المساعد الشخصي الرقمي

مشاهدة النسخة كاملة : رمضان جانا ... ياللا جهزوا حاجته معانا



الصفحات : 1 2 3 [4]

sea horse
04-08-2009, 05:15 PM
كوكتيل الفراوله والمانجه
جربته النهارده مع ضيوف وطلع حلو قلت اقولكم عليه
عندى عصير فراوله مجمده فى قوالب التلج العادية فادانى مكعبات فراوله حمرا قانيه
عملت عصير مانجه عادى نص الكوبايه وكملت الحجم بمكعبات الفراوله
بقت ألوان الاحمر والاورانج متداخله دون مزج وبدرجات مختلفه مع الذوبان
وورقتين نعناع اخضر على طرف الكوبايه
بجد كانت حلوه
مساء الفل
:eat:

اليمامة
04-08-2009, 05:29 PM
العزيز سى هورس
فعلا فكرة حلوة وممكن تتنفذ ببدائل كتيرة...
يعنى ممكن مكعبات قهوة فى اللبن....وممكن مكعبات ليمون مع الشاى البارد...وكمان صودا مع الكركدية...تسلم ايدك

sea horse
04-08-2009, 05:49 PM
العزيزه همزه
تمام كده... الفكره فى بدائل الالوان مع تجانس الطعم طبعا
والفراوله علشان لونها تقبل الشغل مع المانجه والكانتالوب وعصير العنب وغيرها
تسلم الافكار الملونه
مساء الفل
:eat:

اليمامة
05-08-2009, 09:41 PM
صينية قرع العسل الحلوة
هنجيب واحدة قرع عسلى صغيرة او كبيرة مش مهم وناخد منها اللى هناخدوا وممكن الباقى نخزنة فى الفريزر بعد خطة المحلول السكرى اللى لسة هقولها...او نعملها كلها ونضبط المقادير بالنظر.....المهم هنقشرها وهناخد كيلو منها متقطع شرايح ونحطة فى نص وزنة سكر يعنى نص كيلو سكر ونص وكوباية الاربع مية وكلة يسخن مع بعضة ويغلى غلوتين بعد كدة نصفية...هنعمل صلصة بشاميل عادية بس هنحليها بالسكر علىذوق كل حد وبعد ماتبرد هنضيف البيض مع الفانيليا او قرفة او مية ورد ....حوالى 3 بيضات ولو صفارين كمان يبقى هايل...ونجهز صينية فرن وندهنها بالسمن ونرشها ببقسماط او دقيق ونرمى فيها نص البشاميل الحلو وفوقة نحط شرايح القرع العسلى وبعد كدة هنخلط مكسرات على بعضها زى الزبيبب وعن جمل ولوز وسودانى واى مكسرات متسقطة فى سيرب تقيل زى العسل وطالعة بتلزق مع شوية من السيرب او ممكن نستعيض عن العسل بمعلقتين كبار سكر عادى وخلاص مع شوية فانيليا وهنحط الحشو دة فوق طبقة القرع الاولى وبعد كدة هنحط الطبقة التانية من القرع وبعد كدة هنحط باقى صوص الباشميل وندخلها الفرن المتوسط لغاية لما البشاميل يستوى ويجمد ويحمر الوش ونقدمها باردة وشكرا

اليمامة
06-08-2009, 09:16 AM
صباح الفل
على فكرة صينية قرع العسل الحادقة ...بتبقى عادى بيتسلق القرع فى مية عادية مع وبنتبلة بالملح والتوابل وبنعصج اللحم ونجهز البشاميل وبنعملة زى المكرونة بالبشاميل العادية وكمان بنزود جبنة...وبيقبل اى اضافات وحشوات لانة هو اصلا ملوش طعم قوى....فعادى احنا بنشكل منة اللى احنا عايزينه.

sea horse
07-08-2009, 09:31 AM
العزيزه همزه
تسلم ايدك على صوانى القرع العسلى
والايام دى الموسم بتاعه ومالى السوق
واكبر مشكله فيه هيه تقشيره لصلابة قشرته
انا باشقها اتنين بالعرض
فالاقى عندى نصين كوره
كل واحده احطها على لوحة التقطيع بتبقى زى القبه
وبسكين كبير وباليدين اقشرها من فوق لتحت بالضغط
دى أسهل طريقه لتقشيره
وكل سنه وانتم طيبين
صباح الفل
:eat:

sea horse
07-08-2009, 09:37 AM
اليومين دول الياميش مالى السوق
بس نصيحه نستنى شويه لان أغلبه من اللى بايت فى التلاجات من الموسم السابق
يعنى نشترى المكسرات افضل بعد اسبوع كمان
وبافضل اجهز خلطة مكسرات تبقى جاهزه لمختلف الاستعمالات
باسيح معلقتين سمن على معلقتين زبده
وأضيف المكسرات حوالى ربع كيلو من كل صنف / لوز وبندق وعين جمل بشكل مجروش كبير
بحيث يفضل باين أشكالها ونميزها
لو اتجرشت ناعم بتتوه فى اى وصفه
يعنى ممكن جرش بالسكين او دقه على خفيف
وأشوح المكسرات بالسمن لغاية اللون الذهبى الغامق الجميل
ولما تبرد اعبيها فى أكياس ونبططها وعلى الفريزر
بالشكل ده نلاقيها جاهزه للكنافه والقطايف واى استعمال
كل سنه وانتم طيبين
صباح الفل
:eat:

