المساعد الشخصي الرقمي

مشاهدة النسخة كاملة : فوازير رمضانية بالنكهة المطبخية



الصفحات : [1] 2 3 4 5 6 7 8

أم أحمد
17-08-2009, 11:49 AM
بسم الله الرحمن الرحيم

أيام قليلة ويهل علينا شهر رمضان الكريم
أعاده الله علينا وعليكم وعلي الأمة الإسلامية بالخير والبركات

وطبعا ما ينفعش يمر شهر رمضان من غير الفوازير الجميلة
وعشان كده ميعادنا السنة دي مع فوازير جديدة
ذات طابع جميل ومحبب لنا جميعا


http://www.albatof.com/images/ramadan_fanos1.jpg



فوازيرنا هذا العام هتحمل الطابع الشعري
يعني هتكون فوازير شعرية بنكهة مطبخية

هيكون كل يوم عندنا فزورة تقدم في صورة شعرية
هتكون عن أحد أنواع الخضار أو الفاكهة وفي بعض الأحيان عن بعض الأكلات الشهية

http://www.pic.s88s.com/gallery/fwakeh_wkhodar/p0315878.JPG


هيقوم بإعداد وكتابة الفوازير شعرائنا الكرام
وإن شاء الله هأقوم كل يوم بعرض حلقة جديدة
في نفس الموضوع هنا
واللي يعرف الحل يقوم بوضع الإجابة فورا في الموضوع
وفي أخر الشهر سوف نقوم بتجميع النقاط

هيكون عندنا 3 مراكز
يلا يا شاطرين
ركزوا معانا في المسابقة
وكلنا إن شاء الله هنكون فايزين:hey:



ومن خلال هذا الموضوع
اشكر شعرائنا الكرام علي تعاونهم الجميل معنا:f:
في إعداد وتقديم هذه المسابقة المتميزة


خالص شكري للفاضل أستاذ Ayman Roshdy :f:

وخالص شكري للرائعة سماء:f:
وخالص شكري للفاضل أستاذ وجدي محمود:f:



انتظروا معنا أول حلقة
في أول أيام شهر رمضان الكريم

تحياتي لكم جميعا
وخالص تقديري للجميع :f2:

اليمامة
17-08-2009, 01:51 PM
العزيزة ام احمد
هى دى الفوازير واللا بلاش...على الاقل ليها ريحة وطعم ونكهة ولون...حاجة تفتح النفس...ياللا انا معاكى...وجهزى الجوايز ام عيار تقيل اوىىىىىىىىىىى

طـــــير في الســـما
17-08-2009, 02:00 PM
سلام الله عليك أم أحمد

معاك و ان شاء الله...نعرف نحل

و لو إني قلقانة من أستاذ وجدي

فوازيره من سهلة أبدا

بس يلا..أمرنا لله

رمضان كريم عليكوا

خالص تحيـ ـ ـ ـ ـ ـاتي

أم أحمد
17-08-2009, 06:43 PM
العزيزة ام احمد
هى دى الفوازير واللا بلاش...على الاقل ليها ريحة وطعم ونكهة ولون...حاجة تفتح النفس...ياللا انا معاكى...وجهزى الجوايز ام عيار تقيل اوىىىىىىىىىىى
اهلا بيكي يا حبيبتي:f2:
منورة الموضوع والمسابقة
طبعا الجوايز هتكون هدايا عينية من مطبخك الكريم
دي مش تدبيسة ولا حاجة:p
دي عزومة من اهل الكرم:d

اليمامة
17-08-2009, 06:47 PM
العزيزة ام احمد
مش تقولى كدة من الاول
خلاص موافقة...بس قوليلى على منيو الجوايز..علشان احضر نفسى
ياعينى عليهم اهل الكرم..ولا يهمك
كل سنة وانتى طيبة انتى والاسرة الكريمة

سيمفونية كاتبه
17-08-2009, 07:33 PM
:hey::hey::hey:

