المساعد الشخصي الرقمي

مشاهدة النسخة كاملة : عيد أضحى سعيد ... ولحم شديد



sea horse
17-11-2009, 07:20 AM
كل سنه وانتم طيبين
عيد الأضحى المبارك
عيد سعيد باذن الله
عايزين كل الاصدقاء يقولولنا على احلى طبق لحمه بيحبوه
او يطلبوا وصفة معينه للحوم العيد
وعيد سعيد فرحان ...مليان لحمه وخرفان
مع اعتذارى للاسعار
صباح الفل
:eat:

sea horse
17-11-2009, 09:34 AM
خلونا نبدأ بحاجه خفيفه لفتح الشهيه
صينية الريش
طبعا لو ريش بتلو تبقى فى الجون
لكن لو ريش ضانى فيفضل سلقها اولا
مع مستكه وحبهان وبصلايه مشقوقه حتى السوى وتصفى
ونحضر خلطة من 3 بصلات حلقات وبطاطساية مكعبات صغيرة
وجزرايه مكعبات صغيرة وملح وفلفل وبهارات
وندهن الصينية بالسمن ونرص الريش وفوقها الخلطة
وكمان كوباية شوربه او ميه بملح خفيف
ونغطى بالالمونيوم فويل وعالفرن الحامى عدل
تاخدلها حوالى ساعه ونشيل الفويل للتحمير
صباح الفل
:eat:

سمـاء
17-11-2009, 08:27 PM
كل سنة والجميع بخير..

ربنا يجمعنا ان شاء الله على جبل عرفات

ويتقبل من الحجاج ويحفظهم..

بكرة ان شاء الله اول ذو الحجة... فى السعودية كمان..

عيد سعيد علينا كلنا ان شاء الله...


http://samaa1.jeeran.com/1232/bouquet5.jpg



sea horse

طريقة الريش دى شكلها تحفة..

اصل موضوع الشوى ع الفحم ده بقى صعب شوية...

خصوصا ان العيد هيكون جمعة وسبت... يعنى مافيش اجازة... :(


سؤال كمان.. انا عارفة انك كتبت طريقة كفتة الرز قبل كده.. بس بصراحة مش عارفة الاقيها..

ممكن تانى؟؟؟

sea horse
18-11-2009, 11:47 AM
العزيزه سماء
اللهم يتقبل دعائك للجميع
ومتجمعين فى الخير دايما يارب
كفتة اللحمه بالرز و الدمعه
والدمعه هيه الصلصة بالتوم
وتتعمل بدق عشر فصوص توم محترمين
ويتشوحوا فى معلقة سمن كبيره ونقطتين زيت
وبعدين نحط الصلصة والميه والملح والفلفل والكمون
ونسيبهم يغلوا عالنار نص ساعه.. وننزلها من عالنار
وكده يبقى جهزنا الدمعة
نيجى بقى للكفته
كيلو لحم مفروم وشين
كوباية رز منقوعه فى الميه بقالها ساعتين وتطحن فى الكبة للتنعيم
شبت وبقدونس وكسبرة خضرا وخمسة فصوص توم ...و نفريهم فى الكبه ناعم
نحط ده كله على بعض مع ملح وفلفل وكمون وشطة وملعقة صغيرة نشا
وهوبا ياللا نديها عجن محترم بالايدين حتى التجانس التام
نحول العجين لصوابع حسب المقاس ونقليها فى الزيت للون الذهبى
والكفته اللى تطلع من الطاسه نسقطها فى الدمعه السخنه
ومانحطش كفته اكتر من الدمعه لانها لسه هاتشرب منها
ولما نخلص نحطها تانى عالنار غلوتين للكفته المحمره وهيه فى الدمعه
وتتاكل مع رز ابيض
مساء الفل
:eat:

سمـاء
18-11-2009, 07:12 PM
sea horse

تسلم ايدك على الكفتة..

أخيرا هناكل كفتة حلوة مش زى اللى الجزار بيعملها...

بس سؤال صغير.. مافيش بصل فى الخلطة؟؟

sea horse
18-11-2009, 10:58 PM
العزيزه سماء
طبعا ممكن اضافة بصله مبشوره ناعمه بس هاتدى طعم تانى
ولو عملناها ببصل بس تدى طعم تالت
يعنى التعامل مع تباديل البصل والتوم بيدى طعم مختلف لكل حاله
انا عن نفسى باحبها بالتوم وبدمعه بالتوم برضه
بس جربى كده وكده للتغيير برضه
مساء الفل
:eat:

