المساعد الشخصي الرقمي

مشاهدة النسخة كاملة : الجزء الثانى - من كيف تحصل على أموال كثيرة بسهولة



hossam
09-10-2002, 01:22 PM
أعزائى وأصدقائى

أنا آسف على غموض الموضوع بس حبيت أشوقكم شوية .. وعلى فكرة أنا مش بأدور على شريك ولا حاجة
دى شوية أفكار عندى حاولت أفيدكم بيها علشان تكسبوا وتربحوا وتدعولى

الموضوع الأول : ( كيفية تصنيع العطور )

الخامات : ( لتحضير زجاجة 50 مل )
أولاً : 10 مل زيت عطرى ( موجود بجميع أنواعه بمحال العطور وثمنه رخيص جداً )
ثانياً : 40 مل كحول عطرى ( برضه بنفس المحلات )
ثالثاً : ماء مقطر ( موجود بمحطات الوقود - وعلى فكرة دى مش ميه نار .. بس هى عاملة زى المياه المعدنية بس بلاش تحاولوا تشربوها )

عدة الشغل :
أولاً : مقياس مدرج ( عامل زى الكوباية وهتلاقوه فى الصيدليات ويفضل أن يبدأ تدريجه من 5 مل )
ومن الممكن الإستغناء عنه وإستخدام الطريقة البلدى فى المعايرة يعنى تحط معيار زيت وعليه أربع معايير كحول وهكذا ..

ثانياً : دورق واسع للتقليب


طريقة التركيب :
1 - يوضع الزيت العطرى
2 - يوضع الكحول العطر
3 - توضع من 4 إلى 5 قطرات من الماء المقطر
4 - ترج جيدأ
5 - توضع بزجاجة بلاستيكية وتوضع فى الفريزر بالثلاجة لمدة لا تقل عن أسبوع مع مراعاة التقليب والرج جيدأ كل يوم .
6 - إستمتع .......

ملحوظة هامة :
- معيار التركيب من 1 إلى 4 يعنى إذا أردت تركيب 100 مل يبقى تحط 20 زيت و 80 كحول وهكذا .
- الماء المقطر له وظيفتين ( إزالة الملمس الزيتى فى العطر - إزالة رائحة الكحول )
- وضع البرفان بالفريزر يؤدى إلى تعتيقه وزيادة تركيز العطر وثباته حيث يساعد الظلام ودرجة الحرارة المنخفضة على إمتزاج الخليط وتركيزه

- الموضوع ده كله مش حايكلفك أكتر من 10 جنيه لتصنيع زجاجة من أشهر الأنواع وبنفس التركيز وبالطبع المكسب 100 % لو فكرت تبيع بـ 20 جنيه .

وأخيراً أرجو أن تستفيدوا وتدعولى دعوة خير تنفعنى ...

إنتظروا أفكار أخرى مثل ( الصابون السائل - الشامبو - .... BABY OIL )


حسام

خالد بن الوليد
09-10-2002, 02:58 PM
شكراً حسام على الطريقة و الفكرة ..
بس اعتقد مش ناقص المثبت ! ؟ كدة عطر و كحول بس الرائحة مش هتفضل موجودة لفترة طويلة .. كمان بشوف برفانات الوان ( ازرق فاتج - اخضر فاتح و احمر فاتح و كدة )
يا ريت لو عندك فكرة كمل جميلك و قولنا نجيب مثبت منين و اسمو ايه و الصبغة أو اللون كمان ..
و شكراً مرة تانية منتظرينك في افكار جديدة :)
:6:

ابن البلد
09-10-2002, 03:03 PM
مشكور hossam
باشاااااااا
و أهلا بيك معانا وكده هنعمل دهب من الموقع وأفكارك الجميله
:179:

hossam
11-10-2002, 10:29 AM
أصدقائى الأعزاء ... أنا سعيد جداً لإهتمامكم بالموضوع
وبالنسبة للمثبت من الممكن أن تجدوا عند نفس محلات العطور بعض المثبتات وأن عن نفسى لا أستخدمها كثيراً ولكن من الممكن وضع نقطة من الجليسرين للتثبيت
بس أعتقد وهذا عن تجربة أن وضع الزجاجة فى الفريزر كفيل بذلك ولكن إذا أردتم زيادة فى التثبيت إستخدموا المثبت الموجود فى المحلات أو الجليسرين ولكن لا تزيدوا فى المثبتات حتى لا يكون ملمس العطر زيتى . . . وهناك زيت الصندل وود من الممكن إستخدامه كمثبت ولكن برضه نقطة واحة ....

بالنسبة للألوان ...........

علشان تحصل على أى لون إنت عايزه .. عارفين الألوان الفلوماستر ؟

جوه القلم الفلوماستر إسفنجة بها اللون الخاص به . يعنى تجيب السفنجة إللى فى اللو اللى انت عايزه وتحطها فى الكحول لمدة أقل من ثانيه حتى لا يكثر اللون ويبقع الهدوم وبعدين ترج كويس .. حتلاق الألوان اللى انت عايزها سواء كانت أحمر أو أخضر أو أصفر وإلى آخره ...

أشكركم مرة أخرى على إهتمامكم وجارى التحضير لموضوع مربح آخر ..

حسام

خالد بن الوليد
12-10-2002, 07:27 AM
مشكور أخ حسام ربنا يجازيك خير ..
و في انتظار المزيد ..;)

Mrs. Virgo
12-10-2002, 07:37 AM
حلو .......... بس فين الـ BABY OIL بتاعي ؟؟؟ :(

:5:
:5:
:5:

hossam
12-10-2002, 01:30 PM
عزيزتى Miss. Virgo مشرفة قاعة الفن ...
كما وعدت من قبل فإنه جارى التجهيز لمواضيع جديدة كثيرة من بينها الBABY OIL بس أرجو التمهل حيث أن بعض هذه الأشياء أعرفها وأقوم بها واليعض الآخر أقوم بترجمته حتى أطرحه عليكم بصورة مبسطة ... فأرجو المعذرة والتمهل ... وكل عام وأنتم جميعاً بخير ...

والسلام عليكم ورحمة الله وبركاته

ابن مصر
12-10-2002, 02:18 PM
برافوة hossam حيسك بالدينا --مشاء اللة عليك --وانا شيفك نشيط ويالاة ياشباب الهمة وربنا يعطكم الصحة
ابن مصر

hossam
12-10-2002, 07:40 PM
:) والله يا أخى إبن مصر أنا مش عارف أشكرك إزاى يعنى إنت الوحيد هنا الصراحة إللى واخد بحسى ومشجعنى سواء هنا أو فى القاعات الأخرى يا سيدى أنا فعلاً متشكر وسعيد جداً بإهتمامك ومشاركتك لى وتشجيعك لى

وكل سنة وأنت بألف خير وسلام أنت وكل المشاركين بالمنتدى

والسلام عليكم ورحمة الله وبركاته

حسام

ابن مصر
14-10-2002, 11:50 AM
اولاشكران علي كلامك الجميل جد--ثانيا-- اصل موضيعك كلها قيمة ومفيدة--وصعب الواحد يفتها -- الخير والحلوة والطيب --قليل جدا--في هذة الايام--بارك اللة فيك :) :) ا
اخيك في اللة --ابن مصر

hossam
14-10-2002, 11:26 PM
بسم الله الرحمن الرحيم.
أخى العزيز إبن مصر .. أخجلتنى بكلماتك الرائعة التى وإن كانت قليلة فإنها تحمل معانى كثيرة تمر كالنسيم على قلبى .. فهذه الكلمات منك أنت بالذات أعتبرها شرف لى وتاج على رأسى .
أشكرك مرة أخرى وأرجو أن أكون عند حسن ظنك .. وأشكر كل أعضاء ومشرفين المنتدى الذين أعتبرهم مثال للإلتزام والجدية والتعاون والمشاركة .. عسى أن يوفقنا الله من خلال هذا المنتدى جميعاً إلى مايحب ويرضى ويجعلنا هادين مهديين لا ضالين مضلين اللهم تقبل منا إنك أرحم الراحمين ..



وكما وعدت كل أصدقائى فأنا أجمع الآن من الشبكة كل ما يفيد من أعمال قد تدر أرباحاً بدون تكلفة مرتفعة وأترجمها لكى تعم الفائدة ، بالإضافة إلى الكتابات الإسلامية الهامة لبعض ما نجهل فى ديننا الحنيف .. علنا ننتفع بحديث رسول الله والذى فيما معناه أنه إذا مات إبن آدم إنقطع عمله إلا من ثلاث " صدقة جارية ، وعلم ينتفع به ، وولد صالح يدعو له " فنرجو أن نحصل على الجائزة الثانية كلنا إن شاء الله .... آسف على التطويل .. وشكراً مرة أخرى

والسلام عليكم ورحمة الله وبركاته ..

midodeebo
08-01-2005, 04:04 PM
نريد المزيد
زاد الله فى عمرك واجرك يا hoss

mperf
17-08-2005, 09:41 AM
*4*
شكرا أخ حسام على المعلومات الرائعة وإن شاء الله تكون في ميزانك يوم القيامة

بس كنت احب اسألك عن سبب البقع اللي على الهدوم في بعض العطور وهل في مواد تمنع تسبب البقع

وجزاك الله خيرا

أم أحمد
01-02-2006, 09:35 AM
كل الشكر ليك يا اخي الفاضل علي الموضوع
يا ريت تكمل الموضوع
في انتظار البقية

hossam
18-02-2006, 10:02 PM
السلام عليكم ورحمة الله وبركاته ..

طبعاً أنا غبت عنكم كتير .. ولكن لم أنساكم .. فمن الممكن أن تقولوا كنت تايه ومش لاقي لا الموقع ولا اليميل ولا اليوزر نيم ولا كل حاجة .. وبالصدفة كنت أقلب صفحات الانترنت باحثاً عن بعض المواضيع ووجدت الموضوع بالصدفة والله ، والحمد لله أن اراكم مرة أخرى على خير ، وإن شاء الله يكون بيننا تعاون مثمر ...

أما بالنسبة لموضوع البقع على الملابس بعد إستخدام العطر فينبغى الإشارة إلى زيادة الزيت لدرجة أن تأثيره على الملابس يكون ملحوظ .. هنا من الممكن أن تضع قليلاً من قطرات المياه المقطرة ولكن إحترس فإن زادت كمية الماء أدى ذلك إلى التعكير .. فلا تبالغ في وضع الماء وإن شاء الله سوف لن تجد بقع ..
الكمية المفضلة للمياه على 50 جرام هي 5 قطرات ..

وأى خدمة

حسام

ضابط شرطة
18-02-2006, 11:04 PM
فكرتك جميلة جدا يا حسام و بتدل على كرمك و ذوقك
وحبك لابناء وطنك ...
ربنا يجازيك خير ان شاء الله و يوفقك في طريقك ...

و بالمناسبة اعملي واحده مربرت مان يا مان ;)

hossam
20-02-2006, 12:05 AM
يا باشا متشكر جداً على ذوقك ، وأنا تحت أمرك والمربرتمان مان جاهزة وشوف انت هتبقى في القاهرة إمتى وقوللى وأنا أجيبهالك :)

وتأمرني يا باشا ..

أخوك حسام

بنت مصر
20-02-2006, 12:51 AM
حمد الله على سلامتك اخي حسام
منور المنتدى

*189*

بسنت

hossam
25-07-2009, 04:58 AM
حمد الله على سلامتك اخي حسام
منور المنتدى

*189*

بسنت


المنتدى منور بوجود مشرفين واعضاء روعة أمثالكم والله وحشتوووووووونى

العسل المر
25-07-2009, 03:31 PM
موضوع جميل فعلا - بس اعتقد يا استاذ حسام حضرتك لما نزلت الموضوع دا مكنش في قاعة في المنتدى وقتها اسمها رجال الأعمال !!

على كل حال - موضوع مفيد جدا جدا يا فندم - جزاك الله كل خير

أخت ضابط شرطه
25-07-2009, 04:56 PM
شكرا عالافكار أخى الفاضل

ابوالحيلة
25-07-2009, 08:55 PM
بسم الله الرحمن الرحيم
الفاضل حسام
انا اشكرك على هذه الميول الجميلة عندك والتى تساعد كثير من الشباب على الكسب الحلال واقترح عليك ان تمدهم بمشروع عيش الغراب لان هذا الموضوع بسيط جدا ومطلوب من قبل المطاعم ومكسبه كبير
وشكرا على افكارك البنائة0000ودمتم بخير

hossam
26-07-2009, 03:31 PM
بسم الله الرحمن الرحيم
الفاضل حسام
انا اشكرك على هذه الميول الجميلة عندك والتى تساعد كثير من الشباب على الكسب الحلال واقترح عليك ان تمدهم بمشروع عيش الغراب لان هذا الموضوع بسيط جدا ومطلوب من قبل المطاعم ومكسبه كبير
وشكرا على افكارك البنائة0000ودمتم بخير

إنشاء الله أخى العزيز عن قريب سوف أضع تلك المواضيع تباعاً وأشكرك على اقتراحك وردك ولكنى بدأت بالعطور لانها عن تجربة شخصية ولكن سأبذل قصارى جهدى لايجاد المزيد من الأفكار التى تساعد الشباب الذى فى بداية حياته العملية على أن يكسب كسب حلال ويعتمد على نفسه .. وجزاكم الله خيراً ..

الطارق جروب
15-03-2010, 06:01 PM
بارك الله فيك أخي ، عاوز اعرف من حضرتك منين أجيب القزايز ( زجاجات البرفان ) ياريت تقولي مصدرها منين وياريت اعرف تليفون حضرتك


Photo Gallery