فكره جميله جداً

إن شاء الله متابعه

لو إتقال كلام موزون عن الكوسه وعصير الليمون

يبقى إحنى أكيد هنقول يافصوليه .. ياطبق فول

منتظرررررررررره :4:

a_leader
17-08-2009, 09:35 PM
كل سنة و انتو طيبين و دايما بخير يارب


مسابقة جميلة و لذيذة و الفكرة تمام

و فراخ محشية و مشوية و معاها حمام

و الشوربة تجنن و المحشى ولا فى الأحلام

و عصاير تهوس تشربها و تقول يا سلام


أعاد الله عليكم ايامه هذه باليمن و البركات

:f2:

a_leader
17-08-2009, 10:15 PM
ياللا يا عالم شوَّقتونا=قبل الأكل فين التحابيش

سلطة و طُرشى جوَّعتونا=ياللا بسرعة و هاتو العيش

بيبسى و كولا و هاتو خرُّوب=و عصير منجة و نص ياميش

و املوا السفرة لحوم و خضار=مش عايزين اطباق فى النيش

ياللا يا عالم مش قادرين=ولّا أجيب محضر و شاويش

a_leader
17-08-2009, 10:37 PM
بصوا خلاص انا جيبت صنية=و حطيت فيها حبّة مايّة

أمّا انا ح اعمل حتّة عملة=مكرونة انما ايه مغذِّية

قلت اجيبها كده ف صنية=و ادِّيها لخواتى هديّة

قبل الصوم لاجل ما يتعذّو=ياللا أوام هاتو الطبلية

أم أحمد
18-08-2009, 10:22 AM
سلام الله عليك أم أحمد

معاك و ان شاء الله...نعرف نحل

و لو إني قلقانة من أستاذ وجدي

فوازيره من سهلة أبدا

بس يلا..أمرنا لله

رمضان كريم عليكوا

خالص تحيـ ـ ـ ـ ـ ـاتي
وعليكم السلام ورحمة الله وبركاته
اهلا بيكي يا ايمان
ما تقلقيش يا حبيبتي
الفوازير ان شاء الله هتكون سهلة
بس ركزي شوية معانا انتي
وخليكي متابعة علي طول
رمضان كريم يا قمر:f:

سمـاء
18-08-2009, 03:43 PM
أم أحمد قالت فوازير

ووافقنا من غير تأخير

بس عشان رمضان وبكرمه

هتحلوها من غير تفكير


الأصدقاء الأعزاء

كل رمضان وانتم واحنا صايمين وقايمين وذاكرين...

وكل مسابقة وكلنا هنا متجمعين..

المهم تحلوا الفزورة بسرعة علشان ما تضيعوش وقت رمضان............

ربنا يجمعنا دايما على الخير ان شاء الله..

أم أحمد
18-08-2009, 06:16 PM
العزيزة ام احمد
مش تقولى كدة من الاول
خلاص موافقة...بس قوليلى على منيو الجوايز..علشان احضر نفسى
ياعينى عليهم اهل الكرم..ولا يهمك
كل سنة وانتى طيبة انتى والاسرة الكريمة

انا عارفة يا قمر انك اهل كرم:y:
وعزومتك بجد مش مجرد كلام
كل اهل الاسماعيلية كده
ما احنا برضه من هنااااك
كل سنة وانتي طيبة يا حبيبتي
وربنا يبارك في اولادك يا رب
ويعيده عليكم بالخير والبركات:f:

وجدى محمود
18-08-2009, 07:46 PM
عم الليدر جاب تحابيش

كله حوادق غيرها مافيش

فين البط والمرجان

طيب أنا طمعان فى ياميش

منك أو مالأخت إيمان
كل سنه وإنتم بكل صحه وسعاده وخير يارب

ويجعلنا كده نتجمع على مائده الأخت الطباخه

أم أحمد

أحسن الأستاذ أيمن قرر يودينى مائده رحمن

ربنا يوفقم يارب

أم أحمد
18-08-2009, 08:46 PM
:hey::hey::hey:



فكره جميله جداً


إن شاء الله متابعه


لو إتقال كلام موزون عن الكوسه وعصير الليمون


يبقى إحنى أكيد هنقول يافصوليه .. ياطبق فول



منتظرررررررررره :4:


اهلا بيكي يا هايدي
سعيدة بمتابعتك للموضوع
هيكون فيه كوسة وليمون وفي كل الخضار والفاكهة
بس خليكم معانا علي طووول
:f:

sea horse
18-08-2009, 09:05 PM
تسلم ايدك وافكارك يا أم أحمد
وواضح ان الشعراء مش ماسكين نفسهم من قبل رمضان
يعنى واضح انها هاتبقى مسابقه نار يا حبيبى نار
والمسابقه هاتبقى بين الشعراء اكتر
هايل
وانا عليه اتوبيس الرحله للاسماعيلية
:roll2::roll2::roll2:
مساء الفل
:eat:

اليمامة
18-08-2009, 09:47 PM
اة..دانتوا متفقين عليا بقة
ولا بيهمنى....انا عند كلمتى
......
اسماعيلية اسماعيلية
بس ياريت قبلها بشوية
فية تحابيش واكلة هنية
من الفول للطعمية
بس خلاص ومفيش ملوخية
ولا بهاريز ولا تقلية
فاكرين اية فى اسماعيلية
عينوا عليكوا يا مصراوية
وراحت خلاص عليكوا
الماهييييييييييييييييييية
...........برضة انا جاهزة
فول وطعمية ...فى قمة الشياكة

totatoty
19-08-2009, 12:49 AM
السلام عليكم ورحمه الله وبركاته
الغاليه ام احمد دايما افكارك جميله وجديده
كل سنه وانتى طيبه وشعرائنا الجمال بخير

أم أحمد
19-08-2009, 09:03 AM
كل سنة و انتو طيبين و دايما بخير يارب




مسابقة جميلة و لذيذة و الفكرة تمام


و فراخ محشية و مشوية و معاها حمام


و الشوربة تجنن و المحشى ولا فى الأحلام


و عصاير تهوس تشربها و تقول يا سلام



أعاد الله عليكم ايامه هذه باليمن و البركات



:f2:


كل سنة وحضرتك واسرتك بكل الخير
واهلا بك دائما اخي الفاضل
ربنا يتقبل صيامنا وقيامنا جميعا
ويعيده علينا بالخير والبركات
:f::f:

أحمد ناصر
19-08-2009, 11:37 AM
البصلة ها تتقطع
وإنت ولا على بالك
والبامية ها تتقمع
طب شوف إيه ها يجرالك
إذا كنت ه تحتار
بين جرجير وخيار
فكرك يصيح سلطة
يتقلب على النار
قلبى أنا حاسس بيك
حريف فى التسبيك
يا بو طاقية طويلة
تسلم والله إيديك

أختى الغالية أم أحمد
أكيد الفوازير ها تكون جميلة جدا
شكرا لك على الموضوع الجميل

أم أحمد
19-08-2009, 01:11 PM
ياللا يا عالم شوَّقتونا=قبل الأكل فين التحابيش

سلطة و طُرشى جوَّعتونا=ياللا بسرعة و هاتو العيش

بيبسى و كولا و هاتو خرُّوب=و عصير منجة و نص ياميش

و املوا السفرة لحوم و خضار=مش عايزين اطباق فى النيش

ياللا يا عالم مش قادرين=ولّا أجيب محضر و شاويش



:good::good:
بسم الله ما شاء الله
ده الابداع اشتغل اهو قبل رمضان
يا ريت يا فندم تكتر التحابيش
ومن غير ما تجيب شاويش
انا جبت السلطة اهو
http://photos.azyya.com/store/up2/081225152108Uph5.gif
هات انت بقي الياميش:good:

العسل المر
19-08-2009, 01:27 PM
اختي ام احمد ... كل سنة وانتي طيبة - رمضان كريم


بس كان نفسنا نعمل مسابقة السنة اللي فاتت لموسمها التاني - والفرق والتصوير اللي على ودنه !!

عموما - كل حاجه منك ... زي العسل - بس مش العسل بتاعي !


تسلم ايدك - في الإنتظار

أم أحمد
19-08-2009, 03:18 PM
بصوا خلاص انا جيبت صنية=و حطيت فيها حبّة مايّة

أمّا انا ح اعمل حتّة عملة=مكرونة انما ايه مغذِّية

قلت اجيبها كده ف صنية=و ادِّيها لخواتى هديّة

قبل الصوم لاجل ما يتعذّو=ياللا أوام هاتو الطبلية



انا من الصبح بدور علي طبيلة ومش لاقية:beta2:
يا ريت تجيبها بالمرة مع صينية المكروووونة

:f2:

أم أحمد
19-08-2009, 05:37 PM
أم أحمد قالت فوازير



ووافقنا من غير تأخير


بس عشان رمضان وبكرمه


هتحلوها من غير تفكير


الأصدقاء الأعزاء

كل رمضان وانتم واحنا صايمين وقايمين وذاكرين...

