المساعد الشخصي الرقمي

مشاهدة النسخة كاملة : رمضان جانا ... ياللا جهزوا حاجته معانا



الصفحات : 1 2 [3] 4

اليمامة
21-07-2009, 04:30 PM
الاخت العزيزة اميمة بالنسبة للحمام كتبنا طريقتين لية واحدة لسى هورس وواحدة ليا وبالتفصيل يا ريت ترجعى لموضوع اطلب الوصفة وهتلاقية ومسالة ان ميفتحش فى الشوربة دى انت عارفة طبعا انك بتقفلية بخيط وابرة مطهرة سنها فى النار او تقفلية بخلل اسنان زى تدكيك كدة...ومبيفتحش وحتى لو نزل حبيتين رز عادى وطبيعى مفيش مشاكل اما لو عايزة الشوربة سليمة خالص ممكن تلفى الحماماية فى ورقة فويل وتسقطيها عادى بس مبحبش كدة علشان الالمونيوم وبعدين بيعمل عازل بين الحمام والشوربة....بحس كدة
بالنسبة للكنافة...طبعا فى طرق كتير وحشوات مختلفة وكنافة بورمة وعادية واشكال وقوالب ..وجمال الحلويات الشرقية فى انها اصلية معروفة مبتتغيرش وبنحبها على اصلها علشان كدة التجديد مش كتير اوى لكن التجديد فى طريقة التقديم والتقطيع والعرض
ان شاء الله ننزل ملف كامل لكل انواع الكنافة...لكن كان فية صنف للكنافة عادى تقطعية صغير اوى وتحمرية شوية بسمنة بلدى او زبدة وبعدين تكونى عاملة قهوة تقلبيها فيها وتعملى صوص الكراميل يعنى سكر محروق وتطفية بالكريمة اللبانىوتحطى فية كمان كام حباية بونبون اللى هوة بالزبدة يسيح فى الصوص وتحشى الكنافة اللى بالقهوة فى الوسط منة وتدخل الفرن عادى تحمر وتبقى قالب وتطلع يكون الشربات دافى وتسقيها وتصفيها والطريقة دى بتكون حلوة فى قوالب صغيرة...ويارب تعجبك

sea horse
21-07-2009, 04:32 PM
اهلا بالاعزاء اميمه و أم الحلوين
اصدقاء منورين الموضوع
بالنسبه لحشو الحمام فأسهل وأضمن شئ
تجهيز الحشو سواء بالرز أو الفريك مع البصل والبهارات والفلفل والملح
وتسويته 80 % عادى كأنك بتطبخى الرز
بعد كده بنجيب الحمامه ونخلى بالصوابع بالراحه بين الجلد والجسم
ونحشى من الخلطه دى بكل حريه وجرأه لان الحشو لن يتمدد تانى ويفرقع الجلد
لانه تشرب تماما أثناء التسوية
هانحشى تحت الجلد والرقبه وجوه تجويف الحماماه
بعد كده نشبك رجليها واحده فوق التانيه ونغرسهم فى فتحه بالحجر عشان تقفل التجويف المحشى
بعد كده تترص الحمامات فى صينية فرن مدهونه سمن
وندهن وشهم بالسمن المخلوط معاه معلقة صلصة وتوابل
وتدخل الفرن نص ساعه ثم تحت الشوايه لغاية التلوين التمام أو الموت الزؤام
وبالف هنا
مساء الفل
:eat:

sea horse
21-07-2009, 04:34 PM
معلش نزلت الرد ولقيت العزيزه همزه ردت برضه
بس الطريقه دى من غير شوربه
حمام محشى مضمون وسريع بس جاااااااااف
:shock2:
مساء الفل
:eat:

اليمامة
21-07-2009, 04:41 PM
العزيز سى هورس
اولا حمدلله على السلامة تانى ...كل شوية اختفاء
ثانيا ...مفيش
ثالثا تسلم ايدك ...طريقتك حلوة
الحمام كدة محشى مشوى اكيد بيطلع تحفة
اغلب الناس بتسلقة علشان تضمن التسوية
لكن احساسى بيقول ان كدة احسن على الاقل الحمام يحتفظ بنكهتة كاملة وطعمة اللذيذ

sea horse
21-07-2009, 04:53 PM
العزيزه همزه
طبعا تسلم ايدك ونص ...بس انا اقصد عالكنافه
التركيبه شكلها تمام وبينقط سكريات
:eat:
ومعلومات الورد صحيحه وتمام
الورد البلدى اللى بيقولوا عليه الجورى
والتسميه اصلها ان اشهر بلد لانتاجه فى مصر هى أجهور
فبقى الورد الاجهورى واتحرفت للجورى
وماء الورد بيتصنع من بتلات الورد ده يعنى الجزء الملون بس
وعشان يتجاب لازم من مزرعة ورد وهيه منتشره فى القناطر والمنوفيه بشكل عام
والاسهل نشترى ازازة وخلاص
:l2:
مساء الفل
:eat:

اليمامة
22-07-2009, 06:36 PM
كنافة استانبولى
كيلو كنافة متقطعة صغير اوى شبة مفرومة هناخدها تحمير فى سمن بلدى بكمية محترمة وبعدين هنقلب عليها شوية فواكة مشكلة متقطعة او شوية فواكة جافة مشكلة مع مكسرات ...اللى موجود...وبعدين هصب الشربات عليها تتشربة... شربات ميكونش كتير وبعدين هنحطها فى قالب ظريف او اى شكل حلو عندكوا قلب او قمع او بريوش ...اى حاجة نكبسها فية وبعدين نقلبها على طبق التقديم ونزوق بوردات الكريمة

omima
23-07-2009, 09:29 AM
الأعزاءhamza;sea horseشكرا لأهتمامكم بالرد
وطرق الحمام فيها معلومات مفيده جدا
وأنا فى أنتظاركم لتتحفينا بباب الكنافه
Thanks