أم أحمد
07-08-2009, 09:38 AM
انا نفسي اجرب القرع العسلي
بس مش عارفة طعمه هيكون ايه
علي العموم دي فرصة بجد عشان اجربه قريب
ممكن اعمل صينية صغيرة كده ونشوف الطعم ايه
شكرا يا قمر


سي هورس انا ما فهمتش طريقة التقشير
ممكن الشرح تاني
صباح الفل

الوان الربيع
07-08-2009, 09:51 AM
رمضان مبارك لجميع الامة الاسلاميّة

sea horse
07-08-2009, 10:42 AM
العزيزه ام احمد
طريقة التقشير اننا بنقطع القرعايه من النص
يعنى ننيمها على جنبها يبقى العنق بتاعها على اليمين مثلا
ونقطع من النص
هاتلاقى عندك نصين
نحط النص منهم على لوحة التقطيع بحيث الجزء المسطح مكان القطع يبقى لاسفل
يبقى قدامنا شكل زى القبه بتاعة الجامع
وبسكين كبير وباستخدام اليدين ..ايد ماسكه مقبض السكين والايد التانيه قرب نهاية السلاح
ونضغط باليدين تقشير من اعلى القبه لغاية لوحة التقطيع
يارب اكون عرفت اوصفها صح
صباح الفل
:eat:

اليمامة
09-08-2009, 07:46 AM
اصدقائى الشاطرين ...الصاحيين والنايميين ..المتابعين..والمكسلين....صباح رمضان اللى قرب....كل سنة وانت طيبين...وفى المطبخ العامر...دايما مقيمين ومنورين
العزيز سى هورس...افكارك هايلة وفكرة الياميش جديرة بالاحترام...وانا احب الافكار العملية المفيدة اللى بتوفر الوقت وتخلى الدنيا سهلة وطرية...تسلم الدماغ المطبخية العبقرية
وكمان على طريقة تقطيع القرعايية العسلية اللى محتاجة عضلات رجالية...بس انا بنادى لكل الجيران..نرفع القرعة العسلية من الارض بعزم الرجال..وهيلا بيلا على الرخاما وناخد نفسنا...ونمسك السكاكين ونعمل طابور طويل كبير ونبدا نقشر ونشد على طريقة لعبة شد الحبل الجماعية...هههههههه
يا صباح الفل....رمضااااااان كريم

اليمامة
09-08-2009, 08:22 AM
طريقة فطيرة محترمة للقرع العسلى للعزيزة ام احمد
هنعمل عجينة السابلية العادية...وهقولها تانى....نص كيلو زبدة من التلاجة هنضربها كويس ونحط عليها بالتريج ربع كيلو سكر لغاية لما يبقوا كريمى والزبدة تبيض...هنزل عليهم ب3 بيضات بيضة بيضة فى كل مرة واستنى على كل بيضة 3 دقايق تدوب وتختخفى ونطول بالنا شوية ياريت...هتعمل حجم وارتفاع يعنى فوليم وهتبقى كريمىىىىى هنضيف ذرة ملح يعنى مش ربع معلقة...حاجة بين الصوابع والفانيليا وبعدين هانزل بكيلو الاربع دقيق مرة واحدة وهلفها لفتين وخلاص مش كتير علشان متقلبش لعيش ونحطها فى كيس بلاستيك فى التلاجة لمدة ساعة تجمد وياريت الشغل يكون على رخامة باردة والمطبخ متهوى..فى الوقت دا هنعمل حشوعبارة عن 3 كوباييات صوص بشاميل حلو يعنى بالسكر وممكن معاة كريمة والفانيليا طبعا واى منكهات زى القرفة ونكون سلقنا القرعيياية العسلية مع مية وسكر واستوت وصفيناها كويس وخدناها هرس فى الكبة وعلى فكرة ممكن الصوص المسكر بتاع سلقة نعمل بية البشاميل...هنضيف 3 بيضات على البشاميل ونقلبهم كويس فية مع فانيليا تانى ونضيف القرع العسلى كوبيتين تلاتة...وملش مش عارفة اقول معايير محددة لانى باعملها بالنظر والتقدير...بعد كدة فى صينية تارت جدرانها منخفضة هنفرد عجينة السابلية اللى طالعة من التلاجة ونرفعها على جدران الصينية نغطيها وندهن وشها طبقة مربى او عسل نحل...ونصب الحشو بتاع القرع العسلى وممكن نرص على شكل نجمة قطع سليمة على هيئة جوانح فوق الحشو يدى شكل حلو وندخلها الفرن لغاية لما تستوى وتتماسك وتتطلع تبرد وتاخد وش سكر بودرة مع فانيليا يترش عليها وتتساب لما تبرد وتتقطع وتتقدم متزينة بشرائح القرع العسلى المسلوق والمسكر....وممكن تتعمل حادقة زى التشيز كيك والحشو ياخد الجبنة الحلوة الكريمى...ودا تصور...لسة مجربتهوش

sea horse
09-08-2009, 04:58 PM
العزيزه همزه
حلوه اوى طريقة تارت القرع العسلى ده
والتصور سليم وشغال ومتخيله
أهم مشكله للقرع هى اعداده الاولى
علشان كده ممكن اعملها يوم القرع العالمى
يعنى اجيب قرعايتين كبار واعيش معاهم تقطيع وتقشير وسلق
واعبى فى اكياس بالفريزر ... وعاده هيه مره فى السنه تتعمل كميه تكفى عدة وصفات
وكل سنه وانتم طيبين
مساء الفل
:eat:

اليمامة
09-08-2009, 05:41 PM
تعالوا نقول على تخزين المانجا ويدوب نخزن دلوقتى...يعنى انا مثلا يومين وهانتهى من موال المانجا وتخزينها
فية طريقتين...تتغسل كويس وتتنشف وتتحط على طوا كدة فى الفريزر وعند العصر تتطلعوها تسيبوها خمس عشر دقايق وتشيلوا القشر هيتشال معاكوا سهل جدا كانكوا بتقشروا يوسفياية وهتشيلوا اللحم وتخلوا البذرة وتضربوها وانا باحبها تقيلة ومحترمة...والطريقة دى هانفذها السنة دى
قبل كدة كنت باغسلها طبعا وكدة وبخليها كلها من واطلع اللحم واشيل البذر والقشر ...يعنى باقسم المانجاية من الوسط بيطلع عنى حاجة زى انصاص الكورة او كوبايتين بالمعلقة باخد اللحم زى التقوير وبخلى اللحم من البذر وبحط على كل كيلو كوباية الاربع سكر وباعبى فى الاكياس حسب الكمية اللى عايزاها وعلى الفريزر تكون جاهزة للضرب على طول..نوعية المانجا باجيبها الزبدة اللى لونها اخضر غامق لانها بتبقى مليانة لحم ومش مسكرة جدا ...مش للاكل يعنى..وكل سنة وانتم طيبين

sea horse
09-08-2009, 09:17 PM
العزيزه همزه
الطريقتين صح لتخزين المانجه
لكن طريقتك القديمه افضل لسببين مهمين
أولهم تقليل حيز التخزين لان القشر زالبذر يمكن حوالى 30%
ثانيهم سرعة الاستعمال بعد التخزين
ومش مهم اضافة السكر او الضرب قبل التخزين
وكله ماشى بس المهم المانجه تتجمد
تسلم ايدك
مساء الفل
:eat:

اليمامة
11-08-2009, 05:01 PM
مساء الفل على مطبخنا الرمضانى
وقتنا خلاص قرب...وكلها ايام قليلة وهتعدى بسرعة وينورنا رمضان ويغمرنا بنورة...عايزة اقولكم انى من الناس اللى بتاكل فى رمضان قليل جدا...يعنى على مستوى المطبخ باطبخ عادى وبشكل معقول...وعلى مستوى السفرة باكل طبيعى اقل من العادى...ومن المنطلق دا عايزة اقترح عليكوا اقتراح بسيط لو عجبكوا ولاقى قبول ننفذة...الفكرة هى موضوع جديد نعرض فية اكلاتنا فى رمضان...وانا عندى فكرة انكم كل سنة كنتوا بتعملوا موضوع مشابة...يلا نجددة مع اول يوم رمضان وكل واحد يقول هايعمل اية...كل واحد بيحب الطبخ وافتكاساتة وابتكاراتة يدخل يكتب هايفطر اية على مستوى الواقع...افكار بسيطة وشغالة...ونقول من اصناف الحلويات الاورينتال ما لذ وطاب وندخل السحور فى الوسط....يعنى موضوع عائلى ودى اسرى بيجمعنا فى رمضان بكل مظاهرة وعزوماتة وحتى اجتماعياتة وعاداتة. .. ونكتة وضحكة..وخيمة ..وحتى بعد الفطار والصلاة نقعد نشرب القهوة ونحكى على فطارنا واكلنا واللى حصلنا....موضوع مفتوح هدفة المطبخ وما حولة....مستنية ارائكوا واسئلتكوا واضافاتكوا واقتراحاتكوا...لو عجبكوا...اوعدكم احضرلة واخلية جذاب واجتماعى ولذيذ وممكن ندخل اى ائلة لذيذة فى الوسط على هيئة معلومة او مسابقة او زى ما تحبوا...بحيث يكون الموضوع مفيد لكل وقت...بس بالة خططوا معايا وقولوا اقتراحات...