اليمامة
19-11-2009, 12:01 AM
موضوع لطيف كالعادة العزيز سى هورس...وخاصة انك جايب فى سيرة اللحمة...ههههههه....كل سنة وانتم طيبين جميعا ويارب عيد سعيد باذن الله برغم ارتفاع اسعار اللحوم كعادة كل عيد فى الفترة الاخيرة.
هاقول عن وصفة لذيذة لحتة اعتقد الكل بيحبها وهى الموزة...ونقول الموزة الرستو..والحقيقة انا بافضل الضانى جدا فى العيد وعارفة ان فية ناس كتير متحبوش يمكن للريحة مع انى مش شايفة ان له ريحة منفرة للدرجة دى..المهم هانجيب الموزة قطعة واحدة وياريت تكون بعضمة..ونتبلها بالفلفل الاسود والملح وناخدها تحمير فى طاسة على النار لقفل المسام للاحتفاظ بالعصارة وبالتالى طراوة اللحم..وبعدين فى صينية فرن هانحطها ونقطع عليها شرايح الطماطم و فلفل اخضر وشرايح جزر وبصل ونتبل كل دا بالفلفل وبهارات اللحم زى الحبهان والمستكة واللورو والملح ونزود الشوربة او المية ونحطها فوق النار تغلى شوية على الهادى لمنع الكششان الشديد للحم وبعدين تدخل الفرن الحامى ونزود المية كل شوية مع اختبار تسويتها لغاية ماتقريبا تجف الميية وتستوى بتاخد مش اقل من ساعتين تلاتة وحسب حجم القطعة وطبعا مغطين بورق فويل وبعدين استوت نشيل الفويل وندهنها بالسمن البلدى ونفتح الشواية ويتحمر اللحم تحت الشواية وناخدها مع الصوص اللذيذ الدسم اللى نازل منها بالفلفل والطماطم والبصل والجزر مع الرز وصينية بطاطس محترمة وشوية ملوخية خضرا ...وبألف هنا.

اسكندرانى
19-11-2009, 12:44 AM
اخى العزيز
سى هورس

كل سنة وانت طيب

هى دى الموضوعات اللى انا بحبها

موضوعات فيها شموخ

انا معااااااااااااااااااااااااك

اعتبرنى شيف مساعد

او شيف تحت التمرين

اهو ادوق من كل وجبه تقدمهالنا

كل سنة وانت طيب

sea horse
19-11-2009, 06:59 AM
شكرا للعزيزه يمامه
وصفه شديده وسهله تسلم ايدك
بس برضه كمعلومه الضانى فى مصر عدة اصناف
الاوسيمى والرحمانى والبلدى الخليط ...واهمهم صنف البرقى
بالانسبة للاصناف البلديه زى الرحمالنى وغيره فيعاب عليه رائحه نفاذه
وكمان كبر حجم الليه ( دهن الديل) والتى تصل ل 12 كيلو احيانا
اما البرقى فهو سلاله نقيه تعيش فى الساحل الشمالى وتنتشر بين مصر وليبيا ايضا
ويمتاذ بحجمه المناسب ( 40--70 كيلو) وصغر حجم الليه ..2 كيلو
كما ان الدهن موزع بين العضلات مما يعطيى لحمه مثاليه للشوى وكافة الوصفات
معلش اصلى متحيز جدا للصنف ده ومش باشترى غيره
لانه خروف وضانى بس فى نفس الوقت لحمه اقرب للنيفه ( لحم الجدى )
فانا يا يمامه من مؤيدى الضانى برضه واللحم الملبس اللذى لا يعلى عليه
صباح الفل
:eat:
يا جماعه علامات التنسيق والتلوين للنص عطلت عندى فجاه
ياريت اللى يفهم فى الحاجات دى يساعدنى
اخوكو مزنوق ومالوش فى الحدوته

sea horse
19-11-2009, 07:05 AM
اهلا بالعزيز اسكندرانى
يا عم انت تنور اى موضوع واى مكان
وكده ضمنت نجاح الموضوع بوجودك فيه
وبلاش زوغان ومساعد والافلام دى
انا عارف ان الاسكندرانيه مشهورين فى العيد بورقة لحمه حدوته
فمستنيين وصفتها يا بو سكندر والعيال جعانه ومستنيهه
تسلم ايدك دايما
صباح الفل
:eat:

ملك عمرى_88
20-11-2009, 11:30 AM
السلام عليكم ازيك ياسى هورس
وكل سنة وكلكم طيبييييييييييين
انا كنت عايزة اسأل سؤال ملوش دعوة بخروف العيد
بس ليه علاقة باللحمة
ايه هو احسن مقطع اخد منه كباب الحلة
وبالمرة بقى ادينا وصفتك لكباب الحلة
لان وصفاتك دايما بتبقى غير
وعيد سعيييييييييييييد

sea horse
20-11-2009, 08:17 PM
العزيزه ملك
اهلا بيكى ودايما منورانا
بالنسبة لأفضل جزء لكباب الحله من الخروف فيفضل الفخذ
بس من الجزء الداخلى
يعنى لما نتخيل الفخده قدامك ففيه الجزء الخارجى ( وش الفخده )
والجزء الداخلى .. وده الافضل لنعومته مقارنة بالوش الخارجى
وعامة يفضل لكباب الحلة اللحم الملبس بقليل من الدهن للتسوية الجيده والطعم الجميل
وكل سنه وانتى والجميع طيبين
مساء الفل
:eat:

أيوب الصابر
20-11-2009, 09:36 PM
موضوع شهي جداً
ياعيني على الخرفان ياعيني
عندنا بفلسطين اللي بيضحي يوم العيد الصبح
بكون الفطار فتة لحمه بعظمها وعالوش حب حمص شامي مسلوق
مع توم مدقوق وحب هال
والوجبه المركزيه هي الشواء والشواء فقط
حتى انتهاء ما تبقى اللحم بعد التوزيع
واللي ماعندوش اضحيه فيتجه لشواء البتللو
وكل عام وأنتم بخير

أم أحمد
20-11-2009, 10:30 PM
كل سنة وانتم جميعا بكل الخير
ايوة كده بشاير العيد هلت علينا
يا رب يكون عيد سعيد علي الجميع
وبلاش تكتروا من اكل اللحمة
وكتروا من السلطة والخضروات جنبها عشان تعمل توازن

انا بحب افطر كبده وكلاوي ولحمة متقطعة صغير ومتشوحة في شوية زبدة
بتكون خفيفة وسريعة ومتعودة علي كده من زمان
برغم ان في ناس بتفطر فتة بس انا مش اقدر علي الصبح كده اديها فتة وتوم وصلصلة بتكون صعبة شوية
عاوزين بقي طريقة حلوة للرقاق ولو اني مش عارفة هالاقيه هنا ولا لا

sea horse
21-11-2009, 08:53 AM
العزيز ايوب
طبعا عادات العيد بتختلف من بلد لبلد وبتختلف كمان حسب المناطق داخل البلد
يعنى انا اصلا من احدى البلاد الساحلية فى مصر وبنفطر زيكم لازم الفته والتوم واللحم الهبر عالوش
لكن فى القاهره يفطروا كبد وكلاوى محمره ويخلوا الفته للضهريه
فواضح ان عادات سواحل البحر الابيض زى بعض مع انها بتكون فطار شديد ومحتاج مهضمات بعده
ههههههههههههههههه
العزيزه ام احمد
واضح انك تبع فرقة الكبد والكلاوى القاهرية
اهم حاجه تجميعة العيله وفطار غير تقليدى برضه ...ماحنا مش بنفطر ابدا حاجه محمره اى يوم
يوم مختلف جميل ويجعله عيد سعيد عالجميع
بصى بقى
لما كنت فى امريكا تحايلت على موضوع الرقاق ده بالعيش الشامى اللبنانى الكبير
فجبت حوالى 12 رغيف واخدت الوش بتاعهم بيكون ارق من القاعده
وتعاملت معاه على انه رقاق
وطلعت صينية رقاق برضه ... صحيح مش زى الاصل ..لكن برضه من ريحة المرحوم
هههههههههههههههههه
صباح الفل
:eat:

سمـاء
21-11-2009, 09:30 PM
sea horse

كفتة الرز طلعت حلوة جدا تسلم ايدك...

وبمناسبة الكفتة والعيد دى كانت وصفة من وصفاتك:


الكفته المصرية عالسيخ

نجيب كيلو لحم كندوز و نص كيلو لحم جملى و حتة صغيرة ليه ضانى من غير الجملى هاتقع الكفته من على السيخ
ونفرم المجموعة مع بعضها مرتين على الاقل مع التقليب للتجانس ولا نضع اى اضافات على اللحم... ونسيبه فى التلاجة
نبشر بصله كبيره ناعم ثم نعصرها فى شاشة وناخد مية البصل بس ونضيف لمية البصل فورا معلقة صغيرة ملح و نص معلقة فلفل اسود ونكون مخرطين حزمتين تلاتة بقدونس لاستقبال الكفته عليها بعد الشوى
المهم ... بعد ما نولع الفحم ..نسيبه يصفى خالص يعنى يبقى كله جمر مافيهوش لون اسود

نبل ايدنا فى مية البصل و ناخد قطعة من اللحم المفروم ونشكلها عالسيخ بطوله
و نضغط عليها بين الابهام والسبابه من مكانين لتشكيل تلات صوابع

