المساعد الشخصي الرقمي

مشاهدة النسخة كاملة : الاستاذ كامل موجود؟؟؟؟؟؟؟؟



محمد فاروق
07-10-2004, 12:42 PM
آلو..
آلو..
- منزل الأستاذ(كمال الدين أبو الكامل كمال أكمل)؟
- أيوه يا فندم..حضرتك مين؟
- ظلموني وباين في عنيهم..
- نعم!!!
- ظلموني وباين في عنيهم م م م..
- بطل سخافة وقلة أدب يا جدع انت.
وأغلقت التليفون بكل صرامة كأي أسد همام يجد نفسه في مثل هذا الموقف..
غريب هذا البشري، اسمه"ظلموني وباين في عنيهم"أما والله نكتة..
فردت الجريدة أمام عيني..
وشرعت في القراءة وأنا أضحك بين الوقت والأخر..
- احم..احم..بابا
- نعم يا صفاء..
- هو في حد اتصل دلوقتي؟
قلت ببساطة:واحد سخيف بيعاكس..خليك انت في مذكرتك..
رمقتني بنظرة مرتبكة ومضت..
تأملتها وهي تدخل الي غرفتها..
كم كبرت هذه الشيطانة! منذ أقل من سنتان لم تكن هكذا..
لم تكن بهذا الكبر..والجمال..
لقد أصبت شابة..جميلة..عروسة..
و..تررررررن..تررررررن..
منزل الأستاذ(كمال الدين أبو الكامل كامل أكمل)
- لأ يا سيدي"كمال أكمل"
- آه ..لا مؤاخذة..آسف جدا
- مفيش مشكلة..مين حضرتك؟
- ظلموني وباين في عنيهم..
- ياه! تاني..اسمع يا أستاذ ظلموني انت..من فضلك مش..
- طب اخنقي القطة وتعالي يا بطة؟
- لا..دا نت مناخوليا علي الأخر..اسمع يا سيد أوعي تتصل هنا تاني..احنا ناقصين..
أغلقت التليفون بحدة وأنا أطبق متعجبا..صحيح ان الجنون عم البلد..ولكن ليس بهذه الطريقة..
رأس صفاء يطل من باب حجرتها وصوتها المرتبك يقول:
- حد اتصل يا بابا؟
- لأ يا ماما..انتي منتظرة تليفون ولا حاجة؟
- لأ..لأ..قالتها وأدخلت رأسها بسرعة..غريب أمر هؤلاء المراهقات و..حححح..مراهقات!!
أيمكن أن؟لا..لا..
ولكنها تسأل..وهي التي لا يهمها شئ في هذه الدنيا الا ثانويتها العامة..
نظرت في ساعتي..السابعة والنصف..المفروض أن أكون خارجا الآن جالسا علي القهوة..
ولكنني مرضت فجأة..
مرة أخري أفهم مدي غباء الآباء أحيانا! هكذا يا صفاء..
حسنا..
تررررررن..ترررررن
- أيوه!
- ألو منزل الأستاذ كامل؟
- أيوه!
- المحشي في البكابورت..وأنا عليك صبرت..
- وعندك دم تتصل تاني يا صايع يا..
- صايع؟!!! صيحة باستنكار ارستقراطي بغيض ضعيف الذاكرة حتي ينسي وقعته في الشارع ليتصيد بنات الناس..
صرخت بقوة أكبر:أيوه صايع ومش متربي..
بدل ما تعاكس بنات الناس شفلك كلمتين وذاكرهم..
- أنا أشوفلي كلمتين وأذاكرهم؟
- آه..هو سعادتك البحتري ولا أينشتين علشان تقول"كفاية علام"..يا أخي جتك نيلة في..
و..سبة شديدة السوقية سيعترض عليها المراقب.
فعلها الجبان..
رفعت عيني أمامي بضيق..فوجدت صفاء وأمها..
فسألتها بصوت جهوريا أسوديا جبارا:مين ده يا بنت؟
- أنا أسفة جدا يا بابا اني مقلتلكش علي الموضوع..
- نععععععم؟ آسفة يا بابا..معلهش يا بابا..بابا آخر من يعلم بفضايحك يا هانم!