اليمامة
11-08-2009, 05:12 PM
فى السحور بنحب الفطاير والسمبوسك ...وكمان من الفطاير ممكن نعمل اصناف حلوة
باقترح عليكوا لو راق ليكوا...نعمل حوالى 3 كيلو من عجينة الكرواسان..وطبعا كل واحد لية طريقتة..وانا كنت نزلت طريقة شاملة معتمدة عندى للعجينة فى موضوع اطلب الوصفة اللى على بالك...متتخضوش وتقولوا دى موال ولبخة...اسمعونى بس اخنا نعمل العجينة بمزاج وروقان من غير عجلة ولاتوتر...ومنقعدش نستناها ...ننساها ...ونمارس حيلتنا ونعمل امورنا التانية اثناء اشتغالنا فيها منعا للزهق...ونسيبها تاخد حقها تمام وبعد كدة نفرد ونقطعها مربعات حوالى 6*6 سم ونكيس على اد الكمية اللى احنا عايزنها ونشيلها فى الفريز...او نخرم المربعات دى بشوكة ونخبزها ونشيلها مخبوزة...بس الاحسن نشيلها عجينة لتنوع اصنافها...دى بقى ممكن نطلعها على طول تسيح ونعمل كرواسان ...دنش...اى فطاير محشية...او تارت..او فطيرة الكيش الفرنسية...غير جاتوة الميل فى السهل او ام على ام وش يجنن...او تورتة الميل فى ....وطريقة التقطيع متروكة ليكوا بمعنى لو هنعملوا جاتوة ميل فى يكون التقطيع مستطيل...الفطاير مربعة....ياترى فاهمينى...انا هعمل فى يوم 5 كيلو...هاتشجع وهابدا فى المشروع وهاستعين بالله...وكلة علشان خاطر الشعب....وكل سنة وانتم طيبين...

sea horse
12-08-2009, 09:54 PM
العزيزه همزه
فعلا موضوع فطار رمضان ده بنعمله كل سنه
وكان عنوانه هانفطر ايه النهارده
وبفكرتك دى يبقى تطوير لذيذ
يعنى الكل يشارك باللى ناوى يعمله او عمله عالفطار والسحور
وكل سنه وانتم طيبين
مساء الفل
:eat:

اليمامة
13-08-2009, 07:55 PM
اصدقائى...مساء الفل
الفلفل الاحمر مالى الدنيا الايام دى هو والشطة الحمرا بتاعة المخللات
انا باستغل الفرصة دى وباعمل شوية صلصة فلفل مركزة...وباعمل نوعين...شوية باردين بالفلف البارد وشوية حراقيين بالشطة..بجيب الفلفل او الشطة وباغسلة كويس وبافتحة وباشيل منة البذور وكدة...وطبعا بالبس جوانتى مع الشطة...وبحطة على صينية بعد ما بافتحة نصين وبارش ملح علية واسيبة طول الليل مثلا يدبل وينزل شوية من ميتة بعد كدة باخدة على النار مع المية اللى نازلة منة وبسوية او باسلقة يطرى..اسيبة يبرد وبعدين افرمة وممكن ازود مية صغيرة لسهولة الفرم وبعدين اصفية من التفل وبعدين احطة على النار تانى يتقل اوى واجهز البرطمانات النضيفة الجافة واعبيها واحدد البارد من المشطشط واضيف الزيت فوق الوش كتير واحفظ فى التلاجة واراعى لما اجى اخد اخد بمعلقة ناشفة واضيف زيت تانى بحيث الوش يكون مغمور فى الزيت
بالنسبة للاستخدامات...معلقة صغيرة منة مع الطماطم على الخضار بتديلة اللون الاحمر الحلو والطعم الهايل..وكمان مع المكرونة بالطماطم..المحشى..الاسماك....المخبوزات اللى بيتعملها حشوات..اطباق بيض وفول..والحامية كمان خرافية...للناس اللى غاوية شطة ممكن تضيف لها توابل وفصوص توم مع بصل وتبقى صوص جنب اى اكل ...يارب تعجبكوا

sea horse
13-08-2009, 08:17 PM
ايوه كده
أهم حاجه الشطه وخلطاتها
انا باعمل صوص اخضر بالفلفل القرون الشطه الاخضر
بافرمه مع ملح وتوم ومعلقتين خل أو عصير ليمون ومعلقتين زيت زيتون
ونفس التعبأه بالزيت
فعلا بينفع مع كل شئ ما عدا الكنافه
:4::hey::4:
مساء الفل
:eat:

اليمامة
14-08-2009, 07:53 PM
اصدقائى الاعزاء
الزبدة ؟؟
الزبدة دلوقتى النيوزلندى او الصفرا عموما مالية الدنيا ولسة السعر معقول الكيلوب 14 جنية ونص...ياللا الحقوا بسرعة هاتوا كمية كويسة علشان رمضان وحلوياتة...وكمان العيد وكعكة وبسكوتة وحلوياتة هو كمان...اعتقد انها هاتغلى كل ما قربنا من العيد...الافضل نجيب دلوقتى ونسيح شوية ونعبى فى الرطمانات للكعك والغريبة...ونحط شوية فى الفريزر من غيير تسيح للبسكوت والبيتيفور والسابلية والكيكات والحشوات الحلوة....

اليمامة
15-08-2009, 04:58 PM
اصدقائى الاعزاء
عايزة اقولكوا على افكار جديدة ومختلفة للقطايف...ممكن مكان الحشوات التقليدية...نعمل حشوة تفاح بالقرفة ناخد التفاح ونقشرة ونقطعة مكعبات صغيرة جدا وناخدة تشويح فى الزبدة او السمنة مع شوية قرفة وسكر ونحشى القطايف ونقليها عادى وتتحط فى الشربات التقيل البارد او نرش عليها سكر بودرة....
كمان ممكن نعمل القطايف بالذات الصغيرة عصافيرى...يعنى نعملها زى القرطاس ونقليها وبعد ما تطلع من القلاية وتكون مقرمشة نسيبها تبرد ونحشيها ايس كريم ونحطها فى الفريزر ونطلعها على الاكل على طول كريمة او ممكن تتشال من غير حشو وساعة التقديم نحشيها اى حشو عايزينة..كريمة باتسيير مثلا
كمان ممكن نبشر الشيكولاتة مع بندق مجروش ونحشى القطايف وتتقلى والشربات عادى
وطبعا عارفيين انها تقبل الحشوات المالحة زى الجبن لوحدة او بالاضافات والاعشاب والزيتون والفلفل
كلها افكار وتجديد ظريف رغم بساطتة بس مختلف وملفت ويحسس اهل البيت والضيوف ان سيدة المنزل فنانة ومبدعة وعاملة ولايم....كل سنة وانتم طيبين