بعد ما نخلص مجموعة اسياخ على قد الشوايه ..نبدأ الشوى فورا
ولا يستحب كثرة التقليب على النار ..يعنى نسيب كل جنب يستوى .. ونقلب ولما يستوى السيخ ننزل الكفتة على فرشة البقدونس فيمتص الرائحة وتبقى أحلى كفتة
بالهنا والشفا




بس السؤال برضه اللحمة من غير اضافات خالص طعمها هيكون حلو؟؟؟

وايه البديل للحمة الجملى علشان ماتقعش من على السيخ؟؟؟

أيوب الصابر
22-11-2009, 09:35 PM
sea horse





الكفته المصرية عالسيخ

نجيب كيلو لحم كندوز و نص كيلو لحم جملى






ماهو اللحم الكندوز واللحم الجملي
أفيدونا أفادكم الله تعالى

اليمامة
22-11-2009, 10:46 PM
مساء الفل
متابعه الموضوع الرائع دا...وكل الشكر لكل الناس الحلوة ..لانى حاسة بجد ببشاير العيد الحلوة فى لمتكوا الجميلة..
واحب اقولكوا على وصفة التقاطيع؟ ياترى عارفينها؟ او فاهمينها؟..انا بحبها بس لما تتعمل صح..اولا التقاطيع دى اى حاجة اعتقد جوا بطن الحيوان المدبوح..يعنى الكبدة والطحال والقلب والكلاوى والامعاء والرئة...فية حاجة تانية؟ مش بيسموها برضة حلويات...او فواكة المدبح؟
المهم بناخد الحاجات دى زى ما هى بحجمها او يعنى بنقطعها نصين ونغسلها كويس جدا ونغير عليها المية وفى النهاية بنسيبها منقوعة شوية فى مية بملح ودقيق وشوية خل..وطبعا حاجة زى الامعاء لازم تتنضف وتندعك فى الدقيق والملح وتتنقع فى خل علشان تبقى نضيفة اوى...اى حاجة محتاجة تنضيف بنضفها..بعد كدة بنغلى المية ونسقط الحاجات دى تغلى غلوتين وبعدين نشيلها ونرمى المية ونحط مية جديدة ولما تغلى بنحط الحاجات تانى مع بصلة كبيرة وفلفل اسود وحبهان ولورو وفص مستكة وجزر وممكن قرن فلفل اخضر ونسيبها تغلى وتستوىوبعدين بناخده ونبدا نقطع بسكينة حامية الحاجات دى كلها طرنشات رفيعة بقدر الامكان وطبعا لو الكمية كبيرة قطعى او قطع من كل صنف على اد الوجبة المطلوبة والباقى يتشال سليم فى اكياس خزين فى التلاجة..المهم بناخد المتقطع وفية كام طريقة او اضافة لطبخة...انا عن نفسى فى زيت او سمن باخدهم تشويح مع شوية فلفل اسود كتار والملح المضبوط وبس لكن ممكن فصين توم يتحطوا وممكن بصل بس وممكن بصل مع توم والاخطر انة ممكن يتحط طماطم بس انا باعمل التشويح السريع كأنة جريل مع فلفل اسود وملح وبس وبعد كدة باجيب العيش البلدى وباطبق نص الرغيف جوة الرغيف بحيث يطلع ساندويتش مزدوج بدون فصلة..وباكون مجهزة جرجسر مقطعاة بايدى خشن وباحط جوة السندويتش وبعد كدة باحشية تقاطيع ويتاكل سخن ومعاة طبق شوربة دسمة مليانة بهاريز وفيها حتة كوارع والليمون...وبكدة هاتكونوا قاعدين فى اى مسمط محترم فى السيدة زينب و الحسين....يارب تعجبكوا.