اليمامة
23-07-2009, 05:05 PM
الكنافة البورمة
بنجيب الكنافة من عند الكنفانى قطعة واحدة بالطول سليمة وطرية وطازة
نبدا ناخدها شرايط شرايط بالطول متكونش سميكة ونبدا نلف القطعة على صوباعين السبابة والوسطى 3 لفات وبعد كدة نقطع ونرص فى الصينية المدهونة بحيث الفتحة اللى هنحشيها تكون من فوق....نعمل كل الكنافة بالطريقة دى ونرصها فى الصينية لازقة فى بعضها
نكون محضرين الحشو فسدق اخضر
او مشكل لوز وعين جمل وسودانى ...زبيب وغيرة...الحشواللى بتفضلوة
نبدا نحشى كل دايرة كويس وندخل الحشو جواها
نكون مجهزين السمن البلدى السايح نغمر بية قطع الكنافة والصينيةونهزها ونتاكد ان القطع شاربة السمن وواصلها من جوة وتدخل الفرن المتوسط الحرارة فى الرف الوسطانى لغاية لما كلها هتتحمر
تطلع نكون حضرنا السيرب الخفيف مقدار السكر زى مقدار المية وعصير نص ليمونة وغليان ربع ساعة ويكون دافى ...نضيفة على الكنافة السخنة ونسيبها 3او4 دقايق تتشرب وبعدين نصفيها وبالف هنا....هتعجبكم اوى

sea horse
23-07-2009, 06:02 PM
شكرا للعزيزه همزه فتح باب الكنافه
الكنافه الطويله الطرية الطازه اسمها عند الكنفانى ...كنافه بورمه
نطلبها كده ولازم تكون طالعه فعلا حالا ودافيه
الوصفه بتاعتك 100% وبتطلع هايله ودى اسمها عش البلبل
وممكن تتعمل اصغر باللف على صباع واحد
اصلها تفرق من صباع لصباع ...رجالى او بناتى
:icecream:
بالنسبه للسمن ..انا باسيح حوالى كيلو واخليه يسخن اوى واصبه على الكنافه مع دخول الفرن
يعنى هاتبقى متغطيه بالسمن المغلى ...كده هاتستوى من كل حته تمام
ونطلعها نصفيها من السمن ونصب الشربات او القطر عادى
وهنا برضه باحب ادلق عليها شربات كتير وبعد دقيقه تشرب اصفيه تانى
ومش هانخسر السمن ...يستعمل عدة مرات فى اى حلويات
مساء الفل
:eat:

اليمامة
23-07-2009, 06:17 PM
العزيز سى هورس
تسلم ايدك...الزعيم زعيم والكبير كبير
نفسى اطلع بقة من المرحلة اياها
صينية الكنافة مولعة الدنيا

sea horse
23-07-2009, 09:11 PM
العزيزه همزه
انتى استاذة مافيش كلام
بس حلاوة الموضوع اننا بنضيف لبعض من خبراتنا
وانا شخصيا استفدت كتير هنا وغيرت كتير بناء على اقتراحات ووصفات تجنن
تسلم ايدك بجد
:eat:

جيهان محمد على
23-07-2009, 10:25 PM
الكنافة البورمة
بنجيب الكنافة من عند الكنفانى قطعة واحدة بالطول سليمة وطرية وطازة
نبدا ناخدها شرايط شرايط بالطول متكونش سميكة ونبدا نلف القطعة على صوباعين السبابة والوسطى 3 لفات وبعد كدة نقطع ونرص فى الصينية المدهونة بحيث الفتحة اللى هنحشيها تكون من فوق....نعمل كل الكنافة بالطريقة دى ونرصها فى الصينية لازقة فى بعضها
نكون محضرين الحشو فسدق اخضر
او مشكل لوز وعين جمل وسودانى ...زبيب وغيرة...الحشواللى بتفضلوة
نبدا نحشى كل دايرة كويس وندخل الحشو جواها
نكون مجهزين السمن البلدى السايح نغمر بية قطع الكنافة والصينيةونهزها ونتاكد ان القطع شاربة السمن وواصلها من جوة وتدخل الفرن المتوسط الحرارة فى الرف الوسطانى لغاية لما كلها هتتحمر
تطلع نكون حضرنا السيرب الخفيف مقدار السكر زى مقدار المية وعصير نص ليمونة وغليان ربع ساعة ويكون دافى ...نضيفة على الكنافة السخنة ونسيبها 3او4 دقايق تتشرب وبعدين نصفيها وبالف هنا....هتعجبكم اوى

تعرفى يا همزة انا بحب الكنافة جدااااا
بكل انواعها بس اكتر نوع بحبه اللى انتى عملتيه دا :king:
بس ياريت تقوليلى على طريقة الكنافة اللى بتبقى عبارة عن شريط واحد طويل ومبرومه على المكسرات وبعدين بنقطعها بالسكينة لما بتطلع من الفرن الحقيقة مش عارفة إسمها إيه ومش بعرف أعملها كويس :thumbdown: بس بجد نفسى أعرف طريقتها لانى فاشلة جدا فيها :sad:
وكمان عايزة حاجات كتير نعملها بالقشطة لأنى عندى كمية قشطة كبيرة أوى فى الفريزر مش عارفة أعمل بيها أيه :blink:
تحياتى وماتتأخريش عليا والنبى
:bye:

مارب
24-07-2009, 05:24 AM
كل سنة وانتم طيبين
موضوع أكثر من رائع استفدت منه فعلا وكل الشكر لهمزة وسي هورس على عبقريتهم المطبخية
همزة وصفة الشراب الورد البلدي سألوني عنها من مدة
كنت في التكسي فبيسألني صاحبها بيقولي عفوا مدام بس بتعرفيلي كيف بيعملوا شراب الورد
فعتذرت منه لاني مابعرف المقادير بالضبط فقلتله ممكن تسأل والدتك او حد كبير بالعيلة كانوا يعملوه زمان
قلي مابقدر انا مرتي سوبر في المطبخ كيف اطلعها قدامهم مابتعرف تعمل شراب الورد مو حلوي بنوب بحقها مو ظابطة بنوب:4:

أعتقد يا همزة من خلال مشاهدتي لصنع الشراب انهم كانوا بيضيفوا لون للشراب ليحصلوا على لون الورد الجوري الأحمر القاني :f2:

العزيزة جيهان اعتقد بتقصدي بسؤالك عن الكنافة بالمكسرات الملفوفة والمسماة بالشام كنافة مبرومة أو الكنافة البرما
اسمحيلي أساعد همزة و اشارك بوصفتها:


ممكن نعمل الكنافة بجوز الهند او الفستق السوداني او الكاجو حسب الرغبه


المقادير ل 2 كغ كنافة مبرومة :

عجينه كنافة 1 كغ
فستق مجروش خشن او كامل 5 اكواب
قطر 5 كوب
زيت 5 كوب أو مايعادله سمنة حيواني سائحة

بنحط 3 كوب قطر على الفستق وندخله الفرن حتى يجمد القطر عليه ونقسم عجينه الكنافة الى شرائح ونضع امامنا على الطاوله الشريحه الاولى من العجينه بعرض 15 سم وتكون خيوط الكنافة متداخله بشكل لا نرى الطاوله من خلالها
نضع قسم من الفستق في وسط العجين بالعرض ثم نلفه بالجانبين
نلتقط راس الشريحه باليد اليمنى ونبدا باليسرى ببرم العجينه على بعضها ونضغط عليه حتى نصل الى الراس الثاني ونضع البرما اللي لفناها في الصينيه ونسكب عليها الزيت بحيث تغطيها بالكامل وندخلها الفرن
تُوضع في فرن حرارته 180 درجة مئوية حتى تنضج و يحمَر سطحها
وعند النضج تخرج من الفرن وتصفى من السمن الزايد أو الزيت
نصب القطر عليها و هي ساخنة وبعدها تصفى من القطر الزائد ونقوم بتقطيعها بشكل عرضاني على شكل دوائر وتقدم باردة