اليمامة
16-08-2009, 09:38 AM
على فكرة ممكن نعمل كفتة رز ونرصها فى الاطباق البلاستيك وكمان كفتة سمك وجمبرى وحتى فراخ...ونعمل كبيبة شامى وبتمشى برضة باى انواع لحوم حتى السمك(لسة منزلة طريقتها فى موضوع اطلب الوصفة.......) المهم نرص على النى فى الاطباق البلاستيك ونشيل على الفريزر وتتطلع نسيبها عش دقايق وبعدين تتحمر وتدخل فى الصلصة او تحمروها وتشيلوها متحمرة بس باحب اشيلها على النى لان على فكرة كل الانواع دى قابلة للشوى...يعنى ممكن تتطلع تتشوى فى الفرن فى صوانى او تتشك فى العصيان الخشبية مع الخضروات.ومع الارز والمكرونات...وجبات لطيفة واهو كلنا بنعز الكفتة واالا اية رايكوا؟

fishawy
16-08-2009, 10:45 AM
الله يخليكي ياهمزة
عاوز طريقة كفتة الرز ام دمعة يعني اللي بصلصة الطماطم, حاولت عدة مرات وكل مرة تطلع بطعم محتلف. نفسي في الطريقة البلدي الفلاحي.
ربنا يسترك يابنتي وهادعي لك لما يشعشع طعم الكفتة في نافوخي.

اليمامة
16-08-2009, 11:15 AM
العزيز فيشاوى
صباح الفل عليك...يارب تكون والاسرة بالف خير
انا هاقولك على طريقتى المعتمدة اللى بتمشى معايا تمام ..علشان خاطر الستر...يارب يخليك...بس اهم حاجة تشعشع فى النافوخ...ومهما كان حجم الشعشعة وهايودى لفين...ارجوك يا فيشاوى...ماتدعيش عليا..ههههه...انا عندى عيال لسة صغيرين...يكبروا شوية وادعى براحتك وانا نفسى راضية....
بص يا سيدى انا باجيب نص كيلو اللحمة المفرومة وعلية راس توم متوسطة وحزمة مشكلة من البقدونس والكسبرة والشبت..وبصلة متوسطة متقطعة وكوباية رز مطحون او مستوى او منقوع بقالة مش اقل من ساعة فى مية...جميل؟ الفكرة يافيشاوى انها متكونش صايصة...يعنى الخضرة مش كتير البصلة مش كبيرة ...وكدة يعنى
هتبدا تفرم كل دا كويس يكون ناعم وممكن تفرمها وشين تكون ناعمة علشان دا بيخليها متفكش وتضيف بهاراتك من ملح وفلفل وكمون وياسلام لو انت عملتها وسيبتها فى التلاجة ساعتين وبعدين تصبع وتقلى وتخلى جنبك طبق فية مية يساعدك على التصبيع او شوية زيت ...هاتحمر الصوابع وتشيلها على الصلصة ام توم
يعنى هتهرس نص راس توم وتشوحها فى السمن يصفر وتنزل بعصير الطماطم الفريش وتسيبها لما تتسبك اوى وتنزل بالكفتة وتزود المية وتحط بهاراتك وطبعا بنفس الطريقة ممكن تعملها مع اى لحوم بس فى الجمبرى تخلية كيلو مع كوباية الارز واخر مرة عملتها بالسمك كانت فى الحقيقة تهبل...اقدر اقولك انها شعشعت يوميها شعشعة محصلتش...يعنى نمنا وصحينا تانى يوم من الاغماءة المباغتة نتيجة الشعشعة ....ههههه
وجنب الارز الابيض بجد هاتدعيلى" يارب استر"..
...بس ياريت تطمنى ارجوك لانى هاترقب مجيئك للمنتدى مرة اخرى...ههههه...ياللا جرب واتوكل على الله...فليس لك رب سواه.

fishawy
16-08-2009, 11:24 AM
صباح الفل زي بعضه مع إن الساعة عندي ستة ونص المغرب.

شوفي ياستي
أنا هاجهز إسطوانة أكسجين وشنطة الإسعافات الأولية, وهاخزن رقم الإسعاف في التليفون على الطلب السريع.
وهاجرب الكفتة والله المستعان.

نسيب الهزار على جنب

ربنا يخليكي ويبارك فيكي شكلها كدة بالظبط اللي أنا طالبها, هاخطف رجلي للسوبر ماركت واشتري اللحمة وابلغك بالنتيجة.

سؤال: أفتكر إنهم كانوا بيعملوها بلحم نصها ضاني ونصها بقري, هل صح كدة..