وكل مسابقة وكلنا هنا متجمعين..

المهم تحلوا الفزورة بسرعة علشان ما تضيعوش وقت رمضان............

ربنا يجمعنا دايما على الخير ان شاء الله..


الغالية دائما سماء
كل سنة وانتي واسرتك طيبين يا حبيبتي
وربنا يعيده عليكم وعلينا بالخير والبركات
وطبعا مش لاقية اي كلام يقدر يوفيكي حقك علي مجهودك الجميل في اعداد الفوازير
ربنا ما يحرمني منك ولا من قلبك الجميل
دمتِ دائما برقي ونقاء
:f2:

أم أحمد
19-08-2009, 05:48 PM
عم الليدر جاب تحابيش



كله حوادق غيرها مافيش


فين البط والمرجان


طيب أنا طمعان فى ياميش


منك أو مالأخت إيمان
كل سنه وإنتم بكل صحه وسعاده وخير يارب


ويجعلنا كده نتجمع على مائده الأخت الطباخه


أم أحمد


أحسن الأستاذ أيمن قرر يودينى مائده رحمن



ربنا يوفقم يارب



ايووووة
ادوها سيجال شعري ادوها
خلينا نستمتع اكتر واكتر
اصل احنا مش هنخلص من الشعراء وابداعاتهم الجميلة:biggrin:

الاستاذ القدير وجدي
كل كلمات الشكر غير كافية علي موافقتك علي الاشتراك في الاعداد للمسابقة
وبجد ما شاء الله عليك موهبة رهيبة وجميلة وعندك تلقائية عالية وسرعة بديهة
كل سنة وحضرتك بكل الخير
:f2:

وجدى محمود
19-08-2009, 07:44 PM
ايووووة
ادوها سيجال شعري ادوها
خلينا نستمتع اكتر واكتر
اصل احنا مش هنخلص من الشعراء وابداعاتهم الجميلة:biggrin:

الاستاذ القدير وجدي
كل كلمات الشكر غير كافية علي موافقتك علي الاشتراك في الاعداد للمسابقة
وبجد ما شاء الله عليك موهبة رهيبة وجميلة وعندك تلقائية عالية وسرعة بديهة
كل سنة وحضرتك بكل الخير
:f2:


مين اللى رهيب؟

ليدر طبعا:y1:

دا بجد حبيب

مخلص جدا

ولا إنتى كمان

ردك يسعد

تستاهلى الخير

يــــ أم محمد

ماجيلك سؤ أبدا أبدا

والفرح يكونلك ولا يبعد


أختى الفاضله

أم محمد
نادرا ما يجد المرءصحبه تحث على الخير وتدعوا للحب

صحبة أمل وخير

إناس يدعمون

لا يخربون

إناس يسعدهم نجاح الغير

ويشجعون ويأزرون كل مبتدئ

عائله جميله

رائعه
هى عائلة

منتدى أبناء مصر

كل الشكر لكى أختى الفاضله على إتاحته الفرصه لى

للوجود بينكم والمشاركه ولو بالقليل

الأخ الجميل الرائع

الحبيب

ليدر
فى كل مناسبه دائما أجدك سباق بالخير

ترحاب بضيف جديد

أو سؤال عن أخ أو أخت غائبه

أو مشاركة أحدنا أفراحه

لك كل الشكر على ماتقدمه بخالص نيه وبكل حب لأخوتك هنا

جزاك الله كل خير
دومتم جميعا على الحب الفرحه دام تألفكم وتألقكم

أم أحمد
19-08-2009, 08:28 PM
تسلم ايدك وافكارك يا أم أحمد

وواضح ان الشعراء مش ماسكين نفسهم من قبل رمضان
يعنى واضح انها هاتبقى مسابقه نار يا حبيبى نار
والمسابقه هاتبقى بين الشعراء اكتر
هايل
وانا عليه اتوبيس الرحله للاسماعيلية
:roll2::roll2::roll2:
مساء الفل

