها ده شئ يسعدنى
صباح الفل
:)

osha
06-01-2005, 10:33 PM
هواية جميلة وأعتقد انك لو كنت اشتغلت شيف كان ممكن تبقى اقل اهتماما بها،عموما ده من حظنا،جوزي كمان غاوي طبيخ خاصة الفتة لكني أفضل أن يبحث لنفسه عن هواية تانية شفقة بنا وبالفتة...
*77*
مساء الورد

bodda
06-01-2005, 11:05 PM
ههههههههههههههههه

خلاص خليه يتصل بيه وانا هاغششه كل حاجه
لازم برضه نقف جنب الراجل
*6*
مساء الفل
:)

أنفـــــال
13-01-2005, 10:22 AM
شطوور يا بودا..:)
عيني عليك باردة :)
أنفال

osha
13-01-2005, 05:35 PM
شوف يا بودا،هو مقتنع بان الفتة بتاعته محصلتش ولكن برضه ممكن تعمل فيا هذا المعروف وتنصحه
اختى انفال:فعلا بودا معلم وربنا يحرسه من العين

bodda
15-01-2005, 12:42 PM
ياجماعه كده بتدونى اكتر من حقى
وانا تحت امركم
وصباح الفل

MFM
16-01-2005, 10:17 AM
صباح الخير يا بودا.
انا متشكرة جدآ علي ردك في موضوع الفطير المشلتت.
وعندي استفسار بخصوص الطعمية
ممكن نضيف للخلطة قليل من الكسبرة الخضرا، وقليل من البقدونس واضافة قليل من الكمون المطحون؟
وممكن لو مش هااتعبك معايا تقول لي احسن طريقة لقلي الطعمية علشان تبقي هشة ومقرمشة ومستوية من جوه ومش محروقة من بره
يعني النار تكون عالية ولا متوسطة ؟
واشكرك جدآ جدآ جدآ.

bodda
17-01-2005, 12:59 PM
طبعا ممكن اى اضافة للطعمية ودى تحسن الطعم حسب الرغبة

بس بلاش البقدونس لانه يضيع طعم الكسبره الخضرا والجافة وهى الاهم
مشكلة قلى الطعمية فى البيت هى استعمال زيت قليل
والمفروض يكون عميق وساخن جدا

وصباح الفل
:)

MFM
20-01-2005, 08:39 AM
صباح الخير يا جماعة
ممكن حد شاطر يقوللي طريقة عمل العيش البلدي
بس لو ممكن بالتفصيل الممل
هاكون متشكرة جدآ

bodda
21-01-2005, 08:28 AM
اولا كل سنه وانتى طيبه وكل الاصدقاء فى مطبخنا العامر


بالنسبة للعيش البلدى ..أهم شئ فرن حار جدا

والصاج يكون داخله بنفس السخونه قبل بدء عملية الخبيز

يعنى لما نيجى نحط العجينه بنخرج الصاج حته صغيره

على قد وضع العجين وندخله بسرعه قبل فقد الحرارة

وده الصعب فى الموضوع

لكن الطريقه سهله:

ممكن كيس خميرة جافة أو ملعقة صغيرة خميرة جافه لكل 2 كيلو دقيق أسمر

وندوب الخميرة فى نص كوباية ميه دافيه مع ملعقة سكر صغيرة لتنشيط الخميره

ونرشها على كومة الدقيق فى وعاء عميق

وبعدين بماء دافى ( فاتر جدا ) نعجن الدقيق للدرجة اللى ممكن نصبه باليد

ونحط نص ملعقة ملح

يعنى بيكون طرى جدا زى درجة تماسك المهلبية

وللاسف مش عارف اوصف درجة التماسك بالكلام لانها لازم تتشاف بالعين

المهم ...

نسيب العجين مغطى بفوطة نظيفة لمدة ساعه فى مكان دافى للخمير

أو لغاية مايزيد حجمه بمقدار النصف على الأقل

بعد كده ناخد حته من العجين على سطح مرشوش بالرده ونقلبه عليها

يعنى الوشين يلزق فيهم رده ونرص فى مسطح خشبى او اى شئ بس مايكونش ساقع

ونسيبه نص ساعه متغطى للخمير الاخير

بعد كده نفرده على الايد ونحطه فى الصاج الساخن كما سبق وصفه

والعيش البلدى سهل بس لازم يتجرب مره واتنين لغاية ما يظبط معاكى

وبالهنا والشفا

وصباح الفل

:)

