المساعد الشخصي الرقمي

مشاهدة النسخة كاملة : فسيخ مصري Home Made



fishawy
22-03-2010, 08:42 AM
منذ عشرين سنة أو يزيد لم آكل الفسيخ, وقررت أن أصنعه بنفسي فوجوده هنا شبه مستحيل, بحثت بالنت كثيراً فوجدت شروط يصعب تحقيقها هنا مثل سمك بوري طازج, لم يجمد أو يمس الثلج, لا يكون سمك مزارع.
فقررت أن اغامر بالتجربة ولا ألتزم بهذه الشروط الصعبة. وصورت المراحل.
اشتريت سمكة نصف كيلو من نوع Milk Fish وهي بنت عم البوري, وبها كمية دهون قد تفوق البوري, علقتها من ذيلها لمدة عشر ساعات للتجفيف أو كما يسمونه التنفيخ, نزل منها كمية بسيطة جداً من الماء.


23471
وكنت كل فترة أضغط على السمكة وخاصة البطن والخياشيم لتفريغ ما بها من الماء قدر المستطاع.
خلطت كمية من الملح الرشيدي الخشن Sea Salt بملعقة من الكركم وفائدة الكركم هي إضافة اللون الذهبي الجميل للفسيخ.
في برطمان وضعت طبقة من الملح المخلوط بالكركم ثم وضعت السمكة ثم ملأت البرطمان بالملح المخلوط بالكركم.
وضعت (حشرت) أكياس بلاستيك فوق هذه الخلطة حتى سددت الفراغ المتبقى من البرطمان.
تركتها عشرة أيام
ثم اخرجت السمكة


23472
وكانت النتيجة رائعة فسيخة مثل الزبدة,


23473

ومع ليمون وعيش وبصل كانت أعظم غدوة.

sea horse
22-03-2010, 05:16 PM
الله عليك يا فيشاوى
فسيخه 100% تسلم ايدك
وطبعا دى سمكه من نفس العائله البوريه
ويطلق عليها فى السواحل هنا اسم اللبت كنايه عن بورايه كبيره دسمه
ولو لفيتها مع ملح كتير وخاصة فى الخياشيم
ولفيتها فى حتة خيش ثم ورق جرايد وعلقتها بنفس الطريقه
هاتديك الفسيخ النبراوى الدلع ( ملح خفيف )
بالف هنا
مساء الفل
:eat:

اسكندرانى
24-03-2010, 10:48 PM
الله عليك يافيشاوى

تسلم ايدك وافكارك

بس قلى المده كانت اد ايه

عاوز الحق اعمل طريقتك دى على شم النسيم

احسن الفسيخ ولع وحيتباع بالدولار

بجد تسلم ايدك

fishawy
25-03-2010, 12:55 AM
الله عليك يا فيشاوى






فسيخه 100% تسلم ايدك
وطبعا دى سمكه من نفس العائله البوريه
ويطلق عليها فى السواحل هنا اسم اللبت كنايه عن بورايه كبيره دسمه
ولو لفيتها مع ملح كتير وخاصة فى الخياشيم
ولفيتها فى حتة خيش ثم ورق جرايد وعلقتها بنفس الطريقه
هاتديك الفسيخ النبراوى الدلع ( ملح خفيف )
بالف هنا
مساء الفل


:eat:

أستاذنا sea horse
دائماً لك لمساتك وإضافاتك الجميلة, والله يا أستاذنا لم أجد فرق بين الفسيخ النبراوي وتلك الفسيخة اليتيمة, وكانت (دلعة) جداً.
وعندي شوية أسئلة :

في حالة عمل كمية من الفسيخ كيف أحتفظ بها مدة طويلة؟
هل أتركها بالتمليح كما هي ؟
وما هي أطول مدة ممكنة بعدها تصبح غير صالحة؟
هل يمكنني حفظها بالفريزر بالأكياس المحكمة التي لا تنفذ منها الرائحة؟
هل يمكنني استعمال نفس الملح يعني نفس البرطمان بملحه المستعمل لتفسيخ كمية أخرى؟ أم كل مرة يجب استعمال ملح جديد؟


الله عليك يافيشاوى

تسلم ايدك وافكارك, بس قلى المده كانت اد ايه ,عاوز الحق اعمل طريقتك دى على شم النسيم , احسن الفسيخ ولع وحيتباع بالدولار

بجد تسلم ايدك

استاذ إسكندراني
تركت السمكة بالملح عشرة أيام فقط, يعني يوم تجفيف وعشرة أيام تمليح.
ولا تنسى موضوع الخياشيم وفم السمكة يجب حشوهما بالملح حتى يمتص أي سوائل قد تسبب تعفن السمكة, لم أستعمل الملح الناعم لأن السمكة ستمتص الكثير منه وتصبح مالحة جداً, والمفروض أن الملح يمتص سوائل السمكة لا العكس.
والكركم أعطاها لون جميل جداً.
بالفعل توفير جامد جداً في النفقات لو عملته بالبيت, ولا تهتم بما يقولونه من عدم صلاحية سمك المزارع وعدم التجميد وهذه الأشياء فالسمكة كانت مجمدة وكانت سمكة مزارع.
جرب وصور لنا النتيجة.