:eat:



يا عيني عليكي يا همزة
شكلك اتدبستي يعني اتدبستي
حتي سي هورس اهو عرف لوحده:poster_sss:


سي هورس الفاضل
كل سنة وانت طيب
وتابع معانا المعركة الحامية بين الشعراء
لك خالص التقدير:f2:

kethara
19-08-2009, 10:02 PM
أختى الرقيقة الغالية
أم أحمد

كل سنة وأنتِ يألف خير غاليتى

ومبارك عليكِ والأسرة النبيلة الشهر الفضيل

أعادة عليكم بالخير واليمن والبركات

فكرة رائعة كعادتك وتألق طاغى

معكِ باذن الله متابعه ومن المقدمة والشعراء الرائعين

النجاح لكم والتوفيق

اللهم بلغنا رمضان

مع تحيتــــــــــى

أم أحمد
19-08-2009, 11:35 PM
اة..دانتوا متفقين عليا بقة
ولا بيهمنى....انا عند كلمتى
......
اسماعيلية اسماعيلية
بس ياريت قبلها بشوية
فية تحابيش واكلة هنية
من الفول للطعمية
بس خلاص ومفيش ملوخية
ولا بهاريز ولا تقلية
فاكرين اية فى اسماعيلية
عينوا عليكوا يا مصراوية
وراحت خلاص عليكوا
الماهييييييييييييييييييية
...........برضة انا جاهزة
فول وطعمية ...فى قمة الشياكة

ايوة ايوة ايوووووووة
ايه المواهب المستخبية دي يا قمر
الموضوع خلي همزة تقول شعر يا جدعااان:hey:
بس هتقولي شعر هتقول زجل
خلاص سي هورس حضر الاتوبيس
ودولي كمان;)

سعيدة اوي بروحك الطيبة وبوجودك الجميل زي جمال قلبك
تقبلي خالص مودتي:f:

أم أحمد
20-08-2009, 12:39 AM
السلام عليكم ورحمه الله وبركاته

الغاليه ام احمد دايما افكارك جميله وجديده
كل سنه وانتى طيبه وشعرائنا الجمال بخير



وعليكم السلام ورحمة الله وبركاته
توتا الغالية
انتي كنتي فيييييييين كل ده
وحشتينا جدااا
ما تغبيش علينا تاني يا قمر
كل سنة وانتي طيبة يا حبيبتي
:f2:

sea horse
20-08-2009, 02:25 PM
فاكره هاتطفش الزباين بفطار الفول والطعميه
كان غيرك أشطر .. هوه فيه أحلى منهم عالطبلية
***********
رغيفين وطرشى بلدى وشوية قوطه بالدقه اللى هيه
مع صحن طحينه مشطشطه وفلفل مقلى تبقى اكله هنيه
**********
يعنى نطلع صحراوى ولا زراعى المهم الفطار فى بيت الهمزاوية
ناكل فول ..ناكل طعمية ......المهم ضامنين مانجة الاسماعيلية
**********
وكده التجمع لاهل المطبخ وكله بالجلابية

وبلاش تطفيش دى عالم بتتلكك
مساء الفل

أم أحمد
20-08-2009, 04:52 PM
البصلة ها تتقطع
وإنت ولا على بالك
والبامية ها تتقمع
طب شوف إيه ها يجرالك
إذا كنت ه تحتار
بين جرجير وخيار
فكرك يصيح سلطة
يتقلب على النار
قلبى أنا حاسس بيك
حريف فى التسبيك
يا بو طاقية طويلة
تسلم والله إيديك

أختى الغالية أم أحمد
أكيد الفوازير ها تكون جميلة جدا
شكرا لك على الموضوع الجميل

اخي العزيز احمد
سعيدة بمتابعتك الرائعة
وسعيدة اكتر بالزجل الجميل ده
والله زمان يا شيفنا:no1:
عاوزينك متابع معانا علي طول:good:
كل سنة وانت واسرتك بكل الخير
ورمضااااااان كرررررريم
:f::f:

أم أحمد
20-08-2009, 04:56 PM
اختي ام احمد ... كل سنة وانتي طيبة - رمضان كريم


بس كان نفسنا نعمل مسابقة السنة اللي فاتت لموسمها التاني - والفرق والتصوير اللي على ودنه !!