اليمامة
24-07-2009, 11:26 AM
جيجى...اخيرا نورتى...حمدلله على السلامة
بانبسط اوى لما الو صفة بتعجبك...يارب دايما بجاوب على الحاجات اللى بتحبيها
انا متاكدة انك مش فاشلة ولا حاجة ....انت بس عايزة تجربى بشوية شجاعة واقدام
بالنسبة للكنافة اللى بتتقطع بالورب او سمبوكسات نفس التكنيك بتاعة وصفتى بس بنفرد الكمية كلها بالطول على صينية طويلة والسمك مش تخين نفس سمك عش البلبل وعموما كل ما تكون رفيعة بالمعقول بتكون احلى
ممكن ترشى او تدهنى السمنة دلوقتى وبرضة هتصبى فى الاخر سمنة وممكن تحشى على طول وبعدين تصبى السمنة مرة واحدة...المهم يا جيجى هتعملى الحشو على مزاجك بالمكسرات ...وزى ما مارب قالت ممكن تسقطى المكسرات فى سيرب وعلى فكرة يا مارب بالمصرى اسمها شربات وبالانجليزى اسمها syrup يعنى شراب وكمان sherbet قديمة اة بس تنفع واصلها عربى مصرى...وفى مصر بنقول" دمك شربات "...."قدمك شربات" كدة يعنى......
فية ناس بتحمص المكسرات فى السمن البلدى وبعدين تنزلة فى سيرب تقيل وترفعة يلزق فى بعضة ويسكر ويتلمع وبعدين تدخلة فى الحشو وممكن من غير سكر خالص وتحشى على طول تفردى الحشو وتتنى اول طبقة كويس وتضغطى ولفتين كمان وتقصى وترصى الشرايط دى فى صينية مستطيلة كلة جنب بعضة وتغمرى بالسمنة البلدى بتاعتنا وتدخلى الفرن تستوى وتتحمر وتقرمش وتتطلع تتقابل بالشربات الدافى وقبلة نكون صفينا السمنة وبعدين نسيبها 3 دقايق تتشرب شوية ونصفيها وبعدين يا قمر ناخدها تقطيع بالورب قطع معقولة...وتتقدم كويس مع شوية كريمة ومكسرات صحيحة او شوية جوز الهند متحمرين فى السمنة ومرشوشين عليها مع شوية جوز هند ابيض....العبى بالالوان يا جيهان....عجبتك؟

اليمامة
24-07-2009, 11:31 AM
العزيزة مارب
شكرا على وصفتك ...حبيت اقول بس بالتفصيل لجيهان وعلى الطريقة المصرية لكن تسلم ايدك
بالنسبة لشربات الورد....طبعا كلامك صح مليون المية وطبعا لازم اللون وان كنت مقولتش علية يبقى نسيت...وقولت كمان لزيادة النكهة بنضيف روح الورد

اليمامة
24-07-2009, 11:40 AM
بصى بقة يا جيجى
القشطة ليها استخدامات كتيرة اوى فى الحلويات على الخصوص
ابسط حاجة ممكن تنزل فى الفطار والعشاء مع العسل النحل والمربات
ممكن ساندويتشات حلو زى الحلاوة بالقشطة والتوست بالموز والقشطة وغيرة كتير وقوليلى لو عايزة بالتفاصيل
فى الحلويات الشرقى....عندك البسبوسة بالقشطة والكنافة بالقشطة والقرص للفطار الصباحى وفى الكيك وحشوات كتيرة جدا وكمان الفطير المشلتت يا عينى علية
كمان ياجيهان خدى عندك طواجن الارز المعمر والارز باللبن لو ضيفتى علية قشطة...بيبقى كريمى وطعمة تحفة وانسى يا عمرو....قصدى انسى يا جيهان
بصى بقة يا قمرة لو كمية كبيرة خديها ضرب بمعلقة خشب او بالمضرب الكهربائى...هتلاقى اللبن بيفصل وهتتكون باللف الزبدة البلدى بتاعتنا هتروح اخدة الزبدة دى وتسييح على النار وبكدة يكون عندك شوية سمنة بلدى محترمين تخربى بيهم الدنيا...
وفية اطباق كدة مميزة بنحبها بالسمن البلدى زى الارز الابيض ساعات بنحبة بالسمن ...طبق البيض...شوية فول بالسمن البلدى...حشوالرز للفراخ والبط والحمام البلدى...الطير البلدى عموما
بصى اللى يعجبك من هنا قوليلى علية واكتبهولك بالتفصيل....اتفقنا؟

محمودعرابى
24-07-2009, 05:29 PM
السلام عليكم ورحمة الله وبركاته
اخوانى اخواتى فى الله عليكم بالتمسك بالنفحات العطرة فى الشهر الكريم انه شهر رمضان المعظم

omima
25-07-2009, 06:22 AM
شكرا للأعزاء sea horse ,hamza لفتح باب الكنافه:brawa::brawa::brawa::brawa:
جميله جدا جدا تكات الكنافه البرم أنا ماعملتهاش ولامره وكنت أكتفى بشرائها جاهزه خصوصا عش البلبل وحكاية المكسرات فى العسل برضه معلومه جديده لكن ياريت تقولولى علىطريقة حشو الكريمه داخل الكنافه زى الجاهزه علشان الميزانيه موش حاتنفع طول الشهر مكسرات
(وعندى إضافه بالنسبه لإستخدام القشطه أنا باضيفها للكريم شانتيه فى تزيين التورت او الجيلى)
أنا فى إنتظار الجديد وكل عام وأنتم بخير