اليمامة
23-11-2009, 11:57 AM
اهلا يا سماء...وصفة كفتة سى هورس هايلة فعلا..ميرسى انك فكرتينا بيها الايام دى...عايزة اقولك فعلا اى كفتة من اللحمة الجملى بتبقى هايلة لانها بتمسك نتيجة لنسبة الجليوتين العالية فى لحم الجمل...ومعروف ان لحم الجمل بيتاخد يتفرم للكفتة...غير انه لحم نقى ومسكر ونضيف..جدتى ربنا يرحمها كانت تعمل الكفتة كاملة بدون خلط من لحم الجمل...ولانى مش دايما بلاقية فابعمل الكفتة عادى بس بشرط ان اللحم المفروم يكون حوالى 25% منة دهن مفروم عادى مع اللحمة..وبعدين باخد تلت كمية اللحم افرمة تانى لوحدة...يارب كلامى يكون مفهوم بس هاوضح اكتر...يعنى مثلا لو بجيب كيلو لحم مفروم الجزار فارمهولى حالا باخدة وفى الكبة باخد تلت الكيلو المفروم دا وبافرمة فى الكبة تانى بيبقى ناعم جدا وبعد كدة باخلطة مع التلتين الباقيين المفرومين من الاول وباقلبهم فى بعض وعلى فكرة فى محلات الكبابجية بيعملوا كدة بيجيبوا اللحم عادى حتت مش مفروم ويحطوة فى المفرمة الكهربائية الضخمة دى يتفرم كلة الاول وبعد كدة بياخدوا نصة ويفرموه تانى انعم لوحدة ويخلطوة مع المفروم الاولانى والحكاية دى اسمها فرمة ونص ووظيفتها بتخلى صوباع الكفتة متماسك ميفوكش من على النار ..وغالبا بيعملوها باللحم البتلو وبالتالى بيحطوا لحم طماطم يعنى الفيلية مش مية الطماطم او القلب...لحم الطماطم المتماسك وبيفرموة مع اللحم وفايدتة بيدى لون احمر للحم وخاصة لو كان بتلو وطعم حلو مع نسبة الدهن اللى بيفرموها كمان وبيكونوا طبعا ناقعين اللحم قبلها فى مية بصل وبعدين بياخدوه يفرموة مع تفل البصل بس...وانا باعمل كدة بعد الفرمة والنص مع تفل البصل بس بدون ميتة باخد المية وباقلب فيها الفلفل الاسود والملح وممكن شوية قرفة وباصبعها وبارصها فى صينية وبادخلها الفرن بس اولا باعمل فحم مولع اوى جمر وباطفية فى الصينية والكفتة نية فى قشرة بصل فيها شوية زيت مقدوحين وباغطى الصينية بغطاء وباحكم بفوطة علشان اللحم يتشبع من ريحة الفحم وهو نى وبادخلها الفرن بعد ما اكون شيلت الفحم وانطفى...تستوى وتتحمر وباكون مجهزة تانى فحم وباعملة بنفس الطريقة الاولى مع احكام الفوطة وبكدة بتتطلع الريحة هايلة كأنها على شواية...كنت بس عايزة اقول انى باخد مية البصل مع الفلفل والملح وقرفة وبابل ايدى منها وباصبع الكفتة بيها بتبقى حلوة اوى...اما المفروم نفسة باكون حاطة علية فلفل وملح وقرفة برضة...جربى دى يمكن تعجبك.

sea horse
23-11-2009, 07:53 PM
العزيزه سماء
بالنسبه للاضافات بتكون موجوده مع مية البصل زى الملح والفلفل واى شئ
وموضوع اللحم الجملى ده اساسى لعدم سقوط الكفته من السيخ
وطبعا زى ما قالت يمامه تنعيم جزء من المفروم بيساعد كمان
:f:
العزيز ايوب
الكندوز هو لحم عجل البقر الكبير بيكون وزن العجل لا يقل عن 400 كيلو
والجملى هو لحم الجمل او الناقه او الابل
والبتلو هو لحم رضيع الجاموس يكون سنه حوالى 40 يوم وقبل الفطام ووزنه من 80 ل 120 كيلو
الجاموسى هو لحم عجل الجاموس ويكون وزنه لا يقل عن 600 كيلو
مساء الفل
:eat:

سمـاء
23-11-2009, 08:43 PM
يمامة sea horse

شكرا على المعلومات الكفتية...

وبما ان اللحم الجملى صعب جدا... هجرب موضوع الفرم ده..

وموضوع مية البصل كمان...

والفحم... بس دى كنت بعملها لما مايكونش فى شوى بجد...

تسلم الايادى والنصايح والخبرات...

أما موضوع التقاطيع أو الحلويات ده فمالناش فيه خاااااااالص.. يادوب الكبدة بس.... :elvis:

sea horse
24-11-2009, 10:08 AM
العزيزه سماء
اللحم الجملى سمعته سيئه عند معظم المصريين لكن بجد هوه من اللحوم الجيده جدا
واهم شئ يكون جمل صغير ويسمى بعرور
متهيالى كده ببعرور دى مش هاتجيبيه خالص
ههههههههههههههههه
وطبعا الكبده والكلاوى والقلب ممتازه ... ومش هاننسى المخ برضه تحفه
صباح الفل
:eat:

ملك عمرى_88
24-11-2009, 10:49 AM
ميرسى ليك ياسى هورس انا كان قصدى على كباب الحلة الكندوز بس متهيألى انه نفس المقطع من الكندوز
بس انت نسيت تقولى وصفتك لكباب الحلة
كمان انا مش متوفر عندى هنا لحم جملى اعمل ايه للكفتة المشوية كمان بتبقى نسبة الدهن قد ايه
وكمان بقى قولى اعرف مواصفات الخروف البرقى دة نعرفه ازاى
طلباتى كتير معلش بقى

sea horse
24-11-2009, 07:52 PM
العزيزه ملك
فعلا نفس القطعه تنفع لكباب الحله
وبالنسبه للجملى لو مش متوفر يبقى ننعم الفرم
يعنى زى ما قالت يمامه فرم مره واحده وبعدين نص الكميه تتفرم مرتين تانى تنعم خالص
ونخلط كله وبكده نقلل فرص سقوطها من على السيخ
كباب الحله
كيلو لحم ونص بصل وتوابل وملح وفلفل ومبشور جوزة الطيب
هانخرط نص كيلو البصل رفيع هلالات ونحطه فى حله مع معلقتين سمن ومعلقة زيت
ونشوح لغاية ما يدبل ونضيف الملح والتوابل ثم اللحم مقطع لقطع صغيره
ونقلب كويس لغاية ما كل اللحم يتلون وتتقفل المسام
ونضيف نص كوباية ميه بتغلى وكل ما تنقص نضيف تانى بس بتغلى
حتى السوا التمام
نصفى شوية سمن من فوق اللحم ونشوح فيهم فى طاسه معلقة دقيق كبيره
ونطشها بكوباية لبن وملح خفيف ونقلب كويس هانلاقى صوص تخين شويه
نقلبه على اللحم وغلوه بسيطه
وبالف هنا
بالنسبه للخروف البرقى مش هاتلاقيه الا فى اسواق وادى النطرون
خلف ريست الطريق الصحراوى للاسكندرية
وتلاقيه لونه ابيض كريمى وراسه بس سودا او بنى غامق
وكل سنه والجميع بخير
مساء الفل
:eat:

أم العلاء
25-11-2009, 06:32 AM
موضوع قمة في الروعة
تسلم الأيادي يا رب
و كل عام و أنتم بخير

sea horse
25-11-2009, 07:00 AM
شكرا للعزيزه ام العلاء
شرفتى ونورتى مطبخنا الجميل
زفى انتظار ارائك ومشاركاتك دايما
صباح الفل
:eat:

عاشقة للبحر
25-11-2009, 03:03 PM
العزيز سى هورس
طبعا كالعادة موضوع رائع وفى وقته تمام
كل سنة وانت طيب واسرتك كلها فى احسن حال
كل سنة واهل المطبخ جميعا طيبين

ملك عمرى_88
25-11-2009, 04:43 PM
ميرسى كتيييييييييييييييييييييييييييييييييييييييييييييييي يييييير ياسى هورس
كل سنة وانت طيب

sea horse
25-11-2009, 09:47 PM
العزيزه عاشقة البحر
العزيزه ملك
وجودكم وسطنا ده اهم شئ للاحساس بالعيد
فلا تحرمونا من مشاركتكم ابدا
وكل سنه والجميع بالف خير
:f:
بطن الخروف محشية
دى حته دايما نتضايق منها ومش بنلاقيلها لازمه لانها طبقات رفيعه من اللحم والدهن
هانجيب البطن بنلاقى عرضها حوالى 20 سم وطولها حوالى 50 سم
وهانعمل خلطه من لحم مفروم معصج ونص كيلو بسله مسلوقه
وجزرتين وبطاطسيتين متقطعين صغير اوى قد البسله ومسلوقين برضه
ونضيف للخلطه ملح وفلفل وبهار لحم ومبشور جوزة الطيب وحبهان مطحون
ومبشور طماطمايه كبيره ومفروم بقدونس كتير
ونحط الحشو بطول قطعة البطن ونلف الطرفين على الحشو ونربط بخيط قطن
زى اللحم البارد
ونحط اللفه دى فى طبقتين المونيوم فويل باحكام
ونحطها فى صينية فرن ومعاها كوبايتين ميه بتغلى ونحدفها عالفرن
وكل شويه نتاكد ان فيه ميه حوالين اللفه ونزودها بميه بتغلى
تاخدلها حوالى 3 ساعات
وتطلع نفك الدوباره وتقطع ترانشات بعد ما تبرد لسهولة التقطيع
وبالف هنا
:eat:

sea horse
26-11-2009, 09:03 AM
وقفة عرفات
كل سنه وانتم طيبين
كل سنه والكل متجمع عالخير
كل سنه ومعاكم فلوس تشتروا لحم كتيييييييييييييييير
:eat:

اليمامة
26-11-2009, 07:47 PM
العزيز سى هورس
ميرسى على زوقك وتهنئتك الرقيقة...كل سنة وانت طيب...اما بطن الخروف المحشية دى فعبقرية اوى ومذهلة...لان متخيلاها اوى وبوصفك لطبيعة البطن ..لحم بيتخللة دهن ...فطبعا الطعم فى منتهى اللذة وطبعا هايضيف على الخضروات نكهة خرافة مع التوابل وخاصة انها اشبة بانها مشوية فى الفرن...بجد جديدة وافتكاسة شديدة....تسلم ايدك.

سمـاء
26-11-2009, 08:27 PM
كل سنة والجميع بخير

وربنا يجمعنا على عرفات ان شاء الله

Sea horse

فين الفته على طريقتك؟؟؟؟؟ :eek:

sea horse
26-11-2009, 08:29 PM
العزيزه يمامه
كل سنه وانتى طيبه والاسره جميعا
ولحم البطن المحشى جربيه فعلا ممتاز
لان الدهون هاتسلى اثناء الشوى فى الفرن لفتره طويله ويتشرب اللحم الطعم
وعيد سعيد للجميع يارب
:eat:

أيوب الصابر
26-11-2009, 08:48 PM
كل سنة والجميع بخير

وربنا يجمعنا على عرفات ان شاء الله

sea horse

فين الفته على طريقتك؟؟؟؟؟ :eek:



وانا كمان عايز طريقة الفته بتاعة فطار صباح العيد
وكل سنه وحضرتك طيب

جيهان محمد على
26-11-2009, 09:05 PM
sea horse

اليمامة

كل واحد فيكم يقر ويعترف بكرة هايعمل أيه على الغدا :gun2:
أصلى بصراحة محتارة وما عنديش أفكار خااااااااااالص :2:
وعايزة أغش منكم أى حاجة :$
بس ركزوا معايا فى الكندوز والنبى عشان ماعنديش ضانى :icecream:
ياللا كل سنة وانتم طيبين وعيد سعيد عليكم يارب وعلى كل حبايبكم
تحياتى
:f2:

اليمامة
26-11-2009, 09:28 PM
ازيك يا جيجى...كل سنة وانتى طيبة..انا هاعترف اهوة...بصى عاداتنا لازم بنسلق اللحمة الصبح وبنعمل الفتة على 11 صباحا وبنفطر والمفترض اللحم ضانى ودى السنة طبعا...لكن انا زيك عندى كندوز وطلبت من زوجى مواصفات للحمة الحمد لله كعادة الرجال دائما تقولى يمين يمشوا شمال جابلى لحم احمر صافى طبعا سكت وابتسمت وقلت الله ...هههههه...لكن الاحمر دا مينفعش فى فتة ولا اى حاجة بصراحة لانى بافضل اللحم الملبس وخاصة لو طاجن كمان...ولانى اتوقع ضيوف بكرة..فاقلت هاعمل صينية رقاق..وصينية ريش تكون جوسى فى الفرن..وورق عنب وطاجن بامية..وهافكر فى الملوخية علشان ولادى بيحبوها ورز..وسلطات وبس..والفتة بقى اى يوم تانى..اما لو مجاش ضيوف هاعمل الرز والريش والملوخية وبس...انا كدة يا جيهان اعترفت...الدور عليكى...

ملك عمرى_88
26-11-2009, 10:12 PM
الله ياى هورس على وصفة البطن دى بجد دايما بتفاجئنى
والله دايما متابعاكم بس مش دايما بقدر اشارك
عندى بنوتة سنتين وبيبى خمس شهور والغربة صعبة
بس عايزة اقولك والله اول مااتجوزت كانت خبرتى فى المطبخ زيرو
بس الحمدلله دلوقتى تمام وتلات ارباع الاكل اللى بعمله من وصفاتك بجد
بس اعترف بقى ياسى هورس انت شيف بجد لان خبرتك فى المطبخ ماشاء الله مش معقولة
انت تعمل برنامج ويبقى ياخراب بيتك ياشيف اسامة وشيف حسن وكل شيفات مصر
كل سنة وانت وكل الناس هنا بألف خير ودايما عامر ياسى هورس

ملك عمرى_88
26-11-2009, 10:14 PM
صحيح هى اليمامة هى همزة انا عرفتك من حكاية الكفتة ام فرمة ونص
كل سنة وانتى طيبة انتى وكل اهل الاسماعيلية اللى انا بحبها موووووووووت دى

اليمامة
26-11-2009, 10:21 PM
ازيك يا ملك...كل سنة وانتى طيبة...ايوة اليمامة هى همزة...ههههههههههه...اللى هما انا...كل اهل الاسماعيلية دلوقتى نيام فى العسل...ههههههه...بلد جميل فعلا بس بالاصدقاء والناس....قبلاتى لنوناتك الحلوين.