ربنا يحفظك لأسرتك وأولادك وزوجك

اليمامة
16-08-2009, 11:34 AM
عزيزى فيشاوى
اذا كانوا بيخلطوا اللحم فلان الضانى له طعم مميز حلو والدهن بتاعة بيخليها طعمها ونكهتها حلوة ...ولن يضير فى شىء لو انت خلطت هاتكون حلوة كمان...لكن انا باعملها بلحم عادى كندوز...وان شاء الله تطلع زى الفل المرة دى وتطمنى اكيد على النتيجة
واروع شىء انك فتى مطيع وجهزت شنطة الاسعافات وجهزت رقم التليفون...ههههه....كدة تمام
ومساء الفل ...ياللا زى بعضة....الساعة هنا دلوقتى 1:34
ولاتزعل نفسك.....مساء الفل

اليمامة
17-08-2009, 03:44 PM
مساء الفل
صينية الجلاش بعين الجمل والقرفة
هندهن صينية فرن بالزبدة ونفرد فيها حوالى5 رقات الجلاش مع دهان كل ورقة بالزبدة ونحاول ان الصينية تكون اصغر من مقاس الجلاش علشان نرفع حوافة عليها وبعدين هنحضر الحشو عبارة عن ربع كيلو عين جمل ونص كوباية سكر بودرة ومعلقة صغيرة قرفة ..هنحط على الخمس رقاقات حوالى تلت كمية الحشو...وبعد كدة هنحط ورقة رقاق واحدة وندهنها وتكون هى الورقة السادسة بعد كدة هنككلر نفس العملية مرتين يعنى 5 ورقات جلاش مدهونين والحشو وورقة سادسة وكمان 5 ورقات والحشو وورقة سادسة وبكدة الرقاق عمرة ما هايفصل والحواف اللى طلعناها على جدران الصينية هتتكتل وتستوى وتمنع خروج الحشو من الجوانب وفى النهاية هندهن وش الصينية بالزبدة...وبالسكينة تقطع الجلاش قطع مربعة صغيرة ونكون ولعنا الفرن على درجة حرارة فوق المتوسطة وندخل الصينية ونسيبها حوالى ربع ساعة وبعدين نوطى النار على ال170 درجة علشان يقرمش شوية ويحمر بلون موحد حلو هنكون مجهزين الشربات التقيل يعنى السكر ضعف المية مع عصير الليمون وعلى النار لغاية لما يعقد ويكون قوامة تقيل..المهم الشربات يكون دافى وننقطة على الجلاش المتحمر السخن....الشربات تكون مش كتير...مش هنحتاج نصفى الصينية..مجرد تنقيط بلمعلقة او بفرشاة فوق الجلاش وبعدين هانسيبة يبرد ونكمل نقطيع المربعات يعنى نفصلها خالص ونرصة فى طبق التقديم...ونجمله بعين الجمل المجروش بقشرة نص دقة كدة ..وعين الجمل المتقشر بشكل عشوائى ويارب يعجبكوا

اليمامة
19-08-2009, 10:34 PM
القرص المصرية للسحور..
كوباية ونص سمنة بلدى على نص كوباية زيت درة يتقدحوا على النار..وفى اناء للعجن هنحط 6 كوبايات دقيق وعليهم معلقة صغيرة ملح وواحد كبيرة شمر ونعمل حفرة فى وسط الدقيق ونحط فيها السمسم وفى نفس الاثناء نح 3 معالق من الخميرة البودر على ربع كوباية مية دافية ومعلقة صغيرة سكر ونسيبها تتفاعل لما تفور...هنصب السمن الساخن فوق السمسم وبعد ثوانى نبدا نقلب السمسم مع الدقيق بالمعلقة الخشب وبعد مايبرد نبدا عملية البس بين كفوف ايدينا لغاية لما يتحول الدقيق لشىء ناعم كانة مبلول زى الرمل كدة ودى عملية مهمة علشان الدقيق يتشرب السمن كويس ومينطروش فى الخبز..بعد كدة هانضيف الخميرة المتفاعلة وكوباية كوباية مية دافية قابلة للزيادة على حسب حالة الدقيق والعجينة ...وتعجنوا كويس اوى ..لت وتقطيع العجبنة من برا لجوا...وطبعا العجانة هاتسهل العملية اكتر من المانيوال دا...المهم توصلوا لعجينة ملساء وناعمة وبتسيب الايد والاناء... هتسيبوها تخمر بضمير ويتضاعف حجمها وبعد كدة تتشكل قرص مدورة او قراقيش بالورب او قرص محشية عجوة او اصابع محشية عجوة وممكن تترش بالسمسم او حبة البركة وممكن مكان الشمر يكون كمون ....بس كلة يكون مطحون...والعجوة طبعا بتتقلب فى حتة زبدة وشوية سمسم على قرفة...لما تطرى خالص...وتتساب تخمر تانى يمكن ساعة وتدخل الصوانى الفرن على 200 درجة لمدة نص ساعة او لغاية لما تحمر....
فيه نوع تانى من القرص اطرى من السابق واخف...هابقى انزلهلكوا

sea horse
20-08-2009, 05:43 AM
العزيز فيشاوى
بقالك يومين مش ظاهر بعد الكفته !!!
يارب تكون بخير
بس أمانه لما يسألوك فى التحقيق بعد الغيبوبه ماتجيبش سيرة المنتدى
وبرضه همزه مش هاتستحمل الاستدعاء لجنوب شرق آسيا
فممكن ييجوا يسالوها هنا
بس لازم تحتفظ بجزء من الكفته كحرز عشان التحليل النووى ولحفظ الحقوق
صباح الفل
:eat:

اليمامة
20-08-2009, 01:39 PM
العزيز سى هورس
كدة برضة؟..باتباع فورى...هههههه...فعلا لما ييجوا يسالونى هنا افضل ...ومش مهم ياخدونى بالسلاسل والاغلال لغاية هناك ...مفيش مشاكل...المهم المنتدى وناسة يكونوا بخير...ما تلحقنى يا فيشاوى...وتقول حاجة...علشان الكوابيس...بس كويس النداء العاجل دا لفيشاوى...علشان يظهر ويطمنا على الكفتة والشعشعة فى النافوخ...
..........هقولكوا دلوقتى على وصفة القرص الطرية الخفيفة ...وبجد طعمة ولذيذة
هنرب كوباية زبادى مع نص كوباية سمن بلدى جامد ونضيف نص كيلو دقيق ورشة ملح وعلى جنب هنكون حطينا معلقة كبيرة خميرة على نص معلقة سكر وشوية لبن دافى صغيرين ولما تتفاعل نضيفها على الدقيق ونعجن كويس اوى تكون العجينة ناعمة وملسا وبتسيب الايد وريحتها خطيرة هنسيبها تخمر وبعدين نقرصها وبحبها سادة...ونعملها قرص مستديرة ونسيبها تخمر تانى حوالى ساعتين فى نفس صوانى خبزها مع مراعة ترك مسافات بينها واسعة..وبعدين تتخبز فى فرن فوق المتوسط لغاية لما تحمر ....وبس خلاص

أجمل من الخيال
03-09-2009, 09:14 PM
اهلا بالاعزاء اميمه و أم الحلوين
اصدقاء منورين الموضوع
بالنسبه لحشو الحمام فأسهل وأضمن شئ
تجهيز الحشو سواء بالرز أو الفريك مع البصل والبهارات والفلفل والملح
وتسويته 80 % عادى كأنك بتطبخى الرز
بعد كده بنجيب الحمامه ونخلى بالصوابع بالراحه بين الجلد والجسم
ونحشى من الخلطه دى بكل حريه وجرأه لان الحشو لن يتمدد تانى ويفرقع الجلد
لانه تشرب تماما أثناء التسوية
هانحشى تحت الجلد والرقبه وجوه تجويف الحماماه
بعد كده نشبك رجليها واحده فوق التانيه ونغرسهم فى فتحه بالحجر عشان تقفل التجويف المحشى
بعد كده تترص الحمامات فى صينية فرن مدهونه سمن
وندهن وشهم بالسمن المخلوط معاه معلقة صلصة وتوابل
وتدخل الفرن نص ساعه ثم تحت الشوايه لغاية التلوين التمام أو الموت الزؤام
وبالف هنا
مساء الفل
:eat:

موضوع هايل وافدني كتير اوي بصراحة

لكن بالنسبة للحمام انا جربته وطلع خطير احسن من المسلوق بكتير لكن الصدر ما استواش

كويس ياتري اخي سي هوورس ازاي اتغلب على ده اما اعمل حمام تاني ؟

أجمل من الخيال
04-09-2009, 02:55 AM
انا عندي شوية كاجو كتار ومش عارفة اعمل بيهم ايه حاولت احطه فالرز بالمكسرات بوظ طعمه

ياريت حد يفيديني وربنا يجزيه خير

اليمامة
04-09-2009, 10:37 AM
العزيزة اجمل من الخيال
الكاجو زى اى مكسرات يتحط على كل الاكلات اللى بتقبلها...الرز بالخلطة زى الصنوبر كدة..وممكن يتحمص وممكن لا..واكلات كمان خليجية اعرفها بالاسم زى الجريش والهريس والفريكة...وكمان يتحط مع الحلويات الاورينتال زى البقلاوة وكدة..بس انا مش فاهمة ازاى بوظ طعم الرز...المفترض بس هايتحمص ويترش فوقة...عموما هو ممكن يتاكل كدة لوحدة مفيد ومفيهوش دهون كتيرة زى اللوز والباقى...بس خدى بالك بيبوظ بسرعة...وفية صلصة شهيرة اسمها صوص الكاجو الحار...بتتاخد مع البحريات والاكل الصينى..كتباها عندى بس مش مش فاكرة اقولهالك دلوقتى...هادورلك عليها...مش عارفة اذا كان ينفع ناخدة فى الشركسية مكان عين الجمل واللا لا...هارجعلك تانى

اليمامة
04-09-2009, 10:41 AM
بالنسبة للحمام خدية تشويح فى سمن الاول ياخد لون وتتقفل المسام..وممكن بالسكينة تغززية من صدرة للتسوية وتسيبية فى الفرن براحتة يستوى بس انا بافضل تحطى فى الصينية فى الفرن اثناء التسوية مية وكل ما تنشف تزودى لاحكام التسوية ودا بعد ما تلفى الحمام بالفويل..وفى النهاية تكشفية يتحمر..ولازم تختارى الحمام الصغير...وممكن تسلقية نص سلق وبعدين يكمل فى الفرن واعتقد دا الافضل..انا شخصيا باسلق الحمام لانى بخاف من عدم التسوية...السمان ممكن كدة على طول فى الفرن...وهايستوى

همس المشاعر !!
04-09-2009, 11:37 AM
بسم الله ماشاء الله
ولا حول ولا قوة الا بالله العلى العظيم
والله موضوع روووووووووووووعة

كتير استفدت منه بجد
كمية معلومات ونصايح رهيييييييييبة

الاحلى من دا كله هو روح التعاون وحب المساعدة بين الجميع
بجد بجد جزاكم الله خيرا

اخى الفاضل سى هورس
بشكرك جزيل الشكر لموضوعك وفكرته الراقية
جعله ربى بميزان حسناتك
واظلك يوم لا ظل الا ظله

ولكل من شارك وحب يفيد الباقيين
كل رمضان وانتم بخير وامان وسعادة ان شاء الله
متابعة مكم بإستمرار ان شاء الله

أجمل من الخيال
04-09-2009, 02:19 PM
العزيزة اجمل من الخيال
الكاجو زى اى مكسرات يتحط على كل الاكلات اللى بتقبلها...الرز بالخلطة زى الصنوبر كدة..وممكن يتحمص وممكن لا..واكلات كمان خليجية اعرفها بالاسم زى الجريش والهريس والفريكة...وكمان يتحط مع الحلويات الاورينتال زى البقلاوة وكدة..بس انا مش فاهمة ازاى بوظ طعم الرز...المفترض بس هايتحمص ويترش فوقة...عموما هو ممكن يتاكل كدة لوحدة مفيد ومفيهوش دهون كتيرة زى اللوز والباقى...بس خدى بالك بيبوظ بسرعة...وفية صلصة شهيرة اسمها صوص الكاجو الحار...بتتاخد مع البحريات والاكل الصينى..كتباها عندى بس مش مش فاكرة اقولهالك دلوقتى...هادورلك عليها...مش عارفة اذا كان ينفع ناخدة فى الشركسية مكان عين الجمل واللا لا...هارجعلك تانى

انا حمرته مع المعكسرات اللي بتبقي جوه الرز مش عالوش وكان طعمه ماسخ خالص اما استوي

ياريت تتأكدي بيتضاف للشركسية والا لا لاني حأجربها بكرة او بعده ان شاء الله


شكرا لاهتمامك اختي اليمامة

جزاكي الله خيرا

أجمل من الخيال
04-09-2009, 02:22 PM
بالنسبة للحمام خدية تشويح فى سمن الاول ياخد لون وتتقفل المسام..وممكن بالسكينة تغززية من صدرة للتسوية وتسيبية فى الفرن براحتة يستوى بس انا بافضل تحطى فى الصينية فى الفرن اثناء التسوية مية وكل ما تنشف تزودى لاحكام التسوية ودا بعد ما تلفى الحمام بالفويل..وفى النهاية تكشفية يتحمر..ولازم تختارى الحمام الصغير...وممكن تسلقية نص سلق وبعدين يكمل فى الفرن واعتقد دا الافضل..انا شخصيا باسلق الحمام لانى بخاف من عدم التسوية...السمان ممكن كدة على طول فى الفرن...وهايستوى

يعني لازم اسوي الحمام بشوية ميه الاول عشان كله يستوي

شكرا عالافادة اختي اليمامة

جزاكي الله خير ا

أجمل من الخيال
04-09-2009, 03:49 PM
ايه هو احسن سمن بلدي فالسوق انا نباتية واول مرة حأستعمل سمن بلدي السنة دي في عمايل الكحك

والبسكويت ارجو الافادة وجزاكم الله خيرا على كل الحاجات الحلوة اللي جبتهولنا تسلم ايدكم

اليمامة
30-06-2010, 07:00 PM
للرفع وللتحضير والإعادة
والإستزادة
وكل سنة وانت طيبين

اليمامة
30-06-2010, 07:01 PM
للرفع وللتحضير والإعادة
والإستزادة
وكل سنة وانتم طيبين:f2:

سمـاء
05-08-2010, 10:00 AM
كل سنة والجميع بخير..

كلها كام يوم ونقول رمضان جانا بجد...

وطبعا رمضان بيحتاج عصاير ومشروبات خصوصا فى الجو ده...

والموضوع هنا مليان وصفات وتنويعات جميلة جدا...

بس دورت على مشروب الدوم مالاقيتوش....

أنا جالى كيس دوم مجروش وعمرى ما عملته قبل كده... ياترى بيتعمل ازاى؟؟

انا متخيلة إنه من فصيلة "المناقيع" على رأى sea horse بس التفاصيل بأه....




اللهم بلغنا رمضان واجعلنا من عتقائه

اليمامة
09-08-2010, 09:31 AM
ازيك يا سما وكل سنة وانتى طيبة..
فعلاً عصير الدوم من العصاير اللطيفة اللذيذة..بس المهم يتعمل طازة ويكون فريش علطول لأنه سهل التلف..
أستأذنك أنزل وصفته فى الموضوع الرمضانى الجديد بتاع السنة دى اللى لسه عامله سى هورس
زورونا هناك ستجدوا ما يسركم..
تحياتى..