أم أحمد
26-03-2010, 06:38 AM
ايه الريحة الجميلة دي يا استاذ فيشاوي
ما شاء الله عليك
شكل الفسييييخ رهيب رهيب رهيب
انا كمان بدور عندي عليه كتير وبكل اسف مش بلاقيه
وطبعا من اول الاكلات اللي بطلبها لما انزل مصر
تسلم الايادي
وبالف هنا وشفا
بس اوعي حد يبلغ عنكم البوليسسسس هههههه

sea horse
26-03-2010, 07:11 AM
العزيز فيشاوى
طبعا لو ناوى تعمل فسيخ وتخزنه لمدة 6 شهور مثلا
فنزود الملح شويه وتسيبه فى نفس العبوه بدون فتح
يعنى مثلا لو ملحت 5-6 سمكات فى برطمان كبير
فعند فتحه يجب الاستمرار بالاستهلاك خلال شهر
لكن طالما مقفول كويس يعيش اكتر من 6 شهور
وطبعا بعد الفتح ممكن تطلع السمكات وتغلف كل واحده بكيسين عزل
وعالفريزر براحتك لاى مده ولما تطلعها من التجميد تسيبها تفك فى التلاجه تحت
ولا تفكها بالحرارة او فى جو حار
وبالنسبه للملح فلا ينصح باستعماله مره اخرى
لان قدرته على نزع الماء من السمكه هايقل اوى
بالاضافه لان هاتلاقيه بقى لونه احمر شويه بسبب الدم
وهايكون مصدر تلوث للسمك الجديد
هوه الملح غالى اوى عندكم ؟؟ اطلع عالبحر اكيد فيه ملاحات وهاتلك نص شوال
تسلم ايدك وكل سنه وانت طيب
صباح الفل
:eat:

fishawy
26-03-2010, 07:15 AM
بس اوعي حد يبلغ عنكم البوليسسسس هههههه
هاهاهاه
والله يا أم أحمد عندك حق, هاحكي لك...
أنا إنتهزت فرصة عدم وجود أم شادي وشادي بالبيت وقمت بالعملة السودة دي, ولما رجعوا لقيت شادي بيقول لي : أف إيه الريحة دي, فيه حاجة معفنة.
حكيت لهم الحكاية, قالوا نفس كلمتك إحمد ربنا إن ما حدش من الجيران إتصل بهيئة نظافة البيئة أو بالبوليس.
طبعاً هذه المأكولات الدمار آكلها لوحدي فقط.

fishawy
26-03-2010, 07:20 AM
العزيز فيشاوى

طبعا لو ناوى تعمل فسيخ وتخزنه لمدة 6 شهور مثلا
فنزود الملح شويه وتسيبه فى نفس العبوه بدون فتح
يعنى مثلا لو ملحت 5-6 سمكات فى برطمان كبير
فعند فتحه يجب الاستمرار بالاستهلاك خلال شهر
لكن طالما مقفول كويس يعيش اكتر من 6 شهور
وطبعا بعد الفتح ممكن تطلع السمكات وتغلف كل واحده بكيسين عزل
وعالفريزر براحتك لاى مده ولما تطلعها من التجميد تسيبها تفك فى التلاجه تحت
ولا تفكها بالحرارة او فى جو حار
وبالنسبه للملح فلا ينصح باستعماله مره اخرى
لان قدرته على نزع الماء من السمكه هايقل اوى
بالاضافه لان هاتلاقيه بقى لونه احمر شويه بسبب الدم
وهايكون مصدر تلوث للسمك الجديد
هوه الملح غالى اوى عندكم ؟؟ اطلع عالبحر اكيد فيه ملاحات وهاتلك نص شوال
تسلم ايدك وكل سنه وانت طيب
صباح الفل
:eat:


أستاذ كرسي المطبخ ورئيس قسم أسرار الأكلات sea horse
ربنا يخليك لينا بنصايحك الرائعة, سأنفذ ياافندم هذه التعليمات ومن الآن يمكن لأي زائر لسنغافورا أن يتناول وجبة فسيخ نبراوي معتبر.
الملح موش غالي ولا حاجة بس كان مجرد سؤال,

sea horse
27-03-2010, 12:13 AM
العزيز فيشاوى
اكتر حاجه عاجبانى هيه اصرارك على عمل شئ غير معروف فى بلد الاقامه
احترم جدا من لا يعرف المستحيل ...لان فعلا كل شئ ممكن نطوعه ونعمله
فكرتنى زمان كنت فى انجلترا وكان رمضان واصريت على عمل كنافه
ومش هاحكيلك على الكوز وتخريمه ومحاولات عديده لغاية ما عملت ما يشبه الكنافه
بس المهم اتعملت وطبعا القطايف كانت اسهل شويه
تسلم ايدك بجد
وكل سنه وانت طيب وشم النسيم عالابواب هايكون 5 ابريل
مساء الفل
:eat:

عاشقة للبحر
27-03-2010, 02:27 PM
الحاجة ام الاختراع

تسلم ايدك يا استاذ فيشاوى الانتاج هايل

حضرتك كدة ممكن تعمل مشروع لإنتاج الفسيخ فى سنغافورا

كل سنة وانت طيب

fishawy
27-03-2010, 03:43 PM
العزيز فيشاوى



اكتر حاجه عاجبانى هيه اصرارك على عمل شئ غير معروف فى بلد الاقامه
احترم جدا من لا يعرف المستحيل ...لان فعلا كل شئ ممكن نطوعه ونعمله
فكرتنى زمان كنت فى انجلترا وكان رمضان واصريت على عمل كنافه
ومش هاحكيلك على الكوز وتخريمه ومحاولات عديده لغاية ما عملت ما يشبه الكنافه
بس المهم اتعملت وطبعا القطايف كانت اسهل شويه
تسلم ايدك بجد
وكل سنه وانت طيب وشم النسيم عالابواب هايكون 5 ابريل
مساء الفل
:eat:


بلاش الله يخليك سيرة الكنافة والقطايف, لأني منتهى الضعف أمامهما, ومنذ سنوات وجدت بأحد السوبرماركات كنافة مجمدة, وكان يوم عيد بالنسبة لي, وعلمت أم شادي كيفية عملها, واستمتعت لمدة, ولكن للأسف توقف السوبر ماركت عن استيراد هذه الكنافة(كانت كنافة تركية)
وطالما ذكرت القطايف فمطلوب من حضرتك وصفة لعجينة القطايف علشان أعملها بالبيت, لكن الله يخليك ويبارك لك, بالمقادير التفصيلية. نقطة نقطة.


الحاجة ام الاختراع

تسلم ايدك يا استاذ فيشاوى الانتاج هايل

حضرتك كدة ممكن تعمل مشروع لإنتاج الفسيخ فى سنغافورا

كل سنة وانت طيب

الله يسامحك يا عاشقة البحر, مشروع فسيخ وفي سنغافورا؟؟؟ دول يطردوني من البلد يابنتي, وهنا مافيش مصريين أبيع لهم, يعني هاعمل الفسيخ واكله أنا.

شاعر الرومانسية
04-04-2010, 12:53 PM
الله الله الله

تسلم الايادي والافكار يا عم فيشاوي
والله حاجة تفرح بجد ..
خاصة مع النتائج الرائعة دي ..:y1:

ولاتسمم بقى ولا خوف من طريقة تصنيع
كل منزلي ياباشا وعلى ادينا :1:

كل عام وانت وجميع أسرتك بخير وفي أحسن حال :f:

خالص تحياتي،،،:f2:

fishawy
04-04-2010, 01:18 PM
الأستاذ الشيف الشاعر حسن
من يستطعم الكلمات أكيد أكيد يستطعم الأكلات. علشان كدة شهادتك وسام.
واتفضل عندنا في سنغافورا إنت والأحباب في مطبخنا الرائع معزومين على أكلة فسيخ سنغافور وليس نبراوي.
وكل شم نسيم وأنت والأسرة وأعضاء منتدانا بخير وصحة وسعادة

أجمل من الخيال
23-06-2010, 01:31 PM
اخي فيشاوي تسلم ايدك انا بحب الفسيخ اوي بس مش بأشتريه خوفاً من اضراره بس من هنا و جاي حنعمله فالبيت و ناكل براحتنا بقى

و تسلم ايدك اخي سي هورس على الاضافة المفيدة اصلي بحب الفسيخ ملح خفيف

Lavender
06-07-2010, 07:42 PM
فسيخ
الله انا خلاص جوعت من الصورة
مش عارفة انا بخاف اشتري الفسيخ او الرنجة او السردين في الصيف
لذلك الواحد يستنى شوية و ياكله أفضل
مش عارفة ليه بس هو مرتبط معايا بالشتاء

ما شاء الله اخ فيشاوي شكل الفسيخ تحفة الف هنا