وهنا تدخلت حرمنا:فضيحة..فضيحة ايه يا كامل؟ الموضوع أصغر من كده بكتير..
- وايش عرفك انت بالموضوع؟
- لأن أنا اللي متفقة مع الراجل
(نعم..متي..كيف!!! آه قلبي) راجل مين يا ست انت؟! يعني انت تتفقي مع صايع علي كده برضه؟!
- صايع ايه بس! ده فيه كل المواصفات المطلوبة..
- يعني خلاص دبرتوها والبنت لسة في ثانوية..وكمان راجل؟
- أيوه..يعني عايز لها شاب من بتوع الأيام دي..الواحد فيهم لا يحل ولا يربط!
أحسست أني سأجن..ماذا يحدث حولي؟! أصحي وافطر واذهب للشغل..وارجع تعبان ومرهق..فأجلس لكي أقرأ الصحيفة..فأعلم أن ابنتي ستتزوج! هكذا! لا ريب أن ذلك حلم..انني لم آكل اللحم منذ أمد طويل..لاشك أنني عندما أكلتها اليوم حدثت لي صدمة عصبية..
شعرت أن عقلي يكاد أن يتوقف، أردت أن أسأل:
- طيب هو كان بيتكلم بطريقة غريبة ليه!
- آه..علشان المباحث..
- مباحث؟! ليه؟
- علشان الحاجات دي حرموها خلاص!
"حرموا الجواز؟"- هما مين؟
- وزارة التعليم..
- تعليم ايه يا ولية يا بدنجان أنت؟ وايه دخل التعليم بالخطوبة والجواز.
- خطوبة وجواز؟!!
قالتها تفيدة وصفاء وهما ينظران لبعضهما برهة ثم انفجرا في الضحك ووسط كل هذه الضحكات(وأنا مثل الطربوش) قالت تفيدة بصعوبة:كامل..الله يخيبك..انت مفهمتش..احنا كنا بنكلمك علي الأستاذ مرسي جود لك مدرس الانجليزي..
يالي من أبله..اذن الموضوع موضوع درس خصوصي وليس زواج
- ليه انت مقلتيش يا تفيدة من الأول.
- يا أخي..أصلي كنت عارفة انك مش عايز تدفع نكلة علشان أي درس للبنت
- أهه!اذن فالموضوع كذلك
- وجبتي الفلوس منين يا هانم؟
- فلوسي..
- يعني معاكي فلوس؟
- آه!
- ومتقوليش..؟
- آه!
- أمال عماله تقولي التعاون بين الزوجين..التعاون بين الزوجين..وبعدين تخبي مننا الفلوس
- حاضر يا تفيدة يا بنت..
- لأ أمسك لسانك يا برج التور انت..
-الله بس بقي(قالتها صفاء بحنق وهي زهقانة في ازدراء وأردفت:شششش)
وأدارت قرص التليفون..علمنا أنها ستتصل بالأستاذ مرسي ونظرنا الي بعضنا بكثير من الخجل..لقد تشاجرنا مثل الديوك وتركنا الموضوع الرئيسي ..مستقبل البنت
وأتمت صفاء محادثتها وقالت:ح ييجي الساعة8 ونص.يدوبك ألحق أكلم البنات وأجهز نفسي..بابا..
- نعم يا حبيبتي؟
- الأستاذ مرسي ح يتصل بينا قبل ما يطلع..وح يقول كلمة السر"اخنقي القطة" لوالدار أمان هاتناونوله
- أنونوله؟
- آه زي القطة..نيو..نيو..نيو..كده..
- ولو الجو لبش ت..
- ايه لبش دي يا بنت؟بتجيبي الكلام ده منين؟
- كبر دماغك يا بابا! المهم..لو الجو لبش تقفل السكة في وشه علي طول..وخليك فاكر.نيو..نيو،لو قلت نو..نو مش هايجي
- خلاص يا صفاء..أنا أنونو؟أنا؟ معلش يا زمن..
- آلو
- أخنقي القطة وتعالي يا بطة
- نيو نيو..
سمعت صوت ضحكة ساخرة عالية ثم ذلك الصوت البغيض . تك!
انه يسخر مني..والمشكلة الحقة هي أنه لديه كل الحق..

منقوووووووووووووووووووووووووووول

MaTR|X
07-10-2004, 02:51 PM
ههههههههههههههههههههههههههههه
ههههههههههههههههههههههههه
هههههههههههههههههههه
ههههههههههههههه
ههههههههههه
هههههه
هه
ه

تسلم ايدك يا باشا

أشجان الليل
08-10-2004, 02:44 AM
هههههههههههههههههههههههههههههههههههههههههههههههههه ههههههههههههههههههههههه
بجد بقى
جامده طحن...
فكرتنى بأيام تالته اعدادى
عملوا كبسه فى المدرسه وكانوا بيقفشوا المدرسين..
كنا بنعمل حاجات شبه كده بجد

تسلم إيدك يا محمد
ويخليك لينا يارب
*8*

daria
08-10-2004, 08:05 PM
هههههههههههههههههههههه
ظلموني وباين في عنيهم
جميلة يا محمد
مش عارفة ليه فكرتني بسك على بناتك

يراع
16-10-2004, 12:38 PM
القراءة المترجرجة الهدلاقة للنص تجبرك علي الوقف جلوسا للكاتب المسماق المفيهق تعبيرا عن الامتنان

رمضان كريم

و تحية الي صديقي الذي لا يشبهه من هم علي شاكلتة

إسلام شمس الدين
20-10-2004, 12:37 PM
ههههههههههههههه
جميلة جدا يا محمد تسلم ايدك

بس بتهيألي دلوقتي مابقتش الأمور محتاجة كل ده ، سواء كان درس خصوصي و لا معاكسة

شكراً لك يا محمد على هذه الابتسامة الجميلة
و كل عام و أنت بخير *105*
إسلام شمس الدين

محمد فاروق
21-10-2004, 08:20 AM
الاخ العزيز ماتريس
كويس انها عجبتك ياماتريكس ....... بس مش اوى كده ..ههههههههههه

محمد فاروق
21-10-2004, 08:22 AM
اشجان الليل

انا سعيد جدا انها عجبتك احنا فى ديك الساعة ولا فرختها لما نضحكك شوية..هههههههه

محمد فاروق
21-10-2004, 08:24 AM
داريا

انت اصلا تعرفى سك على بناتك ؟؟؟ ده انت يادوبك مواليد السنة اللى فاتت!!!

بس فعلا حلوة ظلمونى وباين ف عنيهم!!!

محمد فاروق
21-10-2004, 08:25 AM
العزيز الطيب الجوادى

الذى يحب القمح اكثر من الورد
اسعدنى جدا مرورك فلا تحرمنى منه

محمد فاروق
21-10-2004, 08:26 AM
ياه .. العزيز اسلام شمس الدين عندنا

دى خطوة عزيزة وامينة ومديحة كمان .. يادى النور يادى الهنا
وعلى رأيك الكلام ده كان على ايامنا ايام ماكان فيه حاجة اسمها ... ادب

أنفـــــال
23-10-2004, 10:19 PM
حلوة يا محمد..:)

محمد فاروق
24-10-2004, 11:09 AM
تشكرى يا انفال

وعلى فكرة .... خطوة عزيزة

محمد فاروق

ابن البلد
24-10-2004, 11:18 AM
بتقول ايه يا مدان ؟؟؟

محمد فاروق
28-10-2004, 08:06 AM
مابقولش حاجة ياباشا

و...............رمضان كريم

أحمد ناصر
03-11-2004, 08:23 AM
:d
خفة دم المصريين ليس لها مثيل

بنت مصر
04-11-2004, 03:23 AM
رهيبة يا محمد فاروق
بجد فطست من الضحك
قال ظلموني وباين في عينيهم قال *109*

ديدي
26-04-2006, 05:32 PM
للرفع
جميلة اوى يا استاذ محمد
فين الحاجات الجميلة دى من زمان.

محمد فاروق
29-04-2006, 12:30 PM
يسعدنى انها عجبتك ياناصر انت وبنت مصر
وربنا يسهل فى حاجة بكتبها ف الطريق مش منقولة بقى ..ادعولى

وشكرا للاخت ديدى على الرفع

بنت شهريار
29-04-2006, 01:07 PM
ههههههههه
عسل يا محمد
تسلم ايدك يا فندم..
وعموما هى دى اخرة اللى يسمع كلام العيال.
تقبل تحياتى..


Photo Gallery