اليمامة
25-07-2009, 02:49 PM
العزيزة اميمة
هنزلك دلوقتى طريقة الكنافة بالقشطة وهقولك بدايل كمان
بس على فكرة انا عن نفسى بجيب مكسرات مش كتير ...قليل ...يمكن نص من كل نوع وتصورى بطلع من رمضان بالباقى لان انا بعمل فى كل رمضان يمكن 3 صوانى كنافة بالكتير غير الحلويات التانية الخفيفة...
الكنافة بالقشطة...
كيلو كنافة يتقطع رفيع جدا جدا واحسن تقصية بالمقص او تهرية فى الكبة لفتين وبس...هتكون السمن البلدى موجود وسايح ودافى تقلبى فية كل الكنافة تحسى كدة انها شايلة سمن كتير وبتنقط...انا بحبها كدة....مهما كانت دسمة ...انا باخد حتة صغيرة بس...المهم فى صينية الفرن هتحطى اول راق وياريت مش تخين حاجة بتاع 2 سم وتضغطية كويس اوى وممكن تحطى علية تقل وتسبية ساعة وتدخلية الفرن ياخد الون الدهبى وفى الاثناء دى تكونى بتحضرى الحشو عبارة عن كوباية نشا تقلبيها كويس اوى مع كوبيتين ونص لبن وبعدين ترفعيهم على النار مع التقليب وحطى السكر على ذوقك وتغلى غلوتين ونقلب هيتخن طبعا معانا نسيبها تبرد وبعدين نقلب معاهم حوالى نص كيلو قشطة او اقل شوية وممكن هنا ودى اختيارى انك تقلبى مع الخليط دة شوية مكسرات متحمرة فى السمن البلدى هتجيبى الراق الاولانى اللى اتحمر وتفردى الحشو بالتساوى وبشكل ناعم على الوش ومتوصليش للاطراف علشان متتحرقش ويبقى منظرها مش لطيف خالص...وتضيفى الكنافة التانية بنفس السمك وهنا تضغطى شوية بس للتساوى لكن متضغطيش كتير ولا جامد وتدخليها الفرن المتوسط وتتحمر وتطلع نحطلها الشربات الدافى وتتزين بوردات القشطة او دايرة كاملة حوالين الصينية ولغاية جوة والمكسرات الصحيحة وومكن رشات من صوص التوفى او الكراميل اللى هو عبارة عن نص كوباية سكر تتحرق وتنطفى بربع فريش كريم مش مضروب مع تمن زبدة

اليمامة
25-07-2009, 03:24 PM
الكنافة عموما بالقشطة او المكسرات ممكن نعملها فى قوالب صغيرة واشكال لطيفة حتى تفتح نفس الاطفال
وفى لون برتقالى اكيد عارفيينة ممكن بنحطة مع الكنافة يعنى ندهن الصينية بالسمن المخلوط بشوية من اللون دة ونحط الكنافة ونفس الحركة مع الراق الاخير
الكنافة اللى بالقشطة ممكن فو ق القشطة نرص حلقات من الفراولة ونضيف الراق التانى وندخل الفرن وتتطلع وتتزين بحبات الفراولة ونفس الطريقة ممكن مع الموز
وممكن طبقة الكاسترد فوق على الوش المتحمر وبدون وضع طبقة تانية من الكنافة بس نسيبة لمدة 5 دقايق ونفردة بشكل متجانس ونزينة بالفستق المجروش والمسكر فى السيرب ونقدمها والشربات نكون حطيناها على الراق الاولانى وقبل ما نكون حطينا صوص الكاسترد او اى صوص انتوا عايزينة
الكنافة بتقبل اضافات كتير
ممكن نعمل كنافة بنكهة القهوى مع الشيكولاتة
ونحشى بكريمة الشيكولاتة ونزوق بالكريز وبشر الشيكولاتة ورشات الكاكاو
وحتى القرفة كمان ممكن ناخدها كمنكة
وممكن نعمل كنافة حادقة بحشوات مختلفة
كمان ممكن نعملها بنفس فكرة التشيز كيك
طبقة الكنافة تكون مجرد قاعدة
ياااااااااة....كتير...دا ابداع

sea horse
26-07-2009, 08:42 AM
العزيزه همزه
شكرا لابداعات الكنافه وروايح رمضان واصله تهفهف
:hey:
جربوا دى على ضمانتى
كنافه باللحم او بالجمبرى
بنقطع الكنافه صغير اوى ..وفعلا احلى اعداد يكون بالمقص
وممكن تجمدى الكنافه الهايشه فى الفريزر ونطحنها بالايد وهيه مجمده هاتتفتفت اوى برضه
هانشتغل عادى بس بدل السمن زيت ذره ومعلقتين زبده
ونعمل اول طبقه بدون كبس
ونحضر الحشو سواء لحم مفروم معصج أو جمبرى صغير كتير متشوح بالزبده والملح والفلفل
وبعد طبقة الحشو نحط باقى الكنافه ونضغط هنا كويس اوى وممكن بصينيه اصغر وفوقها حلة ميه
المهم تتكبس جامد ... ونحدفها عالفرن لغاية بداية التلوين الذهبى المميز
ونرش عليها خليط مضروب جامد من نص كوباية زبده على كوباية لبن وبيضتين
ونكمل تسوية تمام
وبالف هنا
صباح الفل
:eat:

اليمامة
26-07-2009, 10:11 AM
الله الله الله
تسلم ايدك ودماغك المفترية المطبخية
هايلة الكنافة الحادقة دى....انا بميل للحادق اكتر
طب ممكن اضيف حاجة يا بروف؟
ممكن نعملها برضة لفائف لوحدها زى عش البلبل او نقطعها بالورب ونحشى الحشو المالح وكمان مع الجبن هتكون حلوة وعلى الفرن وبنفس التكنيك
بيتهيالى...اة....انا شمة الريحة
تسلم الايادى

اليمامة
26-07-2009, 05:21 PM
التين وتجفيفة
فية طريقتين لتجفيف التين...فى الفرن وفى الشمس
الطريقة الاولى بتاعة الفرن بنغسل التين كويس وبنزلة فى محلول سكرى عبارة عن لتر مية وعلية كوباية سكر وعصير ليمونة ونص معلقة ملح ليمون...وطبعا ننتخب الثمار الجامدة...مستوية بس جامدة تتحمل المحلول السكرى على النار لمدة 4 دقايق ونطلعها سليمة محافظين على شكلها
نرصها تجف وبعدين ندخلها صوانى فى الفرن مش اقل من 8-12 ساعة على درجة حرارة ا100-110 ونسيب باب الفرن مفتوح علشان تنفيث الرطوبة وبعد كدة نطلعة نرصة تانى عل الواح ونسيبة فى مكان رطب يومين تلاتة ونعبية فى اكياس وللحفظ المطول نشيلة فى الفريزر
التجفيف الشمشى بنفتح الثمرة نصين او نعمل فيها علامة x من تحت ونكون غسلناة وسيبناة ينشف ونرصة على ورق ابيض نضيف او ورق زبدة جنب بعضة لكن مش فوق بعضة ونيسبة ينشف فى مكان رطب لمدة يومين تلاتة مع مراعاة اننا كل يوم نقلبة على جميع النواحى وخاصة انة بينزل عصارة وبيلزق..وبعد كدة نحطة يوم فى الشمس وطبعا طول الوقت متغطى ...المهم احنا بالنظر نفهم المدة واحنا عايزين نوصل انى ميكونش فية عصارة وبقى ناشف مش طرى علشان عملية التعفن وانة يعيش معانا لاطول فترة ممكنة... بعد كدة هناخدة على الفرن الحار لمدة مش اقل من ساعة ونطلعة نسيبة يبرد ونعبية فى الاكياس ونشيلة فى التلاجة...ومع الخشاف وغيرة وكل سنة وانتم طيبين.