عموما - كل حاجه منك ... زي العسل - بس مش العسل بتاعي !


تسلم ايدك - في الإنتظار

يا سلام يا سلام:eek:
شوف مين اللي عاوز مسابقة
وهو مين اللي كان اعتذر السنة
اللي فاتت انه يكمل المسابقة:uff:

علي العموم كل سنة وانت طيب
ولو عاوز تصور لنا اي وجبة من عندك
هنكون سعداء جدااا:play_ball:
شكرا يا العسل المر علي المرور الطيب
ورمضان كريم عليك وعلي اسرتك
:f::f:

أم أحمد
20-08-2009, 04:59 PM
مين اللى رهيب؟


ليدر طبعا:y1:


دا بجد حبيب


مخلص جدا


ولا إنتى كمان


ردك يسعد


تستاهلى الخير


يــــ أم محمد


ماجيلك سؤ أبدا أبدا


والفرح يكونلك ولا يبعد



أختى الفاضله


أم محمد
نادرا ما يجد المرءصحبه تحث على الخير وتدعوا للحب


صحبة أمل وخير


إناس يدعمون


لا يخربون


إناس يسعدهم نجاح الغير


ويشجعون ويأزرون كل مبتدئ


عائله جميله


رائعه
هى عائلة


منتدى أبناء مصر


كل الشكر لكى أختى الفاضله على إتاحته الفرصه لى


للوجود بينكم والمشاركه ولو بالقليل


الأخ الجميل الرائع


الحبيب


ليدر
فى كل مناسبه دائما أجدك سباق بالخير


ترحاب بضيف جديد


أو سؤال عن أخ أو أخت غائبه


أو مشاركة أحدنا أفراحه


لك كل الشكر على ماتقدمه بخالص نيه وبكل حب لأخوتك هنا


جزاك الله كل خير

دومتم جميعا على الحب الفرحه دام تألفكم وتألقكم


ربنا يكرمك يا رب يا استاذ وجدي
حضرتك واستاذ ايمن والحبيبة سماء كلكم غاية في الابداع والروعة
وكل كلمات الشكر غير كافية لكم كي تعبر عن عظيم شكري وامتناني لمجهودكم الجميل

واستاذ ليدر كمان انسان جميل ومتعاون مع الجميل بروحه الطيبة واخلاقه العالية


علي فكرة انا أم أحمد ومش أم محمد:hey:

أم أحمد
20-08-2009, 05:02 PM
أختى الرقيقة الغالية


أم أحمد


كل سنة وأنتِ يألف خير غاليتى


ومبارك عليكِ والأسرة النبيلة الشهر الفضيل


أعادة عليكم بالخير واليمن والبركات


فكرة رائعة كعادتك وتألق طاغى


معكِ باذن الله متابعه ومن المقدمة والشعراء الرائعين


النجاح لكم والتوفيق


اللهم بلغنا رمضان



مع تحيتــــــــــى


الغالية قيثارة الفن والجمال
الاروع هو وجودك يا حبيبتي في الموضوع
كل سنة وانتي واسرتك بخير يا حبيبتي
وربنا يعيده عليكم وعلينا وعلي الامة الاسلامية
بالخير واليمن والبركات
خليكي متابعة معانا بقي علي طول
لكي يكتمل الموضوع بوجودك الرقيق
محبتي
:f::f::f:

وجدى محمود
20-08-2009, 05:33 PM
مين اللى رهيب؟

ليدر طبعا:y1:

دا بجد حبيب

مخلص جدا

ولا إنتى كمان

ردك يسعد

تستاهلى الخير

يــــ أم أحمد

ماجيلك سؤ أبدا أبدا

والفرح يكونلك ولا يبعد


أختى الفاضله

أم أحمد
نادرا ما يجد المرءصحبه تحث على الخير وتدعوا للحب

صحبة أمل وخير

إناس يدعمون

لا يخربون

إناس يسعدهم نجاح الغير

ويشجعون ويأزرون كل مبتدئ

عائله جميله

رائعه
هى عائلة

منتدى أبناء مصر

كل الشكر لكى أختى الفاضله على إتاحته الفرصه لى

للوجود بينكم والمشاركه ولو بالقليل

الأخ الجميل الرائع

الحبيب

ليدر
فى كل مناسبه دائما أجدك سباق بالخير

ترحاب بضيف جديد

أو سؤال عن أخ أو أخت غائبه

أو مشاركة أحدنا أفراحه

لك كل الشكر على ماتقدمه بخالص نيه وبكل حب لأخوتك هنا

جزاك الله كل خير
دومتم جميعا على الحب الفرحه دام تألفكم وتألقكم

مين جاب سيرة محمد

أنا كتبت أم محمد ؟؟؟؟؟؟؟؟؟؟؟؟؟؟؟؟؟؟؟؟؟


ديما ظلمان كده يأم( محمد) أحمد:mazika2:

أنا عايز شهووووووووووووووووود:uff:


لأنه

فى الأرض أحمد
:shit:
وفى السما محمود

أ[قى خدى بالك كويسي يا أحمد وإنتى بتقرئى الظلم حراااااااااااااااااااااام:bicycle::bicycle:

hanoaa
20-08-2009, 09:22 PM
الله الله يا أم أحمد
كعادتك دايما أفكار مسابقاتك هايله
و الشعراء بدأوا نزالهم من دلوقت
يعنى قشطة بقى هانشوف و نسمع و نكسب
معاكوا إن شاء الله
كل سنة و أنتوا طيبين

boukybouky
20-08-2009, 10:20 PM
السلام عليكم و رحمة الله و بركاته

كل مطبخ و انت بخير يا أم أحمد ههههههههههههههههههه

هتجوعونا يا بنتي مش كده :d

متابعة معاكي و مع فوازير شعراءنا ربنا يعينهم

و كل سنة و انتم طيبين و بخير يا رب

في رعاية الله ،،،

حكيم عيووون
21-08-2009, 10:45 PM
أم أحمد

كل سنة وانتي طيبة

في انتظارمهلبية المكرونة
وسمك الشانكرونا ...

تحياتي ليكي
ولشعرائنا ...
ولكل اللى هياكلوا ...

ومعااكوا فى المطبخ
وأكروبات المطبخ



http://tbn2.google.com/images?q=tbn:yr8myEe6Q4TpSM:http://genan1.jeeran.com/imag/islamic/21.jpg



حكيم عيووون


http://www.nakaf.com/up/image/17659.jpeg (http://www.nakaf.com/up/view/17659)

nariman
22-08-2009, 03:27 PM
مسابقات تفتح النفس .. تسلم ايدك يا سمسمة
كل سنة وانتى طيبة
:f2:

العسل المر
22-08-2009, 05:26 PM
في انتظار المسابقة - مع اني عارف ومتأكد اني هدخل تانى هلاقيها اتحلت


:f2: :f2: :f2:


انا عطشان قوي يا جماعة :-s

أم أحمد
22-08-2009, 09:11 PM
الله الله يا أم أحمد
كعادتك دايما أفكار مسابقاتك هايله
و الشعراء بدأوا نزالهم من دلوقت
يعنى قشطة بقى هانشوف و نسمع و نكسب
معاكوا إن شاء الله
كل سنة و أنتوا طيبين


اهلا اهلا يا قمر
نورتي المسابقة يا حبيبتي
كل سنة وانتي واسرتك بكل الخير يا رب
تابعي معانا علي طول بقي:f:


السلام عليكم و رحمة الله و بركاته

كل مطبخ و انت بخير يا أم أحمد ههههههههههههههههههه

هتجوعونا يا بنتي مش كده :d

متابعة معاكي و مع فوازير شعراءنا ربنا يعينهم

و كل سنة و انتم طيبين و بخير يا رب

في رعاية الله ،،،

وعليكم السلام ورحمة الله وبركاته
اهلا يا شهر زاد نورتي المسابقة
خليكي معانا هتشوفي احلي واشهي الفواكه والخضروات
كل سنة وانتي يا حبيبتي بخير وسعيدة :h:


أم أحمد

كل سنة وانتي طيبة

في انتظارمهلبية المكرونة
وسمك الشانكرونا ...

