المساعد الشخصي الرقمي

مشاهدة النسخة كاملة : الحمـارخانة (2\3)



د0 احمد فنديس
19-09-2004, 03:50 PM
ولما كانت الليلة الثانية من ليالي الحمار خانة بدأت الحمير تعرف بعضها أكثر0وبعد وجبة العشاء بدأ كل حمار منهم يحكى ما مر به من أحداث0قال "قدره" :
ـ سمعتم آخر نكتة عن الحمير ؟
ـ عاوزين نكت عن البني آدمين0زهقنا من النكت إللى بتتقال عننا0عقّب "خميره" 0
ـ يقولون أن رجلاً دخل حديقة الحيوانات فوجدها كلها تضحك ما عدا الحمار0ولما عاد في يوم آخر وجد العكس0فلما سأل عن السبب قال له الحارس أن القرد قال نكتة من أسبوع لم يفهمها الحمار إلا اليوم 0
ـ نكتة بايخة0قال "زبلول" فيه بنى آدمين عايشين في قضية بقالهم أكتر من خمسين سنة موش أسبوع ومع ذلك لسه ما فهموهاش لغاية دلوقتى 0
ـ علي فكرة البني آدمين دول مُخهم على قدهم0تدخّل "زغلول" في الحوار0تصور إنهم فاكرين إنهم بيتفرجوا علي الحيوانات في يوم شم النسيم0دول همه اللى بيملوا الجنينة علشان الحيوانات هي اللي تتفرج عليهم 0
ـ ما تفكرنيش باليوم دا0واحد قريبي هناك قال لي إن ريحة الجنينة فى نهاية اليوم بتكون فى غاية النتانة0طول النهار ياكلوا فسيخ ورنجة وبصل وطعمية ومخللات ويسيبوا أكوام زبالتهم يفضل العمال يشيلوا فيها أكتر من أسبوع 0
ـ ليّه قريب بياخد يوم شم النسيم أجازه عارضة هرباً من ريحة البني آدمين0أضاف "زجلول" 0
ـ أقول لكم أنا آخر النكت الحميرية0قال "قدره"
يحكى أن حماراً اسمه حمورة ذهب إلى حمار صديق له اسمه حمرمر يشكو إليه حماراً ثالثاً اسمه حمارينو دأب على سبه فدار بينهما هذا الحوار :
ـ أشكو إليك صديقك حمارينو 0
ـ ماذا فعل ؟ هل "رفص" لك حاجة ؟
ـ لا أبدا0إنما كل يوم الصبح ينادى عليه من "زريبته" منهقاً : يا حمورة0يا حمورة وعندما أقول له نعم يقول لي ياعبيط0هل عندك حل لهذا المُشكل ؟
ـ الحل بسيط جداً0قبل أن ينهق عليك منادياً0نهق أنت قبله0وعندما يرد عليك قل له يا عبيط 0
فرِح حمورة بهذا الحل الذي اقترحه حمرمر0وبعد أن تناول عشاء فخماً من التبن والبرسيم وانتفخ بطنه من الأكل وصدره من الزهو بما سوف يفعله فى الصباح الباكر بحمارينو برطع ما شاء له البرطعة ونام وهو يتعجل قدوم الصباح 0
ومع أول ضوء وبعد أن سمع صياح أول ديك نهض وعدّل من بردعته ومط شفته العليا متثائباً ونادى قائلا :
ـ حمارينو0حمارينو
ـ من ينادي ؟ رد حمورة من "زريبته"
ـ أنا 0
ـ أنت مين ؟
ـ أنا حمورة 0
ـ ماذا تريد يا عبيط ؟!!
نظرت كل الحمير إلى "قدرة" وقالوا فى وقت واحد : ماذا تريد أنت يا عبيط ؟!!

ولما كانت الليلة الثالثة من ليالي الحمار خانة دخل "زبلول" على رفاقه وهو فى غاية "النرفزة" قائلا :
ـ تصوروا يا إخواني إن البني آدمين بيرموا زبالتهم فى الشارع0أنا زهقت منهم0ممكن أدفع لك خلو رجل وأجر أنا عرييتك0موجهاً كلامه إلي "زغلول" 0
ـ تدفعه أربعة أمثال لأنك بأربع رجلين 0
وهنا أدرك "زجلول" النهيق فقال بصوت غير رقيق
احرق قشك ويا كاوتشك
هبب جوك لوث بيئتك
إرمى زبالتك طيّن عيشتك
بكره ما تعرف تاخد نَفَسك
وغضبى
ـ زمان كان عم "خاطر" صاحبي بيلم الزبالة من صناديق مقفولة قدام أبواب الشقق0دلوقتي الموضوع بقى سهل خالص0كل عمارة قدامها زبالتها أكوام أكوام 0
عطس "خميره"
ـ مالك أنت راخر؟ إيه مضايقك ؟
ـ كنت زمان أجر عربية خبز نظيفة0خبزها مغطى لحمايته من الذباب0دلوقتى اتدهور حالى0ألفّ طول النهار0أجرّ عربية عليها عيش مكسر0تجارة جديدة0
ـ ليه ؟ سأله "زبلول" :
ـ فيه نسبة كبيرة من العيش ما بتتاكلشي علشان محروقة أو معجونة برمل0عم خاطر بيشتريها ويبيعها لمزارع الدواجن ومزارع الأسماك تاكلها الفراخ والسمك إللى0بياكلها الناس بعد كده 0
ـ عم خاطر بيشتري العيش المكسر "المعفن" وساعات لما ما بيعرفشى يبيعه تعرف بيعمل فيه إيه ؟؟ أردف "قدره" 0
ـ أيوه يا سيدى0أصله عنده مطعم0بالليل لما يقفل الدكانة ينقع العيش الناشف دا فى الميه ويخلطه بعجينة الطعمية
وهنا أدرك "زجلول" النهيق فأنشد بصوت غير رقيق :
احلم بيوم فيه عيش نضيف
أو حتى آكل كلّ الرغيف
وغضبي
ـ كفاية عكننة بقه واسمعوا النكتة الحميري دى0قاطعه "قدره" محاولاً إدخال السرور على قلوبهم قبل النوم :
ـ يحكى أن البرسيم قد ارتفع سعره فى يوم ما فاجتمعت حمير المدينة0وبعد أن تجاذبت أطراف "النهيق" قررت أن تذهب "بربطة المعلم" لتطالب رئيس رابطة الحمّارين بالمدينة بتوفير علفها :
ومرة أخرى أدرك "زجلول" النهيق فأنشد بصوت غير رقيق :
أنا الجحش فى أحشائه التبن ناقص فهل وفر الحَمّار لي عَلفاتي

ـ بيحب اللغة العربية
ـ أصله طول النهار بيجرّ "عربية"
ـ بس يا حمار إنت0دى حمير بتحب لغة بلدها موش زي ناس لاويين ألسنتهم بكلام الخواجات آل يعنى عشان يبقوا متحضرين يتكلموا بغير لغتهم0تدخل "خميره" في الحوار 0
ـ ما فيش مشروع سياحي دلوقتى أو شركة أو منتجع إلا وله إسم أجنبى0ناقص يعملوا لنا إحنا كمان منتجع ويسموه حميرلاند0أضاف "زبلول" 0
ـ أو يبنوا لنا قرية سياحية ساحلية نفضل نرقص فيها فى كل حفلة عمال علي بطال ونحرك رجلينا الأربعة في الهواء يمين وشمال ببلاهة مع كل حمار متخلف عقلياً يفضل ينهق لوش الفجر 0
ـ إن أنكر الأصوات00
ـ ونسميها قرية حُمارينا
ـ فيه إعلان عن منطقة سكنية في الطريق الصحراوي يقول : موش عارف إيه خُش يمين ، وموش عارف إيه دي اسم مترجم إلى العربية لضاحية سكنية أمريكية 0
ـ عقدة الخواجة وتشويه للغة العربية بهذا الأسلوب الركيك
ـ أصل من ضرورات التحضر والحداثة والعولمة أن نطلق علي المنتجع "ريسورت" والحدائق "جاردنز" !!!
ـ فاكر "هوجة" الانفتاح الاستهلاكى وموجة الـ كو واستبدال الأسماء العربية الجميلة بمفردات شاذة غريبة0لافتات معظم الشركات والمحلات التجارية إما تحمل أسماء أجنبية صريحة أو مترجمة "كالمول" أو تنتهي بالـ كو الشهيرة0حتى "المسمط" أصبح بعد الانفتاح "مسمطكو" 0
ـ أرأيتم لغة في العالم تهان وتمتهن كرامة رموزها ـ علي ألسنة ناطقيها وعبر الوسائل الإعلامية الرسمية المختلفة المقروءة والمشاهدة والمسموعة ـ بمثل هذه الدرجة 0
ـ لأ
ـ ممكن أكمّل ؟ تدخّل الحمار صاحب النكتة 0
ـ إتفضل يا سيدي
ـ ما أن اقتربت الحمير من منزل رئيس الرابطة حتى انبرى أكبرهم برأي مؤداه أن يذهب وفد منهم لشرح وجهة نظرهم فوافقت الحمير كلها "بتنهيقة" جماعية 0
وهنا أدرك "زجلول" النهيق فأنشد بصوت غير رقيق :
إللي تشوفه يا ريّس كله تمام وكويس
نمشى يمين لو تؤمر نمشى شمال لو تهمس
كلنا راح نمشى وراك لو حتى راح ناكل ترمس

ـ نقطنا بسكاتك يا أخينا0وبعدين ؟ أردف "زبلول"
ـ وبعدين ذهب الوفد ليشرح لرئيس الرابطة مشاكل الحمير فطال به الوقت عنده0ولما فرغ صبر الحمير المنتظرة فى الخارج وبعد أن شرب وفد الحمير عصير البرسيم المثلج بينما زملاؤهم يعانون حرارة الجو ولهفة الانتظار نهق حمار زهقاً فتبتعه كل الحمير بتنهيقة جماعية رافضة سلوك حمير الوفد 0
ـ وبعدين ؟
ـ بعد قليل خرج حمار يبدو عليه الإفراط فى شرب عصير البرسيم0بدا وكأنه يترنح0نظر إلي الحمير المنتظرة بابتسامة بلهاء وقال : لسّه000رئيس الرابطة ما فهمشى لسه بنحاول نفهمه 0
ـ دى موش نكتة0قال "زغلول" البني آدمين دلوقتى بيفكروا يعملوا محلات لعصير البرسيم0حتى البرسيم عاوزين يشاركونا فيه0إيه بقي إللى ها يعمل فرق بين الحمار والبني آدم لو هما الاثنين أكلوا البرسيم أو شربوا عصيره00وانخرط الحمير كلهم في الضحك 0

أحمد ناصر
19-09-2004, 04:07 PM
أستاذنا الساخر د.أحمد قنديس
2/3 يعنى إيه؟؟
يعنى ثلاث حلقات فقط لا غير؟؟
لأ نحن نريد سلسلة لا تقل عن 100 حلقة

د0 احمد فنديس
20-09-2004, 08:44 PM
ربنا يسهل يا عزيزى (هوا أنا اللي سايق؟؟!!!)

فالحمير هي التى تقرر متى ستتوقف عن تجاذب أطراف (النهيق)

ناهيق عن بداية العام الدراسي (من الدريس)

ولا تنس أننى أعمل في كلية (تربية)
د0 احمد

بنت مصر
21-09-2004, 07:22 PM
أنا الجحش فى أحشائه التبن ناقص فهل وفر الحَمّار لي عَلفاتي
هههههههههه يا دكتور احمد والله كلامهم حق
انا بعد الحلقات دي قررت احترم الحمير
حتى الحمير مش عاجبهم حالنا !!
وغضبي <<<<< ملطوشة


بسنت

د0 احمد فنديس
22-09-2004, 03:14 PM
وغضبى...ملطوشة.!!!!!!!!!!!!!!!!!!!!!!!!!!!!!!!!!!! ..شكرا فهى مقتبسة من شاعر غلبان
زمان.أيام جوز الفراخ ما كان 3 فرخات وكتكووووت قالوا ان اللي يشرب لبن الحمارة (ولامؤاخذة)
بيخف من بعض الأمراض
من يومها وأنا باحترمهم
لأنهم المعارضون الحقيقيون لسياسة دولة (جحشستان) الديموكراتية العظمى
وعضمة علي عظمة يااااااااااااااااااااااااااااااااااجحش
تحيتى