المساعد الشخصي الرقمي

مشاهدة النسخة كاملة : أبو العريف



بنت مصر
28-11-2002, 02:34 AM
زمان؛ حكم الناس واحد اسمه "أبو العريف".
وكان بيقول إنه هوه بس اللى عارف كل حاجة.
وكان حاكم على الناس إن ماحدش يحل ولا يربط
غير لما ياخد رأيه، ويعمل بشورته.


وف يوم من الأيام؛ كان فيه ناس فلاحين عندهم
لامؤاخذه جاموسة ـ اسم الله على مقامكم،
عطشت وهى فى الزريبة، وحاولت تشرب
من الزير؛ راسها اتحشرت.

حاولو يطلعوها ماعرفوش، وبقت مشكله.
خدو بعضهم وراحو على قصر أبو العريف، لقوه
قاعد وحواليه الحاشية والبطانة. طلبو الكلام،،،
وحكو له عن المشكلة اللى عندهم.

أبو العريف ماصدق يلاقى حاجة يحلها؛ خد
الحاشية البطانة وركب جمل، وطلع على القرية.

وبعدين سألهم: "فين الجاموسة اللى محشورة فى الزير؟"

شاورو له على الدار وقالو:
"فى الدار دهى."

قال لهم:
"طيب هدو الدار عشان أخش بالجمل."

هدو ييجى تلاتربع الدار عشان يخش بالجمل. ودخل بالجمل،
والجمل برك قدام الجاموسة اللى محشورة فى الزير، وقدعد
يتأمل فى المشكله، وبعدين نادى على السياف وقال له:
"ياسياف؛ اقطع رقبة الجاموسة."

راح السياف رافع سيفه التقيل، وراح قاطع رقبة الجاموسة
بضربة واحدة. ونزلت راس الجاموسة جوه الزير. أبو العريف
قعد يتأمل فى المشكلة الجديدة، وبعدين قال للسياف:
"ياسياف؛ إكسر الزير."

راح السياف خابط الزير خبطة واحدة اتفشفش، وطلعت منه
راس الجاموسة. الحاشية هللت والبطانة هتفت والتاس هاصت.

والوزير قال لصاحب الجاموسة:
"ياللا بقى أمال؛ اعمل لك همة وجهز الغدا لمولانا آبو العريف."

الراجل الغليان طبخ الجاموسة، واتغدى بيها أبو العريف
والحاشية والبطانة، وبعدين قعد يعيط.

سألوه:
"بتعيط ليه يامولانا؟ دا انت حليت كل حاجة، وماسبتش
حاجة لحد يحلها؟"

قال لهم:
"ياترى حاتعملو إيه من بعدى؟"

هههههههههههههههههههههههه


اتمنى تكون عجبتكم


بسنت

اسامة يس
07-12-2002, 12:54 AM
جميلة يا بنت مصر ...............
محنا برده في زمن ابو عريفات كتير ..............
:7:

بنت مصر
07-12-2002, 01:40 AM
هو احنا جايبنا لورا ومودينا في داهية
الا شغلانة ابو العريف دي يا اسامة

اشكرك على تعليقك الجميل وكل سنة وانت طيب


Photo Gallery