تحياتي ليكي
ولشعرائنا ...
ولكل اللى هياكلوا ...

ومعااكوا فى المطبخ
وأكروبات المطبخ



http://tbn2.google.com/images?q=tbn:yr8myEe6Q4TpSM:http://genan1.jeeran.com/imag/islamic/21.jpg



حكيم عيووون


http://www.nakaf.com/up/image/17659.jpeg (http://www.nakaf.com/up/view/17659)

اهلا اهلا بحضرتك يا حكيم عيون
خليك معانا وانت تشوف كل الاكلات
كل سنة وانت واسرتك بكل الخير :f2::good:


مسابقات تفتح النفس .. تسلم ايدك يا سمسمة
كل سنة وانتى طيبة:kiss2:
:f2:

كل سنة وانتي طيبة يا نيرمين
سعيدة جدا بوجودك يا قمر:hey:


في انتظار المسابقة - مع اني عارف ومتأكد اني هدخل تانى هلاقيها اتحلت


:f2: :f2: :f2:


انا عطشان قوي يا جماعة :-s

حاضر حالا اهو هانزل المسابقة
والله لسه مخلصة فطار ومصلية المغرب
يا رب تكون هنا بقي انت كمان عشان ما تفوتكش المسابقة:good:

أم أحمد
22-08-2009, 09:38 PM
السلام عليكم ورحمة الله وبركاته

موعدنا الان مع الحلقة الاولي من الفوازير

الحلقة اعداد وكتابة الاستاذ القدير وجدي محمود:good:



يادى الهم

إيه ياوليه

انا مش طالب لحمه وباميه

هو أنت سايبلى فلوس يعنى

تتشرط بيها كده عليا

مالك

شكلك ليه قرفان

هى دى نعمه ولا أزيه

دى بلون ليل ومافيهش سلامه

إنت حتتنمرد عالنعمه

لاء حتجنن

والمجنون ماعليهش ملامه

عمله خضار حيزيد فى جنانى

وأنا عقلى بقى زى يمامه

طايره فى ليل إسود على لونه

طار ومسابش لعقلى علامه



لكم جميعا خالص التقدير:f:

nariman
22-08-2009, 09:40 PM
البتنجان الأسود يا سمسمة

المسقعة :biggrin:

:f2:

سيمفونية كاتبه
22-08-2009, 09:46 PM
هي البدايه كده مسقعه

أنا كمان اعتقد البتنجان الرومي

hanoaa
22-08-2009, 10:43 PM
حبيبتى المسقعه
و ياسلام لو باللحمة المفرومة

أم أحمد
22-08-2009, 10:57 PM
البتنجان الأسود يا سمسمة

المسقعة :biggrin:

:f2:


برافو يا ناريمان :no1:
هو الباذنجان:good:


هنوؤه
هايدي
منورين يا جماعة
خليكم متابعين معانا علي طول:h::h:


النتيجة
ناريمان1

hanoaa
23-08-2009, 12:29 AM
فرقت يعنى المسقعه من الباذنجان
ماعلينا
مبروك يا ناريمان

العسل المر
23-08-2009, 02:31 PM
فرقت يعنى المسقعه من الباذنجان
ماعلينا
مبروك يا ناريمان

البتنجان حاجه والمسقعة حاجه تانية يا هنوءة - ما تزعليش الأسياد :sorry:


بركاتك يا شيخة ناريمان :good: ( نحن غرابا عنك ) جملة من أيام الجاهلية - على اساس انك الوحيدة المتعلمة في المنتدى - ارحمي - هتاخدي عين تقعدي ع السرير اسبوع :poster_spam: انا خايف عليكي



تسلم ايدك يا أم أحمد :'(

nariman
23-08-2009, 02:46 PM
وعلى ايه أسبوع في السرير .. ده أنا حتى مش بحب الطبيخ الغامق :d
كل سنة وانتم طيبين
:f2:

العسل المر
23-08-2009, 06:24 PM
مستني يا أم احمد اهوه ... بس عارف اني مش هشوف مكسب في ولا مسابقة السنة دي - وهعمل احتجاج واضراب وكل حاجة بسمع عنها :d

اعترض بقوة وعنف ... ميت غمر ولله الأمر :-s