MFM
23-01-2005, 04:24 AM
انا اسفة جدآ انا نسيت اهني الكل بالعيد الكبير oops
كل سنة وانتم طيبين اعاد الله علينا الاعياد و الايام بخير
bodda وكل سنة وانت بالف خير يا
انا مش عارفة اشكرك ازاي علي طريقة العيش البلدي انا كان نفسي اتعلمها من زمان
بس علشان اتاكد قبل ما اعملها كنت عاوزة اسالك شوية اسالة لوسمحت لي
هل يمكن ان استعمل العجانة ؟
واذا لازم استعمل الايدين معني ذلك انها ستلزق
هل ادهنهم زيت او حاجة؟
وهل لما اقلبهم في الرده علي الوجهين ابططهم؟
ولما افردهم واضعهم علي الصاج ما هي التخانة بتاعتهم؟
هل هي سميكة ام رفيعة ام رفيعة جدآ؟
ومش عارفة اشكرك ازاي
bodda علي اي حال الف الف الف شكر يا

bodda
23-01-2005, 08:08 AM
العزيزه MFM *4* اصلى مش عارف اسم تانى هههه

كل سنه وانتى بالف خير
وبالنسبة للاسئلة:
هل يمكن ان استعمل العجانة ؟
ممكن بس لها عجانه خاصه للعيش بتكون سرعتها بطيئة جدا
يعنى غير العاديه اللى فى البيوت
واذا لازم استعمل الايدين معني ذلك انها ستلزق
فى البدايه بتلزق وده اللى بيسموه اللت والعجن
ولكن باستعمال الرده بتسيب الايدين
هل ادهنهم زيت او حاجة؟
لا ماينفعش الزيت ... ممكن دقيق او رده بس
وهل لما اقلبهم في الرده علي الوجهين ابططهم؟
لا يبطط الرغيف ابدا .. هوه بيفرد براحته لان العجين لين
ولما افردهم واضعهم علي الصاج ما هي التخانة بتاعتهم؟
بتكون حوالى نص سم
هل هي سميكة ام رفيعة ام رفيعة جدآ؟
قلنا نص سم .. ههههههههههه
ومش عارفة اشكرك ازاي
ولا شكر ولا حاجه ابقى اعزمينى عالغدا وخلاص:d
وصباح الفل
:)

osha
01-02-2005, 06:42 AM
سؤال صعب شوية يا بودا بس انت قدها
تفتكر الرده ممكن يكون اسمها ايه بالانجليزي؟
الباقي كله سهل،وحشني العيش الاسمر وما صدقت لقيت طريقته
وشكرا مقدما يا باشا

bodda
01-02-2005, 07:55 AM
غالى والطلب رخيص
wheat bran
اى خدمة
وصباح الفل
:)

MFM
01-02-2005, 08:57 AM
صباح الخير يا bodda*81*
انت هايل باسم الله ماشاء الله عليك
ومافيش عندي حاجة ممكن اقولها لك غير الف الف شكر *122*
وانا يبقي لي الشرف انك تتغدي عندنا وذنبك علي جنبك لاني طبعا هاجرب فيك كل الوصفات اللي اخذتها منك
*44*

bodda
01-02-2005, 09:33 AM
صباح الفل MFM

ياستى بس المهم العزومه تكون سمكيه
ومالكيش دعوه بالباقى
:d

MFM
01-02-2005, 10:14 AM
*81*bodda
وصباح الفل
*102*
العزومة سمكية يعني سمك *11*
*54*
بس هاتاكل لوحدك لاني لا انا ولا جوزي ولا اولادي بناكل اي ماكولات بحرية بعد ما عرفنا انها ملوثة بالزءبق mercury
ودي مادة سامة ومضرة جدا للصحة
مش عاوزة اوجع دماغك *94*
علي فكرة انا باعمل سمك تحفة بس اكيد مش زي السمك بتاعك
وطولت عليك *44*

bodda
02-02-2005, 08:10 AM
موضوع تلوث الاسماك ده محتاج كلام كتير *4*

وهاكتبه فى موضوع مستقل بس اول مالاقى وقت *7*

لان فيه حقائق غايبه عن ناس كتير*11*

واحلى صباح الفل

:)

MFM
02-02-2005, 08:19 AM
*81* osha
تسمحيلي ارد علي سوالك بخصوص اسم الردة بالانجليزية *11*
ولو تسمحلي يا bodda*7*
انا باشتريها من اي super market *73*
تحت اسم WHEAT GERM
وخللي بالك فيه نوعين Plain or, with honey.
وان شا؛ الله تلاقيه بسهولة
و*44*

bodda
03-02-2005, 08:00 AM
العزيزة MFM
طبعا كلامك مضبوط *4*
بس ال WHEAT GERM رده مع جنين القمح
أو مع اى اضافات تانيه
لكن ال wheat bran هى الرده السادة البلدى
ودى تلاقيها فى أى مخبز*11*
وكله شغال *7*
و صباح الفل
:)

osha
06-02-2005, 07:03 PM
كتر الف خيرك
اتقل عليك بقى واسألك عن بابا غنوج من الاصلي؟
اصل عندي عزومة سمك والناس اللي عازماهم بيحبوه وانا ماعرفش بيتعمل ازاي عشان محدش هنا بياكله في اسرتي

ديدي
06-02-2005, 07:40 PM
الصفحة دى مفيدة ولذيذه كمان
فى انتظار طريقة البابا غنوج يا بودا.
برافو عليك والله ما شاء الله.

ماما زوزو
06-02-2005, 07:43 PM
بسم الله الرحمن الرحيم
الله الله الله
عليك يابودا وتسلم ايدك يارب
انت ولا اجدعها طباخ فى العالم
*167*

mooooooh
06-02-2005, 07:46 PM
نيس بجد يا بوده على المعلومات الى الشيفيه دى فعلا كده انتا اسبت ان افضل ناس فى العالم بتعمل الاكل هيا احنى الرجاله ويارب اتعلم منك واكون ربعك يا صحبي


موووووووووووووووووووووووووووووووه

mooooooh
06-02-2005, 07:49 PM
بابا غنوج دى سهله اوى بس انا هسيب بودى هوه الى يشرحهالك احسن منى علشان انا بثق فى قدراته اما انا لسي بتعلم تحت ايد بودى ولما اكون تمام هعملكوا وجبه بس ايه المنتدى كله هياكل صوبعه وراها

bodda
06-02-2005, 09:31 PM
الله يخليكى يا ماما زوزو

انتى الاصل طبعا واحنا بنحاول نساعد بس
العزيزه اوشا وديدى حاضر وحالا
العزيز موووووووووووووهـ
باين عليك طباخ قديم ومخبى *4*
اهلا بيك وبافكارك الجديده ومنور احلى مطبخ

بابا غنوج
طبعا الاساس باذنجان رومى ( الكروى ) مشوى
بس المشكله للى فى امربكا الالارم هايضرب وتيجى المطافى وتبقى فضيحه
وانا لما كنت هناك كنت اعمل حاجه من اتنين:
اما اسلق الباذنجان بدل الشوى *4*
أو أفصل الالارم واريح دماغى *6*
المهم سواء انسلق او اتشوى لما يبقى زى المسلوق
نقشره ونفصل اللحم عن القشر
ولو فيه عروق بذور لازم تستبعد*7*
وبعدين نضرب اللحم فى الكبه او الخلاط لما ينعم خالص
وحوالى 2 كيلو باذنجان تحتاج كيلو طحينه بيضاء
الطحينه نحط عليها نص كوباية ميه ونقلبها هاتجمد
نحطها على الباذنجان المضروب
ومعاهم 7 فصوص توم كبيره وملعقتين ملح ونص كوباية خل عنب
ونعجن ده كله مع بعض ونضبط التخانه بالميه
ويمكن تجميل الصحون بعد غرفه باوراق البقدونس او انصاف الزيتون الاسود
وبالف هنا وشفا
مساء الفل
:)

ديدي
06-02-2005, 09:55 PM
مساء الورد يا بودا

شكرا.

ممكن بعد اذنك تقولى بتعمل اللحوم البارده ازاى.