sea horse
26-07-2009, 07:17 PM
طبعا تشكيل الكنافه باى حشو مجال مفتوح
عش البلبل او مبرومه أو عاديه
انا مره جربتها بضرب الجنبرى مع كرفس مسلوق وكريمه
يعنى حولته لكريمة جمبرى وحشيت الكنافه بالكريمه دى
وبجد بتبقى صنف جديد وغير متوقع على السفره
تسلم ايدك والافكار اللوزعية
مساء الفل
:eat:

sea horse
26-07-2009, 07:18 PM
طريقة تجفيف التين هايله بس نصيحه اعملوها بالتين الابيض مش الاحمر
التين الابيض بيكون لونه اخضر فاتح لما يستوى
وميزته ان المواد الصلبه الكليه واساسها السكريات بتكون مرتفع فيه
تسلم الايادى
مساء الفل
:eat:

جيهان محمد على
26-07-2009, 08:07 PM
أختى العزيزة ....hamza adam
أختى العزيزة..... مارب
:f2:
حقيقى بشكركم على إهتمامكم بطلبى وشرح طريقة الكنافة مرة بالشامى ومرة بالمصرى هههههههههههههه ربنا يخليكم ليا يارب
بس أعتقد المشكلة عندى بتبقى فى طريقة اللف نفسها :closedeyes:
ومع ذلك هاحاول ومرة تصيب ومرة تخيب ما هو لازم يبقى فى خساير برضو فى الأول:notme: وإن شاء الله لو نجحت هاجى هنا افرحكم :2:
مرة تانية بشكركم وان شاء الله ارجعلكم بطلبات تانية وإنتو بقى اللى جيبتوه لنفسكم :p

جيهان محمد على
26-07-2009, 08:27 PM
بصى بقة يا جيجى
القشطة ليها استخدامات كتيرة اوى فى الحلويات على الخصوص
ابسط حاجة ممكن تنزل فى الفطار والعشاء مع العسل النحل والمربات
ممكن ساندويتشات حلو زى الحلاوة بالقشطة والتوست بالموز والقشطة وغيرة كتير وقوليلى لو عايزة بالتفاصيل
فى الحلويات الشرقى....عندك البسبوسة بالقشطة والكنافة بالقشطة والقرص للفطار الصباحى وفى الكيك وحشوات كتيرة جدا وكمان الفطير المشلتت يا عينى علية
كمان ياجيهان خدى عندك طواجن الارز المعمر والارز باللبن لو ضيفتى علية قشطة...بيبقى كريمى وطعمة تحفة وانسى يا عمرو....قصدى انسى يا جيهان
بصى بقة يا قمرة لو كمية كبيرة خديها ضرب بمعلقة خشب او بالمضرب الكهربائى...هتلاقى اللبن بيفصل وهتتكون باللف الزبدة البلدى بتاعتنا هتروح اخدة الزبدة دى وتسييح على النار وبكدة يكون عندك شوية سمنة بلدى محترمين تخربى بيهم الدنيا...
وفية اطباق كدة مميزة بنحبها بالسمن البلدى زى الارز الابيض ساعات بنحبة بالسمن ...طبق البيض...شوية فول بالسمن البلدى...حشوالرز للفراخ والبط والحمام البلدى...الطير البلدى عموما
بصى اللى يعجبك من هنا قوليلى علية واكتبهولك بالتفصيل....اتفقنا؟

شوفى يا ستى كل اللى قولتيه دا جميل جداً وحاجة تفتح النفس بصراحة.... أنا شخصياً بحب جداً سندوتشات العسل الابيض بالقشطة بالنسبة لى مدمرة :eat:
فكرة الرز بالبن اللى عليه قشطة دى هاجربها واضح فعلا هايبقى طعمه خطير بس يعنى أحط القشطة مع اللبن تغلى طب كدا مش هاتبقى زبدة ولا أحطها فى الاخر يا ريت تقوليلى ؟؟؟؟ وكمان ياريت تقوليلى طريقة الرز المعمر بالتفصيل
عشان بحس اللى بعمله دا مابيبقاش رز معمر :nono: فقوليلى طريقتك كدا يمكن يطلع رز معمر المرة دى ;)

بالنسبة لعمل الزبدة من القشطة فا وحياتك جربتها وحاولت أضربها كتير جدا كل اللى بيحصلها إنها بتزيد وبتبقى زى الكريمة :nono:لكن ما بتفصلش وتطلع الزبدة والاخر زهقت وحطتها فى الفريزر:l2:
مش عارف ايه المشكلة رغم إنى جربت قبل كدا أعمل موضوع الزبدة دا ونفع والله معايا بس الظاهر القشطة دى مختلفة شوية :angry:
أشكرك يا قمر وربنا ما يحرمك من غلاستى
:p

جيهان محمد على
26-07-2009, 08:35 PM
العزيزه همزه

شكرا لابداعات الكنافه وروايح رمضان واصله تهفهف
:hey:
جربوا دى على ضمانتى
كنافه باللحم او بالجمبرى
بنقطع الكنافه صغير اوى ..وفعلا احلى اعداد يكون بالمقص
وممكن تجمدى الكنافه الهايشه فى الفريزر ونطحنها بالايد وهيه مجمده هاتتفتفت اوى برضه
هانشتغل عادى بس بدل السمن زيت ذره ومعلقتين زبده
ونعمل اول طبقه بدون كبس
ونحضر الحشو سواء لحم مفروم معصج أو جمبرى صغير كتير متشوح بالزبده والملح والفلفل
وبعد طبقة الحشو نحط باقى الكنافه ونضغط هنا كويس اوى وممكن بصينيه اصغر وفوقها حلة ميه
المهم تتكبس جامد ... ونحدفها عالفرن لغاية بداية التلوين الذهبى المميز
ونرش عليها خليط مضروب جامد من نص كوباية زبده على كوباية لبن وبيضتين
ونكمل تسوية تمام
وبالف هنا
صباح الفل

:eat:





حلوة موت طريقة الكنافة الحادقة دى :y1: وانا كمان زى همزة بميل للحادق اكتر من الحلو :sorry: عشان كدا عجبانى الطريقة وهاجربها اكيد
بجد طريقة تجنن وسهلة جدا ومتوقعة كمان طعمها هايبقى تحفة
تسلم إيدك وربنا مايحرمنا من فنونك المطبخية :eat:

انا هاخرج بقى من الموضوع مش عارفة ليه كل مابدخل هنا بتجوعونى ربنا يسامحكم
:no:
سلام