sea horse
26-11-2009, 10:51 PM
العزيزه سماء
العزيز ايوب
الفته بالتقلية
طبعا احسن عيش للفته هيه الشقق المحمصه الفلاحى
بس باستعمل برضه العيش البلدى بعد تحميصه فى الفرن وده طبعا اخف من التحمير فى السمن
باكسر العيش لقطع قد علبة الكبريت مثلا
وباجيب معلقه كبيره توم مفروم احطها على معلقة زيت وتشويح سريع ونطفى بالخل
ونضيف معلقه كبيره صلصة طماطم
كده التقليه بالدمعه جاهزه
طبعا اللحم اتسلق مع كل الاضافات المعروفه لغاية ما استوى
اطلع اللحم على جنب وااستعمل كمية شوربه تكفى تشرب العيش
احط عليها نص تقلية التوم واحط بقى العيش واغطى ربع ساعه العيش يتشرب تمام
انشل العيش المتشرب فى صينية او طبق التقديم واغطى بالرز واحط اللحم
وادلق عالكل باقى التقلية
وبالف هنا
وفيه طريقه تانيه باحبها برضه واسهل
انى بافصص اللحم واقطعه صغير وافرشه فوق العيش المتشرب
واغطى بالرز وادلق التقليه عالوش بفن ونظام
وبكده اى حد يضرب معلقه هاتطلع بالعيش واللحم والرز
يعنى التغيير مالوش حدود
وكل سنه وانتم طيبين
:eat:

sea horse
26-11-2009, 10:54 PM
العزيزه ملك
كلامك ده وسام افتخر بيه بس فى الاول والاخر احنا هواه لشئ بنحبه
يعنى هوايه بنحب نمارسها مع بعض ونفيد بعض
وطبعا كنت اتمنى طول عمرى شغلانة الشيف دى
لكن ربنا اراد تغيير مسار
ههههههههههههه
الحمد لله اننا بنقدر نمارس هواياتنا وبالتالى يحصل التوازن بين الواقع والامنيات
الف شكر
كل سنه والجميع بخير
:eat:

sea horse
26-11-2009, 10:56 PM
العزيزه يمامه
عندك حق تماما فى موضوع ان اللحم الملبس اطعم جدا خصوصا للفته
ومش عندك حق فى موضوع ان كل الرجاله تحب تخالف وبس
عايزين نعمل جمعية لحفظ حقوق الرجل..... زيكم
ههههههههههههههههههه
كل سنه وانتم طيبين
:eat:

أيوب الصابر
27-11-2009, 05:15 AM
العزيزه سماء
العزيز ايوب
الفته بالتقلية

وفيه طريقه تانيه باحبها برضه واسهل
انى بافصص اللحم واقطعه صغير وافرشه فوق العيش المتشرب
واغطى بالرز وادلق التقليه عالوش بفن ونظام
وبكده اى حد يضرب معلقه هاتطلع بالعيش واللحم والرز
يعنى التغيير مالوش حدود
وكل سنه وانتم طيبين
:eat:
الطريقه دي انا شايفها أفضل علشان العيال كل مره بياكلو اللحم اللي عالوش
ويشبعوا ويسيبوا الفته
بكده هاياكلوا الفته كلها وهما بدوروا عاللحمه هههههههههههههه
يسلمو ايديك يسي هورس والله يدلك عالخير
وكل سنه وانت طيب

sea horse
27-11-2009, 05:30 AM
العزيز الغالى ايوب
سعيد جدا انى شايفك فاتح وموجود فى االمنتدى بدرى يوم العيد
كل سنه وانت وكل اهل فلسطين الكرام بكل خير ومحققين امانيكم باذن الله
عيد سعيد ليك وللاسره ولكل الاحباب
:eat:

سمـاء
30-11-2009, 07:34 PM
sea horse يمامة

تسلم وصفاتكو.....

سفرة العيد كانت رائعة...

صينبة الريش... اكتساح.... :y1:

والكفتة بفرمة ونص مع المسح بمية البصل اختراع.... :4:

والفتة... بطريقتى أنا..... طبعا هى اساسا نفس طريقة sea horse بس أنا بعمل الرز الابيض نص مية ونص شوربة اللحمة... وكمان قبل ما احط اللحمة المسلوقة على وش الفتة بحمرها على خفيف مع معلقة سمن وشوية توم.... ;)

يعنى حبيت اقولكوا على الكلام الحلو اللى سمعته على وصفاتكوا...

متجمعين دايما فى الاعياد والايام لحلوة ان شاء الله...

sea horse
01-12-2009, 07:09 AM
العزيزه سماء
كل سنه وانتى طيبه
وكل اضافاتك صح 100% واهم شئ انها عجبت الزباين واهل الدار
تسلم ايدك
وماتبعديش بقى كتير عن المطبخ وتجمع الاصدقاء
صباح الفل
:eat:

اليمامة
01-12-2009, 05:05 PM
اهلا يا سما
الحمد لله الوصفات بيضت وشنا...ههههههه....بألف هنا وشفا...ويارب بعودة انشلله الله.