osha
07-02-2005, 06:46 AM
حاشوي الباذنجان في الفرن وخلي بتوع المطافي يتعبوا شوية!!
الف شكر يا معلم بودا

bodda
08-02-2005, 08:35 AM
العزيزه ديدى

اللحوم البارده أنواع كتير
بس اعتقد انك تقصدى لحم بقرى بارد
وده أفضل جزء يستعمل فيه هو العرق سواء تلبيانكو أو فلتو
وبنجيب العرق وباستعمال خيط قطن قوى نقوم بلف العرق لفات متقاربه 1 سم
والجزار عادة بيقوم بالمهمة دى
المهم
نيجى لشغل المطبخ
بنحضر خلطة من حلقات بصل، فلفل أخضر، طماطم، 3 فصوص توم شرائح
مبشور جزرايه ، ملح وفلفل وبهارات لحم - يقلب الخليط جيدا
يوضع العرق فى صينية أو حله تتسع له فوق نصف الخلطة السابقة ويغطى بالباقى+ ملعقة سمن
يوضع نصف كوب ماء وتغطى الصينية أو الحله وممكن بالالمونيوم فويل
وتوضع على النار أو فى الفرن ماتفرقش
ويكشف عنها كل فتره ويؤخذ من السائل المحيط ويصب علي العرق
حتى يتم السواء
يستخرج العرق ولا يقطع الا بعد أن يبرد تماما
ويفضل ان يوضع بعد ان يبرد فى التلاجه ساعتين حتى يقطع بشكل جيد
المهم نفك الخيط باحتراس ثم يتم التقطيع بسكين حاد لشرائح سمكها نص سم
وترص فى سيرفيس بالطريقة المطلوبه
نيجى بقى لمتخلفات التسويه من الخضروات والصوص اللى معاها
ناخد الخلطه دى ونضربها فى الخلاط ونصفيها هاتديكى احلى صوص
ناخد منه بالملعقة ونرش خفيف على الشرائح المرصوصه
ويجمل الطبق بالبطاطس المحمره او المسلوقه حسب الرغبه
والف هنا وشفا
وصباح الفل
:)

العندليب الأسمر
08-02-2005, 09:48 AM
انا عندي نصيحه ليك يابودا
ايه رايك تنزل كتاب وتبيعه في المنتدي هنا لحسن انت كده مش هتخلص
او في حل ابسط بعد كده تعمل رسوم علي اي سؤال بس علي قد السؤال تاخد منهم واهي تعتبر شغلانة بعد الظهر علشان ربنا يكرمك كده
هههههههههه

اخوكم : العندليب

ديدي
08-02-2005, 11:23 AM
صباح الفل يا bodda
اشكرك جدااا وانتظر الاسئلة القادمة
ربنا يوفقك ويخاليك لعضوات المنتدى
وبعدين انت ايه حكايتك يا عندليب سيب بودا فى حاله هههههه
ولا انت ناوى تنافسه.

bodda
08-02-2005, 12:15 PM
يا عم العندليب ولا يهمك

ومن قدم طبق بيداه التقاه:d

هههههههههههههههههههه*6*

والف شكر ديدى لذوقك واى خدمات

وصباح الفل

:)

العندليب الأسمر
08-02-2005, 12:47 PM
ديدي انا قصدي كل خير برده مافيهاش حاجه يعني كلنا اخوات عادي هههههههههه

العندليب

ديدي
08-02-2005, 03:00 PM
اوك يا عندليب طبعا كلنا اخوات

عزيزى بودا جاهز للسؤال

من فضلك الحمام المحشى بس على اصوله زى ما بيقولوا.

bodda
09-02-2005, 07:58 AM
أنا رديت فى الموضوع الجديد بتاع الوصفات
وياريت يعجبكم مع تحياتى للعندليب العزيز
صباح الفل

العندليب الأسمر
09-02-2005, 08:34 AM
صباح العسل عليك ياشيف بودا ومستنيين احلي الاكلات

bodda
09-02-2005, 12:42 PM
تحت امرك يا عندليب المنتدى

بس سمعنا صوتك وشارك معانا *6*
صباح الفل
:)

MFM
14-02-2005, 09:21 AM
*81*يا bodda
اولا HAPPY VALENTINE'S DAY:f2:
ثانيا انا مش عارفة اشكرك ازاي علي طريقة الطعمية انا جربتها امبارح وكانت تحفة وجوزي بيشكرك جدآ عليها
وربنا يخليك لينا
و *44*
*174*

ابن البلد
14-02-2005, 10:43 AM
طعميه
:-s
هو الموضوع كان علي الطعميه

bodda
14-02-2005, 12:47 PM
العزيزه ايمان

تحياتى لزوجك العزيز وأى لأوامر

وبالف هنا وشفا

صباح الفل

:)

mira2005m
24-02-2005, 01:20 PM
شكرا ليكي كان نفسي في طريقة التومية وطلعت هائلة تسلم ايديك

bodda
25-02-2005, 07:37 PM
منورين احلى مطبخ

شكرا ميرا
مساء الفل
*8*