اليمامة
26-07-2009, 09:34 PM
امورتى جيجى
منورة كالعادة....ومفيش شكر بينا
بالنسبة للف الكنافة...قولنا عش البلبل بتلفى الشريط بتاع الكنافة 3 مرات على صوباعين الوسطى والسبابة وكدة يدوب تقدرى تحطى شوية مكسرات لو صباع واحد هتحطى ازاى؟ دا بالنسبالى....وبعدين تقصى وترصى جنب بعضة فى الصينية
اما التانية البورمة شريط يتفرد بطول وبسمك معقول ويتحشى بالعرض وال3 لفات هيمسكوا الحشو وتقصى وترصى الشرايط وعادى بقة يا جيهان...اجى اعملهالك واريحك؟
بالنسبة للارز باللبن شوفى فى اخر مرحلة وخلاص الرز قوامة قرب يتخن وتكة ويستوى وهتحطى شوية نشا متحطيهومش حطى مكانهم القشطة ومش هتبقى زبدة ولا حاجة دى هتخلى الارز باللبن كريمى وانا عن نفسى باعمل الارز باللبن بدون نشا....اتكلى على الله مش هيجرى حاجة....دى قشطة
بالنسبة للزبدة لما تيجى تعملى منها زبدة....اولا هى قشطة بلدىفلاحى؟ عموما هتسيبيها تفك من التفريز خالص هتلاقيها بتفصل لبن المفروض يا جيهان متضربيهاش كتير لانها كدة بتتحول لكريمه و وبتزبد..دا يدوب لفتين واحسن حاجة انك ترمى المضرب بطول ايدك وطنشى صوت كسروه وبايدك الحلوة لفى القشطة بصوابعك كانك بتربطى غطى برطمان مثلا حاجة كدة زى الرب بسرعة هتلاقى الزبدة بتتكون وبتلف معاكى وتعمليها كور وتسيحى

اليمامة
26-07-2009, 09:47 PM
بالنسبة للارز المعمر...لية انواع ...عادى مالح ومسكر وبرام باللحم او الفراخ او الحمام والسمان والكلاوى....كتيير
انا هقولك على العادى البسيط ولو عايزة حاجة قوليلى
كيلو الرز يتغسل كويس بافترا ويتنضف حلو ويتشال منة اى حباية ملونه نسيبة منقوع فى المية ياريت لو ساعة وينفع اقل بس كلمة فى ودنك انا بانقعة فى اللبن بيخلى طعمة بعد كدة حلو وريتش...حلو الكلام؟
بعد كدة باخد باصفية من اللبن وبادعك الرز بشوية سمن بلدى كتار محترمين او بالزبدة واتوصى وعليهم كمان كوبيتين قشطة من اللى قلبك بيحبها اياها اللى عندك فى الفريزر...والملح المضبوط اوى وانزلى باللبن السخن فى صينيه عادية او حلة وتتحط فوق على وش النار تغلى وتتشرب اللبن ويكون قوام الرز عامل زى الارز باللبن هتجهزى البرام الجامد المدهون سمن وتنزلى بالارز وتحطى القشطة تانى على الوش وتغطية بورق فويل وتدخلية الفرن هيتشرب الباقى ويستوى كويس وبعدين تشيلى الفويل وهيتحمر الوش وهيفقع وهايعجبك ان شاء اللة
هو دسم اة بس دى طبيعة الارز المعمر طعمة رهيب وعلى فكرةممكن تاخدية كامل فى البرام تسوية فى الفرن بس انا باستريح للطريقة الاولى
ياريت تسالى تانى عن اى حاجة يا جيهان احنا اة جبناة لنفسنا...بس جبنا احلى حاجة؟ياللا هاتى الباقى..........

اليمامة
27-07-2009, 05:35 PM
طبعا فى رمضان مفيش غنى عن البلح وبنفطر بية على السنة...وخلاص البلح قرب يغرقنا ومش عارفة هنلحقة فى رمضان واللا لا
بس هقولكوا على حاجة لطيفة ينفع نعملها ونرصها فى طبق تقديم ظريف ونقدمها للضيوف ساعة اذان المغرب يفطروا علية فى حالة لو عازمين حد فى رمضان
هنجيب بسكوت من العادى انا بحب دايجستيف اللايت وبيكون عندى عجينة عجوة وغالبا انا اللىبكون عملاها فى البيت
وباخد البسكوت سليم واعجنة فى العجوة وباتعمد ان البسكوت يكون مكسر خشن جوة العجوة يعنى مش بهرية وبعدين باخد العجوة والفها رول فى السمسم وبيكون طبعا شكل البسكوت باين فى العجوة بعد كدة باخدها بالسكينة واقطعها بالورب..وممكن اعملها كور من الاول او اى شكل تانى فى قوالب صغيرة ومش ضرورى السمسم ممكن الفها فى جوز هند او مجروش الفول السودانى...فستق...او كوكتيل من المكسرات المجروشة او مبشور شيكولاتة وتحطوا فيها خلل الاسنان بحيث كل واحد ياخد القطعة بتاعتة ويفطر عليها بشكل ظريف وجديد وحلو

sea horse
27-07-2009, 10:03 PM
العزيزه جيهان
الف شكر لذوقك وجربيها بجد هاتعجبك اوى
وبالف هنا
:f:
العزيزه همزه
خلطة العجوه بالبسكويت تحفه وتفتح افكار كتير
يعنى ممكن نخلطها اصلا بمجروش مكسرات ونمرمغها فى السمسم
او جوز الهند
يعنى الموضوع يقبل تباديل وتوافيق كتير
تسلم الافكار اللوزعية
مساء الفل
:eat:

omima
28-07-2009, 01:23 PM
:f2:بسم الله الرحمن الرحيم
ألف شكر للأعزاء سى هورس وهمزه إتجرات أمس لتجربة الزبادى منازل قبل رمضان والنتيجه ممتازه جدا جدا فكرة الخلاط والرغاوى عملت وش خطير كنا نفتقده حتى فى الجاهز
أنا عندى سؤال ممكن أعمل الزبادى بلبن معلبات لأنه متوفر عندى ولا المادة الحافظه الموجوده فيه تبطل نشاط البكتيريا

اليمامة
28-07-2009, 02:24 PM
الحلوة اميمة
برافو عليكى...انك بتجربى والحمدلله ان الزبادى نجح معاكى ...دى وصفة هايلة كونتها من خلال تجاربى الكتيرة مع الزبادى
ينفع طبعا تعملية باللبن المعلب عادى وينفع كمان تصورى..؟؟ انك تعملية بلبن بودرة زى نيدو مثلا يعنى بتدوبى اللبن وبتغلية وعادى بتكملى نفس الخطوات...واى سؤال احنا موجودين ياقمر

sea horse
29-07-2009, 06:22 AM
موضوع اللبن المعلب
لو اللبن المعلب بطريقة التعقيم فقط فاكيد ينفع
لكن فيه البان بيكون فيها ماده حافظه ودى تمنع نشاط الخميره
ونيدو طبعا ينفع لانه مجرد تجفيف
صباح الفل
:eat:

اليمامة
29-07-2009, 11:39 PM
العزيز سى هورس
اعزائى اصدقاء المطبخ
مين شاطر يقولى وصفة الكنافة النابلسية بالتفصيل
حد سامعنى
يا خوانا
ردوا علييا

sea horse
31-07-2009, 05:56 PM
العزيزه همزه
معلش للتاخير لظروف السفر
الكنافه النابلسية
ليها عدة طرق واسهلهم اللى بتتعمل بقض الكنافه بطول حوالى 5-7 سم
يعنى قص كبير
لو نص كيلو كنافه مثلا هايتقلب فى كوباية سمن بلدى مفترى مقدوح بعد ما ينزل من على النار
ونقلب كويس ونرده تانى عالنار الهاديه مع التقليب لغاية سوا الكنافه بتغير اللون للذهبى شويه
وممكن تحتاج سمن تانى ....المهم تكون مشبعه كلها بالسمن
ونصب عليها القطر او الشربات الدافى كتير نغرقها وبعد دقيقه نصفيها
ونحطها فى سيرفيس تقديم غويط ونحط على وشها حوالى نص كيلو قشطه
يبدأ يسيل مع السخونه شويه وتقدم كده دافيه
بجد حلوه وتتجرب
وهابقى اقولكم طريقه تانيه لنابلسية الصوانى
مساء الفل
:eat:

اليمامة
01-08-2009, 06:51 PM
العزيز سى هورس..
جميلة الطريقة دى...تفتح النفس
بس اعتقد ان دى بالقشطة عادية الا لو اتخلط مع القشطة شوية كريم تشيز او ريكوتا او قريش لايت
على اية حال انا مستنية الطريقة التانية بتاعة الصوانى ...وعلى بال ما تقولى اسمحلى اقول الكريم كراميل اللذيذ الخفيف اللى بيمشى كحلوى خفيفة مع رمضان وضيوفة وعزايمة
اول حاجة بحط كوباية سكر على كوباية الا ربع مية على بعض وباحطهم على نار هادية لغاية لما السكر يدوب ويغلى بس مبقلبهوش وبسيبة هو بياخد اللون الجولدن ومبحبوش غامق اوى وبعد كدة بصبة بنفس النسب فى قعر ست قوالب صغيرة من بتاعتة الكريم كراميل او لو مفيش يبقى فى صينية الكيك المجوفة او حتى فى صينية عادية مفيش مشاكل
بعد كدة باضرب 4 بيضات مع نص كوباية سكر مع معلقة صغيرة فانيليا كويس وبادفى 3 كوبايات لبن وبصبة على البيض بالسكر المضروبين مع التقليب الجيد السريع بعد كدة باصبة فى القوالب بتاعتى فوق السكر المحروق وبحط القوالب دى فى صينية فيها مية سخنة لغاية نص القوالب وبدخلها الفرن على 160 درجة لمدة 45 دقيقة وبعدين يطلع يبرد ثم فى التلاجة لمدة متقلش عن 8 ساعات وساعة التقديم نقلب القالب فى طبق التقديم ونزينة بالفاكهة او الكريمة

sea horse
02-08-2009, 07:25 AM
العزيزه همزه
الكنافه النابلسية زى ما حضرت عمايلها
مس بيستعملوا فيها غير السمن البلدى والسكر والقشطه
حتى السمن يسموه سمن عربى ...وهوه تقيل اوى عن اللى عندنا لانه يستخرج من لبن الغنم
بس اكيد ينفع تجربى وتعدلى لان اى خلط مع القشطه هايخففها شوية
خاصة الفريش لايت كريم
وهايدى طعم جديد
صباح الفل
:eat:

اليمامة
02-08-2009, 05:43 PM
العزيز سى هورس
ميرسى ليك...انا متاكدة انها طعمها حلو..وخاصة انك شاهد عيان...هههههه
بس من خلال شوية قراءات مطبخية كان عندى فكرة انهم بيستعملوا فيها نوع من انواع الجبن ...حتى كان تقريبا اسمها جبنة نابلسية من لبن الغنم فعلا...وموجودة عندهم بس....وعلشان كدة سموها الكنافة النابلسية
الحقيقة مجربتهاش قبل كدة وباحب الطعم المالح ...عايزة اتخيل طعمها وخاصة انهم بيحوتولها برضة شربات
ممكن القشطة دى تكون هى الجبنة النابلسية ...الاتنين من لبن الاغنام....شكرا ليك...وتسلم ايدك

sea horse
03-08-2009, 06:22 AM
العزيزه همزه
والله انا اكلت النابلسية دى فى سوريا باكتر من شكل وطعم
وكل مطعم يقول هيه دى الطريقه الاصلية
بس بصراحه هيه طريقه حلوه بكل اشكالها
وممكن فى الطرق دى يكون بيدخل فيها جبنه حلوه زى الريكوتا ...ممكن
صباح الفل
:eat:

اليمامة
03-08-2009, 05:31 PM
مساء المانجا
خدوا الوصفة دى بمناسبة المانجا وهتشتغل معاكوا فى رمضان اخر حلاوة
موس المانجا بالليمون
هتجيبوا حبايتين مانجا محترمين ومستوية وتخلوها وتاخدوا اللحم وتهرسوة فى الكبة مع بشر ليمونتين وبعد كدة فى سلطانية على جنب هتاخدوا عصير الليمونتين اللى انتوا بشرتوهم وهترشوا عليهم معلقتين كبار جيلاتينة بودر..موجودة ولسة جايباها قريب اوى وجميلة جدا...وهتسيبوا الجيلاتينة مع عصير الليمون 10 دقايق لغاية لما الجيلاتينة تكون عاملة زى الاسفنج وبعدين نحط السلطانية على حمام مية سخنة ونقلبها لغاية لما الجيلاتينة تدوب على جنب برضة وفى سلطانية هنضرب 3 بيضات مع صفار بيضة ضرب كويس محترم 10 دقايق مثلا لغاية لما لونهم نحسة بقة فاتح معانا وبالتدريج مع التقليب السريع المستمر نبدا نضيف المانجا المضروبة لغاية لما نحس ان القوام بتاع الخليط بيتقل معانا للاخر وبقة متجانس
نكون من قبل كدة وعلى جنب برضة-معلش اخر مرة هقول على جنب-ضاربين كوباية الا ربع كريمة لغاية ماتتقل ويتخن قوامها معانا...هنبدا نضيفهاعلى خليط المانجا ونضيف كمان الجيلاتينة السايحة ونقلب كويس بالراحة لغاية لما كلة يمتزج مع بعضة ويكون متجانس
هنصب بقة الخليط دة فى طبق تقديم حلو كبير او اطباق صغيرة ونحطة فى التلاجة مش اقل من ساعتين لغاية لما يمسك والجيلاتينة تقوم بالواجب ساعة التقديم نزوقة بوردات الكريم شانتية المضروب وكمان شرايح ليمون حوالين الطبق وممكن بسكوتة كمان....جربوها فى موسم المانجا....لذيذة
هنا

sea horse
03-08-2009, 07:46 PM
ايوه كده المانجه وسنينها
كترى من المانجه اوى يا همزه ولا يهمك
حلوه اوى الوصفه دى بس سؤال
ماينفعش نستعمل علبة جيلى مانجه بدل الجيلاتينه ؟؟؟
:omg:
مجرد سؤال لعدم توفر المطلوب احيانا
:1:
مساء الفل
:eat:

اليمامة
03-08-2009, 09:28 PM
العزيز سى هورس
مش عارفة اقولك اية على دماغك العبقرية...اللى بتلقط الافكار بسهولة
طبعا ينفع ونص جيلى المانجا مكان الجيلاتينة وهيكون الطعم احلى كمان...كان فية شيف عبقرى قال على المعلومة دى من فترة وكانت جديدة عليا اوى وفعلا استوعبتها ولقيتها احلى واحلى من الجيلاتينة بكتير وخصوصا ان الوصفة كدة هتنقط مانجا على اصولها مع المانجا الطبيعية اللى فيها...شىء لا يقاوم بجد....االطعم الاصلى المسكر ليها....يلا جرب وقولى الاخبار وليكوا عليا اكتر من المانجا..

أم أحمد
03-08-2009, 10:06 PM
انتم مش هتبطلوا تتكلموا علي المانجة بقي:angry:
حرااااااااااام عليكم راعو اخواتكم المغتربين اللي مش بيشوفوا المانجة دي بالسنين:$

بس الطريقة دي تجنن يا همزة
انا متخيلة الطعم يم يم يم:4:
يلا بالف هنا وشفا يا رب

sea horse
04-08-2009, 07:07 AM
العزيزه ام احمد
معلش احنا برضه محرومين من الكريز والقراصيا وحاجات كتير على الشجر عندكم وبس
يعنى لازم حرمان مناطق يختلف عن مناطق عشان شركات الشحن تشتغل
:brawa:
العزيزه همزه
احنا مجرد بنشوف مع بعض البدائل وبس
وفيه كمان باحب مع اى عصير او تصنيع للمانجه
نى عند الصب سواء فى اطباق او كوبايات احط معلقة من عصير الفراوله المركز
ده مع لون المانجه بيدى حلقه او هاله وردى تخبل
وياسلام لو عليها معلقة عسل كمان
ياللا يا جماعه عايزين افتكاسات المانجه
صباح الفل
:eat:

اليمامة
04-08-2009, 07:20 AM
اختى العزيزة ام احمد:4:
بجد زعلتينى...:(واحنا فى عز موسم المانجا هنا...بس شىء غريب....مفيش مانجا عندكوا خالص؟:blink:...العالم دول مبيعرفوش المانجا؟؟؟...على اى حال لو فى طريقة قوليلى وابعتلك فريش واجهزلك شوية للتخزين فى التلاجة على طول...ومش بهزر ..بتكلم بمنتهى الجدية....ومستنية:kiss2:

اليمامة
04-08-2009, 07:39 AM
العيش بالجبنة والاعشاب لسحور لذيذ
الطريقة دى جميلة وباحبها وباعملها دايما وخاصة ان اولادى بيحبوها علشان بتكون مالحة على خفيف...خدوها وجربوها فطور او سحور او حتى على العشاء الخفيف مع الجبن والشاى والزبدة وغيرة
فى طبق عجن بلاستيك غويط هنحط كوبيتين ونص دقيق وعليةنص كوباية جبنة شيدر مبشورة وزيها جبنة رومى مبشورة ومعلقتين مستردة ومعلقتين كبار بقدونس ومعلقة صغيرة ونص ملح وقلبى كلة مع بعضة وفى نفس الاثناء دى هتكونى حضرتى كوباية ونص لبن دافى ومدوبة فية معلقة كبيرة خميرة وتروحى صباه على الدقيق بمحتوياتة وتعجنى كويس لغاية لما العجينة تكون معاكى ناعمة ومش ماسكة فى ايديك وطبعا بنحط اللبن شوية بشوية على حسب حالة العجين والدقيق هنغطى العجينة ونسيبها فى مكان تتخمر حوالى ساعة ونص وبعدين نجيبها تانى ونبل ايدينا بزيت ونعجنها من الاول وجديد ونسيبها تخمر تانى ساعة وبعد كدة هنجيب صينية فرن للخبيز وندهنها زيت ونفرد فيها العجينة على هيئة دايرة لو الصينية مدورة وعلى هيئة مربع لو الصينية مربعة وبسمك يمكن نص الصينية ونسيبها تانى تتخمر نص ساعة هنجيبها ندهن وشها بالبيض مع اللبن ونعمل خطوط متقاطعة زى الشبكة على وشها بالسكينة ونملاها جبنة شيدر مبشورة وبعد كدة ندخلها الفرن على 240 درجة ...حرارة عالية يعنى لمدة 10 دقايق وبعدين وطى الحرارة ل 200 درجة ونسيبها كمان من تلت لنص ساعة لغاية لما ترفع وتنفش وتحمر ولو الوش احمر ممكن نغطية بورق المونيوم ونكمل الخبيز وبعد كدة تتطلع وبعد ماتبرد نقطعها بسكينة حامية شرايح زى التوست كدة وبتكون فعلا حلوة.....ااتمنى تعجبكوا

اليمامة
04-08-2009, 09:36 AM
العزيز سى هورس
برافو عليك بجد...دا منظر جنان..انا لما باجى اعمل كوكتيلات باصب فى قعر الكوباية اى شربات مركز زى النعناع الفراولة الورد..الطعم بيبقى لا يحتمل...والشكل كمان ...يعنى بيدى تدرج فى الالوان واختلاط وتجانس....طالع غامق من قعر الكوباية وبينور ويفتح طول مانت بتصب العصير..وفى بعض الكوكتيلات بيضاف ليها شوية سفن اب زى الكركدية والليمون والرتقال نفس الطريقة نصب فى قعر الكاس شوية من شرباتهم او صلصتهم ومنكهاتهم ...واتفرج على الفقاقيع والصودا الجميلة اللى تسمع صوتها...فن بجد وجمال....تسلم ايدك
حاجة كمان احب اضيفها...عند عصر المانجا حطو اعليها شوية ورق نعناع محترمين واعصروهم مع المانجا فى الخلاط وسيبوها شوية ولما تصبوها فى قعر الكاس حطوا معلقة شربات نعناع وبعد كدة انزلوا بالمانجا...ومش هتصدقوا الطعم الجمييييييييييييييييييييل

sea horse
04-08-2009, 05:01 PM
تحية تقدير لفن التقديم وتناسق الالوان
:good:
مساء الفل
:eat: